ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߟߊߦߟߍ߬ߡߊ߲߬ ߘߊ߫ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߟߋ߬ ߟߊ߫ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߇ ߣߌ߲߬ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߛߌ߬ߣߌ߲߬ߟߏ߲ ߡߊ߬، ߞߎߡߊ ߕߎ߲߬ ߦߴߌߘߐ߫ ߘߋ߲ߡߌߛߍ߲ ߘߏ߫ ߟߎ߫ ߟߋ߬ ߟߊ߫ ߞߏ ߞߊ߲߬߸ ߕߍ߮ ߞߍ߫ ߘߊ߫ ߡߍ߲ ߠߎ߬ ߘߐ߫ ߔߊߞߌߛߦߊ ߘߏ߫ ߛߋ߲߭ߝߍ߬߸ ߞߵߊ߬ ߓߍ߲߬ ߔߏߞߑߟߍ߲߫ ߞߏ ߞߍ߬ߟߍ ߡߊ߬ ߛߊߣߌ߲߫ ߘߊߡߊ߲ ߠߎ߬ ߓߊ߯ߙߊ ߘߐ߫، ߡߌ߬ߣߊ߬ߓߊ߰ߕߐ߫ ߡߐ߰ ߁߇ ߘߐ߫߸ ߞߕߌߘߊ ߞߵߊ߬ ߓߟߏߓߐ߫ ߡߐ߰ ߁߅ ߘߐ߫߸ ߞߵߏ߬ ߟߎ߬ ߟߊ߫ ߣߐ߬ߝߍ߬ߜߍ߲߬ߠߌ߲ ߛߴߊ߬ ߞߎ߲߬ߝߊ߮ ߡߊ߬، ߡߐ߰ ߝߌ߬ߟߊ߫ ߟߋ߬ ߖߊ߲߬ߞߌ߲߬ ߘߊ߫߸ ߞߋߟߋ߲߫ ߦߴߏ߬ ߘߐ߫߸ ߛߊ߲߭ ߛߊ߬ߓߊ߫ ߟߋ߬ ߟߊ߫ ߘߴߏ߬ ߞߎ߲߬߸ ߛߏ߲߬ߧߊ߬ߟߌ߬ ߖߎ߮ ߞߏߛߐ߲߬.

ߘߋ߲ߡߌߛߍ߲߫ ߡߐ߰ ߕߊ߲ ߣߌ߫ ߥߐߙߐ߲ߝߌ߬ߟߊ ߘߐ߫߸ ߞߊ߬ߙߊ߲߬ߘߋ߫ ߝߌ߬ߟߊ߫ ߕߎ߲߬ ߦߴߊ߬ ߘߐ߫߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߬߸ ߞߏ߫ ߓߌ߬ߟߊ߬ ߞߍߣߴߊ߬ߟߎ߬ ߞߐ߫ ߛߊ߬ߙߌ߬ߦߊ߬ ߢߊߞߘߐ߫ ߔߊߞߌߛߦߊ߫ ߟߊߕߐ߲ߣߍ߲ ߞߍߟߌ ߟߋ߬ ߞߏߛߐ߲߬ ߊ߬ߟߎ߬ ߓߟߏ߫߸ ߖߡߊ߬ ߟߊ߬ߘߍ ߛߊ߬ߙߌ߬ߦߊ߬ ߛߐߛߐ ߞߊ߲߬ ߛߌߟߓߊ ߞߊ߲߬߸ ߝߘߏ߬ߓߊ߬ ߓߟߏߝߋ߲ ߠߎ߬ ߣߌ߫ ߘߎ߲߬ߘߎ߬ߡߊ߬ߕߊ ߟߎ߬ ߘߐߕߌߢߍ ߕߊ߬ߣߍ߲ ߞߵߊ߬ ߟߊ߫ ߖߊ߬ߡߊ ߟߊ߫ ߖߛߎ߬ߛߎߡߊ ߘߐߓߎ߬ߘߎ߲ ߞߊ߲߬߸ ߊ߬ ߣߴߊ߬ߟߎ߫ ߛߋ߲߬ߘߏ߲߬ߢߐ߲߰ߦߊ.

