ߓߌߟߏ߲ ߂߀߂߆ ߕߙߊߓߊ ߕߋ߬ߟߋ߫ ߂߆ ߞߍ߫ ߘߊ߫ ߟߊ߬ߘߍ߫ ߡߊ߲߬ߞߊ߲߬ߡߊ߬ߓߊ߫ ߟߋ߬ ߘߌ߫ ߞߊ߲ߞߊ߲߫ ߞߣߐ߫߸ ߖߌ߬ߣߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߡߊߞߍ߫ ߦߌߟߊ ߘߐ߫، ߞߎߡߊ ߜߊ߬ ߘߊ߫߸ ߞߵߊ߬ ߞߟߊߦߊ߫ ߞߘߏߞߘߏ߫، ߓߊ߬ߙߵߊ߬ ߟߊߓߊ߲߫ ߘߊ߫ ߛߓߍߘߊ߫ ߞߘߐ ߥߊ߬ߦߊ ߟߋ߬ ߡߊ߬ ߗߋߘߋ߲߫ ߣߊ߬ߣߍ߲ ߠߎ߬ ߟߊ߫ ߓߍ߲߬ߡߊ ߟߊ߫ ߞߊ߬ ߓߐ߫ ߖߡߊ߬ߣߊ ߕߌ߲߬ߞߎߘߎ߲ ߠߎ߬ ߘߐ߫߸ ߞߣߊ߬ߕߏ߫ ߞߎߘߊ߫ ߜߘߍ߫ ߟߊߛߌ߰ ߟߊ߫ ߏ߬ ߕߎ߬ߡߊ.

ߓߌߟߏ߲ ߣߌ߲߬ ߡߊ߬߸ ߖߌ߬ߣߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߞߊ߬ ߟߊ߬ߘߍ߬ߓߊ߫ ߟߋ߬ ߛߌ߰ ߛߋ߲߬ߠߊ߫، ߘߏ߲߬ߛߏ ߟߎ߬ ߓߐ߫ ߘߊ߫ ߖߡߊ߬ߣߊ ߝߊ߲߭ ߓߍ߯ ߟߋ߬ ߘߐ߫߸ ߞߵߊ߬ߟߎ߫ ߞߎ߲߬ߛߌ߲߫ ߞߊ߲ߞߊ߲߫ ߠߊ߫ ߝߘߏ߬ߓߊ߬ ߜߙߊ ߞߊ߲ߡߊ߬، ߞߵߊ߬ ߦߌ߬ߘߊ߬ ߞߏ߫ ߛߓߍߘߊ߫ ߞߘߐ ߡߍ߲ ߦߋ߲߬߸ ߏ߬ ߓߘߴߊ߬ߟߎ߫ ߖߊ߲߬ߝߊ߫߸ ߞߵߊ߬ߟߎ߬ ߟߊ߫ ߟߊߒߠߦߊ ߕߌߢߍ߫ ߊ߬ߟߎ߬ ߘߐ߫، ߞߎߡߊ ߕߊ߬ ߘߊ߫ ߕߌ߲߬ߞߎߘߎ߲ ߣߌ߫ ߡߙߊ߬ߓߊ߰ߘߊ ߘߏ߲߬ߛߏ߬ ߞߏߟߊߕߍ߮ ߟߎ߬ ߓߍ߯ ߓߟߏ߫߸ ߞߵߊ߬ߟߎ߬ ߡߙߌߦߊ ߦߌ߬ߘߊ߫ ߞߊ߬ ߓߍ߲߬ ߛߓߍߘߊ ߟߊ߫ ߞߏ ߡߊ߬، ߏ߬ ߞߎߡߊ ߜߊ߬ ߘߊ߫߸ ߞߵߊ߬ ߘߐߛߊ߬ߡߊ߲߬ ߞߏߛߓߍ߫.

