ߛߌߣߌ߲߫ ߛߌ߬ߣߌ߲߬ߟߏ߲ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߃ ߟߋ߬ ߞߍߕߐ߫ ߡߙߊ߬ߓߊ߰ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߫ ߛߎ߬ߞߏ߬ߦߊ ߘߌ߫߸ ߊ߬ߟߋ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫، ߏ߬ ߓߊߘߍ߫ ߖߌ߲ߘߊ߲ߡߊ ߞߍߕߐ߫ ߓߜ߭ߊ߬ߝߍ߬ߦߊ߫ ߘߎ߱ ߟߋ߬ ߞߣߐ߫߸ ߖߌ߬ߣߍ߬ ߜߍߞߊ߲ߠߊ ߘߐ߫. ߛߎ߬ߞߏ߬ߦߊ ߣߌ߲߬ ߞߍ߫ ߘߊ߫ ߓߍ߲߬ߒ߬ߛߋ߲߬ߡߊ߫ ߘߌ߫߸ ߊ߲ ߞߊ߬ ߛߏ ߣߌ߲߬ ߞߎ߲ߝߊ߲ߓߐ߫߸ ߞߵߊ߬ ߘߐ߬ߝߐ ߢߊߢߌߣߌ߲߫߸ ߞߊ߬ ߥߴߊ߬ ߦߋ߫ ߛߏ߫ ߞߘߐߞߘߐ߫ ߘߌ߫߸ ߡߍ߲ ߛߌ߱ ߘߌ߫ ߝߊ߯ߘߐߞߍ߫ ߛߓߊ߬ ߡߊߜߍ߲߫، ߒ߬ߞߵߊ߬ ߦߋ߫ ߛߏ߫ ߟߋ߬ ߝߣߊ߫ ߘߌ߫߸ ߡߐ߰ ߘߴߊ߬ ߝߐ߫ ߞߏ߫ ߢߌ߬ߣߊ߬ ߞߍߣߍ߲߫ ߡߍ߲ ߞߐ߫ ߞߏ߫ ߛߌߦߊߡߊ߲߫ ߘߐ߫.

ߗߍ߬ߓߊ ߘߏ߫ ߟߋ߬ ߟߊ߫ ߢߣߊߡߦߊ ߞߎ߲߭ߝߊ߰ߕߐ߫ ߛߏ ߢߌ߲߬ ߞߣߐ߫ ߕߋ߲߬߸ ߞߎߘߍ߫ ߛߓߊ߬ ߦߴߊ߬ߟߋ߬ ߡߍ߲ ߣߌ߫ ߡߊ߬ߟߌ ߓߐߕߏ߲ ߕߍ߫، ߊ߬ ߘߌ߫ ߝߐ߫ ߓߜ߭ߊ߬ߝߍ߬ߦߊ߫߸ ߊ߬ ߘߏ߲߬ ߘߌ߫ ߝߐ߫ ߝߣߊ߫ ߞߟߐ߬ߡߊ߬ߟߌ߬ߟߊ߫߸ ߏ߬ ߡߍ߲ ߦߋ߫ ߖߊ߬ߕߋ߬ ߟߴߊ߬ ߕߐ߯ ߓߘߍߓߘߍ ߘߌ߫، ߒ߬ߓߊ߬߸ ߊ߬ߟߎ߬ ߘߋ߲ߞߍ߫ ߘߐߜߍ ߘߏ߫ ߟߋ߬ ߛߎ߬ߞߏ߬ߦߊ ߣߊ߬ߕߐ߫ ߞߍ߫ ߟߊ߫ ߛߌߣߌ߲߫߸ ߞߵߏ߬ ߞߍ߫ ߊ߬ ߟߊ߫ ߢߣߊߡߦߊ ߓߊ߲ߣߍ߲ ߘߌ߫، ߞߊ߬ ߞߐ߲߰ ߓߊߘߍ ߣߌ߫ ߛߎ߬ߘߏ߲ ߢߍ߫߸ ߘߎ߰ ߡߐ߮ ߟߎ߫ ߞߊ߬ ߛߏ ߣߌ߲߬ ߡߊ߲߬ߞߕߎ߫ ߧߋ߫߸ ߛߏ߫ ߕߐ߯ߟߡߊ߫ ߘߌ߫߸ ߊ߬ ߣߌ߫ ߞߵߊ߬ ߦߌ߬ߘߊ߬ ߞߏ߫ ߖߌ ߦߋ߫ ߓߏ߬ߙߌ߬ ߟߴߊ߬ ߛߌߟߊ߫ ߞߘߐ ߟߋ߬ ߝߍ߬.

