ߊߟߎ߫ ߓߍ߯ ߞߵߊ߬ ߟߐ߲߫ ߞߏ߫ ߞߟߌߦߊ߲߫ ߒߓߊߔߋ߫ ߕߍ߫ ߕߏߟߏ߲߫ ߠߊ߫ ߕߋ߲߬߸ ߒ߬ߓߊ߬ ߙߋ߬ߦߊߟ ߞߊ߬ ߛߊ߭ ߟߊߓߐ߫ ߟߋ߬ ߞߎߣߎ߲߬ ߞߍ߲ߘߍߟߏ߲ ߟߌߜ߭ߊ ߘߐ߫߸ ߞߊ߬ ߕߎ߬ ߄ ߘߏ߲߬، ߡߍߙߍ߲ߖߋ ߟߊ߫ ߕߎ߬ ߟߊ߬ߓߊ߲ ߘߏ߲߬ ߘߊ߫ ߊߙߑߘߊ߫ ߜ߭ߎߟߊ߫ ߟߋ߬ ߓߟߏ߫ ߜߟߊ߬ߜߟߊ߬ ߇߀ ߟߊ߫.

ߙߋ߬ߦߊߟ ߛߊ߲ߞߊ ߞߘߐߕߊ߬ ߘߊ߫ ߟߵߊ߬ߟߎ߬ ߟߊ߫ ߕߏ߬ߟߊ߲߬ߕߊ߲߬ ߓߙߊ ߘߐ߫ ߞߎߣߎ߲߬ ߞߍ߲ߘߍߟߏ߲ ߡߊ߬߸ ߓߍߙߑߣߊߓߋ߳، ߞߊ߬ߕߎ߲߯߸ ߊ߬ ߕߟߋ߬ ߣߊ߯ߣߌ߲ ߠߋ߬ ߕߋ߲߬߸ ߊ߬ߟߎ߫ ߞߊ߬ ߛߌ߬ߕߌ ߘߊ߬ߘߌ߫ ߕߎ߬ ߃-߀ ߞߊ߲߬، ߏ߬ ߞߍ߫ ߘߊ߫ ߞߐ߬ߟߏ߲߫ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߞߟߏߞߕߏߦߊ߫ ߕߊ߲ߠߌ߲ ߟߊ߬ߓߊ߲ ߛߋߦߌ߲ߢߐ߲߮ ߝߍ߬، ߙߋ߬ߦߊߟ ߞߵߏ߬ ߓߍ߯ ߛߎߘߊ߲ ߕߊ߬ ߟߋ߬ ߞߵߊ߬ ߛߐ߬ߘߐ߲߬ ߞߟߌߦߊ߫ ߒߓߊߔߋ߫ ߢߊ߫ ߕߍ߫ ߜߍ߫ ߘߐ߫، ߒ߬ߓߊ߬߸ ߊ߬ߟߎ߫ ߞߊ߬ ߛߊ߭ ߟߊߓߐ߫ ߟߋ߬ ߞߍ߲ߘߍߟߏ߲ ߡߊ߬.

ߘߎߢߊ߫ ߕߏ߬ߟߊ߲߬ߕߊ߲߬ߠߊ ߟߎ߬ ߓߍ߯ ߘߊߘߐߖߊ߬ ߘߊ߫ ߟߋ߬ ߞߍ߲ߘߍߟߏ߲ ߣߌ߲߬ ߡߊ߬߸ ߞߵߏ߬ ߕߎ߬ߙߎ ߞߍ߫ ߊߙߑߘߊ߫ ߜ߭ߎߟߊ߫ ߟߊ߫ ߕߎ߬ ߘߏ߲߬ߣߍ߲ ߘߌ߫ ߡߌ߬ߛߍ߲ ߈߉߲ ߡߊ߬، ߕߍߡߊߟߐ ߣߌ߲߬ ߘߏ߲߭ ߓߙߊ ߘߐ߫ ߢߊ ߡߍ߲߸ ߊ߬ ߞߵߊ߬ ߛߋ߲߬ߡߊߙߊ߲ ߝߌ߬ߟߌ߫ ߕߋ߲߬ ߌߞߘߐ߫߸ ߜߟߊ߬ߜߟߊ߬ ߇߀ ߢߐ߲߰ ߠߊ߫߸ ߞߊ߬ ߕߏ߬ߟߊ߲ ߠߊߡߊ߰߸ ߞߊ߬ ߥߴߊ߬ ߝߌ߬ߟߌ߫ ߖߐ߭ ߞߣߐ߫، ߊ߬ ߟߊ߫ ߕߎ߭ ߏ߬ ߞߍ߫ ߘߊ߫ ߕߎ߬ ߞߓߊߞߏߡߊ ߟߋ߬ ߘߌ߫߸ ߡߍ߲ ߘߐߞߏߟߏ߲߫ ߕߍߣߊ߬ ߕߏ߫ ߟߊ߫߸ ߣߴߊ߬ ߡߊ߫ ߞߐ߲ߘߐ߲߫ ߞߐ߲ߘߐ߲߫ ߘߐߜߍ ߟߊ߫.

