ߊߓߘߎߟߊߦߌ߬ ߖߊ߬ߞߌ߬ߕߋ߬ ߡߍ߲ ߦߋ߫ ߞߊ߲ߞߊ߲߫ ߡߙߊ߬ߓߊ߰ߘߊ ߡߊ߬ߞߍ߬ ߦߙߐ ߗߋߕߌ߮ ߘߌ߫߸ ߏ߬ ߟߊ߫ ߞߕߌ ߛߋ߲߬ߕߊ߬ ߂߲ ߠߋ߬ ߕߎ߲߬ ߦߴߌߘߐ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߂߀߂߆ ߕߙߊߓߊ ߕߋ߬ߟߋ߫ ߃ ߣߌ߲߬ ߡߊ߬، ߓߌ߬ߟߊ߬ ߞߍߣߴߊ߬ ߞߐ߫ ߞߵߏ߬ ߞߎ߲߭ ߞߍ߫ ߥߎߦߊ߸ ߥߎߦߊ ߟߊߓߊ߯ߙߊ ߣߌ߫ ߝߙߋ߬ߝߌ߬ߟߡߊ߬ߦߊ ߘߎ߰ ߞߏ߬ ߥߦߐ ߘߏ߫ ߘߐ߫، ߒ߬ߓߊ߬߸ ߊ߬ ߟߊ߫ ߞߕߌ ߛߋ߲߬ߕߊ ߓߍ߯ ߞߎ߲߭ߝߊ߰ ߘߊ߫ ߓߌ߬߸ ߞߵߊ߬ ߕߊ߬ ߟߊ߬ߥߟߍ߬ߟߌ ߣߌ߫ ߡߌ߬ߣߊ߬ߞߊ߲߬ ߝߐ ߣߌ߫ ߡߞߊ߬ߛߌ߬ߞߊ߲߬ߝߐ ߟߎ߬ ߡߊ߬، ߞߕߌ ߕߍ߱ ߓߘߊ߫ ߕߏ߫ ߕߙߊߓߊ ߕߋ߬ߟߋ߫ ߆ ߣߊ߬ߕߐ ߟߊ߫. ߞߕߌߞߊ߲ߘߊ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߛߊ߬ߥߏ ߟߋ߬߸ ߞߊ߬ ߛߊ߲߬ ߅ ߥߛߎ߫ ߘߐ߲ߘߐ߫ ߊ߬ ߡߊ߬߸ ߊ߬ ߣߴߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߁߅ ߛߊ߬ߙߊ߫ ߢߍ߬ߦߌ߲߬ߘߐ߬ߓߍ߲ ߘߌ߫.

ߊߓߎߟߊߦߌ߬ ߖߊ߬ߞߌ߬ߕߋ߬ ߡߊߞߟߌ ߞߐߝߍ߬ ߞߟߍ߬ߡߐ߰ߘߊ ߟߊ߫߸  ߟߊ߬ߡߙߊ߬ߟߌ ߟߐ߬ߒ߬ߞߋ߬ߟߊ ߞߵߊ߬ ߟߊߘߏ߲߬ ߞߕߌ߫ ߡߊߞߐߣߐ߲߫ ߥߛߎ ߟߊ߫ ߓߌ߲ߠߊߥߎߟߋ߲ ߕߋ߬ߟߋ߫ ߂߂ ߟߋ߬ ߡߊ߬، ߏ߬ ߟߋ ߞߐߝߍ߬߸ ߓߌ߲ߠߊߥߎߟߋ߲ ߕߋ߬ߟߋ߫ ߂߈ ߡߊ߬߸ ߟߊ߬ߥߟߍ߬ߟߌ߬ ߝߟߐߡߊ ߞߍ߫ ߘߊ߫، ߏ߬ ߞߎ߲߭ߘߏ߲߬ ߘߊ߫ ߡߎ߲߬ ߡߊ߬߸ ߓߟߏߓߐ߫ ߘߴߊ߬ ߘߐ߫ ߞߵߊ߬ ߝߐ߫ ߊ߬ ߦߋ߫ ߞߏ߫ ߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߕߊ߲߫ ߛߊ߬ߙߊ߫ ߞߎ߲߬ߞߘߐ߬ߛߌ߮ ߘߌ߫.

