ߊ߲ ߠߊ߫ ߡߊ߲߬ߘߋ߲߫ ߝߘߏ߬ߓߊ߬ ߞߊ߲ ߡߟߋߞߎߦߊ ߣߴߊ߬ ߞߊ߲ߜߍ ߘߐ߫߸ ߣߊ ߕߐ߮ ߓߊ߯ ߟߵߊ߬ ߘߋ߲ ߕߐ߮ ߞߊ߲߬߸ ߊ߬ ߣߌ߫ ߘߋ߲ ߕߐ߮ ߦߋ߫ ߟߴߊ߬ ߣߊ߬ ߕߐ߮ ߞߊ߲߬ ߸ ߏ߬ ߟߎ߬ ߕߍ߫ ߞߘߐ߫ ߞߋߟߋ߲߫ ߘߌ߫ ߡߎ߰ߡߍ߫، ߓߊ߬ߙߌ߬߸ ߞߊ߲ ߟߐ߲ߓߊߟߌߦߊ ߡߊ߬߸ ߏ߬ ߝߍ߬ߓߊ ߓߘߊ߫ ߘߏ߲߬ ߊ߲ ߠߊ߫ ߞߊ߲ ߘߐ߫ ߕߎ߬ߓߊ߬ߓߎ߬ ߞߊ߬ߙߊ߲߬ߠߊ ߟߎ߬ ߓߟߏ߫. ߒ߬ߓߊ߬߸ ߏ߬ ߝߌ߬ߟߊ ߝߊߙߊ߲ߝߊ߯ߛߌ ߝߟߍ߫:

߁߭.  ߣߊ ߕߐ߮ ߟߴߊ߬ ߘߋ߲ ߞߊ߲߬߸ ߏ߬ ߞߘߐ ߟߋ߬ ߞߏ߫ ߣߊ ߟߋ߬ ߕߊ߫ ߦߋ߫ ߘߋ߲ ߏ߬ ߘߌ߫، ߓߊߏ߬߸ ߞߍߒߞߊ߲ߠߌ߲ ߕߐ߲ߛߋ߲߫ ߝߌߟߊߣߊ߲ ߘߐ߫߸ ߞߎߡߊߘߋ߲߫ ߝߟߐ ߟߋ߬ ߕߊ߫ ߦߋ߫ ߝߌߟߊߣߊ߲ ߘߌ߫، ߦߏ߫: ߣߛߌ߬ ߓߏ߸ ߛߟߎߞߎ߫ ߝߊߟߊ߲... ߊ߬ ߦߴߏ߬ ߢߊ߫ ߞߋߟߋ߲߫ ߠߋ߬ ߡߊ߬߸ ߣߌ߫ ߣߊ ߕߐ߮ ߞߍ߫ ߘߊ߫ ߝߟߐ߫ ߘߌ߫߸ ߞߊ߬ ߘߋ߲ ߕߐ߮ ߕߎ߲߬ ߏ߬ ߟߊ߫߸ ߏ߬ ߞߘߐ ߟߋ߬ ߞߏ߫ ߣߊ ߟߋ߬ ߕߊ߫ ߦߋ߫ ߘߋ߲ ߘߌ߫، ߦߏ߫: ߛߣߊ߬ߓߊ߬ ߛߏߙߌ߸ ߝߊ߲ߕߊ߫ ߓߟߊ߸ ߖߊ߰ߞߊ߬ ߡߊ߯ߘߌ߫... ߏ߬ ߞߘߐ ߟߋ߬ ߞߏ߫ ߛߣߊ߬ߓߊ߬ ߘߋ߲ ߠߋ߬ ߛߏ߬ߙߌ߬ ߘߌ߫߸ ߝߊ߲ߕߊ߬ ߕߊ ߟߋ߬ ߓߊ߬ߟߊ ߘߌ߫߸ ߖߊ߰ߞߊ ߘߋ߲ ߠߋ߬ ߡߊ߰ߘߌ߬ ߘߌ߫. ߒ߬ߓߊ߬߸ ߞߎ߬ߙߎ߲߬ߘߎ ߢߌ߲߬ ߠߋ߬ ߞߏߛߐ߲߬߸ ߘߋ߲ ߕߐ߮ ߦߋ߫ ߞߍ߫ ߟߊ߫ ߛߊ߲ߡߊߞߎߡߊ ߘߌ߫ ߞߘߊߎ߫߸ ߤߊߟߌ߬ ߣߴߊ߬ ߛߎ߲ ߞߍ߫ ߘߊ߫ ߘߎ߰ߡߊ߬ߞߎߡߊ ߘߌ߫.

