ߖߌ߬ߦߊ߬ߖߟߎ ߘߏ߫ ߟߋ߬ ߦߋߣߌ߲߫ ߒ߬ ߓߟߏ߫ ߡߎߛߊ߫ ߞߐ߲ߘߍ߫ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫߸ ߊ߬ߟߋ ߡߍ߲ ߕߎ߲߬ ߦߋ߫ ߞߊ߲ߕߌ߯ߘߊ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߯ߘߊ ߗߋߕߌ߮ ߘߌ߫ ߞߊ߬ߣߌ߲߬، ߊ߬ ߞߵߊ߬ ߡߙߌߘߐߕߊ߬ ߞߎߣߎ߲߬ ߛߎ ߟߋ߬ ߘߐ߫߸ ߞߊ߬ ߓߐ߫ ߞߊ߬ ߢߊߝߐߟߌ߫ ߖߐ߲ߖߐ߲߫ ߞߍ߫ ߞߊ߬ ߓߍ߲߬ ߊ߬ ߜߍ߲߫ ߞߎ߲ ߡߊ߬. ߓߊߏ߬߸ ߞߎߡߊ ߕߎ߲߬ ߓߘߊ߫ ߛߌߦߊߦߊ߫ ߘߍ߬ߞߙߏߝߏ ߟߎ߫ ߞߊ߲߬߸ ߊ߬ ߞߊ߬ ߢߊߝߐߟߌ ߞߍ߫ ߡߌ߬ߛߍ߲߫ ߛߓߊ߬ ߞߣߐ߫߸ ߞߵߊ߬ ߦߌ߬ߘߊ߬ ߞߏ߫ ߖߋߘߌ߫ ߣߐ߬ ߕߴߊ߬ ߟߊ߫ ߜߍ߲ߠߌ߲߫ ߞߏ ߣߌ߲߬ ߘߌ߫߸ ߡߙߐ߫ ߣߐ߬ ߕߍ߫߸ ߊ߬ ߖߘߍ߬ߓߊ߬ߞߎ߲ ߛߐ߲߭ ߠߋ߬ ߦߴߊ߬ ߞߐ߫ ߕߘߋ߫.

ߊ߬ ߟߊ߫ ߞߎߡߊ߫ ߘߐ߫߸ ߞߏ߫ ߊ߬ ߞߊ߬ ߞߏ߫ ߟߎ߫ ߟߋ߬ ߞߍ߫߸ ߡߍ߲ ߝߘߏ߬ߣߍ߲߬ ߞߊ߲ߕߌ߯ߘߊ ߞߌ߬ߓߊ߬ߙߏ߬ ߞߏ ߟߊߕߊ߯ߡߊ߫ ߛߌߟߊ ߡߊ߬ ߝߊ߯ߙߌ߫، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߕߘߍ߬ ߞߊ߲ߕߌ߯ߘߊ ߞߌ߬ߓߊ߬ߙߏ߬ ߘߏ߫ ߟߎ߫ ߟߊߓߐ߫ ߟߊ߫ ߥߏ߭ ߟߊ߫ ߞߵߊ߬ ߘߌ߫ ߓߟߐߟߐߛߙߏߝߋ ߟߎ߫ ߡߊ߬.

<<ߣߴߊ߬ ߡߊ߫ ߢߊ߬ ߞߏ߫ ߒߠߋ ߦߋ߫ ߓߌ߬ߟߊ߬ߢߐ߲߰ߡߊ ߗߋߕߌ߮ ߟߋ߬ ߘߌ߫߸ ߒ ߕߘߍ߬ ߕߏ߫ ߟߊ߫ ߞߌ߬ߓߊ߬ߙߏ ߟߎ߬ ߟߊߓߐ߫ ߟߊ߫ ߛߐ߲߬ ߞߵߊ߬ ߘߌ߫ ߓߟߐߟߐߛߙߏߝߋ ߟߎ߫ ߡߊ߬، ߏ߬ ߘߏ߲߬ ߕߍ߫ ߓߍ߲߬ ߒߠߋ ߡߊ߬ ߞߊ߬ ߓߍ߲߬ ߒ ߟߐ߬ߘߎ߮ ߡߊ߬.>> ߊ߬ ߞߵߏ߬ ߦߌ߬ߘߊ߬.

