ߦߏ߫ ߊ߲ ߠߊ߫ ߝߐ߰ߓߍ߫ ߕߊ߬ߡߌ߲߬ߣߍ߲ ߠߎ߫ ߞߵߊ߬ ߦߌ߬ߘߊ߬ ߢߊ ߡߍ߲ ߡߊ߬߸ ߤߊߓߌ߫ ߛߋߞߎ߫ ߛߊ߬ߞߐ߫ ߞߊ߬ ߖߌ߬ߦߊ߬ߖߟߎ ߘߏ߫ ߟߋ߬ ߞߍ߫ ߝߊ߬ߙߊ߲߬ߛߌ߬ ߞߊ߲ ߘߐ߫ ߞߵߊ߬ ߟߊߖߍ߲ߛߍ߫ ߕߌߞߑߕߐߞ ߞߊ߲߬، ߖߌ߬ߦߊ߬ߖߟߎ ߏ߬ ߘߐ߫߸ ߊ߬ ߞߎߡߊ߫ ߘߊ߫ ߛߏ߬ߛߏ߬ ߞߊ߲ ߠߋ߬ ߞߊ߲߬߸ ߞߏ߫ ߛߏ߬ߛߏ߬ ߞߊ߲ ߠߋ߬ ߞߊ߲߫ ߘߌ߫߸ ߡߍ߲ ߓߊ߯ ߝߐ߫ ߦߙߐ ߡߍ߲ ߌߞߘߐ߫߸ ߌ ߘߌ߫ ߖߌ߬ߣߍ߬ ߛߌ߲ߞߐ߲ ߦߴߊ߬ ߘߐ߫ ߞߐߞߊ߲ߠߊ ߟߎ߬ ߘߐ߫.

ߊ߬ ߟߊ߫ ߞߎߡߊ ߏ߬ ߟߋ ߡߊ߫ ߕߐ߬ ߕߏ߫ ߒߞߏ ߘߏ߲߬ߞߏ ߟߎ߬ ߟߊ߫߸ ߞߵߊ߬ ߛߐ߬ߘߐ߲߬ ߊ߬ߟߋ߫ ߖߍ߬ߘߍ ߝߣߊ߫ ߦߋ߫ ߒߞߏ ߡߐ߯ ߘߌ߫، ߓߊߏ߬߸ ߊ߬ߟߋ ߟߋ߬ ߒߞߏ ߘߋ߬ߙߌ߬ߘߊ߫ ߡߊ߲߬ߘߋ߲߬ ߗߋߕߌ߮ ߘߌ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߣߌ߫ ߞߊ߲߫ ߞߍ߫ ߘߊ߫ ߦߋ߲߬߸ ߡߍ߲ ߘߌ߫ ߛߋ߫ ߞߍ߫ ߟߊ߫ ߖߌ߬ߣߍ߫ ߡߊ߲߬ߕߏ߲߬ߕߍ߬ ߞߊ߲ ߘߌ߫ ߞߐߞߊ߲߫ ߖߡߊߣߊ ߟߎ߬ ߘߐ߫߸ ߏ߬ ߞߊ߲߫ ߡߊ߫ ߕߊ߬ߡߌ߲߫ ߛߏ߬ߛߏ߬ ߞߊ߲ ߠߊ߫، ߞߏ߫ ߞߊ߲ <<ߝߐߓߊ߮ ߟߊ߫ ߛߌߦߊߦߊ ߕߍ߫ ߘߋ߬߸ ߓߊ߬ߙߌ߬ ߡߍ߲ ߘߌ߫ ߖߡߊ߬ߣߊ ߕߐ߰ߡߊ߬ߛߙߋ߫ ߌߞߘߐ߫>> ߏ߬ ߟߋ ߞߏ߫ ߦߋ߫.

