ߟߊ߬ߛߋ߬ߟߌ߬ ߛߓߍ ߘߏ߫ ߟߋ߬ ߦߋ߫ ߘߴߊ߲ ߓߟߏ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߋ߬ߟߋ߫ ߂߅߸ ߊ߬ ߛߓߍߣߍ߲߫ ߡߍ߲ ߞߣߐ߫ ߞߏ߫ ߡߙߊ߬ߓߊ߰ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߫߸ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߏ߬ ߞߊ߬ ߟߊ߬ߕߍ߰ ߞߍ߫ ߘߊ߯ ߊ߬ߟߌ߬ߡߊߡߌ߲߫ ߛߊ߭ߡߏ߬ߙߌ߬ ߘߊ߲ߘߊߛߏ ߟߊ߫ ߀߄ߕߎߡߊ߃߅ ߡߊ߬، ߛߓߍ ߣߌ߲߬ ߝߘߊ߫ ߘߊ߫ ߥߛߎߓߏ߲ ߡߊ߬ߡߙߊ߬ߟߌ ߗߋߕߌ߯ߘߊ߫ ߝߊ߬ߛߏ߬ߟߊ߬ߞߊ ߟߋ߬ ߟߊ߫، ߘߊ߬ߘߌߛ ߞߡߊ߬ߙߊ߬ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲ ߡߍ߲ ߦߋ߫ ߕߋ߲߬߸ ߊ߬ߟߋ ߓߌ߬ߟߊ߬ߣߍ߲߫ ߕߍ߬ߘߍ߫ ߛߊ߲߬ ߕߊ߲߫ ߥߛߎ ߟߋ߬ ߟߊ߫߸ ߡߐ߰ߦߊ ߞߎ߲߬ߞߏ߬ߓߊ߬ߕߐ߬ߦߊ ߞߏߛߐ߲߬، ߊ߬ ߟߊ߫ ߛߊ߬ߦߊ ߣߌ߲߬ ߘߓߌ߬ ߦߙߐ ߞߏ߬ߣߌ߲߬ ߛߌߦߊߦߊ߫ ߘߊ߫߸ ߞߵߏ߬ ߕߎ߬ߙߎ ߞߍ߫ ߊ߬ ߟߊ߫ ߞߏ ߟߊߝߌߙߌ߲ߝߌߙߌ߲߫ ߦߙߐ ߕߌ߰ߛߌ߬ߕߊ߰ߛߊ߬ ߦߙߐ ߥߊ߬ߙߊ ߘߌ߫ ߞߐߛߊ߲ ߢߌ߲߬ ߠߊ߫.

