߁ߟߐ/ ߞߏ߫ ߜߊ߲ߠߌ߲ߝߋ߲߫ ߕߴߌ ߜߊ߲߫ ߠߊ߫ ߡߞߊ߫ ߞߎ߲߬ߠߊ߫، ߓߊߏ߬ ߞߏ߫ ߟߌ߬ߤߙߐ߬ߡߊ߬ ߦߙߐ ߟߋ߬ ߡߞߊ߫ ߘߌ߫ ߸ ߊ߬ ߣߌ߫ ߊ߬ߟߌ߬ߞߊ߯ߓߊ߫ ߜߘߍ߫ ߟߋ ߛߌ߰ߣߍ߲߫ ߊ߬ߟߌ߬ߞߊ߯ߓߊ߫ ߘߐ ߢߌ߲߬ ߞߎ߲߬ߘߐ߫ ߸ ߞߴߏ߬ ߟߋ ߞߊ߲ߡߊ߬ ߤߊߟߌ߬ ߛߊ߲ߡߊߞߎߟߎ߲߫ ߕߍ߫ ߕߊ߬ߡߌ߲߬ ߠߴߊ߬ ߞߎ߲߬ߠߊ߬.

  • ߞߵߊ߬ ߕߘߍ߬ ߜߎ ߕߎߓߊߣߍ߲ ߠߎ߬ ߦߋ߫ ߕߋ߬ߟߋ߲߬ ߠߊ߫ ߊ߬ߟߌ߬ߞߊ߯ߓߊ߫ ߡߌ߬ߛߙߌ ߞߊ߲߬ ߞߵߊ߬ߟߎ߫ ߢߊ߲߱ ߟߊ߫ ߞߵߊ߬ߟߎ߬ ߝߊ߲ ߠߊߓߋ߬. ߏ߬ ߞߐ߫ ߛߊ߲ߡߊߞߎߟߎ߲ ߦߋ߫ ߕߊ߬ߡߌ߲߬ ߠߊ߫ ߡߞߊ߫ ߞߎ߲߬ߠߊ߫ ߞߵߊ߬ ߡߊߖߊ߲ߓߊ߫ ߊ߬ ߛߊ߬ߥߏ ߟߊ߫، ߛߊ߲ߡߊߞߎߟߎ߲ ߦߋ߫ ߖߌ߬ߦߊ߬ߖߟߎߦߊ ߣߌ߫ ߖߌ߬ߦߊ߬ߕߊ ߟߎ߬ ߞߍ߫ ߟߴߊ߬ ߛߊ߬ߥߏ ߟߊ߫.

ߣߴߌ ߞߵߊ߬ ߦߋ߫ ߛߊ߲ߡߊߘߊ߲߫ ߕߍ߫ ߡߞߊ߫ ߸ ߞߣߍ߫ ߟߋ߬ ߕߴߦߋ߲߬ ߸ ߞߎ߬ߙߎ ߣߌ߫ ߞߙߎ߬ߞߓߊ ߣߌ߫ ߝߏ߲ߝߊ߲ ߜߊ߲߬ߛߊ߲߫ ߠߋ߬ ߡߞߊ߫ ߸ ߛߊ߲ߡߊߘߊ߲߫ ߕߴߛߋ߫ ߟߐ߬ ߟߊ߫ ߦߋ߲߬.

 

߂ߣߊ߲/ ߞߏ߫ ߓߌ߲߫ ߕߍ߫ ߝߍߘߍ߲ ߠߋ߬ ߡߞߊ߫ ߓߊߏ߬ ߟߌ߬ߤߙߐ߬ߡߊ߬ ߘߎ߯ ߟߋ߬.

