ߞߍ߲ߘߍߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߈߸ ߞߌ߬ߓߊ߬ߙߏ߬ߘߊ߬ ߛߌߦߊߡߊ߲߫ ߠߊ߫ ߟߞߊ߬ߟߌ߬ ߞߊ߲߫ ߘߐ߫߸ ߊߡߙߌߞߌ߬ ߣߌ߫ ߌߛߌ߬ߙߊ߬ߌߟߊ߫ ߞߊ߬ ߌߙߊ߲߫ ߥߊ߬ߟߏ߲߬ ߝߏߘߏ߲߫ ߜߌߟߌ߲ ߠߎ߬ ߟߊ߫، ߋߓߙߋ ߟߎ߬ ߝߣߊ߫ ߞߊ߲߫ ߞߏ߫ ߌߙߊ߲߫ ߓߘߴߊ߬ ߕߊߢߐ߲߯ߓߐ߫ ߊ߬ߟߎ߬ ߟߊ߫.

ߞߍ߲ߘߍߟߏ߲ ߣߌ߲߬ ߡߊ߬߸ ߝߏߘߏ߲߫ ߓߟߋߓߟߋ ߟߎ߫ ߟߋ߬ ߡߊ߲߬ߞߊ߲ ߡߍ߲߫ ߘߊ߫ ߌߙߊ߲߫ ߞߎߓߋߘߊ ߟߊ߫ ߕߤߋߙߊ߲߫، ߞߊ߬ ߝߘߊ߫ ߊߡߙߌߞߌ߬ ߟߊ߫߸ ߊ߬ ߣߌ߫ ߌߛߌ߬ߙߊ߬ߌߟߊ߫، ߖߌ߬ߦߊ߬ߖߟߎ ߘߏ߫ ߦߋ߫ ߘߊ߫ ߒ߬ ߓߟߏ߫ ߘߍ߬ߞߙߏߝߏ ߞߊ߲߬߸ ߡߍ߲ ߥߊߣߍ߲߫ ߝߏ߯ ߡߌ߬ߛߍ߲߬ ߛߋߦߌ߲߫ ߢߐ߲߰߸ ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߞߵߊ߬ ߦߌ߬ߘߊ߫ ߏ߬ ߘߐ߫߸ ߞߏ߫ ߊ߬ߟߎ߬ ߟߊ߫ ߖߡߊ߬ߣߊ ߟߋ߬ ߞߊ߬ ߌߙߊ߲߫ ߥߊ߬ߟߏ߲߬ ߝߋߝߋ߫߸ ߞߏ߫ ߛߌߞߊ߫ ߣߌ߫ ߕߡߊ߬ߖߌ߬ ߕߴߊ߬ ߘߐ߫߸ ߊ߬ߟߎ ߟߋ߬ ߞߊ߬ <<ߣߊ߲߬ߕߌ߰ ߦߙߍߞߍߟߌ ߛߌ߰ ߛߋ߲߬ߠߊ߫>> ߌߙߊ߲߫ ߞߊ߲ߡߊ߬.

ߊ߬ ߘߏ߲߬߸ ߛߌ߬ߣߌ߲߬ߟߏ߲ ߞߏ߲ߞߏߜߍ ߕߋ߬ߟߋ߫ ߂߇ ߡߊ߬߸ ߊߡߙߌߞߌ߬ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߡߐߣߍߣߍ߲߫ ߌߙߊ߲߫ ߞߊ߲ߡߊ߬ ߞߏߛߓߍ߫ ߞߵߊ߬ ߓߍ߲߬ ߊ߬ߟߎ߬ ߟߊ߫ ߣߎ߳ߞߑߟߍߙ ߞߏ ߡߊ߬، ߊߡߙߌߞߌ߬ ߞߊ߬ ߌߙߊ߲߫ ߥߊ߬ߟߏ߲߬ ߥߊ߲ߛߌ߲ߕߐ߲߫ ߁ߕߎߡߊ ߟߋ߬ ߡߊ߬ߟ ߏ߬ ߡߍ߲ ߦߋ߫ ߓߍ߲߬ ߠߊ߫ ߆ߕߎߡߊ ߡߊ߬ ߡߊ߲߬ߘߋ߲߬ ߖߡߊߣߊ ߟߎ߬ ߞߣߐ߫.

