ߓߐ߬ߙߑߘߏ߬ ߍߛ.ߏ.ߍߛ ߛߌߟߊ߫ ߛߌߦߊߡߊ߲߫ ߠߋ߬ ߦߋ߲߬ ߕߋ߲߬߸ ߡߍ߲ ߠߎ߬ ߕߌߢߍߣߍ߲߫، ߏ߬ ߟߋ ߘߐ߫߸ ߊ߬ߟߎ߬ ߓߘߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ߸ ߖߐ߲߰ߛߴߊ߬ߟߎ߬ ߘߌ߫ ߛߋ߫ ߘߏ߫ ߞߍ߫ ߟߴߊ߬ߟߎ߫ ߖߘߍ߬ ߦߋ߫، ߞߊ߬ߕߎ߲߯߸ ߊ߬ߟߎ߫ ߣߐ߬ ߓߟߏߟߊߘߍ ߟߋ߬ ߛߌ߰ ߟߊ߫ ߛߌ߲߬ߠߊ߫ ߞߌ߲߬ߘߊ ߞߣߐ߫ ߦߋ߲߬߸ ߞߊ߬ ߛߌߟߊ ߡߛߊ߫߸ ߞߊ߬ ߘߋ߲߬ߞߊ ߟߎ߬ ߟߊߝߊ߰߸ ߞߵߊ߬ ߕߊ߬ ߞߐߣߊߞߙߌ߫ ߛߌߟߓߊ ߡߊ߬ ߞߊ߬ߖߌ߰ ߞߌ߲߬ߘߊ ߞߣߐ߫.

ߞߎߣߎ߲ߟߏ߲ ߡߊ߬߸ ߂߀߂߆ ߕߙߊߓߊ ߕߋ߬ߟߋ߫ ߂߅߸ ߊ߬ߟߎ߫ ߞߊ߬ ߕߙߏ߬ߞߏ ߡߊߞߟߌ߫߸ ߞߊ߬ ߛߌߟߊ ߣߌ߲߬ ߓߊ߯ߙߊ ߘߊߡߌ߬ߣߊ߬، ߦߋ߲߬ ߡߍ߲ ߓߐߟߌ ߕߎ߲߬ ߓߘߊ߫ ߟߊߟߐ߬ ߡߐ߰ ߛߌߦߊߡߊ߲߫ ߓߟߏ߫߸ ߞߵߏ߬ ߞߎ߲߭ ߞߍ߫ ߛߌߟߊ ߕߌߢߍ ߘߌ߫، ߡߙߌߦߊ߫ ߜߘߍ߫ ߘߏ߲߬ ߕߴߊ߬ߟߎ߬ ߟߊ߫߸ ߛߴߊ߬ߟߎ߬ ߘߌ߫ ߛߋ߫ ߛߌߟߊ ߣߌ߲߬ ߞߊ߲߬ ߓߏߙߌ ߟߊߣߐ߰ߦߊ߬ ߟߊ߫ ߢߊ ߡߍ߲ ߡߊ߬߸ ߞߊ߬ ߞߌ߲߬ߘߊ ߞߣߐ߫ ߡߐ߮ ߟߎ߬ ߟߊߝߙߍ߫.

ߊ߬ߟߎ߫ ߣߐ߬ ߣߌ߲߬ ߓߐ߫ ߟߴߊ߬ߟߎ߫ ߖߍ߬ߘߍ߫ ߟߋ߬ ߘߐ߫߸ ߞߊ߬ ߝߘߴߊ߬ߟߎ߬ ߟߊ߫ ߓߟߏߟߊߘߍ ߟߊ߫، ߞߵߊ߬ ߦߌ߬ߘߊ߬ ߞߏ߫ ߞߊ߬ߝߏ߬ߙߋ߲ ߞߣߐ߫ ߦߊ߲߬߸ ߊ߬ߟߎ߬ ߓߘߊ߫ ߓߌ߫߸ ߞߊ߬ ߞߎ߲߬ߠߊ߬ߛߌ߮ ߡߊߘߍ߬ߡߍ߲߬߸ ߞߵߊ߬ߟߎ߫ ߥߊ߬ߣߌ߲߬ߞߋ ߦߌ߬ߘߴߊ߬ߟߎ߬ ߟߊ߫ ߞߌ߲߬ߘߊ ߓߊ߯ߙߊ ߘߐ߫، ߞߊ߬ ߓߊ߲߫߸ ߞߵߏ߬ ߞߍ߫ ߊ߬ ߦߌ߬ߘߊ߬ ߝߋ߲ ߘߌ߫ ߞߎ߲߬ߠߊ߬ߛߌ߮ ߟߊ߫߸ ߞߏ߫ ߊ߬ߟߎ߫ ߡߊ߬ߞߏ ߦߋ߫ ߘߍ߬ߡߍ߲ ߠߊ߫߸ ߛߴߊ߬ߟߎ߬ ߤߊߡߌ߲ ߘߌ߫ ߦߙߊ߬.

