ߕߎ߲ߓߊ߬ ߖߊ߬ߞߌ߬ߕߋ߫ ߛߎ߬ߞߏ ߞߍ߫ ߘߊ߫ ߖߌ߲ߘߊ߲߫ ߓߟߋߓߟߋ ߟߋ߬ ߘߌ߫

ߡߐ߱ ߥߊ߯ ߦߙߌߞߊ߫ ߟߋ߬ ߓߐ߫ ߘߊ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬߸ ߞߵߊ߬ߟߎ߫ ߞߎ߲߬ߛߌ߫ ߓߜ߭ߊ߬ߝߍ߬ߦߊ߫ ߟߊ߫߸ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߓߊߘߍ߫ ߞߊ߲ߡߊ߬߸ ߊ߬ߟߋ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߢߍߡߌߘߊ߫ ߡߎߛߊ߫ ߘߊ߬ߘߌߛ ߞߡߊ߬ߙߊ߬ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲߸ ߣߴߊ߬ ߛߊ߬ ߘߊ߫ ߞߐߣߊߞߙߌ߫ ߕߙߊߓߊ ߕߋ߬ߟߋ߫ ߂߅ ߕߊ߬ߡߌ߲߬ߣߍ߲ ߡߊ߬߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߥߛߎ ߟߊ߫.

ߓߌ߬ ߛߌ߬ߣߌ߲߬ߟߏ߲ ߞߍ߫ ߘߴߊ߬ ߕߊ߫ ߟߊ߬ߡߊ߯ ߟߋ߬ ߘߌ߫ ߓߜ߭ߊ߬ߝߍ߬ߦߊ߫ ߞߣߐ߫، ߛߏ ߣߌ߲߬ ߡߍ߲ ߦߋ߫ ߖߌ߬ߣߍ߬ ߣߌ߫ ߡߊ߬ߟߌ ߓߐߕߏ߲ ߠߊ߫ ߞߎߘߍ߫ ߘߊ߲ߘߐ߫ ߢߐ߲߰ ߠߊ߫. ߞߊ߬ߦߌ߯ ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߖߊ߬ߡߊ ߓߐ߫ ߘߊ߫ ߟߊ߬ߡߌ߬ߣߌ߲߬ ߖߡߊߣߊ ߟߎ߬ ߘߐ߫߸ ߊ߬ ߣߌ߫ ߟߊ߬ߡߌ߬ߣߌ߲߬ ߛߏ ߟߎ߬ ߞߣߐ߫، ߕߋߙߌ ߟߎ߬߸ ߞߊ߬ߣߌ߲߬ߢߐ߲߮ ߠߎ߬߸ ߘߏ߲߬ߛߏ ߟߎ߬߸ ߥߊߛߏߟߏ߲߫ ߖߡߊߣߊ ߟߎ߬߸ ߖߋ߬ߕߘߎ߫ ߘߎ߰ ߁߃߸ ߏ߬ ߟߎ߬ ߓߍ߯ ߟߋ߬ ߛߣߍ߫ ߘߊ߫ ߖߊ߲߬ߖߏ߲ ߣߌ߲߬ ߘߐ߫، ߟߊ߬ߞߙߐ߬ߛߟߌ߬ ߓߟߏ ߡߊ߬߸ ߣߊ߬ ߞߎ߲߬ ߞߋߟߋ߲߫ ߔߋ߫ ߟߋ߬ ߓߍ߯ ߟߊ߫߸ ߏ߬ ߟߋ ߕߎ߲ߓߊ߬ ߡߊߟߐ߭ ߘߌ߫ ߊ߬ ߖߌ߰ߦߘߊ߬ ߟߊ߬ߓߊ߲ ߠߊ߫.

ߓߜ߭ߊ߬ߝߍ߬ߦߊ߫ ߓߐߟߐ߲ ߣߴߊ߬ ߓߐߟߐ߲ߓߐߟߐ߲ ߠߎ߬ ߝߊ߫ ߘߊ߫ ߟߋ߬ ߓߌ߬߸ ߛߎ߬ ߘߎߣߎ߲ ߠߎ߬ ߝߐ ߦߴߌߘߐ߫߸ ߞߊ߬ ߛߎ߬ߣߎ߲ ߕߐ߰ߡߊ߬ߛߙߋ ߟߊ߲ߞߣߍߡߊ߫ ߕߟߏ ߣߌ߫ ߛߣߐ߬ߡߍ ߟߎ߬ ߘߐ߫، ߓߌ߬ ߕߋ߬ߟߋ ߞߍ߫ ߘߊ߫ ߟߋ߬߸ ߞߊ߬ ߡߊ߲߬ߘߋ߲߬ߞߊ߬ߦߊ ߣߌ߫ ߥߊߛߏߟߏ߲ߞߦߊ ߘߌߦߊߘߏ߲߬ ߣߊ߬ߓߊ߮ ߟߎ߬ ߘߐ߫.