ߊ߲ ߞߊ߬ ߞߌ߬ߓߊ߬ߙߏ ߘߏ߫ ߟߎ߫ ߛߐ߬ߘߐ߲߫ ߞߊ߬ ߝߘߊ߫ ߌߛߌ߬ߙߊ߬ߌߟߊ߫ ߞߌ߬ߓߊ߬ߙߏ߬ߘߊ ߘߏ߫ ߟߎ߫ ߟߊ߫߸ ߞߏ߫ ߊ߬ߟߎ߬ ߟߊ߫ ߥߊ߬ߟߏ߲߬ߠߌ߲ ߛߋ߫ ߘߊ߫ ߟߋ߬ ߌߙߊ߲߫ ߞߊ߲ߕߌ߮ ߟߊ߫ ߛߓߍߘߊ ߡߊ߬، ߓߊ߬ߙߌ߬߸ ߞߏ߫ ߡߊ߫ ߞߍ߫ ߞߊ߲ߕߌ߮ ߟߊ߫߸ ߊ߬ߟߌ ߞߊߡߣߋߦߌ߫ ߝߣߊ߫ ߓߘߊ߫ ߟߊߓߐ߫ ߕߤߋߙߊ߲߫ ߞߣߐ߫ ߞߵߊ߬ ߟߊߕߊ߯ ߦߙߐ߫ ߟߊߞߊ߲ߘߊߣߍ߲߫ ߘߐ߫.

ߊ߬ߟߌ ߞߊߡߣߋߦߌ߫ ߦߋ߫ ߞߌ߲߬ߘߊ ߡߍ߲ ߠߊ߫߸ ߏ߬ ߟߎ ߞߍߛߑߝ߭ߊߙߑߘߎߛ ߘߌ߫߸ ߊ߬ߟߎ߬ ߟߊ߫ ߞߊ߲ߕߌ߯ߘߊ ߝߣߊ߫ ߦߋ߫ ߞߌ߲߬ߘߊ ߡߍ߲ ߠߊ߫߸ ߏ߬ ߟߋ ߔߊߛߑߕߍߙ ߘߌ߫، ߝߏߘߏ߲ ߛߋ߫ ߘߊ߫ ߟߋ߬ ߦߋ߲߬ ߠߎ߬ ߓߍ߯ ߘߐ߫، ߌߙߊ߲߫ ߘߎ߰ߓߊ߬ ߜߘߍ߫ ߟߎ߫ ߓߍ߫߸ ߦߏ߫ ߍߛߑߔߊߤߊ߲߫߸ ߞߐߡ߸ ߞߊ߬ߙߊߖ߭߸ ߞߍߙߑߡߊ߲ߛ߭ߊ߫߸ ߊ߬ ߣߌ߫ ߋߟߊߡ߸ ߏ߬ ߟߎ߬ ߝߣߊ߫ ߥߊ߬ߟߏ߲߬ ߘߊ߫ ߟߋ߬.

ߌߛߌ߬ߙߊ߬ߌߟߊ߫ ߞߏߕߌ߯ ߝߟߐ ߞߎߡߊ߫ ߘߴߊ߬ ߟߊ߫ ߖߡߊ߬ߣߊ߬ߘߋ߲ ߠߎ߬ ߝߍ߬߸ ߓߍ߲ߖ߭ߊߡߍ߲ ߣߋߕߦߊߤߎ߫، ߊ߬ߟߋ ߞߵߊ߬ ߟߊߛߋ߫ ߞߏ߫ ߣߊ߲߬ߕߌ߰ ߦߙߍߞߍߟߌ ߡߍ߲ ߦߋ߫ ߕߋ߲߬߸ ߊ߬ߟߎ߫ ߣߐ߬ ߊ߬ ߟߊߥߟߌ߬ ߟߊ߫ ߟߋ߬߸ ߛߊ߫ ߊߦߊߕߏߟߊ ߟߎ߬ ߟߊ߫ ߡߙߊ߬ߞߊ߲ ߘߌ߫ ߘߊߝߘߌ߫ ߢߊ ߡߍ߲ ߡߊ߬.

