ߕߎ߲ߓߊ߬ ߖߊ߬ߞߌ߬ߕߋ߬ ߥߊ߫ ߦߙߐ߫ ߞߋߟߋ߲ ߓߘߊ߫ ߟߐ߲߫߸ ߞߊ߬ ߝߘߊ߫ ߝߘߏ߬ߓߊ߬ ߞߕߌߓߋߟߋ߲ ߠߊ߫ ߟߊ߬ߛߋ߬ߟߌ ߘߏ߫ ߟߊ߫

ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬߸ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߣߴߊ߬ ߕߎ߲߬ ߦߋ߫ ߟߊ߬ߡߙߊ ߘߐ߫ ߞߐ߰ߦߊ߬ ߥߛߎߖߌ߲ߓߊ ߟߊ߫، ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߓߋߟߋ߲ ߞߊ߲߫ ߞߏ߫ ߝߊ߬ߘߌ߬ߘߐ߬ߓߊ߲ ߠߋ߬ ߞߵߊ߬ ߛߐ߬ߘߐ߲߬ ߕߙߊߓߊ ߂߃ ߣߌ߲߬ ߛߎߓߊ߯ߘߊ ߝߍ߬.

ߊߟߎ߫ ߦߴߊ߬ ߟߐ߲߫߸ ߊ߲ ߠߊ߫ ߝߐ߰ߓߍ߬ ߕߊ߬ߡߌ߲߬ߣߍ߲ ߘߏ߫ ߘߐ߫߸ ߊ߲ ߞߵߊ߬ ߦߌ߬ߘߊ߬ ߞߏ߫ ߕߎ߲ߓߊ߬ ߖߊ߬ߞߌ߬ߕߋ߬ ߥߊߣߍ߲߫ ߠߋ߬ ߟߊߓߐ߫ ߟߴߊ߬ ߟߊ߫ ߥߛߎߓߏ߲ߣߍ߲ ߞߣߐ߫ ߞߐ߰ߦߊ߬ ߥߛߎߖߌ߲ߓߊ ߟߊ߫߸ ߡߐ߰ ߟߎ߬ ߓߟߏ߫߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߡߊ߫ ߛߋ߫ ߡߍ߲ ߠߎ߬ ߦߙߐ߫ ߟߐ߲߫ ߠߊ߫، ߒ߬ߓߊ߬߸ ߝߘߏ߬ߓߊ߬ ߞߕߌߓߋߟߋ߲ ߠߊ߫ ߟߊ߬ߛߋ߬ߟߌ ߢߌ߲߬ ߠߋ߬ ߣߊ߬ߣߍ߲߫ ߕߡߊ߬ߖߌ ߓߐ߫ ߟߊ߫ ߞߎߡߊ ߏ߬ ߘߐ߫ ߡߎ߬ߕߎ߲߬ ߛߊ߫، ߓߊߏ߬߸ ߟߊ߬ߛߋ߬ߟߌ߬ ߛߓߍ ߡߍ߲ ߦߋ߫ ߕߋ߲߬߸ ߣߴߊ߬ ߞߟߊ߬ߣߐ߬ߦߊ߬ ߘߊ߫ ߝߊ߬ߟߎ߫ ߘߎ߲߬ߓߎ߬ߦߊ߬ ߓߟߏ߫߸ ߊ߬ߟߋ ߡߍ߲ ߦߋ߫ ߝߘߏ߬ߓߊ߬ ߞߕߌߞߊ߲ߘߊ߫ ߘߌ߫ ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߟߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ ߓߍ߲߬ ߕߎ߲ߓߊ߬ ߝߊ߬ߘߌ߬ ߞߘߐ߬ ߞߏ ߟߊ߫ ߜߟߍ߬ߦߊ ߡߊ߬ ߛߎ ߏ߬ ߘߐ߫߸ <<ߊ߬ ߕߊ߬ ߘߊ߫ ߞߊߟߌߦߊ߫ ߓߟߏ ߡߊ߬ ߏ߬ ߢߊ ߟߋ߬ ߡߊ߬ ߞߵߊ߬ ߟߊߕߊ߯ ߘߊ߯ ߊ߬ߟߌ߬ߡߊߡߌ߲߫ ߛߊ߭ߡߏ߬ߙߌ߬ ߘߊ߲ߘߊߛߏ ߟߊ߫ ߌߞߘߐߞߘߐ߫.>> ߊ߬ ߞߵߊ߬ ߟߊ߫ ߞߎߡߊ ߞߊ߲߬߸ ߞߏ߫ ߕߎ߲ߓߊ߬ ߦߋ߫ ߘߊ߲ߘߊߟߌ ߖߍ߬ߘߍߖߍ߬ߘߍ ߟߋ߬ ߞߘߐ߫ ߦߋ߲߬ ߕߋ߲߬.

