ߕߐ߲ߓߟߏߡߊ ߟߎ߫ ߣߐ߬ ߊ߬ߟߎ߬ ߕߍ߯ ߞߍ߫ ߟߊ߫ ߓߊߛߌ ߘߏ߫ ߟߎ߫ ߟߋ߬ ߘߐ߫ ߞߊ߲ߞߊ߲߫ ߛߏ ߞߣߐ߫߸ ߊ߬ߟߎ߫ ߞߊ߬ ߡߍ߲ ߢߊߢߌߣߌ߲߫ ߞߵߊ߬ ߦߋ߫ ߞߏ߫ ߓߊߛߌ ߏ߬ ߟߎ߬ ߕߴߛߋ߫ ߝߙߋ߬ ߟߊ߫ ߖߡߊ߬ߣߊ ߞߣߐ߫.

ߓߊߛߌ߫ ߡߌߣߊ ߦߙߍߞߍߟߌ ߣߌ߲߬ ߛߌ߰ ߘߊ߫ ߛߋ߲߬ߠߊ߫ ߞߕߌ ߕߐ߲ߓߟߏߡߊ ߟߎ߫ ߟߋ߬ ߓߟߏ߫ ߕߐ߲ߕߌ߯ߟߊ߫߸ ߊ߬ߟߎ߬ ߣߌ߫ ߕߐ߲ߓߟߏߡߊ ߟߎ߬ ߟߊ߫ ߛߋ߲߬ߕߘߍ߬ߟߌ߬ ߞߊߟߌ߲ ߓߙߌ߬ߝߐߝߐ ߟߊ߫ ߓߊ߯ߙߊߢߐ߲߯ߦߊ ߞߣߐߡߊ߬. ߏ߬ ߞߍ߫ ߘߊ߫ ߕߙߎ߬ ߘߌ߫߸ ߊ߬ߟߎ߫ ߞߵߊ߬ߟߎ߬ ߕߍ߯ ߟߊ߫ ߓߊߛߌ߫ ߛߌߦߊߡߊ߲߫ ߘߐ߫.

ߓߊߛߌ ߏ߬ ߟߎ߫ ߦߌ߬ߘߊ߬߬ ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߌ߬ ߕߋ߬ߟߋ ߢߌ߲߬ ߠߋ߬ ߘߐ߫߸ ߂߀߂߆ ߕߙߊߓߊ ߕߟߋ߬ ߅߸ ߞߊ߲ߞߊ߲߫ ߕߐ߲ߓߟߏߡߟߊ߫، ߏ߬ ߞߍ߫ ߘߊ߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߟߋ߬ ߓߟߏ߫߸ ߝߏߘߋ߬ ߓߌ߲ߕߎ߬ ߞߋߕߊ߬.

ߛߊ߬ߙߌ߬ߦߊ߬ߟߐ߲߬ߠߊ ߢߌ߲߬ ߠߊ߫ ߝߐߟߌ߫ ߘߐ߫߸ ߦߙߍߞߍߟߌ ߣߌ߲߬ ߞߍߣߍ߲߫ ߞߏߟߊߕߐ߲ ߛߌߟߊ ߟߋ߬ ߝߍ߬߸ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߓߊߛߌ߫ ߞߏߙߏ߲ ߠߎ߬ ߣߌ߫ ߓߊߛߌ߫ ߝߙߋ ߞߍߢߊ߫ ߖߎ߮ ߟߎ߫ ߞߟߍ߬ ߞߊ߲ߡߊ߬ ߘߊ߲ߘߊߟߌ ߡߊ߬ߘߎ߮ ߘߐ߫߸ ߊ߬ ߣߌ߫ ߘߊ߲ߘߊߟߌ ߟߊߡߎߣߎ߲ߧߊ ߟߎ߬ ߘߐ߫.

<<ߞߊ߲ߞߊ߲߫ ߕߐ߲ߓߟߏߡߟߊ߫ ߕߊ߲ߓߊ߲ ߣߌ߫ ߕߌ߲߬ߞߎߘߎ߲ ߕߐ߲ߓߟߏߡߟߊ߫ ߣߌ߫ ߖߏߣߡߊ߫ ߞߕߌߓߋߟߋ߲ ߕߊ߬ߣߍ߲ ߞߵߊ߬ ߟߊ߫ ߞߕߌ ߕߐ߲ߓߟߏߡߊ ߟߎ߬ ߟߊߘߍ߬ߣߍ߲ ߞߊ߲߬߸ ߏ߬ ߟߎ߫ ߞߵߊ߬ ߡߙߌߘߐߕߊ߬ ߟߋ߬ ߞߏ߫ ߊ߬ߟߎ߬ ߦߋ߫ ߘߍ߬ ߞߊ߬ ߘߊ߲ߘߊߟߌߟߊ߫ ߞߏߙߏ߲ ߠߎ߬ ߞߟߍ߬߸ ߊ߬ ߣߌ߫ ߡߐ߱ ߡߍ߲ ߠߎ߬ ߦߋ߫ ߘߏ߲߬ ߠߊ߫ ߓߊߛߌ߫ ߝߙߋ ߘߐ߫ ߞߵߊ߬ ߛߐ߬ߘߐ߲߬ ߊ߬ߟߎ߬ ߓߊ߯ߙߊ߫ ߕߍ߫.>> ߞߊ߲ߓߍ߲ ߞߕߌߞߊ߲ߘߊ ߟߋ߬ ߞߊ߲߫ ߕߋ߲߬.

