ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߋ߬ ߝߟߍ߫ ߊߟߎ߫ ߢߊߞߘߐ߫ ߣߌ߲߬߸ ߦߋ߲߬ ߝߊ߫ ߘߊ߫ ߞߊ߬ߦߌ߯ ߛߐ߰ߡߘߊ߬ ߖߏߣߊ ߟߋ߬ ߟߊ߫، ߖߊ߬ߡߊ߫ ߘߍ߬ߜߍ ߢߌ߲߬ ߠߎ߬ ߡߊ߫ ߣߊ߬ ߘߏ߫ ߜߘߍ߫ ߟߊ߫߸ ߘߐ߲߬ߞߟߌ߬ߟߊ߬ߟߊ߫ ߡߊ߲߬ߘߋ߲߬ ߝߏߘߋ߫ ߟߋ߬ ߡߊߞߟߌߣߍ߲߫ ߞߕߌߘߊ ߟߊ߫߸ ߡߍ߲ ߡߞߊ߬ߛߌ߬ߟߌ ߞߍߣߍ߲߫ ߓߟߐߟߐ߫ ߞߊ߲ߠߊ ߖߘߍ߬ߟߊ߬ߖߊ߲߬ߞߏ߬ߟߊ߫ ߟߊ߬ ߟߌߦߐߣ ߓߟߏ߫. ߊ߬ ߞߊ߬ߣߌ߲߬ߓߊ߮ ߏ߬ ߟߎ߫ ߟߋ߬ ߕߋ߲߬.

ߕߎ߬ߡߊ߬ߙߋ߲߬ ߦߙߌߞߊ߫ ߟߋ߬ ߞߍ߫ ߘߊ߫ ߘߊߘߐߖߊߥߏ ߟߎ߬ ߟߊ߫߸ ߡߊ߲߬ߘߋ߲߬ ߝߏߘߋ߫ ߣߌ߫ ߟߊ߬ ߟߌߦߐߣ ߓߍ߯ ߞߎߡߊ߫ ߘߊ߫ ߞߵߊ߬ߟߎ߬ ߡߊߝߊ߲߭ ߠߎ߬ ߝߐ߫، ߏ߬ ߞߎߡߊߢߐ߲߯ߦߊ ߟߋ߬ ߞߣߐ߫߸ ߡߊ߲߬ߘߋ߲߬ ߝߏߘߋ߫ ߞߵߊ߬ ߟߊ߫ ߘߐ߲߬ߞߟߌ ߟߊ߫ ߞߎ߲ ߝߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߟߊ߫ ߡߐ߰ ߞߊ߲ߡߊ߬߸ ߊ߬ ߟߊߣߍ߲߫ ߟߊ߬ߟߌ߬ߟߌ߬ ߞߊ߲ ߠߋ߬ ߡߊ߬.

ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߋ ߟߊ߫߸ ߡߊߙߌߦߡߊ߫ ߛߌߙߋ߫ ߟߊ߬ ߟߌߦߐߣ ߞߊ߬ߓߊ ߞߵߊ߬ ߦߌ߬ߘߊ߬߸ ߞߏ߫ ߘߐ߲߬ߞߟߌ ߣߌ߲߬ ߦߙߐ ߘߏ߫ ߟߎ߫ ߦߴߊ߬ߟߋ ߟߋ߬ ߞߘߐߡߊߕߍ߰ ߞߊ߲ ߘߌ߫߸ ߊ߬ ߘߏ߲߬ ߘߍ߲߬ߞߣߍ߬ߦߊ߬ߣߍ߲߫ ߏ߬ ߡߊ߬߸ ߓߊߏ߬ ߊ߬ ߞߵߊ߬ ߟߐ߲߫ ߊ߬ ߦߋ߫ ߡߍ߲ ߝߐ߫ ߟߊ߫.

