ߥߊߟߖߌ ߞߊ߬ߙߊ߲߬ߡߐ߯ ߟߊ߱ߖߌ߬ ߛߎ߬ߟߋ߬ߡߊ߯ߣ ߛߘߌ߬ߓߋ߬ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߖߊ߲ߛߎߡߣߊ߫ ߛߏ߬ߟߏ߸ ߏ߬ ߟߊ߫ ߘߍ߬ߞߙߎ (ߛߌ߬ߟߡߊ߬ߦߊ ߦߋߟߋ߲) ߦߋ߫ ߞߎ߬ߙߣߊ߬ ߞߊߙߊ߲ ߠߋ߬ ߘߊߡߌ߬ߣߊ߬ ߟߊ߫ ߛߌ߬ߟߡߊ߬ ߞߊߙߏ ߕߟߋ߬ ߁߭ ߞߵߊ߬ ߛߌ߰ ߊ߬ ߕߟߋ߬ ߁߄ ߠߊ߫، ߒ߬ߓߊ߬߸ ߏ߬ ߞߎ߬ߙߣߊ߬ ߖߌ߮ ߛߊ߲߭ ߛߓߊ߬ ߣߌ߫ ߞߊߙߏ߫ ߘߊ߲ߘߐ ߟߋ߬ ߕߋ߲߬، ߊ߬ߟߎ߬ ߓߘߊ߫ ߞߎ߬ߙߊ߬ߣߊ ߡߎ߰ߡߍ ߖߌ߰ ߏ߬ ߡߍ߲ ߞߣߐ߫ ߛߋ߲߬ߢߊ߫ ߅߆߀ ߖߊ߬ߕߋ߬ ߟߊ߫߸ ߏ߬ ߡߍ߲ ߦߋ߫ ߞߍ߫ ߟߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߏߛߐ߲߬߸ ߊ߬ ߣߌ߫ ߖߐ ߣߌ߫ ߖߛߎ߬ߛߎߡߊ ߞߏߛߐ߲߬ ߖߡߊ߬ߣߊ ߦߋ߫. 

ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߏ߬ ߘߐ߫߸ ߂߀߂߆ ߘߓߊ߬ߓߌߟߊ ߕߟߋ߬ ߁߄߸ ߖߊ߬ߡߊ ߓߐ߫ ߘߊ߫ ߦߙߐ߫ ߛߌߦߊߡߊ߲߫ ߠߋ߬ ߘߐ߫ ߞߵߊ߬ߟߎ߫ ߞߎ߲߬ߛߌ߲߫ ߣߎߙߑߘߌߣ ߝߊ߲ߓߊ ߟߊ߫߸ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߟߎ ߡߊ߬ ߛߊ߲ߡߊߘߊ߲ ߞߌ߲߬ߘߊ ߟߊ߫، 

ߞߎ߬ߙߣߊ߬ ߞߊߙߊ߲ ߣߌ߲߬ ߦߋ߫ ߣߎߙߑߘߌߣ ߘߍ߬ߞߙߎ ߓߟߏ߫ ߊ߬ߟߎ߬ ߕߊ߫ ߡߊ߬ߜߍ߲ ߠߋ߬ ߘߌ߫ ߖߡߊ߬ߣߊ ߞߣߐ߫߸ ߞߵߊ߬ ߟߊߥߟߌ߬ ߟߊ߫ ߖߐ ߣߌ߫ ߖߛߎ߬ߛߎߡߊ ߣߌ߫ ߓߊߘߋ߲ߧߊ ߘߐߞߙߊ ߡߊ߬߸ ߊ߬ ߣߌ߫ ߛߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫ ߛߎߘߊ߲߫ ߊ߬ ߟߊ߫ ߡߙߌߦߊ߫ ߓߘߍ ߟߎ߬ ߘߐ߫. 

ߣߎߙߑߘߌߣ ߌߛߑߟߊߡ ߕߌ߲ߓߌߘߌ߲ߘߓߊ ߢߍߓߊ߯ ߝߟߐ߸ ߊ߬ ߣߌ߫ ߞߊ߬ߙߊ߲߬ߡߐ߯ ߛߏ߬ߟߏ ߜߋ߲߬ߘߐ߬ ߝߘߏ߬ߓߊ߬ ߞߟߊ߬ߕߌ߮߸ ߟߊ߱ߖߌ߬ ߛߋߞߎ߬ ߛߌ߬ߛߋ ߞߊ߬ ߘߏ߫ ߝߐ߫  ߞߎ߬ߙߣߊ߬ ߞߊߙߊ߲ ߢߌ߲߬ ߞߎ߲߭ ߞߊ߲߬: <<ߊ߲ ߠߊ߫ ߡߐ߰ߓߊ߸ ߊ߲ ߠߊ߫ ߥߊߟߖߌ߸ ߟߊ߱ߖߌ߬ ߛ߭ߍߞ ߛߎ߬ߟߋ߬ߡߊ߯ߣ ߛߘߌ߬ߓߋ߬߸ ߏ߬ ߟߋ ߞߵߊ߬ ߦߌߘߊߞߊ߬߸ ߞߏ߫ ߊ߬ ߦߴߊ߬ ߝߍ߬ ߞߊ߬ ߞߎ߬ߙߊ߬ߣߊ ߞߊ߬ߙߊ߲ ߘߊߡߌ߬ߣߊ߫ ߖߡߊ߬ߣߊ ߦߋ߫߸ ߞߵߊ߬ ߞߊ߬ߙߊ߲߫߫ ߖߡߊ߬ߣߊ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫، ߞߊ߬ ߓߊ߲߫ ߞߊ߬ ߞߎ߬ߙߊ߬ߣߊ ߣߌ߲߬ ߞߊ߬ߙߊ߲߫ ߛߌ߬ߟߡߊ߬ ߖߡߊ ߓߍ߯ ߟߊߘߍ߬ߣߍ߲ ߦߋ߫߸ ߞߊߕߘߍ߬ߕߍ߫ ߣߎߙߑߘߌߣ ߖߊ߬ߡߊ ߡߊ߬߸ ߓߍ߯ ߟߊߘߍ߬ߣߍ߲ ߦߋ߫ ߤߙߍ ߛߐ߬ߘߐ߲߬.>> ߢߍߓߊ߮ ߞߵߏ߬ ߦߌ߬ߘߊ߬.

