ߊߡߊߘߎ߫ ߛߋߞߎ߫ ߕߎ߬ߙߋ߬ ߡߏߦߌ߫ ߘߊ߫ ߁߉߂߂ ߟߋ߬ ߟߊ߫ ߝߙߊߣߊ߫߸ ߖߌ߬ߣߍ߬ ߜߍߞߊ߲ߠߊ ߘߐ߫، ߊ߬ߟߋ ߟߋ߬ ߞߍ߫ ߘߊ߫ ߖߌ߬ߣߍ߬ ߞߊ߲ߓߍ߲ ߠߊ߫ ߖߘߍ߬ߕߌ߰ߦߊ߬ ߛߐߘߐ߲ ߛߋ߲߬ߓߊ ߣߴߊ߬ ߞߟߏߞߕߏ ߘߌ߫، ߊ߲ ߧߴߏ߬ ߟߋ ߟߊ߫ ߛߊ߬ߦߊ ߛߎ߲߬ߞߎ߲߬ߢߐ߲߮ ߘߐ߫ ߣߌ߲߬ ߓߊߘߋ߲ ߠߎ߬߸ ߡߍ߲ ߕߐ߮ ߕߍ߫ ߓߐ߫ ߟߊ߫ ߝߘߊ߬ߝߌ߲߬ߘߋ߲߫ ߥߣߍ߬ߡߊ߬ ߛߌ߫ ߦߟߌ߫ ߟߊ߫ ߡߎ߬ߕߎ߲߬߸ ߞߎߡߊߕߍ߫ ߥߙߎߞߌߟߊ߲ߘߌ ߟߎ߫ ߡߊ߬ ߝߘߊ߬ߝߌ߲߬ߠߊ߬ ߜߙߋ ߞߣߐ߫، ߊ߬ ߟߊ߫ ߘߐ߬ߝߐ ߦߋ߫ ߡߐ߰ ߟߎ߬ ߢߊߞߍ߫ ߟߊ߫߸ ߡߍ߲ ߠߎ߬ ߕߍ߫ ߝߘߊ߬ߝߌ߲ ߠߎ߬ ߟߊ߫ ߞߍߒߖߘߍߘߌ ߝߍ߬، ߏ߬ ߟߋ ߘߐ߫߸ ߛߋߞߎ߬ ߟߐ߲ߕߊ ߟߋ߬߸ ߞߵߊ߬ ߟߐ߲߫ ߝߣߊ߫ ߞߏ߫ ߛߓߊ߫ ߟߊߘߍ߲߰ߕߊ ߟߋ߬ ߦߴߊ߬ ߘߌ߫.

ߛߋߞߎ߬ ߕߎ߬ߙߋ߫ ߞߊ߬ ߞߝߊ߬ ߛߌߦߊߡߊ߲߫ ߛߓߍ߫߸ ߊ߬ ߞߍ߫ ߘߊ߫ ߥߎ߬ߦߊ߲߬ߞߟߌ߬ߟߊ߬ߓߊ߫ ߟߋ߬ ߘߌ߫߸ ߡߍ߲ ߕߎ߲߬ ߕߍ߫ ߛߌߟߊ߲߫ ߠߊ߫ ߡߎ߰ߡߍ߫، ߊ߬ߟߋ ߟߋ߬ ߞߵߊ߬ ߝߐ߫ ߝߊ߬ߙߊ߲߬ߛߌ߬ ߟߊ߫ ߗߋߘߋ߲ ߘߏ߫ ߖߋ߬ߓߌ ߘߐ߫߸ ߏ߬ ߣߐ߬ ߊ߬ ߢߌ߬ߣߌ߲߬ߞߊ߬ ߟߊ߸ ߞߵߊ߬ ߓߍ߲߬ ߊ߬ ߟߊ߫ ߞߊ߬ߙߊ߲ ߞߛߊߞߊ ߡߊ߬، ߊ߬ ߞߵߊ߬ ߝߐ߫ ߞߏ߫ ߊ߬ߟߋ ߞߊ߬ߙߊ߲߬ ߘߊ߫ ߡߐ߰ߦߊ ߣߌ߫ ߖߘߍ߬ߟߐ߲ ߞߊ߬ߙߊ߲߬ߕߊ ߟߋ߬ ߟߊ߫، ߏ߬ ߟߋ ߞߵߊ߬ ߞߍ߫߸ ߊ߬ ߛߎߥߊ߲ߘߌ߫ ߘߊ߫ ߞߵߊ߬ ߞߍ߫ ߖߡߊ߬ߣߊ ߕߐ߰ߕߐ߰ߟߌ߬ ߘߍߘߊ ߓߍ߯ ߝߘߏ߬ߓߊ߬ ߞߟߊ߬ߕߌ߮ ߘߌ߫، ߛߊ߲߬ ߞߋߟߋ߲ ߏ߬ ߟߊߓߊ߲ ߠߊ߫߸ ߊ߬ ߞߍ߫ ߘߊ߫ ߊߝߙߌߞߌ߬ ߝߘߊ߬ߝߌ߲߬ߠߊ߫ ߓߊ߯ߙߟߊ ߟߎ߬ ߟߊ߫ ߕߐ߰ߕߐ߰ߟߌ ߞߎ߲߭ ߘߍ߬ߘߊ (ߎ߳ߣߌߦߐ߲ ߖ߭ߣߋߙߊߟ ߘߍ߬ ߕߙߊߝ߭ߊߦߍ߳ߙ ߘߴߊߝߙߌߞ ߣߎߥߊߙ) ߝߣߊ߫ ߝߘߏ߬ߓߊ߬ ߞߟߊ߬ߕߌ߮ ߘߌ߫.