ߞߎߡߊ߫ ߛߊߡߊ߲߫ ߢߐ߲߰ ߕߍ ߟߎ߬ ߞߐߝߍ߬ ߡߞߊ߬ߛߌ߬ߓߊ߰ߕߐ ߣߌ߫ ߛߌߞߊߒߡߊߓߊ߯ߕߐ ߕߍ߫߸ ߊ߬ ߣߌ߫ ߟߊ߬ߝߛߊ߬ߟߌ߬ߟߊ ߟߎ߬ ߣߌ߫ ߞߕߌߞߊ߲ߘߊ ߕߍ߫، ߞߕߌ ߟߊߘߎ߲߫ ߘߊ߫ ߞߵߊ߬ ߟߊߕߊ߯ ߥߊ߬ߛߌ߬ߥߙߊ ߕߟߋ߬ ߃߀ ߘߐ߫߸ ߞߐ߬ߟߏ߲߫ ߣߊ߬ߕߐ ߟߵߏ߬ ߘߌ߫، ߏ߬ ߡߍ߲ ߞߍߕߐ߫ ߡߌߘߊ߬ߞߊ߲߬ߝߐ ߣߌ߫ ߡߞߊ߬ߘߊ߲߬ߞߊ߲߬ߝߐ ߟߏ߲ߓߊ ߘߌ߫.

ߞߕߌ ߞߐ ߘߐ߫߸ ߞߕߌߞߊ߲ߘߊ߫ ߝߏߘߋ߬ ߓߌ߲ߕߎ߬ ߞߋߕߊ߬ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߦߌ߬ߘߊ߬ ߞߏ߫: <<ߊ߲ ߣߊߡߛߏ߸ ߛߌߙߋ߬ ߞߊ߬ߓߊ ߞߵߊ߬ ߡߊߞߊ߬ߛߌ߬߸ ߞߏ߫ ߘߐ߲߬ߞߟߌ ߘߏ߫ ߟߊߓߐߣߍ߲߫߸ ߊ߬ߟߋ ߡߊߣߊ߬ߣߌ߲߬ߣߍ߲߫ ߘߐ߲߬ߞߟߌ ߏ߬ ߘߐ߫߸ ߞߵߊ߬ ߛߓߊߓߎ ߞߍ߫ ߡߊ߲߬ߘߋ߲߬ ߝߏߘߋ߫ ߟߊ߫ ߘߐ߲߬ߞߟߌ߬ ߟߊߣߍ߲ ߘߏ߫ ߘߌ߫.>> ߏ߬ ߟߋ ߝߐ߫ ߘߊ߫ ߞߊ߲ߓߍ߲ ߞߕߌߞߊ߲ߘߊ ߓߟߏ߫ ߞߊ߬ ߓߍ߲߬ ߡߞߊ߬ߛߌ߬ߟߌ ߞߎ߲߭ ߡߊ߬.

ߏ߬ ߛߌߟߊ߫ ߞߋߟߋ߲ ߠߋ߬ ߝߍ߬߸ ߊߟߎ߫ ߦߴߊ߬ ߟߐ߲߫ ߞߏ߫ ߞߏߢߊ ߣߌ߲߬ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߞߟߍ߬ߡߐ߰ߘߊ ߟߋ߬ ߟߊ߫߸ ߏ߬ ߡߍ߲ ߞߎߡߊ߫ ߟߊߓߊ߲ ߞߍ߫ ߘߊ߫ ߓߌߟߏ߲ ߡߊ߬߸ ߥߊ߬ߛߌ߬ߥߙߊ ߕߟߋ߬ ߁߈، ߞߎߡߊ ߛߋ߲߬ߕߊ߬ ߝߟߐ ߞߍ߫ ߘߊ߫ ߞߕߌߘߊ ߦߌߟߡߊ߫ ߝߟߐ ߟߊ߫ ߥߊ߬ߛߌ߬ߥߙߊ ߕߟߋ߬ ߁߉ ߟߋ߬ ߡߊ߬.

