ߕߟߋ߬ ߄߀ ߛߎ߲ߘߏ߲ ߞߐߝߍ߬߸ ߖߌ߬ߣߍ߬ ߌߛߊ߫ ߣߊߡߎ߲ ߘߏ߲߬ߞߏ ߟߎ߬ ߣߌ߫ ߘߎߢߊ߫ ߦߙߐ߫ ߜߘߍ ߕߐ߭ ߟߎ߬ ߓߍ߯ ߟߊ߫ ߛߊߟߌ ߟߋ߬ ߕߎ߲߬ ߦߋ߫ ߞߎߣߎ߲߬ ߞߊ߯ߙߌ ߘߌ߫߸ ߂߀߂߆ ߞߏ߲ߞߏߘߓߌ ߕߟߋ߬ ߅߸ ߏ߬ ߡߍ߲ ߦߋ߫ ߕߊ߬ߡߌ߲߬ߞߎ߲߬ߠߊ߬ ߛߊߟߌ ߘߌ߫، ߒ߬ߓߊ߬߸ ߞߊ߲ߞߊ߲߫ ߓߊ߬ߕߏ߬ߘߊ ߡߍ߲ ߕߐ߯ ߞߏ߫ ߖߐ ߣߌ߫ ߛߎߘߊ߲ ߞߊߓߊ߲߫ ߜߊ߬ߕߌ߮ « ߣߏߕߙ ߘߊߡ ߘߍ߬ ߝ߭ߌߞߑߕߎߥߊߙ ߋ ߘߋ߬ ߟߊ߬ ߔߍ »߸ ߛߊߟߌ ߣߌ߲߬ ߢߊ߰ߢߊ߮ ߞߍ߫ ߘߊ߫ ߦߋ߲߬߸ ߡߍ߲ ߞߎ߲߬ߠߊߛߌ߰ ߘߊ߫ ߡߐ߲߬ߛߍ߲ߢߍ߳ߙ ߊߟߍߞߑߛߌ߫ ߊ߬ߟߌ ߕߊ߬ߜߌ߬ߣߏ߬ ߓߟߏ߫.

ߛߐ߰ߡߊ߬ߘߊ ߟߋ߬ ߟߊ߫߸ ߌߛߊߟߞߊ ߥߊ߮ ߞߵߊ߬ߟߎ߬ ߟߊߘߍ߬ ߞߊ߲ߞߊ߲߫ ߢߐ߲߬ߞߌ߲߬ߘߊ ߟߊ߫߸ ߖߐ ߣߌ߫ ߛߎߘߊ߲ ߞߊߓߊ߲߫ ߜߊ߬ߕߌ߮ « ߣߏߕߙ ߘߊߡ ߘߍ߬ ߝ߭ߌߞߑߕߎߥߊߙ ߋ ߘߋ߬ ߟߊ߬ ߔߍ »߸ ߞߏ߬ߙߌ߬ߦߊ߬ߟߋ߲߫ ߞߌ߬ߘߊ ߟߊ߫߸ ߞߊ߬ ߛߐ߬ߘߐ߲߬ ߛߊߟߌߓߊ ߣߌ߲߬ ߘߐ߫߸ ߊߟߊ߫ ߡߊߕߐ߯ ߘߐ߲ߞߟߌ ߟߎ߬ ߣߴߊ߬ ߟߊ߲߬ߘߊ߬ ߟߊ߬ߕߋߟߋ߲ ߠߎ߬ ߘߐ߫.

ߡߐ߲߬ߛߍ߲ߢߍ߳ߙ ߊߟߍߞߑߛߌ߫ ߊ߬ߟߌ ߕߊ߬ߜߌ߬ߣߏ߬ ߟߊ߫ ߞߊ߬ߥߊ߲߬ߘߌ߬ߟߌ ߘߐ߫߸ ߊ߬ ߞߊ߬ ߞߎߡߊ߫ ߛߌߦߊߡߊ߲߫ ߝߐ߫߸ ߡߍ߲ ߘߏ߫ ߟߎ߫ ߓߏ߬ߙߌ߬ ߘߊ߫ ߖߌ߰ߡߊ߬ߝߊ ߞߊ߲߬߸ ߖߐ ߣߌ߫ ߖߛߎ߬ߛߎߡߊ ߞߊ߲߬߸ ߊ߬ ߣߌ߫ ߜߟߍ߬ߦߊ߬ ߟߎ߫ ߞߊ߲߬߸ ߖߡߊ߬ߣߊ ߦߋ߫ ߡߍ߲ ߕߍߡߊ߬ ߕߋ߲߬:

<<ߊ߲ ߠߊ߫ ߖߡߊ߬ߣߊ ߦߋ߫ ߝߙߋߞߋ ߟߎ߫ ߟߋ߬ ߕߍߡߊ߬ ߕߋ߲߬߸ ߥߊߘߌ߫ ߡߎ߯ ߞߏߖߊ ߦߴߏ߬ ߘߏ߫ ߟߋ߬ ߘߌ߫߸ ߓߘߍ߬ߓߘߍ߬ߟߌ߬ ߞߙߎߞߊ ߟߎ߬ ߟߊߓߋ߭ ߦߴߏ߬ ߘߏ߫ ߟߋ߬ ߘߌ߫߸ ߓߐߕߏ߲߫ ߠߊ߫ ߥߦߐ ߘߏ߫ ߟߋ߬ ߘߌ߫ ߖߌ߬ߣߍ߬ ߣߌ߫ ߛߙߊ߬ߟߏ߲߬ ߕߍ߫، ߏ߬ ߟߋ ߘߐ߫߸ ߢߐ߲߬ߞߌ߲߬ߘߊ ߦߴߊ߬ ߞߊ߲ߠߊߓߐ߫ ߟߴߊ߲ ߡߊ߬߸ ߊ߲ ߞߊߣߵߊ߲ ߖߍ߬ߘߍ߫ ߖߛߎ߬ߘߐߝߊ߰، ߊ߬ ߦߴߊ߲ ߞߟߌ߫ ߟߊ߫ ߓߍ߲߭ ߣߌ߫ ߖߛߎ߬ߛߎߡߊ ߞߎߡߊ ߟߋ߬ ߝߐߟߌ ߡߊ߬߸ ߡߍ߲ ߘߌ߫ ߖߌ߱ ߟߎ߬ ߡߝߊ߫ ߝߊ߲߭ ߓߍ߯ ߘߐ߫، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߢߊ߲ߜߏߦߊ ߣߌ߫ ߥߊ߬ߥߎߟߋ ߟߊߘߌߦߊߢߍ ߓߘߊ߫ ߝߊ߲߬ߞߊ߫ ߛߐ߬ߘߐ߲߬߸ ߊߟߊ߫ ߘߌ߫ ߛߋ߫ ߛߌߟߊ ߟߊߞߊ߬ ߟߴߊ߲ ߧߋ߫، ߌߛߊ߫ ߟߊ߫ ߕߊ߬ߡߌ߲߬ߞߎ߲߬ߠߊ߬ ߛߊߟߌ ߣߌ߲߬ ߦߋ߫ ߡߐ߰ߦߊ ߘߐ߬ߝߐ ߦߟߍ߬ߡߊ߲߬ ߞߏ߬ߓߊ߫ ߟߋ߬ ߘߌ߫، ߊ߬ ߦߋ߫ ߊߟߊ߫ ߟߊ߫ ߖߋ߬ߓߌ߬ߟߌ ߟߋ߬ ߘߌ߫ ߡߐ߱ ߟߎ߬ ߟߊ߫ ߥߊ߬ߥߎߟߋ ߡߊ߬، ߌߛߊ߫ ߡߊߡߎ߲߬ߣߍ߲ ߞߵߊ߲ ߞߟߌ߫ ߟߋ߬߸ ߞߏ߫ ߊ߲ ߧߋ߫ ߊ߲ ߞߊߓߙߎ ߟߎ߬ ߞߣߐ߫߸ ߞߊ߬ ߞߊ߬ߣߌ߲߬ߒ߬ߕߋ߲߬ߦߊ ߕߊ߬ ߕߊߖߟߎߛߙߊ ߣߐ߭ ߘߐ߫߸ ߛߴߊ߲ ߘߌ߫ ߛߋ߫ ߘߎߢߊ߫ ߣߌ߲߬ ߟߐ߬ ߟߊ߫ ߕߋߟߋ߲ ߞߊ߲߬߸ ߓߊߘߋ߲ߧߊ ߞߊ߲߬.>>

