ߓߌ߬ ߛߐ߱ ߢߌ߲߬ ߡߊ߬߸ ߡߊ߬ߘߏ߬ߣߌ߲߬ߠߌ߲ ߕߐ߰ߕߐ߰ߟߌ߬ߟߊ ߟߎ߫ ߞߊ߬ ߛߌߟߊ ߟߋ߬ ߕߍ߰ ߖߊ߲߬ߞߊ߰ߣߊ߫ ߘߎ߱ ߞߣߐ߫߸ ߞߎߘߍ߫ ߕߊ߲ߣߌߝߌ߬ߟߊ߫ ߖߊ߬ߕߋ߬ ߦߴߏ߬ ߡߍ߲ ߣߌ߫ ߞߊ߲ߞߊ߲߫ ߕߍ߫߸ ߞߊ߬ ߟߊ߬ߓߏ߬ߙߟߌ߬ߟߊ ߟߎ߫ ߞߊ߬ߢߊ߫ ߘߏ߲߬ ߠߊ߫ ߛߏ ߞߣߐ߫߸ ߞߊ߬ ߛߌߟߊ ߕߍ߰߸ ߞߊ߬ ߓߎ߬ߘߎ߲ ߠߊߘߏ߲߬ ߖߌ߰ߣߌ߬ߦߟߍ ߘߐ߫، ߞߊ߬ ߓߍ߲߬ ߛߊ߬ߙߌ߬ߦߊ߬ ߛߐߛߐ ߓߊ߯ߙߊ ߏ߬ ߡߊ߬ ߛߊ߫߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߞߊ߬ ߖߊ߬ߡߊߙߌ ߘߌ߫ ߕߐ߲ ߓߟߏߡߊ ߟߎ߫ ߡߊ߬، ߏ߬ ߟߎ߫ ߞߵߊ߬ߟߎ߬ ߕߍ߯ ߞߍ߫ ߡߐ߰ ߘߊ߲ߘߐ߫ ߘߐ߫ ߛߌߟߊ߫ ߕߍ߯ߟߊ ߟߎ߬ ߘߐ߫߸ ߞߊ߬ ߓߊ߲߫ ߞߊ߬ ߘߎ߰ߞߎߟߎ߲ ߘߏ߫ ߟߎ߫ ߝߣߊ߫ ߡߌ߬ߣߊ߬.

ߖߌ߰ߣߍ߬ߦߟߍ߫ ߕߎ߲߬ ߕߍ߫ ߞߍ߫ ߟߊ߫߸ ߘߎ߰ߞߎ߬ߟߎ߲߬ ߕߍ߫ ߘߏ߲߬߸ ߝߋ߲߫ ߕߍ߫ ߓߐ߫߸ ߘߎ߰ߞߎߟߎ߲ ߞߵߊ߬ ߟߐ߬ ߢߐ߲߮ ߞߐ߫߸ ߊ߬ ߘߌ߫ ߗߍ߬ߡߍ߫ ߢߐ߲߰ ߓߐ߫߸ ߏ߬ ߘߏ߲߬ ߞߍ߫ ߘߊ߫ ߕߎ߬ߡߊ߬ߙߋ߲߬ ߦߙߌߞߊ߫ ߟߋ߬ ߞߘߐ߫، ߏ߬ ߟߋ ߡߊ߫ ߛߊ߬ߙߌ߬ߦߊ߬ ߕߏ߫ ߛߌ߰ ߘߐ߫ ߝߋߎ߫.

ߒ߬ߓߊ߬߸ ߖߊ߲߬ߞߊ߰ߣߊ߫ ߘߏ߲߬ߘߊ ߘߐߞߟߊߦߊ߫ ߘߊ߫ ߟߋ߬ ߓߌ߬ ߞߐ߬ߟߏ߲ ߛߐ߱ ߢߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߟߋ߬ ߀߇، ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߡߊ߬ߘߏ߬ߣߌ߲߬ߠߌ߲ ߕߐ߰ߕߐ߰ߟߌ߬ߟߊ߫ ߟߎ߫ ߟߋ߬ ߥߟߌ߬ ߘߊ߫ ߛߎߓߊ߮ ߝߍ߬߸ ߞߊ߬ ߥߊ߫ ߛߌߟߊ ߕߍ߰ ߘߎ߰ߞߎߟߎ߲ ߠߎ߬ ߦߋ߫߸ ߡߍ߲ ߓߍ߯ ߦߋ߫ ߡߊ߬ߘߏ߬ߣߌ߲߬ߠߌ߲߬ߠߊ ߟߎ߬ ߘߌ߫، ߟߌ߬ߤߟߊ ߘߏ߫ ߟߎ߫ ߞߵߊ߬ ߦߌ߬ߘߴߊ߲ ߠߊ߫ ߞߏ߫ ߕߎ߬ߡߊ߬ߙߋ߲߬ ߦߙߌߞߊ߫ ߟߋ߬ ߞߍ߫ ߘߊ߫ ߢߊ ߏ߬ ߡߊ߬߸ ߡߐ߰ ߕߍ߫ ߘߏ߲߬߸ ߡߐ߰ ߕߍ߫ ߓߐ߫.