ߞߊ߬ߕߎ߲߯߸ ߊ߬ ߕߎ߬ߡߊ߬ ߖߊ߲ ߠߋ߬ ߕߋ߲߬߸ ߞߎ߬ߡߎ߲߫ ߢߐ߲߰ ߞߘߐ ߕߎ߲߬ ߦߴߊ߬ߟߎ߬ ߣߌ߫ ߢߐ߲߯ ߕߍ߫، ߓߊߏ߬߸ ߛߓߍߘߊ ߛߌ߲߬ߝߏ߲ ߡߍ߲ ߠߎ߬ ߦߋ߫ ߛߏߓߊ ߟߎ߬ ߣߌ߫ ߘߎ߰ߣߍ߲ ߠߎ߬ ߞߣߐ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߞߐߣߊߞߙߌ߫ ߛߓߍߘߊ ߟߊ߫ ߞߏߟߊߕߊ߯ߡߊ߫ ߢߊ ߡߴߊ߬ߟߎ߬ ߤߣߍ߫߸ ߡߙߌߦߊ߫ ߛߌߦߊߡߊ߲߫ ߠߋ߬ ߕߊ߬ ߟߊ߫߸ ߊ߬ߟߎ߬ ߕߍ߫ ߟߊߓߐ߫ ߟߊ߫ ߡߍ߲ ߠߎ߬ ߞߊ߬ߟߊߡߊ߬ ߘߎߢߊ߫ ߜߋߟߋ߲ߜߋߟߋ߲߫ ߞߏ߫ ߕߟߋ ߣߌ߲߬ ߘߐ߫، ߞߊ߬ߕߎ߲߯߸ ߞߏ߫ ߕߐ߮ ߟߋ߬ ߦߋ߫ ߊ߬ߟߎ ߟߊ߫ ߞߊ߬ ߝߐ߫ ߞߏ߫ ߊ߬ߟߎ߬ ߦߋ߫ ߝߊ߬ߛߏ ߛߓߍߘߊ ߘߐ߫߸ ߒ߬ߞߊ߬ ߞߏ߫ ߕߍ߫ ߛߙߊ߬ ߟߴߊ߬ߟߎ߬ ߟߊ߫߸ ߓߊ߯ߙߊ ߕߍ߫ ߞߍ߫ ߟߴߊ߬ ߢߊ ߡߊ߬.

ߝߊߕߎߡߊ߫ ߟߊ߯ߦߌ ߘߎ߲ߓߎߦߊ߫ ߡߍ߲ ߦߋ߫ ߞߟߌ߫ ߟߊ߫ ߓߍ߯ ߓߟߏ߫ ߞߏ߫ ߢߊ߲߬ߘߊ߲߫ ߟߊ߱ߦߌ߬߸ ߣߴߊ߬ ߦߋ߫ ߛߓߍߘߊ߫ ߟߊߥߟߏߕߊ ߣߌ߲߬ ߛߌ߲߬ߝߏ߲߬ ߘߌ߫߸ ߏ߬ ߞߊ߬ ߞߎߡߊ߫ ߘߐߖߊ߬ߣߍ߲߬ ߝߐ߫ ߟߊ߬ߘߍ߬ ߘߊߞߎ߲ ߣߌ߲߬ ߘߐ߫، ߊ߬ ߟߊ߫ ߞߎߡߊ ߡߊ߫ ߞߍ߫ ߕߡߊ߬ߖߌ߬ ߞߎߡߊ߫ ߘߌ߫، ߊ߬ ߞߵߊ߬ ߦߌ߬ߘߊ߬ ߞߏ߫ : <<ߝߊ߬ߛߏ ߛߓߍߘߊ ߓߘߊ߫ ߓߋ߬ ߓߌ߬߸ ߝߊ߬ߛߏ ߛߓߍߘߊ߫ ߕߴߦߋ߲߬ ߡߎ߬ߕߎ߲߬، ߊ߲ ߓߘߴߊ߲ ߖߘߍ߬ ߟߊߓߋ߬ ߓߌ߬، ߊ߲ ߠߊ߫ ߛߓߍߘߊ ߞߣߐ߫߸ ߢߐ߲߯ ߠߊߟߐ߲ߠߌ߲߫ ߕߎ߲߬ ߕߍ߫ ߞߍ߫ ߟߊ߫߸ ߞߏߟߊߒߞߘߐߢߐ߲߯ߦߊ߫ ߕߍ߫ ߞߍ߫ ߟߊ߫، ߞߏ ߡߍ߲ ߠߎ߬ ߦߋ߫ ߕߊ߬ߡߌ߲߬ ߠߊ߫߸ ߊ߲ߠߎ߬ ߛߓߍߘߊ߫ ߞߣߐ߫ ߡߐ߮ ߟߎ߬ ߕߍ߫ ߝߏߦߌ߬ ߞߊ߬ߟߊߡߊ߬.>> ߊ߬ ߞߵߏ߬ ߟߋ ߝߐ߫ ߟߊ߬ߘߍ߬ ߖߡߊ ߣߌ߲߬ ߘߐ߫.