ߛߋߞߎ߬ ߕߎ߬ߙߋ߬ ߞߵߊ߬ ߟߊ߫ ߡߐ߰ߓߊ߬ߦߊ ߘߊߡߌ߬ߣߊ߬߸ ߞߊ߬ߦߌ߯ ߊ߬ ߦߋ߫ ߝߎߣߎ߲ߞߋ߫ ߘߌ߫، ߝߏ߫ ߊ߬ ߞߊ߬ ߞߎ߲߬ߜߙߊ߬ ߓߟߋߓߟߋ ߟߎ߬ ߢߣߊߓߊ߯ߦߊ߫ ߘߎߢߊ߫ ߞߣߐ߫، ߊ߬ ߣߴߊ߬ ߟߊ߫ ߓߐ߬ߟߐ߲߬ߞߊ߬ ߝߟߐ ߝߘߊߣߍ߲ ߞߐ߫߸ ߘߋ߲ߡߛߏ ߘߏ߫ ߕߎ߲߬ ߦߋ߫ ߟߊ߱ߖߌ߬ ߛߋߞߎ߬ ߞߓߊ߬ ߓߘߊ ߟߊ߬ߡߐ ߘߐ߫ ߞߊ߲ߞߊ߲߫ ߛߏ ߞߣߐ߫߸ ߛߟߊߕߌ߯ ߘߎ߳ߔߑߟߊ߲ߕߌߦߋ߫ ߣߌ߫ ߓߐ߬ߟߐ߲߬ߞߊ߫ ߞߊߛߌߦߊ߫ ߞߙߏ߬ߡߊ߬ ߟߎ߬ ߘߋ߲ߡߛߏ߫߸ ߏ߬ ߘߌ߫ ߘߴߊ߬ ߡߊ߬ ߝߘߎ߫ ߟߊ߫߸ ߣߊߟߌ߬ߡߎ߲߫ ߓߐ߬ߟߐ߲߬ߞߊ߫ ߊ߲ߘߙߋ߫ ߘߎ߳ߔߑߟߊ߲ߕߌߦߋ߫ ߘߌ߫߸ ߣߴߊ߲ ߓߍ߯ ߟߊߘߍ߬ߣߍ߲ ߦߴߊ߬ ߞߟߌ߫ ߟߊ߫ ߞߏ߫ ߊ߲ߘߙߋ߫ ߕߎ߬ߙߋ، ߊ߬ ߕߐ߯ ߓߘߍ ߟߋ߬ ߊ߲ߘߙߋ ߘߎ߳ߔߑߟߊ߲ߕߌߦߋ߫ ߘߌ߫، ߊ߬ ߣߴߏ߬ ߝߘߎ߫ ߘߊ߫ ߢߐ߲߮ ߡߊ߬ ߁߉߅߃ ߟߋ߬ ߟߊ߫ ߓߟߏߞߓߊ ߕߎ߬ߡߊ ߟߊ߫.