ߞߊ߬ ߓߍ߲߬ ߏ߬ ߟߋ ߞߏߢߊ ߡߊ߬ ߛߊ߫߸ ߌߞߏߡߌ߲߬ ߊ߬ ߦߋ߫ ߡߊ߬ߘߏ߬ߣߌ߲߬ߠߌ߲ ߕߐ߰ߕߐ߰ߟߌ߬ߟߊ ߟߎ߫ ߟߋ߬ ߟߊ߫ ߞߎ߲߬ߠߊ߫߸ ߊ߲ ߕߊ߯ ߘߴߊ߬ߟߎ ߟߊ߫ ߖߋ߬ߓߌ߬ߦߊ߬ߟߊ ߘߏ߫ ߡߊߢߌ߬ߣߌ߲߬ߞߊ߫߸ ߡߍ߲ ߞߵߊ߬ ߟߊߢߌߣߌ߲߫ ߞߏ߫ ߞߵߊ߬ ߕߏ߫ ߜߎ߬ߕߙߎ ߞߣߐ߫߸ ߊ߬ ߡߊ߫ ߛߐ߲߬ ߝߋ߲߫ ߝߐ߫ ߟߊ߫ ߣߌ߲߬ ߞߏ ߞߊ߲߬߸ ߡߐ߰ ߘߌ߫ ߡߍ߲ ߠߊߞߊ߬ߟߌ߬، ߒ߬ߓߊ߬߸ ߞߎߡߊߓߘߎ ߣߌ߫ ߖߌ߬ߦߕߊ߬ߟߊ߲ ߞߊ߲ߞߕߐߡߊ߬ ߏ߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫: <<ߜߟߍ߬ߦߊ ߘߏ߫ ߟߎ߫ ߟߋ߬ ߦߋ߫ ߟߊ߬ߓߏ߬ߙߟߌ߬ߟߊ ߟߎ߫ ߞߊ߲߬߸ ߏ߬ ߟߋ ߞߎߡߊ ߦߋ߫ ߛߋ߲߬ߠߊ߫.>> ߊ߬ ߡߊ߫ ߢߊߝߐߟߌ ߘߐߘߎ߲߬ߧߊ߬ ߜߘߍߞߍ߫ ߡߎ߬ߕߎ߲߬، ߊߟߎ߫ ߞߏ߬ߣߌ߲ ߦߴߊ߬ ߟߐ߲߫߸ ߌ ߓߊ߯ ߛߋ߫ ߞߐ߲߬ߛߏ ߜߙߋ ߟߎ߬ ߟߊ߫ ߞߊ߲ߞߊ߲߫ ߞߣߐ߫߸ ߊ߬ߟߎ߬ ߟߊ߫ ߝߐ߬ߟߍ߬ߘߊ ߟߎ߬ ߕߎ߲߯ߣߍ߲߫ ߠߋ߬߸ ߟߊ߬ߓߏ߬ߙߟߌ߬ߟߊ߬ ߛߌߦߊߡߊ߲߫ ߝߣߊ߫߸ ߛߌߟߊ ߕߍ߰ߣߍ߲߫ ߏ߬ ߟߎ߬ ߦߋ߫ ߞߊ߲ߞߊ߲߫ ߘߏ߲߬ߘߊ ߣߴߊ߬ ߓߐߘߊ ߟߎ߬ ߟߊ߫ ߛߌߟߊ߫ ߞߎ߲߫ ߛߌߦߊߡߊ߲߫ ߠߊ߫.

