ߓߌ߬ߟߊ߬ߒ߬ߘߐ ߡߍ߲ ߕߊ߬ߡߌ߲߬ ߘߊ߫ ߛߙߊ߬ߟߏ߲߬ ߣߌ߫ ߖߌ߬ߣߍ߫ ߖߡߊ߬ߣߊ ߓߐߕߏ߲ ߠߊ߫ ߞߏ߲ߞߏߜߍ ߕߋ߬ߟߋ߫ ߂߂ ߡߊ߬߸ ߏ߬ ߓߘߊ߫ ߘߐߛߎߡߊ߫ ߘߊߘߐߖߊߥߏ ߟߊ߫، ߛߙߊ߬ߟߏ߲߬ߞߊ߫ ߡߐ߰ ߁߆ ߡߍ߲ ߠߎ߬ ߦߋ߫ ߣߌ߲߬߸ ߣߊ߲߬ߕߌ߮ ߟߎ߬ ߦߴߊ߬ߟߎ߬ ߘߐ߫߸ ߕߐ߲ߓߟߏߡߊ ߟߎ߬ ߦߴߊ߬ߟߎ߬ ߘߐ߫، ߒ߬ߓߊ߬߸ ߓߟߏ߫ ߓߘߊ߫ ߓߐ߫ ߊ߬ߟߎ߬ ߘߐ߫ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߇ ߣߌ߲߬ ߡߊ߬، ߏ߬ ߟߊ߬ߛߋ߬ߟߌ ߞߍ߫ ߘߊ߫ ߛߙߊ߬ߟߏ߲߫ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߘߎ߰ߘߋ߲ ߖߏ߯ߘߏ߲ ߞߏߕߌ߯ߘߊ ߟߋ߬ ߓߟߏ߫.

ߛߙߊ߬ߟߏ߲߬ ߞߏߕߌ߯ߘߊ ߣߌ߲߬ ߞߵߊ߬ ߟߊߛߋ߫ ߘߍ߬ߞߙߏߝߏ ߞߊ߲߬ ߞߏ߫ <<ߟߊ߬ߞߊ߲߬ߘߊ߬ߟߌ ߥߛߊ߬ߘߊ߬ߕߌ߮ ߡߍ߲ ߠߎ߬ ߡߌ߬ߣߊ߬ ߘߊ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߟߎ߬ ߓߟߏ߫߸ ߏ߬ ߓߘߊ߫ ߘߌ߫ ߛߙߊ߬ߟߏ߲߫ ߡߊ߬.>> ߊ߬ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߞߵߊ߬ߟߎ߬ ߓߍ߯ ߟߊߛߐ߬ߘߐ߲߬ <<ߊ߬ߟߎ߬ ߞߍ߲ߘߍ߫߸ ߞߏ߫ ߕߴߊ߬ߟߎ߬ ߟߊ߫.>> ߏ߬ ߟߋ ߞߐߝߍ߬ ߕߎ߬ߡߊ߬ߙߋ߲߬ ߘߊ߲ߘߐ߫߸ ߊ߬ߟߋ߬ ߞߏߕߌ߯ߘߊ ߞߊ߬ ߣߊ߲߬ߕߌ߯ ߡߌ߬ߣߊ߬ߣߍ߲ ߏ߬ ߟߎ߫ ߖߌ߬ߦߊ߬ߓߍ ߟߎ߬ ߟߊߖߍ߲ߛߍ߲߫߸ ߞߵߊ߬ ߛߐ߬ߘߐ߲߲߬ ߛߙߊ߬ߟߏ߲߫ ߞߏߕߌ߮ ߡߍ߲ ߘߐ߱ߘߏ߲߬ߣߍ߲߫ ߕߎ߲ߞߊߙߊ߲ߞߋ ߟߎ߬ ߟߊ߫ ߞߏ ߟߊ߫߸ ߊ߬ ߣߌ߫ ߞߐߞߊ߲߫ ߓߊ߯ߙߊߢߐ߲߯ߦߊ ߟߎ߬߸ ߏ߬ ߢߊ ߦߋ߫ ߜߍ ߘߐ߫߸ ߊ߬ߟߋ ߡߍ߲ ߕߐ߯ ߞߏ߫ ߊ߬ߟߊߖߌ߬ ߕߌ߬ߡߐߕߌ߬ ߞߊ߬ߓߊ.