<<ߊ߬ ߝߐߣߍ߲߫ ߠߋ߬ ߞߏ߫ ߦߊ߬ߣߌ߫ ߥߙߎߞߌ ߦߋ߫ ߣߊ߬߸ ߌ ߝߟߐ߫ ߦߴߌ ߞߣߐ ߡߊߞߏ߬߸ ߦߊߣߵߌ ߦߴߌ ߞߐ߫ ߡߊߞߏߟߊ ߛߐ߬ߘߐ߲߬، ߊ߲ ߓߘߴߊ߲ ߤߊ߲ߞߟߌ ߦߌ߬ߘߊ߫ ߞߎ߲߬ߠߊ߬ߛߌ߮ ߟߊ߫߸ ߞߵߊ߲ ߤߊ߲ߞߟߌ ߦߌ߬ߘߊ߬ ߞߏߟߊߘߍߢߐ߲߮ ߠߎ߬ ߟߊ߫ (ߔߊߙߑߕߋߣߍߙ)، ߊ߲ ߘߌ߫ ߛߋ߫ ߡߍ߲ ߞߍ߫ ߟߴߊ߲ ߖߘߍ߬ ߦߋ߫߸ ߊ߲ ߓߘߴߏ߬ ߘߊߡߌ߬ߣߊ߬، ߞߏ߬ߣߌ߲߬߸ ߊ߲ ߘߌ߫ ߡߍ߲ ߝߐ߫ ߞߎ߲߬ߠߊ߬ߛߌ߮ ߦߋ߫߸ ߊ߬ ߣߌ߫ ߓߐߒߖߘߍߘߐ߫ ߡߐ߮ ߟߎ߬ ߦߋ߫߸ ߖߊ߱ߣߌ߲߬߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߛߌߟߊ ߢߌ߲߬ ߠߎ߬ ߓߊ߯ߙߊ ߟߊ߫.>> ߞߊ߱ߓߌ߬ߣߍ߫ ߛߎ߬ߥߊ߬ߙߋ߫ ߟߋ߬ ߞߊ߲߫ ߕߋ߲߬߸ ߊ߬ߟߋ ߡߍ߲ ߦߋ߫ ߓߐ߬ߙߑߘߏ߬ ߍߛ.ߏ.ߍߛ ߞߌ߲߬ߕߌ߮ ߘߌ߫ ߞߊ߬ߣߌ߲߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ ߡߍ߲ ߘߏ߲߬ ߞߍ ߦߴߌߘߐ߫ ߊ߬ߟߎ߬ ߓߟߏ߫ ߣߌ߲߬߸ ߏ߬ ߦߋ߫ ߕߟߋ߬ߝߌ߬ߟߊ߬ߣߍ߲߬ ߞߏ ߟߋ߬ ߘߌ߫، ߏ߬ ߕߏ ߊ߬ ߡߊ߬߸ ߏ߬ ߦߋ߫ ߓߐ߫ ߟߊ߫ ߘߍ߬ߡߍ߲ ߣߌ߫ ߡߊ߬ߜߍ߲ ߠߋ߬ ߘߐ߫߸ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߊ߫.