ߟߊ߬ߛߋ߬ߟߌ߬ ߛߓߍ ߡߍ߲ ߦߋ߫ ߕߋ߲߬߸ ߊ߬ ߦߌ߬ߘߊ߬ߣߴߊ߬ ߞߣߐ߫ ߞߏ߫ ߊ߬ ߞߎ߲߬ߢߐ߲߰ ߦߙߌߞߊ ߟߋ߬ ߕߋ߲߬߸ ߕߎ߲ߓߊ߬ ߦߋ߫ ߝߊ߬ߘߌ ߖߐ߲ߖߐ߲߫ ߕߎ߲߬ ߕߴߊ߬ ߞߊ߲߬، ߞߊ߬ߕߎ߲߯߸ ߤߊߟߌ߬ ߂߀߂߆ ߕߙߊߓߊ ߣߌ߲߬ ߕߟߋ߬ ߄ ߡߊ߬߸ ߌߢߊߛ ߘߌߣ ߘߊ߲ߘߊߛߏ ߘߊ߲ߘߊߟߌߟߊ ߟߎ߫ ߞߊ߬ ߞߊ߲߬ߞߎߡߊ ߘߏ߫ ߟߊߓߐ߫ ߊ߬ ߟߊ߫ ߞߏ ߞߊ߲߬، ߏ߬ ߞߍ߫ ߘߊ߫ ߟߋ߬ ߞߵߊ߬ ߛߐ߬ߘߐ߲߬ ߊ߬ ߟߊ߫ ߟߊ߬ߝߛߊ߬ߟߌ߬ߟߊ߫ ߞߊ߬ߙߊ߲߬ߡߐ߯ ߟߊ߲߭ߛߌ߬ߣߍ߫ ߛߌ߬ߟߊ ߢߊ ߕߘߍ߬ ߜߍ ߘߐ߫، ߊ߬ ߦߌ߬ߘߊ߬ ߘߊ߫ ߛߓߍ ߏ߬ ߞߣߐ߫ ߞߏ߫ ߊ߬ ߟߊ߫ ߖߊ߲߲߬ߞߊߙߏ ߤߊߡߌ߲ ߞߊ߫ ߞߊ߲߫ ߞߊ߬ ߛߌ߰ ߡߐ߰ ߟߊ߫߸ ߓߊߏ߬߸ ߊ߬ߟߎ߫ ߞߵߊ߬ ߦߋ߫ ߞߏ߫ : ߊ߬ ߞߣߐ ߕߎ߲߬ ߓߘߊ߫ ߝߍ߫ ߊ߬ ߟߊ߫߸ ߞߣߐ߫ ߘߌߡߌ߲߫ ߓߊ߲ߓߊߟߌ ߦߴߊ߬ ߞߊ߲߬߸ ߞߣߐߖߊ߫ ߟߊߝߛߊ߬ߣߍ߲ ߝߣߊ߫ ߛߋ߲߬ ߦߴߏ߬ ߘߐ߫߸ ߞߵߏ߬ ߟߊ߫ ߛߎ߬ߣߐ߰ߓߊߟߌߦߊ ߞߊ߲߬، ߏ߬ ߓߍ߯ ߟߋ߬ ߦߋ߫ ߘߊ߫ ߞߊ߲߬ߞߎߡߊ ߣߌ߲߬ ߘߐ߫.

ߕߙߊߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߝߊ߬ߘߌ߬ߘߐ߬ߓߊ߲ ߞߵߊ߬ ߞߍ߫ ߕߎ߲ߓߊ߬ ߞߊ߲߬ ߞߐ߰ߦߊ߬ ߥߛߎߖߌ߲ߓߊ ߟߊ߫߸ ߏ߬ ߞߍ߫ ߘߊ߫ ߕߙߎ߬ ߘߌ߫ ߞߵߊ߬ ߟߊߓߐ߫ ߥߛߎ ߟߊ߫ ߦߋ߲߬ ߞߊߟߌߦߊ߫ ߘߐ߫ ߞߊ߬ ߥߴߊ߬ ߘߌ߫ ߞߐߣߊߞߙߌ߫، ߊ߬ ߦߌ߬ߘߊ߬ ߘߊ߫ ߞߏ߫ ߞߎ߲߬ߠߊ߬ߛߌ߮ ߞߵߊ߬ ߛߋߞߏ ߞߍ߫ ߏ߬ ߞߏ ߘߐ߫ ߟߋ߬ ߝߛߊߦߌ߫߸ ߞߵߊ߬ ߕߊ߬ ߢߊ߫ ߡߊ߬߸ ߦߏ߫ ߡߐ߰ ߘߌ߫ ߖߊ߲߬ߞߊ߬ߙߏ߬ߕߐ߬ ߜߍߟߍ߲ ߠߊ߫ ߞߏ ߕߊ߬ ߢߊ ߡߍ߲ ߡߊ߬߸ ߏ߬ ߞߎߡߊ ߝߐ߫ ߞߕߌ ߝߊ߰ߡߊ ߟߎ߬ ߓߟߏ߫߸ ߘߊ߲ߘߊߟߌ ߝߊ߬ߘߌ߬ ߢߌߡߊ ߘߐ߫ ߞߊ߬ߣߌ߲߬، ߡߊ߬ߝߟߍ߬ߟߌ ߡߍ߲ ߞߍ߫ ߘߊ߫ ߏ߬ ߘߐ߫߸ ߊ߬ ߦߋ߫ ߘߊ߫ ߞߏ߫ ߞߍ߬ߙߍ߲ ߓߘߴߊ߬ ߛߍ߰ ߞߊߕߌ߫߸ ߏ߬ ߡߍ߲ ߕߎ߲߬ ߞߍ߫ ߘߊ߫ ߕߙߎ߬ ߘߌ߫ ߞߵߊ߬ ߖߋ߬ߟߌ ߟߊ߫ ߖߌ߰ߣߌ߬ߦߟߍ ߝߊ߲߬ߞߊ ߖߌ߰ ߞߐߝߌ߫.