  • ߓߌ߲߫ ߝߍߘߍ߲ߓߊߟߌߦߊ ߡߞߊ߫ ߏ߬ ߕߴߊ߬ ߟߊ߫ ߟߌ߬ߤߙߐ߬ߡߊ߬ߘߎ߰ߦߊ ߝߐ߫ ߟߊ߫، ߍ߲߬ߍ߲߬ ߛߊ߲ ߠߋ߬ ߕߍ߫ ߣߊ߬ ߟߊ߫ ߦߋ߲߬ ߏ߬ ߡߍ߲ ߓߌ߲ ߠߎ߬ ߟߊߝߍߘߍ߲߫ ߠߊ߫، ߣߴߏ߬ ߕߍ߫ ߒߠߋ ߞߊ߬ ߓߌ߲ ߝߍߘߍ߲ߣߍ߲ ߦߋ߫ ߒ ߢߊ ߟߊ߫ ߡߞߊ߫ ߘߎ߰ߞߟߏ ߞߊ߲߬.

 

߃ߣߊ߲/ ߞߏ߫ ߡߞߊ߫ ߞߣߐ߫ ߸ ߌ ߦߋ߫ ߓߌߦߊ߲ ߠߎ߬ ߦߋ߫ ߟߴߊ߬ߟߎ߬ ߘߊ ߟߊߡߊ߰ ߟߊ߫ ߟߋ߬ ߓߊ߬ߙߴߊ߬ߟߎ߬ ߦߋ߫ ߝߋ߲ ߡߍ߲ ߕߊ߬ ߞߊ߲߬ ߘߎ߱ ߡߊ߬ ߌ ߢߊ߫ ߕߴߏ߬ ߟߊ߫.

  • ߓߌߦߊ߲߫ ߖߘߍ߬ ߕߍ߫ ߡߞߊ߫ ߛߏ ߞߣߐ߫، ߓߌ߬ߟߊ߬ߝߋ߲ ߡߍ߲ ߦߋ߲߬ ߏ߬ ߟߋ߬ ߞߐ߬ߣߐ ߣߌ߫ ߢߊ߰ߙߌ ߘߌ߫،ߢߐ߬ߞߌߛߍ ߣߌ߫ ߊ߬ߟߌ߬ߞߡߊ߬ ߞߌߛߍ ߝߙߋ߬ߕߊ ߦߋ߫ ߊߙߊߓߎ ߟߎ߬ ߓߟߏ߫ ߤߖߌߘߋ߲ ߠߎ߬ ߦߴߏ߬ ߛߊ߲ ߠߊ߫ ߞߵߊ߬ ߟߛߊߙߌ߫ ߊ߬ ߞߐ߬ߣߐ ߟߎ߬ ߞߘߐ߫ ߓߍ߯ ߢߣߊ߫.

ߖߍ߯ ߞߟߏ ߣߌ߫ ߛߌ߬ߛߍ߬ ߞߟߏ ߣߌ߫ ߤߖߌߘߋ߲ ߠߎ߬ ߘߊߕߐ ߟߋ߬ ߊ߬ ߢߊ߬ߙߌ ߟߎ߬ ߓߊߟߏ ߘߌ߫ ߸ ߏ߬ ߘߐ߫ ߕߎ߬ߢߊ߬ ߕߍ߫ ߞߏ߫ ߦߋ߲߬ ߓߌߦߊ߲ ߠߎ߬ ߟߊ߫ ߝߋ߲߫ ߕߊ߬ߕߊ߬ ߕߍ߫ ߦߋ߫ ߟߊ߫ ߢߊ ߟߊ߫.

 

߄ߣߊ߲/ ߓߌߘߌ߲ ߡߍ߲ ߠߎ߬ ߦߋ߫ ߞߋߟߊ ߟߊ߫ ߡߌ߬ߛߙߌ ߟߊ߫ ߡߊ߬ߘߌߣߊ߬ ( ߕ. ߖ) ߸ ߞߏ߫ ߞߋߟߊ ߘߋ߲ߡߛߏ߫ ߝߊߕߎ߬ߡߕߊ߬ ߟߊ߫ ߓߌߘߌ߲ ߠߎ߬ ߓߐ߲ߛߐ߲ ߠߎ߫ ߟߴߏ߬ ߘߌ߫.