ߛߟߊߕߌ߯ ߡߎߛߊ߫ ߞߐ߲ߘߍ߫ ߞߵߊ߬ ߦߌ߬ߘߊ߬߸ ߞߏ߫ ߕߎ߬ߢߊ ߟߋ߬ ߝߋߎ߫߸ ߊ߬ ߣߌ߫ ߡߙߊ߬ߞߊ߲߬ ߞߘߐ ߛߌ߲߬ߝߏ߲ ߘߏ߫ ߟߎ߫ ߕߘߍ߬ ߞߎߡߊ߫ ߟߊ߫߸ ߊ߬ ߖߍ߬ߘߍ ߞߊ߬ ߞߍߥߊߟߌ߫ ߛߎ߮ ߏ߬ ߡߍ߲ ߖߊ߬ߕߋ߫ ߓߍ߲߬ߓߊߟߌ ߘߌ߫߸ ߡߍ߲ ߣߴߊ߬ ߟߊ߫ ߟߐ߬ߘߎ߮ ߕߍ߫ ߥߊ߫ ߢߐ߲߯ߡߊ߫ ߘߌ߫߸ ߣߴߊ߬ ߡߊ߫ ߢߊ߬ ߞߏ߫ ߦߙߐ߫ ߘߋ߲ߣߍ߲߫ ߕߴߊ߬ ߟߊ߫ ߡߊ߬ߙߊ ߞߣߐ߫ ߏ߬ ߘߌ߫ ߞߊ߬ߣߌ߲߬.

ߊ߬ ߟߊ߫ ߢߊߝߐߟߌ ߟߎ߬ ߘߐ߫߸ ߛߌߞߊ߫ ߞߍ߫ ߘߴߊ߬ ߡߊ߬߸ ߞߏ߫ ߊ߬ ߣߌ߫ ߞߊ߲ߕߌ߮ ߝߊ߬ߘߌ߬ ߞߣߐ߬ߜߍ߲߬ߘߋ߲߬ ߜߐߞߎ ߘߏ߫ ߞߎߡߊ߫ ߘߊ߫ ߜߋߟߋ߲ߜߋߟߋ߲ ߠߊ߫߸ ߏ߬ ߡߍ߲ ߕߐ߯ ߞߏ߫ ߞߐ߲ߘߋ߫ ߓߌߟߌ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߏ߬ ߞߵߊ߬ ߞߟߌ߫ ߊ߬ ߡߊ߬ߞߏ ߘߏ߫ ߡߊ߬߸ ߊ߬ ߞߊ߬ ߅߀߀ ߀߀߀ ߟߋ߬ ߟߊߕߊ߯ ߏ߬ ߞߎ߲߬، ߖߐ߲߰ߛߊ߫ ߏ߬ ߘߴߊ߬ ߟߊߟߐ߲ߠߌ߲߫ ߞߏ߫ ߟߎ߫ ߟߊ߫߸ ߡߍ߲ ߦߋ߫ ߕߊ߬ߡߌ߲߬ ߠߊ߫ ߞߊ߲ߕߌ߮ ߟߊߡߌߣߌ߲ ߘߐ߫ ߊ߬ߟߋ ߟߊ߫ ߞߏ ߟߎ߬ ߞߊ߲߬.

<<ߒ ߞߵߊ߬ ߢߌߣߌ߲߫ ߊ߬ ߝߍ߬߸ ߒ ߞߏ߫ ߊ߬ ߓߊ߯ ߒ ߕߐ߮ ߡߍ߲߫ ߞߏ߫ ߛߌ߫ ߘߐ߫ ߞߊ߲ߕߌ߮ ߟߊߡߌߣߌ߲ ߘߐ߫ ߦߋ߲߬߸ ߊ߬ ߦߴߏ߬ ߝߐ߫ ߒ ߧߋ߫.>> ߊ߬ ߞߵߏ߬ ߟߊߟߐ߬.

ߒ߬ߓߊ߬߸ ߊ߬ ߟߊ߫ ߜߋߟߋߜߋߟߋ߲߫ ߠߊ߫ ߞߎߡߊ ߏ߬ ߟߋ ߔߘߏ߬ߞߟߏ߬ߡߊ߬ ߘߊ߫ ߞߊ߬ ߛߋ߫ ߞߊ߲ߕߌ߯ߘߊ ߞߏߟߊߕߍ߮ ߟߎ߬ ߕߍ߯ ߞߘߐ߫߸ ߊ߬ ߟߊ߫ ߜߋߟߋ߲ߜߋߟߋ߲ ߡߌ߬ߣߊ߬ ߢߊ ߟߋ߬ ߞߍߣߴߊ߬ ߟߊ߫ ߏ߬ ߘߌ߫ ߞߵߊ߬ ߘߐߝߛߍ߬ߝߛߍ ߘߊߡߌ߬ߣߊ߫ ߡߎ߬ߕߎ߲߬ ߢߊ ߓߍ߯ ߘߏ߫ ߡߊ߬.

