ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߟߋ߬ ߁߁߸ ߕߐ߬ߙߐ߲߫ ߓߊ߬ߣߊ߲߬ߞߐ߬ ߡߍ߲ ߦߋ߫ ߛߓߊ߬ߘߎ߰ ߓߙߊߣߊ߬ߡߊ߫ ߡߙߊ߬ߘߊ߬ߙߋ߲ ߞߣߐ߫ (ߞߊ߲ߞߊ߲߫ ߡߙߊ߬ߓߊ߰ߘߊ) ߘߐ߫߸ ߏ߬ ߛߌ߰ߓߊ߮ ߟߎ߫ ߟߋ߬ ߞߵߊ߬ߟߎ߬ ߡߐߣߍ ߦߌ߬ߘߊ߫ ߡߊ߬ߕߊ߰ߡߊ߬ߟߌ ߘߐ߫ ߛߌߟߊ ߞߊ߲߬߸ ߞߊ߬ ߓߐ߫ ߔߊߞߌߛߦߊ ߘߌ߫، ߓߊߏ߬߸ ߊ߬ ߥߊ߯ߕߌ߫ ߖߊ߲ ߠߋ߬ ߕߋ߲߬߸ ߕߍ߬ߡߍߞߘߎ߬ߡߊ ߟߎ߬ ߟߊߦߌ߬ߙߌ߲߬ߘߌ߬ߣߍ߲߫ ߊ߬ߟߎ߬ ߓߘߊ ߦߋ߲߬، ߏ߬ ߟߊߜߏߦߊߢߍ ߟߋ߬ ߞߏߛߐ߲߬߸ ߛߏ ߡߏ߬ߛߏ ߟߎ߫ ߞߵߊ߬ߟߎ߬ ߟߊ߫ ߝߊ߰ߣߌ߲ ߝߊ߲߬ ߞߋߟߋ߲ ߓߐ߫߸ ߊ߬ߟߎ߬ ߣߌ߫ ߖߟߊ߬ ߥߎߟߋ߲߸ ߏ߬ ߡߍ߲ ߦߋ߫ ߡߐߣߍ ߣߌ߫ ߛߊ߬ߙߌ ߕߐ߰ߡߊ߬ߛߙߋ ߘߴߊ߬ߟߎ߬ ߓߟߏ߫ ߞߊ߬ߣߌ߲߬، ߊ߬ߟߎ߬ ߟߊ߫ ߓߐߟߌ ߞߎ߲߬ ߝߟߐߡߊ ߟߵߏ߬ ߘߌ߫߸ ߛߊ߫ ߣߌ߬ߛߌ ߏ߬ ߟߎ߬ ߘߴߊ߬ߟߎ߬ ߓߘߊ ߘߐߞߊ߬ ߢߊ ߡߍ߲ ߡߊ߬، ߊ߬ ߞߎ߲߬ ߝߌߟߊߣߊ߲ ߠߋ߬߸ ߕߍ߮ ߞߍ߫ ߘߴߊ߬ߟߎ߬ ߟߊ߫ ߡߐ߱ ߡߍ߲ ߠߎ߬ ߘߐ߫߸ ߞߵߏ߬ ߟߎ߫ ߓߌ߬ߟߊ߬.