ߌߞߏߡߌ߲߬ ߛߌߟߊ߫ ߕߍ߮ ߏ߬ ߡߊ߫ ߦߋ߫ ߛߊ߬ߙߌ߬ߦߊ߬ ߞߣߐ߫ ߞߏ߫ ߓߘߍ߫ ߘߌ߫߸ ߛߊ߬ߙߌ߬ߦߊ߫ ߞߣߐ߬ߜߍ߲߬ߓߊ߮ ߟߎ߫ ߞߵߊ߬ߟߎ߬ ߞߍߕߊ ߞߍ߫ ߌߞߘߐ߫، ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߕߌߞߊ߲ߘߊ ߝߏߘߋ߬ ߓߌ߲ߕߎ߬ ߞߋߕߊ߬ ߕߊ߯ ߘߊ߫ ߞߣߍ ߞߊ߲߬ ߦߋ߲߬߸ ߞߵߏ߬ ߟߊ߫ ߞߟߍ߬ߡߐ߮ ߟߎ߫ ߞߊ߲߬߸ ߛߋ߲߬ߕߘߍ߬ߟߌ߬ ߞߊߟߌ߲ ߓߙߌ߬ߝߐߝߐ (ߛߞߓ)، ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߓߊ߯ߙ߫ ߛߎ߮ ߏ߬ ߦߋ߫ ߛߊ߬ߙߌ߬ߦߊ߬ ߛߐ߬ߛߐ߬ ߞߏ߬ߓߊ߫ ߟߋ߬ ߘߌ߫.

<<ߝߊߦߙߌ߫ ߛߊߟߌ ߕߊ߬ߡߌ߲ ߞߐߝߍ߬߸ ߊ߬ߟߎ߫ ߞߊ߬ ߞߟߍ߬ߡߐ߮ ߟߎ߬ ߟߊߟߐ߲ߠߌ߲߫߸ ߞߏ߫ ߕߐ߰ߕߐ߰ߟߌ߬ߟߊ ߘߏ߫ ߟߎ߫߸ ߡߍ߲ ߠߎ߬ ߦߴߊ߬ ߖߌ߰ ߟߊ߫ ߞߏ߫ ߊ߬ߟߎ ߟߋ߬ ߖߡߊ߬ߣߊ ߛߊ߬ߙߌ߬ߦߊ ߓߍ߯ ߛߊ߲ߝߍ߬߸ ߞߏ߫ ߏ߬ ߟߎ߬ ߓߘߊ߫ ߥߊ߫ ߛߌߟߊ ߕߍ߰ ߡߐ߱ ߟߎ߬ ߦߋ߫ ߖߊ߲߬ߞߊ߰ߣߊ߬ ߛߌߟߓߊ ߞߊ߲߬، ߞߎߘߍ߫ ߘߊ߲ߘߐ߫ ߢߐ߲߰ ߠߊ߫ ߞߊ߲ߞߊ߲߫ ߘߊߝߍ߬. ߞߊ߬ ߛߌߟߊ ߕߍ߰ ߘߎ߰ߞߎߟߎ߲ ߠߎ߬ ߦߋ߫߸ ߡߍ߲ ߠߎ߬ ߦߋ߫ ߓߐ߫ ߟߊ߫ ߛߌ߯ߙߌ߲߫߸ ߊ߬ ߣߌ߫ ߞߐߣߊߞߙߌ߫، ߊ߬ߟߎ߫ ߓߊ߯ ߡߍ߲ ߠߊߟߐ߬߸ ߊ߬ߟߎ߬ ߘߴߏ߬ ߟߊ߫ ߢߌ߲ ߓߐ߫ ߊ߬ߟߎ߬ ߓߟߏ߫ ߘߌߦߊߜߏߦߊ ߟߊ߫، >> ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߋ߬ ߞߊ߲߫ ߕߋ߲߬، <<ߌߞߏߡߌ߲߬ ߊ߬ߟߎ߬ ߟߊ߫ ߓߊ߯ߙߊ ߏ߬ ߕߍ߫ ߓߍ߲߬ ߛߊ߬ߙߌ߬ߦߊ߫ ߡߊ߬߸ ߊ߬ ߝߟߐ ߡߍ߲ ߘߌ߫ ߡߎߣߎ߲߬߸ ߊ߬ߟߎ߬ ߓߘߊ߫ ߛߌߟߊ ߕߍ߰߸ ߞߊ߬ ߓߊ߲߫ ߞߊ߬ ߡߐ߱ ߟߎ߬ ߘߐߜߍ߬ߘߍ߲߫ ߊ߬ߟߎ߬ ߟߊ߫ ߖߌ߰ߣߌ߬ߦߟߍ ߘߐ߫߸ ߞߊ߬ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊ߫ ߕߊ߯ߣߌߛߊߦߌ߲ ߜߟߍ߬ߦߊ߬، ߏ߬ ߟߋ ߘߐ߫߸ ߊ߲ ߠߊߟߐ߲ߠߌ߲ ߡߍ߲ ߞߍ߫ ߘߊ߫߸ ߊ߲ߠߎ߬ ߡߍ߲ ߠߎ߬ ߦߋ߫ ߛߊ߬ߙߌ߬ߦߊ߫ ߟߊߕߊ߯ߡߊߓߊ߮ ߘߌ߫߸ ߊ߲ ߞߊ߬ ߕߐ߲߫ ߓߟߏߡߊ ߟߎ߬ ߖߡߊ߬ߙߌ߬، ߞߊ߲ߞߊ߲߫ ߞߟߍ߬ߡߐ߰ߘߊ ߛߌ߲߬ߕߘߍ߬ߟߌ߬ ߞߊߟߌ߲ ߓߙߌ߬ߝߐߝߐ ߞߊ߬ ߞߟߌߟߌ ߏ߬ ߟߋ ߖߋ߬ߓߌ߬߸ ߞߊ߬ ߣߊ߬ ߞߏ ߟߎ߬ ߞߍ߫߸ ߦߏ߫ ߊ߬ߟߎ߫ ߞߊ߬ ߖߊ߬ߡߊߙߌ ߛߐ߬ߘߐ߲߬ ߢߊ ߡߍ߲ ߡߊ߬ ߞߊ߬ ߝߘߊ߫ ߛߊ߬ߙߌ߬ߦߊ߬ ߟߊ߫.>>

ߓߊߏ߬߸ ߝߘߏ߬ߓߊ߬ ߞߕߌߞߊ߲ߘߊ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߊ߬ߟߋ ߝߣߊ߫ ߞߊ߬ ߞߟߍ߬ߡߐ߮ ߟߎ߬ ߟߊߟߐ߲ߠߌ߲߫ ߏ߬ ߢߊ ߟߋ߬ ߡߊ߬߸ ߞߵߊ߬ߟߎ߬ ߟߊߖߌ߰ ߖߊ߲߬ߞߊ߰ߣߊ߫ ߝߊ߲߭ ߝߍ߬ ߦߋ߲߬߸ ߞߊ߬ ߥߊ߫ ߛߌߟߊ ߟߊߞߊ߬߸ ߡߐ߱ ߟߎ߫ ߞߵߊ߬ߟߎ߬ ߟߊ߫ ߖߌ߰ߣߌ߬ߦߟߍ ߘߊߡߌ߬ߣߊ߬ ߦߏ߫ ߊ߬ ߞߊ߫ ߞߊ߲߫ ߢߊ ߡߍ߲ ߡߊ߬.

