ߝߟߏ߬ߥߐ߯ߙߐ߬ ߣߌ߲߬ ߦߋ߫ ߘߎߥߊߞߐ߫ ߡߙߊ߬ߘߊ߬ߙߋ߲ ߠߋ߬ ߘߐ߫ ߞߎߘߍ߫ ߂߅ ߟߊ߫߸ ߞߙߎ߬ߛߊ߫ ߡߙߊ߬ߘߊ߬ߓߊ ߞߣߐ߫، ߞߵߊ߬ ߕߊ߬ ߞߊ߬ߙߌ߬ߝߐ ߕߋ߬ߟߋ߫ ߂߀ ߡߊ߬ ߞߵߊ߬ ߛߌ߰ ߓߌ߬ ߂߀߂߆ ߘߓߊ߬ߓߌߟߊ ߕߟߋ߬ ߁߭ ߣߌ߲߬ ߠߊ߫߸ ߕߊ ߦߋ߫ ߕߏ߫ ߟߊ߫ ߥߟߌ߬ ߟߊ߫ ߝߟߏ߬ߥߐ߯ߙߐ߬ ߓߏ߲ ߘߏ߫ ߟߊ߫ ߟߏ߲ -ߏ-ߟߏ߲߫߸ ߝߏ߫ ߓߏ߲߫ ߖߋ߬ߣߌ߲߬ߣߍ߲ ߦߙߌߞߊ ߓߘߊ߫ ߛߋ߫ ߁߁߀ ߘߐ߫߸ ߊ߬ ߓߍ߯ ߕߌߡߊߓߏ߲ ߠߋ߬ ߘߌ߫߸ ߝߟߊߝߟߊߓߏ߲߫ ߝߌ߬ߟߊ߫ ߟߋ߬ ߦߴߊ߬ ߘߐ߫، ߊ߬ ߦߋ߫ ߥߟߌ߬ ߟߴߊ߬ߟߎ߬ ߓߟߏߝߋ߲ ߠߎ߬ ߟߊ߫ ߓߏ߲ ߞߣߐ߫߸ ߊ߬ ߣߌ߫ ߤߊߟߌ߬ ߞߣߍ ߡߊ߬، ߒ߬ߓߊ߬ ߞߊ߬ ߓߍ߲߬ ߏ߬ ߞߏ ߡߊ߬ ߛߊ߫߸ ߊ߲ ߞߵߊ߬ߟߎ߬ ߟߊ߫ ߘߎ߰ߕߌ߮ ߞߎߡߊߢߐ߲߯ߦߊ߫߸ ߏ߬ ߡߍ߲ ߕߐ߯ ߞߏ߫ ߡߊ߬ߡߎߘߎ߬ ߞߐ߲ߘߍ߫ ߊ߬ ߦߋ߫ ߛߣߍ߬ߞߍ߬ߟߊ ߟߋ߬ ߘߌ߫، ߊ߬ ߞߎߡߊ߫ ߘߴߊ߲ ߧߋ߫ ߕߊߓߐ ߞߊ߲߬ ߕߊ߲߬ ߠߋ߬:

ߕߊ ߣߌ߲߬ ߓߐ߫ ߝߟߐߝߟߐ ߞߍߣߍ߲߫ ߞߊ߬ߦߌ߯ ߕߟߋ߬ߡߊ ߟߋ߬ ߘߐ߫߸ ߊ߬ ߓߐ߫ ߘߊ߫ ߛߟߊߕߌ߮ ߞߊ߬ߓߊ ߟߋ߬ ߝߟߐ߫ ߓߘߊ ߞߵߏ߬ ߟߊ߫ ߓߏ߲ ߖߋ߬ߣߌ߲߬߸ ߞߏ߬ߣߌ߲߬ ߊ߲ ߞߵߏ߬ ߟߊ߫ ߏ߬ ߡߏ߬ߛߏ ߟߋ߬ ߞߎ߲߬ ߞߏ߫ ߊ߬ ߟߊ߫ ߕߊ߫ ߓߌߟߊ߫ ߣߐ ߟߋ߬ ߞߍߣߴߏ߬ ߛߊߓߎ ߘߌ߫، ߊ߬ ߞߊ߬ ߓߏ߲߫ ߝߌ߬ߟߊ߫ ߟߋ߬ ߖߋ߬ߣߌ߲߫ ߕߎ߬ߡߊ ߏ߬ ߟߊ߫ ߞߵߊ߬ ߘߐߟߐ߬، ߛߊ߬ߡߊ ߣߌ߲߬ ߝߣߊ߫ ߘߐ߫߸ ߕߊ ߣߌ߲߬ ߞߊ߬ ߓߏ߲߫ ߛߓߊ߫ ߜߘߍ߫ ߖߋ߬ߣߌ߲߬ ߕߎ߲߯ߣߌ߲߫߸ ߏ߬ ߓߍ߯ ߘߐ߫ ߊ߲ ߡߴߊ߬ ߞߏ ߞߙߐ߬ߛߌ߬ ߊ߲ ߡߴߊ߬ ߕߊ߬ ߓߊ߫ ߘߐ߫، ߒ߬ߞߊ߬ ߞߵߊ߬ ߕߵߊ߬ ߓߐ߫ ߞߐߟߕߊ ߢߌ߲߬ ߡߊ߬ ߛߊ߬ߡߊ ߢߌ߲߬ ߘߐ߫߸ ߟߏ߲-ߏ-ߟߏ߲߫ ߕߊ ߘߌ߫ ߥߟߌ߬ ߓߏ߲ ߘߏ߫ ߟߊ߫߸ ߌ ߦߋ߫ ߕߏ߫ ߟߊ߫ ߘߏ߫ ߟߊߛߊ߭ ߟߋ߬ ߞߊ߲߬߸ ߊ߬ ߘߌ߫ ߝߐ߫ ߌ ߡߊ߬ ߞߏ߫ ߘߏ߫ ߜߘߍ߫ ߓߘߊ߫ ߓߐ߫ ߦߊ߲߬ ߘߋ߬، ߣߌ߫ ߕߊ߫ ߞߏ ߕߍ߫ ߝߌ߬ߟߊ߬ ߘߌ߫ ߝߏ߫ ߞߋߟߋ߲߫߸ ߒ߬ߓߊ߬ ߏ߬ ߦߴߊ߲ ߞߊ߲߬ ߕߋ߬ߟߋߝߌ߬ߟߊ ߣߌ߲߬ ߘߐ߫ ߝߋߎ߫، ߕߌߓߏ߲߫ ߞߏ߫ ߕߴߊ߬ ߘߐ߫ ߝߟߊߝߟߊߓߏ߲߫ ߞߏ߫ ߕߴߊ߬ ߘߐ߫߸ ߊ߬ ߦߋ߫ ߝߟߊߝߟߊߓߏ߲ ߞߣߐ߫ ߝߋ߲ ߠߎ߬ ߟߋ߬ ߖߋ߬ߣߌ߲߬ ߠߊ߫ ߞߎߙߍ߫، ߊ߲ ߡߴߊ߬ ߟߐ߲߫ ߕߊ ߣߌ߲߬ ߦߋ߫ ߓߐ߫ ߟߊ߫ ߢߊ-ߊ-ߢߊ߫ ߡߊ߬߸ ߊ߲ ߡߴߊ߬ ߓߐ߫ ߞߎ߲߫ ߝߣߊ߫ ߟߐ߲߫߸ ߏ߬ ߞߣߐ߬ߘߐ߬ߝߟߌ ߦߴߊ߲ ߠߊ߫ ߓߌ߬. ߊ߬ ߞߵߏ߬ ߟߋ ߝߐ߫.