ߛߓߍ ߕߍ߬ߘߍ߫ ߘߎ߱ ߘߏ߫ ߟߋ߬ ߟߊ߫ ߞߊ߲ߞߊ߲߫ ߛߏ ߞߣߐ߫߸ ߞߊ߬ߦߌ߯ ߁߉߆߈ ߠߊ߫، ߊ߬ ߦߌ߬ߘߊ߬ߣߍ߲߬ ߞߏ߫ ߊߓߘߎߟߊߦߌ߬ ߖߊ߬ߞߌ߬ߕߋ߫ ߞߊ߬ ߛߓߍ߫ ߞߎߘߊ߫ ߟߋ߬ ߟߊߘߊ߲߫ ߘߎ߱ ߏ߬ ߟߊ߫ ߂߀߂߂ ߟߊ߫߸ ߏ߬ ߟߋ ߞߍߣߍ߲߫ ߣߊߡߙߊ ߣߌ߲߬ ߛߓߊߓߎ ߘߌ߫ ߊ߬ ߞߐ߫، ߓߊߏ߬߸ ߊ߬ߟߋ ߟߊ߫ ߝߐߟߌ߫ ߘߐ߫߸ ߊ߬ ߞߵߊ߬ ߢߊߢߌߣߌ߲߫ ߢߊ ߓߍ߯ ߡߊ߬߸ ߊ߬ ߡߊ߫ ߛߓߍ߫ ߞߘߐ߫ ߦߋ߫ ߘߎ߱ ߟߊ߫، ߝߏ߫ ߊ߬ߟߎ߫ ߞߊ߬ ߞߌ߲߬ߕߌ߮ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߢߌߣߌ߲߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߛߓߍ ߟߊߘߊ߲߫ ߝߛߊߦߌ߫.

ߏ߬ ߟߋ ߘߐ߫߸ ߞߕߌߞߊ߲ߘߊ ߞߵߊ߬ ߞߊ߲ߠߊߘߌ߫ ߞߌ߲߬ߕߌ߮ ߝߣߊ߫ ߡߊ߬߸ ߏ߬ ߣߊ߬ ߘߴߊ߬ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߠߎ߬ ߝߐ߫، ߓߊߏ߬߸ ߛߓߍ߫ ߟߋ߬ ߘߌ߫ ߘߊ߫ ߞߌ߲߬ߕߌ߮ ߊ߬ߓߎ߫ ߛߌ߬ߛߋ ߡߊ߬ ߞߏ߫ ߊ߬ ߦߴߊ߬ ߞߟߊ߬ߣߐ߬ߦߊ߬߸ ߊ߬ ߡߊ߫ ߛߓߍ ߡߍ߲ ߞߣߐߞߏ߫ ߟߐ߲߫߸ ߊ߬ ߘߏ߲߬ ߡߴߊ߬ ߢߊߢߌߣߌ߲߫، ߛߓߍ ߏ߬ ߟߋ ߞߵߊ߬ ߦߌ߬ߘߊ߬߸ ߞߏ߫ ߡߊ߬ߞߍ߬ ߦߙߐ ߘߌ߫ ߛߋ߫ ߛߓߍ ߘߌ߫ ߟߊ߫ ߛߓߍ߫ ߢߌߣߌ߲ߠߊ ߏ߬ ߟߎ߫ ߡߊ߬ ߝߛߊߦߌ߫߸ ߞߏ߫ ߊ߬ߟߎ߫ ߝߊ߬ ߗߍ ߟߋ߬.

ߞߌ߲߬ߕߌ߮ ߞߵߊ߬ ߦߌ߬ߘߊ߬߸ ߞߏ߫ <<ߒߠߋ ߦߋ߫ ߊߘߡߊߦߊ ߟߊߘߊ߲ ߠߋ߬ ߟߊ߫ ߞߘߊߎ߫، ߤߊߟߌ߬ ߒ ߓߊ߯ ߓߐ߫ ߦߊ߲߬ ߛߌߛߍ߲߬߸ ߒ ߥߊߕߐ߫ ߡߐ߰ߦߊ ߟߊߘߊ߲߫ ߦߙߐ ߘߏ߫ ߟߋ߬ ߘߐ߫.>> ߏ߬ ߟߋ ߘߐ߫߸ ߊ߬ ߞߊ߬ ߛߓߍ ߏ߬ ߞߟߊ߬ߣߐ߬ߦߊ߫߸ ߣߌ߫ ߢߊߢߌߣߌ߲ߠߌ߲߫ ߕߍ߫، ߊ߬ ߞߏ߫ <<ߣߌ߫ ߖߊ߲߬ߝߊ ߡߍ߲ ߞߍߣߍ߲߫ ߞߍ߫ ߘߊ߫ ߛߓߍ߫ ߞߏ ߣߌ߲߬ ߘߐ߫߸ ߏ߬ ߓߐߣߍ߲߫ ߡߐ߰ ߟߋ߬ ߘߐ߫߸ ߡߍ߲ ߞߊ߬ ߛߓߍ ߘߌ߫ ߒ ߡߊ߬ ߞߏ߫ ߒ ߧߴߊ߬ ߞߟߊ߬ߣߐ߬ߦߊ߬، ߓߊߏ߬߸ ߊ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߡߊ߬ߞߏ ߦߋ߫ ߒ ߠߊ߫ ߞߟߊ߬ߣߐ ߟߋ߬ ߟߊ߫߸ ߛߊ߫ ߘߊ߲߭ ߘߌ߫ ߦߌ߬ߘߊ߫ ߞߵߏ߬ ߞߍ߫ ߥߐ߬ߦߐ ߓߊ߲ߣߍ߲ ߘߌ߫،>> ߓߊ߬ߙߌ߬߸ ߊ߬ ߡߊ߫ ߝߐ߫ ߞߏ߫ ߛߓߍ߫ ߞߎߘߊ߫ ߟߊߘߊ߲ߕߐ߫ ߘߎ߱ ߟߊ߫.

