ߒߞߏ ߓߊߛߌߦߊ ߣߴߊ߬ ߘߊ߲ߘߊߟߌ ߘߍ߭ (ߒ.ߓ.ߘ) ߞߊ߬ ߟߊ߬ߛߋ߬ߟߌ߬ ߞߟߊߒߞߋ߫ ߟߋ߬ ߞߍ߫ ߞߎߣߎ߲ߟߏ߲ ߣߌ߲߬ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߊ߫ ߘߍ߬ߞߙߎ ߕߍ߫ ߞߙߎߝߓߊ߫ ߝߏߦߌ߬ ߛߌ߲߬ߝߏ߲߬ ߘߌ߫، ߊ߬ ߖߍ߬ߘߍ߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߞߙߎߝߓߊ ߡߍ߲ ߠߊ߫ ߞߎߡߊ ߦߴߌߘߐ߫߸ ߛߓߍ߫ ߕߴߊ߬ ߟߊ߫.

ߊ߬ߟߎ߬ ߟߊ߫ ߟߊ߬ߛߋ߬ߟߌ ߣߌ߲߬ ߞߍ߫ ߘߴߊ߬ߟߎ߬ ߓߟߏ߫ ߝߊ߲ߓߊ ߟߋ߬ ߟߊ߫߸ ߞߊ߬ߙߊ߲߬ߕߊ߫ ߛߌ߬ߘߊ߬ߝߊ߫ ߛߊ߬ߣߐ߬ ߟߊ߫ ߞߊ߲ߞߊ߲߫، ߒ.ߓ.ߘ ߞߏߟߊߕߍ߮ ߟߎ߫ ߞߵߊ߬ ߦߌ߬ߘߊ߬ ߞߏ߫ ߟߊ߬ߘߍ ߡߍ߲ ߞߍ߫ ߘߊ߫ ߂߀߂߆ ߕߙߊߓߊ ߕߋ߬ߟߋ߫ ߂߇ ߡߊ߬ ߞߊ߲ߞߊ߲߫ ߡߙߊ߬ߘߊ߬ߓߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߟߊ߫ (ߡߜߗ)߸ ߞߏ߫ ߊ߬ߟߎ߬ ߕߍ߫ ߞߙߎߝߓߘߊ߫ ߛߌ߲߬ߝߏ߲߬ ߘߌ߫.

<<ߊ߲ ߡߊߞߟߌ߫ ߘߊ߫ ߟߊ߬ߘߍ ߘߏ߫ ߟߋ߬ ߡߊ߬ ߞߊ߲ߞߊ߲߫ ߡߊ߬ ߡߙߊ߬ߘߊ߬ߓߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߟߊ߫߸ ߏ߬ ߟߊ߬ߘߍ ߏ߬ ߞߣߐߡߊ߬߸ ߊ߲ ߥߊ߫ ߘߴߊ߬ ߦߋ߫ ߞߏ߫ ߞߙߎߝߓߊ ߘߏ߫ ߟߋ߬ ߟߊ߫ ߛߓߍߘߊ߫ ߟߊߛߌ߮ ߦߋ߫، ߏ߬ ߞߵߊ߬ ߢߊߦߌߘߊߞߊ߬߸ ߞߏ߫ ߘߍ߬ߞߙߎ ߓߍ߯ ߞߊ߫ ߞߊ߲߫ ߞߊ߬ ߘߏ߲߬ ߞߙߎߝߓߊ ߏ߬ ߘߐ߫.>>