 ߊ߬ߟߎ߬ ߓߐ߫ ߢߊ ߟߋ߬ ߞߍߣߴߏ߬ ߘߌ߫ ߓߊ߬ߣߊ߲߬ߞߐ߫߸ ߞߊ߬ ߥߎߟߊ߫ ߖߊ߲߫ ߕߊ߯ߡߊ߫ ߞߵߊ߬ߟߎ߬ ߛߌ߲߫ ߞߊ߲ߞߊ߲߫ ߠߊ߫، ߓߊߏ߬߸ ߊ߬ߟߎ߫ ߞߊ߬ ߕߊ߯ߡߊ ߘߊߡߌ߬ߣߊ߬ ߞߊ߲ߞߊ߲ߞߎߘߊ߫ ߘߏ߲߬ߘߊ ߟߊ߫߸ ߤߊ߲߯ ߞߵߊ߬ ߛߌ߰ ߞߊ߲ߞߊ߲߫ ߡߙߊ߬ߓߊ߰ߘߊ ߟߊ߫، ߕߊ߯ߡߊ߫ ߛߌߟߊ ߟߊ߫߸ ߊ߬ߟߎ߬ ߦߴߊ߬ߟߎ߬ ߡߐߣߍ߫ ߡߊ߫ ߞߊ߲ ߠߎ߬ ߟߛߊߙߌ ߞߊ߲߬߸ ߞߵߊ߬ ߓߍ߲߬ ߕߍ߬ߡߍߞߘߎ߬ߡߊ ߟߎ߬ ߟߊߜߏߦߊߢߍ ߡߊ߬߸ ߣߌ߫ ߘߏ߫ ߟߎ߫ ߦߴߊ߬ ߝߐ߫ ߟߴߊ߬ ߡߊ߬ ߞߏ߫ ߝߌߟߊߣߛߌ، ߊ߬ߟߎ߫ ߞߵߏ߬ ߕߐ߮ ߟߊ߫ ߡߙߊ߬ߓߊ߰ߘߎ߯ߟߊ ߟߋ߬ ߞߎ߲߬߸ ߞߵߏ߬ ߡߊߓߎ߬ߙߎ߲߬ߕߌ߬ ߞߎߡߊ ߘߐ߫ ߞߏߛߓߍ߫، ߓߊߏ߬߸ ߊ߬ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߡߙߊ߬ߓߊ߰ߘߎ߯ߟߊ ߟߋ߬ ߡߊ߬ߟߌ ߣߛߌ߬ ߕߌ߮ ߢߌ߲߬ ߠߎ߬ ߞߐߞߘߐ߫߸ ߞߵߊ߬ߟߎ߬ ߟߊߛߌ߰ ߊ߬ߟߎ߬ ߟߊ߫ ߘߎ߰ߞߟߏ ߞߊ߲߬.

ߊ߬ߟߎ߬ ߟߊ߫ ߡߞߊ߬ߛߟߌ߬ ߞߊ߲ ߠߎ߬ ߘߐ߫: ߞߏ߫ ߊ߬ߟߎ߬ ߟߊ߫ ߛߍ߬ߣߍ ߟߎ߬ ߓߘߊ߫ ߕߌߢߍ߫߸ ߞߵߊ߬ߟߎ߬ ߓߊߟߏ߫ ߞߏ ߜߟߍ߬ߦߊ߬߸ ߊ߬ߟߎ߬ ߟߊ߫ ߛߎ߬ߡߊ߲߬ ߛߌ߫ ߕߍ߫ ߕߏ߫ ߟߊ߫ ߣߌ߬ߛߌ ߟߎ߬ ߓߟߏ߫߸ ߞߎߡߊߕߍ߫ ߦߙߌ߫ ߡߊ߬.