ߕߎ߲ߓߊ߬ ߟߊ߫ ߛߊ߬ߦߊ ߣߌ߲߬ ߞߍ߫ ߘߊ߫ ߖߊ߲߬ߖߏ߲߬ ߛߌߦߊߡߊ߲߫ ߠߋ߬ ߕߊ߬ߡߌ߲ ߞߐߝߍ߬߸ ߊ߬ ߟߊ߫ ߥߛߎ ߞߎ߲߬ߕߊ߮ ߣߌ߲߬ ߞߣߐ߫، ߓߊߏ߬߸ ߂߀߂߆ ߞߏ߲ߞߏߜߍ ߕߋ߬ߟߋ߫ ߉ ߣߴߊ߬ ߕߟߋ߬ ߁߀ ߡߊ߬߸ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߟߊߓߐ߫ ߘߊ߫ ߞߐߣߊߞߙߌ߫ ߥߛߎߖߌ߲ߓߊ ߟߊ߫߸ ߞߵߊ߬ ߟߊߕߊ߯ ߞߐ߰ߦߊ߬ ߕߊ ߟߊ߫، ߞߵߏ߬ ߞߎ߲߭ ߞߍ߫߸ ߊ߬ ߟߊ߫ ߝߢߊ ߘߌ߫، ߏ߬ ߟߋ ߘߐ߫߸ ߖߊ߬ߡߊߙߌ ߘߌ߫ ߘߊ߫ ߞߵߊ߬ ߟߊߓߐ߫ ߞߐ߬ߙߐ߲߬ߕߌ߫ ߞߵߊ߬ ߟߊߕߊ߯ ߞߐ߰ߦߊ߬.

ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߞߊ߲ߘߊ߸ ߝߊ߬ߟߎ߫ ߘߎ߲߬ߓߎ߬ߦߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߘߐ߬ߖߎ߰ߖߎ߰ߟߌ ߘߏ߫ ߟߋ߬ ߛߌ߰ ߛߋ߲߬ߠߊ߫ ߞߐߣߊߞߙߌ߫ ߥߛߎߖߌ߲ߓߊ ߟߊ߫߸ ߊ߬ߟߎ߬ ߥߊ߫ ߘߊ߫ ߝߋ߲ ߘߏ߫ ߟߎ߫ ߦߋ߫߸ ߡߍ߲ ߠߎ߬ ߟߊߕߐ߲ߣߍ߲߫ ߣߴߊ߬ߟߎ߬ ߡߊ߲߫ ߞߊ߲߫ ߞߊ߬ ߘߏ߲߬ ߥߛߎ ߟߊ߫، ߒ߬ߓߊ߬߸ ߕߎ߲ߓߊ߬ ߞߊ߬ ߞߏ߫ ߟߋ߬ ߞߍ߫ ߦߋ߲߬ ߏ߬ ߟߏ߲߸ ߊ߬ ߖߊߡߊ߲߫ ߘߊ߫ ߢߊ߫ ߟߋ߬ ߡߊ߬ ߏ߬ ߟߏ߲߸ ߡߍ߲ ߡߊ߫ ߘߌߦߊ߫ ߥߛߎ ߞߣߐ߬ߜߍ߲߬ߓߊ߮ ߟߎ߬ ߦߋ߫، ߓߊߏ߬߸ ߊ߬ ߞߏ ߞߍ߫ ߘߊ߫ ߡߊ߲߬ߞߊ߲߬ߓߊ߫ ߟߋ߬ ߘߌ߫ ߦߋ߲߬ ߏ߬ ߟߏ߲߸ ߡߊ߬ߙߌ߬ߝߊ߬ ߡߊ߲ߞߊ߲ ߓߐ߫ ߘߊ߫ ߡߍ߲ ߘߐ߫߸ ߞߊ߬ ߘߏ߫ ߟߎ߫ ߓߐ߬ߣߐ߫ ߊ߬ߟߎ߬ ߣߌ ߘߐ߫ ߥߛߎߟߊߘߋ߲ ߠߎ߬ ߘߐ߫߸ ߞߊ߬ ߘߏ߫ ߟߎ߫ ߖߐߞߌ߫.