ߖߌ߬ߣߍ߬ ߞߐߞߊ߲ߞߏ ߟߎ߬ ߞߏߕߌ߮ ߞߵߊ߬ ߦߌ߬ߘߊ߬ ߞߏ߫: <<ߖߡߊ߬ߣߊ߫ ߝߌ߬ߟߊ ߓߘߊ߫ ߓߍ߲߬ ߊ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߥߛߊ߬ߓߊ߰ߦߊ ߘߏ߫ ߛߏ߯ߙߏ߫ ߢߐ߲߯ ߝߍ߬߸ ߡߍ߲ ߠߎ߬ ߘߌ߫ ߕߏ߫ ߓߐߕߏ߲߫ ߠߊ߫ ߝߙߋߞߋ ߟߎ߬ ߘߐߢߌߡߌ߲߫ ߠߊ߫ ߛߐ߲߬߸ ߖߐ߲߰ߛߊ߫ ߞߛߌ߫ ߘߌ߫ ߞߍ߫ ߓߌ߬ߟߊ߬ߒ߬ߘߐ߬ ߜߘߍ߫ ߟߎ߫ ߡߊ߬.>> ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߟߋ߬ ߞߵߏ߬ ߝߐ߫߸ ߊ߬ߟߋ ߡߍ߲ ߘߐ߱ߘߏ߲߬ߣߍ߲߫ ߖߌ߬ߣߍ߬ ߕߎ߲ߞߊߙߊ߲ߞߋ ߟߎ߬ ߟߊ߫ ߞߏ ߟߊ߫.

ߊߟߎ߫ ߦߴߊ߬ ߟߐ߲߫߸ ߛߙߊ߬ߟߏ߲߫ ߕߍߓߊ߯ߦߊ ߞߏߕߌ߮ ߘߏ߲߬ ߘߊ߫ ߞߐߣߊߞߙߌ߫ ߓߌߟߏ߲߫ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߊ߬ ߣߌ߫ ߗߋߘߋ߲߫ ߛߌߦߊߡߊ߲߫ ߠߋ߬ ߣߊ߬ ߘߊ߫߸ ߛߴߊ߬ߟߎ߬ ߟߊ߫ ߕߐ߲߫ ߓߟߏߡߊ ߢߌ߲߬ ߠߎ߬ ߘߌ߫ ߓߌ߬ߟߊ߬ ߢߊ ߡߍ߲ ߡߊ߬߸ ߡߍ߲ ߠߎ߬ ߡߌ߬ߣߊ߬ ߘߊ߫ ߓߌ߬ߟߊ߬ߒ߬ߘߐ ߘߏ߫ ߞߐߝߍ߬ ߛߙߊ߬ߣߏ߲߬ ߣߌ߫ ߖߌ߬ߣߍ߬ ߓߐߕߏ߲ ߠߊ߫، ߊ߬ ߘߏ߲߬߸ ߖߡߊ߬ߣߊ߫ ߝߌ߬ߟߊ ߣߌ߲߬ ߛߌ߫ ߡߴߊ߬ ߟߐ߬ ߊ߬ ߟߊ߫߸ ߞߏ߫ ߝߍ߭ ߦߴߊ߬ߟߎ ߟߋ߬ ߝߍ߬، ߊ߬ߟߎ߬ ߟߊ߫ ߞߎߡߊ߫ ߝߐߣߍ߲ ߠߎ߬ ߡߊ߫ ߥߊ߫ ߛߌߟߊ߫ ߞߋߟߋ߲߫ ߞߊ߲߬ ߢߊ߫ ߛߌ߫ ߡߊ߬.

