ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߟߊߘߊ߲߫ ߞߎ߲ ߦߋ߫ ߖߛߎ߬ߛߎߡߊ ߣߌ߫ ߟߊߞߊ߲ߘߊ ߓߊ߲ߓߊ߲ ߠߋ߬ ߘߌ߫ ߘߎߢߊ߫ ߞߣߐ߫، ߒ߬ߓߊ߬߸ ߏ߬ ߟߎ߫ ߟߋ߬ ߓߘߊ߫ ߕߏ߲ߓߐ߫ ߕߋ߲߬߸ ߞߵߊ߬ߟߎ߫ ߘߐ߰ߓߐ߫ ߊ߬ߟߎ߬ ߟߊ߫ ߓߊ߯ߙߊ ߟߊ߫߸ ߣߴߏ߬ ߦߋ߫ ߝߐߢߐ߲߯ߞߐ ߟߎ߬ ߣߌ߫ ߥߐ߬ߦߐ ߟߎ߬ ߣߌ߫ ߞߍ߬ߟߍ ߟߎ߬ ߟߊߛߊ߭ ߘߌ߫ ߖߊ߯ߓߊߟߌ ߣߌ߲߬ ߞߊ߲߬.

ߞߊ߲ߕߌ߮ ߟߎ߬ ߦߋ߫ ߟߊ߬ߘߍ߬ߓߊ ߟߎ߬ ߟߊ߫߸ ߝߘߏ߬ߓߊ߬ ߞߟߊ߬ߕߌ߰ ߡߊ߬ߦߟߍ߬ߡߊ߲߬ ߞߏ ߓߍ߯ ߦߋ߫ ߘߊ ߟߎ߬ ߘߐ߫، ߓߊ߬ߙߌ߬߸ ߘߎߢߊ߫ ߘߐߞߟߊߦߊߣߍ߲߫ ߞߍ߬ߟߍ ߓߟߏ߫، ߐ߲߬ߤߐ߲߫߸ ߡߊ߲߬ߕߏ߲߬ ߠߊߘߍ߬ߣߍ߲ ߝߊ߲߬ߞߊ ߟߊߕߍ߰ ߢߊ ߣߌ߲߬ ߦߋ߫ ߘߌ߬ ߕߋ߲߬ ߞߐߝߌ߫؟ ߕߐ߬ߣߐ߫ ߢߌ߬ߡߊ߲߬ ߦߴߊ߬ߟߎ߬ ߟߊ߫ ߘߎߢߊ߫ ߞߣߐ߫ ߣߌ߲߬ ߘߐ߫ ߓߏ߲߰؟