ߘߍ߲߬ߞߣߍ߬ߦߊ߬ߓߊ߮ ߡߍ߲ ߠߎ߬ ߕߘߍ߬ ߞߣߍ ߞߊ߲߬ ߦߋ߲߬߸ ߛߌ߬ߡߐߣ ߞߎ߲߬ߓߊ߫ ߞߡߊ߬ߙߊ߬ ߦߴߏ߬ ߘߏ߫ ߟߋ߬ ߘߌ߫߸ ߊ߬ߟߋ ߦߋ߫ ߌߛߊߟߞߊ߫ ߕߎ߰ߡߏߙߌ ߟߋ߬ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߎ߲ߞߊߙߏ ߞߐ ߢߌ߲߬ ߘߐ߫: <<ߊ߲ ߛߍߥߊߣߍ߲߫ ߠߋ߬ ߕߟߋ߬ ߄߀ ߖߘߍ߬ߘߐ߬ߡߌߣߊ ߣߌ߲߬ ߘߐ߫، ߓߌ߬ ߢߐ߲߰ ߟߏ߲߫߸ ߊ߲ ߧߋ߫ ߌߛߊ߫ ߟߊ߫ ߕߊ߬ߡߌ߲߬ߞߎ߲߬ߠߊ߬ ߛߊߟߌ ߢߊ߰ߢߊ߮ ߟߋ߬ ߞߊ߲߬، ߊ߬ߟߋ ߡߍ߲ ߛߋ߫ ߘߊ߫ ߛߊ߬ߦߊ ߟߊ߫߸ ߊ߬ ߞߎ߲߬ߠߊ߬ߘߌ߬ߦߊ߬ߣߌ߲ ߓߐ߫ ߘߴߊ߬ ߞߊߓߙߎ ߞߣߐ߫.>>

ߊ߬ ߞߵߊ߬ ߘߍ߲߬ߞߣߍ߬ߦߊ߬ߓߊ߰ ߢߐ߲߮ ߕߐ߭ ߟߎ߬ ߞߟߌ߫߸ ߞߏ߫ ߊ߬ߟߎ߬ ߦߋ߫ ߛߎ߲ߞߊߙߏ ߓߘߍ߬ߦߊ ߣߴߊ߬ ߢߌ߬ߡߦߊ߬ ߛߌߟߊ ߕߊ߯ߡߊ ߘߊߓߊ߲߫ ߛߎ߲ߞߊߙߏ ߓߊ߲ߣߍ߲ ߞߐ ߣߌ߲߬ ߘߐ߫، <<ߊ߲ ߞߊ߬ ߛߊߟߌ ߣߌ߫ ߘߎ߬ߥߊ߬ߥߎ ߡߍ߲ ߠߎ߬ ߞߍ߫ ߛߎ߲ߞߊߙߏ ߞߣߐ߫߸ ߏ߬ ߡߊ߲߫ ߞߊ߲߫ ߞߊ߬ ߟߊߟߐ߬ ߡߎ߬ߕߎ߲߬، ߊ߲ ߞߊ߫ ߞߊ߲߫ ߞߊ߬ ߡߎ߲߬ ߞߍ߫ ߊ߲ ߥߊ߫ ߢߊ ߘߌ߫: ߏ߬ ߟߋ ߦߊ߬ߝߊ߸ ߟߊ߬ߘߌߦߊߢߍ߸ ߖߘߍ߬ߘߐ߬ߡߌߣߊ߸ ߝߊ߲߬ߞߊ߬ߘߡߊ߬ߓߐ߸ ߊ߬ ߕߌ߯ߕߌ߯ ߞߊ߬ ߛߊߟߌ ߘߐߖߊ߬ ߜߘߋߜߘߋ߫.>>

ߋߡߊߣߎ߳ߍߟ ߕߊ߲߬ߓߊ߫ ߕߐ߬ߟߑߣߏ߬ ߡߍ߲ ߦߋ߫ ߟߞߊ߬ߙߊ߲߬ߠߌ߲߬ߠߊ߫ ߕߌߙߌ߲ߠߌ߲ߠߊ߫ ߘߌ߫ ߞߊ߲ߞߊ߲߫ ߖߊ߯ߓߘߊ ߟߊ߫߸ ߏ߬ ߝߣߊ߫ ߞߵߏ߬ ߢߐ߲߰ ߠߋ߬ ߝߐ߫:

<<ߛߍߥߊ߸ ߊ߬ ߣߌ߫ ߞߎ߲߬ߠߊ߬ߦߋߙߋ߲߸ ߏ߬ ߟߋ ߒߠߋ ߟߊ߫ ߓߌ߬، ߕߟߋ߬ ߄߀ ߛߎ߲ߘߏ߲ ߞߐߝߍ߬߸ ߞߍߢߐ߲߯ߝߍ ߣߌ߫ ߖߘߍ߬ߡߊ߬ߓߐ ߘߐ߫߸ ߌߛߊ߫ ߓߘߊ߫ ߟߊߞߎߣߎ߲߫، ߘߎߢߊ߫ ߌߛߊߟߞߊ ߓߍ߯ ߢߊ߯ߟߋ߲ߣߍ߲߫ ߠߋ߬ ߓߌ߬.>>

ߊ߬ ߞߊ߬ ߞߟߌߟߌ ߞߍ߫ ߖߐ ߣߌ߫ ߖߛߎ߬ߛߎߡߊ ߡߊ߬: <<ߒ ߠߊ߫ ߖߐ ߞߟߌߟߌ ߟߋ߬ ߛߋ߫ ߟߊ߫ ߘߍ߲߬ߞߣߍ߬ߦߊ߬ߓߊ߮ ߓߍ߯ ߡߊ߬ ߘߎߢߊ߫ ߘߐ߫߸ ߓߍ߯ ߦߋ߫ ߖߛߎ߬ߛߎߡߊ ߞߎߡߊ ߝߐ߫߸ ߞߊ߬ ߢߐ߲߯ ߞߊߣߌ߲ ߞߎߡߊ ߝߐ߫، ߞߊ߬ߕߎ߲߯߸ ߓߍ߲߬ ߕߍ߫ ߡߐ߱ ߡߍ߲ ߠߎ߬ ߣߌ߫ ߢߐ߲߯ ߕߍ߫߸ ߊ߬ ߣߌ߫ ߞߊ߬ߣߌ߲߬ߢߐ߲߰ߦߊ߸ ߏ߬ ߟߎ߬ ߦߋ߫ ߜߟߍ߬ߦߊ ߟߋ߬ ߕߍߡߊ߬ ߞߘߊߎ߫، ߊ߲ ߢߊ߫ ߦߋ߫ ߝߐߢߐ߲߯ߞߐ ߟߊ߫ ߖߡߊ߬ߣߊ ߘߏ߫ ߟߎ߫ ߞߣߐ߫ ߕߋ߲߬߸ ߦߏ߫ ߌߙߊ߲߫߸ ߌߛߌ߬ߙߊ߬ߌߟߊ߫، ߊ߲ ߧߴߊߟߊ߫ ߕߙߊ߫ ߟߊ߫߸ ߖߛߎ߬ߛߎߡߊ ߦߋ߫ ߘߏ߲߬ ߘߎߢߊ߫ ߘߐ߫߸ ߌߛߊ߫ ߟߊߞߎߣߎ߲ ߞߐ ߣߌ߲߬ ߘߐ߫.>>

ߟߊ߬ߓߊ߲ ߘߐ߫ ߛߊ߫߸ ߛߋߖ߭ߊߙ ߞߏߟߋߦߊߡߌ߫ ߡߍ߲ ߦߋ߫ ߢߐ߲߬ߞߌ߲߬ߘߊ ߜߍ߲߬ߜߍ߲߬ߘߋ߲ ߘߏ߫ ߘߌ߫߸ ߏ߬ ߞߊ߬ ߘߏ߫ ߝߐ߫ : <<ߛߍߥߊ ߣߌ߫ ߢߊ߯ߟߋ߲ ߠߋ߬ ߒ߬ ߓߍ߯ ߟߊ߫ ߓߌ߬، ߕߟߋ߬ ߄߀ ߛߎ߲ߘߏ߲ ߞߐߝߍ߬߸ ߖߘߍ߬ߘߐ߬ߡߌߘߊ ߘߐ߫߸ ߊ߬ ߣߌ߫ ߕߎ߬ߓߌ ߘߐ߫߸ ߊ߲ ߧߧߋ߫ ߌߛߊ߫ ߟߊߞߎߣߎ߲ ߛߊߟߌ ߞߊ߲߬߸ ߘߎߢߊ߫ ߌߛߊߟߞߊ ߓߍ߯ ߟߊ߫ ߝߌ߬ߘߊ.>>