ߓߊߏ߬߸ ߗߋߛߓߍ ߟߊߖߍ߲ߛߍ߲߫ ߘߊ߫ ߛߙߊ߬ߟߏ߲߫ ߞߎ߲߬ߠߊ߬ߛߌ߮ ߓߟߏ߫ ߞߏ߲ߞߏߜߍ ߕߋ߬ߟߋ߫ ߂߄ ߡߊ߬߸ ߏ߬ ߟߎ߫ ߞߊ߬ ߖߌ߬ߣߍ߫ ߛߏ߬ߙߌ߬ߡߊ߬ߘߋ߲ ߠߎ߬ ߟߋ߬ ߖߙߊ߬ߞߌ߬ ߞߏߛߓߍ߫߸ ߞߏ߫ ߊ߬ߟߎ߬ ߓߘߊ߫ ߘߏ߲߬ ߊ߬ߟߎ߬ ߟߊ߫ ߘߎ߰ߞߟߏ ߞߊ߲߬߸ ߞߵߊߟߎ߬ ߣߊ߲߬ߕߌ߮ ߘߏ߫ ߟߎ߫ ߣߴߊ߬ߟߎ߬ ߓߟߏߝߋ߲ ߠߎ߬ ߡߌ߬ߣߊ߬߸ ߊ߬ ߣߌ߫ ߕߐ߲ߓߟߏߡߊ ߘߏ߫ ߟߎ߫، ߛߙߊ߬ߟߏ߲߫ ߞߎ߲߬ߠߊ߬ߛߌ߮ ߟߊ߫ ߝߐߟߌ߫ ߘߐ߫߸ ߓߌ߬ߟߊ߬ߒ߬ߘߐ ߣߌ߲߬ ߞߍ߫ ߘߊ߫ ߞߊߟߌߦߙߋ߫ ߟߋ߬߸ ߝߟߊ߬ߓߊ߫ ߣߐ߬ߘߎ߮ ߘߐ߫ (ߛߙߊ߬ߟߏ߲߬ ߞߣߐ߫)، ߊ߬ߟߎ߬ ߞߊ߲߫߸ ߞߏ߫ ߊ߬ߟߎ߫ ߞߊ߬ ߞߙߎ߫ ߓߊ߬ߛߊ߲߬ߣߍ߲ ߘߏ߫ ߟߎ߫ ߟߋ߬ ߟߊߕߊ߯ ߦߋ߲߬߸ ߞߊ߬ ߕߊ߯ ߕߏ߬ߝߊ߬ ߜߊ߬ߛߌ߬ ߞߊ߲ߡߊ߬ ߛߊ߫ ߞߵߊ߬ߟߎ߬ ߟߊ߫ ߓߐߕߏ߲߫ ߘߌ߲ߞߌߙߊ ߘߏ߫ ߟߐ߬߸ ߞߵߊ߬ߟߎ߬ ߓߟߏߡߊߘߍ߬ߡߍ߲߬ ߦߙߐ ߟߊߞߊ߲ߘߊ ߘߐ߫.

ߓߊ߬ߙߌ߬߸ ߖߌ߬ߣߍ߫ ߞߎ߲߬ߠߊ߬ߛߌ߮ ߡߊ߫ ߕߏ߫ ߡߊ߬ߞߎ߲߬ ߘߐ߫߸ ߊ߬ߟߎ߫ ߞߊ߬ ߞߎߡߊ ߏ߬ ߥߎߦߊߒߕߋߦߊ߫ ߟߋ߬، ߖߌ߬ߣߍ߫ ߣߊ߲߬ߕߌ߰ ߘߊ߯ߘߐ ߞߎ߲߬ߕߌ߮ ߞߊ߲߫ ߞߏ߫ ߛߙߊ߬ߟߏ߲߫ ߣߊ߲߬ߕߌ߮ ߟߎ߫ ߘߏ߲߬ ߘߊ߫ ߖߌ߬ߣߍ߫ ߘߎ߰ߞߟߏ ߞߊ߲߬ ߛߊ߬ߙߌ߬ߦߊ߬ ߛߐߛߐ ߘߌ߫، ߖߌ߬ߣߍ߫ ߣߊ߲߬ߕߌ߮ ߟߎ߬ ߞߊ߲߫߸ ߞߏ߫ ߊ߬ߟߎ߫ ߘߏ߲߬ ߘߊ߫ ߞߎ߬ߘߊ߰߰ߦߊ߫ ߘߎ߱ ߟߋ߬ ߞߣߐ߫߸ ߞߵߊ߬ ߛߐ߬ߘߐ߲߬ ߖߡߊ߬ߙߌ߬ ߝߏߦߌ߬ ߡߊ߫ ߘߴߊ߬ߟߎ߫ ߡߊ߬، ߞߎ߬ߘߊ߰ߦߊ߫ ߏ߬ ߦߋ߫ ߛߊ߲߬ߘߋ߬ߣߌ߬ߦߊ߫ ߟߋ߬ ߘߐ߫߸ ߝߙߊߣߊ߫ ߡߙߊ߬ߓߊ߰ߘߊ ߞߣߐ߫، ߖߌ߬ߣߍ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߘߏ߲߬ ߘߊ߫ ߦߋ߲߬߸ ߞߊ߬ ߜߊ߮ ߕߘߎ߫߸ ߞߵߊ߬ߟߎ߬ ߟߊ߫ ߖߏ߲߬ߖߏ߲ ߛߘߌ߬.