ߞߏߢߊߢߌߣߌ߲ ߏ߬ ߟߎ߫ ߟߋ߬ ߕߏ߫ ߘߴߌߘߐ߫߸ ߊ߬ ߥߊ߫ ߘߊ߫ ߦߋ߫ ߞߏ߫ ߊ߬ ߣߌ߫ ߡߏߙߌߜߊߣߊ߲ ߘߏ߫ ߕߘߍ߬ ߞߎߡߊ߫ ߟߊ߫߸ ߛߴߏ߬ ߘߴߊ߬ ߘߍ߬ߡߍ߲߬ ߢߊ ߡߍ߲ ߡߊ߬ ߞߵߊ߬ ߟߊ߫ ߞߏ߫ ߘߌߦߊ߫ ߞ߲ߊߕߌ߮ ߦߋ߫߸ ߞߵߊ߬ ߟߐ߬ߘߎ߮ ߓߊ߲ߓߊ߲߫߸ ߊ߬ ߞߊߣߊ߬ ߛߋ߫ ߓߐ߫ ߟߊ߫ ߦߋ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߓߊߛߌ ߘߏ߫ ߟߎ߫ ߟߊߘߊ߲߫ ߘߴߏ߬ ߓߟߏ߫߸ ߏ߬ ߖߌ߬ߦߊ߬ߖߟߎ ߟߎ߬ ߓߍ߯ ߕߍ߬ߘߍ߫ ߊ߬ ߟߊ߫ ߜߋߟߋ߲ߜߋߟߋ߲ ߞߣߐ߫ ߦߋ߲߬.

ߡߎߛߊ߫ ߞߐ߲ߘߍ߫ ߖߍ߬ߘߍ ߞߵߊ߬ ߕߍ߰ ߊ߬ ߘߊ ߟߊ߫ ߖߌ߬ߦߊ߬ߖߟߎ ߣߌ߲߬ ߘߐ߫߸ ߞߏ߫ <<ߏ߬ ߟߎ߬ ߦߋ߫ ߞߏ߫ ߟߎ߫ ߟߋ߬ ߘߌ߫߸ ߡߍ߲ ߠߎ߬ ߕߍ߫ ߤߙߐߓߘߍߦߊ߫ ߘߌ߫، ߊ߬ ߕߌ߯ߕߌ߯߸ ߞߏ ߡߍ߲ ߘߍ߲ߣߍ߲߫ ߞߊ߲ߕߌ߯ ߡߎ߯ߡߍ ߟߊ߫ ߞߏ ߟߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߗߋߕߌ߯ ߞߘߐ ߣߌ߲߬ ߞߊ߲߫ ߌ ߞߐ߫߸ ߞߏ߫ ߊ߬ ߞߊ߬ ߔߊߟߊ߲ߞߊ߫ ߜߘߍ߫ ߟߎ߫ ߞߍ߫߸ ߡߍ߲ ߣߴߊ߬ ߟߊ߫ ߓߊ߯ߙߊ ߕߍ߫ ߓߍ߲߬، ߓߊߏ߬߸ ߘߋ߲ߡߛߏߣߍ߲ ߠߎ߬ ߕߍ߬ߘߍ߫ ߘߏ߲߬ ߠߴߊ߬ ߞߊ߲߬ ߊ߬ ߟߊ߫ ߛߓߍߘߊ ߟߊ߫ ߦߋ߲߬߸ ߊ߬ߟߎ߬ ߘߌ߫ ߞߏ߫ ߟߎ߫ ߞߍ߫߸ ߡߍ߲ ߠߎ߬ ߕߍ߫ ߞߏ߫ ߓߘߍ߫ ߘߌ߫. ߊ߬ ߞߊ߲߫ ߞߏ߫: <<ߒ ߣߌ߫ ߘߋ߲ߡߛߏߣߍ߲ ߏ߬ ߟߎ߫ ߕߍ߬ߘߍ߫ ߞߎ߲߬ߘߐ߬ߞߏ߬ߖߎ߰ߦߊ߬ ߞߏ ߟߎ߬ ߞߍ߫ ߟߊ߫ ߦߋ߲߬ ߛߐ߲߬.>>

