ߍߛߑߔߊߢߌ߲߬ ߓߘߊ߫ ߛߎߘߊ߲߫ ߞߊ߬ ߕߊ߯ ߟߊ߬ߓߊ߲ ߣߊ߯ߣߌ߲ߢߐ߲߮ ߘߐ߫ ߂߀߂߆ ߖߊ߯ߓߊ߫ ߖߌߟߊߝߍ ߣߌ߲߬ ߝߍ߬߸ ߞߊ߬ ߔߐߙߑߕߎ߳ߜ߭ߊߟ ߘߊ߬ߘߌ߫ ߕߎ߬ ߁-߀ ߞߊ߲߬ ߞߐ߬ߓߊ߬ߟߏ߲ ߣߌ߲߬ ߡߊ߬، ߊ߬ ߕߏ߬ߟߊ߲߬ߕߊ߲ ߜߊ߬ ߘߊ߫ ߟߋ߬ ߞߏߛߓߍ߫، ߟߏ߲ ߗߍ߬ߓߊ߬ ߞߋߟߋ߲ ߞߍ߫ ߘߊ߫ ߡߌߞߍߟ ߡߋߙߌߣߏ߫ ߟߋ߬ ߘߌ߫߸ ߊ߬ߟߋ ߟߋ߬ ߞߊ߬ ߍߛߑߔߊߢߌ߲߬ ߠߊ߫ ߛߎߘߊ߲ ߕߎ߭ ߘߏ߲߬ ߝߙߊ߬ߒ߬ߞߊ߲߬ ߕߎߡߊ ߞߘߐ߫ (߉߀+߁)߸ ߞߵߏ߬ ߞߍ߫ ߙߏߖ߭ߊ߬ ߟߊ߫ ߖߐ߭ ߟߞߊߘߌߣߍ߲ ߘߌ߫، ߞߊ߬ߕߎ߲߯߸ ߞߵߊ߬ ߕߊ߬ ߂߀߁߀ ߡߊ߬ ߤߊ߲߯ ߕߋ߲߬߸ ߍߛߑߔߊߢߌ߲߬ ߕߊ߬ߡߌ߲߬ ߞߏ߬ ߝߟߐ ߟߋ߬ ߞߍߣߴߏ߬ ߘߌ߫ ߟߊ߬ߓߊ߲ ߣߊ߯ߣߌ߲ߢߐ߲߮ ߘߐ߫ ߖߊ߯ߓߊ߫ ߖߌߟߊߝߍ ߝߍ߬.

ߘߊ߬ߟߊ ߟߞߊߘߌ ߒߞߘߐ߫߸ ߍߛߑߔߊߢߌ߲߬ ߞߵߊ߬ ߘߋ߬ߙߌ߬ߣߊ߲߬ߞߏ߬ ߞߘߐ ߘߊߡߌ߬ߣߊ߬߸ ߞߎ߬ߛߊ߲߬ߧߊ ߣߌ߫ ߞߎ߬ߛߊ߲߬ߕߊ߰ߘߌ߬ߦߊ ߘߐ߫، ߡߌߞߍߟ ߏߦߊߙߑߓߖ߭ߊߟ߸ ߟߊ߬ߡߌߣ ߦߊ߬ߡߊߟ߸ ߊ߬ ߣߌ߫ ߊߟߍߞߛ ߓߊߦߋߣߊ߫߸ ߏ߬ ߟߎ߬ ߓߍ߯ ߞߊ߬ ߛߊ߭ ߟߊߓߐ߫ ߞߊ߬ ߓߍ߲߬ߒ߬ߛߋ߲߬ߡߊ߬ ߛߌߦߊߡߊ߲߫ ߖߊ߲߬߸ ߞߊ߬ߕߎ߲߯߸ ߊ߬ߟߎ߫ ߞߵߊ߬ ߝߌ߬ߟߌ߫ ߖߐ߭ ߝߊ߲߭ ߝߍ߬ ߢߊ߫ ߛߌߦߊߡߊ߲߫ ߡߊ߬߸ ߓߊ߬ߙߌ߬ ߔߐߙߑߕߌߖߍ ߟߎ߬ ߟߊ߫ ߖߐ߬ߞߊ߲ߘߊ ߖߜ߭ߏ߫ ߞߐߛߑߕߊ߬ ߞߵߊ߬ߟߎ߬ ߢߍߓߍ߲߬ ߢߊ ߓߍ߯ ߡߊ߬߸ ߞߊ߬ ߓߊ߬ߟߊ߲ ߛߌ߰߸ ߊ߬ߟߎ߬ ߡߊ߫ ߞߏ߫ ߣߐ߬.

