ߡߊ߬ߟߌ ߝߊ߰ߡߊ ߟߎ߬ ߓߘߊ߫ ߡߙߊ߬ߒ߬ߡߊ߬ߝߋ߲߬ߕߌ߮ ߟߎ߬ ߟߊ߫ ߞߙߎ ߛߌ߲߬ߝߏ߲߬ ߞߘߐ߫ ߡߐ߰ ߃߉߄ ߠߊߞߐ߯، ߊ߬ߟߎ߫ ߛߐ߲߭ ߞߐ ߘߐ߫ ߞߵߊ߬ߟߎ߬ ߟߊ߫ ߡߙߊ߬ߒ߬ߡߊ߬ߝߋ߲ ߠߎ߬ ߓߐ߫ ߊ߬ߟߎ߬ ߓߟߏ߫߸ ߊ߬ߟߎ߬ ߓߘߊ߫ ߝߊ߬ߙߊ߫ ߖߡߊ߬ߣߊ ߣߊ߲߬ߕߌ߮ ߟߎ߫ ߞߊ߲߬ ߡߎ߬ߕߎ߲߬، ߏ߬ ߡߍ߲ ߞߎߡߊ ߝߐ߫ ߘߊ߫ ߣߊ߲߬ߕߌ߰ ߘߊ߯ߘߐ ߞߎ߲߬ߕߌ߮ ߓߟߏ߫.

ߟߊ߬ߞߐ߰ߟߌ ߞߎ߲߬ߝߊ߰ߟߌ߬ ߢߊ߯ߢߊ߮ ߞߍ߫ ߘߊ߫ ߘߓߊ߬ߓߌߟߊ ߕߟߋ߬ ߄ ߠߋ߬ ߡߊ߬߸ ߕߡߎߕߎ߫ ߦߙߍߞߍߟߌ ߓߟߏߘߐߓߍ߲߫ ߕߊ߲ߓߊ߲ ߞߣߐ߫، ߊ߬ߟߎ߫ ߣߐ߬ ߞߊߙߏ߫ ߥߐ߯ߙߐ߫ ߟߋ߬ ߞߍ߫ ߟߊ߫ ߟߊ߬ߞߐ߰ߟߌ ߢߌ߲߬ ߞߊ߲߬، ߕߊ߬ߓߊ߰ߕߐ߬ ߞߎߘߊ ߟߎ߬ ߞߊ߬ ߟߊ߬ߞߐ߰ߟߌ ߘߊߡߌ߬ߣߊ߬ ߝߏ߯ ߊ߬ ߘߊߡߌߣߊ߫ ߦߙߐ ߟߋ߬ ߘߐ߫߸ ߞߵߊ߬ߟߎ߫ ߝߊ߬ߛߊ ߘߐߝߎߟߋ߲߫߸ ߞߵߊ߬ߟߎ߬ ߡߊߞߊ߬ߙߊ߲߬ߧߊ߫ ߣߊ߲߬ߕߌ߰ߦߊ ߓߊ߯ߙߊ ߟߎ߬ ߟߊ߫߸ ߊ߬ ߣߌ߫ ߦߙߍߞߍߟߌ ߣߌ߫ ߢߌߣߌ߲ߠߌ߲ ߠߎ߬ ߦߋ߫ ߞߍ߫ ߟߊ߫ ߢߊ ߡߍ߲ ߡߊ߬߸ ߞߵߊ߬ߟߎ߬ ߤߊ߲ߞߟߌ ߟߊߞߐ߯ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