ߊߛߋߕߎ߬ ߞߡߊ߬ߙߊ߬ ߡߍ߲ ߦߋ߫ ߕߐ߬ߙߐ߲߫ ߓߊ߬ߣߊ߲߬ߞߐ߫ ߛߌ߰ߓߊ߮ ߘߏ߫ ߘߌ߫߸ ߣߴߊ߬ ߘߋ߲ߞߍ߫ ߦߋ߫ ߡߌ߬ߣߊ߬ߓߊ߰ߕߐ ߢߌ߲߬ ߠߎ߬ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ <<ߖߌ߰ߕߍ߮ ߓߘߴߊ߲ ߓߐ߫߸ ߕߙߐߦߊ ߓߘߴߊ߲ ߓߐ߫، ߊ߲ ߕߍ߫ ߝߌߟߊߛߣߌ߫ ߞߏ߫ ߘߐ߫ ߒ߬ ߓߘߊ ߡߎ߬ߕߎ߲߬، ߊ߲ ߣߊ߬ߣߍ߲߫ ߠߋ߬ ߊ߬ߟߎ߬ ߦߴߊ߲ ߠߊ߫ ߡߐ߱ ߟߎ߫ ߓߌ߬ߟߊ߬߸ ߡߍ߲ ߠߎ߬ ߦߴߊ߬ߟߎ߬ ߓߟߏ߫ ߥߛߎ ߟߊ߫، ߊ߲ ߠߊ߫ ߓߊ߬ߣߊ߲߬ߞߎ ߟߎ߬ ߓߘߊ߫ ߓߊ߲߫߸ ߊ߲ ߠߊ߫ ߞߎ ߟߎ߬ ߓߘߊ߫ ߕߌߢߍ߫، ߝߌߟߊߣߛߌ ߟߎ߬ ߓߘߴߊ߲ ߗߍ߭ ߟߎ߬ ߟߊ߫ ߓߊ߯ߙߊߣߐ ߓߍ߯ ߞߍ߫ ߖߌ ߟߊ߫߸ ߞߵߊ߬ߟߎ߬ ߟߊ߫ ߕߎ߲ ߠߎ߬ ߥߦߊ߬>>

ߡߐߣߍ߫ ߞߋߟߋ߲ ߏ߬ ߟߋ ߕߍ߬ߘߍ߫ ߛߊ߬ߡߊ߲߫ ߞߏ߬ߣߊ߬ߕߍ߬ ߝߣߊ߫ ߘߐ߫߸ ߏ߬ ߡߍ߲ ߗߍ߬ ߦߋ߫ ߡߌ߬ߣߊ߬ߓߊ߰ߕߐ ߟߎ߬ ߘߐ߫، ߏ߬ ߞߵߊ߬ ߦߌ߬ߘߊ߬ ߞߏ߫: <<ߊ߬ ߕߟߋ߬ ߘߊ߲ߘߐ ߟߋ߬ ߕߋ߲߬߸ ߒ ߗߍ߬ ߦߋ߫ ߥߛߎ ߟߊ߫، ߊ߲ ߓߘߊ߫ ߕߙߐ߫߸ ߊ߲ ߠߊ߫ ߛߊ߲߬ߛߊ߲߬ ߦߙߌ ߟߎ߫ ߓߊ߬߸ ߡߊ߬ߟߏ ߟߎ߬ ߓߊ߬߸ ߊ߬ ߓߍ߯ ߓߘߊ߫ ߕߌߢߍ߫، ߊߟߎ߫ ߦߋ߫ ߘߍ߬ߡߍ߲߬ ߊ߲ ߞߊ߲߬߸ ߛߊ߫ ߣߌ߬ߛߌ ߢߌ߲߬ ߠߎ߬ ߘߌ߫ ߓߐ߫ ߊ߲ ߓߘߊ߸ ߊ߬ ߣߴߊߟߎ߫ ߦߴߊ߲ ߗߍ߬ ߟߎ߫ ߓߌ߬ߟߊ߬߸ ߊ߲ ߓߘߊ߫ ߛߍ߰ ߞߏߖߎ߰.>>

