ߓߌ߬ߟߊ߬ߢߐ߲߰ߡߊ߬ߓߊߟߌߦߊ ߓߘߊ߫ ߞߊ߬ߙߊ߲߬ߘߋ߲ ߘߏ߫ ߕߏ߫ ߛߊ߲߬ ߞߋߟߋ߲߫ ߞߣߐ߬ߘߐ߬ߝߟߌ ߘߐ߫ ߞߵߊ߬ ߓߍ߲߬ ߊ߬ ߛߎߘߊ߲߫ ߞߏ ߟߐ߲ߓߊߟߌߦߊ ߡߊ߬، ߊ߬ ߟߊߣߍ߲߫ ߕߘߍ߬ ߊ߬ ߛߎߘߊ߲ߓߊߟߌߦߊ ߟߋ߬ ߟߊ߫ ߝߛߊߦߌ߫߸ ߓߊ߬ߙߵߊ߬ ߣߊ߬ ߘߴߊ߬ ߟߐ߲߫ ߕߐ߭ ߢߌ߲߬ ߠߋ߬ ߟߊ߫ ߞߏ߫ ߊ߬ ߛߎߘߊ߲߫ ߘߊ߫߸ ߞߵߊ߬ ߛߐ߬ߘߐ߲߬ ߊ߬ ߥߊߣߴߊ߬ ߕߐ߯ ߟߊߘߏ߲߫ ߞߊ߲ߡߊ߬ ߓߊߘߎ߲߫ ߣߊ߬ߕߐ ߘߐ߫.

ߞߊ߬ߘߌߦߊ߬ ߞߐ߲ߘߍ߫ ߦߋ߫ ߞߊ߬ߙߊ߲߬ߘߋ߲ ߠߋ߬ ߘߌ߫ ߊߟߌ߬ߡߊߡߌ߲߫ ߛߊ߭ߡߏ߬ߙߌ߫ ߞߊ߬ߙߊ߲߬ߘߊ߬ߓߊ ߟߊ߫߸ ߦߌߟߡߊ ߕߊ߲ߣߌߛߓߊߣߊ߲ ߟߐ߲ߞߏ߫ ߞߘߐߓߐߕߊ ߟߊ߫ ߞߊ߲ߞߊ߲߫ ߞߣߐ߫، ߏ߬ ߟߋ ߣߐ߬ ߛߊ߲߬ ߞߋߟߋ߲߫ ߞߍ߫ ߟߊ߫߸ ߞߵߊ߬ ߘߍ߲߬ߞߣߍ߬ߦߊ ߕߏ߫ ߞߏ߫ ߊ߬ ߡߊ߫ ߓߊߘߎ߲ ߛߐ߬ߘߐ߲߬ ߝߛߊߦߌ߫، ߏ߬ ߖߌ߰ߟߊ߬ߝߐߦߊ ߞߏߛߐ߲߬߸ ߊ߬ ߞߵߊ߬ ߣߊ߬ߕߊ߫ ߢߌ߬ߣߊ߲߬ ߞߏ߫ ߊ߬ ߦߴߊ߬ ߛߏ߭ ߡߊߝߟߍ߫ ߟߊ߫߸ ߞߊ߬ ߥߴߊ߬ ߕߐ߯ ߛߓߍ߫ ߞߊ߲ߡߊ߬ ߥߟߊ߬ߟߊ߬ߓߐ߫ ߣߊ߬ߕߐ ߘߐ߫، ߓߊ߬ߙߌ߬߸ ߊ߬ ߕߐ߮ ߓߊ߯ ߟߊߘߏ߲߬ ߞߏߕߊ߲߫߸ ߝߙߋߞߋ ߘߏ߫ ߘߌ߫ ߦߋ߫߸ ߊ߬ ߕߍ߫ ߓߍ߲߬ ߠߊ߫.