ߞߎߡߊ ߞߟߊߦߊ ߣߴߊ߬ ߕߊ߫߸ ߢߊ߲߬ߘߊ߲߫ ߟߊ߱ߦߌ߬ ߞߊ߬ ߘߊ߲߭ߛߌ߰ ߝߊߘߌ߲ߧߊ߫ ߞߊ߲߫ ߝߐ ߟߊ߫، ߊ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߡߊ߫ ߣߊ߬ ߞߟߍ߬ ߞߊ߲ߡߊ߬ ߦߊ߲߬، ߊ߲ ߧߋ߫ ߖߐ ߟߋ߬ ߝߍ߬߸ ߦߏ߫ ߞߊ߲ߓߍ߲ ߞߊ߲ߕߌ߮ ߖߍ߬ߘߍ ߣߕߊ߬ߣߍ߲߫ ߏ߬ ߡߊ߬ ߢߊ ߡߍ߲ ߡߊ߬.>> ߞߵߏ߬ ߝߐ߫ ߞߵߊ߬ ߟߊߥߟߌ߬ ߞߏ ߟߎ߬ ߘߐߛߎߡߊ ߟߊ߫߸ ߏ߬ ߕߎ߬ߡߊ ߦߙߐ ߞߟߊߡߊ߲߫ ߞߎߡߊ߫ ߝߊߘߌߡߊ߲߫ ߝߐ ߟߎ߬ ߟߊ߫ ߞߊߕߌ߫.

ߞߊ߬ ߓߍ߲߬ ߞߎߡߊ߫ ߝߐ߲ߣߍ߲ ߠߎ߬ ߡߊ߬߸ ߓߊߏ߬ ߖߡߊ߬ߣߊ ߘߏ߲߬ߛߏ߬ ߘߎ߮ ߓߍ߯ ߟߋ߬ ߓߍ߲߬ ߘߊ߫ ߛߓߍߘߊ ߟߊߓߋ߬ ߞߏ ߡߊ߬، ߞߎߡߊ ߕߊ߬ ߘߊ߫ ߦߙߐ߫ ߛߌ߫ ߓߟߏ߫߸ ߏ߬ ߟߎ߬ ߓߍ߯ ߓߍ߲߬ ߘߊ߫ ߞߊ߲߫ ߞߋߟߋ߲߫ ߠߋ߬ ߡߊ߬، ߒ߬ߓߊ߬߸ ߞߎߟߎ߲ߝߊ߲߫ ߘߋ߲ߓߊ ߞߡߊ߬ߙߊ߬ ߡߍ߲ ߕߎ߲߬ ߦߋ߫ ߝߊ߬ߛߏ ߛߓߍߘߊ ߞߎ߲߬ߠߊ߬ ߞߐߣߊߞߙߌ߫߸ ߏ߬ ߡߊ߫ ߛߐ߲߬ ߊ߬ ߞߟߏ߫ ߟߊ߫ ߞߎߡߊ߫ ߝߐߣߍ߲ ߏ߬ ߟߎ߬ ߞߘߐ߫، ߊ߬ ߛߊ߬ߙߌ߬ߣߍ߲ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߦߌ߬ߘߊ߬ ߞߏ߫ ߡߊ߬ߝߌ߲߬ߞߊ߲߬ߠߊ ߡߍ߲ ߠߎ߬ ߝߐߣߍ߲߫ ߊ߬ ߞߊ߲ߡߊ߬߸ ߊ߬ ߡߊ߫ ߓߍ߲߬ ߏ߬ ߟߎ߫ ߡߊ߬، ߓߊߏ߬߸ ߊ߬ ߢߊ߯ ߞߎߡߊ ߏ߬ ߟߎ߬ ߟߊ߫ ߕߋߟߋ߲ߓߊߟߌߦߊ߫ ߞߎߡߊ ߣߌ߫ ߕߐ߬ߢߍ߰ ߞߎߡߊ ߟߋ߬ ߘߌ߫.

