ߡߍ߲ ߦߋ߫߸ ߖߌ߬ߦߊ߬ߖߟߎ ߦߋ߫ ߡߌ߬ߙߌ߲߬ߘߌ ߟߊ߫ ߟߐ߲ߠߌ߲ߦߊ ߣߴߊ߬ ߟߊ߫ ߛߏߡߐ߯ߦߊ ߦߌ߬ߘߊ߬ߟߊ߲߬ ߞߍ߲ߘߍ ߘߏ߫ ߟߋ߬ ߘߌ߫ ߓߌ߬ ߞߊ߬ߞߎ߬ߘߊ߬ ߕߟߋ ߢߌ߲߬ ߘߐ߫. ߊ߬ߟߋ߫ ߟߋ߬ ߞߍ߫ ߟߊ߫ ߛߊߓߎ߫ ߘߌ߫ ߞߊ߬ ߡߌ߬ߙߌ߲߬ߘߌ ߦߌ߬ߘߊ߫ ߡߊ߲߬ߕߏ߲߬ߕߍ ߓߙߊߞߣߍ ߘߐ߫، ߏ߬ ߟߋ ߞߏߛߐ߲߬߸ ߛߏߘߌߦߊߞߏ ߓߌ߬ߟߊ߬ߣߍ߲߫ ߛߋ߲߬ߠߊ߫ ߖߌ߬ߣߍ߬ ߞߣߐ߫ ߟߋ߬߸ ߛߴߊ߲ ߠߊ߫ ߕߐ߮ ߟߎ߬ ߣߌ߫ ߒ߬ ߛߌ߰ ߢߊ ߟߎ߬ ߣߌ߫ ߒ߬ ߠߊ߫ ߓߊߘߋ߲ߧߊ ߟߎ߬ ߘߌ߫ ߦߌ߬ߘߊ߫ ߒ߬ ߘߋ߲ ߠߎ߬ ߟߊ߫. ߊ߬ ߘߏ߲߬ ߞߵߏ߬ ߢߊ߬ ߟߋ߬ ߕߎ߬ߡߊ߬ ߖߏߣߊ ߟߎ߬ ߟߊ߫ ߝߛߊߦߌ߫، ߓߊߏ߬߸ ߛߏߘߌߦߊ߫ ߞߊ߬ ߖߏ߯ߘߏ߲ ߡߍ߲ ߞߍ߫ ߕߎ߬ߡߊ ߏ߬ ߟߊ߫߸ ߏ߬ ߡߊ߫ ߞߍ߫  ߞߟߐ߬ߞߟߐ߬ ߘߌ߫. ߓߊߏ߬߸ ߌ ߕߘߍ߬ ߕߍ߫ ߓߊ߲߫ ߝߟߐ߫ ߛߏߘߌߦߊ߫ ߡߊߝߟߍ߫ ߟߊ߫ ߝߋߎ߫߸ ߣߴߌ ߢߊߖߌ ߡߊ߫ ߓߐ߫߸ ߥߟߊ߫ ߞߊ߬ ߡߛߌ߬ߡߛߌ߬.

ߒ߬ߓߊ߬߸ ߡߍ߲ ߓߍ߲߬ߣߍ߲߫ ߕߐ߯ߞߏ ߡߊ߬߸ ߝߟߐ߫ ߛߏߘߌߦߊ߫ ߟߊߓߐߟߊ ߟߎ߫ ߕߘߍ߬ ߦߋ߫ ߡߊ߲߬ߘߋ߲߬ ߕߐ߮ ߟߎ߬  ߟߊ߫ ߟߴߊ߬ߟߎ߫ ߖߘߍ߬ ߟߊ߫  ߖߌ߬ߟߊ߬ߖߟߎ߬ ߟߊ߬ߓߐ ߕߎߡߊ، ߦߏ߫: ߞߏ߬ߟߏ߲߬߸ ߖߊ߲߬ߞߊ߬ߝߏߘߋ߬߸ ߒ ߡߊ߫ ߘߛߎ߬ߓߊ߫߸ ߥߊ߲߬ߞߊ߸ ߣߊߞߊ߬ߣߌ߲߬، ߊ߬ ߣߌ߫...