ߊ߬ ߞߊ߬ ߓߋߟߋ߲ߠߊ߫ ߢߊ߬ߡߊ߲߬ߡߊ ߘߏ߫ ߞߍ߫ ߁߉߅߈ ߘߓߊ߬ߓߌߟߊ ߕߋ߬ߟߋ߫ ߂߅ ߡߊ߬߸ ߞߵߊ߬ ߛߐ߬ߘߐ߲߬ ߘߋߜ߭ߏߟ ߦߋ߫ ߓߐߒߡߊߟߌ ߟߊ߫ ߖߌ߬ߣߍ߫ ߖߡߊ߬ߣߊ ߞߣߐ߫߸ ߊ߬ ߞߵߊ߬ ߝߐ߫ ߘߋߜ߭ߏߟ ߛߌ߰ߣߍ߲ ߢߣߊ߫ ߏ߬ ߟߏ߲ ߠߋ߬߸ ߞߏ߫ ߖߌ߬ߣߍ߬ ߕߴߊ߬ ߖߘߍ߬ ߟߐ߲߫ ߤߙߐ߫ ߘߌ߫߸ ߝߊ߬ߣߌ߫ ߝߘߊ߬ߝߌ߲߬ ߖߡߊ߬ߣߊ߬ ߞߋߟߋ߲߫ ߦߋ߫ ߖߐ߲߬ߧߊ߬ ߖߟߎ ߘߐ߫، ߓߊߏ߬߸ ߞߏ߫ ߖߌ߬ߣߍ߬ ߦߋ߫ ߝߘߊ߬ߝߌ߲߬ߠߊ߬ ߜߙߋ߫ ߞߎߘߎ߲߫ ߞߋߟߋ߲߫ ߠߋ߬ ߘߌ߫߸ ߡߍ߲ ߠߊ߫ ߞߏ ߟߎ߬ ߕߴߛߋ߫ ߕߊ߯ ߟߊ߫ ߕߐ߭ ߟߎ߬ ߞߐ߫، ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߘߐ߱ ߞߊ߫ ߝߌ߬ߛߊ߫ ߒ߬ߠߎ߬ ߦߋ߫ ߞߊ߲ߠߊߓߌߟߊ ߘߐ߫߸ ߞߊ߬ ߕߊ߬ߡߌ߲߬ ߡߍ߲ߘߌߦߊ ߟߊ߫ ߖߐ߲߬ߧߊ ߘߐ߫، ߏ߬ ߘߐ߫߸ ߞߏ߫ ߖߌ߬ߣߍ߬ߞߊ ߣߊ߬ߕߊ ߦߋ߫ ߡߍ߲ ߘߌ߫߸ ߏ߬ ߟߋ ߖߘߍ߬ߕߌ߰ߦߊ ߘߌ߫߸ ߝߘߎ ߡߍ߲ ߓߊ߯ ߞߍ߫ ߊ߬ߟߎ߬ ߣߌ߫ ߝߊ߬ߙߊ߲߬ߛߌ߬ ߕߍ߫߸ ߞߏ߫ ߞߵߏ߬ ߛߊ߬ ߌߞߘߐ߫، ߊ߬ ߛߋ߫ ߘߊ߫ ߣߌ߲߬ ߓߍ߯ ߝߐ߫ ߟߊ߫ ߝߊ߬ߙߊ߲߬ߛߌ߬ ߞߊ߲ߕߌ߮ ߢߣߊ߫߸ ߤߊߟߵߊ߬ ߡߊ߫ ߕߊ߲߬ߕߊ߲߬ ߜߊ߲ߛߊ߲߫.