<<ߊ߲ ߞߊ߬ ߕߐ߲ ߓߟߏߡߊ ߟߎ߫ ߖߊ߬ߡߊߙߌ߫ ߟߋ߬߸ ߞߏ߫ ߊ߬ߟߎ߬ ߦߋ߫ ߣߊ߬ ߞߊ߬ ߣߊ߬ ߛߌߟߊ ߟߊߞߊ߬߸ ߖߐ߲߰ߛߊ߫ ߖߡߊ߬ߣߊ߬ߘߋ߲ ߠߎ߬ ߘߴߊ߬ߟߎ߬ ߟߊ߫ ߓߏ߬ߙߌ ߟߎ߬ ߞߍ߫ ߊ߬ ߢߌ߬ߡߊ ߟߊ߫، ߊ߲ ߞߊ߬ ߞߕߌߛߓߍߟߊ ߟߎ߬ ߝߣߊ߫ ߖߡߊ߬ߙߌ߬߸ ߊ߬ߟߎ߬ ߦߋ߫ ߣߊ߬ ߞߣߍ ߞߊ߲߬ ߞߊ߬ ߞߏ ߟߎ߬ ߟߊߞߙߐ߬ߛߌ߬߸ ߞߵߊ߬ ߟߐ߲߫ ߡߎ߲߬ ߞߋߟߋ߲߫ ߕߊ߬ߡߌ߲߬ߣߍ߲߫.>> ߞߕߌߞߊ߲ߘߊ ߞߵߏ߬ ߝߐ߫، ߊߟߎ߫ ߦߴߊ߬ ߟߐ߲߫߸ ߞߊ߬ ߞߐ߲߰ ߓߌ߬ ߢߍ߫߸ ߕߐ߰ߕߐ߰ߟߌ߬ߟߊ ߟߎ߬ ߣߌ߫ ߞߊ߲ߞߊ߲߫ ߡߊ߬ߡߙߊ߬ߟߌ ߝߊ߰ߡߊ ߟߎ߫ ߕߎ߲߬ ߓߘߊ߫ ߢߐ߲߯ߦߋ߫߸ ߣߊߟߌ߬ߡߎ߲߫ ߡߙߊ߬ߓߊ߮ ߘߌ߫߸ ߏ߬ ߡߍ߲ ߞߵߊ߬ߟߎ߬ ߘߐߛߎ߫ ߘߊߘߐߖߊߥߏ ߡߊ߬߸ ߞߵߊ߬ߟߎ߬ ߘߐߛߎ߫ ߛߊ߬ߙߌ߬ߦߊ߬ ߡߊ߬ߓߏ߲ߧߊ ߡߊ߬߸ ߞߊ߬ ߝߘߊ߫ ߖߘߍ߬ߡߊ߬ ߞߕߌ߬ߕߍ߮ ߟߎ߬ ߟߊ߫. <<ߛߐ߱ ߢߌ߲߬ ߠߋ߬ ߡߊ߬ ߏ߬ ߘߐ߫ ߛߊ߫߸ ߞߎߡߊ ߏ߬ ߓߍ߯ ߣߴߊ߬ ߕߊ߫߸ ߊ߬ߟߎ߫ ߞߊ߬ ߖߡߊ߬ߣߊ ߛߊ߬ߙߌ߬ߦߊ ߛߐ߬ߛߐ߬߸ ߞߊ߬ ߣߊ߬ ߡߐ߱ ߟߎ߫ ߞߊ߬ߢߴߊ߬ߟߎ߬ ߟߊ߫ ߖߌ߰ߣߌ߬ߦߟߍ ߟߊ߫߸ ߞߊ߬ ߡߐ߱ ߟߎ߬ ߗߋߛߊ߬، ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߞߟߍ߬ߡߐ߰ߘߊ ߣߊ߬ߣߍ߲ ߞߏ ߟߎ߬ ߘߐߛߎߡߊ߫ ߞߊ߲ߡߊ߬߸ ߞߊ߲ߓߍ߲ ߞߕߌߞߊ߲ߘߊ ߞߵߏ߬ ߟߎ߬ ߡߍ߲ ߠߎ߬ ߖߡߊ߬ߙߌ߬߸ ߣߊߟߌ߬ߡߎ߲߬ ߒߠߋ ߖߘߍ߬ߓߊ߬ߞߎ߲ ߘߌ߫߸ ߛߊ߫ ߝߊ߲߬ߞߊ ߘߌ߫ ߘߌ߫ ߛߊ߬ߙߌ߬ߦߊ ߡߊ߬ ߢߊ ߡߍ߲ ߡߊ߬߸ ߊ߬ߟߎ߫ ߞߵߏ߬ ߟߎ߬ ߝߣߊ߫ ߟߊߓߍ߲߬ ߕߊߛߙߊߟߌ ߟߊ߫.>> ߓߊ߬ߙߌ߬߸ ߊ߬ߟߎ߬ ߟߊ߫ ߜߟߍ߬ߦߊ ߏ߬ ߣߴߊ߬ ߕߊ߫߸ ߕߐ߲ߓߟߏߡߊ ߟߎ߬ ߛߋ߫ ߘߴߊ߬ߟߎ߬ ߡߊߣߐ߬ ߟߊ߫߸ ߞߊ߬ ߞߏ ߟߎ߬ ߛߌ߰ ߞߟߊ߬ ߞߋߟߋ߲߫ ߞߊ߲߬. <<ߛߋ ߕߏ߫ ߘߊ߫ ߛߊ߬ߙߌ߬ߦߊ ߟߋ߬ ߓߟߏ߫.>> ߊ߬ ߞߊ߬ ߞߟߍ߬ߡߐ߮ ߟߎ߫ ߝߏ߬ ߊ߬ߟߎ߬ ߟߊ߫ <<ߞߎ߬ߛߊ߲߬ߧߊ>> ߟߊ߫߸ ߊ߬ߟߎ߬ ߞߍ ߘߐ߫ ߞߊ߬ ߞߏ ߟߎ߬ ߘߐߛߎߡߊ߫߸ ߞߵߊ߬ ߛߐ߬ߘߐ߲߬ ߡߐ߰ ߡߊ߫ ߡߊߘߌߡߌ߲߫߸ ߡߐ߰ ߓߟߏ߫ ߡߊ߫ ߞߊߘߌ߫߸ ߞߎߡߊߕߍ߫ ߞߊ߬ ߡߐ߰ ߓߐ߬ߣߐ߫ ߊ߬ ߣߌ ߘߐ߫.