ߛߏ߫ ߡߐ߮ ߢߌ߲߬ ߠߎ߬ ߛߌߌߦߊߡߊ߲߫ ߠߊ߫ ߞߎߡߊ߫ ߘߐ߫߸ ߊ߬ߟߎ߬ ߦߴߊ߬ߟߎ߬ ߟߊ߫ ߘߌ߲߬ߞߌߙߊ ߝߊ߰ߡߊ ߟߎ߫ ߟߋ߬ ߡߊߝߌ߲߬ ߠߊ߫߸ ߊ߬ߟߎ߬ ߟߊ߫ ߘߏߞߍߓߊߟߌߦߊ ߞߏߛߐ߲߬ ߣߌ߲߬ ߞߏ ߟߊߕߐ߲ ߘߐ߫، ߏ߬ ߟߋ ߘߐ߫߸ ߛߋߞߎ߬ ߞߐ߲ߘߍ߫ ߟߊ߫ ߝߐߟߌ߫ ߘߐ߫߸ ߞߏ߫ ߛߏߣߍ߲߫ ߠߊ߫ ߡߐ߮߮ ߢߌ߲߬ ߠߎ߫ ߞߊ߬ ߡߙߊ߬ߓߊ߰ߘߎ߯ߟߊ ߟߊߛߏ߬ߓߌ߫ ߟߋ߬ ߣߌ߲߬ ߞߏ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߣߌ߬ߛߌ ߟߎ߬ ߓߘߊ߫ ߘߏ߲߬ ߊ߬ߟߎ߬ ߟߊ߫ ߛߏ ߞߣߐ߫.

<<ߊ߬ ߞߊ߬ ߟߊ߬ߤߘߌ ߕߊ߬ ߒ߬ ߧߋ߫߸ ߞߏ߫ ߣߌ߬ߛߌ ߟߎ߬ ߘߌ߫ ߟߊߓߐ߫ ߛߏ ߞߣߐ߫ ߕߟߋ߬ ߁߅ ߞߘߐ߫، ߓߊ߬ߙߌ߬߸ ߏ߬ ߞߊߙߏ߫ ߛߊ߬ߓߊ ߟߋ߬ ߕߋ߲߬߸ ߢߊ߫ ߡߊ߫ ߦߋ߫ ߞߏ߫ ߡߊ߬.>>

ߊ߬ߟߋ ߟߊ߫ ߝߐߟߌ߫ ߘߐ߫߸ ߥߊߘߌ ߡߍ߲ ߛߙߊ߬ ߘߊ߫ ߝߌߟߊ ߟߎ߬ ߓߟߏ߫ ߞߊ߬ ߣߌ߬ߛߌ ߟߎ߬ ߟߊߘߏ߲߬ ߓߊ߬ߣߊ߲߬ߞߐ߬ ߞߣߐ߫ ߞߊߙߏ߫ ߣߊ߯ߣߌ߲߫ ߞߎ߲߬ߕߊ߯ ߞߣߐ߫߸ ߏ߬ ߥߊߘߌ ߡߎ߰ߡߍ ߟߊߛߊ߬ߦߌ߲߬ ߘߊ߫ ߟߋ߬.

<<ߡߙߊ߬ߓߊ߰ߘߎ߯ߟߊ ߞߵߊ߬ ߝߐ߫ ߞߏ߫ ߥߊߘߌ ߡߍ߲ ߡߌ߬ߣߊ߬ߣߍ߲߫ ߓߌߦߊ߲ߜߍ߲ߠߊ ߟߎ߬ ߟߊ߫߸ ߞߏ߫ ߞߵߏ߬ ߟߊߛߊ߬ߦߌ߲߫ ߊ߬ߟߎ߫ ߡߊ߬߸ ߛߴߊ߬ߟߎ߬ ߘߌ߫ ߓߐ߫ ߛߏ ߞߣߐ߫، ߊ߲ ߞߵߊ߲ ߠߊߘߍ߬ ߞߊ߬ ߞߋ߲߬ߥߟߎ߬ ߃߀ ߢߌߣߌ߲߫߸ ߞߵߏ߬ ߟߊߛߊ߬ߦߌ߲߬، ߏ߬ ߓߍ߯ ߣߴߊ߬ ߕߊ߫߸ ߝߏߦߌ߬ ߡߊ߫ ߓߐ߫ ߊ߬ ߘߐ߫، ߊ߲ ߠߊ߫ ߛߣߍ߬ߝߋ߲ ߠߎ߬ ߓߘߊ߫ ߕߌߢߍ߫: ߓߊ߲߬ߣߊ߲߬ߞߎ߫ ߓߊ߬߸ ߡߊ߬ߟߏ߫ ߓߊ߬߸ ߝߊߣߌ߲߫ ߓߊ߬߸ ߞߎ߫ ߓߊ߬߸ ߊ߬ ߓߍ߯ ߓߘߊ߫ ߕߌߢߍ߫ ߣߌ߬ߛߌ ߢߌ߲߬ ߠߎ߬ ߓߟߏ߫.>>