<<ߊ߲ ߧߋ߫ ߡߍ߲ ߞߍ ߞߊ߲߬ ߕߋ߲߬߸ ߏ߬ ߟߋ ߛߌߟߊ ߡߛߊ ߘߌ߫، ߏ߬ ߘߏ߲߬ ߕߍ߫ ߕߏߒߡߕߊ߫ ߘߌ߫، ߛߡߊ߬ ߛߊ߲ߖ ߌߓߊ߯ ߊ߬ ߕߊ߫ ߓߐ߫ ߣߌ߲߬ ߘߐ߫ ߕߋ߲߬߸ ߝߏ߫ ߞߵߊ߬ ߘߊߡߌ߬ߣߊ߫ ߟߋ߬ ߞߏߞߎߘߊ߫ ߛߊ߲߭ ߣߊ߬ߕߐ، ߞߵߊ߬ ߛߐ߬ߘߐ߲߬ ߜߎ߸ ߛߌߟߊ ߣߌ߲߬ ߕߍ߫ ߛߌߟߊ߫ ߘߋ߲ߣߍ߲߫ ߘߌ߫، ߊ߬ ߦߋ߫ ߓߐ߬ߙߑߘߏ߬ ߍߛ.ߏ.ߍߛ ߘߐߛߊ߲߬ ߠߊ߫ ߟߋ߬߸ ߞߊ߬ ߓߐ߫ ߞߐߣߊߞߙߌ߫ ߛߌߟߓߊ ߣߌ߲߬ ߡߊ߬߸ ߞߊ߬ ߛߋ߫ ߣߍ߰ߛߌ߬ߟߊ߬ ߞߘߐ ߡߊ߬߸ ߞߊ߬ ߖߌ߰ ߞߌ߲߬ߘߊ ߞߣߐ߫، ߓߊߏ߬߸ ߦߙߐ ߏ߬ ߟߊߕߊ߬ߡߌ߲ ߜߍ߬ߟߍ߲߬ߡߊ߲߫ ߠߋ߬ ߞߌ߲߬ߘߊ ߞߣߐ߫ ߡߐ߮ ߟߎ߫ ߡߊ߬ ߝߋߝߋ߫.>>

ߞߎߡߊ߫ ߞߋߟߋ߲ ߏ߬ ߟߊ ߝߣߊ߫ ߦߋ߫ ߞߎ߲߬ߘߊ ߞߎ߲߬ߕߌ߮ ߘߊ߫߸ ߎߡߊߙ ߝߊ߬ߙߎߞ ߞߐ߲ߘߍ߫، ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߞߌ߲߬ߘߊ ߞߣߐ߫ ߡߐ߮ ߟߎ߬ ߟߊ߫ ߘߐ߬ߖߊ ߟߋ߬ ߞߏߛߐ߲߬߸ ߊ߬ߟߎ߬ ߦߴߊ߬ ߝߍ߬ ߞߵߊ߬ߟߎ߬ ߟߊ߫ ߛߌߟߊ ߟߎ߬ ߦߋߝߊߘߌ ߡߊߝߊ߬ߟߋ߲߬߸ ߦߊ߬ߣߌ߫ ߡߐ߰ ߜߘߍ ߟߎ߫ ߣߊ߬ߕߐ߫ ߊ߬ߟߎ߬ ߡߊߘߍ߬ߡߍ߲߬ ߠߊ߫.

<< ߊ߲ ߠߊ߫ ߞߌ߲߬ߘߊ ߣߌ߲߬ ߦߋ߫ ߞߊ߲ߞߊ߲߫ ߛߏ߫ ߕߍߡߊ߬ ߟߋ߬߸ ߞߏ߬ߣߌ߲߬ ߣߴߌ ߞߊ߬ ߞߌ߲߬ߘߊ ߣߌ߲߬ ߘߐߜߍ߫ ߊ߬ ߛߌߟߊ߫ ߝߏߦߌ߬ ߓߐߣߍ߲߫ ߕߍ߫߸ ߏ߬ ߞߏߛߐ߲߬ ߊ߲ ߞߵߊ߲ ߡߙߌ߫ ߞߊ߬ ߖߊ߬ߕߋ߬ߘߐ߬ߛߌ߮ ߣߌ߲߬ ߠߊߘߊ߲߫ ߛߊ߫ ߓߐߒߖߘߍߦߋ ߟߎ߬ ߘߌ߫ ߘߍ߬ߡߍ߲ ߞߍ߫߸ ߓߊߏ߬ ߊ߲ ߛߌ߰ ߘߌߦߊ ߓߊ߯ ߘߐߓߍ߲߬ ߊ߬ ߕߐ߬ߣߐ ߦߴߊ߲ ߖߍ߬ߘߍ ߟߋ߬ ߞߊ߲߬، ߛߊߡߊ߬ߣߌ߲߫ ߞߎ߲߬ߠߊ߬ߛߌ߮ ߦߋ߫ ߣߊ߬ ߞߏ ߟߎ߬ ߞߍ߫߸ ߊ߲ ߖߍ߬ߘߍ ߦߴߊ߬ ߦߌ߬ߘߊ߬ ߞߎ߲߬ߠߊ߬ߛߌ߮ ߟߊ߫ ߞߏ߫ ߞߏ ߡߍ߲ ߦߋ߫ ߊ߬ ߓߐߒߖߘߍߘߐ ߡߙߌߦߊ ߦߴߊ߲ ߠߊ߫߸ ߊ߬ ߞߊ߫ ߘߴߊ߲ ߧߋ߫، ߏ߬ ߟߋ ߞߏߛߐ߲߬ ߊ߲ ߞߊ߬ ߖߊ߬ߕߋ߬ߘߐ߬ߛߌ߮ ߣߌ߲߬ ߛߌ߰ ߛߋ߲߬ߠߊ߫ ߞߊ߬ ߝߊ߬ߛߏ߬ߘߋ߲ ߠߎ߫ ߟߐ߬ ߊ߬ ߟߊ߫، ߥߊߘߌ ߡߍ߲ ߞߍߣߍ߲߫ ߞߊ߬ ߛߌߟߊ ߣߌ߲߬ ߛߊ߫ ߡߊ߬ߛߌߣ ߠߊ߫߸ ߊ߬ ߡߊ߫ ߓߐ߫ ߡߐ߰ ߛߌ߫ ߞߎ߲߬߸ ߊ߬ ߓߐߣߍ߲߫ ߞߌ߲߬ߘߊ߬ ߞߣߐ߬ ߡߐ߮ ߟߎ߫ ߟߋ߬ ߞߎ߲߬، ߞߵߊ߲ ߤߊ߲ߞߟߌ ߟߎ߬ ߟߊ߫ ߢߐ߲߮ ߞߊ߲߬߸ ߊ߬ ߣߌ߫ ߓߟߏߟߊߘߍ ߟߎ߬ ߓߍ߲߭ ߣߌ߫ ߕߍ߲ߓߍ߲ ߘߐ߫.>>

