ߡߊ߬ߛߎߓߊ ߣߌ߲߬ ߞߍ߫ ߘߊ߫ ߡߌߕߌ߬ ߘߎ߰ߣߍ߲ ߠߋ߬ ߞߣߐ߫߸ ߊ߬ߟߋ ߡߍ߲ ߦߋ߫ ߘߟߊ߬ߓߊ߫ ߡߙߊ߬ߓߊ߰ߘߐ ߘߐ߫، ߘߏ߲߬ߛߏ߬ ߞߊ߲ߡߋߙߋ߲ ߘߏ߫ ߟߋ߬ ߓߣߐ߬ ߘߴߊ߬ ߣߌ ߘߐ߫ ߦߋ߲߬߸ ߊ߬ ߦߋ߫ ߟߊ߬ߞߊߟߌ ߟߎ߬ ߘߐ߫ ߞߏߏ߫ ߊ߬ ߖߍ߬ߘߍ ߟߊ߫ ߡߊ߬ߙߌ߬ߝߊ ߟߋ߬ ߞߍߣߴߊ߬ ߛߕߊ ߘߌ߫ ߥߊ߬ ߡߊ߬ ߕߊ߯ߡߊ ߘߐ߫. ߊ߬ ߛߎ߭ ߦߋ߫ ߘߊ߫ ߞߊ߯ߙߌ ߛߐ߱ ߟߋ߬ ߡߊ߬ ߂߀߂߆ ߞߏ߲ߞߏߜߍ ߕߟߋ߬ ߁߭.
ߡߕߌߞߊ ߟߎ߫ ߓߌ߬ߟߊ߬ ߘߊ߫ ߛߎ߬ߣߎ߲ ߠߋ߬ ߘߐ߫ ߞߎߣߎ߲߬ ߞߊ߯ߙߌ ߡߊ߬߸ ߞߵߏ߬ ߕߎ߬ߙߎ ߞߍ߫ ߘߏ߲߬ߛߏ߬ ߞߊ߲ߡߋߙߋ߲ ߘߏ߫ ߟߊ߫ ߛߊ߬ߦߊ ߘߌ߫ ߊ߬ ߖߍ߬ߘߍ ߟߊ߫ ߡߊ߬ߙߌ߬ߝߊ ߟߊ߫߸ ߞߵߊ߬ ߕߏ߫ ߥߡߊ߬ߕߊ߯ߡߊ ߘߐ߫ ߛߎ ߝߍ߬، ߊ߬ߟߎ߬ ߟߊ߫ ߘߎ߱ ߏ߬ ߦߋ߫ ߘߟߊ߬ߓߊ߫ ߡߊ߬ߙߊ ߟߋ߬ ߘߐ߫.
ߖߌ߬ߣߍߡߊ߬ߕߍ߲ ߞߐߦߌߘߊ ߟߊ߫ ߝߐߟߌ߫ ߘߐ߫߸ ߞߏ߫ ߡߊߡߊߘߎ߫ ߛߊߥߎ߬ ߓߊߙߌ߫ ߛߎ߭ ߟߋ߬ ߦߋ߫ ߘߊ߫ ߞߊ߯ߙߌߟߏ߲ ߂߀߂߆ ߞߏ߲ߞߏߜߍ ߕߟߋ߬ ߁߭ ߡߊ߬ ߞߏ߲ߞߏ ߞߣߐ߫߸ ߤߐ߯ߙߍ߬ ߡߊ߯ߘߎ߬ ߘߎ߰ߣߍ߲ ߞߣߐ߫߸ ߡߌߕߌ߬ ߛߏ ߞߣߐ߫߸ ߘߟߊ߬ߓߊ߫ ߡߙߊ߬ߓߊ߰ߘߊ ߘߐ߫، ߊ߬ ߛߌ߬ߞߛߊߓߌ ߦߋ߫ ߛߊ߲߬ ߃߀ ߢߐ߲߰ ߠߋ߬ ߘߐ߫߸ ߞߊ߲ߡߋߙߋ߲ ߣߌ߲߬ ߕߏߣߴߊ߬ ߘߐ߫ ߊ߬ ߖߍ߬ߘߍ ߟߊ߫ ߡߊ߬ߙߌ߬ߝߊ ߟߋ߬ ߓߟߏ߫߸ ߟߊ߬ߛߊ߰ߛߌ ߡߍ߲ ߥߊ߫ ߘߴߊ߬ ߓߟߏ߫ ߞߏ߲ߞߏ ߞߣߐ߫ ߝߟߍ߫ ߞߊ߲ߡߊ߬ ߞߊ߬ߣߌ߲߬.