ߏ߬ ߞߍ߸ ߞߊ߲ߞߊ߲߫ ߟߊ߬ߞߟߏ߬ߞߟߏ߬ߟߌ ߗߋߕߌ߯ߘߊ ߥߛߊ߬ߘߊ߬ߕߌ߮ ߞߊ߬ ߡߊ߬ߝߟߍ߬ߟߌ ߘߊߡߌ߬ߣߊ߬،  ߞߐߝߟߌ ߡߎ߲߬ ߦߋ߫ ߘߊ߫߸ ߞߊ߬ߘߌߦߊ߬ ߕߐ߮ ߥߊ߫ ߘߊ߫ ߦߋ߫ ߛߎߘߊ߲ߓߊ߯ߕߐ ߟߎ߬ ߕߐ߮ ߛߙߍߘߍ ߘߐ߫ ߛߊ߲߭ ߕߊ߬ߡߌ߲߬ߣߍ߲ ߠߊ߫، ߞߵߊ߬ ߦߌ߬ߘߊ߬߸ ߞߏ߫ ߞߊ߬ߙߊ߲߬ߘߋ߲ ߞߊ߬ ߛߊ߲߭ ߕߊ߬ߡߌ߲߬ߣߍ߲ ߥߟߊ߬ߟߊ߬ߓߐ ߛߐ߬ߘߐ߲߫ ߠߋ߬߸ ߞߵߊ߬ ߛߐ߬ߘߐ߲߬ ߊ߬ ߕߴߊ߬ ߞߊ߬ߟߊߡߊ߬.

ߢߐ߯ߢߊߦߋߓߊߟߌߦߊ ߣߌ߲߬ ߓߊߖߎ ߓߐ߫ ߘߊ߫ ߝߏ߯ ߖߋ߬ߓߌ ߟߎ߬ ߘߌ߫ ߥߊ߯ߕߌ ߟߋ߬ ߟߊ߫، ߏ߬ ߞߊ߬ ߞߊ߬ߘߌߦߊ߬ ߛߐ߬ߘߐ߲߬ ߓߙߋߕߋߟߊ߫ ߟߋ߬߸ ߏ߬ ߦߋ߫ ߘߎ߰ߣߍ߲  ߘߏ߫ ߟߋ߬ ߘߌ߫ ߖߌ߬ߙߊ߬ߘߎ߬ ߡߙߊ ߘߐ߫߸ ߡߏ߬ߙߌ߬ߓߊ߬ߦߊ߫ ߡߙߊ߬ߘߊ߬ߙߋ߲ ߘߐ߫، ߞߊ߬ߕߎ߲߯߸ ߦߋ߲߬ ߞߙߏ߬ߝߏ߬ ߞߏ ߖߐ߲ߖߐ߲߫ ߕߍ߫߸ ߊ߬ߟߎ߬ ߦߴߊ߬ߟߎ߬ ߓߐ߫ ߟߴߊ߬ߟߎ߫ ߣߐ߭ ߘߐ߫ ߟߋ߬ ߞߊ߬ ߥߊ߫߫ ߞߙߏ߬ߝߏ ߛߊ߯ߘߊ߫. <<ߞߐߝߟߌ ߟߊߓߐ߫ ߕߎߡߊ ߞߵߊ߬ ߛߐ߬ߘߐ߲߫ ߠߋ߬ ߒ ߕߍ߫ ߞߊ߲ߞߊ߲߫߸ ߒ ߕߘߍ߬ ߓߙߋߕߋߟߊ߫ ߟߋ߬، ߦߋ߲߬ ߘߏ߲߬ ߞߟߌߟߌ߫ ߞߏ ߓߍ߯ ߜߍ߬ߟߍ߲߬ߡߊ߫ ߠߋ߬، ߒ ߞߵߊ߬ ߢߌߣߌ߲߫ ߒ ߘߍ߬ߢߐ߲߮ ߠߎ߫ ߝߍ߬ ߞߏ߫ ߊ߬ߟߎ߬ ߦߋ߫ ߒ ߠߊ߫ ߞߐߝߟߌ ߡߊߝߟߍ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߒ ߡߴߊ߬ ߛߐ߬ߘߐ߲߬߸ ߏ߬ ߜߟߍ߬ߦߊ߬ ߘߊ߫ ߒ ߡߊ߬ ߞߏߛߓߍ߫.>> ߊ߬ߟߋ ߟߋ߬ ߞߊ߲߫ ߕߋ߲߬.