ߞߕߌߓߋߟߋ߲ ߠߊ߫߸ ߡߊ߬ߝߌ߲߬ߓߊ߰ߕߐ ߣߌ߲߬ ߓߍ߯ ߞߵߊ߬ ߛߐ߬ߛߐ߫ ߟߋ߬ ߞߍߣߍ߲ ߠߊ߫، ߡߊ߬ߡߊ߬ߘߌ߫ ߛߌ߬ߟߊ߬ ߡߍ߲ ߞߊ߲߬ߕߐ߮ ߦߋ߫ <<ߕߐߔߑߛߌ߫>> ߘߌ߫߸ ߛߌߞߊ߫ ߞߍߣߍ߲߫ ߞߏ߫ ߊ߬ߟߋ ߡߍ߲ ߦߋ߫ ߕߏ߰ߝߏ ߓߋߟߋ߲ߕߌ߮ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߛߐ߲߬ߣߍ߲߫ ߊ߬ ߡߊ߬߸ ߊ߬ߟߋ ߟߋ߬ ߞߊ߬ ߡߐ߱ ߟߎ߬ ߡߊߞߟߌ߫ ߔߊߞߌߛߦߊ߫ ߞߏ ߡߊ߬߸ ߖߐ ߞߣߐߡߊ߬، ߖߐ߲߰ߛߴߊ߬ߟߎ߬ ߘߌ߫ ߓߐ߫ ߞߵߊ߬ߟߎ߬ ߣߌߘߐߕߊ ߦߌ߬ߘߊ߫ ߔߏߞߑߟߍ߲ ߠߊ߫ ߓߊ߯ߙߊ߫ ߖߎ߮ ߞߊ߲߬ ߟߊ߬ߡߌߣߌ߲ ߘߐߖߊߛߌ ߘߐ߫ ߛߌ߯ߙߌ߲߫ ߖߡߊߣߊ ߞߊ߲߬، ߓߊ߬ߙߌ߬ ߟߏ߲߫ ߞߋߟߋ߲߫ ߟߏ߲߫ ߕߟߊ߫߸ ߊ߬ ߡߴߊ߬ ߡߙߌ߫ ߡߐ߱ ߟߎ߬ ߞߟߌ߫ ߞߏ ߡߊ߬ ߞߏ߫ ߊ߬ߟߎ߬ ߦߋ߫ ߣߊ߬ ߕߌߢߍߟߌ ߞߍ߫.

ߡߊ߬ߡߊ߬ߘߌ߬ ߛߌ߬ߟߊ߬ ߕߐ߯ ߜߘߍ߫ ߝߣߊ߫ ߕߍ߬ߘߍ߫ ߣߌ߲߬ ߞߏ ߘߐ߫߸ ߓߌ߬ߟߊ߬ ߞߍߣߍ߲߫ ߕߍ߬ߘߍ߫ ߏ߬ ߞߐ߫ ߔߊߞߌߛߦߊ߫ ߟߊߘߌ߬ߢߍ߬ߓߊ߬ߟߌ ߕߘߍ߬ߒ߬ߘߐ߬ߟߌ ߘߐ߫߸ ߊ߬ ߣߌ߫ ߛߏ߲߬ߧߊ߬ߟߌ߬ ߖߎ߮، ߞߊ߬ߕߎ߲߯߸ ߊ߬ߟߋ߫ ߞߵߊ߬ ߡߊߝߟߍ߫ ߛߣߌߥߊ ߟߎ߬ ߟߊ߫ ߜߋ߬ߕߋߜߋ߭ ߘߏ߫ ߟߋ߬ ߕߊ߬ ߞߏ ߘߐ߫.

ߞߎߡߊ ߛߋ ߡߍ߲ ߞߍ߫ ߘߊ߫ ߝߘߏ߬ߓߊ߬ ߞߏߕߌ߯ߘߊ ߓߟߏ߫߸ ߏ߬ ߡߍ߲ ߞߐߦߌ߬ߘߊ߬ߣߍ߲߫ ߞߊ߲ߓߍ߲ ߞߕߌߞߊ߲ߘߊ ߓߟߏ߫߸ ߞߊ߬ߙߊ߲߬ߡߐ߰ ߘߏߡߣߌߞ ߛߋߛߋ߫ ߟߎ߬ߥߊ߬߸ ߏ߬ ߞߊ߬ ߞߊߙߏ߫ ߥߐ߯ߙߐ߫ ߥߛߎ߫ ߞߏ ߝߐ߫߸ ߞߊ߬ ߞߊߙߏ߫ ߛߓߊ߬ ߘߐ߲ߘߐ߫ ߊ߬ߟߎ߫ ߡߊ߬، ߊ߬ ߞߵߏ߬ ߝߐ߫ ߊ߬ ߟߊ߫ ߡߌ߬ߣߊ߬ ߞߊ߲߬ ߝߐ ߟߋ߬ ߘߐ߫ ߞߵߊ߬ ߟߐ߬ ߡߊ߬ߝߌ߲߬ߓߊ߰ߕߐ߫ ߡߐ߰ ߁߃ ߡߊ߬.

