ߢߣߊߕߊߟߌ ߞߐߝߟߌ߫ ߓߊ߲ߝߟߍ߬ߟߍ ߟߊߥߊ߲߬ߞߊ߲ ߞߐ ߘߐ߫ ߕߎ߬ߡߊ߬ߙߋ߲߬ ߘߊ߲ߘߐ߫ ߟߊ߫߸ ߣߌ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߎߘߊ߲߫ ߘߊ߫ ߞߊ߲ߧߊ߫ %߈߆،߇߂، ߒ߬ߓߊ߬߸ ߞߊ߲ߕߌ߮ ߞߊ߬ ߛߙߊ߬ߣߎ߲ ߕߊ߬ ߞߊ߯ߙߌ ߣߌ߲߬ ߡߊ߬߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߄، ߊ߬ ߟߊ߫ ߓߋߟߋ߲ߠߊ ߣߌ߲߬ ߡߊ߫ ߖߊ߲߰ߧߊ߫߸ ߓߊ߬ߙߴߊ߬ ߖߌ߲ߘߊ߲ ߥߙߊ߬ ߘߊ߫، ߓߊߏ߬߸ ߊ߬ ߞߍ߫ ߘߊ߫ ߞߏߢߌߡߊߟߐ߲ ߓߋߟߋ߲ߠߊ ߟߋ߬ ߘߌ߫߸ ߊ߬ ߣߌ߫ ߞߍߞߋߟߋ߲ߘߌ ߣߊ߬ߕߊ߸ ߞߵߏ߬ ߟߴߊ߬ ߦߌ߬ߘߊ ߞߊ߲߬ ߞߏ߫ ߊ߬ ߓߌߣߍ߲߫ ߛߊ߲߬ ߥߐߙߐ߲ߝߌ߬ߟߊ߫ ߣߊ߬ߕߐ ߓߊ߯ߙߊ ߟߊ߫.
ߞߕߌߖߌ߲ ߛߊ߲ߘߐߕߊ ߓߊ߲ ߞߐ ߖߌ߬ߣߍ߬ ߂߀߂߅ ߞߏߟߌ߲ߞߏߟߌ߲ ߂߈ ߞߊ߲ߕߌ߯ ߢߣߊߕߊߟߌ ߞߐߝߟߌ߫ ߓߊ߲ߝߟߍ߬ߟߍ ߟߊߥߊ߲߬ߞߊ߲߬ ߠߊ߫߸ ߕߎ߬ߡߊ߬ߙߋ߲߬ ߘߊ߲ߘߐ߫ ߕߋ߲߬߸ ߞߊ߲ߓߍ߲ ߞߊ߲ߕߌ߮ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߞߎߡߊ߫ ߖߡߊ߬ߣߊ߬ߘߋ߲ ߠߎ߬ ߝߍ߬ ߞߊ߯ߙߌ ߣߌ߲߬ ߥߎ߬ߙߊ ߝߍ߬ ߂߀߂߆ ߓߌ߲ߠߊߥߎߟߋ߲ ߕߟߋ߬ ߄ ߡߊ߬.