ߓߜ߭ߊ߬ߝߍ߬ߦߊ߫ ߦߋ߫ ߛߏ߫ ߟߋ߬ ߘߌ߫߸ ߢߌ߬ߣߊ߬ ߞߍߣߍ߲߫ ߡߍ߲ ߞߐ߫ ߝߊߦߌߘߊ߫، ߊ߬ ߘߐߞߎߘߎ߲ߣߍ߲߫ ߞߎ߲߬ߘߊ߬ ߣߊ߯ߣߌ߲߫ ߠߋ߬ ߘߌ߫߸ ߡߍ߲ ߦߋ߫ ߢߊ߲߬ߕߊ߬ߣߌ߲߬ߠߊ߫ ߡߙߊ߬ߘߊ߬ߙߋ߲ ߘߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߰ߘߊ ߘߐ߫ ߞߎߘߍ߫ ߇߅ ߢߐ߲߰ ߠߊ߫، ߊ߬ ߡߊߛߐ߬ߘߐ߲ ߜߍ߬ߟߍ߲߬ߡߊ߲߬ ߛߌߟߊ߫ ߞߏ ߘߐ߫ ߕߟߋ߬ߡߊ ߣߌ߲߬ ߘߐ߫߸ ߞߎߡߊߕߍ߫ ߏ߬ ߘߐ߫ ߣߌ߫ ߛߊ߬ߡߊ ߘߏ߲߬ ߘߊ߫، ߒ߬ߓߊ߬߸ ߘߎߢߊ߫ ߞߍߕߐ߫ ߢߐ߲߮ ߓߍ߲߬ ߠߊ߫ ߘߎ߱ ߣߌ߲߬ ߠߋ߬ ߞߣߐ߫ ߛߌ߬ߣߌ߲߬ߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߃، ߛߏ ߣߌ߲߬ ߡߊ߬ߞߏ ߦߋ߫ ߞߏ߫ ߛߌߦߊߡߊ߲߫ ߠߊ߫߸ ߡߍ߲ ߠߎ߬ ߘߛߍߣߍ߲߫ ߊ߬ ߘߐ߫، ߏ߬ ߓߍ߯ ߣߴߊ߬ ߕߊ߫߸ ߘߎߢߊ߫ ߢߊ ߦߋ߫ ߛߏ ߢߌ߲߬ ߠߋ߬ ߘߐ߫ ߕߋ߲߬߸ ߓߍ߯ ߦߋ߫ ߦߌ߬ߙߌ߲߬ߘߌ ߞߊ߲߬ ߛߏ ߢߌ߲߬ ߠߋ߬ ߞߣߐ߫ ߕߋ߲߬߸ ߞߊ߬ ߣߊ߬ ߛߐ߬ߘߐ߲߫ ߡߙߊ߬ߓߊ߰ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߫ ߛߎ߬ߞߏ ߘߐ߫߸ ߊ߬ߟߋ ߡߍ߲ ߛߊ߬ ߘߊ߫ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߅߈ ߘߐ߫߸ ߞߊ߬ ߝߘߎߡߊ߫ ߞߋߟߋ߲߫ ߕߏ߫߸ ߊ߬ ߣߌ߫ ߘߋ߲ߞߍ߫ ߞߋߟߋ߲߫߸ ߏ߬ ߡߍ߲ ߓߘߊ߫ ߓߊ߲߫ ߊ߬ ߟߊ߫ ߞߊ߬ߙߊ߲ ߠߊ߫ ߕߋ߲߬.