߂߀߂߆ ߕߙߊߓߊ ߕߟߋ߬ ߁߃ ߛߎ ߞߵߊ߬ ߘߎ߰ߛߊ ߜߍ߫ ߁߄ ߠߊ߫߸ ߡߊ߬ߟߌ ߣߊ߲߬ߕߌ߯ ߝߌ߬ߟߊ ߡߍ߲ ߠߎ߬ ߟߊߡߙߊ߬ߣߍ߲߫ ߕߍ߬ߘߍ߫ ߓߊ߰ߓߊ߰ߟߌ߬ߟߊ ߟߎ߬ ߓߟߏ߫߸ ߏ߬ ߟߎ߫ ߓߌ߬ߟߊ߬ ߘߊ߫، ߊ߬ߟߎ߬ ߟߊߘߏ߲߰ ߘߊ߫ ߞߊ߬ ߥߴߊ߬ߟߎ߬ ߘߌ߫ ߡߏߙߌߕߊߣߌ߫ ߞߎ߲߬ߞߊ߬ߙߌ߬ߝߊ߬ߟߌ߬ ߘߊ߮ ߘߏ߫ ߞߣߐ߫߸ ߞߣߊ߬ߕߏ߫ ߊ߬ߟߎ߬ ߟߊߣߊ߬ ߟߴߊ߬ߟߎ߫ ߝߊ߬ ߖߡߊߣߊ ߞߊ߲߬ ߡߊ߬ߟߌ ߟߊ߫ ߡߎ߬ߕߎ߲߬ ߛߊ߫.

ߣߊ߲߬ߕߌ߰ ߘߊ߯ߘߐ ߟߊ߫ ߟߊ߬ߛߋ߬ߟߌ߬ ߞߟߊߒߞߋ ߘߐ߫߸ ߊ߬ ߦߌ߬ߘߊ߬ߣߍ߲߫ ߞߏ߫ ߊ߬ߟߎ߫ ߔߘߏ߬ߞߟߏ߬ߡߊ߬ߣߍ߲߫ ߠߋ߬، ߓߊ߬ߙߌ߬߸ ߔߘߏ߬ߞߟߏ߬ߡߊ߬ߟߌ ߏ߬ ߡߊ߫ ߞߍ߫ ߦߋ߲߬ ߕߋ߲߬ ߜߊ߲ߛߊ߲߫ ߘߋ߬߸ ߡߊ߬ߟߌ ߣߊ߲߬ߕߌ߮ ߟߎ߫ ߞߊ߬ ߦߙߍߞߍߟߌ ߘߏ߫ ߟߋ߬ ߛߌ߰ ߛߋ߲߬ߠߊ߫ ߡߊ߬ߟߌ ߣߌ߫ ߡߏߙߌߕߊߣߌ߫ ߓߐߕߏ߲ ߠߊ߫߸ ߥߊ߱ߘߎ߰ ߕߎ ߞߘߐ߫، ߦߟߍߞߍߟߌ ߏ߬ ߟߋ ߞߍ߫ ߘߊ߫ ߕߙߎ߬ ߘߌ߫߸ ߓߟߏ߫ ߛߋ߫ ߘߊ߫ ߟߊ߫ ߟߊ߫ ߢߌ߲߬ ߠߎ߬ ߘߐ߫، ߟߊ߬ߛߋ߬ߟߌ߬ ߛߓߍ ߞߵߊ߬ ߝߐ߫ ߞߏ߫: <<ߡߊ߬ߟߌ ߣߊ߲߬ߕߌ߮ ߟߎ߬ ߦߋ߫ ߦߙߍߞߍߟߌ ߞߊ߲߬ ߢߊߟߐ߲ ߣߌ߫ ߞߎ߬ߛߊ߲߬ߧߊ ߟߊ߫߸ ߖߐ߲߰ߛߊ߫ ߡߌ߬ߣߊ߬ߓߊ߰ߕߐ ߓߍ߯ ߘߌ߫ ߓߌ߬ߟߊ߬ ߢߊ ߡߍ߲ ߡߊ߬.>>

ߣߊ߲߬ߕߌ߮ ߡߍ߲ ߠߎ߬ ߛߋߣߍ߲߫ ߕߟߊ߫ ߟߊ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߕߋ߲߬߸ ߏ߬ ߟߎ߬ ߝߟߐߡߊ ߟߋ߬ ߡߏ߬ߤߊ߬ߡߍߘ ߥߊ߲߬ߜ߭ߙߊ߬ߓߊ߫ ߘߌ߫߸ ߍߛߑߞߊߘߐߙߐ߲߫ ߙߋߞߐߣߍߛߊ߲ߛ ߟߊ߫. ߊ߬ ߝߌߟߊߣߊ߲ ߠߋ߬ ߡߤߊߡߍߘ ߍ߬ߟ ߡߊߥߟߎߘ ߖߊߟߏ߫ ߘߌ߫߸ ߞߊ߬ ߝߘߊ߫ ߙߋߖ߭ߌߡߊ߲߫ ߓߑߟߍ߲ߘߋ ߟߊ߫.