ߔߕߏ߬ߞߌ߬ߟߊ߫ ߘߏ߲߬߸ ߏ߬ ߟߎ߬ ߝߣߊ߫ ߞߵߊ߬ߟߎ߬ ߛߎߡߊ߲߫ ߕߊߛߙߊߟߌ ߘߐ߫ ߕߎ߬ߡߊ߬ ߛߌߦߡߊ߲߫، ߣߎߣߏ߫ ߡߍ߲ߘߍߛ ߞߵߊ߬ ߛߎ߮ ߦߌ߬ߘߊ߫ ߞߎ߲߬ߕߊ߰ ߝߟߐ ߘߐ߫߸ ߞߊ߬ ߥߊ߬ߟߏ߲߬ߠߌ߲߫ ߘߍ߬ߜߍ ߘߏ߫ ߞߍ߫߸ ߡߍ߲ ߥߊ߫ ߘߴߊ߬ ߛߌ߰ ߣߍ߱ ߞߊ߲߬ߞߊ߬ߣߍ߲ ߞߎ߲߬ ߛߊ߲ߡߊ߬߸ ߛߌߣߍߣߍ߲߫߸ ߊ߬ ߡߊ߫ ߞߍ߫ ߕߎ߭ ߘߌ߫، ߞߙߌߛߌߦߊߣߏ߫ ߙߏߣߊߟߑߘߏ߫ ߝߣߊ߫ ߞߊ߬ ߓߍ߬ߒ߬ߛߋ߲߬ߡߊ߬ ߓߘߍߓߘߍ߫ ߝߌ߬ߟߊ߫ ߖߊ߲߬߸ ߊ߬ ߡߊ߫ ߛߋ߫ ߖߐ߭ ߟߊߡߊ߰ ߟߊ߫ ߢߊ߫ ߛߌ߫ ߡߊ߬.

ߞߎ߲߬ߕߊ߰ ߝߟߐ ߏ߬ ߓߊ߲ߣߍ߲߸ ߊ߬ߟߎ߬ ߓߍ߯ ߞߵߊ߬ߟߎ߬ ߤߊ߲ߞߟߌߛߌ߰߸ ߞߊ߬ ߞߏ ߟߎ߬ ߥߊ߫ ߢߊ ߡߊߝߟߍ߫ ߖߐ߲ߖߐ߲߫، ߓߍ߬ߒ߬ߛߋ߲߬ߡߊ ߘߐ߯ߦߊ߫ ߘߊ߫ ߡߎ߬ߕߎ߲߬߸ ߤߊߟߌ߬ ߣߌ߫ ߞߊ߬ ߛߐ߬ߘߐ߲߬ ߞߏ߫ ߓߙߎߣߏ ߝߍߙߑߣߊ߲ߘߍߛ ߣߌ߫ ߙߝߊߦߍߟ ߟߊߥߏ߫ ߣߌ߫ ߟߊ߬ߡߌߣ ߦߊ߬ߡߊߟ ߞߵߊ߬ߟߎ߬ ߛߎߡߊ߲߫ ߞߏߓߊ ߟߊߡߊ߰ ߞߏ ߘߐ߫، ߞߏ߬ߣߌ߲߬ ߕߎ߬ߢߊ ߦߋ߫ ߡߍ߲ ߘߌ߫߸ ߔߐߙߑߕߎ߳ߜ߭ߊߟ ߖߐ߬ߞߊ߲ߘߊ ߞߊ߬ ߍߛߑߔߊߢߌ߲߬ ߠߊ߫ ߡߊ߬ߞߊ߲߬ߞߊ߲߬ߠߌ߲ ߞߍߝߊߘߌ ߓߍ߯ ߟߋ߬ ߟߊߕߎ߲߬ߕߎ߲߬߸ ߦߊ߬ߡߊߟ ߞߊ߬ ߞߎ߲߬ߞߊ߲߬ ߕߋߟߋ߲ߣߍ߲ ߘߏ߫ ߟߊߝߟߌ߬߸ ߏ߬ ߞߊ߬ ߕߎ߭ ߛߌߟߊ ߡߌ߬ߣߊ߫ ߟߋ߬ ߝߋߎ߫، ߓߊ߬ߙߌ߬߸ ߖߐ߬ߞߊ߲ߘߊ ߞߵߏ߬ ߟߊ߫ ߛߌߟߊ ߢߊߞߍ߫ ߊ߬ ߡߊ߬߸ ߕߎ߭ ߏ߬ ߡߊ߫ ߘߏ߲߬.