ߓߊߏ߬߸ ߊ߬ߟߎ ߟߐ߲ߣߍ߲߫ ߡߍ߲ ߡߊ߬߸ ߏ߬ ߟߋ ߝߐߢߐ߲߯ߞߐ ߟߎ߬ ߘߐߛߊ߭ ߘߌ߫߸ ߓߊ߬ߙߌ߬ ߞߍ߬ߟߍ ߕߋ߬ߟߋ ߦߋ߫ ߕߊ߬ߡߌ߲߬ ߠߊ߫ ߥߟߏ߫ ߟߊ߫߸ ߎ߳ߞߑߙߍߣߌ߲߬ ߘߐߜߍ߫ ߞߍ߬߸ ߕߟߋ߬ߓߐ ߡߊ߬ߛߎߘߎ߲ߧߊ ߝߣߊ߫ ߘߐߜߍ߫ ߓߊ߫، ߘߏߣߊߟ ߕߑߙߐ߲ߔ ߓߘߊ߫ ߘߎߢߊ߫ ߘߐߛߌߟߊ߲߫߸ ߞߊ߬ ߥߊ߫ ߓߋ߲߬ ߌߙߊ߲߫ ߞߊ߲߬߸ ߞߊ߬ ߓߋ߬ ߝ߭ߣߋߖ߭ߎߥߋߟߊ߫ ߞߊ߲߬߸ ߏ߬ ߘߏ߲߬ ߓߍ߯ ߞߍߣߍ߲߫ ߡߊ߲߬ߕߏ߲߬ ߠߊߘߍ߬ߣߍ߲ ߢߊ ߡߊߞߊ߬ߣߍ߲ ߠߋ߬ ߢߣߊ߫، ߊ߬ ߟߊߘߊ߲ ߛߊ߲߬ ߈߀ ߠߋ߬ ߕߋ߲߬߸ ߊ߬ߝߐ߫ ߊ߬ ߡߊߣߊ߬ ߞߘߐ߬ ߟߊ߫ ߟߋ߬ ߓߊ߬ ߞߵߊ߬ ߘߋ߲ߡߌߛߍ߲ߧߊ߫ ߝߊ߲ߞߊ ߟߊߕߍ߰؟ ߓߊߏ߬߸ ߘߏߣߊߟ ߕߑߙߐ߲ߔ ߞߵߊ߬ ߝߐ߫ ߊ߬ ߟߊ߫ ߞߎߡߊ ߘߏ߫ ߘߐ߫߸ ߞߏ߫: <<ߓߊ߯ߙߊ߫ ߜߘߍ߫ ߕߴߊ߬ߟߎ߬ ߟߊ߫ ߛߓߍߟߌ߫ ߓߊ߲ߓߊߟߌ ߞߐ߫߸ ߡߙߌߘߐ߫ ߜߍߟߍ߲ ߠߎ߬ ߘߌ߫، ߓߊ߬ߙߌ߬ ߖߊ߲߬ߕߏ߬ ߕߍ߫ ߞߍ߫ ߟߴߊ߬ ߘߐ߫ ߢߊ߫ ߛߌ߫ ߟߋ߬ ߡߊ߬، ߊ߬ߟߎ߬ ߦߋ߫ ߞߎߡߊ߫ ߘߐߞߏߟߏ߲߫ ߝߐ ߟߋ߬ ߞߊ߲߬ ߞߘߊߎ߫߸ ߡߍ߲ ߕߍ߫ ߛߋ߫ ߟߊ߫ ߥߦߐ߬ ߘߐߛߊ߬ ߟߊ߫.>>

ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߟߊߘߊ߲߫ ߘߊ߫ ߁߉߄߅ ߟߋ߬ ߟߊ߫߸ ߖߊ߯ߓߊ ߞߟߍ߬ ߝߌߟߊߣߊ߲ ߞߐߝߍ߬، ߊ߬ ߟߊߘߊ߲߫ ߘߊ߫ ߞߏ߫ ߊ߬ ߦߴߊ߬ ߘߐ߱ߘߏ߲߬ ߖߐ ߣߌ߫ ߟߊ߬ߞߊ߲߬ߘߊ߬ߟߌ ߟߋ߬ ߟߊ߫ ߘߎߢߊ߫ ߞߣߐ߫، ߞߊ߬ ߛߋ߫ ߘߴߊ߬ ߡߊ߬߸ ߊ߬ ߘߌ߫ ߛߴߊ߬ ߟߊ߫ ߜߏ߲ߜߏߘߏ߲߫ ߓߊ߯ߡߊ ߟߎ߬ ߟߊߖߌ߰ ߟߊ߫ ߘߎߢߊ߫ ߞߣߐ߫ ߛߋ ߡߍ߲ ߘߐ߫، ߓߊ߬ߙߌ߬߸ ߓߍ߯ ߓߘߊ߫ ߘߍ߲߬ߞߣߍ߬ߦߊ߫ ߡߎ߬ߕߎ߲߬߸ ߞߏ߫ ߛߋ ߡߍ߲ ߦߋ߫ ߡߊ߲߬ߕߏ߲߬ ߠߊߘߍ߬ߣߍ߲ ߢߍ߫߸ ߏ߬ ߦߋ߫ ߛߋߣߍ߲߫ ߛߌߣߍߣߍ߲߫ ߠߋ߬ ߘߌ߫.