ߞߏ ߡߎ߰ߡߍ ߦߟߍ߬ߡߊ߲߬ ߘߴߊ߬ ߢߊߖߎ߮ ߞߊ߲߬ ߡߌ߲߫߸ ߏ߬ ߟߋ ߞߍ߫ ߘߊ߫ ߣߌ߬ߛߌ ߘߏ߫ ߟߎ߫ ߝߊ߱ ߘߌ߫ ߛߏ߫ ߞߣߐ߫ ߡߐ߮ ߟߎ߬ ߓߟߏ߫، ߓߊߏ߬߸ ߛߏ߫ ߡߐ߮ ߟߎ߬ ߟߊ߫ ߝߐߟߌ߫ ߘߐ߫߸ ߘߋ߲ߡߌߛߍ߲ ߘߏ߫ ߟߎ߫ ߟߋ߬ ߥߟߌ߬ ߘߊ߫ ߡߐߣߍ ߡߊ߬߸ ߊ߬ߟߎ߬ ߟߊ߫ ߛߍ߬ߣߍ ߘߐߕߌߢߍ ߞߏߛߐ߲߬߸ ߞߊ߬ ߥߊ߫ ߥߊ߭ ߞߣߐ߫ ߞߊ߬ ߘߏ߲߬ ߣߌ߬ߛߌ ߟߎ߬ ߕߎ߫ ߘߐ߫߸ ߞߊ߬ ߛߌߦߊߡߊ߲߫ ߓߏ߲߫ ߡߊ߬ߙߌ߬ߝߊ ߟߊ߫߸ ߞߵߏ߬ ߟߎ߬ ߞߍ߫ ߛߎ߭ ߘߌ߫، ߡߊ߬ߟߌ ߣߛߌ߬ ߕߌ߮ ߏ߬ ߟߎ߬ ߝߣߊ߫ ߡߐߣߍ߫ ߢߊ ߟߋ߬ ߞߍߣߴߏ߬ ߘߌ߫߸ ߞߵߊ߬ߟߎ߬ ߡߊߞߊ߬ߛߌ߬ ߛߏ ߞߊ߲߬߸ ߊ߬ߟߎ߬ ߟߊ߫ ߣߌ߬ߛߌ ߟߎ߫ ߝߊ߱ ߞߏߛߐ߲߬، ߏ߬ ߟߋ ߞߏߛߐ߲߬߸ ߡߞߊ߬ߛߟߌ߬ ߞߍ߫ ߘߊ߫ ߘߋ߲ߡߌߛߍ߲ ߘߏ߫ ߟߎ߫ ߞߊ߲߬߸ ߕߍ߮ ߞߍ߫ ߘߊ߫ ߡߍ߲ ߛߌߦߊߡߊ߲߫ ߘߐ߫ ߞߐ ߢߌ߲߬ ߠߊ߫.