ߊߡߙߌߞߌߞߊ ߟߎ߬ ߟߊ߫ ߥߊ߬ߟߏ߲߬ߠߌ߲ ߛߋ߫ ߘߊ߫ ߟߋ߬ ߌߙߊ߲߫ ߘߋ߲ߡߛߏߣߍ߲ ߠߎ߬ ߟߊ߫ ߞߊ߬ߙߊ߲߬ߕߊ ߘߏ߫ ߡߊ߬ ߡߌߣߊߓ߸ ߞߊ߬ ߞߊ߬ߙߊ߲߬ߘߋ߲߫ ߡߐ߰ ߂߄ ߓߐ߬ߣߐ߫ ߊ߬ ߣߌ ߘߐ߫. ߊ߲ ߠߊ߫ ߖߊ߬ߕߋ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߌߙߊ߲߫ ߣߊ߲߬ߒ߬ߕߊ߲߬ ߃߆ ߢߐ߲߰ ߓߘߊ߫ ߓߐ߬ߣߐ߫ ߊ߬ ߣߌ ߘߐ߫.

ߌߙߊ߲߫ ߘߏ߲߬ ߝߣߊ߫ ߡߊ߫ ߕߏ߫ ߛߌ߰ ߘߐ߫߸ ߊߡߙߌߞߌ߬ ߟߊ߫ ߖߌߞߊ߲߫ ߘߊ߮ ߡߍ߲ ߦߋ߫ ߓߤߊ߬ߙߍߦߣ߸ ߊ߬ߟߎ߬ ߓߘߊ߫ ߦߋ߲߬ ߥߊ߬ߟߏ߲߬߸ ߊ߬ ߣߌ߫ ߞߏߥߍߕ ߝߣߊ߫ ߓߘߊ߫ ߥߊ߬ߟߏ߲߫ ߊ߬ߟߎ߬ ߓߟߏ߫، ߞߵߊ߬ ߟߴߊ߬ ߞߊ߲߬߸ ߊ߬ߟߎ߬ ߟߊ߫ ߥߊ߬ߟߏ߲߬ߠߌ߲ ߓߘߊ߫ ߛߋ߫ ߊߙߊߓߌ߫ ߛߊߥߎߘߌߕ ߦߙߐ ߘߏ߫ ߟߎ߫ ߝߣߊ߫ ߡߊ߬، ߊ߬ ߖߍ߬ߘߍ߸ ߏ߬ ߟߎ߬ ߞߊ߲߫ ߠߋ߬ ߞߏ߫ ߌߙߊ߲߫ ߞߍ ߞߊ߬ ߔߋߦߌ߫ ߘߋ߫ ߜ߭ߐߟߝ ߏ߬ ߟߎ߫ ߥߊ߬ߟߏ߲߬߸ ߏ߬ ߡߊ߫ ߘߌߦߴߊ߬ߟߎ߬ ߦߋ߫ ߢߊ߫ ߛߌ߫ ߡߊ߬.

ߙߎ߬ߛߌ߬ ߓߘߴߊ߬ ߞߏߢߊ ߘߐߜߏߦߊ߫߸ ߞߵߊ߬ ߦߌ߬ߘߊ߬ ߞߏ߫ ߥߊ߬ߥߎ߬ߟߋ߬ ߜߘߍ߫ ߟߋ߬ ߘߊߡߌ߬ߣߊ߬ߕߐ߫ ߝߊ߲߬ߞߣߐ ߏ߬ ߟߎ߬ ߘߐ߫ ߕߋ߲߬.