ߊ߬ ߓߊ߲߫ ߘߊ߫ ߞߊ߬ ߞߎߡߴߊ߲ ߧߋ߫ ߓߏ߲߫ ߖߋ߬ߣߌ߲߬ߣߍ߲ ߠߎ߬ ߦߙߌߞߊ ߞߊ߲߬، ߊ߬ ߞߵߊ߬ ߦߌ߬ߘߵߏ߬ ߘߐ߫ ߞߏ߫ ߊ߲ ߣߐ߬ ߡߍ߲ ߖߊ߬ߕߋ߬ ߟߊ߫ ߕߌߓߏ߲ ߕߊ ߘߐ߫ ߡߎߣߎ߲߬ ߏ߬ ߟߋ ߁߁߀ ߘߌ߫، ߝߟߊߝߟߊߓߏ߲߫ ߝߌ߬ߟߊ߫߸ ߊ߬ ߞߏ߬ߣߌ߲ ߣߐ߬ ߓߎ߬ߕߎ ߣߌ߫ ߝߋ߲ ߡߍ߲ ߠߎ߬ ߖߋ߬ߣߌ߲߬ ߠߴߏ߬ ߟߎ߬ ߞߣߐ߫ ߏ߬ ߞߊ߫ ߛߌߦߊ߫، ߊ߬ ߞߊ߬ ߥߊߘߌߕߌ߯ ߛߌ߰ߘߌ߬ߦߊ߬ߡߊ߫ ߛߓߊ߬ ߞߏߝߐ߫ ߓߐ߬ߣߐ ߣߊ߬ ߡߍ߲ ߠߎ߫ ߛߐ߬ߘߐ߲߬߸ ߏ߬ ߟߎ߫ ߞߏ߬ߣߌ߲ ߡߊ߫ ߞߎߡߴߊ߬ߟߎ߬ ߟߊ߫ ߥߊߘߌ߫ ߖߋ߬ߣߌ߲߬ߣߍ߲ ߦߙߌߞߊ ߞߊ߲߬ ߡߎߣߎ߲߬.

ߛߎ߬ߡߊ߲߬ ߞߏ ߝߣߊ߫ ߘߐ߫߸ ߡߊ߬ߟߏ߬ ߛߌߦߊߡߊ߲߫ ߠߋ߬ ߖߋ߬ߣߌ߲߬ߣߍ߲߫߸ ߡߐ߱ ߟߎ߬ ߟߊ߫ ߓߊߟߏ߫ ߡߊߟߏ ߣߴߊ߬ߟߎ߬ ߟߊ߫ ߡߊ߬ߟߏ߬ߛߌ ߛߌߦߊߡߊ߲߫ ߠߋ߬ ߖߋ߬ߣߌ߲߬ߣߍ߲߫ ߕߊߓߐ ߣߌ߲߬ ߘߐ߫، ߕߌ߬ߦߊ߫ ߓߊ߬߸ ߡߊ߬ߣߊ߲߬ߞߎ߲߬ ߖߊߙߊ߲߫ ߓߊ߬߸ ߊ߬ ߣߌ߫ ߓߟߏߝߋ߲߫ ߛߌߦߊߡߊ߲߫߸ ߊ߲ ߡߊ߫ ߡߍ߲ ߠߎ߬ ߦߙߌߞߊ߫ ߟߐ߲߫ ߡߎߣߎ߲߬، ߊ߬ ߞߊ߲߫ ߝߣߊ߫ ߞߏ߫ ߡߐ߱ ߟߎ߫ ߦߋ߫ ߛߌ߬ ߟߊ߫ ߞߣߍ ߡߊ߬ ߟߋ߬ ߕߋ߲߬߸ ߕߊ ߡߍ߲ ߓߐ߫ ߕߎߡߊ߫ ߟߐ߲ߣߍ߲߫ ߕߍ߫ ߡߐ߰ ߕߴߛߋ߫ ߥߊ߫ ߟߴߌ ߟߊ߫ ߓߏ߲ ߠߊ߫ ߘߋ߬، ߘߏ߫ ߟߎ߫ ߜߎ ߟߊ߫ ߓߏ߲ ߠߋ߬ ߖߋ߬ߣߌ߲߬ߣߍ߲߫ ߞߎߙߍ߫.