ߡߊ߬ߡߊ߬ߘߌ߫ ߛߌ߬ߟߊ߬ ߟߊ߫ ߞߏ ߘߐ߫߸ ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ <<ߕߐߔߑߛߌ߫>> ߟߋ߬ ߦߋ߫ ߛߊ߬ ߞߎ߲ ߘߌ߫ ߣߌ߲߬ ߞߏ ߘߐ߫߸ ߞߏ߫ ߞߊߙߏ߫ ߁߂ ߥߛߎ߫ ߟߋ߬ ߞߊ߫ ߞߊ߲߫ ߞߊ߬ ߟߴߊ߬ߟߋ ߞߎ߲߬߸ ߞߊ߬ ߞߐ߬ߣߐ߲߬ߘߐ߬ ߘߐ߲ߘߐ߫ ߊ߬ ߡߊ߬ ߏ߬ ߘߐ߫߸ ߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߞߋߟߋ߲߫ ߟߊ߫ ߏ߬ ߞߊ߲߬ ߢߍ߬ߦߌ߲߬ߘߐ߬ߓߍ߲ ߘߌ߫.

ߞߕߌߞߊ߲ߘߊ ߡߊ߫ ߕߏ߫ ߡߊ߬ߞߎ߲߬ ߘߐ߫ ߞߵߊ߬ ߓߍ߲߬ ߡߏ߬ߤߊ߬ߡߍߘ ߞߊ߲ߕߍ߫ ߣߌ߫ ߊ߬ߟߌ߫ ߛߌ߬ߛߋ߬ ߟߊ߫ ߞߏ ߡߊ߬߸ ߞߏ߫ ߞߵߏ߬ ߟߎ߫ ߓߌ߬ߟߊ߬߸ ߞߵߊ߬ ߕߎ߬ߙߎ ߞߍ߫ ߘߊ߬ߟߎ߬ ߖߐ߲ߖߐ߲߫ ߛߐ߬ߘߐ߲߬ߓߊߟߌߦߊ ߘߴߊ߬ߟߎ߬ ߟߊ߫ ߞߏ ߞߊ߲߬.

ߞߕߌߞߊ߲ߘߊ ߟߊ߫ ߡߌ߬ߣߊ߬ ߞߊ߲߬ ߝߐ ߟߋ߬ ߞߐ ߘߐ߲߫߸ ߡߊ߬ߞߊ߲߬ߞߊ߲߬ߠߌ߲ ߘߏ߲߬ߞߏ ߟߎ߬ ߝߣߊ߫ ߞߊ߬ ߞߎߡߊ ߕߊ߬ ߡߊ߬ߝߌ߲߬ߓߊ߰ߕߐ ߟߎ߬ ߟߊߝߊ߬ߛߊ ߘߌ߫߸ ߏ߬ ߡߍ߲ ߞߏߢߊ ߕߍ߬ߘߍ߫ ߞߊ߬ߙߊ߲߬ߡߐ߰ ߞߊ߲ߕߍ߫ ߓߟߏ߫، ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߡߊ߬ߝߌ߲߬ߓߊ߰ߕߐ ߟߎ߬ ߓߘߊ߫ ߥߊ߯ߕߌ ߡߍ߲ ߞߍ߫ ߟߊ߬ߡߙߊ ߘߐ߫߸ ߏ߬ ߞߊ߬ ߟߊ߬ߟߌ߫ ߓߐ߫، ߏ߬ ߘߐ߫߸ ߞߏ߫ ߞߊ߬ ߓߟߏߓߐ߫ ߊ߬ߟߎ߬ ߘߐ߫ ߡߎ߬ߕߎ߲߬.