ߏ߬ ߛߌߟߊ߫ ߞߋߟߋ߲ ߠߋ߬ ߝߍ߬߸ ߊ߬ ߟߊߕߊ߯ ߘߊ߫ ߞߐ߰ߦߊ߬߸ ߊ߬ ߟߊ߫ ߖߊ߲߬ߞߊߙߏ ߖߎ߯ߦߊ߫ ߘߊ߫ ߦߋ߲߬߸ ߝߏ߫ ߝߊ߬ߘߌ ߘߐߓߊ߲߫ ߘߊ߫߸ ߞߵߏ߬ ߟߊߓߊ߲߫ ߟߊߣߊ߭ ߡߊ߬ ߞߐߣߊߞߙߌ߫ ߘߊ߯ ߛߊ߭ߡߏ߬ߙߌ߬߸ ߏ߬ ߟߋ ߞߎ߲߭ߘߏ߲߬ߣߍ߲߫ ߛߊ߬ߦߊ ߟߊ߫ ߕߋ߲߬ ߛߊ߫.

ߕߎ߲ߓߊ߬ ߖߊ߬ߞߌ߬ߕߋ߫ ߛߐ߬ߘߐ߲߬ ߘߊ߫ ߁߉߆߈ ߞߏ߲ߞߏߘߓߌ ߕߟߋ߬ ߃߀ ߟߋ߬ ߡߊ߬ ߞߐߣߊߞߙߌ߫߸ ߊ߬ ߕߍ߬ߘߍ߫ ߣߊ߲߬ߕߌ߰ ߘߊ߲ߘߊߟߌߟߊ ߟߋ߬ ߘߌ߫، ߡߍ߲ ߡߊߟߐ߲߫ ߘߊ߫ ߡߐ߰ ߛߌߦߊߡߊ߲߫ ߓߟߏ߫ ߂߀߀߈ ߞߊ߬ߝߏ߬ ߖߊߛߏ߲ ߝߍ߬߸ ߊ߬ ߞߍ߫ ߘߊ߫ ߘߊ߬ߘߌߛ ߟߊ߫ ߗߡߍ߬ ߓߙߋߡߊ߫ ߘߌ߫ ߏ߬ ߥߊ߯ߕߌ ߟߋ߬ ߟߊ߫.

߂߀߀߉ ߔߊߞߌߛߦߊߓߊ ߡߍ߲ ߞߍ߫ ߘߊ߫߸ ߣߌ߫ ߡߐ߰ ߁߅߆ ߓߣߐ߬ ߘߴߊ߬ ߣߌ ߘߐ߫߸ ߞߊ߬ ߖߋ߬ߟߌ߬ ߛߌߦߊߡߊ߲߫ ߓߐ߲߬، ߊ߬ ߡߊߝߌ߲߬ ߘߊ߫ ߏ߬ ߟߋ ߞߏߢߊ ߘߐ߫߸ ߞߏ߫ ߡߍ߲ ߠߎ߬ ߞߊ߬ ߟߊ߲ߝߊ߲ߠߌ߲ ߞߍ߫ ߦߋ߲߬߸ ߊ߬ ߦߴߏ߬ ߛߊ߬ߞߎ߲ ߘߏ߫ ߟߋ߬ ߘߌ߫.