  • ߓߌ߬ߘߌ߲ ߏ߬ ߟߎ߬ ߦߋ߫ ߕߙߎߞߌ߫ ߡߊ߲ߛߊ ߟߊ߫ ߓߌ߬ߘߌ߲ ߠߎ߬ ߓߐߟߐ߲ ߠߎ߬ ߟߋ߬ ߘߌ߫ ߸ ߓߊߏ߬ ߊߙߊߓߎ ߟߎ߫ ߕߘߍ߬ ߓߋ߬ ߟߊ߫ ߝߘߊ߬ߝߌ߲߬ ߤߖߌߘߋ߲ ߠߎ߫ ߞߊ߲߬ ߠߋ߬ ߞߵߊ߬ߟߎ߬ ߞߍ߫ ߖߐ߲߬ ߘߌ߫ ߤߖߌ ߞߐߝߍ߬، ߊ߬ߟߎ߫ ߡߙߊ߬ߣߍ߲߫ ߕߘߍ߬ ߕߙߎߞߌ߫ ߡߍ߲ ߓߟߏ߫ ߏ߬ ߟߏ߲ ߸ ߏ߬ ߡߊ߲߬ߛߊ ߞߵߊ߬ ߟߊ߫ ߛߌ߬ߘߌ߬ߞߊ߲ ߟߊߣߊ߬ ߞߊ߬ ߡߊ߲߬ߛߊ߬ߓߌߘߌ߲߫ ߝߌ߬ߟߊ߫ ߘߏ߲߬ ߏ߬ ߣߴߊ߬ ߟߊ߫ ߖߊ߬ߡߊ ߓߟߏ߫ ߸ ߞߏ߫ ߞߵߊ߬ ߝߐ߫ ߊߙߊߓߎ߫ ߡߊ߲ߛߊ ߢߍ߫ ߸ ߞߏ߫ ߖߐ߲߬ ߠߊߡߙߊ߬ߣߍ߲߬ ߓߊ߯ ߞߍ߫ ߡߍ߲ ߓߟߏ߫ ߡߞߊ߫ ߖߡߊߣߊ ߞߣߐ߫ ߸ ߓߍ߯ ߦߴߌ ߕߊ߫ ߟߊߓߌ߬ߟߊ߬ ߦߏ߫ ߒ ߞߍߕߐ߫ ߓߌ߬ߘߌ߲ ߢߌ߲߬ ߠߎ߬ ߟߊߓߌ߬ߟߊ߬ ߟߊ߫ ߢߊ ߡߍ߲ ߛߍ߲، ߘߊ߬ߡߊ߲߬ߛߊ߫ ߊ߬ ߞߊ߬ ߓߌߘߌ߲߫ ߝߌ߬ߟߊ ߏ߬ ߟߊߓߐ߫ ߛߊ߲ߛߊ߲ ߘߐ߫ ߞߵߊ߬ߟߎ߫ ߓߌ߬ߟߊ߬، ߞߊ߬ ߓߊ߲߫ ߞߵߊ߬ ߝߐ߫ ߞߏ߫: ߓߌ߬ߕߊ ߞߐ߫ ߓߌ߬ߕߊ ߢߍ߫ ߸ ߖߐ߲߬ߧߊ߬ ߕߍ߫ ߛߎ߰ߘߎ߬ߟߊ߫ ߡߎ߬ߕߎ߲߬ ߞߎߡߊߕߍ߫ ߞߊ߬ ߤߖߌߘߋ߲߫ ߡߌ߬ߘߊ߬ ߏ߬ ߟߎ߬ ߡߍ߲ ߠߎ߬ ߦߋ߫ ߊߟߊ߫ ߟߊ߫ ߟߏ߲ߟߊ߲ ߠߎ߬ ߘߌ߫.

ߒ߬ߓߊ߬ ߓߌ߲ߘߌ߲߫ ߝߌ߬ߟߊ ߏ߬ ߟߋ ߓߎ߯ ߘߊ߫ ߞߏߛߓߍ߫ ߓߊߏ߬ ߊ߬ߟߎ߬ ߦߋ߫ ߓߙߊߞߣߍ߫ ߟߊߕߏߣߍ߲ ߠߋ߬ ߘߐ߫ ߡߍ߲ ߢߣߊߡߦߊߝߋ߲ ߠߎ߬ ߕߍ߫ ߝߊ߰ ߟߊ߫ ߡߐ߰ ߓߟߏ߫، ߞߏ߬ߣߌ߲߬ ߝߋߎ߫ ߞߋߟߊ߫ ߘߋ߲ߡߛߏ߫ ߟߊ߫ ߓߌ߬ߘߌ߲߬ ߕߍ߫ ߡߎ߰ߡߍ߫.