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߏ߬ ߟߏ߲ ߠߋ߬ ߡߊ߬߸ ߡߊ߲߬ߘߋ߲߬ ߝߏߘߋ߫ ߞߊ߬ߙߌ߬ߝߊ߬ ߘߴߊ߬ ߟߊ߫ ߡߣߊߖߋ ߟߋ߬ ߟߊ߫߸ ߣߴߏ߬ ߕߍ߫ ߊ߬ ߕߎ߲߬ ߘߌ߫ ߛߋ߫ ߘߏ߲߬ ߠߊ߫ ߥߛߎ ߟߊ߫ ߏ߬ ߟߏ߲߸ ߞߕߌ߫ ߡߊߞߐߣߐ߲߫ ߥߛߎ.

ߞߊ߲ߓߍ߲ ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߕߌ ߞߐ ߣߌ߲߬ ߘߐ߫ ߌߞߐ߫߸ ߞߏ߫: <<ߊ߲ߠߎ߬ ߞߏ߬ߣߌ߲ ߛߍߥߊߣߍ߲߫، ߓߊߏ߬߸ ߊ߲ ߧߴߊ߬ ߝߐ߫ ߟߊ߫ ߟߏ߲ ߡߍ߲ ߠߊ߫ ߞߏ߫ ߊ߲ ߕߍ߫ ߡߐ߰ ߟߊߕߊ߯ ߟߊ߫ ߥߛߎ ߟߊ߫، ߊ߲ ߧߋ߫ ߡߐ߱ ߟߊߕߊ߯ ߟߊ߫ ߥߛߎ ߟߊ߫ ߥߊ߯ߕߌ ߓߍ߯߸ ߓߊ߬ߙߵߊ߲ ߕߴߊ߬ ߞߍ߫ ߟߊ߫ ߢߊ ߏ߬ ߡߊ߬، ߏ߬ ߞߍߣߍ߲߫ ߠߋ߬߸ ߖߡߊ߬ ߛߌ߫ ߕߎ߲߬ ߡߊ߫ ߓߐ߫߸ ߡߐ߰ ߛߌ߫ ߕߎ߲߬ ߕߴߊ߬ ߞߊ߬ߟߊߡߊ߬، ߓߊ߬ߙߵߊ߲ ߞߵߊ߬ ߝߐ߫ ߞߏ߫ ߊ߲ ߘߌ߫ ߛߋ߫ ߞߕߌ ߣߌ߲߬ ߞߍ߫ ߟߊ߫߸ ߡߊ߬ߝߊ ߣߌ߫ ߝߊ߲ߡߊߖߌ߮ ߘߐ߫߸ ߝߙߋߞߋ߫ ߕߴߊ߬ ߘߐ߫ ߝߏߦߌ߬ߝߏߦߌ߬.>> ߊ߬ ߞߵߏ߬ ߦߌ߬ߘߊ߬.