ߊ߬ ߟߊ߫ ߞߎߡߊ ߢߌ߲߬ ߠߋ߬ ߞߍߣߍ߲߫ ߘߙߌ߬ߞߌߌ߬ߣߍ߲߬ ߞߊ߲ߓߊ ߘߴߊ߬ ߓߟߏ߫ ߛߊ߫، ߓߊߏ߬߸ ߊ߬ߟߋ ߞߊ߬ ߞߎߡߊ߫ ߝߌ߬ߟߊ߫ ߟߋ߬ ߝߐ߫߸ ߡߍ߲ ߞߊ߬ ߓߍ߯ ߓߊ߬ߟߌ߬، ߊ߬ ߞߊ߲߫ ߞߎߡߊ߫ ߝߟߐ ߘߐ߫߸ ߞߏ߫: <<ߞߊ߲߫ ߞߋߟߋ߲߫ ߢߌ߬ߡߊ߲߫ ߦߋ߲߬߸ ߡߍ߲ ߘߌ߫ ߛߋ߫ ߖߌ߬ߣߍ߫ ߡߌ߬ߙߌ߲߬ߘߌ ߦߌߘߊߞߊ߬ ߟߊ߫߸ ߞߵߊ߬ ߟߊ߫ ߘߎ߰ߞߟߏ ߦߌ߬ߘߊ߬߸ ߞߵߊ߬ ߕߐ߰ߡߊ߬ߛߙߋ߬ ߘߎߢߊ߫ ߖߡߊ߬ߣߊ߬ ߜߘߍ ߟߎ߫ ߞߊ߲߬؟>> ߊ߬ ߞߵߊ߬ ߦߌ߬ߘߊ߫ ߏ߬ ߖߋ߬ߓߌ ߘߐ߫߸ ߞߏ߫ ߏ߬ <<ߞߊ߲߫ ߡߊ߫ ߕߊ߬ߡߌ߲߫ ߛߏ߬ߛߏ߬ ߞߊ߲ ߠߊ߫>>.

ߓߊ߬ߙߌ߬߸ ߊ߬ ߞߵߊ߬ ߦߌ߬ߘߊ߬ ߛߌߟߊߓߐߛߐ߯ߣߊ߫ ߟߊ߫߸ ߞߏ߫ ߊ߬ ߟߊ߫ ߞߎߡߊ ߞߘߐ ߟߋ߬߸ <<ߛߏ߬ߛߏ߬ ߞߊ߲ ߦߋ߫ ߞߍ߫ ߖߡߊ߬ߣߊ߬ߘߋ߲ ߠߎ߬ ߟߊ߫ ߓߌ߬ߟߊ߬ߢߐ߲߰ߡߊ߬ ߞߊ߲ ߘߌ߫ ߞߐߞߊ߲߫ ߖߡߊߣߊ ߟߎ߬ ߘߐ߫߸ ߞߵߊ߬ ߞߍ߫ ߜߎ߲߬ߘߎ߬ߢߐ߲߰ߦߊ߬ ߞߊ߲ ߘߌ߫.>>

ߞߎߡߊ߫ ߝߌ߬ߟߊ߫ ߏ߬ ߟߋ ߞߊ߬ ߢߐ߲߯ ߝߘߏ߬، ߏ߬ ߟߋ ߘߐ߫߸ ߒߞߏ ߥߎ߬ߦߊ߲߬ߞߌ߬ߟߌ߫ ߝߊ߬߸ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ ߣߐ߬ ߞߎߡߊ߫ ߟߊߗߋ߲߯ߧߊ߫ ߞߊ߲ ߠߋ߬ ߘߐߙߐ߲߫ ߝߐ߫ ߟߊ߫߸ ߥߟߊ߫ ߞߵߊ߬ ߘߊߘߐߓߍ߲߬، <<ߣߴߏ߬ ߕߍ߫߸ ߡߐ߱ ߞߍ߫ ߘߊ߫ ߖߡߊ߬ ߘߐ߫߸ ߌ ߞߍ߫ ߘߴߌ ߞߋߟߋ߲߫ ߠߊ߫߸ ߌ ߞߍ߫ ߘߴߊ߬ ߛߎ߯ ߺ ߎ ߺ ߛߎ߯ ߘߐ߫߸ ߌ ߞߊ߫ ߞߊ߲߫ ߞߵߊ߬ ߓߍ߯ ߝߐ߫ ߌ ߟߊ߫ ߞߊ߲ ߠߋ߬ ߘߐ߫، ߓߊߏ߬߸ ߤߊߟߌ߬ ߡߐ߱ ߦߋ߫ ߛߌ߬ߓߏ ߡߍ߲ ߞߍ߫ ߟߊ߫߸ ߌ ߦߋ߫ ߛߌ߬ߓߏ ߞߍ߫ ߟߴߌ ߟߊ߫ ߞߊ߲ ߠߋ߬ ߘߐ߫، ߣߴߏ߬ ߕߍ߫ ߜߎ߲߬ߘߎ ߘߊ߲߭ ߠߋ߬ ߛߌ߬ߓߏ ߘߌ߫، ߞߐ߬ߣߌ߲߬߸ ߛߌ߬ߓߏ ߦߋ߫ ߝߐ߫ ߟߴߌ ߟߊ߫ ߞߊ߲ ߠߋ߬ ߘߐ߫، ߣߴߌ ߣߌ߫ ߡߐ߱ ߦߋ߫ ߜߎ߲߬ߘߎ߬ ߢߐ߲߯ߦߋ ߟߊ߫߸ ߛߊ߬ߣߴߊ߬ ߦߴߊ߬ ߝߐ߫ ߥߊߟߌ߫ ߞߊ߲ ߘߐ߫߸ ߊߟߎ߫ ߕߍ߫ ߢߐ߲߮ ߦߋ߫ ߓߏ߲ ߠߊ߫؟ ߊߟߎ߫ ߘߴߏ߬ ߝߐ߫ ߊߟߎ߫ ߟߊ߫ ߞߊ߲ ߘߐ߫.>>