<<ߊ߲ߠߎ߬ ߦߋ߫ ߓߊ߯ߙߊ߫ ߟߊ߫ ߞߐߣߊߞߙߌ߫ ߟߋ߬، ߡߍ߲ ߠߎ߬ ߦߋ߫ ߞߣߐߟߊ ߘߐ߫ ߦߊ߲߬߸ ߏ߬ ߟߎ߬ ߕߍ߫ ߛߋ߫ ߟߊ߫ ߞߐߣߊߞߙߌ߫ ߝߊߦߌߘߊ߫.>> ߊ߬ ߞߵߏ߬ ߝߐ߫ ߖߘߍ߬ߡߞߊ߬ߘߊ߲߬ ߞߊ߲߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߡߊ߫ ߕߌߢߍ߫ ߊ߬ ߞߋߟߋ߲߫ ߓߟߏ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ <<ߊ߬ߟߎ߬ ߓߊ߯ ߞߍ߫ ߊ߬ߟߎ߫ ߓߊ߲߬ ߠߊ߫ ߒ ߘߐ߫߸ ߊ߬ߟߎ߬ ߦߴߊ߬ ߝߐ߫ ߘߋ߲߬ߓߊ߬ ߒ ߕߴߌ ߝߍ߬߸ ߡߊ߲߬ߛߊ߬ߦߊ ߦߋ߫ ߥߊ߯ߕߌ ߟߋ߬ ߘߌ߫، ߊ߬ ߞߏ߬ߣߌ߲߸ ߒ ߠߊ߫ ߛߓߍߘߊ ߡߍ߲ ߦߋ߫ ߞߐߣߊߞߙߌ߫߸ ߏ߬ ߟߎ߬ ߦߋ߫ ߓߊ߯ߙߊ߫ ߟߊ߫.>>

ߊ߬ ߞߵߊ߬ ߖߊ߬ ߞߎߡߊ߫ ߞߋߟߋ߲߫ ߞߊ߲߬߸ ߞߊ߬ ߓߍ߲߬ ߘߏ߲߬ߛߏ߬ߦߊ ߕߋߟߋ߲ߓߊ߯ߦߊ ߡߊߓߏ߲߬ߧߊ ߡߊ߬ ߡߊ߲߬ߘߋ߲߬ ߓߏߙߌ߫ ߕߐ߯ ߘߐ߫،  ߊ߬ ߞߵߊ߬ ߦߌ߬ߘߊ߬ ߞߏ߫: <<ߒߠߋ ߓߊ߯ ߓߐ߫ ߦߋ߲߬߸ ߕߣߊ߬ ߕߍ߫ ߘߋ߬، ߌ ߘߴߊ߬ ߕߘߍ߬ ߥߊ߯ߕߌ ߓߘߊ߫ ߛߋ߫، ߓߊ߬ߙߌ߬߸ ߊߟߎ߫ ߓߊ߯ ߞߍ߫ ߊ߬ ߞߍ߫ ߟߊ߫߸ ߊߟߎ߫ ߦߴߊ߬ ߞߍ߫ ߕߋߟߋ߲ ߞߊ߲߬߸ ߞߵߊ߬ ߞߍ߫ ߕߎ߬ߢߊ ߞߊ߲߬.>> ߞߎߡߊ ߏ߬ ߡߍ߲ ߞߍ߫ ߘߊ߫ ߞߎߡߊߣߍ߲߫ ߢߊ߬ߡߊ߲߬ߕߐ߬ ߘߌ߫߸ ߞߊ߬ ߟߊ߬ߘߍ߬ ߖߡߊ ߟߐ߬ ߞߎߡߊ ߞߐߛߊ߬ߦߌ߲߬ ߠߴߊ߬ ߞߊ߲ߡߊ߬ ߞߏߞߎߘߊ߫.