ߓߊߏ߬߸ ߟߊ߬ߞߙߐ߬ߛߌ߬ߟߌ ߟߎ߬ ߓߘߴߊ߬ ߦߌ߬ߘߊ߬߸ ߡߊ߲߬ߕߏ߲߬ ߠߊߘߍ߬ߣߍ߲ ߡߊ߫ ߛߋ߫ ߞߍ߬ߟߍ߫ ߓߊ߬ߟߌ߬ ߟߊ߫ ߞߍߟߌ ߡߊ߬ ߡߎߣߎ߲߬، ߡߍ߲ ߘߏ߲߬ ߓߊ߯ ߞߍ߫߸ ߏ߬ ߘߐߛߎߡߊ ߦߋ߫ ߜߍ߬ߟߍ߲߬ߡߊ߲߬ ߘߴߊ߬ߟߎ߬ ߓߟߏ߫، ߊߟߎ߫ ߦߋ߫ ߟߊߒߡߊ ߕߊ߬ ߙߎߥߊ߲ߘߊ߫ ߛߌߟߛߊ߫ ߞߟߍ ߡߊ߬ ߕߎ߲߫߸ ߏ߬ ߞߍ߫ ߘߊ߫ ߡߊ߲߬ߕߏ߲߬ ߠߊߘߍ߬ߣߍ߲ ߢߊ ߢߣߊ߫ ߟߋ߬߸ ߊ߬ߟߎ߬ ߣߴߊ߬ߟߎ߬ ߟߊ߫ ߣߊ߲߬ߕߌ߮ ߟߎ߬، ߏ߬ ߟߋ ߘߐ߫߸ ߝߊ߬ߙߊ߲߬ߛߌ߫ ߓߘߍ߬ߓߘߍ߬ߟߌ߬ ߟߐ߲߬ߠߊ ߘߏ߫ ߓߍ߫߸ ߞߏ߫ ߝߊ߬ߙߊ߲߬ߛߎߥߊ ߖ߭ߋߡߍߣ߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߒߠߋ ߓߊ߬ߟߌ߬ߣߍ߲߫ ߠߋ߬ ߡߊ߲߬ߕߏ߲߬ ߠߊߘߍ߬ߣߍ߲ ߠߊ߫ ߞߏ ߘߐ߫߸ ߒ ߡߴߊ߬ ߟߐ߲߫ ߊ߬ߟߎ߬ ߘߌ߫ ߛߋ߫ ߡߍ߲ ߞߋߟߋ߲߫ ߣߐ߬ ߟߊ߫.>>