ߦߊ߬ߣߌ߫ ߖߎߡߊ ߦߋ߫ ߛߊߟߌ߫߸ ߛߐ߰ ߞߍ߫ ߘߊ߫ ߞߎ߬ߙߣߊ߬ ߖߌ߮ ߕߌ߲ߞߌ ߣߌ߫ ߤߙߍߞߏ ߟߎ߫ ߦߌ߬ߘߊ߬ߟߊ߲ ߠߋ߬ ߞߊ߬ߙߊ߲ ߡߊ߬߸ ߞߊ߬ ߣߊ߬ ߕߌ߲ߞߌ߫ ߓߎ߰ߓߎ߰ߣߍ߲ ߠߎ߫ ߕߎ߲߰ ߏ߬ ߟߊ߫. 

ߥߊߟߖߌ߫ ߛߎ߬ߟߋ߬ߡߊ߯ߣ ߛߘߌ߬ߓߋ߫ ߞߊ߬ ߘߎ߬ߥߊ߬ߥߎ߬ ߞߙߍߞߙߍߣߍ߲߫ ߞߍ߫߸ ߖߡߊ߬ߣߊ ߘߌ߫ ߛߓߊ߬ߕߌ߫ ߢߊ ߡߍ߲ ߡߊ߬߸ ߖߡߊ߬ߣߊ߬ߘߋ߲ ߠߎ߬ ߘߌ߫ ߟߊߕߊ߲߬ߞߊ߬ ߢߊ ߡߍ߲ ߡߊ߬߸ ߞߵߊ߬ߟߎ߬ ߞߛߌ߫ ߞߍ߬ߟߍ ߡߊ߬. 

ߊ߬ ߛߐ߰ ߘߊ߫ ߕߌ߲ߞߌ ߡߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ <<ߞߵߊ߬ ߢߌ߬ߡߊ߫ ߖߌ߰ ߟߊ߬ߖߌ߬ߣߍ߬ߞߊ ߟߎ߫ ߞߊ߲߬߸ ߊߟߊߡߵߏ߬ ߞߍ߫ ߘߊ߫߸ ߞߵߊ߬ ߟߊߕߊ߲߬ߞߊ߫ ߞߵߊ߬ ߟߊߕߎߣߎ߲߫ ߊ߬ ߖߎ߮ ߟߎ߫ ߡߊ߬߸ ߊߟߊߡߵߏ߬ ߞߍ߫ ߘߊ߫.>> ߞߊ߬ߙߊ߲߬ߡߐ߯ ߛߏ߬ߟߏ ߞߵߏ߬ ߘߎ߬ߥߊ߬ߎ ߞߍ߫.

ߞߎ߬ߙߣߊ߬ ߞߊߙߊ߲ ߢߌ߲߬ ߣߌ߫ ߞߏ߫ ߝߌ߬ߟߊ߫ ߟߋ߬ ߜߙߊ߬ ߘߊ߫ ߓߌ߬߸ ߝߟߐߡߊ ߞߍ߫ ߘߊ߫ ߡߊߥߟߎߘߌ߫ ߞߊߙߏ ߕߟߋ߬ ߝߟߐ ߣߴߊ߬ ߖߎߡߊ߫ ߝߟߐ ߓߍ߲߬ߒ߬ߛߋ߲߬ߡߊ ߟߋ߬ ߘߌ߫߸ ߏ߬ ߡߍ߲ ߞߍ߫ ߘߊ߫ ߓߍ߯ ߞߟߌ ߘߌ߫ ߣߎߙߑߘߌߣ ߓߟߏ߫ ߊ߬ ߟߊ߫ ߡߊߥߟߎߘߌ߫ ߣߊ߬ߕߐ ߘߐ߫.

ߞߏߢߊ ߝߌߟߊߣߊ߲ ߘߐ߫߸ ߌߛߊߟߞߊ ߘߏ߫ ߕߎ߬ߓߌ߬ ߘߊ߫ ߞߊ߬ ߘߏ߲߬ ߛߌ߬ߟߡߊ߬ߦߊ ߘߐ߫߸ ߊ߬ߟߎ߫ ߞߊ߬ ߓߐ߬ߟߐ߲߬ߞߊ ߏ߬ ߡߍ߲ ߟߐ߬ ߛߙߋߕߋߕߋߦߊߟߊ߲ ߞߊ߬ߙߊ߲߬ ߠߊ߫߸ ߞߵߊ߬ ߕߐ߮ ߦߟߍ߬ߡߊ߲߫ ߞߵߊ߬ ߞߍ߫ ߤߊߖߊ߬ ߡߊߙߌߦߡߊ߫ ߘߌ߫.

ߏ߬ ߟߋ ߞߍ߫ ߘߊ߫ ߖߊ߲߬ߖߏ߲ ߞߎ߲߬ߝߊ߮ ߘߌ߫߸ ߘߎ߬ߥߊ߬ߥߎ߬ ߟߊ߬ߡߌߣߊ ߟߎ߬ ߞߐ ߘߐ߫ ߞߊ߬ߣߌ߲߬.