ߊ߬ ߞߊ߬ ߘߏ߫ ߝߐ߫ ߛߎ߲ߞߊߙߏ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߛߎ߲ ߛߌ߰ߣߍ߲߫ ߓߊ߬ߙߏ߲߬ߡߊ߫ ߛߊ߬ߓߊ߫ ߟߋ߬ ߞߊ߲߬: <<ߡߐ߰ ߞߋߟߋ߲ ߠߊ߫ ߛߎ߲ߞߊߙߏ ߦߋ߫ ߕߙߎߕߙߎ߫ ߟߊ߫ ߓߊ߬ߙߏ߲߬ߡߊ߫ ߛߊ߬ߓߊ߫ ߟߋ߬ ߞߊ߲߬: ߛߊߟߌ߸ ߝߊ߲߬ߞߊߘߊ߬ߡߊ߸ ߊ߬ ߣߌ߫ ߢߊ߬ߟߌ، ߊ߲ ߓߘߊ߫ ߛߊߟߌ߫ ߊ߬ ߢߊ ߡߊ߬߸ ߞߊ߬ ߕߎ߬ߓߌ ߢߊߢߌߣߌ߲߫߸ ߞߊ߬ ߦߊ߬ߝߊ߫ ߞߏ߫ ߞߍߢߊ߫ ߖߎ߮ ߟߎ߬ ߘߐ߫߸ ߊ߬ ߣߌ߫ ߞߊ߬ ߕߏ߫ ߢߐ߲߬ߞߌ߲߬ߘߊ ߟߊ߫ ߛߌߟߊ ߞߊ߲߬.>>

ߕߊ߬ߡߌ߲߬ߞߎ߲߬ߠߊ߬ ߛߊߟߌ ߣߌ߲߬ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫ ߞߊ߲ߞߊ߲߫ ߞߣߐ߫߸ ߊ߬ ߞߍ߫ ߘߊ߫ ߛߍߥߊ ߣߌ߫ ߢߊ߯ߟߋ߲ ߠߋ߬ ߘߐ߫ ߘߌ߯ߣߊ ߘߏ߲߬ߞߏ ߟߎ߬ ߓߟߏ߫، ߞߊ߬ ߞߟߌߟߌ ߞߍ߫ ߓߍ߲߭ ߣߌ߫ ߞߋ߬ߟߋ߲߬ߧߊ ߡߊ߬߸ ߘߍ߲߬ߞߣߍ߬ߦߊ ߡߊ߬، ߞߊ߬ߕߎ߲߯߸ ߖߡߊ߬ߣߊ ߦߋ߫ ߞߏ߫ ߛߌߦߊߡߊ߲ ߡߍ߲ ߠߎ߬ ߕߍߡߊ߬ ߕߋ߲߬߸ ߞߎߡߊ߫ ߝߐ߫ ߘߊ߫߸ ߡߍ߲ ߘߌ߫ ߘߏ߲߬ ߓߍ߯ ߕߟߏ ߡߊ߬: ߞߊ߬ ߖߛߎ߬ߛߎߡߊ ߓߌ߬ߟߊ߬ ߢߍߝߍ߬߸ ߞߊ߬ ߢߐ߲߯ ߞߊߣߌ߲ ߣߌ߫ ߢߐ߲߯ ߖߌ߯ߡߝߊ ߓߌ߬ߟߊ߬ ߢߍߝߍ߬߸ ߞߵߏ߬ ߞߍ߫ ߌߛߊ߫ ߟߊߞߎߣߎ߲ ߛߌ߲ߞߐ߲ ߘߌ߫߸ ߞߊ߬ ߛߋ߫ ߘߍ߭ ߘߐߞߙߊ߫ ߟߊ߫ ߕߋߟߋ߲ ߣߌ߫ ߢߐ߲߯ߘߍߡߍ߲ ߠߊ߫.

ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.