ߍߝ.ߛߋ ߓߊߙߑߛߋߟߐߣ ߓߘߴߊ߬ ߟߊߛߋ߫ ߞߍ߲ߘߍߟߏ߲ ߣߌ߲߬ ߡߊ߬߸ ߞߏ߫ ߊ߬ ߓߘߊ߫ ߛߋ߲߬ߓߐ߫ ߋߙߐߔߎ߬ ߛߎ߳ߔߍߙ ߟߌߜ߭ ߖߊ߬ߕߋ߬ߘߐ߬ߛߌ߮ ߘߐ߫ ߛߍߣߍ߲߬ ߝߛߊߦߌ߫߸ ߏ߬ ߓߘߊ߫ ߞߍ߫ ߛߊ߲ߞߊߢߐ߯ߦߊ ߣߌ߲߬ ߟߊߢߐ߲ߢߐ߲߫ ߞߊ߲ ߘߏ߫ ߘߌ߫ ߏ߬ ߘߐ߫ ߡߎߣߎ߲߬߸ ߊ߬ߟߋ ߡߍ߲ ߠߊߘߊ߲ߣߍ߲߫ ߟߌߜ߭ ߘߍ߫ ߛ߭ߊ߲ߔߌߦߐ߲ ߛߊ߲ߞߊߢߐ߲߯ߦߊ߫ ߞߊ߲ߡߊ߬ ߞߊ߬ߣߌ߲߬.

ߟߊ߬ߛߋ߬ߟߌ ߘߏ߫ ߟߋ߬ ߞߍ߫ ߘߊ߫߸ ߞߕߊߟߊ߲ ߞߍߙߍ߲ߘߊ ߦߴߊ߬ ߦߌ߬ߘߊ߬ ߟߊ߫ ߡߍ߲ ߘߐ߫߸ ߞߏ߫ ߊ߬ߟߎ߬ ߓߘߊ߫ <<ߋߙߐߔߎ߬ ߛߎ߳ߔߍߙ ߟߌߜ߭ ߞߏߟߊߘߍ ߣߌ߫ ߞߍߙߍ߲ߘߊ ߕߐ߭ ߟߎ߬ ߟߊߟߐ߲ߠߌ߲߫ ߓߐߟߌ߫ ߞߏ ߟߊ߫.>> ߡߙߌߦߊ ߏ߬ ߓߘߊ߫ ߕߊ߬ߡߌ߲߫ ߙߋ߬ߦߊߟ ߡߊߘߙߌߘ ߕߏ߫ ߟߊ߫ ߞߋ߬ߟߋ߲߬ߠߊ߬ ߛߌ߮ ߘߐ߫߸ ߊ߬ߟߋ ߡߍ߲ ߦߋ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߞߐߡߊߓߌ߲ߓߌ߲߫ ߠߊ߫ ߓߍ߯ ߘߌ߫ ߞߊ߬ߣߌ߲߬߸ ߞߵߊ߬ ߕߵߊ߬ ߘߊߡߌߣߊ ߡߊ߬ ߤߊ߲߯ ߕߋ߲߬߸ ߊ߬ߟߎ߬ ߟߊ߫ ߞߍߙߍ߲ߘߊ ߞߊ߲ߕߌ߮ ߝߑߟߏߙߊ߲ߕߌߣߏ ߔߋ߯ߙߍߖ߭ ߕߍ߫ ߛߍ߰ ߟߴߊ߬ ߞߐߡߊߓߌ߲ߓߌ߲ ߘߐ߫.

ߛߎ߳ߔߍߙ ߟߌߜ߭ ߡߍ߲ ߦߋ߫ ߕߋ߲߬߸ ߊ߬ ߟߊߘߊ߲߫ ߘߊ߫ ߞߍߙߍ߲ߘߊ߫ ߕߊ߲ߣߌߝߌ߬ߟߊ߫ ߟߋ߬ ߓߟߏ߫ ߂߀߂߁ ߠߊ߫߸ ߊ߬ߟߎ߫ ߞߊ߬ ߞߐߡߊߓߌ߲ߓߌ߲ߠߊ ߟߎ߫ ߛߐ߬ߘߐ߲߬ ߌߞߘߐ߫߸ ߝߊ߬ߛߏ ߞߟߏߞߕߏߦߊ ߟߎ߬ ߘߐ߫߸ ߞߙߎߝߊ ߟߎ߬ ߣߌ߫ ߓߘߍ߬ߓߘߍ߬ߟߌ߬ ߝߊ߯ߡߊ ߟߎ߬ ߘߐ߫، ߞߵߊ߬ ߓߍ߲߬ ߞߐߜߊߟߌ߫ ߛߌߦߊߡߊ߲ ߡߊ߬ ߛߊ߫߸ ߊ߬ ߛߌ߲ߘߌߓߊ߯ ߛߌ߲ߝߏ߲ ߘߏ߫ ߟߎ߫ ߞߵߊ߬ߟߎ߫ ߣߍ߰ߓߐ߬ ߖߏߣߊ߫߸ ߦߏ߫ ߊߙߑߛߋߣߊߟ߸ ߗߍ߬ߟߑߛߌ߸ ߡߊ߲ߗߍߛߑߕߍ߳ߙ ߛߕߌ߸ ߡߊ߲ߗߍߛߑߕߍ߳ߙ ߦߎߣߊߦߌߕߍߘ߸ ߊߛߋ߫ ߡߌߟߊ߲߸ ߊ߬ ߣߌ߫ ߌ߲ߕߍߙ ߡߌߟߊ߲߸ ߏ߬ ߟߎ߬ ߡߊ߫ ߕߏ߫ ߊ߬ ߘߐ߫ ߝߋߎ߫߸ ߖߎ߳ߝ߭ߍ߲ߕߎ߳ߛ ߞߊ߬ ߓߐߓߊ߯ߕߐ ߟߎ߬ ߛߊ߯ߘߊ߫ ߟߋ߬ ߞߐߟߊ߫.

߂߀߂߁ ߠߊ߫߸ ߛߎ߳ߔߍߙ ߟߌߜ߭ ߣߊ߬ ߞߏ ߝߐ ߡߍ߲ ߞߍ߫ ߘߊ߫߸ ߋߙߐߔߎ߬ ߕߏ߬ߟߊ߲߬ߕߊ߲߬ ߘߍߞߙߎ ߟߎ߬ ߟߊ߫ ߞߋ߬ߟߋ߲߬ߧߊ ߋߕߘߞ (UEFA) ߞߊ߬ ߞߍߙߍ߲ߘߊ߫ ߛߌߦߊߡߊ߲߫ ߠߋ߬ ߘߐߛߌߟߊ߲߫߸ ߞߏ߫ ߊ߬ߟߎ߬ ߘߴߊ߬ߟߎ߫ ߛߋ߲߬ߓߐ߫ ߛߊ߲ߞߊߢߐ߲߯ߦߊ ߘߐ߫߸ ߞߵߊ߬ߟߎ߬ ߟߊ߫ ߕߏ߬ߟߊ߲߬ߕߊ߲߬ߠߊ ߟߎ߬ ߖߊ߲߬ߞߌ߫߸ ߏ߬ ߟߎ߬ ߕߍ߫ ߕߏߟߏ߲߫ ߝߊ߬ߛߏ ߛߘߍߞߎߘߎ߲ ߠߎ߬ ߘߐ߫، ߊߛߌߔߊ߲߫ ߞߕߌߘߊ ߞߵߊ߬  ߝߐ߫ ߏ߬ ߟߋ ߡߊ߬ ߞߐ ߢߌ߲߬ ߠߊ߫߸ ߞߏ߫ ߋߕߘߞ ߞߵߊ߬ ߘߊ߲߬ߠߊߕߊ߬ߡߌ߲߫ ߠߋ߬ ߊ߬ ߟߊ߫ ߝߊ߲߬ߞߊ ߟߊߓߊ߯ߙߊ߫ ߢߊ ߘߐ߫ ߥߊ߯ߕߌ ߏ߬ ߟߊ߫، ߓߊ߬ߙߌ߬߸ ߋߕߘߞ ߣߊ߬ ߘߊ߫ ߛߊ߬ߙߌ߬ߦߊ߬ ߡߊ߬ߝߊߟߋ߲ ߠߎ߬ ߞߍ߫ ߞߐ ߢߌ߲߬ ߠߊ߫߸ ߞߊ߬ ߛߙߊߕߌ ߏ߬ ߟߎ߬ ߛߌߦߊߡߊ߲߫ ߠߊߓߋ߬، ߏ߬ ߣߴߊ߬ ߕߊ߫߸ ߊߝ߭ߍ߲ߘߋ߫ ߛߑߔߐߙ ߞߵߊ߬ ߡߊߞߊ߬ߛߌ߫ ߊ߬ߟߎ߫ ߞߊ߬ ߂߀߂߅ ߞߏ߲ߓߌߕߌ߮ ߟߊ߫߸ ߞߏ߫ ߋߕߘߞ ߦߋ߫ ߋߙߏ ߥߟߎ߬ߡߊ߬ ߄ ߛߙߊ߬ ߣߘߐ߬ߓߍ߲ ߘߌ߫߸ ߊ߬ߟߎ߬ ߟߊ߫ ߖߊ߬ߕߋ߬ߘߐ߬ߛߌ߮ ߛߋ߲߬ߡߊ߬ߕߐߙߐ߲ߜߐ ߞߏߛߐ߲߬ ߊ߬ߟߎ߬ ߓߟߏ߫.

 ߓߊߙߑߛߊ ߞߏ߬ߣߌ߲ ߠߊ߫ ߛߋ߲߬ߓߐ߬ߟߌ ߡߍ߲ ߦߋ߫ ߕߋ߲߬߸ ߏ߬ ߓߘߊ߫ ߞߍ߫ ߛߎ߳ߔߍߙ ߟߌߜ߭ ߟߊ߫ ߞߋ߬ߟߋ߲߬ߠߊ߬ߕߏ ߟߋ߬ ߘߌ߫ ߕߋ߲߬ ߝߊߦߌߘߊ߫، ߙߋ߬ߦߊߟ ߡߊߘߙߌߘ ߞߏ߬ߣߌ߲߸ ߏ߬ ߡߴߊ߬ ߞߊ߲ ߛߐ߬ߛߐ߬߸ ߊ߬ ߞߋߟߋ߲߫ ߔߋ߫ ߟߋ߬ ߛߎ߳ߔߍߙ ߟߌߜ߭ ߞߏ ߣߌ߲߬ ߛߍ߬ߘߏ߲ ߞߊ߲߬ ߡߎ߬ߕߎ߲߬ ߝߋߝߋ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.