ߛߊߟߌߝߊ߬ߣߊ ߓߊ߲ ߛߊߟߌ߫ ߟߴߊ߲ ߓߟߏ߫ ߛߐ߬ߕߐ ߟߊ߫ ߣߊߟߌ߬ߡߎ߲߫ ߊ߬ߟߌ߬ߞߊ߯ߓߊ߫ ߘߌ߫ ߸ ߒ ߞߊ߬ ߒ ߠߊ߫ ߞߊߦߘߌ ߣߌ߫ ߒ ߠߊ߫ ߞߊ߬ߟߊ ߟߊߓߐ߫ ߞߊ߬ ߒ ߘߋ߬ߙߌ߬ ߞߏ ߘߊߡߌ߬ߣߊ߬ ߣߴߊ߬ ߦߋ߫ ߛߓߍߟߌ ߘߌ߫، ߔߊߞߌߛߑߕߊ߲ߗߍ ߡߍ߲ ߛߌ߰ߣߍ߲߫ ߒ ߘߊߝߍ߬ ߸ ߊ߬ ߞߵߊ߬ ߞߍ߫ ߒ ߡߊߝߟߍ߫ ߘߌ߫ ߛߓߍߟߌ ߘߐ߫ ߸ ߞߵߊ߬ ߕߊ߬ ߞߊߦߘߌ ߞߎ߲߭ ߠߊ߫ ߛߊ߲ߝߍ߬ ߞߊ߬ ߣߵߊ߬ ߓߌ߬ߟߵߊ߬ ߞߎ߲߭ ߠߊ߫ ߘߎ߱ ߡߊ߬ ߸ ߒ ߡߊ߫ ߒ ߓߟߏ ߟߊߟߐ߬، ߏ߬ ߘߏ߲߬ ߓߍ߲߬ ߠߊ߫ ߛߐ߲ߞߐ߫ ߂߃ ߟߋ ߡߊ߬ ߥߟߊ߫ ߛߌ߬ߕߊ߬ߙߌ߬ ߂߃ ߤߊߞߍ߫، ߟߏ߲ ߏ߬ ߕߘߍ߬ ߒ ߕߋ߬ߟߋ߫ ߛߊ߬ߓߊ߫ ߟߋ߬ ߘߌ߫ ߒ ߕߍ߫ ߛߓߍߟߌ߫ ߢߊߛߐ߬ߘߐ߲߬ ߠߊ߫، ߞߊ߲ߡߋߙߋ߲ ߞߵߊ߬ ߕߏ߫ ߝߏ߫ ߒ ߓߊ߲߫ ߘߊ߫ ߛߌ߬ߕߊ߬ߙߌ߬ ߟߊߓߊ߲ ߛߓߍ߫ ߟߊ߫، ߊ߬ ߞߊ߬ ߒ ߝߏ߬ ߊߙߊߓߎ߫ ߞߊ߲ ߘߐ߫ ߞߊ߬ ߓߐߦߙߐ߫ ߢߌߣߌ߲ߞߊߟߌ ߞߍ߫، ߞߊ߬ ߓߊ߲߫ ߞߵߊ߬ ߝߐ߫ ߞߏ߫: { ߊ߬ߟߋ߬ ߕߍ߫ ߛߓߍߟߌߟߊ߫ ߘߌ߫ ߸ ߓߊ߬ߙߌ߬ ߛߓߍߟߌ ߞߊ߫ ߣߐ߲߰ ߒߠߋ ߡߊ߬ ߘߋ߬، ߞߊ߬ ߞߊߦߘߌ߫ ߞߐߜߍ߫ ߞߋߟߋ߲߫ ߛߓߍ߫ ߌ ߡߴߌ ߓߟߏ ߘߐߟߐ߬ ߌ ߡߴߌ ߞߎ߲߬ߠߊߥߟߌ߬ ߸ ߊ߬ ߞߏ߫ ߊ߬ ߛߋ߲߬ߧߊ߬ ߝߟߐ ߟߋ ߕߋ߲߬ ߒ ߧߴߏ߬ ߡߐ߰ ߦߋ߫}. ߒߠߋ ߞߵߊ߬ ߖߋ߬ߓߌ߬ ߞߏ߫ ߒ ߧߴߊ߲ ߝߊ߬ߞߊ߲ ߠߋ߬ ߛߓߍ ߞߊ߲߬ ߕߋ߲߬، ߌ ߞߓߊߣߍ߲߫ ߒߠߋ ߡߊ߬ ߟߋ߬ ߜߊ߲ߛߊ߲߫ ߣߴߏ߬ ߕߍ߫ ߛߓߍߟߌߟߊ߫ ߥߣߊ߫ ߟߎ߫ ߊ߲ ߓߘߊ ߸ ߒߠߋ ߕߍ߫ ߛߎ߬ߘߎ߲߬ߧߊ߫ ߏ߬ ߟߎ߬ ߟߊ߫، ߊ߬ ߞߊ߲߫ ߞߏ߫ ߒ ߧߴߏ߬ ߘߏ߫ ߞߏߝߐ߫. ߒ ߞߊ߲߫ ߞߏ߫ ߞߙߊ߬ߡߐ߯ ߓߊ߬ߓߊ߫ ߖߊ߰ߣߍ߫، ߏ߬ ߓߘߊ߫ ߞߎ߬ߙߊ߬ߣߊ ߡߎ߰ߡߍ ߛߓߍ߫ ߛߋ߲߬ߧߊ߫ ߞߐ߬ߣߐ߲߬ߘߐ߫، ߊ߬ ߣߌ߫ ߛߓߍߕߊ߫ ߛߌߦߊߡߊ߲߫ ߜߘߍ߫. ߊ߬ ߞߊ߲߫ ߞߏ߫ ߡߐ߱ ߟߋ߬ ߗߍ߭ ߏ߬ ߘߌ߫؟ ߒ ߞߊ߲߫ ߞߏ߫ ߞߏߛߓߍ߫. ߊ߬ ߞߏ߫ ߞߓߊߞߏ߫...
ߊ߬ ߓߊ߲߫ ߘߊ߫ ߞߊ߬ ߒ ߢߌ߬ߣߌ߲߬ߞߊ߬ ߞߏ߫ ߒ ߠߊ߫ ߛߓߍߟߌ ߦߋ߫ ߓߏ߬ߙߌ߬ ߟߊ߫ ߟߐ߲ߠߌ߲ߦߊ ߢߌ߬ߡߊ߲߫ ߞߊ߲߬؟ ߒ ߞߏ߫ ߘߌߣߊ ߸ ߟߐ߲ߞߏ ߸ ߥߘߋ߬ߥߘߋ߬ߟߌ ߸ ߘߊ߲ߘߊߟߌ....
ߊ߬ ߞߊ߲߫ ߞߏ߫ ߒ ߓߘߊ߫ ߤߊ߬ߘߌ߬ߛߊ߬ ߞߝߊ ߘߏ߫ ߘߟߊߡߌ߬ߘߊ߬؟ ߒ ߞߊ߲߫ ߞߏ߫: ߓߎ߬ߞߊ߬ߙߌ ߣߌ߫ ߡߎߛߟߌ߬ߡߎ߲ ߣߌ߫ ߡߎ߬ߥߊ߰ߕߊ ߓߘߊ߫ ߘߟߊߡߌ߬ߘߊ߬ ߒ ߓߟߏ߫.