ߊ߬ߟߎ߫ ߡߌ߬ߣߊ߬ ߘߊ߫ ߞߊ߬ߦߌ߯ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߉ ߟߋ߬ ߡߊ߬ ߖߋ߬ߟߌߓߊ߬ ߓߊߓߊ ߞߊ߲߬߸ ߊ߬ߟߎ߬ ߥߊߣߍ߲߫ ߕߍ߬ߘߍ߫ ߡߊ߬ߞߏ ߘߎ߫ ߟߋ߬ ߟߊ߫ ߦߋ߲߬.

ߟߊ߬ߛߋ߬ߟߌ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߝߣߊ߫߸ ߞߏ߫ ߖߏ߬ߦߌ߬ߟߊ߫ ߡߙߊ߬ߓߊ߮ ߡߍ߲ ߕߐ߯ ߞߏ߫ ߛߟߊߕߌ߯ ߊ߬ߟߌߖߌ߬ ߓߊ߬ߢߊ߫߸ ߏ߬ ߡߍ߲ ߡߌ߬ߣߊ߬ ߘߊ߫ ߂߀߂߆ ߞߏ߲ߞߏߜߍ ߕߟߋ߬ ߁߄ ߡߊ߬، ߏ߬ ߝߣߊ߫ ߛߋ߫ ߘߊ߫ ߕߟߊ߫ ߟߴߊ߬ ߡߌ߬ߣߊ߬ߓߊ߮ ߟߎ߬ ߟߊ߫ ߡߊߛߌߣߊ߫ ߝߊ߲߭ ߝߍ߬ ߕߙߊߓߊ ߕߟߋ߬ ߁߃ ߡߊ߬߸ ߊ߬ ߛߋ߫ ߘߊ߫ ߡߊߛߐ߬ߘߐ߲߬ ߠߊ߫ ߡߊ߬ߟߌ ߣߊ߲߬ߕߌ߮ ߟߎ߬ ߓߟߏ߫߸ ߞߵߊ߬ ߞߍ߲ߘߍ߫ ߟߊߘߏ߲߬ ߕߍ߬ߣߍ߲߬ߞߎ߬ ߜߋߙߋ߲ߜߋߙߋ߲߫.

ߞߊ߲ߠߊߓߌߟߊߟߌ߫ ߛߓߊ߬ߣߍ߲ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߡߊ߬ߟߌ ߣߊ߲߬ߕߌ߮ ߟߎ߬ ߓߌߣߍ߲߫ ߠߋ߬ ߛߎ ߣߌ߫ ߕߋ߬ߟߋ߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ߲߫߸ ߞߊ߬ ߟߊߒߠߦߊ ߢߌߣߌ߲߫ ߢߊ ߓߍ߯ ߡߊ߬߸ ߞߵߊ߬ ߟߐ߲߫ ߞߏ߫ ߊ߬ߟߎ߬ ߦߋ߫ ߖߡߊ߬ߣߊ ߟߋ߬ ߦߋ߫.

ߞߘߊߎ߫߸ ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߛߓߍ ߓߍ߯ ߞߎ߲߬ߘߏ߲ ߠߋ߬߸ ߞߏ߫ <<ߣߴߊ߲ ߧߋ߫ ߘߍ߬߸ ߊ߲ ߓߍ߫ ߛߋ߫.>> ߡߊ߬ߟߌ߬ߞߊ ߟߎ߫ ߞߏ߬ߣߌ߲ ߝߣߊ߫ ߓߘߊ߫ ߘߍ߲߬ߞߣߍ߬ߦߊ߫ ߡߎ߬ߕߎ߲߬߸ ߞߏ߫ ߊ߬ߟߎ߬ ߟߊ߫ ߣߊ߲߬ߕߌ߮ ߟߎ߬ ߦߋ߫ ߓߊ߯ߙߊ߫ ߟߊ߫ ߢߊߟߐ߲ ߖߍ߬ߘߍߖߍ߬ߘߍ ߟߋ߬ ߟߊ߫ ߞߎ߲߬ߠߊ߬ߛߘߌ ߟߌ߫ ߓߊߛߌ߯ߓߊߟߌߦߊ ߞߍ߬ߟߍ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.