ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬߸ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߡߊ߬ߟߐ߲߬ ߔߊ߬ߔߘߊ߬ ߢߎߡߍߙߋ߲ߡߊ ߛߌ߰ ߘߊ߫ ߛߋ߲߬ߠߊ߫ ߖߋ߬ߟߌ߬ߓߊ߬ߘߎ߯ ߖߡߊ߬ߣߊ ߞߊ߲߬، ߏ߬ ߖߊ߲߬ߖߏ߲ ߘߟߊߞߊ߬ ߘߴߊ߬ߟߎ߬ ߟߊ߫ ߞߊ߲ߕߌ߮ ߖߍ߬ߘߍ ߟߋ߬ ߓߟߏ߫߸ ߞߟߍ߬ߕߌ߰ ߊߓߘߎߙߊߤߑߡߊߣߌ߲߬ ߗߊ߬ߣߌ߲߬، ߊ߬ߟߋ ߟߋ߬ ߝߟߐ߫ ߛߐ߰ ߘߴߊ߬ ߟߊ߫ ߖߌ߬ߦߊ߬ߕߊ ߟߎ߫ ߡߊ߬ ߡߎߣߎ߲߬߸ ߞߵߏ߬ ߞߍ߫ ߓߊ߯ߙߊ߫ ߝߟߐ ߘߌ߫ ߒߞߘߐ߫.

ߞߊ߬ߦߌ߯ ߂߀߂߅ ߞߏߟߌ߲ߞߏߟߌ߲ ߂߆ ߟߋ߬ ߡߊ߬߸ ߞߏߕߌ߯ ߟߊߘߍ ߓߍ߲߬ ߘߊ߫ ߡߊ߬ߟߐ߲߬ ߔߊߔߘߊ ߣߌ߲߬ ߕߊ߬ ߞߏ ߡߊ߬ ߞߵߊ߬ ߞߍ߫ ߖߡߊ߬ߣߊ ߡߊ߬ߟߐ߲߬ ߔߊߔߘߊ ߘߌ߫، ߊ߬ ߘߏ߲߬߸ ߊ߬ߟߋ߬ ߡߊ߬ߟߐ߲߬ ߔߊߔߘߊ ߣߌ߲߬ ߓߊ߯ߙߊ ߞߍߣߍ߲߫ ߢߊ߫ ߟߋ߬ ߡߊ߬߸ ߡߍ߲ ߛߋߒߞߏߟߊߘߐߦߊ ߝߊ߲߬ߞߊ ߓߏ߲߬ߓߊ߫߸ ߊ߬ ߘߏ߲߬ ߞߏ ߟߎ߬ ߟߊߞߊ߲ߘߊߣߍ߲߫ ߞߊ߬ ߢߊ߬ ߖߐ߲ߖߐ߲߫. ߞߎ߲߬ߠߊ߬ߛߌ߮ ߖߍ߬ߘߍ ߟߋ߬ ߞߊ߲߫ ߕߋ߲߬.

ߡߙߌߦߊ߫ ߜߘߍ߫ ߦߴߊ߬ߟߎ߬ ߟߊ߫߸ ߏ߬ ߟߋ ߞߊ߬ߞߎߘߊ ߟߐ߲ߕߊ߫ ߕߊ߲ߓߊ߲ ߘߏ߫ ߛߌ߱ ߘߌ߫ ߛߋ߲߬ߠߊ߫߸ ߞߊ߲ߞߋߦߊ߫ ߟߊߞߊ߲ߘߊߣߍ߲ ߘߐ߫߸ ߊ߬ ߣߌ߫ ߢߎߡߍߙߋ߲߫ ߖߐ߯ߙߊ߲ ߠߎ߬߸ ߡߍ߲ ߘߌ߫ ߛߋ߫ ߡߌ߬ߙߌ߲߬ߘߌ ߟߊ߫ ߟߐ߲ߕߊ ߟߎ߬ ߡߊߡߊ߬ߙߊ ߣߐ߰ߦߊ߬ ߟߊ߫.

ߛߋߒߞߏߟߊߘߐߦߊ ߡߊ߬ߘߎ߮ ߝߣߊ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߣߊ߲߬ߝߟߏ ߘߏ߫ ߘߏ߲߬ ߡߐ߱ ߟߎ߬ ߟߊߞߐ߯ ߞߏ ߘߟߊ߫߸ ߖߐ߲߰ߛߊ߫ ߓߊ߯ߙߊ ߣߌ߲߬ ߘߌ߫ ߛߌ߬ ߛߐ߬ߘߐ߲߬، ߊ߬ߟߎ߫ ߞߊ߬ ߜߋ߬ߟߎ߲߬ߠߌ߲߬ ߘߍߘߊ ߘߏ߫ ߛߌ߰ ߛߋ߲߬ߠߊ߫ ߏ߬ ߟߋ ߘߐ߫߸ ߡߍ߲ ߠߎ߬ ߘߴߊ߬ߟߎ߫ ߘߐ߱ߘߏ߲߬ ߡߊ߬ߟߐ߲߬ ߔߊ߬ߔߘߊ߬ ߢߎߡߍߙߋ߲ߡߊ ߢߌ߲߬ ߠߎ߬ ߟߊߥߟߏ ߟߊ߫߸ ߊ߬ ߣߌ߫ ߕߊ߬ߡߌ߲߬ߛߓߍ߬ ߢߎߡߍߙߋ߲ߡߊ߸ ߤߊ߲߯ ߞߵߊ߬ ߛߌ߰ ߓߊ߯ߙߊ ߞߎ߲߬ߝߊ߮ ߟߊ߫.

ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߖߡߊ߬ߣߊ߫ ߛߊ߬ߓߊ ߡߙߌߦߊ ߦߋ߫ ߊ߬ߟߎ߬ ߟߊ߫ ߞߙߎߝߊߢߐ߲߯ߦߊ ߟߌߟߌ߲ ߓߊ߲ߓߊ߲ ߠߋ߬ ߘߌ߫ ߢߎߡߍߙߋ߲߫ ߛߌߟߊ ߝߍ߬.

ߡߊ߬ߟߐ߲߬ ߔߊߔߘߊ ߓߊ߯ߙߊ ߛߌ߱ ߡߍ߲ ߣߌ߲߬ ߛߋ߲߬ߠߊ߫߸ ߖߡߊ߬ߣߊ ߞߏߟߊߕߍ߯ ߛߌߦߊߡߊ߲߫ ߢߊ ߕߘߍ߬ ߜߍ ߘߐ߫߸ ߣߊ߲߬ߕߌ߮ ߟߎ߬ ߣߌ߫ ߣߊ߲߬ߒ߬ߕߊ߲ ߠߎ߬ ߘߐ߫، ߞߊ߬ߝߏ ߞߏߕߌ߮ ߡߍ߲ ߘߐ߱ߘߏ߲߬ߣߍ߲߫ ߞߣߐߟߊ ߟߊ߫߸ ߞߟߍ߬ߕߌ߯ ߡߏ߬ߤߊ߬ߡߍ߬ߘ ߕߎ߲ߓߊ߬ ߕߍ߬ߘߍ߫ ߦߋ߲߬، ߞߵߏ߬ ߟߊ߫ ߣߊ߲߬ߕߌ߰ ߝߊ߲ߞߊ ߣߌ߲߬ ߞߏߟߊߕߍ߯ ߛߌߦߊߡߊ߲߫ ߞߊ߲߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.