 

߅ߣߊ߲/ ߞߏ߫ ߊ߬ߟߌ߬ߞߊ߯ߓߊ߫ ߡߌ߬ߛߙߌ ߘߎ߰ߞߟߏ ߞߊ߬ߙߏ ߥߊߟߴߊ߬ ߢߊߘߐߛߊ߲ߠߊ߲ ߛߎ߬ߡߊ߬ߣߍ߲߫ ߢߊ ߡߍ߲ ߏ߬ ߘߌ߫ ߣߴߊ߬ ߕߍ߫ ߞߟߊߦߊ߫ ߟߊ߫ ߡߎ߰ߡߍ߫ ߸ ߞߏ߫ ߊ߬ߟߌ߬ߞߊ߯ߓߊ߫ ߟߌ߬ߤߙߐߡߊ߫ ߟߴߏ߬ ߞߍ߫ ߟߊ߫.

  • ߞߊ߬ߙߏ߬ ߜߍߡߊ߲ ߡߍ߲ ߊ߬ߟߌ߬ߞߊ߯ߓߊ߫ ߡߌ߬ߛߙߌ ߘߎ߰ߞߟߏ ߞߊ߲߬ ߣߴߊ߬ ߕߍ߫ ߞߟߊߦߊ߫ ߟߊ߫ ߕߟߋ߬ ߓߟߏ߫، ߞߊ߬ߙߏ ߏ߬ ߛߎ߮ ߢߌߣߌ߲߫ ߘߴߊ߬ ߞߊ߲ߡߊ߬ ߟߋ߬ ߸ ߊ߬ ߕߊ߯ ߘߊ߫ ߦߋ߫ ߦߎ߯ߣߊߣߌ߲߫ ߖߡߊߣߊ ߟߋ߬ ߘߐ߫ (la Grèce ) ߸ ߓߟߌߜ߭ߊ߯ߙߌ߫ ߦߴߊ߬ ߣߎߡߊ߲ ߝߍ߬ ߕߙߎߞߌ߫ ߦߴߊ߬ ߞߐߘߐ߲ ߝߍ߬، ߊ߬ ߥߊ߫ ߘߊ߫ ߦߋ߫ ߞߎ߬ߙߎ ߡߍ߲ ߘߐ߫ ߸ ߛߎ߰ߘߎ߬ߟߊ߫ ߡߊ߲߬ߛߊ ߟߎ߫ ߞߵߊ߬ߟߎ߫ ߥߞߊ߬ߟߌ߫ ߣߊ߲߬ߝߟߏ ߟߊ߫ ߞߊ߬ ߞߎ߬ߙߎ ߏ߬ ߡߎ߰ߡߍ ߛߊ߲߬ ߛߴߊ߬ ߞߊ߬ߙߏ ߘߌ߫ ߊ߬ߟߌ߬ߞߊ߯ߓߊ߫ ߞߣߐߟߊ ߡߎ߰ߡߍ ߓߐ߫، ߕߋ߬ߟߋ ߓߊ߯ ߞߟߊߦߊ߫ ߢߊ - ߊ - ߢߊ߫ ߞߟߊߦߊ ߞߛߊߞߊ % ߂ ߔߋ߫ ߟߋ ߘߏ߲߬ ߠߊ߫ ߊ߬ߟߋ߬ ߞߊ߬ߙߏ ߟߊ߫ ߸ ߊ߬ ߘߴߊ߬ ߕߐ߬ % ߉߈ ߟߊߛߊ߬ߦߌ߲߬ ߞߵߏ߬ ߞߍ߫ ߛߎߡߦߊ ߘߌ߫ ߊ߬ ߟߊ߫، ߓߊ߬ߙߌ߬ ߝߋߎ߫ ߊ߬ߟߌ߬ߞߊ߯ߓߊ߫ ߟߌ߬ߤߙߐ߬ߡߊ߬ ߕߴߊ߬ ߛߎߡߊ߫ ߟߊ߫.