ߕߐ߰ߕߐ߰ߟߌ߬ߟߊ ߟߎ߬ ߕߊ߯ ߘߊ߫ ߘߎ߰ߞߎߟߎ߲ ߡߍ߲ ߠߎ߬ ߞߣߐ߫ ߦߋ߲߬߸ ߏ߬ ߛߋߦߌ߲߫ ߢߐ߲߰ ߓߘߊ߫ ߛߋ߫ ߛߊ߬ߙߌ߬ߦߊ߬ ߓߟߏߞߘߐ߫߸ ߕߌߢߍߟߌ ߞߍߓߊ߮ ߟߎ߬ ߛߌߦߊߡߊ߲߫ ߝߣߊ߫ ߦߋ߫ ߓߟߏߘߐ߫، ߞߕߌߞߊ߲ߘߊ ߞߊ߬ ߞߎߡߊ ߏ߬ ߟߊߛߙߋߦߊ߫߸ ߞߵߊ߬ ߦߌ߬ߘߊ߬ ߞߏ߫: <<ߌߞߏߡߌ߲߬ ߊ߲ ߠߊ߫ ߞߟߍ߬ߡߐ߮ ߟߎ߬ ߟߊߞߐ߯ߣߍ߲߫ ߠߋ߬ ߜߊߟߌߜߊߟߌ߫߸ ߛߋ ߕߏ߫ ߘߊ߫ ߛߊ߬ߙߌ߬ߦߊ ߟߋ߬ ߓߟߏ߫߸ ߡߊ߬ߝߊ ߓߘߊ߫ ߘߏ߲߬߸ ߞߏ ߟߎ߬ ߓߘߊ߫ ߢߡߊߟߐ߬، ߕߍ߰ ߓߘߊ߫ ߞߍ߫ ߘߎ߰ߞߎߟߎ߲ ߠߎ߬ ߘߐ߫߸ ߊ߬ߟߎ߬ ߓߘߊ߫ ߛߋ߫ ߛߊ߬ߙߌ߬ߦߊ߬ ߕߊ߫ ߓߟߏ߫ ߡߊ߬߸ ߊ߬ ߞߍߓߊ߮ ߟߎ߬ ߓߘߊ߫ ߡߌ߬ߣߊ߬߸ ߒ ߘߏ߲߬ ߘߌ߫ ߟߊ߬ߤߘߌ ߕߊ߬ ߞߏ߫ ߛߊ߬ߙߌ߬ߦߊ ߘߌ߫ ߟߊߕߊ߯ߡߊ߫ ߊ߬ ߢߊ ߡߊ߬ ߣߌ߲߬ ߞߏ ߘߐ߫، ߓߊߏ߬߸ ߊ߲ ߕߍ߫ ߛߴߊ߬ ߕߏ߫ ߟߊ߫ ߕߋ߲߬߸ ߖߡߊ߬ߣߊ߬ߘߋ߲ ߦߋ߫ ߥߌ߬ߟߌ߫ ߛߐ߰ߡߘߊ߬ ߞߋߟߋ߲߫ ߠߊ߫ ߕߋ߲߬ ߌߞߘߐ߫߸ ߞߊ߬ ߛߌߟߊ ߕߍ߰ ߡߐ߱ ߟߎ߬ ߦߋ߫߸ ߞߵߊ߬ ߞߍ߫ ߦߏ߫ ߊ߲ ߧߋ߫ ߜߊ߲ߕߣߊߡߏ߫ ߟߋ߬، ߊ߬ ߘߏ߲߬ ߝߐߣߍ߲߫ ߠߋ߬ ߞߏ߫ ߣߴߌ ߞߵߌ ߕߐ߮ ߛߓߍ߫ ߔߊ߯ߙߊߞߐߡߊ߲ߘߏߦߊ ߘߐ߫߸ ߌ ߦߴߌ ߜߊ߲߫ ߠߊ߫ ߟߋ߬، ߌߞߏߡߌ߲߬ ߊ߬ߟߎ߬ ߓߘߴߊ߬ ߦߌ߬ߘߊ߬ ߞߏ߫ ߛߊ߬ߙߌ߬ߦߊ߬ ߕߍ߫ ߖߡߊ߬ߣߊ ߞߣߐ߫߸ ߓߟߏ ߓߘߊ߫ ߟߊ߫ ߡߐ߰ ߘߊ߲ߘߐ߫ ߘߐ߫ ߊ߬ߟߎ߬ ߘߐ߫߸ ߏ߬ ߟߎ߬ ߦߋ߫ ߞߟߍ߬ߡߐ߰ߟߊ߫ ߕߋ߲߬߸ ߏ߬ ߟߎ߬ ߘߌ߫ ߞߕߌ߫߸ ߌߞߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.>> ߞߕߌߞߊ߲ߘߊ ߟߋ߬ ߞߊ߲߫ ߕߋ߲߬.

ߞߣߍ ߞߊ߲߬߸ ߊ߲ ߞߊ߬ ߛߌߟߊ߫ ߕߍ߮ ߣߌ߲߬ ߞߐߝߟߌ ߘߏ߫ ߟߎ߫ ߟߊߞߙߐ߬ߛߌ߬߸ ߡߍ߲ ߡߊ߲߬ߕߙߐ ߛߋ߫ ߘߊ߫ ߛߌߟߊ߫ ߞߊ߲߫ ߓߏߙߌߟߊ ߟߎ߫ ߡߊ߬، ߕߎ߬ߡߊ߬ߙߋ߲߬ ߛߌߦߊߡߊ߲߫ ߠߋ߬ ߞߍ߫ ߘߊ߫߸ ߘߎ߰ߞߎߟߎ߲ ߘߏ߫ ߟߎ߫ ߟߐ߬ߣߍ߲߫ ߊ߬ߟߎ߬ ߡߊ߫ ߛߋ߫ ߥߊ߫ ߟߊ߫، ߏ߬ ߞߍ߫ ߘߊ߫ ߡߊ߲߬ߕߙߐ ߘߌ߫ ߕߊ߯ߡߊߘߋ߲ ߘߏ߫ ߟߎ߫ ߡߊ߬، ߡߊߡߊߘߎ߫ ߛߊߦߌߘߎ߬ ߖߊߟߏ߫ ߦߴߏ߬ ߘߏ߫ ߟߋ߬ ߘߌ߫߸ ߏ߬ ߡߍ߲ ߓߕߐ߫ ߕߍ߬ߘߍ߫ ߓߡߊ߬ߞߐ߬، ߊ߬ߟߋ ߞߵߊ߬ ߦߌ߬ߘߊ߬ ߞߏ߫: <<ߊ߲ ߛߋ߫ ߘߊ߫ ߖߊ߲߬ߞߊ߰ߣߊ߫ ߦߊ߲߬ ߛߐ߰ߡߊ߬ߟߊ ߄ߕߎߡߊ ߟߋ߬ ߟߊ߫، ߞߵߊ߬ ߛߐ߬ߘߐ߲߬ ߛߌߟߊ ߝߊ߲߭ ߓߍ߯ ߕߍ߰ߣߍ߲߫߸ ߕߐ߰ߕߐ߰ߟߌ߬ߟߊ ߟߎ߬ ߦߋ߫ ߘߎ߰ߞߎߟߎ߲ ߠߎ߬ ߢߌ߲ ߡߌ߬ߣߊ ߞߊ߲߬ ߕߎ߲߫، ߘߎ߰ߞߎߟߎ߲ ߡߍ߲ ߟߐ߬ߣߍ߲߫ ߕߘߍ߬߸ ߊ߬ ߘߌ߫ ߗߡߍ߬ ߓߐ߫.>> ߞߎߡߊ߫ ߢߊߦߌߘߊ߫ ߢߐ߲߰ ߠߊ ߟߎ߬ ߓߍ߯ ߣߴߊ߬ ߕߊ߫߸ ߕߊ߯ߡߊߘߋ߲ ߠߎ߬ ߞߊ߲߫ ߞߏ߫ ߊ߬ߟߎ߬ ߡߊ߫ ߓߐߘߊ߫ ߛߐ߬ߘߐ߲߬ ߝߋߎ߫: <<ߊ߲ ߞߵߊ߬ߟߎ߬ ߡߊߘߌߦߊ߫߸ ߞߏ߫ ߊ߬ߟߎ߬ ߦߴߊ߲ ߓߌ߬ߟߊ߬ ߛߴߊ߲ ߘߌ߫ ߕߊ߬ߡߌ߲߬߸ ߓߊ߬ߙߵߊ߬ߟߎ߬ ߡߊ߫ ߛߐ߲߬، ߊ߲ ߓߊߟߊ߲ߣߍ߲ ߕߏ߫ ߘߊ߫ ߢߊ ߏ߬ ߟߋ ߡߊ߬ ߤߊ߲߯ ߞߵߊ߬ ߛߌ߰ ߈ߕߎߡߊ ߣߌ߫ ߉ߕߎߡߊ ߟߊ߫߸ ߜߟߍ߬ߦߊ ߘߝߊߣߍ߲ ߘߐ߫.>>

ߊ߬ ߘߏ߲߬߸ ߞߕߌߞߊ߲ߘߊ ߞߊ߲߫ ߞߏ߫ ߊ߬ߟߋ߬ ߡߊ߫ ߝߌ߬ߟߊ߬ ߟߐ߲߫ ߣߌ߲߬ ߞߏ ߘߐ߫߸ <<ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬߸ ߊ߬ ߟߊߕߊ߯ߡߊߕߐ߫ ߕߋ߲߬ ߠߋ߬.>> ߊ߬ ߞߵߏ߬ ߕߡߊ߬ߖߌ ߓߐ߫ ߓߍ߯ ߘߐ߫.

ߕߐ߲ߓߟߏߡߊ ߟߎ߬ ߟߊ߫ ߣߊ߬ߟߌ ߞߐ ߣߌ߲߬ ߞߏ߬ߣߌ߲ ߘߐ߫߸ ߡߊ߬ߝߊ ߓߘߊ߫ ߘߏ߲߬ ߖߊ߲߬ߞߊ߰ߣߊ߫߸ ߡߐ߱ ߟߎ߬ ߓߘߴߊ߬ߟߎ߬ ߟߊ߫ ߓߏ߬ߙߌ ߘߊߡߌ߬ߣߴߊ߬ ߢߌ߬ߡߊ ߟߊ߫، ߊ߬ ߞߏ߬ߣߌ߲߸ ߟߊ߬ߓߏ߬ߙߟߌ߬ߟߊ ߟߎ߬ ߣߌ߫ ߕߐ߬ߕߐ߰ߟߌ߬ߟߊ ߟߎ߬ ߝߋ߲߫ ߡߊ߫ ߝߋ߲߫ ߝߐ߫ ߡߎߣߎ߲߬߸ ߊ߲ ߧߋ߫ ߟߌ߬ߤߟߊ ߣߌ߲߬ ߛߓߍ߫ ߟߊ߫ ߕߎ߬ߡߊ ߡߍ߲ ߠߊ߫ ߕߋ߲߬ ߞߊ߬ߣߌ߲߬، ߢߐ߲߯ߦߋ ߞߏ߬ߣߌ߲ ߦߴߌߘߐ߫ ߞߊ߲ߞߊ߲߫ ߡߙߊ߬ߦߊ߬ ߞߊ߲ߞߋ ߣߌ߫ ߕߐ߰ߕߐ߰ߟߌ߬ ߟߎ߬ ߕߍ߫ ߕߋ߲߬، ߐ߲߸ ߣߌ߫ ߡߍ߲ ߓߐ߫ ߘߴߏ߬ ߘߐ߫߸ ߣߴߊ߬ ߢߊ߬ߕߣߐ߬ ߦߋ߫ ߘߊ߫ ߥߟߴߊ߬ ߡߊ߫ ߦߋ߫߸ ߊ߲ ߘߴߊߟߎ߫ ߟߊߟߐ߲ߠߌ߲߫ ߏ߬ ߟߊ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.