߂߀߀߉ ߞߏߟߌ߲ߞߏߟߌ߲ ߕߋ߬ߟߋ߫ ߃ ߡߊ߬߸ ߡߊ߲߬ߞߊ߲ ߘߏ߫ ߕߊ߬ߡߌ߲߬ ߘߴߊ߬ ߣߌ߫ ߘߊ߬ߘߌߛ ߞߡߊ߬ߙߊ߬ ߕߍ߫߸ ߊ߬ ߞߊ߬ ߡߎ߮ ߟߊߥߌ߬ߟߌ߫ ߏ߬ ߞߊ߲߬ ߞߵߏ߬ ߖߐߞߌ߫ ߞߏߖߎ߯ߦߊ ߞߍ߫߸ ߞߣߊ߬ߕߏ߫ ߊ߬ ߓߏ߬ߙߌ߬ ߟߊ߫ ߞߊ߬ ߥߊ߫߸ ߘߊ߬ߘߌߛ ߟߊߕߊ߯ ߘߊ߫ ߡߊ߬ߙߐߞߎ߬߸ ߊ߬ ߘߊ߲ߘߊ߫ ߞߊ߲ߡߊ߬، ߏ߬ ߥߊ߯ߕߌ ߟߋ߬ ߟߊ߫߸ ߊ߬ߟߎ߫ ߞߊ߬ ߟߎ߫ ߞߋߟߋ߲߫ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߂߀߀ ߟߋ߬ ߛߌ߰ ߥߊ߯ߕߌ ߏ߬ ߟߊ߫߸ ߞߏ߫ ߣߌ߫ ߡߍ߲ ߞߵߊ߬ ߦߋ߫߸ ߏ߬ ߘߌ߫ ߘߴߏ߬ ߕߌ߰ ߡߊ߬. ߓߊ߬ߙߌ߬߸ ߛߊ߲߬ ߘߊ߲ߘߐ ߏ߬ ߞߣߐ߫߸ ߢߊ ߡߊ߫ ߟߊ߫ ߕߎ߲ߓߊ߬ ߞߊ߲߬߸ ߝߏ߫ ߂߀߁߆ ߞߏߟߌ߲ߞߏߟߌ߲ ߠߋ߬ ߟߊ߫߸ ߊ߬ ߡߌ߬ߣߊ߬ ߘߊ߫ ߘߊ߬ߞߊ߯ߙߎ߫ (ߛߣߍ߬ߜ߭ߊߟߌ߫ ߖߡߊ߬ߣߊ ߞߊ߲߬)߸ ߞߣߊ߬ߕߏ߫ ߊ߬ ߟߊߣߊ߬ ߟߊ߫ ߞߐߣߊߞߙߌ߫ ߂߀߁߇ ߕߙߊߓߊ ߟߊ߫.