ߛߊ߲߬ ߈߀ ߞߘߐ߫߸ ߖߡߊ߬ߣߊ߬ ߅߁ ߠߋ߬ ߕߘߍ߬߸ ߊ߬ ߓߘߊ߫ ߛߋ߫ ߖߡߊ߬ߣߊ߫ ߁߉߃ ߘߐ߫، ߓߍ߯ ߦߋ߫ ߡߊ߲߬ߕߏ߲߬ ߠߊߘߍ߬ߣߍ߲ ߦߋ߫ ߟߊ߫ ߘߊߘߐߖߊߥߏ߫ ߞߣߍ ߟߋ߬ ߘߌ߫ ߡߎ߬ߕߎ߲߬، ߞߏ ߓߍ߯ ߦߋ߫ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߡߍ߲ ߓߟߏ߫߸ ߏ߬ ߡߊ߬ߡߙߊ߬ߟߌ߬ ߘߎߡߊߣߍ߲ ߦߋ߫ ߖߡߊ߬ߣߊ߬ ߟߏ߯ߟߎ߫ ߟߋ߬ ߓߟߏ߫: ߝߊ߬ߙߊ߲߬ߛߌ߫߸ ߓߙߌߕߊ߲ߓߊ߫߸ ߛ߭ߌ߯ߣߌ߲߬߸ ߙߎ߬ߛߌ߬߸ ߊ߬ ߣߌ߫ ߞߊ߬ߝߏ߫ ߘߍ߬ߣߍ߲، ߒߕߍߜߊߘߌ ߤߊߞߍ ߦߋ߫ ߖߡߊ߬ߣߊ߬ ߟߏ߯ߟߎ ߢߌ߲߬ ߠߎ߫ ߟߋ߬ ߓߟߏ߫ ߡߊ߲߬ߕߏ߲߬ ߠߊߘߍ߬ߣߍ߲ ߞߣߐ߫، ߓߍ߯ ߣߴߊ߬ ߟߊ߫ ߓߊ߲߭ ߤߊߞߍ߫ ߟߋ߬߸ ߊ߬ ߞߋߟߋ߲ߞߋߟߋ߲ ߓߍ߯ ߘߌ߫ ߛߋ߫ ߖߊ߬ߡߊ ߟߊ߫ ߡߙߌߘߐ߫ ߕߊ߬ߣߍ߲ ߓߊ߬ߟߌ߬ ߟߊ߫ ߞߍߟߌ ߡߊ߬، ߒ߬ߓߊ߬߸ ߊߡߙߌߞߌ߬ ߦߴߏ߬ ߛߎ߮ ߟߋ߬ ߞߍ ߞߊ߲߬ ߓߊ߰ߒ߬ߡߊ߬ ߞߟߍ ߢߌ߲߬ ߠߎ߬ ߘߐ߫߸ ߞߵߊ߬ߟߎ߬ ߟߊ߫ ߓߊ߲߭ ߣߌ߫ ߒߕߍ ߤߊߞߍ ߟߊߓߊ߯ߙߊ߫߸ ߞߊ߬ ߕߏ߫ ߕߊ ߟߊߝߍ߫ ߟߊ߫ ߘߎߢߊ߫ ߞߍ߬ߟߍ ߘߏ߫ ߟߎ߫ ߞߘߐ߫߸ ߜ߭ߊ߯ߖ߭ߊ߬ ߞߣߐ߫߸ ߌߙߊ߲߫ ߞߣߐ߫. ߙߎ߬ߛߌ߬ ߝߣߊ߫ ߦߋ߫ ߓߊ߲߭ ߤߊߞߍ߫ ߞߋߟߋ߲ ߏ߬ ߟߋ ߟߊߓߊ߯ߙߊ߫ ߟߊ߫߸ ߞߊ߬ ߎ߳ߞߑߙߍߣߌ߲߬ ߘߊ߬ߘߌ߬ ߞߏߛߓߍ߫. ߞߵߊ߬ ߛߐ߬ߘߐ߲߬ ߡߊ߲߬ߕߏ߲߬ ߠߊߘߍ߬ߣߍ߲ ߢߊ ߡߊߞߊ߬ߣߍ߲߫߸ ߊ߬ ߕߴߛߋ߫ ߟߊ߫ ߝߋ߲߫ ߝߐ߫ ߟߊ߫.

ߒ߬ߓߊ߬߸ ߢߌ߬ߣߌ߲߬ߞߊ߬ߟߌ ߦߋ߫ ߦߙߐ ߡߍ߲ ߘߐ߫ ߛߊ߫߸ ߦߊ߯ߟߊ߫߸ ߒߕߍߜߊߘߌ ߤߊߞߍ ߦߋ߫ ߖߡߊ߬ߣߊ߬ ߟߏ߯ߟߎ ߡߍ߲ ߠߎ߬ ߓߟߏ߫ ߣߌ߲߬߸ ߏ߬ ߟߎ߬ ߘߌ߫ ߛߋ߫ ߣߐ߬ߘߐߓߌ߬ߟߊ߬ ߟߊ߫ ߓߊ߬؟ ߞߊ߬ ߖߡߊ߬ߣߊ߬ ߜߘߍ߫ ߟߎ߫ ߓߌ߬ߟߴߊ߬ ߘߐ߫؟