ߞߊ߬ߕߎ߲߯߸ ߛߙߋ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ ߥߟߌ߬ ߘߊ߫ ߥߎ߬ߙߊ ߟߋ߬ ߝߍ߬ ߞߵߊ߬ ߥߊ߭ ߡߊߜߍ߲߫ ߝߟߍ߫ ߞߊ߲ߡߊ߬߸ ߊ߬ ߘߋ߬ߙߌ߬ߣߍ߲߫ ߏ߬ ߡߍ߲ ߞߍ߫ ߟߊ߫ ߛߐ߲߬ ߞߘߊߎ߫ ߞߊ߬ߣߌ߲߬، ߊ߬ ߡߍ߲ߣߍ߲߫ ߏ߬ ߟߋ ߘߐ߸ ߊ߬ ߞߐߛߊߦߌ߲߫ ߡߊ߫ ߦߋ߫߸ ߘߎ߰ ߡߐ߮ ߟߎ߬ ߞߵߊ߬ ߢߌߣߌ߲߫ ߞߏ ߛߌ߰ ߛߋ߲߬ߠߊ߫ ߛߐ߰ߡߊ߬ߘߊ ߟߊ߫ ߏ߬ ߟߋ ߘߐ߫، ߏ߬ ߟߋ ߞߍ߫ ߘߊ߫ ߓߍ߯ ߛߊߙߌ߫ ߢߊ ߘߌ߫ ߥߊ߭ ߟߊ߫ ߘߏ߲߬ߛߏ߬ߗߍ ߣߌ߲߬ ߢߌߣߌ߲߫ ߞߊ߲ߡߊ߬.
ߡߌߕߌ߬ ߘߎ߰ߕߌ߮ ߡߍ߲ ߕߐ߯ ߞߏ߫ ߟߊ߱ߖߌ߬ ߊߓߘߎߟߊߦߌ߬ ߓߊߙߌ߫߸ ߏ߬ ߞߊ߲߫ ߞߏ߫ ߡߊߡߊߘߎ߫ ߛߊߟߌߥߎ߬ ߓߊߙߌ߫ ߦߟߍ߬ ߘߊ߫ ߦߙߌ ߟߋ߬ ߟߊ߫ ߛߏ߬ߓߏ ߘߏ߫ ߓߍߟߍ߲߫ ߞߊ߲ߡߊ߬ ߜߟߊ߬ ߟߊ߫߸ ߊ߬ ߟߊ߫ ߡߊ߬ߙߌ߬ߝߊ ߕߟߊ߫ ߘߴߊ߬ ߟߊ߫ ߦߋ߲߬ ߠߋ߬ ߛߊ߫ ߞߊ߬ ߓߋ߬، ߞߵߏ߬ ߞߍ߫ ߏ߬ ߝߣߊ߫ ߞߟߍ߬ߕߍ߬ߟߊ߲ ߥߟߌ߬ ߢߊ ߘߌ߫߸ ߞߊ߬ ߞߌ߬ߛߍ ߞߍ߫ ߊ߬ ߘߛߌ ߘߐ߫߸ ߞߵߊ߬ ߢߊߘߐߟߊ ߓߍ߯ ߟߊߛߐ߬ߘߐ߲߬، ߊ߬ ߛߎ߭ ߦߋ߫ ߘߊ߫ ߖߋ߬ߟߌ߫ ߘߍ߬ߜߍ ߟߋ߬ ߕߍߡߊ߬߸ ߊ߬ ߟߊ߫ ߡߊ߬ߙߌ߬ߝߊ ߦߴߊ߬ ߞߍ߬ߙߍߝߍ߬.
ߡߙߊ߬ߦߊ߬ߞߊ߲ߞߋ ߕߊ߬ߣߍ߲ ߞߵߊ߬ ߟߊ߫ ߘߊ߲ߘߊߟߌߟߊ ߟߎ߫ ߞߊ߲߬߸ ߏ߬ ߟߎ߬ ߟߊߛߏ߬ߓߌ߬ ߘߴߊ߬ ߞߏ ߟߊ߫ ߞߊߟߌߦߊ߫ ߘߐ߫ ߌߞߘߐ߫، ߏ߬ ߟߎ߬ ߟߊ߫ ߟߊ߬ߞߙߐ߬ߛߌ߬ߟߌ ߟߎ߬ ߞߐ ߘߐ߫߸ ߘߟߊ߬ߓߊ߫ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߫ ߞߊ߬ ߖߊ߬ߡߊߙߌ ߘߌ߫ ߞߊ߬ ߛߎ߭ ߘߌ߫ ߛߎ߬ߕߌ߮ ߟߎ߫ ߡߊ߬߸ ߊ߬ ߛߎ߭ߘߏ߲߬ ߞߊ߲ߡߊ߬.
ߡߊߡߊߘߎ߫ ߛߊߟߌߥߎ߬ ߓߊߙߌ߫ ߡߍ߲ ߛߊ߬ ߞߏ ߝߐ߫ ߞߊ߲߫ ߣߌ߲߬߸ ߡߏ߬ߛߏ ߦߴߊ߬ ߞߎ߲߬߸ ߘߋ߲߫ ߞߋߟߋ߲߫ ߦߴߊ߬ ߓߟߏ߫، ߊ߬ ߛߎ߭ ߘߏ߲߬ ߘߊ߫ ߞߎߣߎ߲߬ ߞߊ߯ߙߌ ߏ߬ ߡߎ߰ߡߍ ߟߋ߬ ߡߊ߬ ߡߌߕߌ߬ ߛߏ ߞߣߐ߫.
ߓߐߛߎ߲: ߖߌ߬ߣߋߡߊ߬ߕߍ߲.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.