ߏ߬ ߟߋ ߘߐ߫߸ ߞߕߌߞߊ߲ߘߊ ߟߊ߫ ߡߌ߬ߣߊ߬ߞߊ߲߬ߝߐ ߘߊߞߎ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ <<ߛߊ߲߬ ߟߏ߯ߟߎ߫>> ߥߛߎ ߟߋ߬ ߞߊ߫ ߞߊ߲߫ ߞߊ߬ ߘߐ߲ߘߐ߫ ߊߓߘߎߟߊߦߌ߬ ߖߊ߬ߞߌ߬ߕߋ߫ ߡߊ߬߸ ߊ߬ ߣߴߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߁߅ ߛߊ߬ߙߊ߫ ߢߍ߬ߢߌ߲߬ߘߐ߬ߓߍ߲ ߘߌ߫߸ ߞߵߏ߬ ߞߎ߲߭ ߞߍ߫ ߥߎߦߊ ߣߌ߫ ߥߎߦߊ ߟߊߓߊ߯ߙߊ ߘߴߊ߬ ߓߟߏ߫ ߝߘߏ߬ߓߊ߬ ߛߓߍߟߌ߫ ߖߐ߲ߖߐ߲ ߘߐ߫.

ߡߍ߲ ߓߍ߲߬ߣߍ߲߫ ߞߌ߲߬ߕߌ߮ ߟߊ߫ ߞߏ ߡߊ߬߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߬߸ ߞߏ߫ <<ߞߌ߲߬ߕߌ߮ ߕߍ߫ ߞߌ߲߬ߘߊ ߞߣߐ߫ ߕߋ߲߬ ߘߋ߬߸ ߛߓߍ ߡߍ߲ ߓߊ߯ ߣߊ߬ ߘߴߌ ߡߊ߬ ߌߞߘߐ߫߸ ߌߟߋ ߦߴߌ ߓߟߏߣߐ ߓߌ߬ߟߊ߫ ߏ߬ ߘߐ߫ ߦߋ߲߬ ߕߋ߲߬.>> ߌ ߣߴߊ߬ ߢߊߢߌߣߌ߲ ߠߋ߬ ߞߊ߫ ߞߊ߲߫، ߏ߬ ߟߊ߫ ߞߏ߫ ߢߊߢߌߣߌ߲ߓߊߟߌߦߊ ߏ߬ ߞߏߛߐ߲߬߸ ߊ߬ ߣߴߊ߬ ߞߍ ߞߊ߬ ߓߊ߯ߙߊ߫ ߞߍ߫ ߡߍ߲ ߕߴߊ߬ ߟߊ߫ ߓߊ߯ߙߊ߫ ߘߌ߫߸ ߣߴߏ߬ ߦߋ߫ ߘߎ߱ ߕߌ߰ߦߊ ߟߊߛߙߋߦߊ ߘߌ߫߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߬ ߞߏ߫ ߛߊ߲߬ ߣߊ߯ߣߌ߲߫ ߥߛߎ߫ ߟߋ߬ ߞߊ߫ ߞߊ߲߫ ߞߊ߬ ߘߐ߲ߘߐ߫ ߊ߬ ߡߊ߬߸ ߞߵߏ߬ ߟߊ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߃ ߛߊ߬ߙߊ ߞߊ߲߬، ߓߊߏ߬߸ ߊ߬ ߓߘߊ߫ <<ߥߎߦߊ ߟߊߘߊ߲߫߸ ߞߊ߬ ߓߊ߲߫ ߞߊ߬ ߓߊ߯ߙߊ߫ ߞߍ߫ ߊ߬߸ ߊ߬ ߟߊ߫ ߞߍߕߊ߫ ߕߍ߫ ߡߍ߲ ߘߌ߫.>>