߂߲. ߣߌ߫ ߘߋ߲ ߕߐ߮ ߟߊ߫ ߘߴߊ߬ ߣߊ߬ ߕߐ߮ ߞߊ߲߬߸ ߏ߬ ߦߴߊ߬ ߦߌ߬ߘߊ߬ ߟߋ߬ ߞߏ߫ ߘߋ߲ ߏ߬ ߡߏ߬ߛߏ ߟߋ߬ ߊ߬ ߣߊ߬ ߘߌ߫ (ߒ ߘߊ߫ ߖߟߊ߫ ߟߊ߫)، ߓߊߏ߬߸ ߊ߲ ߠߊ߫ ߞߊ߲ ߡߟߋߞߎߦߊ ߛߏ߯ߙߏߢߊ ߘߐ߫߸ ߗߍ߭  ߟߋ߬ ߕߐ߮ ߦߋ߫ ߟߊ߫ ߟߴߊ߬ ߡߏ߬ߛߏ ߞߊ߲߬، ߓߊߏ߬߸ ߊ߲ ߓߘߴߊ߬ ߝߐ߫ ߞߏ߫ ߕߐ߯ ߝߟߐ ߕߊ ߟߋ߬ ߕߐ߯ ߝߌߟߊߣߊ߲ ߘߌ߫، ߟߊߒߡߊ߫ ߘߐ߫߸ ߗߍ߭ ߡߍ߲ ߕߐ߯ ߞߏ߫ ߛߌߘߌ߬߸ ߊ߬ ߡߏ߬ߛߏ ߕߐ߯ ߞߏ߫ ߝߊ߲ߕߊ߬߸ ߏ߬ ߕߐ߮ ߘߌ߫ ߟߴߊ߬ ߡߏ߬ߛߏ ߕߐ߮ ߞߊ߲߬ ߞߏ߫ (ߛߘߌ߫ ߝߊ߲ߕߊ)، ߊ߬ ߘߏ߫ ߜߘߍ߫ ߟߎ߫ ߝߟߍ߫: ߡߊ߰ߘߌ߬ ߛߊߘߊ߲߬، ߓߊߛߓߊߕߌ߫ ߛߊߘߊ߲߬߸ ߡߊ߲߬ߘߋ߲߬ߞߊ߬ ߛߊߘߊ߲߬߸ ߡߏߙߌ߫ ߖߣߍ...

ߏ߬ ߓߟߏߡߊ߬߸ ߡߐ߱ ߡߍ߲ ߠߎ߬ ߣߊ߬ ߕߐ߮ ߦߋ߫ ߟߊ߫ ߟߴߊ߬ߟߎ߫ ߞߊ߲߬ ߞߊ߬ߙߊ߲߬ߕߊ ߟߊ߫߸ ߏ߬ ߦߋ߫ ߝߙߋߞߋߓߊ ߟߋ߬ ߘߌ߫ ߡߊ߲߬ߘߋ߲߬ ߞߊ߲ ߘߐ߫߸ ߞߊ߬ߕߘߍ߬ ߊ߬ߟߎ߬ ߡߴߊ߬ ߟߐ߲߫، ߞߵߊ߬ ߝߐ߫ ߓߌ߲ߕߎ߫ ߛߋߞߎ߬ ߡߊ߬ ߞߏ߫ ߛߋߞߎ߬ ߓߌ߲ߕߎ߬߸ ߢߊ߰ߟߋ߲߬ ߡߊ߯ߘߌ߫  ߞߏ߫ ߡߊ߬ߡߊ߬ߘߌ߫ ߢߊ߰ߟߋ߲߸ ߊ߬ߛߊ߬ ߡߏߙߌ߬ ߡߊ߬  ߡߏߙߌ߬ ߊߛߊ߬....