ߘߋߜ߭ߏߟ ߞߵߊ߬ ߟߊ߫ ߞߎߡߊ ߏ߬ ߖߋ߬ߓߌ߬ ߞߎߡߊ߫ ߞߘߐߡߊ ߘߏ߫ ߟߊ߫߸ ߞߏ߫ ߣߌ߫ ߖߌ߬ߣߍ߬ ߦߋ߫ ߘߍߒߖߘߍߟߦߊ ߟߋ߬ ߝߍ߬߸ ߊ߬ ߦߋ߫ ߞߊ߯ߙߌ ߕߊ߬، ߝߊ߬ߙߊ߲߬ߛߌ߬ ߕߍ߫ ߜߟߍ߬ߦߊ߬ ߛߌ߫ ߓߌ߬ߟߴߊ߬ ߘߐ߫߸ ߏ߬ ߞߐ߬ߣߌ߲ ߞߐߝߟߌ ߦߴߊ߬ ߕߊ߫ ߞߏ߫ ߜߘߍ߫ ߟߋ߬ ߘߌ߫ ߖߌ߬ߣߍ߬ߞߊ ߟߎ߫ ߞߊ߲߬߸ ߊ߬ ߣߌ߫ ߝߊ߬ߙߊ߲߬ߛߌ߬ ߝߣߊ߫ ߞߊ߲߬߸ ߞߏ ߞߏ߬ߣߌ߲ ߘߌߡߊ߲߫ ߘߏ߫ ߟߊ߫ ߘߏ߫ ߘߌ߫.

ߘߋߜ߭ߏߟ ߓߐ߫ ߘߊ߫ ߛߊ߲ߖߌ߫ ߓߐߙߐ߲ߘߐ ߟߋ߬ ߞߘߐ߫߸ ߞߊ߬ ߕߊ߯ ߘߏ߬ߓߏ߲߬ߘߌ߬ ߛߊ߲ߡߊߞߎߟߎ߲ߘߊ߲ ߠߊ߫߸ ߞߊ߬ ߘߊ߬ߞߊ߯ߙߎ߫ ߡߊߜߍ߲߫، ߏ߬ ߞߍ߫ ߘߊ߫ ߘߓߊ߬ߓߌߟߊ ߕߋ߬ߟߋ߫ ߂߆ ߟߋ߬ ߡߊ߬.

ߛߋߞߎ߬ ߕߎ߬ߙߋ߫ ߘߏ߲߬ ߛߋ߫ ߘߴߊ߬ ߟߐ߬ ߟߴߊ߬ ߟߐ߬ ߦߌߟߊ߸ ߝߏ߫ ߞߊ߯ߙߌ ߛߎߘߊ߲߫ ߘߊ߫ ߖߌ߬ߣߍ߬ ߞߣߐ߫߸ ߕߎߟߊߝߌ߲ ߕߋ߬ߟߋ߫ ߂߈ ߞߊ߲ߘߟߌ ߝߍ߬، ߞߊ߬ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߖߏ߲߬ߖߏ߲ ߠߊߦߟߍ߬ ߞߏ߲ߓߌߕߌ߮ ߕߋ߬ߟߋ߫ ߂ ߡߊ߬߸ ߁߉߅߈ ߠߊ߫.

ߛߋߞߎ߬ ߕߎ߬ߙߋ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߡߴߊ߬ ߕߏ߫ ߛߟߊߕߌ߯ߦߟߊ ߟߎ߬ ߘߐ߫ ߝߋߎ߫، ߊ߬ ߞߊ߬ ߛߍ߬ߘߏ߲ ߞߍ߫ ߝߘߊ߬ߝߌ߬ߠߊ߫ ߖߡߊ߬ߣߊ߬ ߛߌߦߊߡߊ߲߫ ߠߋ߬ ߞߣߐ߫߸ ߦߏ߫ ߞߊߡߋߙߎߣ ߣߌ߫ ߊߟߌߖ߭ߋߙߌ߫، ߊ߬ ߞߊ߬ ߔߊ߬ߕߙߌߛ ߟߎߡߎ߲ߓߊ߫ ߝߊ߰ ߞߏ ߘߐߜߏߦߊ߫ ߟߋ߬ ߁߉߆߁ ߠߊ߫ ߔߛߐߞߐ߫، ߊ߬ ߘߏ߲߬ ߞߍ߫ ߘߊ߫ ߞߊ߲ߞߋߟߋ߲ߕߌ߮ ߟߋ߬ ߘߌ߫ ߞߵߊ߬ ߟߐ߬ ߜ߭ߊ߯ߣߊ߬ ߞߊ߲ߕߌ߯ ߒߞߎߥߊߡߍ߫ ߞߎ߬ߙߎߡߊ߬ ߡߊ߬߸ ߏ߬ ߡߍ߲ ߜߍ߲߫ ߘߊ߫ ߞߊ߲ߕߌ߯ߦߊ ߟߊ߫ ߞߊ߬ߝߏ߬ ߖߊߛߏ߲ ߘߏ߫ ߛߋ߲߭ߝߍ߬ ߁߉߆߆ ߟߊ߫߸ ߝߏ߫ ߞߵߊ߬ ߞߍ߫ ߊ߬ ߞߊ߲ߕߌ߯ߢߐ߲߮ ߘߌ߫ ߖߌ߬ߣߍ߬ ߞߣߐ߫ ߦߊ߲߬، ߊ߬ ߞߊ߬ ߊߡߌߞߊߟ ߞߊߓߙߊߟ ߘߍ߬ߡߍ߲߬ ߞߏߛߓߍ߫.