ߛߏߡߊ߫ ߕߎ߬ߙߋ߫ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߦߌ߬ߘߊ߬ ߞߏ߫ ߘߊߘߐߡߌߘߊ߫ ߞߎ߲ߧߊ߫ ߕߍ߫ ߘߏ߲߬ߛߏ߫ ߘߋ߲߬ߓߊ߬ ߟߊ߫، ߊ߬ ߞߊ߬ ߞߎߡߊ ߝߐ߫ ߥߛߊߞߙߊ߫ ߞߵߊ߬ ߦߌ߬ߘߊ߬ ߞߏ߫: <<ߜߋߟߋ߲ߜߋߟߋ߲߫ ߞߏ߫ ߕߟߋ ߣߌ߲߬ ߘߐ߫߸ ߣߴߌ ߞߊ߬ ߡߍ߲ ߥߟߋ߫߸ ߣߴߏ߬ ߡߊ߫ ߛߐ߲߬ ߥߊ߫ ߟߊ߫߸ ߏ߬ ߣߐ߬ߘߐߓߌ߬ߟߊ߬.>> ߊ߬ ߞߵߏ߬ ߟߋ ߞߍ߫ ߘߏ߲߬ߛߏ߫ ߘߋ߲߬ߓߊ߬ ߟߊ߫ ߞߎߡߊ ߞߐߞߊߘߌ߫ ߞߎߡߊ ߘߌ߫߸ ߖߊ߬ߡߊ ߞߊ߬ ߕߍ߯ߜߊ߬ߛߌ߬ ߡߍ߲ ߞߐ ߘߐ߫.

ߛߏߡߊ߫ ߕߎ߬ߙߋ߫ ߘߏ߲߬ ߞߵߊ߬ ߟߊ߫ ߞߎߡߊ ߞߎ߲߭ߝߊ߰ ߘߊ ߢߊ߫ ߞߋߟߋ߲߫ ߠߋ߬ ߟߊ߫߸ ߏ߬ ߦߋ߫ ߡߎ߲߬ ߘߌ߫ <<ߊ߲ ߕߍ߫ ߞߍ߬ߟߍ߫ ߝߍ߬ ߡߎ߬ߕߎ߲߬߸ ߊ߲ ߘߏ߲߬ ߕߍ߫ ߥߊ߫ ߟߊ߫ ߡߐ߰ ߝߍ߬ ߜߘߌ߫ ߘߐ߫، ߞߵߊ߬ ߝߐ߫ ߞߏ߫ ߊ߲ ߓߴߊ߬ ߕߎ߲߬ߕߎ߲߫ ߡߎ߬ߕߎ߲߬ ߞߊ߬ ߡߐ߰ ߟߊߛߌ߰߸ ߡߍ߲ ߝߣߊ߫ ߘߌ߫ ߖߊ߬ߡߊ ߣߌ߭ ߘߊߥߎ߲߫߸ ߊ߲ ߕߴߏ߬ ߝߍ߬، ߡߌ߲ ߓߍ߫ ߖߊ߬ߡߊ ߣߌ߭ ߡߞߊߘߊ߲߫߸ ߊ߲ ߧߴߊ߲ ߓߟߏ ߟߐ߬ ߟߊ߫ ߏ߬ ߟߋ ߟߊ߫ ߣߌ߲߬ߛߋ߲߭.>> ߊ߬ ߞߵߊ߬ ߦߌ߬ߘߊ߬ ߞߏ߫ ߡߍ߲ ߓߊ߯ ߞߍ߫ ߟߊߛߌ߰ ߟߊ߫ ߡߎ߬ߕߎ߲߬߸ ߝߏ߫ ߣߴߏ߬ ߥߊ߫ ߘߊ߫ ߕߏ߲߭ ߠߊ߫ ߞߊ߬ ߥߏ߬ߙߏ ߢߌߡߌ߲߫ ߞߵߊ߬ ߛߍ߲߫.