ߛߙߊ߬ߣߎ߲ ߛߋ߫ ߘߊ߫ ߞߕߌߘߊ ߖߘߍ߬ߓߊ߬ߞߎ߲ ߕߊ߫ ߓߟߏ߫ ߞߊ߲߬߸ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߡߐ߰ ߘߊ߲ߘߐ߫ ߓߍ߫߸ ߏ߬ ߟߎ߬ ߟߊ߫ ߣߐ߬ߝߍ߬ߜߍ߲߬ߠߌ߲ ߓߘߊ߫ ߛߴߊ߬ ߘߊ߲߭ ߠߊ߫ (ߞߊ߬ ߓߟߏߓߐ߫ ߊ߬ߟߎ߬ ߘߐ߫ ߡߎ߬ߕߎ߲߬ ߝߋߎ߫): ߛߋߞߎ߬ ߞߡߊ߬ߙߊ߬߸ ߗߍߙߑߣߐ߬ ߞߡߊ߬ߙߊ߬߸ ߘߊߎߘߊ߬ ߕߎ߬ߙߋ߸ ߦߊ߬ߞߎߓߊ߬ ߕߙߊߥߟߋ߫߸ ߡߎߛߊ߫ ߞߡߊ߬ߙߊ߬߸ ߊߓߘߎߟߊߦߌ߬ ߖߊߙߋ߫߸ ߡߊߡߊߘߎ߬ ߓߊߙߌ߫߸ ߡߊߡߊߘߎ߫ ߓߐߦߌ߬ ߓߊ߸ ߊߡߊߘߎ߬ ߘߊ߲߬ߛߐ߯߸ ߜߟߏ߬ߞߎ߲߫ ߞߎߦߊߕߍ߫߸ ߊߓߎߓߞߊߙ ߘߊ߲߬ߛߐ߯߸ ߊ߬ ߣߌ߫ ߝߏߘߋ߫ ߞߋߕߊ߬، ߏ߬ ߟߎ߫ ߓߌ߬ߟߊ߬ ߘߊ߫ ߦߙߐ ߏ߬ ߘߐ߫ ߦߋ߲߬ ߌߞߘߐ߫.

ߡߏ߬ߤߊ߬ߡߍߘ ߞߊ߲ߕߍ߫ ߣߌ߫ ߊ߬ߟߌ߫ ߛߌ߬ߛߋ ߟߊ߫ ߞߏߢߊ ߘߐ߫߸ ߊ߬ ߦߋ߫ ߘߊ߫ ߞߏ߫ ߊ߬ߟߎ ߡߐ߰ ߝߌ߬ߟߊ ߡߊ߫ ߞߎ߲߬ߞߏ߬ ߘߐߕߍ߰߸ ߊ߬ߟߎ߬ ߘߌ߫ ߛߋ߫ ߣߐ߭ߡߌ߬ߣߊ߬ ߟߊ߫ ߡߍ߲ ߝߍ߬.

ߡߍ߲ ߓߍ߲߬ ߘߊ߫ ߡߊ߬ߡߊ߬ߘߌ߫ ߛߌ߬ߟߊ߬ ߟߊ߫ ߞߏ ߡߊ߬ ߛߊ߫߸ ߣߴߏ߬ ߦߋ߫ ߕߐߔߑߛߌ߫ ߘߌ߫߸ ߏ߬ ߖߊ߲߬ߞߌ߲߬ ߘߊ߫ ߞߊߙߏ߫ ߥߐ߯ߙߐ߫ ߥߛߎ߫ ߟߋ߬ ߟߊ߫߸ ߊ߬ ߦߋ߫ ߞߋߟߋ߲߫ ߠߋ߬ ߞߍ߫ ߟߊ߫ ߥߛߎ߫ ߘߊߕߎ߲߯ߣߍ߲ ߞߣߐ߫߸ ߞߵߊ߬ ߕߐ߬ ߟߏ߯ߟߎ ߘߐ߲ߘߐ߫ ߊ߬ ߡߊ߬، ߞߵߊ߬ ߟߴߊ߬ ߞߊ߲߬߸ ߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߝߌ߬ߟߊ߫ ߟߋ߬ ߛߙߊ߬ ߟߊ߫ ߢߍ߬ߦߌ߲߬ߘߐ߬ߓߍ߲ ߘߌ߫߸ ߛߊ߬ߙߌ߬ߦߊ߬ ߛߐ߬ߛߐ߬ ߖߡߊ߬ ߟߊ߬ߘߍ ߝߍ߬ߙߍ ߕߍ߱ ߞߏߛߐ߲߬ ߊ߬ ߓߟߏ߫.