ߏ߬ ߟߋ ߞߏߛߐ߲߬߸ ߖߌ߬ߣߍ߫ ߣߊ߲߬ߕߌ߮ ߟߎ߬ ߕߊ߯ ߘߊ߫ ߦߙߐ ߏ߬ ߘߐ߫߸ ߞߊ߬ ߛߙߊ߬ߟߏ߲߫ ߛߏ߬ߙߌ߬ߡߊ߬ߘߋ߲߬ ߁߆ ߏ߬ ߟߎ߫ ߡߌ߬ߣߊ߬߸ ߊ߬ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬، ߓߊ߬ߙߌ߬߸ ߢߐ߲߯ ߡߊߝߌ߲ ߏ߬ ߓߍ߯ ߞߐ ߘߐ߫߸ ߊ߬ ߞߏ ߟߊߓߊ߲߫ ߘߊ߫ ߡߌ߬ߣߊ߬ ߝߊ߲߬ ߞߋߟߋ߲߫ ߛߐ߬ߘߐ߲ ߡߵߊ߬ ߟߊ߫߸ ߞߏ ߟߎ߬ ߓߘߊ߫ ߛߌ߰ ߞߟߊ߬ ߞߋߟߋ߲߫ ߞߊ߲߬ ߡߎ߬ߕߎ߲߬߸ ߖߡߊ߬ߣߊ߫ ߝߌ߬ߟߊ ߟߊ߫ ߘߊߘߐߖߊߥߏ ߟߎ߬ ߞߐߝߍ߬.

ߊߟߎ߫ ߦߴߊ߬ ߟߐ߲߫߸ ߝߐߢߐ߲߯ߞߐ ߣߌ߲߬ ߞߍߣߍ߲߫ ߦߙߐ ߡߍ߲ ߘߐ߫ ߕߋ߲߬߸ ߊ߬ ߛߊ߲߭ ߡߎ߬ߥߊ߲߬ ߣߌ߫ ߞߐ ߟߋ߬ ߕߋ߲߬߸ ߖߌ߬ߣߍ߬ ߣߌ߫ ߛߙߊ߬ߟߏ߲߬ ߦߋ߫ ߢߐ߲߯ ߡߊߝߐߦߌ߲ߝߐߦߌ߲ ߞߊ߲߬ ߦߋ߲߬.

ߛߙߊ߬ߟߏ߲߫ ߘߏ߲߬ ߣߌ߫ ߖߌ߬ߣߍ߬ ߓߐߕߏ߲ ߥߊߣߍ߲߫ ߠߋ߬ ߤߊ߲߯ ߞߎߘߍ߫ ߇߀߀ ߖߊ߬ߕߋ߬، ߊ߬ߟߎ߬ ߦߋ߫ ߛߌ߲߬ߝߏ߲߬ߘߊ߬ ߛߌߦߊߡߊ߲߫ ߠߋ߬ ߝߣߊ߫ ߘߐ߫ ߞߋߟߋ߲ߘߌ߫߸ ߦߏ߫ ߛߘߋߦߊߥߏ ߣߌ߫ ߡߊߣߏ߫ ߓߊ ߞߋ߬ߟߋ߲߬ߧߊ߸ ߊ߬ߟߎ߬ ߣߌ߫ ߜߋ߲ߞߐ߰ߖߌ߬ߘߊ ߣߌ߫ ߟߊߓߙߌߦߊ߫ ߟߎ߬ ߓߍ߯ ߟߵߏ߬ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.