ߕߐ߮ ߏ߬ ߟߎ߫ ߕߘߍ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߒߞߏ߫ ߝߐߟߊ ߟߎ߫ ߟߋ߬ ߛߏߘߌߦߊ߫ ߘߐ߫߸ ߡߍ߲ ߠߎ߬ ߦߴߊ߬ ߞߊ߲߬ ߞߵߊ߬ߟߎ߬  ߟߊ߫ ߕߐ߯ ߓߘߍ ߟߎ߫ ߦߌ߬ߘߊ߬ ߘߎߢߊ߫ ߟߊ߫. ߊ߬ ߘߏ߲߬߸ ߛߏߘߌߦߊ߫ ߡߊߝߟߍߟߊ ߦߋ߫ ߛߏߘߌߦߊ߫ ߖߌ߰ ߟߊ߫ ߛߍ߬ߓߍ ߟߋ߬ ߘߌ߫، ߏ߬ ߘߐ߫߸ ߊ߬ ߕߐ߮ ߟߎ߬ ߡߊ߲߫ ߞߊ߲߫ ߞߊ߬ ߞߍ߫ ߦߟߍߡߊߞߏ߫ ߕߐ߮ ߟߎ߫ ߘߌ߫߸ ߦߏ߫ ߊ߲ ߓߌ߬ ߕߟߋ ߝߊ߲߬ߓߊ ߛߏߘߌߦߊ߫ ߕߐ߮ ߝߊ߲߬ߓߊ ߓߍ߫ ߢߊ ߡߍ߲، ߌ ߓߊ߯ ߕߐ߮ ߟߎ߬ ߘߏ߫ ߟߎ߫ ߡߍ߲߫߸ ߌ ߕߍ߫ ߝߏߦߌ߬ ߛߐ߬ߘߐ߲߬ ߠߴߊ߬ ߘߐ߫ ߝߏ߫ ߦߟߍ ߥߟߊ߫ ߊߙߊߓߎ߫ ߕߐ߮.

ߣߌ߫ ߡߐ߰ ߞߊ߬ ߡߊ߬ߟߌ ߖߌ߬ߦߊ߬ߖߟߎ ߘߏ߫ ߟߎ߫ ߡߊߝߟߍ߫߸ ߦߏ߫ ߛߋߞߎ߫ ߝߊ߰ߡߊ ߟߎ߬ (ߙߏ߬ߥߊ ߘߋ߬ ߛߋߞߎ߫)߸ ߏ߬ ߟߎ߬ ߟߊ߫ ߕߐ߮ ߓߍ߯ ߦߋ߫ ߜߟߏ߬ߝߌ߲߬ ߕߐ߮ ߟߋ߬ ߘߌ߫߸ ߥߊߟߌ߫ ߕߐ߯ ߞߋߟߋ߲߫ ߔߋ߫ ߕߍ߫ ߡߍ߲ ߘߐ߫، ߏ߬ ߘߏ߲߬ ߞߊ߬ ߛߊ߲ߞߊ ߕߊ߬ ߡߊ߲߬ߘߋ߲߬ ߖߡߊߣߊ ߟߎ߬ ߞߣߐ߫ ߟߋ߬ ߝߛߊߦߌ߫߸ ߞߎߡߊߕߍ߫ ߘߎߢߊ߫ ߞߊߓߋ ߡߊ߬، ߝߣߊ߫߸ ߊ߬ߟߎ߬ ߝߊߘߌߦߊߓߐ ߣߴߊ߬ߟߎ߬ ߓߟߏߝߋ߲ ߓߍ߯ ߞߍ߫ ߘߊ߫ ߝߘߊ߬ߝߌ߲߬ ߝߋ߲ ߠߋ߬ ߘߌ߫. 

ߝߏ߫ ߊ߲ ߠߊ߫ ߛߏߘߌߦߊ߫ ߟߊߓߐߟߊ ߟߎ߬ ߦߴߊ߬ ߟߐ߲߫ ߠߋ߬ ߞߏ߫ ߊ߬ߟߎ߬ ߦߋ߫ ߦߟߌߡߊߛߙߋ ߟߋ߬ ߘߌ߫ ߡߌ߬ߙߌ߲߬ߘߌ ߓߟߏ߫߸ ߓߍ߯ ߦߋ߫ ߡߍ߲ ߠߎ߬ ߟߊ߫ ߞߎߡߊ ߣߴߊ߬ߟߎ߬ ߟߊ߫ ߞߍߕߊ ߟߊߘߍ߲߰ ߠߊ߫ ߕߋ߬ߟߋ ߞߘߐ߫ ߞߘߊߎ߫. ߏ߬ ߡߊ߬߸ ߊ߬ߟߎ߬ ߦߴߊ߬ߟߎ߬ ߘߐߖߊ߬ ߞߊ߬ ߡߊ߲߬ߘߋ߲߬ ߕߐ߯ߞߏ ߞߍ߫ ߛߍ߬ߓߍ ߖߍ߬ߘߍߖߍ߬ߘߍ ߘߴߊ߬ߟߎ߬ ߟߊ߫ ߖߌ߬ߦߊ߬ߖߟߎ ߟߎ߬ ߘߐ߫، ߏ߬ ߓߊ߯ ߞߍ߫߸ ߊ߲ ߠߊ߫ ߕߐ߮ ߟߎ߬ ߘߌ߫ ߘߌߦߊ߫ ߡߐ߱ ߟߎ߬ ߦߋ߫߸ ߊ߬ߟߎ߬ ߘߴߊ߬ ߦߋ߫ ߛߓߍ߬ߞߏ ߝߣߊ߫ ߘߌ߫.