ߊ߬ ߟߊ߫ ߓߋߟߋ߲ߠߊ ߣߌ߲߬ ߘߐ߫ ߡߌ߬ߛߍ߲߬ ߥߐߙߐ߲ߝߌ߬ߟߊ߫ ߢߐ߲߰ ߞߘߐ߫߸ ߞߊ߬ߝߏ߬ ߞߎ߲ߕߌ߮ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߖߌ߬ߣߍ߬ߞߊ ߟߎ߬ ߟߊ߫߸ ߊ߬ߟߎ߬ ߞߍ ߘߐ߫ ߞߵߊ߬ߟߎ߬ ߟߊ߫ ߟߊߒߠߦߊ ߟߴߊ߬ ߘߐ߫، ߊ߬ ߞߵߊ߬ߟߎ߫ ߝߏ߬ ߊ߬ߟߎ߬ ߟߊ߫ ߝߊ߲ߡߊߖߌ߮ ߟߊ߫߸ ߞߵߊ߬ߟߎ߫ ߝߏ߬ ߊ߬ߟߎ߬ ߟߊ߫ ߡߊ߬ߝߊ ߟߊ߫߸ ߊ߬ ߣߴߊ߬ߟߎ߬ ߟߊ߫ ߞߍߕߊ ߟߎ߬ ߞߍߟߌ ߟߊ߫ ߢߣߊߕߊߟߌ ߞߎ߲߬ߕߊ߮ ߓߍ߯ ߟߊߘߍ߬ߣߍ߲ ߞߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫߸ ߡߊ߲߬ߕߏ߲߬ߕߍ߬ ߟߊ߬ߞߙߐ߬ߛߟߌ߬ߟߊ ߟߎ߫ ߖߍ߬ߘߍ ߦߴߏ߬ ߛߙߋ߫ ߘߌ߫߸ ߏ߬ ߟߎ߬ ߡߊ߫ ߖߎ߯ߡߊ߲߫ ߛߌ߫ ߟߊߞߙߐ߬ߛߌ߬ ߛߎߥߊ߲ߘߟߌ ߞߎ߲߬ߕߊ߮ ߞߘߐ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߝߊ߲߬ߓߦߊ߬ ߞߐߟߌߞߐߟߌ ߛߐ߬ߘߐ߲߫ ߖߊ߰ߟߋ߬ ߝߟߐ ߟߋ߬ ߘߐ߫߸ ߊ߬ ߞߊ߲߫ ߞߏ߫ ߖߊ߬ߡߊ ߟߊ߫ ߛߎߥߊ߲ߘߟߌ ߏ߬ ߓߘߊ߫ ߕߊ߬ߡߌ߲߫ ߊ߬ <<ߘߌߦߊߜߏߦߊ߫>> ߟߊ߫߸ ߞߊ߬ ߖߡߊ߬ߣߊ ߡߊ߬ߙߊ߫ ߖߊ߬ߡߊ ߟߊ߫ ߕߐ߬ߣߐ ߡߞߊߘߊ߲ ߞߊ߲߬، ߊ߬ ߞߊ߬ ߛߎߥߊ߲ߘߟߌߟߊ ߟߎ߫ ߝߏ߬߸ ߡߍ߲ ߠ߬ߎ ߞߵߊ߬ߟߋ ߛߎߥߊ߲ߘߌ߫߸ ߊ߬ ߣߌ߫ ߡߍ߲ ߠߎ߬ ߞߊ߬ ߡߊ߬ߡߌ߬ߣߊ߬ߟߌ߬ߟߊ߬ ߜߘߍ ߏ߬ ߟߎ߬ ߝߣߊ߫ ߛߎߥߊ߲ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߓߍ߯ ߛߐ߬ߘߐ߲ ߢߣߊߕߊߟߌ ߘߐ߫߸ ߏ߬ ߞߊ߬ ߓߍ߯ߦߊ ߟߋ߬ ߦߌ߬ߘߊߞߊ߬.
ߞߊ߲ߕߌ߯ ߛߎߥߊ߲ߘߌߣߍ߲ ߞߊ߬ ߝߏ߬ߟߌ ߟߐ߬ ߓߙߊߡߊߖߊ߲ߓߊ߲ ߓߊ߯ߙߊߞߍߟߊ ߟߎ߫ ߡߊ߬߸ ߗߋߕߌ߯ߘߊ ߟߎ߬ ߣߌ߫ ߝߘߏ߬ߓߊ߬ ߞߌ߲ߘߊ ߟߎ߬ ߟߎ߬߸ ߞߵߏ߬ ߟߊ߫ ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲߬ ߝߊ߲ߞߊ ߘߏ߲߬ߞߏ ߟߎ߫ ߞߊ߲߬߸ ߊ߬ߟߎ߬ ߟߊ߫ ߓߊ߯ߙߊ ߟߊ߫ ߞߎ߬ߛߊ߲߬ߧߊ ߘߐ߫߸ ߊ߬ ߣߴߊ߬ߟߎ߬ ߞߍ ߘߐ߫ ߞߵߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߟߊߛߋ߫߸ ߞߏ߫ <<ߛߎߘߊ߲ߓߊ߯ ߣߌ߫ ߓߋ߬ߓߊ߮ ߕߴߦߋ߲߬>>߸ ߓߊ߬ߙߌ߬ ߖߌ߬ߣߍ߬ ߞߋߟߋ߲߫ ߠߋ߬߸ ߡߍ߲ ߦߋ߫ ߞߎ߲ߕߎߙߎ߲߫ ߕߟߊߓߊߟߌ ߘߌ߫، ߊ߬ ߞߊ߬ ߞߟߌߟߌ ߟߊߛߋ߫ ߖߌ߬ߣߍ߬ߞߊ ߟߎ߫ ߡߊ߬߸ ߡߍ߲ ߠߎ߬ ߦߴߊ߬ ߞߣߐ߫ ߓߊ߬߸ ߊ߬ ߣߌ߫ ߡߍ߲ ߠ߬ߎ ߦߋ߫ ߞߐߞߊ߲߬߸ ߞߏ߫ ߓߍ߯ ߦߴߊ߬ ߟߐ߬ ߢߐ߲߮ ߝߍ߬߸ ߞߊ߬ ߖߌ߬ߣߍ߬ ߞߍ߫ ߖߌ߬ߣߍ߬ ߘߌ߫ ߖߐ ߘߐ߫߸ ߕߋߟߋ߲ ߘߐ߫߸ ߢߝߍߕߊ߮ ߣߌ߫ ߖߘߍ߬ߕߌ߰ߦߊ ߓߊ߲ߓߊ߲ ߞߊ߲߬.
