ߝߊ߬ߙߊ߲ߛ ߡߋߘߌߦߊ ߊߝߙߌߞ ߣߐ߬ ߟߊ߬ߖߍ߲߬ߛߍ߲߬ߠߌ߲ ߘߏ߫ ߟߋ߬ ߞߍ߫ ߟߊ߫ ߞߏ߲ߞߏߘߓߌ ߕߋ߬ߟߋ߫ ߂߅ ߣߌ߲߬ ߡߊ߬߸ ߡߍ߲ ߓߘߊ߫ ߜߊ߬ ߡߐ߰ ߛߌߦߊߡߊ߲߫ ߠߊ߫، ߞߊ߬ߕߎ߲߯߸ ߊ߬ߟߎ߫ ߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߝߊ߬ߙߊ߲߬ߛߌ߬ ߞߋߟߋ߲߫ ߔߋ߫ ߟߋ߬ ߘߌ߫ ߛߋ߫ ߡߊ߬ߟߌ ߡߞߊߘߊ߲߫ ߠߊ߫، ߏ߬ ߘߐ߫߸ ߞߏ߫ ߊߛߡߌ߫ ߜ߭ߏߦߌ߬ߕߊ߬ ߦߋ߫ ߦߊ߬ߝߊ ߕߙߊ߫ ߝߊ߬ߙߊ߲߬ߛߌ߫ ߝߍ߬ ߖߏߣߊ߫.

ߊ߬ ߘߏ߲߬߸ ߡߊ߬ߟߌ߬ߞߊ ߟߎ߬ ߞߎߣߎ߲ߣߍ߲߫ ߡߊ߲߬ߞߊ߲ ߠߋ߬ ߡߊ߬ ߓߌ߬߸ ߣߴߏ߬ ߦߋ߫ ߖߡߊ߬ߣߊ ߦߙߐ߫ ߛߌߦߊߡߊ߲߫ ߡߌ߬ߣߊ ߘߌ߫ ߓߊ߰ߓߊ߰ߟߌ߬ߟߊ ߟߎ߬ ߓߟߏ߫، ߏ߬ ߖߌ߬ߦߊ߬ߖߟߎ ߣߴߊ߬ ߖߌ߬ߦߊ߬ߓߍ ߟߎ߬ ߦߋ߫ ߝߌߙߌ߲ߝߌߙߌ߲ ߞߊ߲߬ ߝߊ߬ߙߊ߲߬ߛߌ߫ ߝߐ߰ߓߍ߬ߘߊ ߟߎ߬ ߓߟߏ߫߸ ߦߏ߫ ߊ߬ߟߎ߬ ߣߌ߫ ߓߊ߬ߓߊ߰ߟߌ߬ߟߊ ߟߎ߬ ߓߊ߯ ߞߍ߫ ߘߍ߭ ߡߊ߬، ߊ߬ߟߎ߬ ߓߘߊ߫ ߕߏ߫ ߏ߬ ߢߊ ߟߋ߬ ߡߊ߬߸ ߞߊ߬ ߟߊ߬ߖߍ߲߬ߛߍ߲߬ߠߌ߲߬ ߞߍ߫߸ ߡߍ߲ ߘߏ߲߬ߣߍ߲߫ ߡߊ߬ߟߌ ߟߊ߫ ߖߘߍ߬ߕߌ߰ߦߊ ߞߊ߬ߛߌ ߘߐ߫߸ ߡߍ߲ ߦߋ߫ ߟߊ߬ߖߍ߲߬ߛߍ߲߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߡߊ߬ߟߌ ߕߴߛߋ߫ ߝߏߦߌ߬ ߟߊ߫ ߝߊ߬ߙߊ߲߬ߛߌ߬ ߞߐ߫.

ߊ߬ ߛߓߍ߫ ߘߊ߫ ߡߋߘߌߦߊ ߝߊ߬ߙߊ߲ߛ ߊߝߙߌߞ ߓߟߏ߫ ߟߋ߬ ߝߍߛߑߓߎߞ ߟߊ߫ ߞߏ߫: <<ߦߏ߫ ߊ߬ ߕߘߍ߬ ߢߊ ߡߍ߲ ߂߀߁߃ ߟߊ߫߸ ߝߊ߬ߙߊ߲߬ߛߌ߬ ߞߋߟߋ߲߫ ߔߋ߫ ߟߋ߬ ߘߌ߫ ߛߋ߫ ߡߊ߬ߟߌ ߓߐ߫ ߟߊ߫ ߣߌ߲߬ ߞߏ ߢߌ߲߬ ߘߐ߫، ߊߛߡߌ߫ ߜ߭ߏ߬ߦߌ߬ߕߊ߬ ߞߊ߫ ߞߊ߲߫ ߞߊ߬ ߦߊ߬ߝߊ ߟߋ߬ ߝߟߐ߫ ߕߙߊ߫ ߡߎߣߎ߲߬.>> ߞߎߡߊ ߣߌ߲߬ ߝߐߣߍ߲߫ ߠߋ߬߸ ߓߊߏ߬ ߡߊ߬ߟߌ ߓߘߴߊ߬ ߣߌ߫ ߝߊ߬ߙߊ߲߬ߛߌ ߕߍ ߞߊ߬ߣߌ߲ ߛߊ߬߸ ߞߵߊ߬ߟߎ߬ ߟߊ߫ ߣߊ߬ߝߊ ߓߍ߯ ߛߌߟߊ ߕߍ߰߸ ߞߵߊ߬ ߢߍߛߌ߲߫ ߙߎ߬ߛߌ߬ ߟߊ߫ ߕߋߙߌߦߊ߫ ߞߎߘߊ߫ ߘߌ߫، ߒ߬ߓߊ߬߸ ߊ߬ߟߎ߬ ߛߋߣߍ߲߫ ߞߊ߲ ߡߍ߲ ߝߐ߫ ߟߊ߫ ߡߊ߲߬ߞߊ߲ ߟߏ߲ߓߊ ߢߌ߲߬ ߘߐ߫߸ ߏ߬ ߟߋ ߕߋ߲߬، ߏ߬ ߡߍ߲ ߦߋߣߍ߲߫ ߟߊ߬ߞߙߐ߬ߛߟߌ߬ߟߊ ߟߎ߬ ߓߟߏ߫ ߓߍ߲߬ߒ߬ߛߋ߲߬ߡߊ ߕߣߐ߬ߓߐ ߘߴߊ߬ߟߎ߬ ߓߟߏ߫߸ ߛߴߊ߬ߟߎ߬ ߘߌ߫ ߛߴߊ߬ߟߎ߬ ߕߏߟߏ߲߫ ߠߊ߫ ߖߡߊ߬ߣߊ߬ߘߋ߲ ߠߎ߬ ߤߊ߲ߞߟߌ ߟߊ߫߸ ߞߊ߬ ߞߎ߲߬ߊߠ߬ߛߌ߮ ߟߊ߫ ߞߏ߫ ߟߐ߯ߓߐ߫ ߊ߬ߟߎ߬ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߝߊ߬ߙߊ߲߬ߛߌ߫ ߟߋ߬ ߘߌ߫ ߛߋ߫.