ߊ߬ ߞߵߊ߬ ߞߊ߲ߠߊߘߌ߫ ߞߎ߲߬ߠߊ߬ߛߌ߮ ߡߊ߬߸ ߘߍ߬ߡߍ߲߬ߠߌ߲߬ߠߊ ߟߎ߫ ߡߊ߬߸ ߛߊ߫ ߓߊ߯ߙߊ ߣߌ߲߬ ߘߌ߫ ߛߌߟߊ߫ ߛߐ߬ߘߐ߲߬: <<ߡߐ߰ ߜߘߍ ߕߍߣߊ߬ ߓߐ߫ ߟߊ߫ ߞߌ߲߬ߘߊ߬ ߜߘߍ߫ ߟߊ߫ ߥߟߊ߫ ߛߏ߫ ߜߘߍ߫ ߟߊ߫ ߞߊ߬ ߣߵߌ ߛߌ߰ ߘߌߦߊ ߘߐߓߍ߲߬߸ ߝߏ߫ ߌ ߖߍ߬ߘߍ ߟߋ߬ ߦߴߊ߬ ߘߐߓߍ߲߬، ߊ߲ߠߎ߬ ߠߋ߬ ߞߊ߫ ߞߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߲ ߛߌ߰ ߦߙߐ ߘߐߓߍ߲߭ ߤߊߡߌ߲ ߦߴߊ߲ ߠߊ߫، ߏ߬ ߘߐ߫ ߊ߲ ߞߵߊ߬ ߟߊߥߟߌ߬ ߡߍ߲ ߡߊ߬ ߏ߬ ߟߋ ߣߌ߲߬، ߓߊߏ߬ ߡߐ߰ ߛߌ߫ ߕߴߛߋ߫ ߛߌߟߊ ߓߊ߯ߙߊ߫ ߟߊ߫߸ ߞߎ߲߬ߠߊ߬ߛߌ߮ ߟߋ߬ ߘߌ߫ ߛߋ߫ ߛߌߟߊ ߓߊ߯ߙߊ߫ ߟߊ߫،ߊ߲ ߧߴߊ߲ ߥߊ߬ߣߌ߲߬ߞߋ ߟߋ߬ ߦߌ߬ߘߊ߬ ߟߊ߫ ߞߎ߲߬ߠߊ߬ߛߌ߮ ߟߊ߫، ߞߵߊ߬ ߦߌ߬ߘߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߏ߫ ߊ߲ ߛߋߞߏ ߟߋ߬ ߣߌ߲߬߸ ߊ߬ ߡߊߘߍ߬ߡߍ߲ ߘߐ߫ ߊ߬ ߡߙߌ߫ ߢߌߡߊ ߟߎ߫ ߡߊ߬، ߊ߬ߟߋ ߟߋ߬ ߞߵߊ߲ ߠߊߣߊ߬߸ ߞߵߊ߬ ߦߌ߬ߘߊ߬ ߊ߬ ߟߊ߫ ߞߏ߫ ߊ߬ ߞߊ߬ ߡߐ߱ ߡߍ߲ ߠߎ߬ ߟߊߣߊ߬ ߞߏ߫ ߡߐ߰ ߛߓߍ ߟߎ߫ ߟߋ߬߸ ߞߌ߲߬ߘߊ ߞߎ߬ߘߎ ߦߋ߫ ߡߍ߲ ߠߎ߬ ߞߊ߲ߠߊ߫߸ ߏ߬ ߘߐ߫ ߊ߲ ߘߌ߫ ߛߋ߫ ߡߍ߲ ߝߐ߫ ߟߊ߫ ߛߐ߰ߡߊ߬ߘߊ ߣߌ߲߬ ߠߊ߫ ߏ߬ ߟߋ ߣߌ߲߬.