 

߆ߣߊ߲/ ߞߏ߫ ߤߖߌ ߡߌ߬ߘߊ ߛߙߊߕߌ ߘߏ߫ ߟߋ߬ ߡߏ߬ߙߊ ߞߍ߫ ߘߌ߫ ߞߵߌ ߡߌ߬ߘߊ߬ ߡߞߊ߫.

  • ߞߎ߲߭ ߡߍ߲ ߊ߬ ߞߍ߫ ߟߊ߫ ߡߏߙߊ ߦߋ߫ ߡߐ߱ ߡߌ߬ߘߊ߬ ߟߊ߫ ߡߞߊ߫ ߸ ߏ߬ ߣߌ߫ ߤߖߌ ߡߌ߬ߘߊ ߣߴߊ߬ ߡߌ߬ߘߊ߬ߓߊߟߌߦߊ ߕߍ߫ ߞߋߟߋ߲߫ ߘߌ߫، ߍ߲߬ߤߍ߲߬ ߖߊ߬ߡߊ߫ ߛߊ߬ߝߌߝߌ ߟߋ߬ ߢߐ߲߯ ߓߍ߲߬ ߠߊ߫ ߡߞߊ߫ ߡߌ߬ߛߙߌ ߞߣߐ߫ ߤߖߌ ߛߋ߲߬ߝߍ߬، ߏ߬ ߘߐ߫ ߛߊ߬ ߕߴߊ߬ ߟߊ߫ ߏ߬ ߘߏ߫ ߣߌ߫ ߡߏߙߊ ߘߌ߫ ߣߊ߬، ߏ߬ ߡߏߙߊߕߐ ߓߊ߯ ߕߌ߬ߛߏ߬ ߖߊ߬ߡߊ ߘߐ߫ ߊ߬ ߘߴߊ߬ ߟߊߡߌߣߌ߲ ߡߐ߱ ߟߎ߬ ߛߐ߫ ߸ ߓߊߏ߬ ߓߍ߯ ߞߵߊ߬ ߟߐ߲߫ ߞߏ߫ ߡߏߙߊ ߢߐߛߌ ߖߍ߲ߛߍ߲߫ ߞߊ߫ ߘߌ߫ ߖߊ߲߬ߞߊߙߏ ߓߍ߯ ߘߌ߫.

ߒ߬ߓߊ߬ ߡߏߙߊ ߦߋ߫ ߡߐ߱ ߟߎ߫ ߡߌ߬ߘߊ߬ ߟߊ߫ ߛߓߊߓߎ ߡߍ߲ ߠߊ߫ ߊ߬ ߝߟߐ ߟߴߏ߬ ߘߌ߫. ߊ߬ ߝߌߟߊߣߊ߲ ߸ ߦߋ߲߬ ߛߣߍߡߊߓߊ߮ ߓߍ߯ ߡߊ߫ ߘߋ߬ߙߌ߬ ߓߊ߲ߘߦߊߟߊ߲߫ ߠߊ߫ ߞߊ߬ ߛߌ߬ ߞߊ߬ ߕߋ߬ߟߋ߲߬ ߸ ߏ߬ ߘߐ߫ ߡߍ߲ ߠߎ߬ ߡߊ߫ ߘߋ߬ߙߌ߬ ߊ߬ ߟߊ߫ ߸ߊ߬ ߛߎߡߦߊ ߘߌ߫ ߡߏߙߊ ߟߊߛߋ߫ ߏ߬ ߟߎ߫ ߡߊ߬ ߸ ߏ߬ ߟߎ߬ ߘߌ߫ ߖߊ߬ߡߊ ߓߟߏߟߊߛߐ߫، ߞߏ߬ߣߌ߲߬ ߝߋߎ߫ ߤߖߌ ߡߌ߬ߘߊ ߛߙߊߕߌ߫ ߕߍ߫.