ߡߊ߲߬ߘߋ߲߬ ߝߏߘߋ߫ ߞߊ߬ ߟߊ߬ߝߛߊ߬ߟߌ߬ߟߊ߫ ߛߊ߬ߓߊ߫ ߟߋ߬ ߕߊ߬ ߓߌ߬ ߞߕߌ ߣߌ߲߬ ߘߐ߫߸ ߊ߬ ߡߞߊߘߊ߲߫ ߞߊ߲ߡߊ߬، ߟߊ߬ߝߛߊ߬ߟߌ߬ߟߊ߫ ߡߊ߬ߡߊ߬ߘߌ߬  ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߞߏ߫ <<ߊ߬ ߡߊ߫ ߣߡߌߛߊ ߘߐ߲߬ߞߟߌ ߟߊ ߘߐ߫߸ ߊ߬ ߣߌ߫ ߣߡߌߛߊ߫ ߝߣߊ߫ ߡߊ߲߫ ߞߊ߲߫ ߘߐ߲߬ߞߟߌ ߟߊ ߘߐ߫، ߓߊ߬ߙߌ߬߸ ߡߍ߲ ߠߎ߬ ߞߵߊ߬ ߟߊ߫ ߘߐ߲߬ߞߟߌ ߞߵߊ߬ ߟߥߊ߫ ߞߎ߲߬ ߠߊ߫߸ ߊ߬ ߡߴߊ߬ ߟߥߊ߫ ߞߎ߲߭ ߡߍ߲ ߠߊ߫، ߊ߬ ߞߊ߲߫ ߞߏ߫ ߊ߬ ߣߐ߬ ߊ߬ ߢߊߦߋ߫ ߟߊ ߘߐ߲߬ߞߟߌ ߟߊߓߐ ߞߎ߲߬ߢߐ߲߰ ߞߋߟߋ߲ ߡߊ߬߸ ߊ߬ ߞߵߊ߬ ߝߐ߫ ߓߟߐߟߐ ߞߊ߲߬߸ ߞߏ߫ ߡߐ߰ ߞߊߣߵߊ߬ ߟߊ߫ ߘߐ߲߬ߞߟߌ ߡߐ߬ߟߐ߲ ߓߐ߫ ߊ߬ ߟߊ߫߸ ߞߏ߫ ߊ߬ ߡߴߊ߬ ߟߊ߫ ߡߐ߰ ߞߋߟߋ߲߫ ߞߊ߲ߡߊ߬.>> ߊ߬ ߞߵߏ߬ ߝߐ߫.

ߘߐ߲߬ߞߟߌ ߣߌ߲߬ ߟߊߓߐ ߣߌ߫ ߛߌߛߍ߲߬ ߕߍ߫߸ ߊ߬ ߞߏ ߓߘߊ߫ ߞߍ߫ ߞߎߡߊ߫ ߛߌߦߊߡߊ߲ ߘߌ߫، ߞߕߌ ߞߏ߬ߣߌ߲ ߕߐ߭ ߕߏߣߍ߲߫ ߥߊ߬ߛߌ߬ߥߙߊ ߕߟߋ߬ ߃߀ ߟߋ߬ ߟߊ߫، ߊ߲ ߛߋ߫ ߘߊ߫ ߡߙߊߡߊ߫ ߛߙߋ߫ ߟߊ߫ ߞߐߙߍ ߞߣߐ߫߸ ߓߊ߬ߙߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߞߎߡߊ߫ ߟߊ߫، ߡߊ߲߬ߘߋ߲߬ ߝߏߘߋ߫ ߟߊ߫ ߡߣߊߖߋ ߊߓߎߓߞߊߙ ߞߐ߲ߘߍ߫߸ ߡߣߊ߬ߖߋ߬ ߜ߭ߊ߯ߖ߭ߊ߬߸ ߊ߬ߟߋ߫ ߞߊ߬ ߕߊ߲߬ߘߏ߬ߟߌ ߟߋ߬ ߘߐߙߐ߲߫ ߠߊߛߋ߫ ߊ߬ߟߎ߫ ߞߊ߬ߣߌ߲߬ߓߊ߮ ߟߎ߫ ߡߊ߬߸ ߓߐߟߌ߫ ߞߐߟߌߞߐߟߌ ߟߊ߫.

ߓߍ߯ ߟߊߘߍ߬ߣߍ߲ ߞߏ߬ߣߌ߲ ߛߌ߰ߣߍ߲߫ ߞߊ߬ ߞߕߌ ߣߌ߲߬ ߞߐߝߟߌ ߟߋ߬ ߡߊߞߐ߬ߣߐ߲߬߸ ߣߌ߫ ߡߍ߲ ߓߐ߫ ߘߴߊ߬ ߘߐ߫߸ ߏ߬ ߓߍߣߊ߬ ߞߌ߬ߦߴߊߟߎ߫ ߡߊ߬ ߟߏ߲߫ ߣߊ߬ߕߐ ߟߎ߬ ߘߐ߫.