ߛߌߟߊ ߣߌ߲߬ ߘߏ߲߬ ߞߋߟߋ߲߫ ߓߊ߯ߙߊ ߕߴߊ߬ߟߎ߬ ߟߊ߫ ߖߊ߬ߕߋ߬ ߘߐ߫߸ ߊ߬ߟߎ߬ ߦߴߊ߬ ߝߍ߬ ߞߊ߬ ߘߏ߫ ߜߘߍ߫ ߟߎ߫ ߝߣߊ߫ ߓߊ߯ߙߊ߫߸ ߡߍ߲ ߦߋ߫ <<ߓߐ߫ ߟߊ߫ ߛߌߡߊ߲ߕߋߙߌ ߟߊ߫ ߞߊ߬ ߣߊ߬ ߛߍ߲ߖ߭ߊ߲߬ ߡߊ߬.>> ߏ߬ ߝߣߊ߫ ߓߊ߯ߙߊ߫ ߞߏ ߦߴߊ߬ߟߎ߬ ߟߊ߫ ߢߍߥߟߊ ߘߐ߫، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߞߎ߲߬ߠߊ߬ߛߌ߮ ߓߟߏߡߊߘߍ߬ߡߍ߲߬ ߝߛߊߦߌ߫.

ߒ߬ߓߊ߬߸ ߢߌ߬ߣߌ߲߬ߞߊ߬ߟߌ ߦߋ߫ ߦߙߐ ߡߍ߲ ߘߐ߫ ߛߊ߫߸ ߦߊ߯ߟߊ߫߸ ߣߌ߫ ߞߎ߲߬ߠߊ߬ߛߌ߮ ߡߊ߫ ߘߍ߬ߡߍ߲߫ ߓߐ߬ߙߑߘߏ߬ߞߊ ߟߎ߫ ߞߊ߲߬ ߣߌ߲߬ ߓߊ߯ߙߊ ߘߐ߫߸ ߦߊ߯ߟߊ߫߸ ߊ߬ ߞߏ ߘߌ߫ ߢߝߍߟߊ ߟߊߛߐ߬ߘߐ߲߫ ߓߊ߬؟ ߊ߬ ߞߏ߬ߣߌ߲߸ ߞߌ߲߬ߘߊ ߞߣߐ߫ ߡߐ߮ ߟߎ߬ ߓߘߴߊ߬ߟߎ߫ ߥߊ߬ߣߌ߲߬ߞߋ ߦߌ߬ߘߊ߬߸ ߞߵߊ߬ ߦߌߘߊߞߊ߬ ߞߏ߫ ߊ߬ߟߎ߬ ߓߟߏ ߟߊߣߍ߲߫ ߕߴߊ߬ߟߎ߫ ߛߋ߲߭ ߞߊ߲߬߸ ߒ߬ߞߊ߬ ߝߏ߫ ߖߘߍ߬ߦߋ߬ߟߊ ߟߎ߬ ߣߌ߫ ߘߍ߬ߡߍ߲߬ߠߌ߲߬ߠߊ ߟߎ߬ ߣߌ߫ ߞߎ߲߬ߠߊ߬ߛߌ߮ ߟߋ߬ ߦߋ߫ ߝߊ߬ߙߴߊ߬ߟߎ߫ ߞߊ߲߬߸ ߞߵߊ߬ߟߎ߬ ߟߊ߫ ߓߊ߯ߙߊ ߓߐ߫ ߜߍߟߊ߫.

ߟߏ߲ߞߊߛߌߦߊ߫ ߞߡߊ߬ߙߊ߬߸ ߊ߬ߟߌ߫ ߞߙߊ߬ߞߐ߬ߞߊ ߞߊ߬ߟߐ߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.