ߞߊ߲ߞߊ߲߫ ߞߌ߲߬ߘߊ ߛߟߊߡߊߣߌ߲߫߸ ߣߍ߱ ߜߊ߬ߛߌ߬ ߞߊ߲ ߦߋ߫ ߡߍ߲߫ ߠߊ߫ ߘߌ߲߬ߞߌߙߊ ߡߍ߲ ߘߐ߫ ߦߋ߲߬߸ ߏ߬ ߟߋ ߝߊ߲߮ ߘߌ߫، ߒ߬ߓߊ߬߸ ߛߌ߬ߘߌߞߌ߬ ߕߙߊߥߟߋ߫ ߦߋ߫ ߣߎ߬ߡߎ߲߬ ߛߋߒߞߏߟߊ ߟߋ߬ ߘߌ߫߸ ߡߍ߲ ߣߴߊ߬ ߟߊ߫ ߡߞߊ߬ߙߊ߲߬ߘߋ߲ ߠߎ߬ ߦߋ߫ ߣߍ߰ߟߊ߬ߞߊ ߟߎ߫ ߦߟߍ߬ߡߊ߲߬ ߠߊ߫ ߞߵߊ߬ߟߎ߬ ߞߍ߫ ߛߌ߲ߞߏ߲ ߘߌ߫߸ ߞߊ߬ ߞߐߙߍ ߟߎ߫ ߡߊ߬ߞߏߢߊ߬ ߕߓߌߟߌ ߣߌ߫ ߟߊ߬ߘߊ߲߬ߠߌ߲߬ ߛߌߦߊߡߊ߲߫ ߘߊߞߎ߲ ߘߐ߫.

<<ߊ߲ ߧߋ߫ ߛߌ߲ߞߏ߲ ߠߊߘߊ߲߫ ߠߊ߫ ߦߊ߲߬߸ ߊ߬ ߛߌߦߊߡߊ߲ߓߊ، ߌ ߣߊ߬ ߘߊ߫ ߦߊ߲߬ ߕߎ߬ߡߊ߬ ߛߌ߫ ߟߊ߫߸ ߌ ߘߌ߫ ߣߊ߬ ߘߏ߫ ߛߐ߬ߘߐ߲߫ ߦߊ߲߬.>> ߊ߬ ߞߵߏ߬ ߦߌ߬ߘߊ߬، ߊ߬ߟߎ߬ ߟߊ߫ ߕߏ߲߬ߜߏ ߣߌ߲߬ ߦߋ߫ ߛߌ߲ߞߏ߲ ߛߎ߯ߦߊ߫ ߛߌߦߊߡߊ߲߫ ߠߋ߬ ߟߊߘߊ߲߫ ߠߊ߫ ߞߊ߬ ߓߍ߲߬ ߛߊ߲߬ߠߌ߲߬ߠߊ ߟߎ߫ ߡߊ߬ߞߏ ߡߊ߬߸ ߘߏ߫ ߟߎ߫ ߦߋ߫ ߞߋ߬ߡߎ߲ ߠߋ߬ ߞߋߟߋ߲߫ ߘߌ߫، ߘߏ߫ ߟߎ߫ ߦߋ߫ ߟߐ߮ ߣߌ߫ ߞߋ߬ߡߎ߲ ߕߊ߬ ߟߊ߫.

ߛߌ߲ߞߏ߲ ߝߣߊ߫ ߛߊ߲߬ ߕߎߡߊ ߟߎ߬ ߦߴߊ߬ ߘߐ߫ ߟߋ߬. <<ߛߊ߲߬ߠߌ߲ ߦߋ߫ ߞߍ߫ ߟߊ߫ ߥߊ߯ߕߌ ߡߍ߲ ߠߊ߫ ߓߊߞߍ߬߸ ߏ߬ ߟߋ ߣߍߣߍ ߕߎ߬ߡߊ ߘߌ߫߸ ߊ߬ ߣߌ߫ ߛߎ߲ߞߊߙߏߡߊߞߐߣߐ߲߸ ߞߢߐߡߊߟߐ ߞߊ߫ ߛߌߦߊ߫ ߏ߬ ߡߍ߲ ߥߊ߯ߕߌ ߟߊ߫.>> ߛߌ߬ߦߊ߬ߞߌ߬ ߗߍ ߞߵߏ߬ ߦߌ߬ߘߊ߬، ߊ߬ ߞߵߊ߬ ߝߐ߫ ߝߣߊ߫ ߞߏ߫ ߊ߬ߟߎ߬ ߟߊ߫ ߛߌ߲ߞߏ߲ ߠߎ߬ ߦߋ߫ ߛߊ߲߬ ߠߊ߫ ߕߙߊ ߘߐ߫ ߝߛߊߦߌ߫߸ ߓߊ߬ߙߵߊ߬ ߛߎߡߊߡߊ߲߫ ߠߋ߬ ߣߍ߲ߞߍ߫، ߊ߬ ߞߏ߬ߣߌ߲ ߞߍ߫ ߘߊ߫ ߢߊ߫ ߛߌ߫ ߡߊ߬߸ ߞߏ߫ ߛߌ߲ߞߏ߲ ߠߋ߬ ߦߋ߫ ߛߊ߲߬ ߠߴߊ߬ߟߎ߬ ߟߊ߫ ߝߋ߲ ߓߍ߯ ߘߌ߫ ߦߋ߲߬߸ ߓߊߏ߬ ߊ߬ߟߋ ߟߋ߬ ߛߊ߲߬ ߠߊ߫ ߛߊ߲߭ ߞߊߙߏ߫ ߁߂ ߞߘߐ߫، ߌ ߘߴߊ߬ ߝߐ߫ ߟߋ߬ ߞߏ߫ ߊ߬ ߞߊߟߌߡߊ߲߫ ߕߎ߬ߡߊ ߘߏ߫ ߟߊ߫ ߘߏ߫ ߘߌ߫.

ߊ߬ߟߎ߬ ߟߊ߫ ߛߌ߲ߞߏ߲߫ ߠߊߘߊ߲ߕߊ ߟߎ߬ ߘߐ߫߸ ߛߎ߯ߦߊ߫ ߝߌ߬ߟߊ߫ ߟߋ߬ ߛߊ߲ߞߊ ߟߊ߫ ߓߊߞߍ߬߸ ߘߐ߰ߡߊ߲߬ߣߍ߲ ߣߌ߫ ߓߏ߲߬ߓߊ߬ߓߊ، ߘߐ߰ߡߊ߲߬ߣߍ߲ ߦߋ߫ ߛߊ߲߬ ߠߊ߫ ߛߋߒߞߏߟߊ߫ ߓߊ߯ߙߟߊ ߟߎ߬ ߣߌ߫ ߕߋ߫ ߥߙߌߟߊ ߟߎ߫ ߟߋ߬ ߓߟߏ߫ ߓߊߞߍ߬، ߞߎ߲߬ߓߊ߬ߓߊ ߦߋ߫ ߛߊ߲߬ ߠߊ߫ ