ߜߟߏ߬ߓߊ߬ߘߎ߰ ߦߋ߫ ߛߌ߰ߘߊ ߘߏ߫ ߟߋ߬ ߘߌ߫ ߞߡߐ߬ߘߎ߯ ߡߙߊ߬ߘߊ߬ߙߋ߲ ߞߣߐ߫߸ ߞߊߦߌߙߊߥߊ߯ߣߍ߲߫ ߡߙߊ߬ߓߊ߰ߘߊ ߞߣߐ߫، ߕߊߟߓߌ߫ ߞߊ߬ߓߊ ߟߋ߬ ߓߣߐ߬ ߘߴߊ߬ ߣߌ ߘߐ߫ ߦߋ߲߬ ߂߀߂߅ ߛߎ߲ߞߊߙߏߡߊߞߐߣߐ߲ ߠߊ߫، ߏ߬ ߟߋ ߞߕߌ ߟߊߣߍ߲߫ ߞߊߦߌߙߊߥߊ߯ߣߍ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߞߎ߲߬ߞߏ߬ߓߊ ߟߎ߬ ߞߕߌ߫ ߟߢߊ߫ ߡߊ߬، ߞߕߌ ߘߐ߫߸ ߟߊ߲߬ߛߋߦߌ߫ ߞߐ߲ߘߍ߫ ߡߍ߲ ߦߋ߫ ߡߊ߬ߝߌ߲߬ߓߊ߰ߕߐ ߘߌ߫ ߝߊ߰ߟߌ߬ ߞߏ ߣߌ߲߬ ߘߐ߫߸ ߞߕߌߘߊ ߞߵߊ߬ߟߋ ߖߊ߲߬ߞߌ߲߫ ߛߊ߲߬ ߟߏ߯ߟߎ߫ ߥߛߎ߫ ߘߊߕߎ߲߯ߣߍ߲ ߠߋ߬ ߟߊ߫߸ ߣߌ߫ ߢߊ߬ߦߌ߲߬ߘߐ߬ߓߍ߲߬ ߛߙߊ߫ ߕߍ߫، ߏ߬ ߟߋ ߦߋߣߍ߲߫ ߕߊߟߓߌ ߞߊ߬ߓߊ ߞߐߙߍ ߓߟߏ߫ <<ߤߌߣߊߒߠߊ>> ߘߌ߫ ߞߏߖߎ߯ߦߊ߫߸ ߞߵߏ߬ ߞߎ߲߭ ߞߍ߫ ߞߏ߫ ߞߍߣߍ߲ ߠߊ߫ ߖߎ߯ߦߊ ߘߌ߫، ߏ߬ ߟߋ ߘߐ߫߸ ߊ߬ߟߎ߬ ߦߴߊ߬ ߝߍ߬ ߞߵߊ߬ ߞߏ ߟߊߘߏ߲߬ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߖߐ߲߰ߛߊ߫ ߞߕߌ ߘߌ߫ ߟߊ߫ ߞߏߞߎߘߊ߫.
ߗߍ߭ ߘߋ߲ߞߍ߫ ߝߟߐ߫ ߊ߬ߟߌ߫ ߞߊ߬ߓߊ ߟߊ߫ ߝߐߟߌ߫ ߘߐ߫߸ ߓߌ߬ߟߊ߬ߒ߬ߘߐ ߣߌ߲߬ ߘߊߡߌ߬ߣߊ߬ ߘߊ߫ ߡߊ߲߬ߞߊ߲ ߘߏ߫ ߟߋ߬ ߝߍ߬ ߓߙߊ߬ߘߊ߰ ߞߏ ߘߐ߫߸ ߓߌ߲ߢߎ߯ ߥߙߌ߫ ߓߙߊߘߊ߮ ߞߊ߬ߣߌ߲߬، ߊ߬ ߞߵߊ߬ ߦߌ߬ߘߊ߬ ߞߏ߫: <<ߒ ߘߍ߬ߢߐ߲߰ߗߍ߫ ߟߋ߬ ߞߊ߬ ߓߙߊ߬ߘߊ߮ ߛߊ߲߬ ߞߊ߬ ߓߐ߫ ߊ߬ ߘߌ߫ ߞߊ߲ߞߊ߲߫ ߞߊ߬ ߣߵߊ߬ ߘߌ߫ ߒ ߡߊ߬، ߒ ߞߊ߬ ߓߙߊ߬ߘߊ߮ ߏ߬ ߟߋ ߕߏ߫ ߒ ߕߍߣߍ߲ߡߛߏ߫ ߓߘߊ، ߟߊ߬ߛߋ߬ߦߌ߬ ߦߋ߫ ߓߐ߰ߟߐ߬ߟߊ ߟߋ߬ ߘߌ߫߸ ߊ߬ ߕߘߍ߬ ߓߏ߲߫ ߟߐ ߘߏ߫ ߟߋ߬ ߞߊ߲߬ ߡߎ߬ߕߎ߲߬ ߛߊ߫، ߏ߬ ߟߎ߫ ߞߊ߬ ߓߙߊ߬ߘߊ߮ ߏ߬ ߟߋ ߕߊ߬ ߞߊ߬ ߕߋ ߥߌ߬ߙߌ߫ ߊ߬ ߟߊ߫ ߦߋ߲߬، ߥߎ߬ߙߊ ߝߍ߬ ߒߠߋ ߣߊ߬ ߘߊ߫ ߓߙߊ߬ߘߊ߮ ߞߐ߫߸ ߞߵߊ߬ ߝߐ߫ ߟߊ߲߬ߛߋߦߌ߫ ߦߋ߫ ߞߏ߫ ߊ߬ ߣߐ߬ ߓߙߊ߬ߘߊ߮ ߡߍ߲ ߕߊ߬ ߟߊ߫ ߒ ߕߍߣߍ߲ߡߛߏ߫ ߓߘߊ߸ ߒ ߕߊ ߟߋ߬، ߒ ߞߏ߫ ߊ߬ ߦߴߊ߬ ߘߌ߫ ߒ ߡߊ߬، ߓߊ߬ߙߌ߬߸ ߊ߬ ߡߊ߫ ߛߐ߲߬ ߊ߬ ߘߌ߫ ߟߊ߫ ߒ ߡߊ߬߸ ߞߏ߫ ߊ߬ ߕߊ ߟߋ߬، ߒ ߞߵߊ߬ ߦߌ߬ߘߴߊ߬ ߟߊ߫ ߒ ߞߏ߫ ߣߴߊ߬ ߕߊ ߟߋ߬߸ ߊ߬ ߦߴߊ߬ ߦߌ߬ߘߊ߬ ߒ ߠߊ߫ ߒ ߧߴߊ߬ ߦߋ߫، ߓߊߏ߬߸ ߒ ߢߊߣߐ ߦߴߊ߬ ߡߊ߬، ߊ߬ ߡߊ߫ ߛߐ߲߬، ߒߠߠߋ ߞߵߊ߬ ߦߌ߬ߘߴߊ߬ ߟߊ߫ ߝߣߊ߫ ߒ ߡߐ߱ ߕߍ߫ ߘߏ߲߬ ߠߊ߫ ߡߐ߱ ߟߎ߬ ߞߐ߫ ߓߏ߲ ߠߊ߫ ߞߊ߬ ߝߋ߲ ߕߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߤߊߟߌ߬ ߡߍ߲ ߕߍ߫ ߏ߬ ߘߌ߫߸ ߊ߬ ߘߴߏ߬ ߕߊ߬߸ ߏ߬ ߗߍ߬ ߕߴߦߋ߲߬ ߡߍ߲ ߘߴߊ߬ߟߋ ߟߊߟߐ߬.>> ߊ߬ߟߌ߫ ߞߊ߬ߓߊ ߟߋ߬ ߣߌ߲߬ ߢߊߝߐ ߞߊ߲߬ ߕߋ߲߬.
ߞߵߊ߬ ߟߊߥߟߌ߬ ߞߏ ߘߐߛߎߡߊ ߡߊ߬߸ ߓߏ߲߫ ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߘߌ߫ ߓߙߊ߬ߘߊ߮ ߢߐ߲߱ ߛߙߊ߬، ߓߊ߬ߙߌ߬߸ ߏ߬ ߟߊ߫ ߘߐ߬ߝߘߊ߬ߟߌ ߏ߬ ߢߊ߬ߞߏ߬ ߡߊ߫ ߞߍ߫ ߊ߬ ߘߐ߫.
ߏ߬ ߘߎ߰ߛߊ ߜߍ߫ ߘߊ߫ ߞߎߣߎ߲ߟߏ߲ ߡߍ߲ ߠߊ߫߸ ߏ߬ ߣߌ߫ ߞߢߐߞߏ ߘߏ߫ ߟߋ߬ ߞߊ߬ ߢߐ߲߯ߓߍ߲߬ ߛߏ ߞߣߐ߫ ߦߋ߲߬، ߊ߬ߟߌ ߞߊ߬ ߔߏߔߏ ߘߴߊ߬ ߘߐ߯ߞߍ߫ ߡߊ߬߸ ߞߏ߫ ߊ߬ ߦߋ߫ ߥߊ߫ ߏ߬ ߟߊߟߐ߬߸ ߛߴߊ߬ߟߎ߬ ߘߌ߫ ߥߊ߫ ߞߢߐߕߊ߫ ߦߌߟߊ ߖߐ߭ ߘߐ߫، ߏ߬ ߞߐߛߊ߬ߦߌ߲߬ߕߐ߬ߟߊ ߟߋ߬ ߟߊߟߐ߬ ߘߊ߫ ߎߛߑߡߊߣߌ߲߬ ߓߟߏ߫ ߛߌߟߊߕߍ߫߸ ߏ߬ ߦߋ߫ ߡߊ߬ߝߌ߲߬ߓߊ߰ߕߐ ߞߘߐ߬ߞߍ߫ ߟߋ߬ ߘߌ߫، ߏ߬ ߞߊ߬ ߣߊ߬ߣߌ߲߬ߠߌ߲߬ ߞߏ߬ ߞߎߡߊ ߘߏ߫ ߟߎ߫ ߟߋ߬ ߟߊߓߐ߫ ߊ߬ߟߌ ߘߐ߯ߞߍ߫ ߡߊ߬. ߛߙߋߦߊ ߞߵߊ߬ ߦߌ߬ߘߊ߫ ߒ߬ ߠߊ߫ <<ߊ߬ ߞߐߛߊ߬ߦߌ߲߬ߕߐ߬ߟߊ߸ ߎߛߑߡߊߣߌ߲߬ ߞߘߐ߬ߞߍ߫ ߞߊ߬ ߛߌߟߊ ߕߍ߰ ߊ߬ ߦߋ߫߸ ߞߵߊ߬ ߦߌ߬ߘߴߊ߬ ߟߊ߫ ߞߏ߫ ߏ߬ ߕߘߍ߬ ߣߊ߬ߣߌ߲߬ߠߌ߲߬ ߡߍ߲ ߠߎ߬ ߞߊ߲߬ ߞߎߣߎ߲߬߸ ߏ߬ ߦߴߏ߬ ߡߊߛߊ߬ߦߌ߲߬ ߓߊ߫، ߒ ߘߐ߯ߞߍ߫ ߜߊ߬ߛߌ߬ ߘߴߊ߬ ߞߎ߲߭ ߘߐ߫ ߝߏ߫ ߞߵߊ߬ ߞߎ߲߭ ߛߐ߰، ߒߠߋ ߝߣߊ߫ ߣߊ߬ ߘߊ߫.>> ߛߙߋߦߊ ߟߋ߬ ߞߊ߲߫ ߕߋ߲߬߸ ߊ߬ߟߌ߫ ߞߊ߬ߓߊ.
ߕߊߟߓߌ߫ ߞߊ߬ߓߊ ߣߐ߬ ߡߊ߲߬ߞߊ߲ ߏ߬ ߟߋ ߡߍ߲߫ ߠߊ߫߸ ߏ߬ ߣߊ߬ ߘߊ߫ ߘߌ߲߬ߞߌߙߊ ߘߐ߫ ߊ߬ ߘߋ߲ ߠߎ߬ ߡߊߛߓߊߙߌ߫ ߞߊ߲ߡߊ߬، ߓߊ߬ߙߌ߬ ߥߊ߯ߕߌ ߏ߬ ߟߋ ߟߊ߫߸ ߟߊ߲߬ߛߋ߬ߦߌ߬ ߞߐ߲ߘߍ߫ ߓߏ߬ߙߌ߬ߡߍ߬ߣߍ߲߬ߕߐ ߣߌ߫ ߡߎ߬ߙߎ ߞߵߊ߬ ߞߎ߲߬ߓߐ߫، <<ߎߛߑߡߊߣߌ߲߫ ߕߐ߮ ߘߏ߫ ߓߍ߫߸ ߏ߬ ߞߵߊ߬ ߓߏ߬ߙߌ߫ ߞߵߊ߬ ߟߊߓߍ߲߬߸ ߛߴߊ߬ ߘߴߊ߬ ߟߊߟߐ߬ ߢߊ ߡߍ߲ ߡߊ߬، ߏ߬ ߞߊ߲߫ ߊ߬ ߡߊ߬ ߞߏ߫ ߊ߬ ߦߴߊ߬ ߟߐ߬، ߓߊ߬ߙߌ߬ ߟߊ߲߬ߛߋߦߌ߫ ߞߵߏ߬ ߕߍ߰ ߡߎ߬ߙߎ ߟߊ߫߸ ߞߵߊ߬ ߓߏ߬ߙߌ߫ ߞߊ߬ ߥߊ߫ ߗߍ߬ߡߐ߰ߓߊ ߛߐ߰ ߊ߬ ߞߊ߲ ߝߍ߬، ߏ߬ ߛߊ߬ ߘߴߊ߬ ߣߐ߭ ߘߐ߫ ߦߋ߲߬ ߠߋ߬ ߌߞߘߐ߫.>> ߊ߬ߟߌ߫ ߞߊ߬ߓߊ ߞߵߏ߬ ߝߙߊ߬ ߞߎߡߊ ߞߊ߲߬.
ߡߊ߬ߛߎߓߊ ߏ߬ ߟߋ ߞߐ ߘߐ߫߸ ߕߊߟߓߌ߫ ߞߊ߬ߓߊ ߘߋ߲ ߠߎ߬ ߕߊ߬ ߘߊ߫ ߞߊ߬ ߥߴߊ߬ߟߎ߬ ߘߌ߫ ߛߏߕߌ߯ ߗߍߡߐ߮ ߓߘߊ، ߡߙߊ߬ߓߊ߰ߘߎ߯ߟߊ ߣߌ߫ ߞߊ߬ߝߏ߬ߙߋ߲߬ߕߌ߮߸ ߏ߬ ߟߎ߫ ߣߊ߬ ߘߊ߫ ߘߌ߲߬ߞߌߙߊ ߘߐ߫ ߦߋ߲߬ ߌߞߘߐ߫߸ ߞߏ ߟߎ߬ ߘߐߛߎߡߊ߫ ߞߊ߲ߡߊ߬، ߎߛߑߡߊߣߌ߲߬ ߣߌ߫ ߟߊ߲߬ߛߋߦߌ߫ ߡߌ߬ߣߊ߬ ߘߊ߫߸ ߓߊ߬ߙߌ߬ ߟߊ߲߬ߛߋ߬ߦߌ߬ ߞߋߟߋ߲߫ ߔߋ߫ ߟߋ߬ ߟߊߕߊ߯ ߘߊ߫ ߞߊߦߌߙߊߥߊ߯ߣߍ߲߫ ߥߛߎߖߌ߲ߓߊ ߟߊ߫.
ߟߏ߲߫ ߞߋߟߋ߲߫ ߠߋ߬ ߞߍ߫ ߘߊ߫ ߡߎ߬ߕߎ߲߬߸ ߞߐߙߍ ߡߊߞߟߌ߫ ߘߊ߫ ߞߏ߫ ߊ߬ߟߎ߬ ߦߋ߫ ߣߊ߬ ߞߊߦߌߙߊߥߊ߯ߣߍ߲߫߸ ߞߵߊ߬ߟߎ߬ ߘߊߘߐߢߌ߬ߣߌ߲߬ߞߊ߬، ߓߊ߬ߙߵߊ߬ߟߎ߬ ߛߋ ߞߣߍ ߞߊ߲߬߸ ߊ߬ߟߎ߫ ߞߵߊ߬ ߦߋ߫ ߞߏ߫ ߘߊߘߐߢߌߣߌ߲ߞߊߟߌ߫ ߜߊ߲ߛߊ߲߫ ߕߍ߫߸ ߞߕߌ ߟߋ߬ ߜߎ ߦߴߌߘߐ߫߸ ߞߵߊ߬ ߛߐ߬ߘߐ߲߬ ߤߊߟߌ߬ ߟߊ߬ߝߛߊ߬ߟߌ߬ߟߊ߬ ߕߴߊ߬ߟߎ߬ ߓߟߏ߫، <<ߊ߬ߟߎ߫ ߞߵߊ߲ ߞߟߌ߫ ߟߋ߬ ߞߏ߫ ߊ߲ ߧߋ߫ ߣߊ߬ ߞߊߦߌߙߊߥߊ߯ߣߍ߲߫ ߞߵߊ߲ ߠߊߥߟߍ߫، ߊ߲ ߛߋ ߦߋ߲߬߸ ߊ߲ ߞߵߊ߬ ߦߋ߫ ߞߏ߫ ߟߊ߬ߥߟߍ߬ߟߌ߬ ߕߍ߫߸ ߞߕߌ ߟߋ߬، ߟߊ߬ߝߛߊ߬ߟߌ߬ߟߊ߫ ߘߏ߲߬ ߕߴߊ߲ ߓߟߏ߫.>> ߗߍ߭ ߘߋ߲ߞߍ߫ ߝߟߐ ߟߋ߬ ߞߊ߲߫ ߕߋ߲߬.
ߞߕߌ߫ ߘߊߞߎ߲ ߘߐ߫ ߦߋ߲߬߸ ߡߊ߬ߝߌ߲߬ߓߊ߰ߕߐ ߞߵߊ߬ ߟߐ߬ ߊ߬ ߛߐ߲߭ ߠߊ߫߸ ߞߊ߬ ߦߝߊ߬ ߕߙߊ ߞߍ߫، ߞߕߌߞߊ߲ߘߊ ߞߵߊ߬ ߦߌ߬ߘߴߊ߬ ߟߊ߫ ߡߌ߬ߣߊ߬ ߞߊ߲߬ ߝߐ ߘߐ߫߸ ߞߏ߫ ߞߊ߬ ߛߊ߲߬ ߃߀ ߟߊ߫ ߟߊ߲߬ߛߋߦߌ߫ ߞߎ߲߬߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߂߀ ߢߍ߬ߦߌ߲، ߡߊ߬ߞߊ߲߬ߞߊ߲߬ߠߌ߲ ߞߵߊ߬ ߦߌ߬ߘߊ߬ ߞߏ߫ ߏ߬ ߞߊ߫ ߛߌߦߊ߫.
ߒ߬ߓߊ߬߸ ߞߕߌ ߕߍ߰ ߞߏ ߟߐ߯ߟߊ߫ ߘߊ߫ ߞߵߊ߬ ߕߏ߫ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߀ ߠߊ߫߸ ߏ߬ ߡߍ߲ ߓߍ߲߬ ߘߊ߫ ߛߌ߬ߣߌ߲߬ߟߏ߲ ߡߊ߬، ߞߕߌߞߊ߲ߘߊ ߞߊ߬ ߟߊ߲߬ߛߋߦߌ߫ ߞߐ߲ߘߍ߫ ߖߊ߲߬ߞߌ߲߫ ߛߊ߲߬ ߟߏ߯ߟߎ߫ ߥߛߎ߫ ߘߊߕߎ߲߯ߣߍ߲ ߠߋ߬ ߟߊ߫߸ ߣߌ߫ ߢߍ߬ߦߌ߲߬ߘߐ߬ߓߍ߲߬ ߛߙߊ߫ ߕߍ߫.
ߊ߬ߟߌ߫ ߞߊ߬ߓߊ ߞߵߊ߬ ߦߌ߬ߘߊ߬ ߞߏ߫ <<ߒ ߝߊ߬ ߟߋ߬ ߝߊ߰ߣߍ߲߬، ߊ߲ ߡߊ߫ ߓߍ߲߬ ߞߕߌ߫ ߕߍ߰ߣߍ߲ ߡߊ߬، ߊ߲ ߧߴߊ߬ ߝߍ߬ ߞߵߊ߬ ߞߏ ߟߊߕߊ߯ ߞߊ߲ߞߊ߲߫.>> ߊ߬ ߞߵߊ߬ ߛߌߞߊ߫ ߦߙߐ ߘߏ߫ ߦߌ߬ߘߊ߬߸ ߞߵߊ߬ ߓߍ߲߬ ߓߟߏߞߏ ߝߊ߲߬ߝߍ߬ߟߊ ߡߊ߬، <<ߡߊ߬ߝߌ߲߬ߓߊ߰ߕߐ ߟߊ߫ ߡߐ߱ ߟߎ߬ ߞߵߊ߬ߟߎ߬ ߓߟߏߡߟߊ߫ ߥߊߘߌ߫ ߞߏ ߟߋ߬ ߡߊ߬، ߊ߬ ߘߌ߫ ߛߋ߫ ߞߍ߫ ߟߊ߫߸ ߊ߬ߟߎ߫ ߞߊ߬ ߟߊ߬ߝߛߊ߬ߟߌ߬ߟߊ ߟߎ߫ ߛߊ߬ߙߴߊ߬ ߞߏ ߘߐ߫.>> ߊ߬ߟߌ߫ ߞߊ߬ߓߊ ߞߵߏ߬ ߝߐ߫߸ ߊ߬ ߞߏ߬ߣߌ߲ ߡߊ߫ ߘߊ߬ߟߎ߫ ߦߌ߬ߘߊ߫ ߒ߬ߠߎ߬ ߟߊ߫ ߞߵߊ߬ ߓߍ߲߬ ߦߙߐ ߏ߬ ߕߌ߯ߕߌ߯ߦߊ ߡߊ߬.
ߊ߲ ߠߊ߫ ߛߍߝߍ߲ߘߊ ߟߊ߫ ߞߟߌߟߌ ߛߋ߫ ߘߊ߫ ߞߊߦߌߙߊߥߊ߯ߣߍ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߡߊ߬߸ ߝߊ߭ߦߊ߬ ߝߊ߲߬ߛߌ߬ߣߊ߬ߘߎߣߏ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ <<ߞߕߌߕߍ߰ ߘߊ߫ ߛߊ߬ߙߌ߬ߦߊ ߟߋ߬ ߟߊ߫.>> ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ <<ߝߊ߰ߓߊ߰ߕߐ ߕߊߟߓߌ߫ ߞߊ߬ߓߊ ߞߐߦߌ߬ߘߊ߬ ߘߴߊ߬ ߘߋ߲ߞߍ߫ ߝߟߐ ߖߍ߬ߘߍ ߟߋ߬ ߓߟߏ߫، ߡߙߌߘߐ ߡߍ߲ ߕߊ߬ ߘߊ߫߸ ߊ߲ߠߎ߬ ߞߵߏ߬ ߦߋ߫ ߛߊ߬ߙߌ߬ߦߊ ߞߣߐ߫ ߞߎߡߊ ߟߋ߬ ߞߌ߫ ߝߋߎ߫، ߛߊ߲߬ ߟߏ߯ߟߎ ߟߊߣߍ߲ ߡߐ߱ ߞߎ߲߬ ߞߎ߲߬ߞߏ߬ߓߊ ߞߏߛߐ߲߬߸ ߏ߬ ߕߍ߫ ߞߊߙߏ߫ ߟߏ߯ߟߎ߫ ߘߌ߫ ߘߋ߬.>>
ߒ߬ߓߊ߬߸ ߕߊߟߓߌ ߞߊ߬ߓߊ ߟߊ߫ ߡߐ߱ ߟߎ߫ ߞߏ߬ߣߌ߲ ߣߐ߬ ߓߐߘߊ ߡߍ߲ ߦߋ߫ ߟߊ߫ ߡߎ߬ߣߎ߲߬߸ ߏ߬ ߟߋ ߊ߬ߟߎ߬ ߟߊ߫ ߞߕߌ ߟߊߘߏ߲߭ ߘߌ߫ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߟߊ߫߸ ߛߊ߫ ߢߊ ߘߌ߫ ߡߊߖߌ߰ ߣߌ߲߬ ߞߏ ߞߘߐ߫ ߞߏߞߎߘߊ߫، ߣߌ߫ ߡߍ߲ ߓߐ߫ ߘߴߊ߬ ߘߐ߫߸ ߊ߲ ߓߍߣߵߏ߬ ߞߌ߬ߦߴߊߟߎ߫ ߡߊ߬ ߒ߬ ߠߊ߫ ߟߌ߬ߤߟߊ߫ ߣߊ߬ߕߐ ߟߎ߬ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.