ߒ߬ߓߊ߬߸ ߞߊ߲ ߞߕߐߡߊߝߐߟߌ ߏ߬ ߟߋ ߓߘߊ߫ ߞߍ߫ ߛߊ߲ߞߊߥߟߌ ߘߌ߫ ߓߌ߬ ߊ߲ ߠߊ߫ ߕߎ߬ߓߊ߬ߓߎ߬ߟߊ߬ߡߐ߮ ߟߎ߬ ߓߟߏ߫.

ߏ߬ ߘߐ߫߸ ߌ ߓߊ߯ ߡߌ߬ߙߌ߲߬ߘߌ ߟߊ߫ ߞߊ߲ ߓߐ߫ ߊ߬ ߡߎ߬ߙߊ߲ ߞߣߐ߫ ߕߎ߲߫߸ ߊ߬ ߦߋ߫ ߞߍ߫ ߟߊ߫ ߝߙߋߞߋ ߟߋ߬ ߘߌ߫ ߞߊ߲ ߞߣߐ߫. ߒ ߞߙߊ߬ߡߐ߯ ߡߊ߬ߡߊ߬ߘߌ߬ ߞߐ߲ߘߍ߫ ߒߞߏ ߞߊ߬ ߏ߬ ߟߋ ߝߐ߫ ߞߏ߫ (ߊ߲ ߧߋ߫ ߢߐ߲߮ ߢߊߟߋ߫ ߟߊ߫ ߘߋ߬ߙߌ ߟߋ߬ ߡߊ߬߸ ߊ߲ ߕߍ߫ ߢߐ߲߮ ߢߊߦߋ߫ ߟߊ߫ ߞߊ߲ ߞߎ߬ߙߎ߲߬ߘߎ ߡߊ߬)، ߣߵߏ߬ ߕߍ߫߸ ߣߊ߭ ߕߍ߫ ߓߌ߬ߟߊ߬ ߘߋ߲ ߡߛߏ߬ߦߊ ߘߊߞߎ߲ ߘߐ߫ ߝߋߎ߫. ߏ߬ ߟߋ ߞߏߛߐ߲߬߸ ߒ ߞߵߊ߬ ߝߐ߫ ߞߏ߫ ߊ߲ ߠߊ߫ ߡߟߋߞߎߦߊ ߝߊ߱ ߟߴߌߘߐ߫ ߥߊߟߌ߫ ߡߐ߮ ߟߎ߬ ߓߟߏ߫.

ߞߎߡߊ߫ ߟߊߓߊ߲ ߘߐ߫߸ ߡߊ߲߬ߘߋ߲߬ߞߊ ߟߎ߫ ߞߊ߬ ߣߊ ߟߋ߬ ߕߐ߮ ߟߊ߫ ߘߋ߲ ߞߊ߲߬ ߞߵߏ߬ ߞߍ߫ ߝߊߙߊ߲ߝߊ߯ߛߌߟߊ߲ ߘߴߊ߬ ߕߐ߯ߡߊ߲߫ ߞߙߎ ߟߎ߬ ߕߍߡߊ߬߸ ߞߊ߬ ߝߊ߭ ߛߌ ߟߴߊ߬ ߞߊ߲߬߸ ߞߴߏ߬ ߞߍ߫ ߊ߬ ߟߊ߫ ߖߘߍ߬ߥߟߏ߬ߦߊ ߣߴߊ߬ ߟߊ߫ ߡߊ߲߬ߕߎ߬ߙߋ߬ߦߊ ߓߊ߲ߓߊ߲߫ ߝߋ߲ ߘߌ߫.

ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߓߊ߬ ߓߟߏ߫߸ ߡߊ߲߬ߘߋ߲߬ ߕߐ߯ߞߏ ߞߟߊ߬ߡߊ߬ߓߊ߮߸ ߞߊ߬ ߓߐ߫ ߥߎߟߘߊ ߣߐ߯ߣߐ߯߸ ߛߌ߯ߙߌ߲߫ ߛߌ߰ߓߊ߮.