ߥߏ߬ߙߏ ߦߋ߫ ߝߋ߲߫ ߞߘߐߡߊ߲ ߠߋ߬ ߘߌ߫ ߡߊ߲߬ߘߋ߲߬ ߞߣߐ߫߸ ߊ߬ ߘߏ߲߬ ߣߊ߬ߝߊ ߞߊ߫ ߓߏ߲߬ ߝߣߊ߫ ߞߊ߬ ߟߴߊ߬ ߏ߬ ߞߊ߲߬߸ ߊ߬ ߦߋ߫ ߞߏ߫ ߛߌߦߊߡߊ߲߫ ߠߋ߬ ߢߊ߬ ߟߊ߫߸ ߡߐ߰ߦߊ ߘߐ߫ ߊ߬ ߣߌ߫ ߞߏ߫ ߜߘߍ߫ ߟߎ߫߸ ߝߊߕߎ߬ߡߊ߫ ߞߎ߬ߙߎߡߊ߬ ߦߋ߫ ߥߙߏ߬ ߝߙߋ߬ߟߊ ߟߋ߬ ߘߌ߫ ߞߊ߲ߞߊ߲߫ ߞߣߐ߫߸ ߛߏߜߍ ߥߙߏ߬ߝߋ߬ߟߊ ߟߎ߬ ߟߊ߫ ߞߎ߲߬ߕߌ߮ ߟߋ߬ ߦߴߊ߬ ߘߌ߫߸ ߊ߲ ߛߋ߫ ߘߊ߫ ߛߋ߲߬ߠߊ߬ߓߐ߬ߟߌ߫ ߞߍ߫ ߟߊ߫ ߞߊ߬ ߛߋ߫ ߊ߬ߟߋ ߝߍ߬߸ ߖߐ߲߰ߛߊ߫ ߊ߬ ߘߌ߫ ߘߏ߫ ߝߐ߫ ߊ߲ ߧߋ߫ ߥߏ߬ߙߏ ߕߐ߬ߣߐ ߘߏ߫ ߟߎ߫ ߞߊ߲߬߸ ߞߊ߬ߕߎ߲߯߸ ߊ߬ߟߋ ߞߵߊ߬ ߟߊ߫ ߞߏ ߓߍ߯ ߞߍ߫ ߥߏ߬ߙߏ ߟߋ߬ ߘߐ߫߸ <<ߒߠߋ ߞߊ߬ ߒ ߠߊ߫ ߞߏ ߓߍ߯ ߞߍ߫ ߥߏ߬ߙߏ ߟߋ߬ ߘߐ߫߸ ߒߠߋ ߦߋ߫ ߒ ߣߌ߫ ߒ ߘߋ߲ ߠߎ߬ ߓߍ߯ ߞߎ߲߬ߞߏ ߓߊߛߌ߫ ߟߊ߫ ߥߙߏ߬ ߝߙߋ ߟߋ߬ ߘߐ߫ ߓߌ߬>>ߊ߲ ߣߊߡߛߏ ߞߵߊ߬ ߦߌ߬ߘߊߞߊ߬ ߞߏ߫ ߥߏ߬ߙߏ ߦߋ߫ ߝߋ߲߫ ߠߋ߬ ߘߌ߫߸ ߡߍ߲ ߕߍ߫ ߛߐ߲߬ ߠߊ߫ ߖߊ߲߬ߝߊ ߡߊ߬߸ ߊ߬ ߦߋ߫ ߝߋ߲ ߠߋ߬ ߘߌ߫߸ ߡߍ߲ ߕߍ߫ ߞߏߘߐߞߙߎ߬ߣߍ߲ ߝߍ߬߸ ߝߊߕߎ߬ߡߊ߫ ߞߎ߬ߙߎߡߊ߬ ߦߋ߫ ߡߐ߰ ߞߘߐ ߟߋ߬ ߘߌ߫ ߥߙߏ߬ ߝߙߋ ߘߐ߫߸ ߞߊ߬ߕߎ߲߯߸ ߊ߬ ߞߵߊ߬ ߕߊ ߣߌ߲߬ ߘߊߡߌ߬ߣߊ߫ ߕߎ߬ߡߊ߬ ߖߊ߲ ߠߋ߬ ߟߊ߫.


<<ߒߠߋ ߞߊ߬ ߣߌ߲߬ ߘߊߡߌ߬ߣߊ߫ ߒ ߛߐ߬ߘߐ߲߫ ߛߊ߲߬ ߁߀ ߠߋ߬ ߡߊ߬߸ ߤߊ߲߯ ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߒ ߘߏ߲߬ ߓߘߊ߫ ߛߊ߲߬ ߆߀ ߣߌ߫ ߘߏ߫ ߓߐ߫߸ ߥߏ߬ߙߏ ߕߐ߬ߣߐ ߞߊ߫ ߓߏ߲߬ ߓߊ-ߟߋ߬߸ ߞߊ߬ߕߎ߲߯߸ ߣߌ߫ ߊ߬ߟߋ ߕߍ߫ ߝߘߎ ߡߍ߲ ߘߐ߫߸ ߏ߬ ߞߘߐ߫ ߟߋ߬ ߞߏ߫ ߊ߬ߟߎ߫ ߦߋ߫ ߞߊ߬ߣߎ߲ ߠߋ߬ ߡߊ߬ ߏ߬ ߘߌ߫߸ ߞߊ߬ ߥߏ߬ߙߏ ߕߏ߫ ߌ ߘߊ ߘߐ߫߸ ߌ ߖߊ߲߬ߕߏ߫ ߌ ߟߊ߫ ߝߐߕߊ ߟߎ߬ ߘߐ߫߸ ߞߊ߬ߕߎ߲߯߸ ߣߴߊ߬ߟߋ ߦߴߌ ߘߊ ߘߐ߫߸ ߝߏ߫ ߌ ߦߋ߫ ߢߌ߬ߡߊ ߟߋ߬ ߝߐ߫߸ ߣߴߏ߬ ߕߍ߫ ߌ ߓߊ߯ ߞߎߡߊ߫ ߝߐ߫ ߡߍ߲ ߕߍ߫ ߝߐߕߊ߫ ߘߌ߫߸ ߊߟߊ߫ ߘߴߌ ߡߌ߬ߣߊ߬ ߌ ߟߊ߫ ߝߐߣߍ߲߫ ߞߏߛߐ߲߬>> ߝߊߕߎ߬ߡߊ߫ ߞߎ߬ߙߎߡߊ߬ ߞߎߡߊ߫ ߘߴߊ߲ ߧߋ߫ ߞߏ߫ ߛߌߦߊߡߊ߲߫ ߠߋ߬ ߞߊ߲߬ ߥߏ߬ߙߏ ߟߊ߫ ߞߏ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߥߏ߬ߙߏ ߦߋ߫ ߓߊߘߋ߲ߧߊ ߘߐߞߙߊ߫ ߖߟߎ ߟߋ߬ ߘߌ߫߸ ߣߌ߫ ߝߘߎ ߟߎ߬ ߖߍ߬ߘߍ ߝߣߊ߫.
<<ߌߟߋ ߞߎߣߎ߲߫ ߘߊ߫ ߞߊ߬ ߓߐ߲ߛߐ߲߫ ߕߊ߬ߡߌ߲߬ߣߍ߲ ߠߎ߬ ߕߏ߫ ߡߍ߲ ߞߊ߲߬߸ ߣߴߌߟߋ ߞߊ߬ ߌ ߕߊ߫ ߞߎ߬ߙߎ߲߬ߘߎ߬ ߜߘߍ߫ ߟߊߘߊ߲߫ ߞߵߊ߬ ߓߐ߫ ߏ߬ ߟߎ߬ ߕߊ ߡߊ߬߸ ߏ߬ ߦߋ߫ ߣߊ߬ ߟߊ߫ ߕߌߢߍߟߌ ߟߋ߬ ߘߌ߫߸ ߒ߬ߓߊ߬߸ ߦߟߍ߬ߡߊ߲ ߏ߬ ߟߋ߬ ߓߘߊ߫ ߣߊ߬ ߞߍ߫ ߝߘߎ ߛߌߦߊߡߊ߲߫ ߛߊ߭ ߛߊߓߎ ߘߌ߫.

ߞߊ߲ߞߊ߲߫

ߡߊ߬ߡߊߘߌ߫ ߘߎ߲߬ߓߎ߬ߦߊ߬ ߝߣߊ߫ ߦߋ߫ ߥߙߏ߬ ߝߙߋ߬ߟߊ ߟߋ߬ ߘߌ߫ ߞߊ߲ߞߊ߲߫ ߞߣߐ߫߸ ߊ߬ߟߋ ߟߊ߫ ߥߙߏ߬ ߝߙߋ ߣߌ߲߬ ߘߊߡߌ߬ߣߵߊ߬ ߓߟߏ߫ ߊ߬ ߣߌ߫ ߓߌ߬ ߕߍ ߘߐ߫߸ ߊ߲ ߧߋ߫ ߏ߬ ߛߊ߲߬ ߃߀ ߢߐ߲߰ ߠߋ߬ ߘߐ߫ ߕߋ߲߬߬߸ ߥߙߏ߬ ߝߙߋ ߣߌ߲߬ ߘߊߡߌ߬ߣߊ߬ ߘߴߊ߬ ߓߟߏ߫ ߥߎ߬ߛߎ߫ ߞߎ߲߬ߘߐ߬ߖߊ߲ ߠߋ߬ ߞߘߐ߫߸ <<ߒߠߋ ߞߊ߬ ߓߊ߯ߙߊ߫ ߣߌ߲߬ ߘߊߡߌ߬ߣߊ߬ ߁߉߈߈ ߝߊ߲߭ ߠߋ߬ ߝߍ߬߸ ߥߏ߬ߙߏ ߦߋ߫ ߛߎ߯ߦߊ߫ ߘߊ߲ߘߐ߫ ߟߋ߬ ߘߌ߫߸ ߞߛߌ߬ ߥߙߏ ߦߋ߲߬߸ ߜߙߍ߬ߛߍ߬ ߥߙߏ ߦߋ߲߬߸ ߛߎ߯ߦߊ ߏ߬ ߟߋ߬ ߦߋ߫ ߣߊ߬ ߟߴߊ߲ ߓߘߊ ߦߊ߲߬߸ ߥߏ߬ߙߏ ߕߐ߬ߣߐ ߞߊ߫ ߓߏ߲߬ ߓߊߟߋ߬߸ ߥߏ߬ߙߏ ߦߋ߫ ߝߋ߲߫ ߣߝߊ߬ߡߊ߬ߓߊ ߟߋ߬ ߘߌ߫ ߡߊ߲߬ߘߋ߲߬ ߣߊߡߎ߲ ߘߐ߫߸ ߓߊߏ߬߸ ߌ ߓߊ߯ ߞߍ߫ ߌ ߛߌ߰ ߟߊ߫ ߡߐ߰ ߝߍ߬߸ ߌ ߦߋ߫ ߥߙߏ߬ ߁߀ ߠߋ߬ ߘߌ߫ ߟߴߊ߬ ߡߊ߬ ߞߏ߫ ߣߴߌ ߘߌ߬ߢߍ߬ ߘߊ߫ ߒ ߧߴߊ߬ ߝߍ߬ ߞߊ߬ ߒ ߛߴߌ ߝߍ߬ ߦߊ߲߬߸ ߝߘߎ ߘߊߞߎ߲ ߘߐ߫ ߤߊߟߌ߬ ߣߴߌ ߞߊ߬ ߞߋ߲߬ߥߟߎ߬ ߦߙߌߞߊ ߟߋ߬ ߘߌ߫߸ ߏ߬ ߓߍ߯ ߕߊ߬ߕߐ߫ ߞߵߊ߬ ߟߊ߫ ߥߙߏ߬ ߁߀ ߠߋ߬ ߞߊ߲߬>> ߊ߬ ߘߏ߲߬ ߓߘߊ߫ ߕߐ߬ߣߐ߫ ߛߐ߬ߘߐ߲߫ ߊ߬ ߟߊ߫ ߥߙߏ߬ ߝߙߋ ߣߌ߲߬ ߘߐ߫߸ ߞߊ߬ߕߎ߲߯߸ ߊ߬ ߟߊ߫ ߞߎ߲߬ߞߏ߬ߦߊ ߓߍ߯ ߘߋ߲ߣߍ߲߫ ߊ߬ߟߋ ߟߋ߬ ߟߊ߫߸ ߞߵߏ߬ ߕߊ߫ ߞߵߊ߬ ߟߊ߫ ߘߋ߲ߓߦߊ ߕߊ ߞߊ߲߬.

ߖߊ߰ߞߊ߬ ߡߊ߯ߘߌ߫ ߘߎ߲ߓߎߦߊ߫ ߝߣߊ߫ ߟߊ߫ ߞߎߡߊ߫ ߘߐ߫߸ ߊ߬ߟߋ ߕߊ ߞߍߣߍ߲߫ ߊ߬ ߡߊ߬ ߓߐߞߊߕߍ߬ߘߍ ߟߋ߬ ߘߌ߫߸ ߞߊ߬ߕߎ߲߯߸ ߊ߬ ߣߊ߬ߣߍ߲߫ ߊ߬ ߝߊ߬ ߟߎ߬ ߓߟߏ ߕߘߍ߬ ߟߴߊ߬ ߘߐ ߟߋ߬߸ ߊ߬ ߘߏ߲߬ ߕߍ߫ ߛߋ߫ ߊ߬ ߘߊߡߌߣߊ߫ ߕߎߡߊ ߔߘߋߔߘߋ߫ ߟߊߕߍ߰ ߟߊ߫߸ ߝߊߦߌߘߊ߫ ߊ߬ ߞߵߊ߬ ߖߘߍ߬ ߦߋ߫ ߊ߬ ߕߍߡߊ߬ ߟߋ߬߸ ߊ߬ ߝߣߊ߫ ߛߋ߫ ߘߊ߫ ߘߏ߫ ߝߐ߫ ߟߴߊ߲ ߧߋ߫ ߥߏ߬ߙߏ ߛߎ߯ߦߊ߫ ߘߡߊߘߡߊ߫ ߞߊ߲߬<<ߒ ߘߌ߫ ߛߋ߫ ߡߍ߲ ߝߐ߫ ߟߊ߫ ߥߏ߬ߙߏ ߛߎ߯ߦߊ ߟߎ߫ ߘߐ߫߸ ߟߊߒߡߊ߫ ߘߐ߫: ߛߏ߬ߞߎ߲߬ ߥߙߏ߸ ߦߟߍ߫ ߥߙߏ߸ ߥߙߏ߬ ߘߊߕߐ…. ߏ߬ ߟߎ߬ ߛߌߦߊߡߊ߲ ߦߋ߫ ߞߍ߫ ߟߊ߫ ߛߘߊߞߊ ߟߋ߬ ߘߌ߫߸ ߞߏ߬ߣߌ߲߫߫߸ ߡߍ߲ ߣߊ߬ߕߐ߫ ߟߐ߬ ߟߊ߫ ߝߘߎ ߕߊ ߡߊ߬߸ ߛߎ߯ߦߊ߫ ߞߏ߫ ߕߴߏ߬ ߘߐ߫߸ ߏ߬ ߞߍ߫ ߘߴߊ߬ ߛߎ߯-ߎ߫-ߛߎ߫ ߟߋ߬ ߘߌ߫>>ߊ߬ߟߋ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߛߐ߲߬ߞߐ߬ ߞߋߟߋ߲߫ ߠߊߕߍ߰ߣߍ߲߬ ߕߍ߫ ߥߏ߬ߙߏ ߟߊ߫߸ ߥߏ߬ߙߏ ߦߋ߫ ߥߟߏߒߘߐ ߟߋ߬ ߘߌ߫߸ ߛߐ߲߬ߞߐ߬ ߞߋߟߋ߲߫ ߠߊߕߍ߬ߣߍ߲߫ ߕߍ߫ ߡߍ߲ ߠߊ߫߸ ߕߎ߬ߡߊ ߘߏ߫ ߟߎ߫ ߟߊ߫߸ ߊ߬ ߘߌ߫ ߖߌ߰߸ ߕߎ߬ߡߊ߬ ߜߘߍ߫ ߟߎ߫ ߟߊ߫߸ ߊ߬ ߘߌ߫ ߦߟߍ<<ߥߏ߬ߙߏ ߦߋ߫ ߥߟߏߒߘߐ ߟߋ߬ ߘߌ߫߸ ߛߐ߲߬ߞߐ߬ ߞߋߟߋ߲߫ ߛߌ߫ ߟߋ߬ ߕߴߊ߬ ߟߊ߫߸ ߌ ߓߊ߯ ߥߏ߬ߙߏ ߛߊ߲߬ ߓߌ߬ ߖߕ ߃߀ ߀߀߀ ߟߊ߫߸ ߛߌߣߌ߲߫ ߌ ߘߴߊ߬ ߦߋ߫ ߊ߬ ߓߘߊ߫ ߞߍ߫ ߖߕ ߅߀ ߀߀߀ ߘߌ߫߸ ߏ߬ ߦߋ߫ ߓߐ߫ ߟߴߊ߬ ߛߐ߬ߘߐ߲ ߠߊߜߟߍ߬ߦߊ ߟߋ߬ ߘߐ߫߸ ߣߴߊ߬ ߛߐ߬ߘߐ߲ ߣߐ߰ߦߊ߬ ߘߊ߫ ߛߊ߲߭ ߡߍ߲ ߠߊ߫ ߝߣߊ߫߸ ߊ߬ ߛߐ߲߬ߞߐ ߘߌ߫ ߟߊߣߐ߰ߦߊ߫ ߛߊ߲߭ ߏ߬ ߟߊ߫>>

ߥߏ߬ߙߏ

ߝߊ߲ߕߊ߬ ߞߊ߬ߓߊ ߝߣߊ߫ ߦߋ߫ ߥߙߏ߬ ߝߙߋ߬ߟߊ ߟߋ߬ ߘߌ߫ ߞߊ߲ߞߊ߲߫ ߛߏ ߞߣߐ߫߸ ߏ߬ ߡߍ߲ ߛߊ߲߬ ߁߀ ߢߐ߲߰ ߦߋ߫ ߊ߬ ߘߊߞߎ߲ ߘߐ߫ ߕߋ߲߬߸ ߊ߬ ߞߵߊ߬ ߘߊߡߌ߬ߘߊ߬ ߂߀߁߅ ߟߋ߬ ߟߊ߫߸ ߊ߬ߟߋ ߘߏ߲߬ ߝߣߊ߫ ߥߟߌ߬ ߘߊ߫ ߞߵߊ߬ ߟߊ߫ ߡߐ߰ߓߊ ߟߎ߬ ߕߏ߫ ߊ߬ ߞߊ߲߬ ߠߋ߬ <<ߒߠߋ ߞߊ߬ ߥߙߏ߬ ߝߙߋ ߘߊߡߌ߬ߣߊ߬ ߂߀߁߅ ߟߋ߬ ߟߊ߫߸ ߒ ߘߏ߲߭ ߊ߬ ߘߐ߫߸ ߏ߬ ߞߍ߫ ߘߊ߫ ߒ ߓߟߏ߫ ߓߐߞߊ߬ߕߍ߬ߘߍ ߟߋ߬ ߘߌ߫߸ ߓߊߏ߬߸ ߒ ߥߟߌ߬ ߘߊ߫ ߞߊ߬ ߒ ߝߊ߬ ߕߏ߫ ߊ߬ߟߋ ߟߋ߬ ߞߊ߲߬߸ ߗߍ߭ ߡߍ߲ ߞߊ߬ ߒ ߝߘߎ߫ ߏ߬ ߝߣߊ߫ ߦߴߊ߬ߟߋ߬ ߓߊ߯ߙߊ߫ ߞߋߟߋ߲߫ ߠߋ߬ ߞߊ߲߬߸ ߏ߬ ߟߋ߬ ߞߍ߫ ߘߊ߫ ߒߠߋ ߝߣߊ߫ ߘߏ߲߬ߢߊ ߘߌ߫ ߊ߬ ߘߐ߫>> ߕߣߐ߬ ߓߊߟߋ߬ ߦߋ߫ ߥߏ߬ߙߏ ߟߊ߫߸ ߓߊߏ߬߸ ߊ߬ ߦߋ߫ ߞߍ߫ ߟߊ߫ ߞߊ߬ ߝߘߎ ߟߊߘߊ߲߫߸ ߊ߬ ߣߌ߫…. ߌ ߓߊ߯ ߓߐ߫ ߡߏ߬ߛߏ ߞߐ߫ ߝߘߎ ߓߟߏߡߊ߬߸ ߌ ߦߋ߫ ߥߊ߫ ߟߊ߫ ߥߙߏ߬ ߁߀ ߠߋ߬ ߘߌ߫߸ ߞߏ߫ ߒ ߓߘߊ߫ ߓߐ߫ ߊߟߎ߫ ߘߋ߲ߡߛߏ߫ ߞߐ߫ ߝߘߎ ߟߊ߫߸ ߡߐ߰ ߕߍ߫ ߛߋ߫ ߕߊ߯ ߟߊ߫ ߓߐ߲߬ߓߐ߲ ߡߊߟߐ߬ ߟߊ߫ ߓߌߘߊ߲ߠߞߊ ߟߎ߬ ߟߊ߫ ߘߋ߬ ߞߏ߫ ߒ ߓߘߊ߫ ߓߐ߫ ߊߟߎ߫ ߘߋ߲ ߞߐ߫߸ ߏ߬ ߕߴߦߋ߲߬.