ߊ߬ ߞߊ߲߫ ߞߏ߫ ߒ ߞߊ߬ ߓߎ߬ߞߊ߬ߙߌ ߟߐ߲߫؟ ߒ ߞߏ߫ ߒ ߞߊ߬ ߘߏߣߍ߲߫ ߟߐ߲߫ ߊ߬ ߟߊ߫ ߞߏߢߊ ߘߐ߫. ߊ߬ ߞߏ߫ ߓߎ߬ߞߊ߬ߙߌ ߝߊ߬ ߓߘߊ ߡߌ߲߫؟ ߒ ߞߊ߲߫ ߞߏ߫ ߓߎ߬ߞߊ߬ߙߌ ߓߘߊ ߟߋ߬ ߏߖ߭ߑߓߞߌߛߑߕߊ߲߫ ߘߌ߫. ߊ߬ ߞߏ߫ ߕߎ߬ߢߊ߬. ߊ߬ ߞߊ߫ ߞߏ߫ ߤߊ߬ߘߌ߬ߛߌ ߕߟߊߣߍ߲߫ ߖߋ߬ߟߌ߬ ߘߌ߫؟ ߒ ߞߏ߫ ߝߌ߬ߟߊ߬: ߛߙߊ߬ߣߎ߲߬ ߓߛߍ ߣߌ߫ ߟߊ߬ߝߐ߬ߓߊ߰ ߛߙߊ߬ߣߎ߲. ߛߙߊ߬ߣߎ߲߬ ߓߛߍ ߟߋ߬ ߤߊߘߌߛߎ߫ ߞߎߘߑߛߌ ߘߌ߫. ߊ߬ ߞߏ߫ ߞߋߟߊ ߟߊ߫ ߛߙߊ߬ߣߎ߲ ߦߋ߫ ߖߋ߬ߟߌ߬ ߘߌ߫؟ ߒ ߞߏ߫ ߛߙߊ߬ߣߎ߲ ߞߊ߫ ߛߌߦߊ߫ ߥߊ߯ ߗߡߍ߬ ߘߌ߫، ߞߏ߬ߣߌ߲߬ ߣߵߌ ߞߊ߬ ߡߊ߬ߛߊ߬ߦߌ߬ߛߊ߬ߦߌ߲ߠߌ߲ ߓߐ߫ ߊ߬ ߘߐ߫ ߊ߬ ߣߌ߫ ߛߙߊ߬ߣߎ߲߬ ߞߋߟߋ߲ ߝߐ߫ ߞߏ߫ ߛߌߦߊߡߊ߲، ߛߙߊ߬ߣߎ߲ ߕߐ߭ ߦߋ߫ ߥߊ߯ ߕߊ߲ ߣߌ߫ ߟߎ߯ߟߎ߫ ( ߁߅ ߀߀߀) ߓߐߢߐ߲߯ߞߏ߫ ߘߌ߫. ߊ߬ ߞߏ߫ ߕߎ߬ߢߊ߬.
ߊ߬ ߞߏ߫ ߛߙߊ߬ߣߎ߲߬ ߟߍߙߊ ߟߎ߬ ߓߐߛߎ߲ ߦߋ߫ ߟߍߙߊ߫ ߖߋ߬ߟߌ߬ ߘߌ߫ ߸ ߒ ߞߏ߫ ߟߍߙߊ߫ ߁߃، ߞߊ߬ ߆ ߞߴߊ߬ߟߎ߬ ߟߌ߲ߟߌ߲ ߘߌ߫ ߸ ߞߊ߬ ߝߌ߬ߟߊ߬ ߞߴߊ߬ߟߎ߬ ߢߍߡߐ߮ ߘߌ߫ ߸ ߞߊ߬ ߞߋߟߋ߲߫ ߞߵߊ߬ߟߎ߬ ߛߟߊߕߌ߮ ߘߌ߫ ߸ ߏ߰ ߓߎ߬ߞߊ߬ߙߌ߬ ߘߌ߫.
ߊ߬ ߞߏ߫ ߒߠߋ ߞߊ߬ ߣߌ߲߬ ߓߍ߯ ߟߐ߲߫ ߘߌ߬؟ ߒ ߞߊ߲߫ ߞߏ߫ ߌ ߞߵߊ߬ߟߎ߬ ߟߐ߲߫ ߢߊ ߡߍ߲ ߒ ߝߣߊ߫ ߞߵߊ߬ߟߎ߬ ߟߐ߲߲߫ ߕߋ߲߬ ߠߋ߬، ߊ߬ ߞߊ߲߫ ߞߏ߫ ߊ߬ߟߋ ߞߵߊ߬ߟߎ߬ ߟߐ߲߫ ߘߌ߫؟ ߒ ߞߊ߲߫ ߞߏ߫ ߌ ߡߵߊ߬ߟߎ߫ ߞߊ߬ߙߊ߲߬ ߠߋ߬ ߞߵߊ߬ߟߎ߬ ߟߐ߲߫؟ ߊ߬ ߞߏ߫ ߊ߬ߥߐ߫. ߒ ߞߊ߲߫ ߞߏ߫ ߒ ߝߣߊ߫ ߞߵߊ߬ߟߎ߫ ߞߊ߬ߙߊ߲ ߠߋ߬ ߞߵߊ߬ߟߎ߬ ߟߐ߲߫. ߊ߬ ߞߊ߲߫ ߞߏ߫ ߒ ߧߋ߫ ߒ ߠߊ߫ ߝߙߍߕߍ ߘߴߊ߬ ߡߊ߬ ߸ ߞߏ߫ ߣߌ߫ ߤߖߌ ߓߊ߲߫ ߘߊ߫ ߊ߬ ߘߌ߫ ߞߏ ߓߍ߯ ߞߍ߫ ߞߊ߬ ߣߵߊ߬ ߢߊ ߟߊ߫ ߒ ߞߊ߲߬ ߡߊ߬ߟߌ߫ ߟߊ߫، ߞߊ߬ ߓߊ߲߫ ߞߵߊ߬ ߝߐ߫ ߞߏ߫: ߊ߬ߝߐ߫ ߡߞߊ߫ ߞߙߊ߬ߡߐ߮ ߟߎ߬ ߣߴߊ߬ ߡߎߝߑߕߌ ߟߎ߫ ߞߵߊ߬ ߟߐ߲߫ ߡߐ߱ ߡߍ߲ ߦߴߊ߬ߟߎ߬ ߟߊ߫ ߘߎ߰ߞߟߏ ߞߊ߲߬ ߕߋ߲߬؟ ߒߠߋ ߞߊ߲߫ ߞߏ߫ ߒ ߣߊ߬ߣߍ߲߬ ߒ ߤߖߌ ߟߋ߬ ߟߊ߫ ߒ ߡߊ߫ ߣߊ߬ ߞߏ߫ ߜߘߍ߫ ߟߊ߫. ߊ߬ ߞߏ߫ ߣߴߊ߬ ߕߎߣߎ߲߫ ߞߏ ߕߍ߫ ߊ߬ ߘߍ߬ߢߐ߮ ߠߎ߫ ߡߊ߬ ߸ ߞߴߊ߬ ߕߘߍ߬ ߘߌ߫ ߥߊ߫ ߒ ߝߍ߬ ߊ߲ ߖߌ߬ߦߊ߬ߘߊ ߟߊ߫. ߊ߬ ߞߊ߬ ߒ ߠߊ߫ ߝߙߍߕߍ ߕߊ߬ ߒ ߝߣߊ߫ ߞߵߊ߬ ߕߊ ߕߊ߬.
ߒߠߋ ߣߌ߫ ߡߊ߬ߟߌ߬ߞߊ ߡߍ߲ ߠߎ߫ ߕߘߍ߬ ߞߣߍ ߞߊ߲߬ ߦߋ߲߬ ߦߏ߫ ߊߡߙߊ߫ ߞߊ߲ߕߍ߫ ߸ ߏ߬ ߞߊ߲߫ ߞߏ߫ ߒ ߓߘߊ߫ ߡߐߣߍ ߓߐ߫ ߊ߬ߟߎ߬ ߘߐ߫ ߞߊ߬ ߝߘߊ߬ߝߌ߲߬ߧߊ ߞߎ߲߬ߠߊ߬ߦߋߙߋ߲߫، ߡߙߊ߬ߞߊ߬ߞߍ߬ ߜߘߍ ߦߋ߲߬ ߸ ߏ߬ ߞߊ߲߫ ߞߏ߫ ߒߠߋ ߘߏ߲߬ ߡߴߊ߬ ߝߐ߫ ߡߐ߰ ߢߍ߫ ߞߏ߫ ߒ ߧߋ߫ ߞߙߊ߬ߡߐ߰ ߘߌ߫؟ ߒ ߞߊ߲߫ ߞߏ߫ ߕߎ߬ߢߊ߬ ߸ ߒ ߓߊ߯ ߞߍ߫ ߞߙߊ߬ߡߐ߮ ߘߌ߫ ߟߏ߲ ߡߍ߲ ߒ ߘߴߊ߬ ߟߊߛߋ߫ ߘߎߢߊ߫ ߡߊ߬. ߊ߲ ߞߵߊ߬ ߕߐ߭ ߞߍ߫ ߦߟߍ ߘߌ߫ ߸ ߤߊߤߊߤߊ߫.
Aucun commentaire pour le moment.