ߞߕߌ ߝߊ߰ߡߊ ߟߎ߬ ߞߊ߲߫ ߌ ߞߐ߫߸ ߞߏ߫ ߊ߬ߟߎ߬ ߓߘߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ߸ ߞߊ߬ ߞߍߕߊ ߓߍ߯ ߛߌ߰ ߛߋ߲߬ߠߊ߫. >>ߞߏ ߺ ߏ ߺ ߞߏ߫ ߣߌ߫ ߞߍߟߌ ߦߊ߫ ߞߊ߲߫߸ ߏ߬ ߓߍ߯ ߞߍ ߦߴߌߘߐ߫ […] ߖߐ߲߰ߛߊ߫ ߓߟߏ ߘߌ߫ ߛߌ߰ ߊ߬ ߞߘߐ߫ ߢߊ߫ ߡߊ߬߸ ߡߍ߲ ߞߊ߫ ߢߌ߲߬߸ ߊ߬ ߣߌ߫ ߡߍ߲ ߘߌ߫ ߓߍ߲߬ ߡߐ߰ߦߊ ߡߐ߬ߟߐ߲ ߡߊ߬.>> ߟߊ߬ߛߋ߬ߟߌ ߣߌ߲߬ ߞߵߏ߬ ߝߐ߫. ߞߕߌߓߋߟߋ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߏ߬ ߡߊ߫ ߢߌ߲߬ ߞߍ߫ ߊ߬ߟߎ߫ ߖߍ߬ߘߍߡߊ߬ ߦߋ߲߬ ߕߋ߲߬ ߘߋ߬، ߊ߬ߟߎ߬ ߣߌ߫ ߥߛߎ ߞߏߟߊߕߍ߮ ߟߎ߬ ߣߌ߫ ߘߊ߲ߘߊߟߌߟߊ ߟߎ߬ ߟߊ߫ ߓߍ߲߬ߘߐ ߟߋ߬ ߝߛߊߦߌ߫. ߝߘߏ߬ߓߊ߬ ߞߕߌߓߋߟߋ߲ ߞߵߊ߬ ߦߌ߬ߘߊ߬ ߞߏ߫ ߕߎ߲ߓߊ߬ ߟߊ߫ ߞߏ ߕߴߊ߬ߟߎ߬ ߓߟߏ߫ ߞߏ߫ ߘߋ߲ߣߍ߲߫ ߘߌ߫، ߊ߬ߟߎ߬ <<ߢߊ ߣߴߊ߬ߟߎ߫ ߛߣߐ߬ߡߍ ߟߋ߬ ߦߴߊ߬ ߝߍ߬>>߸ ߊ߬ߟߎ߫ ߘߏ߲߬ ߘߌ߫ ߕߏ߫ ߖߊ߬ߡߊ ߟߊߟߐ߲ߠߌ߲߫ ߠߴߊ߬ ߘߐߞߏ ߓߍ߯ ߟߊ߫߸ ߞߊ߬ ߓߍ߲߬ ߛߊ߬ߙߌ߬ߦߊ߬ ߟߊ߫ ߛߙߊߕߌ߫ ߝߐߣߍ߲ ߠߎ߬ ߡߊ߬ ߟߊ߬ߟߐ߲߬ߠߌ߲߬ߠߌ߲ ߞߊߡߊ߲ ߞߣߐ߫.