 

߇ߣߊ߲/ ߞߏ߫ ߡߐ߱ ߘߏ߫ ߟߎ߫ ߦߋ߫ ߣߊߟߏ߲ ߠߊ߫ ߥߟߊ߫ ߞߊ߬ ߓߋ߬ ߊ߬ߟߌ߬ߞߊ߯ߓߊ߫ ߦߋ ߘߐ߫، ߏ߬ ߘߐ߫ ߞߴߏ߬ ߟߎ߬ ߟߊ߫ ߣߊ߲߬ߝߟߏ ߛߊߣߌ߲ߡߊ߲߫ ߕߍ߫.

  • ߣߊ߬ߓߊ߰ߕߐ ߘߏ߫ ߟߎ߫ ߡߊ߬ߙߏ߬ߡߊ߬ߙߏ߬ߕߐ߬ ߞߏߖߎ߮ ߣߴߊ߬ߟߎ߬ ߛߍߥߊ߫ ߞߏߖߎ߮ ߊ߬ߟߌ߬ߞߊ߯ߓߊ߫ ߜߍ߫ ߘߐ߫ ߦߋ ߘߐ߫ ߸ ߊ߬ ߣߌ߫ ߖߊ߬ߡߊ ߛߌߦߊߦߊ߫ ߞߏߖߎ߮ ߊ߬ߟߎ߬ ߢߊߞߘߐ߫ ߸ ߏ߬ ߘߌ߫ ߘߏ߫ ߟߎ߫ ߣߊߟߏ߲ ߕߊ߬ ߊ߬ߟߎ߫ ߞߊ߲߬ ߣߌ߫ ߡߍ߲ ߘߋ߬ߙߌ߬ߣߍ߲߬ ߕߍ߫ ߖߡߊ߬ ߛߎ߮ ߏ߬ ߦߋ߫ ߟߊ߫، ߣߴߏ߬ ߕߍ߫ ߊ߬ߟߌ߬ߞߊ߰ߓߊ߬ ߦߋ ߕߍ߫ ߡߐ߰ ߛߌ߫ ߝߊ߬ߕߐ߬ߦߊ߫ ߟߊ߫ ߊ߬ ߕߍ߫ ߡߐ߰ ߣߊߟߏ߲߫ ߠߊ߫.

 

߈ߣߊ/ ߞߏ߫ ߖߋ߬ߟߌ߬ߦߊ߬ ߕߍ߫ ߞߍ߫ ߟߊ߫ ߊ߬ߟߌ߬ߞߊ߯ߓߊ߫ ߟߊ߫ ߸ ߞߏ߫ ߌ ߓߴߌ ߘߊ ߟߊߞߊ߬ ߞߴߌ ߦߋ߫ ߛߏߟߌ߬ߦߋ ߝߐ߫ ߟߊ߫ ߸ ߞߏ ߘߏ߫ ߘߌ߫ ߞߴߌ ߟߊ߫.

  • ߞߎߡߊ߫ ߏ߰ ߝߐ߫ ߟߊ߫ ߟߋ߬ ߛߊ߫ ߞߊ߬ ߡߐ߱ ߟߎ߬ ߘߐߛߌߟߊ߲߫ ߘߐ߲߬ߞߟߌ߬ ߟߊ ߡߊ߬ ߓߙߊߞߣߍ߫ ߟߊߕߏߣߍ߲ ߘߐ߫ ߛߊ߫ ߡߐ߱ ߟߎ߬ ߞߊߣߵߊ߬ ߞߍ߫ ߡߣߊ߬ߡߣߊ߬ ߣߌ߫ ߘߐ߲߬ ߞߍ߬ ߦߙߐ߫ ߘߌ߫، ߣߴߏ߬ ߕߍ߫ ߡߐ߰ ߞߋߟߋ߲߫ ߔߋ߫ ߡߊ߫ ߦߌ߬ߘߊ߬ ߡߎߣߎ߲߬ ߞߏ߫ ߞߊ߬ ߡߍ߲ ߛߐ߬ߘߐ߲߬ ߏ߬ ߘߊߞߎ߲ ߘߐ߫ ߊ߬ߟߌ߬ߞߊ߯ߓߊ߫ ߟߊ߫.