ߡߊ߬ߡߊ߬ߘߌ߫ ߞߏ߬ߣߊ߬ߕߍ߬ ߟߊ߫ ߟߞߊ߬ߟߌ߬ ߞߊ߲߫ ߘߐ߫ ߒ߬ ߠߊ߫ ߞߎߡߊߓߘߎ ߟߊ߫߸ <<ߊ߲ ߘߋ߲ ߡߍ߲ ߠߎ߬ ߡߌ߬ߣߊ߬ߣߍ߲߫߸ ߊ߬ߟߎ߬ ߦߴߏ߬ ߟߎ߫ ߓߌ߬ߟߊ߬، ߣߴߏ߬ ߕߍ߫߸ ߝߊ߬ߣߴߊ߬ߟߎ߫ ߞߵߊ߲ ߓߍ߯ ߟߊ߫ ߏ߬ ߟߎ߫ ߞߊ߬ ߞߊ߬ߛߏ ߟߊ߫ ߦߋ߲߬.>>

ߖߊ߬ߡߊ ߟߊ߫ ߓߐߟߌ ߣߴߊ߬ߟߎ߬ ߟߊ߫ ߡߐߣߍ ߞߏߛߐ߲߬߸ ߞߊ߲ߞߊ߲߫ ߡߙߊ߬ߓߊ߰ߘߊ ߘߏ߲߬ߞߏ ߟߎ߫ ߞߊ߬ ߟߊ߬ߘߍ߬ ߟߊߓߙߊ߬ߣߍ߲߫ ߛߌ߰ ߛߋ߲߬ߠߊ߫ ߌߞߘߐ߫߸ ߞߊ߬ ߛߏ߫ ߡߐ߯ ߡߐ߰ ߘߊ߲ߘߐ߫ ߝߊ߬ߙߴߊ߬ߟߎ߫ ߞߊ߲߬، ߟߊ߬ߘߍ ߏ߬ ߞߣߐ߫ ߞߎߡߊ ߟߎ߬ ߘߐ߫߸ ߝߘߏ߬ߓߊ߬ ߞߕߌߞߊ߲ߘߊ ߡߊߙߑߥߊߣ ߓߊߟߑߘߋ߬ ߞߵߊ߬ ߦߌ߬ߘߊ߬ ߞߏ߫ ߓߊ߬ߣߊ߲߬ߞߐ߬ߞߊ ߟߎ߬ ߟߊ߫ ߓߐߟߌ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߝߊ߰ߡߊ ߟߎ߫ ߟߐ߬ ߓߟߏߘߐߓߍ߲߫ ߞߍ߫ ߟߴߊ߬ ߞߏ ߟߊ߫ ߞߊߟߌߦߊ߫ ߘߐ߫.

<<ߛߓߊ߬ߘߎ߰ ߓߙߊ߬ߣߡߊ߬ߞߊ ߟߎ߬ ߓߐ߫ ߘߊ߫ ߟߋ߬ ߓߌ߬ ߞߊ߬ ߣߊ߬ ߡߙߊ߬ߓߊ߰ߘߊ ߟߊ߫ ߦߊ߲߬، ߊ߬ߟߎ߬ ߟߊ߫ ߓߐߟߌ ߣߌ߲߬ ߛߎ߬ߘߎ߲߬ߧߊ߬ ߘߊ߫ ߖߊ߬ߡߊ ߟߊ߫ ߖߛߎ߬ߛߎߡߊ ߘߐߓߎ߬ߘߎ߲ ߠߊ߫߸ ߏ߬ ߡߍ߲ ߞߍ߫ ߘߊ߫ ߕߙߎ߬ ߘߌ߫ ߞߵߊ߲ ߟߐ߬ ߓߐ߫ ߟߴߊ߲ ߣߐ߭ ߘߐ߫߸ ߞߊ߬ ߣߊ߬ ߢߊ߫ ߢߌߣߌ߲߫ ߊ߬ ߞߏ ߡߊ߬.>>