ߏ߬ ߝߣߊ߫ ߕߊ߬ߣߍ߲ ߞߵߊ߬ ߟߴߊ߬ ߣߴߊ߬ ߟߊ߫ ߓߊ߯ߙߊߘߋ߲ ߠߎ߬ ߕߍߟߊ ߜߐ߬ߛߐ߲߬ߞߐ ߘߏ߫ ߞߊ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߞߣߐߘߐߘߌߦߊ ߡߍ߲ ߦߋ߫ ߘߌ߫ ߟߴߏ߬ ߟߎ߫ ߡߊ߬߸ ߊ߬ ߕߎ߲߬ ߕߴߏ߬ ߟߎ߫ ߛߙߊ߬ ߟߴߊ߬ ߢߊ ߡߊ߬ ߛߐ߲߬߸ ߏ߬ ߞߵߊ߬߬ ߟߊ߫ ߞߏ߫ ߜߏߦߊ߫ ߡߐ߰ ߛߌߦߊߡߊ߲߫ ߦߋ߫ ߦߋ߲߬ ߞߵߊ߬ߟߎ߫ ߞߎ߬ߡߎ߲߬ ߢߐ߲߮ ߞߘߐ߫ ߞߊ߲ߕߌ߯ߘߊ ߞߌ߬ߓߊ߬ߙߏ߬ߘߊ ߟߊ߫ ߦߋ߲߬.

ߝߎ߬ߕߎ߲߬ߕߌ ߣߌ߫ ߝߍ߬ ߡߊߘߊ߲ߣߍ߲ ߥߙߍߓߊߓߊ ߢߌ߲߬ ߠߋ߬ ߓߍ߯ ߞߏߛߐ߲߬߸ ߛߟߊߕߌ߮ ߡߎߛߊ߫ ߞߐ߲ߘߍ߫ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߮ ߞߵߊ߬ߟߋ ߜߍ߲߫ ߊ߬ ߟߐ߬ߘߎ߮ ߘߐ߫ ߣߌ߲߬ ߢߊ߸ ߏ߬ ߖߏ߫ ߦߴߏ߬ ߘߐ߫ ߝߋߝߋ߫߸ ߊ߬ߟߋ ߟߋ߬ ߖߏ߫ ߕߍ߫.

<<ߣߌ߫ ߞߏ ߢߌ߲߬ ߠߎ߬ ߓߍ߯ ߓߊ߲߫ ߘߊ߫ ߟߐ߲߫ ߠߊ߫߸ ߞߊ߲ߕߌ߮ ߕߴߛߋ߫ ߕߏ߫ ߟߊ߫ ߡߊ߬ߞߎ߲߬ ߘߐ߫ ߡߎ߬ߕߎ߲߬߸ ߞߎߡߊߕߍ߫ ߞߊ߬ ߕߏ߫ ߛߌ߰ ߘߐ߫، ߒ ߣߌ߫ ߡߍ߲ ߞߊ߫ ߞߊ߲߫ ߞߏ ߓߍ߯ ߘߌ߫ ߏ߬ ߘߐ߫߸ ߏ߬ ߟߋ ߜߍ߲ߠߌ߲ ߘߌ߫߸ ߒ ߘߏ߲߬ ߛߐ߲߬ߣߍ߲߫ ߏ߬ ߡߵߊ߬ ߢߊ ߖߍ߬ߘߍߖߍ߬ߘߍ ߡߊ߬.>> ߊ߬ ߞߵߏ߬ ߝߐ߫.

ߊ߬ ߟߊ߫ ߞߎߡߊ ߟߊߓߊ߲߫ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߊ߬ ߕߎ߲߬ ߦߋ߫ ߓߐ߫ ߞߊ߬ ߢߌ߲߬ ߠߋ߬ ߝߐ߫߸ ߛߊ߫ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߟߎ߫ ߕߎ߲߬ ߘߌ߫ ߘߊ߲߬߸ ߡߍ߲ ߕߎ߲߬ ߦߋ߫ ߡߐ߱ ߟߎ߬ ߘߊ߫ ߘߍ߬ߞߙߏߝߏ ߟߎ߫ ߞߊ߲߬.

<<ߝߏ߫ ߒ ߕߘߍ߬ ߓߐ߫ ߞߊ߬ ߕߎ߬ߢߊ ߣߌ߲߬ ߝߐ߫ ߟߋ߬، ߞߏ ߡߍ߲ ߞߊ߬ ߒ ߛߐ߬ߘߐ߲߬߸ ߒ ߖߍ߬ߘߍ ߣߐ߭ ߟߋ߬.>> ߊ߬ ߞߵߏ߬ ߝߐ߫ ߞߊ߬ ߓߊ߲߫ ߞߵߊ߬ ߟߊ߫ ߞߎߡߊ ߞߊ߲߬ ߞߏ߫ ߊ߬ ߡߊ߫ ߞߎߡߊ ߣߌ߲߬ ߝߐ߫ <<ߘߐ߬ߜߍ߬ߘߍ߲߬ ߝߏߦߌ߬ ߘߐ߫>>

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.