ߕߐ߲ߓߟߏߡߊ ߟߎ߬ ߟߊ߫ ߟߊߟߐ߲ߠߌ߲߫ ߘߊ߫ ߟߋ߬߸ ߞߏ߫ ߓߊߛߌ ߣߌ߫ ߓߊߛߌ߫ ߡߎߣߎ߲ ߘߏ߫ ߟߎ߫ ߓߕߐ߫ ߓߡߊ߬ߞߐ߫ ߞߊ߬ ߣߵߊ߬ ߘߌ߫ ߞߊ߲ߞߊ߲߫ ߞߣߐ߫، ߏ߬ ߟߎ߬ ߓߐߣߍ߲߫ ߦߙߐ߫ ߟߎ߫ ߟߋ߬ ߘߐ߫߸ ߡߍ߲ ߠߎ߬ ߡߊ߫ ߟߊߘߌ߬ߢߍ߬ ߓߊߛߌ߫ ߝߙߋ߫ ߞߊ߲ߡߊ߬ ߝߋߝߋ߫، ߊ߬ߟߎ߬ ߟߊߣߊ߬ߣߍ߲߫ ߞߵߊ߬ߟߎ߬ ߟߊߡߙߊ߬ ߦߙߐ ߡߍ߲ ߝߣߊ߫ ߘߐ߫ ߞߊ߲ߞߊ߲߫߸ ߦߋ߲߬ ߕߍ߫ ߦߙߐ߫ ߘߌ߫߸ ߓߊߛߌ ߘߌ߫ ߛߋ߫ ߟߊߡߙߊ߬ ߟߊ߫ ߦߙߐ ߡߍ߲ ߘߐ߫.

ߒ߬ߓߊ߬߸ ߞߊ߲ߞߊ߲߫ ߡߙߊ߬ߓߊ߰ߘߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߟߊߟߐ߲ߠߌ߲ ߡߍ߲ ߞߍ߫ ߘߴߏ߬ ߟߊ߫߸ ߏ߬ ߟߎ߫ ߝߙߊ߬ ߘߊ߫ ߕߐ߲ߓߟߏߡߊ ߟߎ߫ ߞߊ߲߬߸ ߞߊ߬ ߞߙߐ߬ߛߟߌ߬ ߖߐ߲ߖߐ߲ ߠߎ߬ ߛߌ߰ ߛߋ߲߬ߠߊ߫، ߊ߬ ߟߐ߲߫ ߘߊ߫ ߢߊߢߌߣߌ߲ߠߌ߲ ߓߍ߯ ߞߐ ߘߐ߫߸ ߞߏ߫ ߥߟߏߒߘߐ ߏ߬ ߟߎ߬ ߞߐߝߟߌ ߘߌ߫ ߛߋ߫ ߖߡߊ߬ߣߊ߬ߘߋ߲ ߠߎ߬ ߟߊ߫ ߞߍ߲ߘߍߦߊ ߟߊߛߐ߬ߘߐ߲߬ ߠߊ߫.

ߞߊ߲ߞߊ߲߫ ߕߐ߲ߓߟߏߡߊ ߟߎ߬ ߟߊ߫ ߕߐ߲ߕߌ߯ ߛߙߍߞߍ߸ ߣߊ߬ߓߌ ߛߎߡߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߊߟߐ߲ߠߌ߲߫ ߘߊ߫ ߓߊߛߌ ߣߌ߲߬ ߣߊ߬ ߞߏ ߟߊ߫ ߞߏ߲ߞߏߜߍ ߕߋ߬ߟߋ߫ ߂߃ ߟߋ߬ ߡߊ߬، ߏ߬ ߞߐߝߍ߬ ߕߋ߬ߟߋ߫ ߛߓߊ߬߸ ߢߊߢߌߣߌ߲ߠߌ߲ߠߊ߫ ߞߏߟߊߞߙߐߛߌߟߊ ߟߎ߫ ߞߵߊ߬ ߦߋ߫ ߞߏ߫ ߓߊߛߌ ߓߘߊ߫ ߘߏ߲߬߸ ߊ߬ ߦߋ߫ ߞߊ߲ߞߊ߲߫ ߛߍ߲߬ߞߍ߬ߝߙߊ߫ ߞߌ߲߬ߘߊ ߟߋ߬ ߟߊ߫߸ ߡߣߐ߬ߓߏ߲ ߘߏ߫ ߞߣߐ߫ ߦߋ߲߬.