ߊ߬ ߞߵߊ߬ ߦߌ߬ߘߊ߫ ߂߀߂߆ ߟߊ߫ ߞߏ ߘߐ߫߸ ߞߏ߫ ߊ߬ ߘߌ߫ ߓߊ߯ߙߊ߫ ߛߊ߲߭ ߢߌ߲߬ ߠߊ߫߸ ߞߊ߬ ߛߍ߬ߓߍ ߡߌ߬ߣߊ߬߸ ߞߊ߬ ߞߍߞߋߟߋ߲ߘߌ ߓߊ߲ߓߊ߲߫߸ ߞߊ߬ ߖߊ߬ߡߊ ߖߌ߱ ߡߝߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߢߍߥߟߊ ߟߋ߬ ߞߵߊ߬ ߞߎ߬ߡߊ߲߬ߘߌ߫ ߞߎߡߊ߫ ߟߊ߫ ߛߊ߲߬ ߠߊ߬ߓߊ߲ ߝߍ߬߸ ߦߏ߫ ߊ߬ ߘߋ߬ߙߌ߬ߣߍ߲߬ ߞߍ߫ ߟߊ߫ ߢߊ ߡߍ߲ ߡߊ߬ ߞߘߐ߬ߡߊ߲߬، ߏ߬ ߟߋ ߞߵߊ߬ ߞߍ߫߸ ߤߊߟߵߊ߬ ߡߊ߫ ߛߋ߫ ߛߊ߲߬ ߞߎ߬ߘߊ߬ ߝߏߟߌ ߝߣߊ߫ ߞߍ߫ ߟߊ߫، ߓߊߏ߬߸ ߊ߬ߟߋ߫ ߖߍ߬ߘߍ ߕߍ߬ߘߍ߫ ߡߊ߬ߡߌ߬ߣߊ߬ߟߌ߬ߟߊ ߟߋ߬ ߘߌ߫߸ ߛߌ߲߬ߝߏ߲߬ߘߊ ߟߎ߫ ߓߏ߲߬ߧߊ ߞߏߛߐ߲߬߸ ߊ߬ ߡߊ߫ ߛߋ߫ ߓߐ߫ ߟߊ߫ ߞߊ߬ ߝߏ߬ߟߌ߬ ߞߍ߫، ߞߏ߫ ߒ߬ߓߊ߬߸ ߊ߬ ߦߴߊ߬ ߟߊ߫ ߞߎߡߊ߫ ߞߋߟߋ߲ ߣߌ߲߬ ߞߍ߫ ߟߊ߫ ߓߍ߲߬ߒ߬ߛߋ߲߬ߡߊ ߘߌ߫߸ ߝߏ߬ߟߌ ߟߊߛߋ߫ ߓߍ߯ ߟߊߘߍ߬ߣߍ߲ ߡߊ߬߸ ߞߍ߲ߘߍߦߊ ߘߐ߫߸ ߖߐ ߘߐ߫߸ ߊ߬ ߣߌ߫ ߖߡߊ߬ߣߊ ߟߊ߫ ߢߍߕߊ߮ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.