ߓߙߋߕߋߟߊ߫ ߡߍ߲ ߞߏ߫ ߦߋ߫ ߣߌ߲߬߸ ߊ߬ߟߋ ߦߋ߫ ߘߎ߰ ߟߋ߬ ߘߌ߫߸ ߡߍ߲ ߦߋ߫ ߝߏ߲ߝߊ߲ ߞߣߐ߫߸ ߞߵߊ߬ ߟߊߡߌߣߌ߲߫ ߞߎ߬ߙߎ ߟߊ߫߸ ߦߏ߫ ߊ߬ ߦߋ߫ ߘߋ߲߬ߞߊ߬ ߓߛߌߞߌ߫ ߟߋ߬ ߞߣߐ߫.

ߊ߬ ߘߍ߲߬ߞߣߍ߬ߦߊ ߞߐߝߍ߬ ߊ߬ ߟߊ߫ ߗߌߙߏ߲ ߡߊ߬߸ ߊ߬ ߞߵߊ߬ ߟߊߢߌߣߌ߲߫ ߞߏ߫ ߊ߬ ߦߴߊ߬ ߘߐߓߍ߲߬ ߥߟߊ߬ߟߊ߬ߓߐ߫ ߣߊ߬ߕߐ ߢߍ߫، ߒ߬ߓߊ߬߸ ߊ߬ ߕߐ߯ ߟߊߘߏ߲߫ ߕߎߡߊ ߟߋ߬ ߟߊ߫ ߛߊ߫߸ ߕߎ߬ߢߊ ߓߊ߲ߞߌ߫ ߘߊ߫. ߊ߬ ߞߊ߲߫ ߞߏ߫: <<ߊ߬ ߝߐ ߡߍ߲ ߞߍ߫ ߘߊ߫ ߒ ߧߋ߫ ߞߏ߫ ߒ ߛߎߘߊ߲߫ ߘߊ߫ ߟߋ߬ ߞߊ߬ߦߌ߯ ߛߊ߲߭ ߕߊ߬ߡߌ߲߬ߣߍ߲߸ ߏ߬ ߓߙߊ߬ ߘߊ߫ ߒ ߘߐ߫ ߝߏ߫ ߞߊ߬ ߒ ߘߊ ߓߐ߫ ߒ ߞߎ߲߬، ߏ߬ ߘߌߦߊߣߍ߲߫ ߒ ߧߋ߫ ߟߋ߬ ߞߊ߬ ߛߴߊ߬ ߘߊ߲߭ ߠߊ߫.>> ߊ߬ ߛߍߥߊߣߍ߲ ߞߵߏ߬ ߟߋ ߝߐ߫.

ߞߊ߬ߘߌߦߊ߬ ߞߐ߲ߘߍ߫ ߕߊ ߣߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߊ߬ ߟߊ߫ ߞߏߢߊ ߣߌ߲߬ ߓߘߴߊ߬ ߦߌ߬ߘߊ߫ ߟߋ߬ ߞߏ߫ ߞߘߐߓߐߓߊ߯ߕߐ ߟߎ߬ ߟߊ߫ ߞߐߝߟߌ߫ ߟߊߛߐߘߐ߲ ߦߋ߫ ߝߙߋߞߋ ߟߋ߬ ߘߴߊ߬ߟߎ߫ ߡߊ߬߸ ߓߍ߯ ߣߐ߬ ߕߍ߫ ߡߍ߲ ߞߏ ߟߎ߬ ߢߊߦߋ߫ ߟߊ߫ ߝߟߐ߫߸ ߞߎ߲߬ߠߊ߬ߛߌ߮ ߟߊ߫ ߘߐ߬ߖߊ ߓߍ߯ ߣߴߊ߬ ߕߊ߫ ߞߊ߬ߣߌ߲߬، ߊ߬ߟߋ ߞߏ߬ߣߌ߲ ߠߊ߫ ߞߣߐ߬ߘߐ߬ߝߟߌ ߓߘߊ߫ ߓߊ߲߫߸ ߊ߬ ߛߋ߲߬ ߕߍߣߊ߬ ߛߐ߬ߘߐ߲߬ ߠߊ߫ ߞߘߐߓߐߟߌ߫ ߣߊ߬ߕߐ ߛߐ߲߬ߖߊ ߘߐ߫߸ ߊ߬ ߓߘߊ߫ ߖߌ߰ߡߊ߬ߝߊ߫ ߕߋ߲߬ ߝߛߊߦߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.