ߘߟߊߛߎ߲ߓߎߟߌ ߟߎ߬ ߞߍ߫ ߘߊ߫߸ ߣߊ߬ߓߊ߮ ߟߎ߫ ߛߙߊ߬ߣߎ߲߬ ߘߊ߫߸ ߖߊ߰ ߕߎ߲ߓߊ߫ ߞߏ ߞߊ߬ ߖߌ߬ߣߍ߬ ߞߐߛߊ߬ߥߏ߫ ߟߋ߬.

ߖߌ߬ߣߍ߫ ߣߊ߲߬ߕߌ߰ ߞߘߐ ߣߌ߫ ߡߎߛߊ߫ ߘߊ߬ߘߌߛ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲߸ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߊ߬ ߛߊ߬ ߘߊ߫ ߕߙߊߓߊ ߕߋ߬ߟߋ߫ ߂߅ ߟߋ߬ ߡߊ߬߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߥߛߎ ߟߊ߫ ߞߐ߰ߦߊ߬، ߓߊߏ߬߸ ߓߌ߬ߟߊ߬ ߞߍ߫ ߘߴߊ߬ ߞߐ߫ ߂߀߀߉ ߕߎߟߊߝߌ߲ ߕߋ߬ߟߋ߫ ߂߈ ߖߊ߬ߖߏ߲ ߠߋ߬ ߘߐ߫߸ ߞߊ߬ ߛߊ߲߬ ߁߀ ߥߛߎ߫ ߟߴߊ߬ ߞߎ߲߬، ߞߕߌ ߏ߬ ߟߋ ߞߵߊ߬ ߕߐ߮ ߕߏ߫ ߘߎߢߊ߫ ߘߊ ߘߐ߫߸ ߊ߬ ߕߐ߮ ߣߴߊ߬ ߡߊ߲߬ߞߕߎ ߕߌߢߍ ߡߍ߲ ߞߍ߫ ߘߊ߫ ߛߊ߲߬ ߦߙߌߞߊ߫ ߞߘߐ߫߸ ߊ߬ ߟߊ߫ ߞߎߡߊ ߣߊ߬ ߘߊ߫ ߦߟߍ߬ߡߊ߲ ߘߏ߲߬ ߏ߬ ߘߐ߫ ߊ߬ ߟߊߡߍ߲ߓߊ߮ ߟߎ߬ ߢߊߞߘߐ߫ ߞߕߌ߫ ߘߊߞߎ߲ ߘߐ߫.

ߓߜ߭ߊ߬ߝߍ߬ߦߊ߫ ߘߎ߱ ߞߣߐ߫ ߦߊ߲߬߸ ߡߐ߰ ߛߌߦߊߡߊ߲߫ ߠߋ߬ ߣߊ߬ ߘߊ߫ ߓߊߘߍ ߣߌ߲߬ ߘߐ߫߸ ߞߊ߬ ߓߐ߫ ߦߙߐ߫ ߛߌߦߊߡߊ߲߫ ߘߐ߫، ߘߏ߫ ߟߎ߫ ߓߐ߫ ߘߊ߫ ߜߋ߲ߞߐ߰ߖߌ߬ߘߊ ߟߊ߫߸ ߏ߬ ߘߏ߫ ߟߋ߬ ߕߎ߬ߡߊ߬ߣߌ߲߫ ߖߊ߬ߞߌ߬ߕߋ߬ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ <<ߊ߲ ߣߊ߬ߣߍ߲߫ ߊ߲ ߓߊߘߋ߲߫ ߕߎ߲ߓߊ߬ ߖߊ߬ߞߌ߬ߕߋ߫ ߛߎ߬ߞߏ ߟߋ߬ ߘߐ߫، ߊߟߊ߫ ߟߋ߬ ߞߵߊ߬ ߘߌ߫߸ ߊߟߊ߫ ߟߋ߬ ߞߵߊ߬ ߕߊ߬، ߊ߬ ߟߊ߫ ߛߊ߬ߦߊ ߞߍߣߍ߲߫ ߞߏߓߊ߫ ߟߋ߬ ߘߌ߫ ߥߊߛߏߟߏ߲߫ ߡߊ߬߸ ߊ߬ ߣߌ߫ ߖߌ߬ߣߍ߫ ߖߡߊ߬ߣߊ ߡߊ߬.>>