ߛߞߌߝߟߌ߫ ߛߌߦߊߡߊ߲ ߣߌ߲߬ ߓߍ߯ ߞߐߝߍ߬߸ ߘߏ߲߬ߛߏ ߟߎ߫ ߓߍ߲߬ ߘߊ߫ ߞߊ߲߫ ߞߋߟߋ߲߫ ߡߊ߬، ߖߊ߬ߡߊ ߓߍ߲߬ ߘߴߊ߬ ߡߊ߬ ߞߏ߫ ߞߊ߬ ߛߓߍߘߊ߫ ߞߘߐ ߟߊ߫ ߞߎߡߊ ߦߟߍ߬ߡߊ߲߫ ߡߎ߬ߕߎ߲߬߸ ߞߊ߬ ߞߎߘߊ߫ ߟߊߛߌ߰߸ ߡߍ߲ ߘߌ߫ ߘߏ߲߬ߛߏ ߟߎ߬ ߡߊߡߙߊ߬ ߦߊ߬ߣߌ߫ ߢߣߊߕߊߟߌ ߦߋ߫ ߞߍ߫.

ߡߏ߬ߙߌ߬ߓߊ߫ ߘߊ߲߬ߕߟߌ߬ ߞߋߕߊ߬ ߡߍ߲ ߦߋ߫ ߞߟߌ߫ ߟߊ߫ ߞߏ߫ <<ߞߐ߬ߡߊ߲߬ߘߊ߲߬ ߞߌߟߏ߬>> ߊ߬ߟߋ ߦߋ߫ ߖߡߊ߬ߣߊ ߞߊ߲ߕߌ߯ߘߊ ߞߣߐ߬ߜߍ߲߬ߘߋ߲ ߘߏ߫ ߟߋ߬ ߘߌ߫߸ ߊ߬ߟߎ߫ ߞߵߏ߬ ߟߋ ߞߍ߫ ߞߊ߲ߕߌ߮ ߘߌ߫، ߡߎߛߊ߫ ߞߎ߬ߟߌߓߊ߬ߟߌ߬ ߡߍ߲ ߝߣߊ߫ ߕߎ߲߬ ߦߋ߫ ߞߊ߲ߞߊ߲߫ ߣߌ߫ ߒߛߙߍߜߍ߬ߘߍ߫ ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߘߊ ߘߐ߫߸ ߏ߬ ߞߍ߫ ߘߊ߫ ߞߊ߲ߕߌ߯ ߛߙߍߞߍ ߘߌ߫، ߏ߬ ߘߌߦߊ߫ ߘߊ߫ ߟߊ߬ߘߍ߬ ߖߡߊ ߣߌ߲߬ ߛߌߦߊߡߊ߲߫ ߦߋ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߞߎ߲߬ߠߊ߬ߘߌߦߊ߫ ߟߵߏ߬ ߘߌ߫، ߓߊߏ߬߸ ߛߓߍߘߊ߫ ߞߘߐ ߟߊ߫ ߞߏ ߕߎ߲߬ ߓߘߊ߫ ߛߌ߰ ߊ߬ߟߎ߬ ߣߌ ߞߊ߲߬.

