ߓߋߣߍ߲߫ ߣߊ߲߬ߕߌ߮ ߟߎ߬ ߣߐ߬ ߟߊ߬ߛߋ߬ߟߌ ߘߏ߫ ߟߋ߬ ߞߍ߫ ߟߊ߫߸ ߞߏ߫ ߊ߬ߟߎ߬ ߓߘߊ߫ « ߓߊ߰ߓߊ߰ߟߌ߬ߟߊ߬ » ߄߅ ߝߊ߰ ߞߊߙߏ߫ ߛߊ߬ߓߊ߫ ߞߎ߲߬ߕߊ߯ ߞߣߐ߫߸ ߏ߬ ߞߍ߫ ߘߴߊ߬ߟߎ߬ ߓߟߏ߫ ߓߊ߰ߓߊ߰ߟߌ ߞߍ߬ߟߍ ߦߙߍߞߍߟߌ ߘߏ߫ ߟߋ߬ ߛߋ߲߭ߝߍ߬ ߓߋߣߍ߲߫ ߞߐ߰ߘߎ߮ ߘߐ߫، ߊ߬ߟߎ߬ ߦߋ߫ ߦߙߍߞߍߟߌ ߏ߬ ߡߍ߲ ߞߟߌ߫ ߟߊ߫ ߞߏ߫ ߡߌߙߊߘߐߙ.


߂߀߂߅ ߣߍߣߍߓߊ ߣߌ߫ ߞߏߟߌ߲ߞߏߟߌ߲ ߕߍߟߊ ߘߐ߫߸ ߡߌߙߊߘߐߙ ߣߊ߲߬ߕߌ߮ ߟߎ߬ ߞߊ߬ ߓߊ߰ߓߊ߰ߟߌ߬ߟߊ߬ ߄߅ ߟߋ߬ ߓߐ߬ߣߐ߫ ߊ߬ ߣߌ ߘߐ߫߸ ߊ߬ ߣߌ߫ ߞߵߊ߬ߟߎ߬ ߕߍ߯ ߞߍ߫ ߥߐߙߐ߲ߝߌ߬ߟߊ߬ ߘߐ߫߸ ߞߊ߬ ߕߊ߯ ߏ߬ ߟߎ߬ ߘߌ߫ ߓߋߣߍ߲߫ ߞߕߌߘߊ ߟߊ߫، ߊ߬ߟߎ߬ ߓߊ߲߫ ߘߊ߫ ߝߣߊ߫ ߞߵߊ߬ߟߎ߬ ߕߍ߯ ߞߍ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߝߋ߲߫ ߛߌߦߊߡߊ߲߫ ߠߋ߬ ߘߐ߫߸ ߦߏ߫ ߔߏߔߏ ߣߌ߫ ߞߟߍ߬ ߡߎߙߊ߲ ߘߏ߫ ߟߎ߫.

ߣߊ߲߬ߕߌ߰ ߝߊ߲ߞߊ ߟߎ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬߸ ߓߋߣߍ߲߫ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߫ ߓߘߊ߫ ߢߊ߫ ߛߐ߬ߘߐ߲߬ ߢߍߕߊ߯ ߛߌߦߊߡߊ߲߫ ߡߊ߬ ߊ߬ߟߎ߬ ߟߊ߫ ߡߌߙߊߘߐߙ ߦߙߍߞߍߟߌ ߣߌ߲߬ ߛߋ߲߭ߝߍ߬߸ ߏ߬ ߡߍ߲ ߞߍ߫ ߘߊ߫ ߛߊߓߎ߫ ߘߌ߫ ߂߀߂߂ ߟߊ߫߸ ߓߋߣߍ߲߫ ߞߊ߬ ߣߊ߲߬ߕߌ߰ ߃ ߀߀߀ ߡߊߘߏ߲߬ ߊ߬ ߟߊ߫߸ ߦߊ߬ߣߌ߲߫ ߊ߬ ߦߋ߫ ߢߊ߫ ߛߐ߬ߘߐ߲߫ ߞߊ߬ ߘߏ߫ ߝߊ߬ߙߊ߫ ߏ߬ ߟߎ߫ ߤߊߞߍ ߞߊ߲߬.

ߏ߬ ߞߍ߫ ߘߊ߫ ߓߊ߰ߓߊ߰ߟߌ ߟߎ߬ ߢߍߛߌߟߊ߲ߢߍ ߟߋ߬ ߞߏߛߐ߲߬߸ ߖߐ߲߰ߛߊ߫ ߞߊ߬ ߓߊ߰ߓߊ߰ߟߌ߬ߟߊ ߟߎ߬ ߟߊߘߊ߲߬ ߛߌߟߊ߫ ߕߍ߫߸ ߊ߬ߟߎ߬ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߓߐߕߏ߲ ߠߎ߬ ߟߊ߫߸ ߟߊ߬ߛߋ߬ߟߌ߬ ߞߋߟߋ߲ ߣߌ߲߬ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߊ߬ߟߎ߬ ߟߊ߫ ߟߊ߬ߞߊ߲߬ߘߊ߬ߟߌ ߝߊ߲߬ߞߊߘߏ߲߬ߣߍ߲ ߓߋߣߍ߲߫ ߞߐ߰ߘߎ߮ ߟߋ߬ ߘߐ߫ ߕߋ߲߬.

ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߓߊ߰ߓߊ߬ߟߌ ߞߊ߫ ߛߌߦߊ߫ ߏ߬ ߡߍ߲ ߘߐ߫ ߞߊ߬ߣߌ߲߬߸ ߂߀߂߅ ߞߊߙߏ߫ ߟߊߓߊ߲ ߣߌ߲߬ ߖߍ߬ߘߍ ߟߊ߫߸ ߊߟߑߞߊߦߌߘߊ ߓߊ߰ߓߊ߰ߟߌ߬ ߞߙߎ ߟߊ߫ ߓߊ߰ߓߊ߬ߟߌ ߞߊ߬ ߝߊ߲߬ߞߊ ߛߐ߬ߘߐ߲߫ ߠߋ߬ ߦߋ߲߬߸ ߓߊߏ߬߸ ߞߏ߲ߞߏߜߍ ߕߊ߬ߡߌ߬ߣߍ߲ ߣߌ߲߬ ߡߊ߬߸ ߓߋߣߍ߲߫ ߣߊ߲߬ߕߌ߰ ߅߄ ߠߋ߬ ߝߊ߰ ߘߊ߫ ߦߋ߲߬߸ ߜߋ߲ߜߋ߲ߦߊ ߓߟߏߡߊ߬ ߖߍ߬ߘߍ߸ ߡߌߙߊߘߐߙ ߞߟߍ߬ߘߋ߲ ߠߎ߬.