ߒߞߏ ߕߐ߲߫ ߛߌߦߊߡߊ߲߫ ߓߘߴߊ߬ ߓߟߏ ߘߌ߫ ߢߐ߲߮ ߖߌ߬ߣߍ߫ ߖߡߊ߬ߣߊ ߞߣߐ߫߸ ߞߊ߬ ߓߍ߲߬ ߒߞߏ ߛߌ߲ߘߌ ߛߊ߲߬ߞߎ߲߬ߓߍ߲ ߞߍ߫ ߞߏ ߡߊ߬ ߞߐ߬ߟߏ߲߸ ߂߀߂߆ ߞߏ߲ߞߏߘߓߌ ߕߟߋ߬ ߁߄ ߡߊ߬߸ ߁߃ߙߋ߲ ߠߊ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫ ߞߐߣߊߞߙߌ߫، ߢߌ߬ߣߊ߲߬ ߕߊ ߣߌ߲߬ ߞߍߕߐ߫ ߞߎ߲߬ߕߐ߰ߓߊ ߡߍ߲ ߞߘߐ߫߸ ߏ߬ ߟߋ: <<ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ߬ߟߌ ߞߍߍߣߍ߲߫ ߛߌ߰ߓߏ߲߬ߒ߬ߞߙߋ߬ߟߊ ߟߋ߬ ߘߌ߫>> ߢߌ߬ߣߊ߲߬ ߕߊ ߢߌ߲߬ ߣߌ߫ ߛߊ߲߭ ߕߐ߭ ߟߎ߬ ߕߊ ߡߊ߲߫ ߞߊ߲߫߸ ߓߊߏ߬ ߊ߬ ߞߍߕߐ߫ ߖߊ߲߬ߖߏ߲߫ ߕߐ߰ߡߊ߬ߛߙߋ߬ߡߊ ߟߋ߬ ߘߌ߫߸ ߒߞߏ ߛߌ߲߬ߝߏ߲߬ߘߊ ߛߌߦߊߡߊ߲߫ ߠߊ߫ ߓߍ߲߬ߡߊ ߞߣߐߡߊ߬.

ߒߞߏ ߛߓߍߟߌ ߛߌ߲ߘߌ߫ ߘߊ߫ ߁߉߄߉ ߞߏ߲ߞߏߘߓߌ ߕߟߋ߬ ߁߄ ߠߋ߬ ߡߊ߬ ߓߍ߲߬ߛߍ߬ߘߎ߯ (ߜߋ߲ߞߐ߰ߖߌ߬ߘߊ ߟߊ߫)߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫، ߊ߬ ߛߌ߲ߘߌ ߣߌ߫ ߓߌ߬ ߕߍ ߘߐ߫߸ ߟߐ߲ߞߏ ߓߏߟߏ߲ ߓߍ߯ ߦߋ߫ ߛߋ߫ ߟߊ߫ ߢߊߝߐ߫ ߟߴߊ߬ ߘߐ߫߸ ߛߋߒߞߏߟߦߊ ߣߌ߫ ߛߋߒߞߏߟߊߘߐߦߊ ߢߊߡߌߛߍ߲ ߓߍ߯ ߦߋ߫ ߛߋ߫ ߟߊ߫ ߥߘߋ߬ߥߘߋ߬ ߟߴߊ߬ ߘߐ߫، ߒ߬ߓߊ߬߸ ߟߊ߬ߛߋ߬ߟߌ߬ ߞߟߊߒߞߋ߫ ߓߘߊ߫ ߞߍ߫ ߒߞߏ ߕߐ߲ ߞߙߎ ߟߊߘߍ߬ߣߍ߲ ߓߟߏ߫ ߞߐߣߊߞߙߌ߫ ߞߎ߲ߘߊ߫߸ ߞߵߊ߬ߟߎ߬ ߞߊ߲ߠߊߘߌ߫ <<ߝߊ߬ߛߏ ߟߐ߲ߠߌ߲ߦߊ ߣߴߊ߬ ߞߊ߲ ߠߎ߬ ߞߐߡߊߓߌ߲ߓߌ߲ߓߊ߯ ߡߊߟߐ߲ߣߍ߲>> ߓߍ߯ ߟߊߘߍ߬ߣߍ߲ ߡߊ߬ ߞߐߘߍ߫، ߞߟߌߟߌ߫ ߞߋߟߋ߲ ߏ߬ ߢߐ߲߰ ߠߊߛߋ߫ ߘߊ߫ ߖߘߍ߬ߞߏ ߟߊߘߌߦߊߢߍߓߊ߮ ߟߎ߫ ߡߊ߬߸ ߝߊ߬ߛߏ ߞߊ߬ߣߌ߲߬ߓߊ߮ ߟߎ߫ ߡߊ߬߸ ߞߵߊ߬ ߕߊ߬ ߞߎ߲߬ߠߊ߬ߛߌ߰ ߞߎ߲ߘߊ߫ ߡߊ߬ ߞߵߊ߬ ߛߌ߰ ߡߌ߬ߙߌ߲߬ߘߌ ߝߣߍ߬ߝߣߍ ߟߊ߫.