߂߀߂߂ ߕߎߟߊߝߌ߲ ߠߋ߬ ߟߊ߫߸ ߊ߬ ߟߊ߫ ߞߕߌ ߛߌ߰ ߘߊ߫ ߛߋ߲߬ߠߊ߫߸ ߏ߬ ߞߍ߫ ߘߊ߫ ߞߕߌ߫ ߟߋ߬ ߘߌ߫߸ ߡߍ߲ ߡߊߝߟߍ߫ ߘߊ߫ ߘߎߢߊ߫ ߛߟߋߞߋ߫ ߣߊ߯ߣߌ߲ ߓߍ߯ ߘߐ߫، ߏ߬ ߥߊ߯ߕߌ ߟߋ߬ ߟߊ߫߸ ߕߎ߲ߓߊ߬ ߟߊ߫ ߞߏ ߞߊ߬ ߛߘߊ ߛߐ߬ߘߐ߲߬߸ ߞߵߊ߬ ߡߊ߲߬ߘߌ߬ߦߊ߬ ߓߍ߯ ߓߟߏ߫ ߝߊߦߌߘߊ߫، ߓߊߏ߬߸ ߊ߬ ߟߊ߫ ߞߎߡߊ ߞߍߢߊ ߞߵߊ߬ ߟߊ߫ ߞߏ ߢߊߘߐߜߍ ߦߌ߬ߘߊ߫ ߡߌ߬ߙߌ߲߬ߘߌ ߝߊ߲߬ߓߊ ߟߊ߫ ߟߋ߬. ߒ߬ߓߊ߬߸ ߞߕߌ ߏ߬ ߟߋ ߕߍ߰ ߘߊ߫ ߂߀߂߄ ߞߊ߬ߙߌ߬ߝߐ ߕߟߋ߬ ߃߁ ߡߊ߬߸ ߞߊ߬ ߛߊ߲߬ ߕߊ߲߫ ߥߛߎ ߟߴߊ߬ ߞߎ߲߬، ߊ߬ ߕߏ߫ ߘߊ߫ ߥߛߎ ߏ߬ ߟߋ ߟߊ߫߸ ߊ߬ ߞߵߊ߬ ߟߊ߫ ߞߙߎߞߊ ߟߊߘߊ߲߫ ߞߏ ߝߐ߫߸ ߞߏ߫ ߊ߬ ߦߴߊ߬ ߝߍ߬ ߞߊ߬ ߘߏ߲߬ ߓߘߍ߬ߓߘߍ߬ߟߌ ߘߐ߫߸ ߊ߬ ߟߊ߫ ߞߙߎߞߊ ߏ߬ ߟߋ ߕߐ߯ ߞߏ߫ ߞߏߘߐߦߟߍߡߊ߲ ߞߙߎߞߊ߫ ߓߍ߯ߦߊߟߞߊ (ߞߞߓ)، ߏ߬ ߞߍ߫ ߘߊ߫ ߂߀߂߄ ߠߋ߬ ߟߊ߫، ߤߊߟߌ߬ ߞߊ߲ߕߌ߯ ߢߣߊߕߊߟߌ߫ ߕߊ߬ߡߌ߲߬ߣߍ߲ ߝߍ߬߸ ߊ߬ ߞߵߊ߬ ߣߕߊ߬ ߞߏ߫ ߊ߬ ߦߴߊ߬ ߝߍ߬ ߞߊ߬ ߓߐ߫ ߞߊ߲ߕߌ߯ߦߊ ߞߐ߫ ߞߵߊ߬ ߕߏ߫ ߥߛߎ ߟߊ߫.

ߕߎ߲ߓߊ߬ ߟߊ߫ ߛߊ߬ߦߊ ߡߍ߲ ߦߋ߫ ߕߋ߲߬߸ ߊ߬ ߟߊߛߋߣߍ߲߫ ߥߛߎ ߡߊߡߙߊ߬ߓߊ߮ ߟߎ߫ ߟߋ߬ ߓߟߏ߫، ߊ߬ ߛߊ߲߬ߞߊ ߞߏ߬ߣߌ߲ ߡߊ߫ ߟߊߕߋ߬ ߞߎ߲߬ߠߊ߬ߛߌ߮ ߓߟߏ߫ ߡߎߣߎ߲߬، ߊ߬ ߞߏ߬ߣߌ߲߸ ߢߌ߬ߣߌ߲߬ߞߊ߬ߟߌ ߡߍ߲ ߦߋ߫ ߕߎ߲ߓߊ߬ ߟߊ߫ ߛߊ߬ߦߊ ߘߐ߫߸ ߊ߬ ߟߊ߫ ߛߊ߬ߦߊ ߣߌ߲߬ ߘߐ߫߸ ߊ߬ ߟߊ߫ ߥߛߎߟߊߘߏ߲ ߟߌ߬ߤߟߊ߸ ߟߕߊ߬ߡߌ߲߬ߠߌ߲ ߣߌ߫ ߡߊ߲߬ߞߊ߲߬ ߛߌߦߊߡߊ߲ ߡߍ߲ ߠ߬ߎ ߞߍߣߍ߲߫ ߊ߬ ߟߊ߫ ߞߏ ߘߐ߫ ߕߋ߲߬߸ ߏ߬ ߦߋ߫ ߘߌ߬؟

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.