ߥߎ߬ߦߊ߲߬ߞߌ߬ߟߌ ߝߊ߬ ߟߊ߫ ߖߊ߬ߕߋ߬ ߘߐ߫߸ ߡߊ߲߬ߘߋ߲߬ߞߊ ߟߎ߬ ߟߊ߫ ߞߊ߲ ߝߐ ߡߊ߬ߟߏ߬ߦߊ ߟߋ߬ ߦߋ߫ ߞߍ߫ ߟߴߊ߬ߟߎ߬ ߟߊ߫ ߘߌ߲߬ߞߌ߬ߙߊ߬ ߜߘߍ ߟߎ߬ ߘߐ߫، ߊ߬ ߘߏ߲߬߸ ߡߐ߱ ߡߊ߲߫ ߞߊ߲߫ ߞߊ߬ ߓߊ߬ߟߌ߫ ߊ߬ ߟߊ߫ ߞߊ߲ ߝߐ߫ ߟߊ߫ ߞߏ߫ ߛߌ߫ ߞߏߛߐ߲߬، ߏ߬ ߟߊߒߡߊ ߘߏ߫ ߟߋ߬ ߛߏ߲߬ߖߘߊ߬ ߣߴߊ߬ ߓߊ߫ ߟߊ߫ ߢߊߣߌ߲ߡߊߓߏߙߌ ߘߌ߫߸ ߏ߬ ߛߊ߲߬ ߘߊ߲ߘߐ ߞߘߐ߫߸ ߛߏ߰ߟߏ߲߬ ߡߊ߫ ߛߐ߲߬ ߡߙߊ߬ߞߊ߬ ߞߊ߲ ߝߐ߫ ߟߴߊ߬ ߘߋ߲ ߠߎ߬ ߦߋ߫.

ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߊ߲ߕߌ߮߸ ߓߊߛߓߊ߬ߕߌ߫ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߞߏ߫ ߝߊߦߌߘߊ߫߸ ߤߊߓߌ߫ ߛߋߞߎ ߕߴߊ߬ ߝߍ߬ ߟߋ߬ ߛߏ߬ߛߏ߬ ߞߊ߲ ߦߋ߫ ߥߙߎߞߌ߫ ߞߊ߬ ߢߝߍߟߊ ߟߊߛߐ߬ߘߐ߲߬، ߓߊߏ߬: <<ߞߊ߲ ߘߊ߲ߞߎ߲ ߜߎ߲߬ߘߎ߬ ߞߊ߲߬ߦߊ ߘߌ߫߸ ߏ߬ ߦߋ߫ ߞߊ߲ ߖߍ߬ߘߍ ߟߊ߫ ߡߊ߬ߖߌ߮ ߣߴߊ߬ ߟߊ߫ ߥߙߎߞߌߓߊߟߌߦߊ ߟߋ߬ ߦߌߘߊߞߊ߬ ߟߊ߫، ߓߊߏ߬߸ ߘߎߢߊ߫ ߞߏߟߐ߲ߠߊ ߓߍ߯ ߦߴߊ߬ ߝߍ߬ ߟߋ߬߸ ߊ߬ ߟߊ߫ ߞߊ߲ ߦߋ߫ ߛߋ߫ ߛߓߊ߬ߕߌ߬ ߟߊ߫߸ ߖߐ߲߰ߛߊ߫ ߓߌ߬ߟߊ߬ߢߐ߲߰ߡߊ ߦߋ߫ ߛߋ߫ ߣߐ߰ߦߊ߬ ߟߴߊ߬ ߓߟߏ߫ ߘߎߢߊ߫ ߞߊߓߋ ߟߊ߫.>>

ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߥߎ߬ߦߊ߲߬ߞߌ߬ߟߌ߫ ߝߊ߬ ߛߏ߬ߙߌ߫ ߡߊ߲߬ߘߋ߲߬ߞߊ ߞߵߊ߬ ߟߊ߫ ߞߎߡߊ ߞߊ߲߬ߟߊ߫߸ ߞߏ߫: <<ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߞߊ߲ ߡߍ߲ ߕߍ߫ ߝߐ߫ ߟߊ߫ ߖߡߊ߬ߣߊ߬ ߜߘߍ߫ ߘߐ߫، ߣߴߊ߬ ߕߏ߫ ߘߴߏ߬ ߡߊ߬߸ ߛߏ߬ߛߏ߬ ߞߊ߲ ߝߣߊ߫ ߕߍ߫ ߕߊ߬، ߓߊߏ߬߸ ߊ߬ ߦߋ߫ ߝߐ߫ ߟߊ߫ ߟߌߓߋߙߌߦߊ߫߸ ߣߌ߫ ߒ ߡߊ߫ ߢߌ߬ߣߊ߬߸ ߖߌ߬ߣߍ߫ ߓߌ߬ߛߊ߬ߥߏ߬ ߦߙߐ ߘߏ߫ ߟߎ߫ ߝߣߊ߫ ߓߍ߫߸ ߊ߰ ߝߐ߫ ߟߊ߫ ߦߋ߲߬، ߏ߬ ߘߐ߫߸ ߣߴߊ߬ ߕߏ߫ ߘߊ߫ ߞߊ߲߫ ߠߊߞߋ߲߬ߛߎ߬ߣߍ߲߬ ߝߐ ߡߊ߬߸ ߛߏ߬ߛߏ߬ ߞߊ߲ ߕߴߛߋ߫ ߕߊ߬ ߟߊ߫.>>

ߊ߬ߟߋ ߟߊ߫ ߘߐ߬ߡߙߌ߬ߟߌ ߘߐ߫߸ ߞߊ߲ ߦߋ߫ ߝߐ߫ ߟߊ߫ ߞߊ߲߫ ߟߐ߲ߠߊ ߟߎ߫ ߟߋ߬ ߦߋ߫߸ ߊ߬ ߕߍ߫ ߝߐ߫ ߟߊ߫ ߞߊ߲߫ ߟߐ߲ߓߊߟߌ ߟߎ߬ ߦߋ߫، ߓߊߏ߬߸ ߖߡߊ߬ߣߊ߬ ߞߋߟߋ߲߫ ߛߌ߫ ߕߴߦߋ߲߬߸ ߡߍ߲ ߞߊ߲߫ ߡߊ߲߬ߕߏ߲߬ߕߍ߬ߟߊ߬ߞߊ ߦߋ߫ ߞߊ߲߫ ߝߐߓߊ߯ ߕߜߋ ߘߌ߫، ߊ߬ߟߋ߫ ߞߊ߬ ߟߊ߬ߟߌ߬ߟߌ ߟߋ߬ ߞߍ߫ ߊ߬ ߟߊ߫ ߞߎߡߊ ߣߌ߲߬ ߘߐ߫߸ ߞߵߊ߬ ߦߌ߬ߘߊ߬ ߞߏ߫: <<ߡߐ߱ ߓߊ߯ ߞߍ߫ ߝߊ߲߭ ߺ ߊ ߺ ߝߊ߲߬߸ ߌ ߡߊ߲߫ ߞߊ߲߫ ߞߊ߬ ߓߐ߫ ߌ ߛߎ߮ ߟߊ߫߸ ߞߵߊ߬ ߝߐ߫ ߞߏ߫ ߌ ߓߘߊ߫ ߓߌ߬ߟߊ߬ ߛߎ߯ ߜߘߍ߫ ߕߍߡߊ߬، ߌ ߞߊ߫ ߞߊ߲߫ ߞߊ߬ ߕߏ߫ ߌ ߛߎ߮ ߟߊ߫ ߟߋ߬ ߞߘߊߥߎ߫.>>

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.