ߖߌ߬ߓߙߌߟ ߛߘߌ߬ߓߋ߬ ߡߍ߲ ߦߋ߫ ߥߊߛߏߟߏ߲߫ ߓߏ߬ߟߏ߲߬ߓߊ ߞߊ߲ߕߌ߮ ߘߌ߫߸ ߏ߬ ߞߊ߬ ߣߌ߲߬ ߞߏ ߦߋ߫ ߓߣߐ߬ߓߊ߫ ߘߌ߫ ߊ߬ߟߎ߫ ߞߊ߲߬ <<ߓߌ߬ ߢߐ߲߰ ߟߏ߲߫߸ ߊ߬ ߕߍ߫ ߘߋ߬ ߞߏ߫ ߊ߲ ߞߍߕߐ߫ ߡߐ߱ ߟߋ߬ ߛߎ߭ ߘߏ߲߬ ߠߊ߫ ߞߊߓߙߎ ߞߣߐ߫߸ ߊ߬ߦߌ߫ ߊ߲ ߞߍߕߐ߫ ߊ߲ ߠߊ߫ ߘߐ߬ߝߐ ߦߙߐ ߘߏ߫ ߟߋ߬ ߞߊߓߙߎ߫ ߟߊ߫، ߕߎ߲ߓߊ߬ ߕߍ߬ߘߍ߫ ߝߘߊ߬ߝߌ߲߬ߠߊ߫ ߟߊߞߋ߬ߟߋ߲߬ߧߊ߬ߟߌ ߕߐ߰ߡߊ߬ߛߙߋ ߟߋ߬ ߘߌ߫߸ ߝߊ߬ߛߏ ߞߊߣߌ߲ ߣߌ߫ ߝߊ߬ߛߏ߬ߘߋ߲߬ ߓߘߍ߬ߦߊ ߕߐ߰ߡߊ߬ߛߙߋ ߟߋ߬ ߕߘߍ߬، ߥߊߛߏߟߏ߲߫ ߛߋ߬ߘߊ߬ ߖߎ߬ߓߊ ߘߏ߫ ߟߋ߬ ߓߋߣߍ߲߫ ߕߋ߲߬.>>

ߊ߬ߟߌ ߖߊ߬ߞߌ߬ߕߋ߬ ߡߍ߲ ߝߣߊ߫ ߓߐ߫ ߘߊ߫ ߡߌ߬ߛߊ߬ߘߎ߯ ߞߊ߬ ߣߊ߬ ߓߊߘߍ ߣߌ߲߬ ߘߐ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߕߎ߲ߓߊ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ <<ߥߊߛߏߟߏ߲ߞߊ ߟߎ߬ ߘߌߦߊ߫ ߘߊ߫ ߡߍ߲ ߦߋ߫߸ ߥߊߛߏߟߏ߲ߞߊ ߟߎ߬ ߟߊ߫ ߞߋ߬ߟߋ߲߬ߧߊ ߘߌߦߊ߫ ߘߊ߫ ߡߍ߲ ߦߋ߫.>>

ߖߊ߬ߡߊ ߟߊ߫ ߓߐߟߌ ߓߌ߬߸ ߏ߬ ߕߐ߬ ߡߊ߫ ߕߏ߫، ߛߎ߬ ߘߎߣߎ߲ ߝߐ ߦߴߌߘߐ߫߸ ߟߊ߬ߡߊ߮ ߓߘߊ߫ ߘߏ߲߬ ߛߏ ߦߙߐ ߓߍ߯ ߟߊ߫߸ ߞߵߊ߬ ߟߐ߲߫ ߞߏ߫ ߞߏߓߊ ߘߏ߫ ߦߋ߫ ߛߋ߲߬ߠߊ߫.

ߛߓߊߙߌ ߞߎ߲߫ ߘߊ߫ ߣߊ߬ߓߊ߮ ߟߎ߬ ߣߌ߫ ߛߌ߰ߓߊ߮ ߟߎ߫ ߝߍ߬߸ ߞߊ߬ ߞߏ ߓߍ߯ ߟߊ߫ ߟߊ߬ߕߍ߮ ߞߎ߲߬߸ ߏ߬ ߡߍ߲ ߞߘߐߓߏ߬ߙߌ߬ ߢߊ߫ ߕߍ߫.
ߓߌ߬ ߖߎߡߊ ߦߋ߫ ߟߏ߲߫ ߠߋ߬ ߘߌ߫ ߓߜ߭ߊ߬ߝߍ߬ߦߊ߫ ߘߐ߬ߝߐ ߞߣߐ߫߸ ߡߍ߲ ߕߍ߫ ߓߐ߫ ߡߐ߰ ߤߊ߲ߞߟߌ߫ ߟߊ߫، ߖߌ߬ߣߍ߬ ߓߍ߯ ߟߋ߬ ߝߙߊ߬ ߘߊ߫ ߥߊߛߏߟߏ߲߫ ߞߊ߲߬ ߓߌ߬߸ ߕߎ߲ߓߊ߬ ߟߊ߫ ߖߌ߰ߦߘߊ߬ ߟߊ߬ߓߊ߲ ߓߊ߯ߙߊ ߟߎ߬ ߞߍ߫ ߢߐ߲߮ ߝߍ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.