ߊߟߎ߫ ߦߴߊ߬ ߟߐ߲߫߸ ߞߏ߲ߞߏߜߍ߫ ߞߊߙߏ߫ ߛߊ߬ߣߍ߲ ߕߋ߬ߟߋ߫ ߉ ߟߋ߬ ߡߊ߬߸ ߕߎ߲ߓߊ߬ ߕߊ߬ ߘߊ߫ ߜߊ߰ߢߊ߬ߜߊ߯ߢߊ ߘߐ߫ ߞߊ߬ ߥߴߊ߬ ߘߌ߫ ߞߐ߰ߦߊ߬߸ ߊ߬ ߟߊ߫ ߝߢߊ ߞߏߛߐ߬.

ߟߊ߬ߛߋ߬ߟߌ ߣߌ߲߬ ߞߍ߫ ߕߎߡߊ ߣߐ߬ ߊ߬ ߛߐ߬ߘߐ߲߬ ߠߊ߫ ߟߋ߬߸ ߕߎ߲ߓߊ߬ ߟߊ߫ ߞߎߡߊ ߕߎ߲߬ ߓߘߊ߫ ߖߡߊ߬ߣߊ ߟߊߝߏ߬߸ ߊ߬ ߝߐ ߦߴߌߘߐ߫ ߢߊ߫ ߛߌߦߊߡߊ߲߫ ߡߊ߬، ߊ߲ߠߎ߬ ߞߏ߬ߣߌ߲ ߘߌ߫ ߛߋ߫ ߡߍ߲ ߝߐ߫ ߟߊ߫߸ ߏ߬ ߟߋ ߞߎ߲߬ߠߊ߬ߛߌ߮ ߕߊ߫ ߝߐߣߍ߲ ߢߌ߲߬ ߘߌ߫، ߐ߲߹ ߕߎ߲ߓߊ߬ ߝߊ߬ߘߌ ߦߋ߫ ߘߌ߬߸ ߊ߬ ߦߋ߫ ߣߐ߰ߦߊ ߞߊ߲߬ ߓߊ߬߸ ߥߟߴߊ߬ ߕߍ߫ ߕߋ߲߬߸ ߏ߬ ߞߎߡߊ߫ ߞߏ߬ߣߌ߲߬ ߡߊ߫ ߝߐ߫ ߛߓߍ ߣߌ߲߬ ߞߣߐ߫، ߓߊߏ߬߸ ߊ߬ ߛߋ߫ ߘߊ߫ ߘߊ߲ߘߊߛߏ ߟߊ߫ ߛߎߓߊ߯ߘߊ ߟߋ߬ ߝߍ߬߸ ߏ߬ ߣߌ߫ ߥߎ߬ߙߊ ߣߌ߲߬ ߕߍߟߊ ߘߐ߫߸ ߊ߬ ߝߊ߬ߘߌ ߟߌ߬ߤߟߊ߬ ߡߊ߫ ߟߐ߲߫ ߒ߬ ߓߟߏ߫.

ߊ߬ ߞߏ߬ߣߌ߲ ߦߌ߬ߘߊ߬ ߘߴߊ߲ ߠߊ߫߸ ߞߏ߫ ߕߎ߲ߓߊ߬ ߕߍ߬ߘߍ߫ ߊ߬ ߞߋߟߋ߲߫ ߠߊ߫ ߟߋ߬ ߥߛߎ ߟߊ߫ ߦߋ߲߬߸ ߞߵߊ߬ ߟߊߞߋ߲߬ߛߎ߬، ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߝߣߊ߫ ߞߊ߬ ߖߊ߲߬ߞߊߙߏ ߝߌ߬ߟߊ߫ ߟߋ߬ ߝߐ߫ ߊ߬ ߟߊ߫ ߞߏ ߘߐ߫߸ ߞߍ߬ߙߍ߲ ߣߌ߫ ߖߋ߬ߟߌ߬ߞߐ߬ߕߊ߲.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