ߤߊߞߍߕߏ߫ ߊ߬ߟߎ߫ ߞߵߊ߬ ߖߊ߬ ߞߊߚߊߕߊߕߊ߫߸ ߓߌ߬ߟߊ߬ߢߐ߲߰ߠߊ ߟߊߓߊ߲߫ ߘߊ߫ ߡߎ߲߬ ߡߊ߬߸ ߏ߬ ߟߋ ߟߊ߬ߖߊ߲߰ߧߊ߬ߟߌ ߘߌ߫، ߍߛߑߔߊߢߌ߲߬ ߟߞߊ߬ߙߊ߲߬ߧߊ߬ߟߌ߬ߟߊ ߟߎ߬ߥߌ ߘߋ߬ ߟߊ߬ ߝߎߍ߲ߕ ߞߊ߬ ߓߐߘߊ ߘߏ߫ ߛߐ߬ߘߐ߲߫ ߘߐ߬ߝߊ߬ߟߋ߲߬ߠߌ߲ ߘߏ߫ ߟߊ߫، ߞߊ߬ߕߎ߲߯߸ ߊ߬ ߞߊ߬ ߝߋߙߊ߲߫ ߕߏߙߍߛ ߟߊߘߏ߲߬߸ ߏ߬ ߟߋ ߞߊ߬ ߡߋߙߌߣߏ߫ ߢߊߦߋ߫ ߓߘߍߞߍ߭߸ ߏ߬ ߝߣߊ߫ ߡߊ߫ ߕߎ߲߬ߞߎߙߎ߲߫ ߖߜ߭ߏ߫ ߞߐߛߑߕߊ߬ ߡߊ߬߸ ߞߊ߬ ߕߏ߬ߟߊ߲ ߓߊ߲ߕߐߟߊ߫ ߓߘߍߓߘߍ ߕߏ߫ ߟߊ߬ߖߊ߲߰ߧߊ߬ߟߌ ߡߌ߬ߛߍ߲߬ ߞߋߟߋ߲ ߘߐ߫ ߡߌ߬ߛߍ߲ ߉߀߲+߁߸ ߞߵߊ߬ ߟߊ߫ ߝߌ߬ߟߌ߫ ߖߐ߭ ߟߊ߫ ߕߎ߬ ߞߋߟߋ߲߫ ߘߌ߫ ߕߋ߲߬߸ ߞߵߏ߬ ߞߍ߫ ߖߌ ߞߍߣߍ߲ ߘߌ߫ ߔߐߙߑߕߎ߳ߜ߭ߊߟ ߟߊ߫ ߡߎ߮ ߘߐ߫.

ߤߊ߯߸ ߟߊ߬ߓߐߟߌ ߣߌ߲߬ ߡߊ߫ ߘߌߦߊ߫، ߞߊ߬ߕߎ߲߯߸ ߞߙߌߛߌߦߊߣߏ߫ ߙߏ߬ߣߊߟߑߘߏ߬ ߟߊ߫ ߖߊ߯ߓߊ߫ ߖߌߟߊߝߍ߫ ߟߊߓߊ߲ ߠߋ߬ ߕߋ߲߬، ߊ߬ ߡߊ߲߬ߞߊ߲ ߕߎߣߎ߲ߣߍ߲߫ ߕߘߍ߬ ߛߊ߫߸ ߞߏ߬ߣߵߊ߬ ߖߌ߰ߘߐ߬ߞߏ߬ߟߏ߲߬ߧߊ߬ߣߍ߲ ߣߴߊ߬ ߢߘߊ ߢߏߏߘߏ߲ߣߍ߲߫ ߘߍ߬ߜߍ ߟߋ߬ ߓߐ߫ ߘߊ߫.

ߞߙߌߛߌߦߊߣߏ߫ ߣߴߊ߬ ߟߊ߫ ߞߐ߲ߘߐ߲߫ ߓߟߋߓߟߋ ߟߎ߬ ߣߴߊ߬ ߕߊ߫߸ ߊ߬ ߣߴߊ߬ ߟߊ߫ ߕߐ߯ߕߌ߯߯ߦߊ ߣߴߊ߬ ߕߊ߫߸ ߖߊ߯ߓߊ߫ ߖߌߟߊߝߍ ߡߊ߫ ߛߋ߫ ߓߌ߬ߟߊ߬ ߟߴߊ߬ ߟߊ߫ ߘߏ߬ߣߌ߲ ߘߐ߫ ߝߋߎ߫، ߊ߬ ߞߊ߬ ߝߌ߲ߛߌ ߘߐߓߍ߲߬߸ ߖߐ߲߰ߛߴߊ߬ ߘߴߊ߬ ߛߌ߰ ߊ߬ ߞߎ߲߬߸ ߒ߬ߞߊ߬ ߖߊ߬ߡߊ ߓߍ߯ ߡߊ߫ ߛߋ߫ ߞߢߊ߫ ߟߊ߫ ߕߏ߬ߟߊ߲ ߘߐ߫߸ ߊ߬ ߟߊ߫ ߛߌ߬ߓߏ ߞߍ߫ ߘߊ߫ ߖߌߜߍ߫ ߟߊ߫ ߛߌߓߏ ߘߌ߫.

ߍߛߑߔߊߢߌ߲߬ ߣߌ߫ ߓߍߟߑߖ߭ߌߞ ߟߋ߬ ߞߊ߫ ߞߊ߲߫ ߞߊ߬ ߢߐ߲߯ߓߍ߲߬ ߟߊ߬ߓߊ߲ ߣߊ߯ߣߌ߲ߢߐ߲߮ ߘߐ߫ ߛߌ߬ߣߌ߲߬ߟߏ߲߫ ߣߊ߬ߕߐ ߡߊ߬.