ߡߎߛߊ߫ ߞߎ߬ߟߌߓߊ߬ߟߌ߬ ߘߊ ߢߊ߫ ߝߟߐ ߘߐ߫߸ ߖߋߟߌ߫ ߞߘߐ ߡߍ߲ ߠߎ߬ ߘߐߜߊ߬ߣߍ߲߫ ߕߘߍ߬߸ ߊ߬ ߞߊ߬ ߓߊߛߌ߫ ߞߍ߫ ߏ߬ ߟߎ߬ ߟߊ߫، <<ߖߡߊ߬ߣߊ ߕߌ߲߬ߞߎߘߎ߲ ߓߍ߯ ߘߏ߲߬ߛߏ߫ ߞߐߦߌ߬ߘߊ߬ߣߍ߲߫ ߕߘߍ߬ ߜߍ ߘߐ߫ ߦߊ߲߬، ߊ߲ ߞߊ߫ ߞߊ߲߫ ߞߊ߬ ߓߍ߲߭ ߠߋ߬ ߓߌ߬ߟߊ߬ ߢߍߝߍ߬، ߊ߲ ߧߴߊ߬ ߟߐ߲߫ ߞߏ߫ ߝߘߊߝߘߊߟߌ ߦߴߊ߲ ߝߊ߲߬ߞߊ ߟߊߕߍ߰ ߟߊ߫ ߟߋ߬߸ ߞߊ߬ ߝߊ߰ߡߊ ߟߎ߬ ߛߌߟߊ߲߫ ߊ߲ ߧߋ߫߸ ߞߵߊ߲ ߘߍ߬ߡߍ߲߬ߓߊ߮ ߟߎ߬ ߡߊߓߐ߫ ߊ߲ ߠߊ߫.>> ߊ߬ ߞߵߏ߬ ߦߌ߬ߘߊ߬ ߞߎߡߊ ߘߐ߫، ߞߣߊ߬ߕߏ߫ ߊ߬ ߞߊ߲ߠߊߘߌ߫ ߟߊ߫ ߘߏ߲߬ߛߏ߬ ߕߐ߲ ߓߍ߯ ߡߊ߬ ߞߍߞߋߟߋ߲ߘߌ ߘߐ߫: <<ߘߏ߲߬ߛߏ ߓߍ߯ ߦߋ߫ ߓߊ߯ߙߊ߫ ߞߋߟߋ߲߫ ߠߋ߬ ߞߊ߲߬߸ ߓߍ߯ ߦߋ߫ ߡߙߌߦߊ߫ ߞߋߟߋ߲߫ ߠߋ߬ ߞߊ߲߬، ߊ߲ ߞߊ߫ ߞߊ߲߫ ߞߵߊ߲ ߓߟߏ ߘߌ߫ ߢߐ߲߮ ߡߊ߬߸ ߞߵߊ߲ ߠߊ߫ ߖߡߊ߬ߣߊ ߟߐ߬.>>

ߊ߬ߟߎ߬ ߟߊ߫ ߢߐ߲߯ ߠߊߘߍ ߣߌ߲߬ ߞߍߕߐ߫ ߕߍ߬ߘߍ߫ ߟߊ߬ߘߍ߬ ߟߊߞߊ߬ߟߌ߬ߕߊ߬ߓߊ߫ ߟߋ߬ ߘߌ߫، ߓߊ߬ߙߌ߬߸ ߞߊ߬ ߓߍ߲߬ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߟߊ߫ ߞߎߡߊ ߡߊ߬ ߛߊ߫߸ ߊ߬ߟߎ߫ ߞߵߊ߬ ߞߏ ߡߊߓߍ߲߬.

ߡߊ߲߬ߘߋ߲߬ ߟߐ߲ߠߌ߲ߦߊ ߦߋ߫ ߘߏ߲߬ߛߏ ߟߎ߫ ߟߋ߬ ߕߊ߫ ߓߟߏ ߡߊ߬ ߡߎ߬ߕߎ߲߬ ߝߊߦߌߘߊ߫، ߊ߬ߟߎ߫ ߘߏ߲߬ ߟߐ߬ߘߎ߮ ߓߏ߲߬ߓߊ߫ ߖߡߊ߬ߣߊ ߞߣߐ߫ ߞߏߛߓߍ߫، ߒ߬ߓߊ߬߸ ߊ߬ߟߎ߬ ߓߍ߯ ߞߵߊ߬ ߦߌ߬ߘߊ߫ ߟߊ߬ߘߍ ߣߌ߲߬ ߘߐ߫߸ ߞߏ߫ ߣߴߊ߬ߟߎ߬ ߡߊ߫ ߓߍ߲߬߸ ߊ߬ߟߎ߬ ߕߍߣߊ߬ ߛߋ߫ ߟߊ߫ ߝߏߦߌ߬ ߟߊ߫. ߏ߬ ߟߋ ߘߐ߫߸ ߟߊ߬ߘߍ ߣߌ߲߬ ߕߐ߬ߣߐ ߞߍ߫ ߘߴߊ߬ ߟߊ߫ ߞߏߛߓߍ߫߸ ߞߵߏ߬ ߞߎ߲߭ ߞߍ߫ ߞߎߡߊ ߟߎ߬ ߝߐ ߘߌ߫߸ ߞߵߊ߬ߟߎ߫ ߝߊ߬ߙߊ ߓߐ߫ ߊ߬ ߡߊ߬߸ ߢߐ߲߯ ߢߊߦߋ ߣߌ߫ ߞߏ ߘߐߓߍ߲߬ ߛߌߟߊ ߞߊ߲߬. ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.