ߝߊ߬ߙߊ߲߬ߛߎߥߊ ߖ߭ߋߡߍߣ ߞߵߊ߬ ߦߌ߬ߘߊ߫ ߏ߬ ߖߋ߬ߓߌ ߘߐ߫߸ ߞߏ߫ ߊ߬ ߛߊ߲߬ ߃߀ ߤߊ߲߯ ߛߊ߲߬ ߄߀ ߠߋ߬ ߕߋ߲߬߸ ߏ߬ ߞߎߡߊ ߦߋ߫ ߛߋ߲߬ߠߊ߫، ߓߊ߬ߙߌ߬߸ ߖߡߊ߬ߣߊ ߏ߬ ߟߎ߬ ߕߴߛߋ߫ ߣߐ߬ߘߐߓߌ߬ߟߊ߬ ߟߊ߫߸ ߝߏ߫ ߊ߬ߟߎ߬ ߓߍ߯ ߟߋ߬ ߦߋ߫ ߓߍ߲߬ ߊ߬ ߡߊ߬، ߐ߲߬ߤߐ߲߫߸ ߏ߬ ߟߎ߬ ߓߍ߯ ߘߌ߫ ߛߋ߫ ߓߍ߲߬ ߠߊ߫ ߡߙߌߦߊ߫ ߞߋߟߋ߲ ߏ߬ ߡߊ߬ ߓߊ߬؟ ߊ߬ ߕߌ߯ߕߌ߯ ߎߢߊ߫ ߣߕߊ߬ ߕߟߋ ߡߍ߲ ߦߋ߫ ߣߌ߲߬؟

ߒ߬ߓߊ߬߸ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߡߊߖߌ߭ ߦߴߌߘߐ߫ ߓߍ߯ ߓߟߏ߫߸ ߞߵߊ߬ ߦߌ߬ߘߊ߬ ߞߏ߫ ߕߣߐ߬ ߕߴߊ߬ߟߎ߬ ߟߊ߫، ߕߣߐ߬ߒ߬ߕߊ߲߬ߧߊ ߦߋ߫ ߦߙߐ ߡߍ߲ ߘߐ߫߸ ߏ߬ ߟߋ ߢߊߝߐߣߍ߲߫ ߣߌ߲߬، ߓߊߏ߬߸ ߞߏ ߣߎ߲ߖߟߎ ߦߋ߫ ߡߍ߲ ߠߎ߬ ߓߟߏ߫߸ ߏ߬ ߟߎ߫ ߖߍ߬ߘߍ ߟߋ߬ ߓߋ߬ߒ߬ߞߊ߲߬ߠߌ߲ ߞߊ߲߬، ߦߊ߯ߟߊ߫߸ ߏ߬ ߟߎ߬ ߘߴߊ߬ߟߎ߬ ߓߟߏߓߐ߫ ߊ߬ߟߎ߬ ߟߊ߫ ߕߐ߬ߣߐ ߘߐ߫ ߘߏ߫ ߡߊ߬ߤߌߣߊ߫ ߡߊ߬ ߓߊ߬؟ ߕߐ߬ߣߐ ߘߌ߫ ߘߊߕߐߘߐ߲߫ ߖߛߎߛߎߡߊ ߞߏߛߐ߲߬ ߓߊ߬؟ ߢߌ߬ߣߌ߲߬ߞߊ߬ߟߌ ߏ߬ ߟߎ߫ ߖߋ߬ߓߌ ߟߐ߲ ߠߋ߬ ߘߌ߫ ߓߍ߯ ߟߊߝߙߍ߫. ߓߊߏ߬߸ ߊ߬ ߦߋ߫ ߣߊ߲߬ߝߟߏ߬ߦߊ߬ ߟߴߊ߬ ߞߣߐ߫ ߖߡߊߣߊ ߡߍ߲ ߠߎ߬ ߓߟߏ߫߸ ߣߴߏ߬ ߟߎ߫ ߖߍ߬ߘߍ ߞߍ߫ ߘߊ߫ ߞߟߍ߬ߝߊ߬ ߘߌ߫߸ ߏ߬ ߛߐ߲߬ߕߐ߫ ߞߟߍ߬ߡߎߙߊ߲ ߘߌ߫ ߟߴߊ߬ߟߎ ߡߵߊ߬ߟߎ߫ ߖߘߍ߬ ߞߊ߲ߡߊ߬ ߘߌ߬؟

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.