ߞߊ߬ ߞߐ߲߰ ߊ߬ߟߋ ߟߊ߫ ߕߎ߬ ߗߋ߲߰ߓߊ ߏ߬ ߘߏ߲߭ ߢߍ߫߸ ߏߙߋߟߌߦߍ߲ ߗߎߥߊߡߋߣߌ߫ ߣߌ߫ ߋߘߎߥߊߙߑߘߏ ߞߡߊߝ߭ߌ߲ߜ߭ߊ߫ ߟߎ߫ ߓߍ߯ ߞߵߊ߬ߟߎ߬ ߕߊ߫ ߕߎ߬ ߘߏ߲߬،  ߊ߲ߕߏߣߌߦߏ ߙߏߘߌߖ߭ߍߙ ߟߋ߬ ߞߊ߬ ߕߎ߬ ߝߟߐߝߟߐ ߘߏ߲߬߸ ߞߵߏ߬ ߞߍ߫ ߕߐ߲ ߓߐߣߍ߲ ߘߌ߫ ߣߍ߬ߘߍ ߟߊ߫ ߡߌ߬ߛߍ߲ ߃߉߲ ߡߊ߬، ߏ߬ ߞߐߝߍ߬ ߌߞߘߐ߫߸ ߕߏ߬ߟߊ߲ ߡߌ߬ߛߍ߲ ߄߄߲ ߡߊ߬߸ ߝߘߋߙߌߞߏ ߝ߭ߊߟߑߝ߭ߍߙߘ ߝߣߊ߫ ߞߊ߬ ߥߊ߬ߟߏ߲߬ߠߌ߲߫ ߗߋ߲߰ߓߊ߫ ߞߍ߫ ߞߵߏ߬ ߟߴߊ߬ ߞߣߐ߫ ߘߏߦߌ߲߫، ߊߟߎ߫ ߦߴߊ߬ ߟߐ߲߫߸ ߝ߭ߊߟߑߝ߭ߍߙߘ ߟߋ߬ ߦߋ߫ ߙߋ߬ߦߊߟ ߞߟߏߞߕߏ ߘߌ߫ ߞߎ߲߬ߢߐ߲߮ ߣߌ߲߬ ߞߣߐ߫߸ ߊ߬ߟߋ ߡߍ߲ ߞߊ߬ ߛߓߊ߬ߜߙߊ ߞߍ߫ ߙߋ߬ߦߊߟ ߣߌ߫ ߛߌ߬ߕߌ ߟߊ߫ ߢߐ߲߯ߓߍ߲ ߝߍ߬.

ߞߎ߲߬ߕߊ߰ ߝߌߟߊߣߊ߲ ߠߋ߬ ߝߍ߬߸ ߘߌߣ ߤߐߦߌߛߋ߲߫ ߞߊ߬ ߕߎ߭ ߡߊߞߊ߬ߝߏ߫ ߛߓߊ߬ ߟߊ߫߸ ߞߵߊ߬ ߞߎ߲߭ ߞߍ߫ ߞߵߊ߬ ߝߌ߬ߟߌ߫ ߖߐ߭ ߞߣߐ߫، ߏ߬ ߟߋ ߞߐߝߍ߬߸ ߡߊߣߎ߳ߍߟ ߊ߲ߖߍߟ ߡߏߙߊߣ ߞߊ߬ ߕߎ߭ ߘߏ߲߬ ߊ߬ߟߎ߫ ߖߘߍ߬ ߟߊ߫߸ ߞߡߊ߬ߝ߭ߌ߲ߜ߭ߊ߬ ߟߊ߫ ߝߎ߬ߕߎ߲߬ߕߌ ߘߏ߫ ߞߐߝߍ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.