ߟߊߒߡߊ߫ ߘߐ߫߸ ߣߌ߫ ߡߐ߱ ߡߍ߲ ߠߊ߫ ߓߊ߯ߙߊ ߞߍ߫ ߘߊ߫ ߢߊ߬ߟߌ ߣߌ߫ ߛߐߟߌ ߘߌ߫ ߛߏߘߌߦߊ߫ ߘߐ߫߸ ߏ߬ ߦߋ߫ ߕߐ߯ߟߊ߫ ߟߊ߫ ߞߏ߫ (ߝߏߣߌ߲ߛߙߋ߫)، ߡߍ߲ ߓߊ߫ ߞߍ߫ ߖߊ߬ߡߊ ߖߌ߱ ߘߌ߫߸ ߏ߬ ߦߋ߫ ߞߟߌ߫ ߞߏ߫ (ߦߙߌߓߊ߫) ߤߊߡߊ߲߫ (ߢߡߊ߬ߞߏߙߏ߲߫)، ߡߍ߲ ߓߊ߯ ߞߍ߫ ߗߍ߬ ߝߊߘߌ߲ ߣߌ߫ ߞߟߏߞߕߏ ߘߌ߫߸ ߏ߬ ߕߐ߮ ߦߋ߫ ߞߍ߫ (ߖߘߊ߬) ߘߌ߫ ߥߟߊ߫ (ߝߊ߬ߥߊߣߌ߲߫)، ߡߍ߲ ߠߊ߫ ߓߊ߯ߙߊ ߓߊ߯ ߞߍ߫ ߡߊ߲߬ߛߊ߬ߦߊ ߘߌ߫߸ ߏ߬ ߕߐ߮ ߘߌ߫ ߞߍ߫ ߞߏ߫ (ߝߊ߭ߡߊ߬ߜ߭ߊ߲߬)، ߡߍ߲ ߘߏ߲߬ ߟߐ߬ߘߎ߮ ߓߊ߫ ߞߍ߫ ߖߎ߯ߦߊ ߘߌ߫߸ ߏ߬ ߘߌ߫ ߞߟߌ߫ ߞߏ߫ (ߞߐ߭ߘߎ߬ߘߎ߬). ߡߍ߲ ߓߊ߯ ߞߍ߫ ߣߊ߬ ߡߊ߬ ߝߊߙߌߕߊ ߘߌ߫߸ ߏ߬ ߦߋ߫ ߞߟߌ߫ ߞߏ߫ (ߕߏߒߞߐ߫) ߥߟߊ߫ (ߝߊ߬ߛߎ߬) ߤߊߡߊ߲ߕߍ߫ (ߣߊߛߎ߬)، ߊ߬ ߣߌ߫ ߘߏ߫ ߜߘߍ߫ ߟߎ߫.

ߏ߬ ߘߐ߫߸ ߛߏߘߌߦߊ߫ ߘߊߓߐߣߍ߲߫ ߕߍ߫ ߦߟߍߡߊߞߏ߫ ߟߊߓߐ߫ ߘߐߙߐ߲߫ ߞߊ߲ߡߊ߬ ߘߋ߬، ߍ߲߬ߍ߲߫ ߹ ߊ߬ ߦߋ߫ ߡߌ߬ߙߌ߲߬ߘߌ ߖߏ߯ߘߏ߲ ߣߴߊ߬ ߟߊ߫ ߟߐ߲ߠߌ߲ߦߊ ߟߊߛߓߊ߬ߕߌ߬ߟߊ߲ ߠߋ߬ ߘߌ߫߸ ߡߍ߲ ߦߴߊ߬ ߟߊ߫ ߞߊ߲ ߞߍ߫ ߟߊ߫ ߜߛߋߓߊ ߘߌ߫ ߕߎ߬ߡߊ ߓߍ߯. ߏ߬ ߘߐ߫߸ ߊ߲ ߞߊߣߊ߬ ߢߌ߬ߣߊ߫ ߒ߬ ߠߊ߫ ߕߐ߮ ߟߎ߬ ߞߐ߫ ߡߎ߰ߡߍ߫، ߓߊߏ߬߸ ߏ߬ ߦߴߊ߲ ߡߊߟߐ߲ߝߋ߲ ߜߍߘߐߕߊ ߘߏ߫ ߟߋ߬ ߘߌ߫ ߡߐ߰ߦߊ ߘߐ߫.

ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߓߊ߬ ߓߟߏ߫߸ ߡߊ߲߬ߘߋ߲߬ ߕߐ߯ߞߏ ߞߟߊ߬ߡߊ߬ߓߊ߮ ߣߴߊ߬ ߞߍߓߊ߯ ߝߟߐ߸ ߞߊ߬ ߓߐ߫ ߥߎߟߘߊ ߣߐ߯ߣߐ߯، ߛߌ߯ߙߌ߲߫ ߛߌ߰ߓߊ߮.