ߢߊߝߐߟߌ ߏ߬ ߟߎ߬ ߞߐ ߘߐ߫߸ ߊߓߘߎߟߊߦߌ߬ ߖߊ߬ߞߌ߬ߕߋ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߫ ߞߊ߬ ߡߞߊ߬ߛߌ߬ߞߊ߲߬ߝߐ ߘߊߡߌ߬ߣߊ߬߸ ߣߊߟߌ߬ߡߎ߲߫ ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߌ߫ ߞߊ߬ߙߊ߲߬ߡߐ߰ ߡߏߙߌ߬ ߞߏߣߋ߫ ߘߌ߫، ߏ߬ ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߣߌ߫ <<ߞߕߌ ߡߊ߲߫ ߞߊ߲߫ ߞߏߢߊ ߣߌ߲߬ ߘߐ߫،>> ߊ߬ ߣߐ߬ ߛߓߍ ߡߍ߲ ߠߊߘߊ߲߫ ߠߊ߫߸ ߏ߬ ߟߋ ߕߎ߲߬ ߞߊ߫ ߞߊ߲߫ ߞߊ߬ ߟߊߓߋ߬، ߣߴߊ߬ ߘߏ߲߬ ߡߊ߫ ߢߊ߬ ߟߊߛߌ߱ ߞߐ߫ ߖߐ߲ ߘߐ߫߸ ߏ߬ ߕߘߍ߬ ߞߍ߫ ߟߊ߫ <<ߡߊ߬ߡߙߊ߬ߟߌ ߞߕߌߕߍ߯ߟߊ>> ߟߎ߫ ߟߋ߬ ߘߌ߫. ߏ߬ ߘߐ߫߸ ߞߏ߫ ߊ߬ߟߎ߬ ߦߴߊ߬ ߢߌߣߌ߲߫ ߠߊ߫ ߖߏߓߊ߮ ߝߍ߬߸ ߊ߬ ߦߴߊ߬ ߓߟߏߓߐ߫ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߘߐ߫، ߞߊ߬ ߓߊ߲߫߸ ߊ߬ ߣߐ߬ <<ߞߋ߲߬ߥߟߎ߬ ߕߊ߲ ߡߍ߲ ߛߙߊ߬ ߟߊ߫ ߞߎ߲߬ߞߘߐ߬ߛߌ߮ ߘߌ߫߸ ߞߵߏ߬ ߟߊߛߊ߬ߦߌ߲߫ ߊ߬ ߡߊ߬.>> ߓߊߏ߬߸ ߞߏ߫ ߡߊ߫ ߦߋ߫ ߊ߬ ߣߐ߬ ߘߐ߫߸ ߓߟߏ߫ ߘߌ߫ ߞߍ߫ ߡߍ߲ ߠߊ߫.

ߛߙߊ߬ߣߎ߲ ߏ߬ ߟߏ߫ ߟߋ߬ ߓߍ߯ ߞߐ ߘߐ߫߸ ߖߏߓߊ߮ ߣߴߊ߬ ߟߊ߫ ߞߕߌߛߓߍߟߊ ߓߍ߲߬ ߘߴߊ߬ ߡߊ߬߸ ߞߏ߫ ߊ߬ߟߎ߬ ߓߘߊ߫ ߝߐߟߌ ߟߎ߬ ߟߊߡߍ߲߫߸ ߞߕߌ ߓߘߊ߫ ߟߊߕߊ߯ ߛߌ߬ߣߌ߲߬ߟߏ߲߫ ߣߊ߬ߕߐ ߘߐ߫߸ ߂߀߂߆ ߕߙߊߓߊ ߕߟߋ߬ ߆. ߏ߬ ߘߐ߫߸ ߣߌ߫ ߡߍ߲ ߓߐ߫ ߘߴߊ߬ ߘߐ߫߸ ߊ߲ ߓߍߣߵߏ߬ ߞߌ߬ߦߴߊߟߎ߫ ߡߊ߬ ߝߐ߰ߓߍ߫ ߣߊ߬ߕߐ ߟߎ߬ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߟߋ߬ ߕߎ߲߬ ߦߋ߫ ߞߣߍ ߞߊ߲߬߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.