ߡߊߙߑߥߊߣ ߠߊ߫ ߝߐߟߌ߫ ߘߐ߫߸ ߝߊ߰ߡߊ ߟߎ߫ ߖߍ߬ߘߍ ߛߐ߲߬ߣߴߊ߬ ߡߊ߬ ߞߏ߫ ߕߌߢߍߟߌ߫ ߛߌߦߊߡߊ߲߫ ߓߘߊ߫ ߞߍ߫ ߛߍ߬ߣߍ ߟߎ߬ ߘߐ߫ ߝߋߝߋ߫، <<ߊ߲ ߞߵߊ߬ ߟߊߞߙߐ߬ߛߌ߬ ߞߏ߫ ߕߙߐߦߊ ߓߘߊ߫ ߟߊ߫ ߛߓߊ߬ߘߎ߰ ߓߙߊ߬ߣߡߊ߬ߞߊ ߟߎ߫ ߞߊ߲߬ ߊ߬ߟߎ߬ ߟߊ߫ ߛߍ߬ߣߍ ߝߍ߬، ߊ߬ߟߎ߫ ߘߏ߲߬ ߕߎ߲߬ ߓߘߴߊ߬ߟߎ߬ ߟߊ߫ ߡߞߊ߬ߛߟߌ߬ ߞߊ߲ ߏ߬ ߟߎ߬ ߢߊߝߐ߫ ߊ߬ߟߎ߬ ߟߊ߫ ߛߏ ߝߊ߰ߡߊ ߟߎ߬ ߦߋ߫ ߞߘߐ߬ߡߊ߲߬߸ ߏ߬ ߟߎ߬ ߡߊ߫ ߛߋ߫ ߓߐߘߊ߫ ߢߌߣߌ߲߫ ߠߴߊ߬ ߞߏ ߟߊ߫.>>

ߢߐ߲߯ߦߋ ߣߌ߲߬ ߘߐ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߡߊ߬ߞߟߐ ߟߎ߫ ߕߘߍ߬ ߞߣߍ ߞߊ߲߬߸ ߣߴߏ߬ ߦߋ߫ ߞߎ߲߬ߠߊ߬ߛߌ߰ߟߊ߫ ߝߊߙߌ߲߫ ߊ߬ߟߌ ߓߊߘߊ߬ߙߊ߫ ߞߡߊ߬ߙߊ߬ ߣߴߊ߬߬ ߞߐ ߘߌ߫߸ ߊ߬ ߣߌ߫ ߞߕߌ ߞߏߟߊߕߍ߮ ߟߎ߬ ߣߌ߫ ߡߙߊ߬ߓߊ߰ߘߊ ߕߊ ߟߎ߬߸ ߛߊ߫ ߞߏ ߣߌ߲߬ ߘߌ߫ ߘߐߛߎߡߊ߫ ߢߊ ߡߍ߲ ߡߊ߬، ߛߏ߫ ߡߐ߮ ߟߎ߫ ߞߵߊ߬ ߦߌ߬ߘߊ߬ ߞߏ߫ ߞߵߊ߬ߟߎ߬ ߟߊ߫ ߡߐ߰ ߡߌ߬ߣߊ߬ߣߍ߲ ߠߎ߬ ߘߴߊ߬ߟߎ߫ ߡߊ߬߸ ߊ߬ߟߎ߬ ߦߋ߫ ߥߊ߫ ߞߋߟߋ߲ߘߌ߫.

ߞߕߌߞߊ߲ߘߊ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ <<ߕߍ߮߮ ߞߍߣߍ߲߫ ߡߍ߲ ߠߎ߬ ߘߐ߫߸ ߏ߬ ߟߎ߬ ߘߌ߫ ߞߊ߬ߙߌ߬ߝߊ߫ ߛߏ ߡߐ߰ߓߊ߫ ߝߌ߬ߟߊ߫ ߟߊ߫، ߦߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.>>