ߡߊ߬ߡߊ߬ߘߌ߬ ߛߌ߬ߟߊ߬ ߕߐ߮ ߝߌߟߊߣߊ߲ ߛߊ߫߸ ߏ߬ ߛߐ߲߭ ߦߋ߫ ߘߊ߫ ߛߏ߲߬ߧߊ߬ߟߌ߬ ߖߎ߮ ߟߋ߬ ߘߐ߫، ߏ߬ ߟߋ ߞߏߛߐ߲߬߸ ߞߕߌߘߊ ߞߊ߬ ߛߊ߲߭ ߛߓߊ߬ ߥߛߎ߫ ߟߋ߬ ߟߴߊ߬ ߞߎ߲߬߸ ߞߏ߫ ߊ߬ ߦߋ߫ ߞߋߟߋ߲߫ ߠߋ߬ ߞߍ߫ ߟߴߊ߬ ߞߣߐ߫߸ ߊ߬ ߕߐ߬ ߝߌ߬ߟߊ ߘߌ߫ ߘߐ߲ߘߐ߫ ߊ߬ ߡߊ߬، ߊ߬ ߘߌ߫ ߓߊ߲߫ ߞߊ߬ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߛߊ߬ߓߊ߫ ߛߊ߬ߙߊ߫ ߢߍ߬ߦߌ߲߬ߘߐ߬ߓߍ߲ ߘߌ߫.

ߞߕߌ ߓߊ߲ ߞߐ ߘߐ߫߸ ߞߕߌߞߊ߲ߘߊ ߘߏߡߣߌߞ ߛߋߛߋ߫ ߟߎ߬ߥߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߢߊ ߘߏ߫ ߡߊ߬߸ ߊ߬ ߛߍߥߊߣߍ߲߫، ߓߊߏ߬ ߝߊߦߌߘߊ߫߸ ߕߎ߲߰ ߞߍ߫ ߘߴߊ߬ ߞߐ߫ ߊ߬ ߟߊ߫ ߞߎߡߊ߫ ߝߐߣߍ߲ ߠߎ߬ ߘߐ߫.

ߏ߬ ߟߋ ߞߍ߫ ߘߊ߫ ߞߕߌ ߞߎ߲߬ߝߊ߮ ߘߌ߫߸ ߡߐ߰ ߁߅ ߞߵߊ߬ߟߎ߬ ߞߐߛߊ߬ߦߌ߲߬ ߦߙߐ ߏ߬ ߡߎ߰ߡߍ ߘߐ߫ ߞߊ߬ ߥߊ߫ ߟߎ ߡߊ߬߸ ߊ߬ ߕߐ߬ ߡߐ߰ ߝߌ߬ߟߊ ߟߋ߬ ߟߊߘߏ߲߬ ߘߊ߫ ߥߛߎ ߟߊ߫، ߞߊ߬ߕߎ߲߯߸ ߔߊߞߌߛߦߊ ߟߋ߬ ߛߌ߰ ߘߊ߫ ߛߋ߲߬ߠߊ߫ ߛߌ߯ߙߌ߲߫ ߞߣߐ߫ ߞߏ߲ߞߏߜߍ ߕߍߡߊ߫ ߝߊ߲ ߣߌ߲߬ ߝߍ߬߸ ߞߵߊ߬ ߓߍ߲߬ ߔߏߞߑߟߍ߲߫ ߞߏ ߞߍ߬ߟߍ ߡߊ߬، ߏ߬ ߟߎ߬ ߡߍ߲ ߠߎ߬ ߦߋ߫ ߖߊ߬ߕߋ߬ ߟߊ߫ ߛߌ߯ߙߌ߲߫ ߛߌ߰ߓߊ߮ ߘߏ߫ ߟߎ߫ ߓߟߏ߫ ߟߊ߬ߡߌߣߌ߲ ߘߐߖߊߛߌ߫ ߞߏ ߘߌ߫ ߞߊ߬ߣߌ߲߬.

ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