ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߝߊߕߏ߫ ߘߊ߫ ߞߵߊ߬ ߕߏ߫ ߥߛߎ ߟߊ߫ ߕߙߊߓߊ ߕߋ߬ߟߋ߫ ߂߅ ߕߊ߬ߡߌ߲߬ߣߍ߲ ߣߌ߲߬ ߡߊ߬߸ ߊ߬ ߟߊ߫ ߞߐߙߍ ߓߘߊ߫ ߟߊ߬ߛߋ߬ߟߌ߬ ߞߟߊߒߞߋ߫ ߞߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߛߎ߭ ߓߍߣߊ߬ ߘߏ߲߬ ߞߐߣߊߞߙߌ߫ ߟߋ߬ ߡߎ߬ߕߎ߲߬߸ ߞߏ߲ߞߏߘߓߌ ߕߋ߬ߟߋ߫ ߃ ߣߊ߬ߕߐ ߣߌ߲߬ ߡߊ߬߸ ߏ߬ ߡߍ߲ ߓߍ߲߬ߣߍ߲߫ ߛߌ߬ߣߌ߲߬ߟߏ߲ ߡߊ߬، ߓߍ߯ ߕߍ߬ߘߍ߫ ߊ߬ ߖߌ߰ ߟߊ߫ ߞߏ߫ ߊ߬ ߛߎ߬ߞߏ߬ߦߊ ߞߍߕߐ߫ ߊ߬ߟߎ߬ ߝߊ߬ߛߏ ߟߋ߬ ߟߊ߫ ߞߟߐ߬ߡߊ߬ߟߌ߬ߟߊ߫߸ ߏ߬ ߡߍ߲ ߦߋ߫ ߢߊ߲߬ߕߊ߲߬ߣߌ߲߬ߠߊ߫ ߡߙߊ߬ߘߊ߬ߙߋ߲ ߘߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߰ߘߊ ߞߣߐ߫.

ߣߌ߲߬ ߞߍ߫ ߘߊ߫ ߟߊ߬ߛߋ߬ߟߌ߫ ߟߋ߬ ߘߌ߫ ߓߌ߬ ߞߊ߬ ߝߘߊ߫ ߕߎ߲ߓߊ߬ ߖߊ߬ߞߌ߬ߕߋ߬ ߞߐߙߍ ߟߊ߫߸ ߊ߬ߟߋ ߡߍ߲ ߕߎ߲߬ ߦߋ߫ ߢߍߡߌߘߊ߫ ߡߎߛߊߊ߫ ߘߊ߬ߘߌߛ ߞߡߊ߬ߙߊ߬ ߟߊ߫ ߗߡߍ߬ ߓߙߋߡߊ߫ ߘߌ߫، ߞߐߙߍ ߞߊ߲߫ ߞߏ߫  ߊ߬ ߓߊߘߍ ߞߍߕߐ߫ ߞߐߣߊߞߙߌ߫ ߕߌ߲ߓߌߘߌ߲ߘߓߊ ߟߋ߬ ߟߊ߫߸ ߝߊߦߌߛߊߟ، ߏ߬ ߟߋ ߞߐߝߍ߬߸ ߝߎ߬ߙߋ ߘߌ߫ ߕߊ߬ ߞߊ߬ ߣߵߊ߬ ߘߌ߫ ߞߐߙߍ ߞߣߐ߫ ߓߋߤߊ߲ߖ߭ߍ߲߫߸ ߞߵߊ߬ ߛߎ߭ߘߏ߲߬ ߦߋ߲߬ ߡߎ߬ߕߎ߲߬ ߛߊ߫، ߦߋ߲߬ ߦߋ߫ ߜߋ߬ߛߌߦߊ߫ ߞߊ߬ߝߏ߬ߙߋ߲ ߠߋ߬ ߞߣߐ߫.

ߕߙߊߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߕߎ߲ߓߊ߬ ߖߊ߲߬ߞߊ߬ߙߏ߬ߕߐ ߟߊߓߐ߫ ߘߊ߫ ߞߐ߰ߦߊ߬ ߥߛߎߖߌ߲ߓߊ ߟߊ߫ ߖߍ߲ߓߎߙߍ߲ ߕߎ߬ߡߊ߬، ߊ߬ ߕߊ߬ ߘߊ߫ ߦߋ߲߬ ߠߋ߬ ߞߊ߬ ߥߴߊ߬ ߘߌ߫ ߘߊ߲ߘߊߟߌ߫ ߝߢߊߝߢߊ ߞߘߐ߫ ߘߊ߯ ߊ߬ߟߌ߬ߡߊߡߌ߲߫ ߛߊ߭ߡߏ߬ߙߌ߬ ߕߎ߬ߙߋ߬߸ ߊ߬ ߝߊߕߏ߫ ߘߊ߫ ߦߋ߲߬ ߠߋ߬ ߕߙߊߓߊ ߂߅ ߡߊ߬߸ ߄ߕߎߡߊ߃߅، ߊ߬ ߞߍ߫ ߘߊ߫ ߥߛߎߟߊߘߋ߲߫ ߛߘߊߡߊ߫ ߟߋ߬ ߘߌ߫߸ ߊ߬ ߛߊ߲߬ߞߊ ߟߊߕߋ߭ ߞߊ߬ ߛߎ߬ߣߎ߲ ߠߊߘߏ߲߬ ߊ߬ ߞߊ߬ߣߌ߲߬ߓߊ߰ ߛߌߦߊߡߊ߲߫ ߠߋ߬ ߛߣߐ߬ߡߍ ߘߐ߫، ߊ߬ ߟߊ߫ ߝߊ߲߬ߞߊ߸ ߊ߬ ߟߊ߫ ߗߍ߬ߞߎ߲߬ߧߊ߸ ߊ߬ ߟߊ߫ ߕߎ߬ߢߊ߬ ߝߐ߸ ߊ߬ ߤߊ߲ߞߟߌ ߟߊ߫ ߖߊߙߌߒߕߋߦߊ߸ ߏ߬ ߟߋ ߡߐ߰ ߛߌߦߊߡߊ߲߫ ߘߊ߫߸ ߡߍ߲ ߠߎ߬ ߦߴߊ߬ ߟߊ߫ ߞߏ ߟߊߖߊ߲ߞߊߓߊ߮ ߘߌ߫ ߓߟߐߟߐ ߞߊ߲߬ ߞߊ߬ߣߌ߲߬.

ߔߊߞߌߛߦߊ ߡߍ߲ ߞߍ߫ ߘߊ߫ ߖߌ߬ߣߍ߬ ߞߣߐ߫ ߂߀߀߉ ߕߎߟߊߝߌ߲ ߂߈ ߠߊ߫ ߕߏ߬ߟߊ߲߬ߕߊ߲߬ ߓߙߊ ߘߐ߫߸ ߏ߬ ߡߊ߲߬ߞߊ߲ ߠߋ߬ ߕߎ߲߬ ߦߴߊ߬ߟߋ ߣߌ߫ ߥߊ߯ߕߌ ߏ߬ ߞߊ߲ߕߌ߯ ߛߌߦߊߡߊ߲߫ ߞߐ߫، ߊ߬ ߡߌ߬ߣߊ߬ ߘߊ߫ ߏ߬ ߟߋ ߘߐ߫ ߞߵߊ߬ ߘߏ߲߬ ߥߛߎ ߟߊ߫߸ ߞߕߌߘߊ ߞߊ߬ ߛߊ߲߬ ߁߀ ߥߛߎߖߌ߲߫ ߓߊߟߊ߲ߣߍ߲ ߠߋ߬ ߟߴߊ߬ ߞߎ߲߬߸ ߏ߬ ߡߍ߲ ߕߐ߭ ߕߎ߲߬ ߓߘߊ߫ ߕߏ߫ ߞߊߙߏ߫ ߘߊ߲ߘߐ߫ ߡߊ߬.

ߕߎ߲ߓߊ߬ ߞߍ߫ ߘߊ߫ ߣߊ߲߬ߕߌ߯ ߟߋ߬ ߘߌ߫߸ ߡߍ߲ ߕߘߍ߬ ߘߊ߲ߘߊߟߌߟߊ߫ ߘߌ߫߸ ߊ߬ ߣߌ߫ ߘߊ߬ߘߟߌ߬ߟߊ ߖߍ߬ߘߍߖߍ߬ߘߍ ߟߋ߬ ߕߎ߲߬ ߦߴߊ߬ ߘߌ߫، ߞߕߌ߫ ߘߊߞߎ߲ ߘߐ߫߸ ߊ߬ ߞߎߡߊ߫ ߢߊ߸ ߊ߬ ߟߊ߫ ߘߐ߬ߝߎߟߋ߲ ߣߴߊ߬ ߟߊ߫ ߕߡߊ߬ߖߌ߬ߕߍߒߘߐ߸ ߏ߬ ߞߵߊ߬ ߟߊ߫ ߞߏ ߘߌߦߊ߫ ߡߐ߰ ߛߌߦߊߡߊ߲߫ ߦߋ߫߸ ߝߏ߫ ߘߏ߫ ߟߎ߫ ߞߵߊ߬ ߖߌ߰ ߞߏ߫ ߊ߬ ߦߋ߫ ߛߐ߲߬ߒ߬ߕߊ߲ ߠߋ߬ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