ߒ.ߓ.ߘ ߛߌ߲߬ߝߏ߲ ߠߎ߫ ߞߵߊ߬ߟߎ߬ ߟߊ߫ ߘߍ߭ ߛߌ߰ ߞߎ߲ߧߊ ߘߊ߲߬ߠߊߕߍ߰߸ ߞߊ߬ ߞߍߕߊ ߟߎ߬ ߞߍߟߌ ߛߙߊߕߌ ߟߎ߬ ߝߐ߫، ߞߊ߬ ߓߍ߲߬ ߒ.ߓ.ߘ ߣߌ߫ ߘߍ߬ ߜߘߍ߫ ߟߊ߫ ߓߊ߯ߙߊߢߐ߲߯ߦߊ ߣߌ߫ ߞߏ߫ ߜߘߍ ߕߐ߬ߡߊ ߟߎ߫ ߡߊ߬. <<ߛߓߍߘߊ ߟߋ߬ ߞߋߟߋ߲߫ ߖߊߙߋߣߍ߲߫߸ ߞߊ߬ ߘߍ߬ߞߙߎ ߟߊߘߏ߲߬ ߞߙߎߝߓߊ ߘߏ߫ ߘߐ߫߸ ߥߟߊ߫ ߞߊ߬ ߓߊ߯ߙߊߢߐ߲߯ߦߊ ߟߊߘߏ߲߬ ߒ.ߓ.ߘ ߘߍ߬ߞߙߎ ߣߌ߫ ߘߍ߬ߞߙߎ߬ ߜߘߍ߫ ߕߍ߫.>> ߊ߬ߟߎ߫ ߞߵߊ߬ ߝߐ߫ ߞߵߊ߬ ߟߊߕߍ߰߸ ߞߏ߫ ߒ.ߓ.ߘ ߛߌ߲߬ߝߏ߲߬ ߜߘߍ߫ ߛߌ߫ ߕߴߛߋ߫ ߒ.ߓ.ߘ ߕߐ߮ ߟߊߓߊ߯ߙߊ߫ ߟߊ߫ ߘߊߞߎ߲߫ ߜߘߍ߫ ߘߐ߫߸ ߣߌ߫ ߘߍ߬ߞߙߎ ߛߓߍߘߊ ߕߴߊ߬ ߞߊ߬ߟߊߡߊ߬، ߣߴߏ߬ ߡߍ߲ ߞߍ߫ ߘߊ߫߸ ߊ߬ߟߎ߬ ߟߊ߫ ߕߌ߬ߦߊ߬ ߕߴߏ߬ ߟߊ߫.

 ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߞߋߟߋ߲ ߣߌ߲߬ ߘߐ߫߸ ߓߊߛߌߦߊ߫ ߘߍߞߙߎ ߣߌ߲߬ ߞߵߊ߬ ߟߊߛߋ߫ ߞߏ߫ ߞߙߎߝߓߊ ߡߍ߲ ߠߊ߫ ߞߎߡߊ ߦߴߌߘߐ߫ ߣߌ߲߬߸ ߊ߬ߟߎ߬ ߟߊ߫ ߢߊߢߌߣߌ߲ߠߌ߲ ߞߐߝߟߌ ߞߵߊ߬ ߦߌ߬ߘߊ߬ ߞߏ߫ ߛߓߍ߫ ߕߴߊ߬ ߟߊ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߘߌ߬ߢߍ߬ߛߓߍ، <<ߢߊߢߌߣߌ߲ߠߌ߲ ߠߎ߬ ߓߍ߯ ߞߐߝߍ߬߸ ߞߙߎߝߓߊ ߟߊ߫ ߞߏ ߡߊ߬߸ ߡߍ߲ ߦߴߊ߬ ߞߊ߲ߕߌ߮ ߘߌ߫ ߞߊ߲ߞߊ߲߫ ߡߙߊ߬ߘߊ߬ߓߊ ߞߣߐ߫߸ ߏ߬ ߓߘߴߊ߬ ߦߌ߬ߘߴߊ߲ ߠߊ߫ ߞߏ߫ ߊ߬ ߡߊ߫ ߛߓߍ߫ ߛߐ߬ߘߐ߲߬߸ ߊ߬ ߘߌ߫ ߛߋ߫ ߡߍ߲ ߦߌߘߊߞߊ߬ ߟߴߊ߲ ߠߊ߫߸ ߡߍ߲ ߘߌ߫ ߛߋ߫ ߞߍ߫ ߟߴߊ߲ ߖߌ߰ߡߝߊ߬ ߞߏ߫ ߘߌ߫.>> ߊ߬ߟߎ߫ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߘߍ߬ ߛߌ߲ߝߏ߲ ߓߍ߯ ߟߊ߫ ߏ߬ ߟߋ ߘߐ߫߸ ߞߏ߫ ߒ.ߓ.ߘ ߡߊ߫ ߘߏ߲߬ ߞߙߎߝߓߊ߫ ߛߌ߫ ߘߐ߫.

ߓߊߛߌߦߊ߫ ߘߍߞߙߎ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ ߞߏߟߊߘߍߢߐ߲߮ ߓߍ߯ ߦߋ߫ ߟߊ߬ߛߋ߬ߟߌ ߣߌ߲߬ ߟߴߊ߬ߟߎ߫ ߞߌ߬ߦߊ߬ ߓߟߏ߫ ߞߊ߲߬߸ ߞߊ߬ ߓߍ߲߬ ߘߊߞߎ߲߫ ߣߊ߬ߕߐ ߟߎ߫ ߡߊ߬.