ߛߋߞߎ߫ ߕߎ߬ߙߋ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߠߊ߫ ߖߊ߲߬ߞߊߙߏ ߡߊ߫ ߛߌߦߊߦߊ߫، ߒ߬ߓߊ߬߸ ߁߉߈߄ ߕߙߊߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߊ߬ ߞߊ߬ ߕߟߋ߬ߓߋ߬ ߊߝߙߌߞߌ߬ ߕߐ߰ߕߐ߰ߟߌ߬ ߗߋߘߋ߲ ߠߎ߬ ߟߊ߫ ߝߘߏ߬ߓߊ߬ ߜߙߊ ߞߎ߲߬ߠߊߛߌ߰ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫ ߞߐߣߊߞߙߌ߫߸ ߊ߬ ߕߏ߫ ߘߊ߫ ߞߎߡߊ ߟߊ߫ ߜߊ߬ߙߊ ߏ߬ ߟߋ ߞߎ߲߭ߝߊ߰ ߟߏ߲߸ ߡߛߌ߬ߡߛߌ ߞߊߘߌ߫ ߘߴߊ߬ ߞߎ߲߬ߠߊ߫߸ ߞߊ߬ ߡߙߌ߬ߡߙߊ ߘߏ߲߬ ߊ߬ ߝߊ߬ߘߌ ߘߐ߫، ߞߊ߬ ߕߊ߬ߡߌ߲߬ ߘߌߡߌ߲ ߥߙߊ߬ ߟߊ߫ ߕߎ߲߫، ߊ߬ ߞߐߛߊ߬ߦߌ߲ ߛߋ ߡߊ߲߬ߛߊ߬ ߞߎߓߋ ߟߊ߫߸ ߊ߬ ߕߏ߫ ߘߊ߫ ߘߊߥߎ߲ߠߌ߲ ߠߋ߬ ߟߊ߫߸ ߘߌߡߌ߲ ߝߊ߲߬ߞߊ ߥߙߊ߬ ߘߊ߫ ߞߏߖߎ߯ߦߊ߫߸ ߝߏ߫ ߊ߬ ߞߊ߬ ߖߋ߬ߟߌ߬ ߞߍ߲ߘߍ ߝߣߐ߫، ߏ߬ ߞߵߊ߬ ߝߊ߬ߘߌ ߘߐߝߊ߰ ߞߵߊ߬ ߟߊ߲߰ߝߏ߲߬.

ߊߓߘߎߟߊߦߌ߬ ߕߎ߬ߙߋ ߡߍ߲ ߕߘߍ߬ ߞߐߞߊ߲ߞߏ ߟߎ߬ ߞߏߕߌ߮ ߘߌ߫ ߕߎ߬ߡߊ ߏ߬ ߟߊ߫߸ ߏ߬ ߣߴߊ߬ ߘߍ߬ߢߐ߲߰ ߘߊ߲ߘߊߟߌߟߊ ߟߎ߫ ߞߊ߬ ߡߊ߬ߙߐߞߎ߲߬ ߡߊ߲߬ߛߊ߬ ߤߛߊߣ ߝߌߟߊߣߊ߲ ߞߟߌ߫߸ ߏ߬ ߝߣߊ߫ ߞߊ߬ ߡߊ߲߬ߛߊ߬ ߝߊ߯ߘߌ߬ ߞߟߌ߫ ߛߎ߰ߘߎ߬ߟߊ߫߸ ߞߊ߬ ߛߊ߲ߡߊߞߎߟߎ߲ ߗߋ߫ ߞߊ߲ߕߌ߯ ߛߋߞߎ߬ ߕߎ߬ߙߋ߫ ߕߊ߬ ߞߊ߲ߡߊ߬߸ ߞߵߊߡߙߌߞߌ߬ ߡߊߜߍ߲߫߸ ߊ߬ ߟߊ߫ ߛߐ߲߬ߘߌߡߌ߲ ߘߊ߲ߘߊ߫ ߞߊ߲ߡߊ߬، ߊ߬ ߟߊߘߏ߲߬ߕߐ ߊ߬ ߘߐߓߛߏ߫ ߞߊ߲ߡߊ߬߸ ߊ߬ ߞߵߊ߬ ߝߐ߫ ߞߏ߫ ߡߐ߰ߣߍ߲ ߦߋ߫ ߡߙߌߘߐ ߕߊ߬ߓߊ߮ ߟߋ߬ ߘߌ߫߸ ߊߟߊ߫ ߟߋ߬ ߞߏ ߟߊߕߍ߰ߓߊ߮ ߘߌ߫.