<<ߊ߲ ߞߍߢߊ ߟߵߏ߬ ߘߌ߫ ߞߵߊ߬ ߞߏ ߟߊ߫ ߞߕߌߞߊ߲ߘߊ ߞߘߐ߫߸ ߏ߬ ߞߵߊ߲ ߖߡߊ߬ߙߌ߬ ߞߏ߫ ߞߊ߬ ߥߊ߫ ߞߣߍ ߞߊ߲߬߸ ߞߊ߬ ߓߟߏ ߟߴߊ߬ ߘߐ߫.>> ߊ߬ ߞߵߏ߬ ߟߋ ߝߐ߫.

ߏ߬ ߟߋ ߞߍ߫ ߘߊ߫ ߕߐ߲ߓߟߏߡߊ ߟߎ߬ ߥߊ߫ ߢߊ ߘߌ߫ ߡߣߐ߬ߓߏ߲ ߏ߬ ߟߊ߫ ߦߋ߲߬߸ ߊ߬ߟߎ߬ ߕߊ߯߯ ߘߊ߫ ߝߎߝߎ߫ ߛߌߦߊߡߊ߲߫ ߛߐ߬ߘߐ߲߫ ߦߋ߲߬߸ ߛߌߞߊ߫ ߞߍߣߍ߲߫ ߡߍ߲ ߠߎ߬ ߡߊ߬، ߞߕߌߓߋߟߋ߲ ߠߊ߫ ߖߊ߬ߡߊߙߌ ߞߣߐ߫߸ ߊ߬ߟߎ߫ ߞߊ߬ ߡߣߐ߬ߓߏ߲ ߞߣߐߝߋ߲ ߓߍ߯ ߟߋ߬ ߕߊ߬߸ ߞߵߊ߬ߟߎ߬ ߟߊߕߊ߯ ߞߊ߲ߞߊ߲߫ ߕߐ߲ߓߟߏߡߟߊ߫ ߕߊ߲ߓߊ߲ ߠߊ߫.

ߛߊ߬ߙߌ߬ߦߊ߬ ߓߘߊ߫ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߛߴߊ߬ ߕߌ߰ߟߊ߬ߡߐ߮ ߟߎ߬ ߘߌ߫ ߟߐ߲߫ ߢߊ ߡߍ߲ ߡߊ߬߸ ߡߍ߲ ߠߎ߬ ߛߋ߲߬ ߦߋ߫ ߘߓߌ߬ߘߓߌ߬ ߖߊߥߏ ߣߌ߲߬ ߘߐ߫ ߞߊ߬ߣߌ߲߬، ߞߊ߲ߓߍ߲ ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߡߐ߰ ߛߌ߫ ߛߐ߲߭ ߦߋ߫ ߘߴߊ߬ ߘߐ߫߸ ߏ߬ ߘߌ߫ ߡߌ߬ߣߊ߫ ߞߵߊ߬ ߟߊߟߐ߬ ߛߊ߬ߙߌ߬ߦߊ߬ ߢߊߞߘߐ߫.

<<ߝߊ߲߬ߞߊ ߦߋ߫ ߛߊ߬ߙߌ߬ߦߊ ߟߋ߬ ߟߊ߫، ߞߕߌ ߕߐ߲ߓߟߏߡߊ ߟߎ߬ ߕߍ߫ ߛߍ߰߸ ߊ߬ߟߎ߬ ߕߍ߫ ߢߌ߬ߣߊ߬߸ ߦߙߎ߬ߞߎ߬ߦߙߎߞߎ߫ ߢߊ߬ߞߏ߬ ߕߴߊ߬ ߘߐ߫ ߝߣߊ߫.>> ߝߏߘߋ߬ ߓߌ߲ߕߎ߬ ߞߋߕߊ߬ ߟߋ߬ ߞߊ߲߫ ߕߋ߲߬.

ߝߊ߰ߡߊ ߟߎ߫ ߞߊ߬ ߡߍ߲ ߛߐ߬ߘߐ߲߬ ߞߵߊ߬ ߝߐ߫ ߖߡߊ߬ߣߊ߬ߘߋ߲ ߠߎ߬ ߦߋ߫߸ ߞߏ߫ ߊ߬ߟߎ߬ ߦߴߊ߬ߟߎ߬ ߘߐߖߊ߬ ߞߊ߬ ߞߏ ߟߎ߬ ߟߊߣߐ߰ߦߊ߫߸ ߞߊ߬ ߛߋ߫ ߡߐ߰ ߞߏߙߏ߲ ߠߎ߬ ߞߏߝߐ߫ ߟߊ߫߸ ߞߊ߬ ߕߌߢߍߟߌ ߟߎ߬ ߟߊ߲ߞߣߍߡߊ߫، ߏ߬ ߟߋ ߘߌ߫ ߓߍ߯ ߟߊߝߙߍ߫.

ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.