ߥߏ߬ߙߏ ߦߋ߫ ߝߋ߲߫ ߡߐ߬ߟߐ߲߬ߡߊ߬ߓߊ ߟߋ߬ ߘߌ߫ ߡߊ߲߬ߘߋ߲߬ ߞߣߐ߫߸ ߕߏߟߏ߲߫ ߡߊ߲߫ ߞߊ߲߫ ߞߊ߬ ߞߍ߫ ߡߍ߲ ߠߊ߫߸ ߊ߬ ߘߏ߲߬ ߕߍ߫ ߞߍ߫ ߟߊ߫ ߘߊߥߎ߲ߠߌ߲ ߓߟߏߡߊ߬ ߦߏ߫ ߓߐ߲߬ߓߐ߲߫߸ ߓߊߏ߬߸ ߊ߲ ߓߍ߯ ߟߊߘߍ߬ߣߍ߲ ߦߴߊ߬ ߞߊ߬ߟߊߡߊ߬ ߞߏ߫ ߝߘߎ ߦߋ߫ ߟߊߘߊ߲߫ ߠߊ߫ ߥߏ߬ߙߏ ߟߋ߬ ߟߊ߫߸ ߞߍ߬ߟߍ ߘߌ߫ ߓߊ߲߫ ߥߏ߬ߙߏ ߟߊ߫߸ ߡߊ߲߬ߘߋ߲߬ ߞߣߐ߫ ߥߏ߬ߙߏ ߘߌ߫ ߛߋ߫ ߞߊ߬ ߞߟߍ߬ߢߐ߲߰ߡߊ ߟߎ߬ ߕߍ ߘߐߓߍ߲߬߸ ߛߊ߬ߡߎ߲߬ ߕߙߊߥߟߋ߫ ߟߊ߫ ߞߎߡߊ߫ ߘߐ߫ ߊ߲ ߧߋ߫ ߞߵߊ߬ ߓߍ߲߬ ߊ߬ ߘߏ߲߬ߧߊ ߘߐ߫ ߥߙߏ߬ ߝߙߋ ߘߐ߫<<ߒߠߋ ߦߋ߫ ߥߙߏ߬ ߝߙߋ ߟߋ߬ ߟߊ߫ ߞߊ߲ߞߊ߲߫ ߛߏ ߞߣߐ߫ ߦߊ߲߬߸ ߒ ߘߏ߲߬ ߠߴߊ߬ ߘߐ߫ ߓߊߟߏ߫ ߢߌߣߌ߲ ߠߋ߬ ߞߏߛߐ߲߬߸ ߒ ߘߏ߲߭ ߊ߬ ߘߐ߫ ߏ߬ ߓߘߊ߫ ߛߊ߲߬ ߃߀ ߓߐ߫ ߥߏ߬ߙߏ ߕߐ߬ߣߐ ߞߊ߫ ߓߏ߲߬ ߞߏߛߓߍ߫߸ ߊ߬ ߝߟߐߡߊ߫: ߣߌ߫ ߥߙߏ߬ ߁߀ ߕߍ߫߸ ߝߘߎ ߕߍ߫ ߛߘߌ߬ ߟߴߊ߲ ߓߘߊ ߦߊ߲߬ ߣߴߊ߬ ߦߋ߫ ߜߍߞߊ߲߫ ߖߡߊߣߊ ߘߌ߫߸ ߝߣߊ߫ ߌ ߣߴߌ ߟߊ߫ ߡߐ߰ߓߊ ߓߊ߯ ߓߌ߬ߟߊ߬ ߢߐ߲߯ ߠߊ߫ ߢߊ߫-ߊ߫-ߢߊ߫، ߥߙߏ߬ ߁߀ ߘߌ߫ ߞߍ߫ ߛߊߓߎ߫ ߘߌ߫ ߞߵߏ߬ ߓߊ߲߫ ߡߐ߰ߓߊ ߟߎ߬ ߟߊ߫ ߓߏ߲߬ߧߊ ߞߣߐߡߊ߬>>