 

߉ߣߊ߲/ ߞߏ߫ ߣߴߌ ߞߵߊ߬ ߦߋ߫ ߕߊ ߕߍ߫ ߞߎ߬ߙߊ߬ߣߊ ߖߋ߬ߣߌ߲߬ ߠߊ߫ ߸ ߊߟߊ߫ ߞߘߐߕߊ߬ߣߍ߲ ߞߎߡߊߞߊ߲ ߠߋ߬.

  • ߊ߲ ߕߊ߯ ߘߊ߫ ߞߎ߬ߙߣߊ߬ ߜߌ߬ߙߌ߲߬ߘߌ߬ ߦߙߐ ߡߊ߬ߘߌߣߊ߬ ߸ ߒ߬ ߞߵߊ߬ ߦߋ߫ ߞߎ߬ߙߊ߬ߣߊ ߦߋ߫ ߜߌ߬ߙߌ߲߬ߘߌ߬ ߟߊ߫ ߞߊߦߘߌ ߡߍ߲ ߞߊ߲߬ ߞߊߦߘߌ ߟߎ߬ ߘߐ߫ ߢߌߡߊ ߟߋ߬، ߊ߬ ߛߏ߬ߓߏ ߞߊ߫ ߜߌߟߌ߲߫ ߕߟߎ ߦߴߊ߬ ߟߊ߫ ߝߣߊ߫، ߊ߬ ߛߌߦߊߡߊ߲ ߓߊ߯ ߟߊ߫ ߢߐ߲߯ ߞߣߐ߫ ߸ ߕߊ ߞߍ߫ ߡߊ߲߫ ߘߌ߫ ߞߵߊ߬ ߖߋ߬ߣߌ߲߬، ߓߊߏ߬ ߊ߬ ߞߊߦߘߌ߫ ߟߊߘߊ߲ߣߍ߲߫ ߊ߬ ߞߊ߲ߡߊ߬ ߟߋ߬، ߞߏ߬ߣߌ߲߬ ߞߏ߫ ߊߟߊ߫ ߞߘߐߕߊ߬ߣߍ߲ ߞߎߡߊߞߊ߲ ߠߋ߬ ߏ߬ ߞߏߛߐ߲߬ ߕߊ߫ ߕߴߊ߬ ߖߋ߬ߣߌ߲߬ ߠߊ߫ ߸ ߏ߬ ߕߍ߫.

 

ߒ߬ߓߊ߬ ߸ ߊ߲ ߛߋ߫ ߘߊ߫ ߞߎߡߊ߫ ߞߘߐ ߡߍ߲ ߠߎ߬ ߛߍ߯ߛߍ߯ ߟߊ߫ ߒ߬ ߠߊ߫ ߤߖߌ ߛߋ߲߬ ߝߍ߬ ߞߵߊ߲ ߓߟߏ߫ ߟߴߊ߬ ߞߌ߬ߛߍ ߞߊ߲߬ ߸ ߏ߬ ߟߴߏ߬ ߘߌ߫، ߡߞߊ߫ ߟߌ߬ߤߙߐ߬ߡߊ߬ߦߊ ߣߌ߫ ߞߎ߬ߙߊ߬ߣߊ ߟߊ߫ ߝߌ߬ߛߊ߬ߡߊ߲ߒ߬ߕߋ߬ߦߊ ߘߝߊߣߍ߲߫ ߠߋ߬ ߞߐ߲ߞߐ߲߫، ߓߊ߬ߙߌ߬ ߡߍ߲ ߠߎ߬ ߦߋ߫ ߘߍ߬ߡߍ߲߬ ߘߌ߬ ߟߴߊ߬ߟߎ߬ ߟߊ߫ ߣߌ߲߬ ߢߊ߫ ߛߎ߮ ߞߊ߲߬ ߸ ߏ߬ ߟߎ߫ ߟߋ߬ ߕߍ߫ ߛߥߊ߬ߓߊ߫ ߘߌ߫.

 

ߞߊ߬ߙߊ߲߬ߝߊ ߡߏߙߌ߫ ߞߊ߬ߡߙߊ߫ ߖߐ߲߬ߡߊ߬ߛߌߣߌ߲ߟߐ߲߫ ߓߟߏ߫. ߂߀߂߆ ߤߖߌ ߟߊ߫ ߡߞߊ߫.