ߞߎ߲߬ߝߊ߰ߟߌ߬ ߖߊ߲ߖߏ߲ ߣߌ߲߬ ߝߍ߬߸ ߖߐ߲ߓߐ߲ߕߌ߮ ߟߎ߬ ߞߵߊ߬ߟߎ߬ ߛߋߞߏߦߊ ߦߌ߬ߘߊ߫ ߡߊ߬ߘߏ߲߬ߢߐ߲߰ߠߊ߬ ߞߟߍ ߘߐ߫߸ ߞߊ߬ ߡߙߌ߬ߓߊ ߕߏ߫ ߌ ߓߟߏ߫߸ ߊ߬ ߣߌ߫ ߡߊ߬ߙߌ߬ߝߊ ߘߏ߲߬ߢߐ߲߰ߓߟߏ ߣߴߊ߬ ߓߐߢߐ߲߰ߓߟߏ߸ ߌ ߞߋߟߋ߲߫ ߠߊ߫߸ ߊ߬ ߣߌ߫ ߖߊ߬ߡߊ ߘߐ߫، ߞߊ߬ߕߎ߲߯߸ ߡߊ߬ߙߌ߬ߝߊ ߛߎ߯ߦߊ߫ ߛߌߦߊߡߊ߲߫ ߠߋ߬ ߟߐ߲ߠߌ߲ ߛߐ߬ߘߐ߲߬ߣߍ߲߫ ߊ߬ߟߎ߬ ߓߟߏ߫߸ ߔߋ.ߍߡ ߓߊ߬߸ ߔߋ.ߞߊ.ߍߡ ߓߊ߬߸ ߊ߬ ߣߌ߫ ߞߌ߬ߛߍ߬ߝߙߎ߬ߟߊ߲߫ ߜߥ ߁߂،߇߸ ߞߵߏ߬ ߟߊ߫ ߡߊ߬ߙߌ߬ߝߊ߬ ߕߋ ߕߍ߯ߕߋߟߋ߲ ߞߊ߲߬.

ߕߡߎߕߎ߫ ߦߙߍߞߍߟߌ ߓߟߏߘߐߓߍ߲߫ ߕߊ߲ߓߊ߲ ߗߋߕߌ߮߸ ߝߊߙߌ߲ ߘߊ߯ߕߌ߮ ߊߘߡߊ߫ ߞߎ߲߬ߠߊ߬ߘߌ ߥߊߕߙߊ߫ ߞߵߊ߬ ߦߌ߬ߘߊ߬ ߞߏ߫ ߟߊ߬ߞߐ߰ߟߌ ߣߌ߲߬ ߞߍߣߍ߲߫ ߣߊ߲߬ߕߌ߮ ߟߎ߬ ߟߊ߫ ߡߊ߬ߡߙߊ߬ߟߌ߬ ߛߊ߲ߘߐ ߟߊ߫ ߘߌ߬ߢߍ ߟߋ߬ ߞߣߐ߫߸ ߞߵߊ߬ ߟߊߥߌ߬ߟߌ߫ ߡߊ߬ߟߌ ߣߊ߲߬ߕߌ߮ ߟߎ߫ ߝߊ߲߬ߞߊߘߏ߲߮ ߡߊ߬ ߦߙߍߞߍߟߌ ߘߐ߫، ߊ߬ ߞߊ߬ ߟߊ߬ߞߐ߰ߟߌ߬ߟߊ ߟߎ߫ ߝߏ߬ ߊ߬ߟߎ߬ ߟߊ߫ ߢߊߟߐ߲߫ ߓߊ߯ߙߊ ߟߊ߫߸ ߊ߬ ߣߴߊ߬ߟߎ߬ ߞߍ ߞߵߊ߬ߟߎ߫ ߓߌ߬ߟߊ߫ ߟߊ߬ߞߐ߰ߓߊ߰ߕߐ ߟߎ߫ ߛߊ߬ߥߏ ߘߐ߫.

ߊ߬ ߡߊ߫ ߡߍ߲߫ ߡߎߣߎ߲߬߸ ߡߊ߬ߟߌ ߝߊ߰ߡߊ ߟߎ߫ ߕߎ߲߬ ߞߵߊ߬ ߟߊߛߋ߫ ߞߏ߫ ߊ߬ߟߎ߬ ߓߘߊ߫ ߡߐ߰ ߂߅߄ ߢߐ߲߰ ߝߣߊ߫ ߟߊߞߐ߯ ߡߙߊ߬ߒ߬ߡߊ߬ߝߋ߲߬ߕߌ߮ ߟߎ߬ ߟߊ߫ ߛߌ߲߬ߝߏ߲߬ ߞߘߐ ߢߌ߲߬ ߠߎ߬ ߘߐ߫߸ ߞߵߊ߬ߟߎ߬ ߟߊߘߏ߲߬ ߖߡߊ߬ߣߊ ߣߊ߲߬ߕߌ߮ ߟߎ߬ ߕߍߡߊ߬.