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫ ߛߏ ߡߐ߰ߓߊ ߟߎ߬ ߟߊ߫߸ ߕߎ߲ߓߊ߬ ߓߋ߲ߓߊ ߘߏ߫ ߞߊ߬ ߛߊ߬ߡߘߎ߬ߜߍ߫ ߕߎ߬ߙߋ߬ ߟߊ߫ ߞߟߍ߬ߘߋ߲߬ߧߊ ߞߍ߫ ߟߋ߬߸ ߏ߬ ߡߍ߲ ߞߊ߬ ߕߟߏߥߎߟߋ߲ ߢߊ ߥߎ߬ߟߋ߲߬ ߞߘߏߞߘߏ߫، ߏ߬ ߟߵߊ߬ ߦߌ߬ߘߊ߬ ߟߊ߫߸ ߞߏ߫ ߖߌ ߓߏ߬ߙߌ߬ߣߴߊ߬ ߛߌߟߊ߫ ߞߘߐ ߟߋ߬ ߝߍ߬߸ ߣߴߏ߬ ߦߋ߫ ߗߍ߬ߞߎ߲ ߘߏ߫ ߓߐ ߘߌ߫ ߗߍ߬ߞߎ߲ ߠߎ߬ ߟߊ߫ ߓߏ߲ ߞߣߐ߫.

ߓߜ߭ߊ߬ߝߍ߬ߦߊ߫ ߦߋ߫ ߞߎ߲߬ߠߊ߬ߛߌ߮ ߟߊ߫ ߕߐ߯ ߟߊߣߍ߲ ߠߋ߬ ߘߌ߫߸ ߡߍ߲ ߡߊߟߐ߲ߣߍ߲߫ ߊ߬ ߘߎ߰ߘߋ߲ ߠߎ߫ ߖߍ߬ߘߍ ߓߟߏ߫߸ ߞߏ߫ ߞߟߐ߬ߡߊ߬ߟߌ߬ߟߊ߫، ߛߏ ߣߌ߲߬ ߡߐ߰ߓߊ ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߘߎ߱ ߣߌ߲߬ ߜߍ߲߭ߕߍ߱ ߘߌ߫ ߝߊ߯ߘߐߞߍ߫ ߝߌ߬ߟߊ߬ ߣߌ߫ ߘߏ߫ ߓߐ߫߸ ߊ߬ߟߎ߬ ߓߋ߲ߓߊ ߘߏ߫ ߓߟߏ߫߸ ߡߍ߲ ߕߐ߯ ߞߏ߫ ߞߐ߬ߟߐ߲߬، <<ߦߊ߲߬ ߜߍ߲߱ߕߍ߰ߓߊ߰ ߝߟߐ ߕߐ߯ ߟߋ߬ ߞߏ߫ ߞߐ߬ߟߐ߲߬߸ ߊ߲ߠߎ߬ ߦߴߊ߬ߟߋ߬ ߓߐ߲ߛߐ߲ ߠߎ߫ ߟߋ߬ ߘߌ߫، ߊ߬ߟߋ ߟߋ߬ ߞߊ߬ ߞߐ߬ߟߐ߲߬ߡߟߋ߬ߦߌ߬ߟߊ߫ ߜߍ߲߭ߕߍ߰، ߞߊ߬ߕߎ߲߯߸ ߌߞߏߡߌ߲߬ ߊ߬ ߘߋ߲ߞߍ߫ ߝߟߐ ߕߐ߯ ߞߏ߫ ߡߟߋ߬ߦߌ߬߸ ߊ߬ߟߎ߫ ߝߌ߬ߟߊ ߕߐ߮ ߏ߬ ߟߋ ߟߊߘߍ߬ߣߍ߲߫ ߡߎ߬ߕߎ߲߬ ߛߊ߫߸ ߞߵߏ߬ ߞߍ߫ ߞߐ߬ߟߐ߲߬ߡߟߋ߬ߦߌ߬ߟߊ߫ ߘߌ߫.