ߝߊ߰ߡߊ ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߏ߬ ߞߘߐ߫ ߕߍ߫ ߘߋ߬߸ ߞߵߊ߬ ߝߐ߫ ߞߏ߫ ߊ߬ ߞߏ ߓߊ߲ߣߍ߲߫ ߠߵߏ߬ ߘߌ߫، ߣߌ߬ߛߌ ߟߎ߬ ߘߌ߫ ߟߊߓߐ߫ ߛߏ ߞߣߐ߫߸ ߓߊ߬ߙߌ߬ ߕߎ߬ߡߊ߬ߣߍ߲߬ ߞߋߟߋ߲ ߏ߬ ߝߣߊ߫ ߟߊ߫߸ ߢߊߢߌߣߌ߲ ߘߌ߫ ߛߌ߰ ߛߋ߲߬ߠߊ߫߸ ߞߵߊ߬ ߟߐ߲߫߸ ߡߍ߲ ߠߎ߬ ߛߋ߲߬ ߦߋ߫ ߞߏߖߎ߯ ߛߎ߮ ߣߌ߲߬ ߘߐ߫߸ ߞߊ߬ ߕߍ߮ ߞߍ߫ ߊ߬ߟߎ߬ ߘߐ߫.

ߖߌ߬ߣߍ߬ ߜߍߞߊ߲ߠߊ ߘߏ߲߬ ߝߊߣߍ߲߫ ߣߌ߲߬ ߡߊ߲߬ߞߊ߲߬ ߛߎ߮ ߛߌߦߊߡߊ߲߫ ߠߋ߬ ߟߊ߫߸ ߛߣߍ߬ߞߍ߬ߟߊ ߟߎ߬ ߣߌ߫ ߓߌߦߊ߲߫ ߓߌߟߊߟߊ ߟߎ߬ ߕߍ߫، ߥߊ߯ߕߌ ߢߌ߲߬ ߠߊ߫߸ ߌ ߘߌ߫ ߛߋ߫ ߣߌ߬ߛߌ ߥߊ߯ ߦߙߌߞߊ ߦߋ߫ ߟߊ߫ ߛߏ߫ ߞߋߟߋ߲ ߥߊ߭ ߞߣߐ߫، ߊ߬ ߛߌߦߊߡߊ߲ ߘߏ߲߬ ߣߌ߫ ߛߏ ߡߐ߰ ߘߊ߲ߘߐ߫ ߟߵߊ߬ߟߎ߫ ߛߌ߰ ߟߊ߫ ߞߊ߬ ߞߎߡߊ߫߸ ߞߊ߬ ߘߏ߲߬ ߛߏ ߞߣߐ߫ ߖߊ߬ߡߊ ߕߐ߭ ߞߊ߲ߞߕߐߡߊ߬، ߕߙߐߦߊ ߦߋ߫ ߡߍ߲ ߠߎ߬ ߞߊ߲߬߸ ߝߋ߲߫ ߕߴߏ߬ ߟߎ߬ ߘߊ߫، ߘߏ߫ ߦߋ߫ ߡߍ߲ ߠߎ߬ ߘߊ߫߸ ߏ߬ ߟߎ߬ ߕߍ߫ ߦߋ߫ ߟߊ߫߸ ߕߙߐߦߊ߫ ߘߏ߲߬ ߕߴߊ߬ߟߎ߫ ߞߊ߲߬، ߓߊߏ߬߸ ߊ߲ ߠߊ߫ ߞߟߌߟߌ ߛߋ߫ ߘߊ߫ ߝߊ߰ߡߊ ߘߏ߫ ߟߎ߫ ߡߊ߬ ߣߌ߲߬ ߞߏ ߘߐ߫߸ ߊߟߎ߫ ߘߌߣߵߏ߬ ߟߎ߬ ߟߊ߫ ߛߙߊ߬ߣߎ߲߬ ߞߊ߲ ߠߎ߬ ߟߊߛߐ߬ߘߐ߲߬ ߊ߲ ߠߊ߫ ߝߐ߰ߓߍ߫ ߣߊ߬ߕߐ ߟߎ߬ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.