ߐ߲߬ߤߐ߲߫߸ ߝߊ߬ߙߊ߲߬ߛߌ߫ ߛߊ߲߬ ߁߁ ߡߊ߬ߟߌ ߞߣߐ߫߸ ߊ߬ ߡߊ߫ ߛߋ߫ ߡߍ߲ ߞߍ߫ ߟߊ߫߸ ߊ߬ߝߐ߫ ߏ߬ ߘߌ߫ ߛߋ߫ ߘߏ߫ ߜߘߍ߫ ߝߐ߫ ߟߊ߫ ߡߊ߬ߟߌ߬ߞߊ߬ ߞߋߟߋ߲ ߏ߬ ߟߎ߬ ߦߋ߫ ߓߌ߬ ߥߊ߬؟

ߞߵߊ߬ ߕߊ߬ ߡߙߊ߬ߒ߬ߡߊ߬ߟߌ ߘߊߡߌ߬ߣߊ ߡߊ߬ ߛߐ߱ ߣߌ߲߬ ߡߊ߬ ߤߊ߲߯ ߕߋ߲߬߸ ߓߊ߰ߓߊ߰ߟߌ߬ߟߊ ߟߎ߬ ߣߌ߫ ߊߖ߭ߥߊߘ ߡߙߎߕߌߓߊ߮ ߟߎ߬ ߟߊ ߖߌ߬ߦߊ߬ߖߟߎ ߦߋ߫ ߝߌߙߌ߲ߝߌߙߌ߲߫ ߠߴߊ߬ߟߎ߬ ߓߟߏ߫ ߝߊ߲߬ ߓߍ߯، ߏ߬ ߘߏ߲߬ ߦߋ߫ ߞߏ߫ ߝߌ߬ߟߊ߫ ߟߋ߬ ߦߌ߬ߘߊ߬ ߟߊ߫ ߤߊ߲߯ ߛߓߊ߬: ߊ߬ߟߎ߬ ߣߌ߫ ߓߊ߰ߓߊ߰ߟߌ߬ߟߊ ߟߎ߬ ߓߟߏ߫ ߘߌ߫ ߞߍ߫ ߢߐ߲߯ ߓߟߏ߫، ߊ߬ߟߎ߬ ߦߴߊ߬ ߝߍ߬ ߞߊ߬ ߞߎ߲߬ߠߊ߬ߛߌ߮ ߟߊ߫ ߝߎ߯ߦߊ ߟߋ߬ ߦߌ߬ߘߊ߫ ߖߡߊ߬ߣߊ߬ߘߋ߲ ߠߎ߬ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߕߍ߫ ߕߋ߲߬، ߞߊ߬ ߓߊ߲߫ ߞߊ߬ ߖߡߊ߬ߣߊ߬ߘߋ߲ ߠߎ߬ ߖߊ߭ߥߟߌ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߛߌ߰ߝߊߘߌ ߓߍ߲߬ߣߍ߲߬ ߕߍ߫ ߢߊ ߺ ߊ ߺ ߢߊ߫ ߟߋ߬ ߡߊ߬.

ߘߎߢߊ߫ ߞߌ߬ߓߊ߬ߙߏ߬ ߟߊ߬ ߞߟߍ ߕߎ߬ߡߊ ߣߌ߲߬ ߦߋ߫ ߦߟߌߛߌ߮ ߕߎ߬ߡߊ ߟߋ߬ ߘߌ߫، ߓߊߏ߬߸ ߝߊ߬ߙߊ߲߬ߛߌ߬ ߦߋ߫ ߞߊߘߊ߲ ߓߍ߯ ߟߋ߬ ߞߊ߲߬ ߞߵߊ߬ ߞߏ߫ ߘߌߦߴߊ߬ ߞߟߍ߬ߢߐ߲߰ ߖߡߊߣߊ ߟߎ߫ ߖߡߊ߬ߣߊ߬ߘߋ߲ ߠߎ߬ ߦߋ߫، ߖߐ߲߰ߛߴߊ߬ ߘߌ߫ ߟߐ߲߫ ߞߏ߫ ߊ߬ߟߎ߬ ߦߋ߫ ߢߊ߬ߒ߬ߞߐ߬ߓߊߟߌ ߟߎ߫ ߟߋ߬ ߘߌ߫.