ߊߟߎ߫ ߦߴߊ߬ ߟߐ߲߫߸ ߣߌ߲߬ ߕߍ߫ ߛߊ߲߬ߞߎ߲߬ߓߍ߲߬ ߢߊ߯ߢߊ߮ ߘߐߙߐ߲߫ ߘߌ߫ ߘߋ߬߸ ߊ߬ ߦߋ߫ ߝߘߊ߬ߝߌ߲߬ ߞߊ߲ ߠߎ߬ ߛߊߞߘߐߕߊ߬ ߜߙߊ ߟߋ߬ ߘߋ߫߸ ߞߊ߬ ߛߋ߫ ߝߊ߬ߛߏ߬ ߞߊ߲ ߠߎ߬ ߡߐ߬ߟߐ߲ ߟߊ߲ߞߣߍߡߊ߫ ߟߊ߫߸ ߞߊ߬ ߛߋ߲߬ߕߊ߬ ߞߍߣߍ߲ ߠߎ߬ ߢߊߝߐ߫ ߘߎߢߊ߫ ߦߋ߫، ߓߊߏ߬߸ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߓߘߊ߫ ߓߏ߲߬ߓߊ߬ ߞߍ߫ ߟߐ߲ߠߌ߲ ߞߊߡߊ߲߫ ߛߌߦߊߡߊ߲߫ ߓߊ߫ߙߊ ߘߐ߫، ߏ߬ ߘߐ߫߸ ߝߊ߬ߛߏ߬ ߞߊ߲ ߠߎ߬ ߓߘߊ߫ ߘߊ߲ߞߎ߲ ߡߍ߲ ߞߍ߫ ߝߘߊ߬ߝߌ߲߬ ߖߡߊߣߊ ߛߌߦߊߡߊ߲߫ ߞߣߐ߫߸ ߊ߬ ߕߌ߯ߕߌ߯ ߖߌ߬ߣߍ߫ ߛߌ߰ߞߊ߲ ߕߐ߲ߛߋ߲߫ ߅߲ ߣߐ߬ ߛߍߥߊ ߡߍ߲ ߠߊߘߏ߲߬ ߠߊ߫߸ ߏ߬ ߢߊ߬ߕߣߐ ߓߍߣߊ߬ ߢߊߝߐ߫ ߜߊ߬ߙߊ ߣߌ߲߬ ߘߐ߫.

ߏ߬ ߘߐ߫߸ ߒ.ߢ.ߦ.ߘ ߕߊ߬ߣߍ߲ ߞߵߊ߬ ߟߊ߫ ߟߞߝ ߞߊ߲߬߸ ߝߘߏ߬ߓߊ߬ ߞߙߏߝߏ ߕߊ߬ߣߍ߲ ߞߵߊ߬ ߟߊ߫ ߒ.ߓ.ߘ ߣߌ߫ ߒ.ߛ.ߟ.ߢ.ߘ ߞߊ߲߬߸ ߏ߬ ߟߎ߬ ߓߍ߯ ߟߊߘߍ߬ߣߍ߲ ߓߘߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬ ߞߐߣߊߞߙߌ߫ ߞߣߐ߫߸ ߛߊ߫ ߖߊ߲߬ߖߏ߲ ߣߌ߲߬ ߘߌ߫ ߛߎߘߊ߫ ߢߊ ߡߍ߲ ߡߊ߬، ߏ߬ ߟߋ ߘߐ߫߸ ߊ߬ߟߎ߬ ߞߊ߲߫ ߞߏ߫ ߝߋ߲ ߺ ߋ ߺ ߝߋ߲߫ ߣߌ߫ ߝߊ߬ ߓߘߊ ߞߊ߫ ߘߴߌ ߦߋ߫߸ ߓߍ߯ ߦߋ߫ ߢߐ߲߯ߓߍ߲߬ ߞߐߣߊߞߙߌ߫ ߂߀߂߆ ߞߏ߲ߞߏߘߓߌ ߕߟߋ߬ ߁߄ ߡߊ߬߸ ߏ߬ ߡߍ߲ ߓߍ߲߬ߕߐ߫ ߞߐ߬ߟߏ߲ ߡߊ߬، ߊ߬ ߘߏ߲߬߸ ߞߣߐ߬ߘߐ߬ߝߟߌ߬ ߕߍ߫ ߖߌ߰ߦߊ߬ߓߏ߲߬ ߞߏ ߣߌ߫ ߞߏ߫ ߡߌߛߍ߲ ߕߐ߬ߡߊ ߛߌ߫ ߘߐ߫، ߓߊߏ߬߸ ߊ߬ ߞߊ߫ ߘߌ߫ ߓߍ߯ ߦߋ߫ ߟߋ߬ ߣߌ߲߬ ߟߏ߲߸ ߝߊ߬ߛߏ߬ ߞߊ߬ߣߌ߲߬ߠߊ ߟߎ߬ ߦߋ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߝߊ߫ ߞߵߊ߬ ߘߡߊߛߙߊߓߊ ߟߊ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.