ߓߊ߬ߙߌ߬ ߥߊߦߌߞߊ߫߸ ߡߊ߲߬ߖߎ߫ ߕߎ߬ߙߋ߬ ߣߌ ߡߌ߬ߘߊ߬ ߘߊ߫ ߁߉߈߄ ߕߙߊߓߊ ߕߋ߬ߟߋ߫ ߂߆ ߟߋ߬ ߡߊ߬߸ ߂߁ߙߋ߲߂߃، ߊ߬ ߛߊ߲߬ߞߊ ߟߊߕߋ߬ ߘߊ߫ ߖߌ߬ߣߍ߬ߞߊ ߟߎ߬ ߟߊ߫ ߕߙߊߓߊ ߕߋ߬ߟߋ߫ ߂߇ ߟߋ߬ ߡߊ߬߸ ߛߐ߰ߡߊ߬ߘߊ ߆ߙߋ߲ ߡߌ߬ߛߍ߲߬ ߃߀߸ ߟߊ߲߱ߛߣߊ߬ ߓߋߦߊߝ߭ߏߖߌ߫ ߞߵߊ߬ ߛߊ߲߬ߞߊ ߟߊߕߋ߬߸ ߏ߬ ߡߍ߲ ߕߍ߬ߘߍ߫ ߞߏߕߌ߯ ߝߟߐ ߘߌ߫.

ߟߊ߲ߛߣߊ߬ ߓߋߦߊߝ߭ߏߖߌ߫ ߟߋ߬ ߓߌ߬ߟߊ߬ ߘߴߊ߬ ߣߐ߭ ߘߐ߫ ߞߊ߲ߕߌ߯ߦߊ ߟߊ߫، ߓߊ߬ߙߌ߬߸ ߞߏ߲ߞߏߘߌ߬ߓߌ ߕߋ߬ߟߋ߫ ߃߸ ߂ߙߋ߲ ߡߊ߬߸ ߣߊ߲߬ߕߌ߮ ߟߎ߬ ߞߊ߬ ߞߟߍ߬ ߡߎ߬ߙߊ߲߬ ߜߌߟߌ߲ ߠߎ߬ ߟߊߓߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߝߊ߲߬ߞߊ ߕߊ߬، ߟߊ߲߬ߛߣߊ߬ ߞߐ߲ߕߍ߬ ߟߋ߬ ߞߍ߫ ߘߊ߫ ߞߊ߲ߕߌ߮ ߘߌ߫ ߛߊ߫.

ߓߊߘߋ߲ ߠߎ߬ ߛߋߞߎ߬ ߕߎ߬ߙߋ߬ ߟߊ߫ ߖߊ߲߬ߖߏ߲ ߕߍ߫ ߓߊ߲߫ ߟߊߞߊ߬ߟߌ߬ ߟߊ߫ ߝߘߊ߬ߝߌ߲߬ߠߊ߬ ߡߞߊߘߊ߲ ߘߐ߫߸ ߊ߬ ߣߌ߫ ߥߎ߬ߦߊ߲߬ߞߌ߬ߟߌ ߟߌߟߌ߲ ߓߊ߲ߓߊ߲ ߘߐ߫ ߢߊ ߓߍ߯ ߘߏ߫ ߡߊ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.