ߕߊ ߓߐ ߣߌ߫ ߛߌߛߍ߲߬ ߕߍ߫߸ ߝߊ߰ߡߊ ߟߎ߬ ߓߘߊ߫ ߛߋ߫ ߝߏ߬ߟߌ ߟߊ߫ ߦߋ߲߬߸ ߊ߬ ߣߌ߫ ߡߊ߬ߤߌ߬ߣߊ߬ ߟߊ߬ߡߌߘߊ߸ ߡߙߊ߬ߘߊ߬ߙߋ߲߬ߕߌ߮ ߣߌ߫ ߡߙߊ߬ߓߊ߮ ߣߌ߫ ߞߊ߬ߝߏ߬ߙߋ߲߬ߕߌ߮ ߟߎ߬، ߞߏ߬߬ߣߌ߲߬ ߞߏ-ߏ-ߞߏ߫ ߡߊ߫ ߘߏ߲߬ ߊ߲ߠߎ߬ ߕߍ߫ ߘߍ߬ߡߍ߲߬ߠߌ߲߬ ߘߐ߫ ߝߟߐ߫، ߊ߬ ߞߵߊ߬ ߞߊ߲ߠߊߘߌ߫ ߞߟߌߟߌߞߊ߲ߠߊ߫ ߘߐ߫ ߞߏ߫: ߞߵߊ߬ߟߎ߫ ߘߍ߬ߡߍ߲߬، ߓߍ߯ ߦߴߊ߬ߟߎ߫ ߘߍ߬ߡߍ߲߫ ߝߊ߰ߡߊ ߟߎ߬ ߣߌ߫ ߓߐߒߖߘߍߘߐߡߐ߮ ߟߎ߬ ߘߐ߫߸ ߞߏ߫ ߞߐ߲ߞߐ ߣߌ߫ ߡߊ߬ߢߌ߬ߡߊ߬ߞߏ ߦߴߊ߬ߟߎ߫ ߞߊ߲߬ ߓߌ߬، ߓߊߟߏ߫ ߛߎߡߊ߲ ߓߊ߬߸ ߛߌ߫ ߝߏ߬ߦߌ߬ߕߊ ߟߎ߫ ߓߊ߬߸ ߏ߬ ߓߍ߯ ߞߏߖߊ ߦߴߊ߬ߟߎ߫ ߞߊ߲߬ ߦߋ߲߬ ߕߋ߲߬، ߒ ߕߍߣߊ߬ ߞߎߡߊ߫ ߝߊߘߌߦߊߓߐ߫ ߞߏ ߣߌ߫ ߛߌ߬ߓߏ߲߬ ߞߏ ߡߊ߬، ߝߟߏ߬ߥߐ߯ߙߐ߬ ߘߎ߰ߕߌ߮ ߟߊ߫ ߛߙߊ߬ߣߎ߲ ߠߴߏ߬ ߘߌ߫߸ ߊ߬ߟߋ ߡߍ߲ ߕߐ߯ ߞߏ߫ ߡߊ߬ߡߎߘߎ߬ ߞߐ߲ߘߍ߫.

ߏ߬ ߘߐ߫ ߓߊߘߋ߲߫ ߓߘߍ߫ ߢߌ߬ߡߊ߬ߟߊ߲߬ߘߌ ߟߎ߬߸ ߊߟߎ߫ ߦߴߊ߲ ߠߊ߫ ߛߏߣߍ߲ ߢߌ߲߬ ߘߡߊߞߊߛߌߒߞߊ߲ߠߊ ߟߊߡߍ߲߫ ߞߵߊ߬ߟߎ߫ ߘߍ߬ߡߍ߲߬ ߛߋߞߏ ߓߍ߬ߙߍ ߟߊ߫߸ ߓߏ߲߫ ߞߏ߫ ߛߋ߫ ߦߋ߫ ߡߍ߲ ߦߋ߫ ߓߊ߬߸ ߛߎ߬ߡߊ߲ ߠߋ߬ ߛߋ ߦߴߌߟߋ ߦߋ߫߸ ߌ ߕߊ ߏ߬ ߞߍ߫.

ߡߍ߲ ߞߵߊ߲ ߠߊߞߍ߫ ߞߏߢߊ ߣߌ߲߬ ߞߊ߬ߟߊߡߊ߬ ߝߟߏ߬ߥߐ߯ߙߐ߬ ߛߏ ߞߣߐ߫ ߦߋ߲߬߸ ߏ߬ ߟߋ ߡߎߛߊߖߊ߲ ߞߐ߲ߘߍ߫ ߘߌ߫.