ߒ߬ߓߊ߬߸ ߡߐ߱ ߘߏ߫ ߟߎ߫ ߓߘߊ߫ ߓߐ߲߬ߓߐ߲ ߣߌ߫ ߥߏ߬ߙߏ ߟߋ߬ ߞߍ߫ ߟߊߢߐ߲߯ߡߊ߫ ߝߋ߲ ߘߌ߫߸ ߞߵߊ߬ ߛߐ߬ߘߐ߲߬ ߞߋߟߋ߲߫ ߕߍ߫ ߊ߬ߟߎ߬ ߘߌ߫߸ ߥߏ߬ߙߏ ߦߋ߫ ߦߙߌߘߋ߲ ߠߋ߬ ߘߌ߫߸ ߡߍ߲ ߦߋ߫ ߝߋ߲߫ ߡߐ߬ߟߐ߲߬ߡߊ߬ߓߊ߫ ߘߌ߫ ߡߊ߲߬ߘߋ߲߬ ߞߣߐ߫߸ ߊߓߎߟߊ߯ߦߌ߬ ߞߐ߲ߘߍ߫ ߞߊ߬ ߛߊ߬ߡߎ߲߬ ߕߙߊߥߟߋ߫ ߟߊ߫ ߞߎߡߊ߫ ߞߊ߲ ߠߎ߬ ߟߊߛߙߋߦߊ߫ ߕߊ߲߬ ߠߋ߬߸ ߓߊߏ߬߸ ߊ߬ߟߋ ߝߣߊ߫ ߘߏ߲߬ ߘߴߊ߬ ߘߐ߫ ߞߵߊ߬ ߟߊ߫ ߡߐ߰ߓߊ ߟߎ߬ ߕߏ߫ ߊ߬ߟߋ ߟߋ߬ ߞߊ߲߬߸ ߊ߬ ߘߏ߲߬ ߛߋ߫ ߘߊ߫ ߘߏ߫ ߝߐ߫ ߟߴߊ߲ ߧߋ߫ ߊ߬ ߞߏߢߊ ߞߊ߲߬<<ߒߠߋ ߘߏ߲߬ߣߍ߲߫ ߥߙߏ߬ ߝߙߋ ߘߐ߫ ߞߵߊ߬ ߛߊߓߎ ߞߍ߫ ߒ ߞߎߣߎ߲߫ ߘߌ߫ ߞߊ߬ ߒ ߠߊ߫ ߡߐ߰ߓߊ ߟߎ߬ ߕߏ߫ ߊ߬ ߘߊ߫ ߘߐ߫߸ ߒ ߘߏ߲߬ ߞߵߊ߬ ߦߋ߫ ߊ߬ ߓߘߴߊ߬ߟߎ߫ ߣߝߊ߬߸ ߊ߬ ߘߏ߲߫ ߕߐ߬ߣߐ ߞߊ߫ ߓߏ߲߬ ߞߏߛߓߍ߫߸ ߓߊߏ߬߸ ߊ߬ ߦߋ߫ ߝߘߎ ߟߊߘߊ߲߫ ߝߋ߲ ߠߋ߬ ߘߌ߫߸ ߊ߬ ߦߋ߫ ߛߋ߫ ߟߊ߫ ߞߊ߬ ߤߊߟߌ߬ ߞߍ߬ߟߍ ߓߊ߲߫ ߓߊߘߋ߲ߡߊ ߟߎ߬ ߣߌ߫ ߢߐ߲߯ ߕߍ߫>>ߊ߬ߟߋ ߞߏ߬ߣߌ߲ ߝߣߊ߫ ߓߘߊ߫ ߕߐ߬ߣߐ ߘߏ߫ ߛߐ߬ߘߐ߲߬ ߊ߬ ߕߊ ߟߊ߫߸ ߓߊߏ߬߸ ߊ߬ ߦߋ߫ ߘߋ߲ߓߦߊ ߓߊߟߏ ߓߐ߫ ߟߴߊ߬ߟߋ ߟߋ߬ ߘߐ߫߸ ߊ߬ ߘߏ߲߬ ߓߘߊ߫ ߛߋ߫ ߞߊ߬ ߓߏ߲ ߟߐ߬ ߊ߬ ߘߐ߫ ߝߣߊ، ߒ߬ߓߊ߬߸ ߓߊߘߋ߲߫ ߓߘߍ ߟߎ߫߸ ߏ߬ ߓߍ߯ ߟߊߕߊ߬ߡߌ߲߬ߣߍ߲ ߞߐߝߍ߬߸ ߥߙߏ߬ ߝߙߋ߬ߟߊ ߟߎ߬ ߟߊ߫ ߡߊ߲߬ߕߙߐ ߟߎ߬ ߡߊ߫ ߞߍ߫ ߞߋߟߋ߲߫ ߘߌ߫߸ ߕߙߐ߬ߦߊ ߡߍ߲ ߦߴߊ߬ߟߎ߬ ߡߊߛߐ߬ߘߐ߲߬ ߠߊ߫ ߊ߬ߟߎ߬ ߟߊ߫ ߓߊ߯ߙߘߊ ߣߌ߲߬ ߘߐ߫ ߞߊ߬ߣߌ߲߬߸ ߞߊ߬ߕߎ߲߯߸ ߘߏ߫ ߟߎ߫ ߕߊ ߦߋ߫ ߝߎ߲ߞߎ߲߫ ߞߏ ߘߌ߫߸ ߞߵߊ߬ߟߎ߬ ߓߐ߫ ߕߟߋ߬ߜߍ ߟߊ߫߸ ߓߊߏ߬߸ ߞߏ߫ ߥߎ߬ߛߎ ߕߍ߫ ߓߍ߲߬ ߠߊ߫ ߥߏ߬ߙߏ ߡߊ߬߸ ߘߏ߫ ߟߎ߫ ߝߣߊ߫ ߕߊ ߦߋ߫ ߥߏ߬ߙߏ ߟߊ߫ ߛߊ߲߬ߣߌ߲߬ߓߊ߬ߟߌ߬ߦߊ ߘߌ߫߸ ߞߏ߫ ߡߐ߰ ߝߊ߲߬ߓߊ ߦߴߊ߬ ߓߊ߲߬ ߠߊ߫ ߥߏ߬ߙߏ ߛߊ߲߬ ߠߊ߫ ߟߋ߬߸ ߞߏ߫ ߥߏ߬ߙߏ ߡߊ߫ ߞߏߝߐ߫ ߞߎ߬ߙߊ߬ߣߊ ߘߐ߫߸ ߊ߬ ߣߌ߫ ߥߏ߬ߙߏ ߡߊߛߐ߬ߘߐ߲ ߓߘߊ߫ ߜߟߍ߬ߦߊ߫߸ ߊ߬ ߦߋ߫ ߓߐ߫ ߟߊ߫ ߕߎߞߘߐߟߊ ߡߍ߲ ߘߐ߫ ߞߊ߬ ߦߊ߲߬ ߠߊߛߐ߬ߘߐ߲߫߸ ߣߴߊ߬ ߛߐ߬ߘߐ߲ ߜߟߍ߬ߦߊ߬ ߘߊ߫ ߦߋ߲߬߸ ߏ߬ ߜߟߍ߬ߦߊ ߦߋ߫ ߛߋ߫ ߟߊ߫ ߟߋ߬ ߦߊ߲߬ ߝߣߊ߫ ߡߊ߬߸ ߏ߬ ߓߍ߯ ߕߊ߬ߣߍ߲߫ ߞߵߊ߬ ߟߊ߫ ߡߎ߲߬ ߞߊ߲߬߸ ߟߕߊ߬ߡߌ߲߬ߡߊ߬ߟߌ ߛߐ߲߬ߞߐ ߓߘߊ߫ ߜߟߍ߬ߦߊ߫ ߟߊ߬ߓߏ߬ߙߟߌ߬ߟߊ ߟߎ߫ ߓߟߏ߫߸ ߏ߬ ߞߎ߲߭ ߕߍ߫ ߘߏ߫ ߜߘߍ߫ ߘߌ߫ ߛߌߟߊ ߕߌߢߍ ߞߐ߫، ߊ߲ ߠߊ߫ ߥߙߏ߬ ߝߙߋ߬ߟߊ ߟߎ߬ ߞߊ߬ߛߌ߬ ߞߊ߲ ߕߍ߫ ߘߏ߫ ߜߘߍ߫ ߘߌ߫ ߝߊ߰ߡߊ ߟߎ߫ ߡߊ߬߸ ߏ߬ ߟߋ߬ ߦߋ߫ ߊ߬ߟߎ߫ ߘߍ߬ߡߍ߲ ߘߌ߫ ߜߟߍ߬ߦߊ ߡߍ߲߬ ߠߎ߬ ߟߊ߫.

ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.