>> ߡߐ߰ߓߊ ߟߋ߬ ߞߊ߲߫ ߕߋ߲߬߸ ߟߊ߱ߦߌ߬ ߘߙߊ߬ߡߊߣ ߖߊ߬ߞߌ߬ߕߋ߬. ߕߎ߬ߓߊ߬ߓߎ ߟߎ߫ ߣߊ߭ ߡߍ߲ ߞߍ߫ ߘߊ߫߸ ߏ߬ ߟߎ߬ ߡߊ߫ ߘߌ߫ ߞߐ߬ߟߐ߲߬ߡߟߋ߬ߦߌ߬ߟߊ߫ ߏ߬ ߟߋ ߛߓߍ߫ ߟߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߌߞߏߡߌ߲߬ ߡߊ߲߬ߞߕߎ߬ ߜߘߍ߫ ߦߋ߫ ߛߏ ߟߊ߫߸ ߏ߬ ߡߍ߲ ߦߋ߫ ߓߜ߭ߊ߬ߝߍ߬ߦߊ߫ ߘߌ߫߸ ߏ߬ ߟߋ ߛߓߍ ߣߐ߰ߦߊ߬ ߘߴߊ߬ߟߎ߫ ߡߊ߬߸ ߊ߬ߟߎ߬ ߝߣߊ߫ ߞߵߏ߬ ߕߊ߬. ߡߐ߰ߓߊ ߞߵߊ߬ ߦߌ߬ߘߊ߬ ߞߏ߫ <<ߕߟߏߥߎߟߋ߲ ߠߎ߫ ߣߊ߭ ߡߍ߲ ߞߍ߫ ߘߊ߫߸ ߊ߬ߟߎ߫ ߞߵߊ߬ ߝߐ߫ ߞߏ߫ ߊ߬ߟߎ߬ ߕߴߛߋ߫ ߞߐ߬ߟߐ߲߬ߡߟߋ߬ߦߌ߬ߟߊ߫ ߛߓߍ߫ ߟߊ߫، ߊ߬ߟߎ߫ ߞߊ߬ ߓߜ߭ߊ߬ߝߍ߬ߦߊ߫ ߟߋ߬ ߛߎߥߊ߲ߘߌ߫، ߏ߬ ߟߋ ߘߐ߫߸ ߕߐ߯ ߝߌ߬ߟߊ߬ ߦߋ߫ ߝߐ߫ ߟߊ߫ ߘߎ߱ ߣߌ߲߬ ߡߊ߬ ߕߋ߲߬.>> ߗߍ߬ߡߐ߮ ߟߊ߫ ߞߎߡߊ ߘߊߓߊ߲ ߠߵߏ߬ ߘߌ߫.

ߓߌ߬ ߢߐ߲߰ ߟߏ߲߫߸ ߓߜ߭ߊ߬ߝߍ߬ߦߊ߫ ߛߌ߰ߓߊ߮ ߘߌ߫ ߡߐ߰ ߥߊ߯ ߞߋߟߋ߲߫ ߣߌ߫ ߞߐ߫ ߓߐ߫߸ ߖߊ߬ߕߋ߬ߛߎ߬ߓߐ߫ ߕߊ߬ߡߌ߲߬ߣߍ߲ ߘߐ߫߸ ߊ߲ ߞߵߏ߬ ߡߍ߲ ߛߐ߬ߘߐ߲߬ ߛߏ ߘߎ߰ߕߌ߮ ߖߍ߬ߘߍ ߟߊ߫، ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߛߏ ߛߌ߰ߓߊ߮ ߟߎ߬ ߟߊ߫ ߓߊ߯ߙߊ ߓߎ߲ߓߎ߲ߣߍ߲߫ ߛߍ߬ߣߍ ߟߋ߬ ߡߊ߬߸ ߏ߬ ߟߋ ߊ߬ߟߎ߬ ߟߊ߫ ߛߐ߬ߘߐ߲ ߞߐߞߟߏ ߘߌ߫، ߊ߬ߟߎ߬ ߦߋ߫ ߜߟߍ߬ߦߊ߬ ߛߌߦߊߡߊ߲߫ ߘߐ߫߸ ߦߏ߫ ߛߌߟߊ߫ ߞߏ߸ ߏ߬ ߜߟߍ߬ߦߊ ߦߴߊ߬ߟߎ߫ ߞߊ߲߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߊ߲ߠߎ߬ ߖߍ߬ߘߍ ߢߊ ߛߙߋߦߊ߫ ߘߊ߫ ߡߍ߲ ߡߊ߬߸ ߛߌߟߊ ߡߊ߫ ߢߌ߲߬ ߝߋߎ߫߸ ߏ߬ ߦߋ߫ ߞߍ߫ ߟߊ߫ ߕߙߎ߬ ߘߌ߫ ߞߊ߬ ߜߟߍ߬ߦߊ ߘߏ߲߬ ߛߏ߫ ߡߐ߮ ߟߎ߬ ߟߊ߫ ߖߌ߰ߣߌ߬ߦߟߍ ߘߐ߫، ߤߊߟߌ߬ ߘߊ߲ߘߊߛߏ ߡߍ߲ ߦߋ߲߬߸ ߟߏ߲ ߘߏ߫ ߟߎ߫ ߘߌ߫ ߞߍ߫߸ ߓߊߛߌ߫ ߛߐߘߐ߲ ߓߍ߯ ߦߋ߫ ߜߟߍ߬ߦߊ߬ ߟߊ߫ ߟߋ߬.

ߛߌ߬ߣߌ߲߬ߟߏ߲ ߣߌ߲߬ ߡߊ߬߸ ߕߎ߲ߓߊ߬ ߘߴߊ߬ ߖߌ߰ߦߘߊ߬ ߟߊ߬ߓߊ߲ ߡߊߛߐ߬ߘߐ߲߬ ߛߏ ߞߐ߰ߘߎ߯ ߕߟߋ߬ߓߋ ߘߐ߫߸ ߞߵߊ߬ ߟߴߊ߬ ߓߋ߲ߓߊ ߟߎ߬ ߟߊ߫ ߘߎ߱ ߟߊ߫، ߞߊ߬ ߞߐ߲߰ ߓߊߘߍ  ߣߌ߲߬ ߢߍ߫߸ ߛߏ ߓߘߊ߫ ߓߌ߬ߟߊ߬ ߜߍ ߘߐ߫߸ ߞߵߊ߬ ߞߏ ߟߎ߬ ߟߊ߲ߞߣߍߡߊ߫߸ ߞߊ߬ ߕߎ߲ߓߊ߬ ߕߐ߫ ߦߙߐ ߦߌ߬ߘߊ߬.

ߊߟߎ߫ ߓߘߴߊ߬ ߟߐ߲߫ ߢߊߝߐߟߌ ߣߌ߲߬ ߘߐ߫߸ ߞߏ߫ ߕߎ߲ߓߊ߬ ߦߋ߫ ߡߐ߰ߓߊ߬ ߓߐ߲ߛߐ߲ ߠߋ߬ ߘߌ߫ ߡߍ߲ ߓߋ߲ߓߊ߫ ߓߊ߯ߙߊ߫ ߘߊ߫ ߢߍߓߊ߯ ߛߊ߬ߡߘߎ߬ߜߍ߫ ߕߎ߬ߙߋ߬ ߓߟߏ߫، ߒ߬ߓߊ߬߸ ߕߎ߲ߓߊ߬ ߝߎ߬ߙߋ ߓߍߣߊ߬ ߟߊ߫ ߓߜ߭ߊ߬ߝߍ߬ߦߊ߫ ߦߊ߲߬ ߠߋ߬ ߖߎߡߊ ߣߌ߲߬ ߡߊ߬߸ ߞߵߊ߬ ߟߊ߫ ߛߏ ߕߐ߮ ߞߍ߫ ߕߎߣߎ߲ߓߊߟߌ߫ ߛߊ߬ߓߊߟߌ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.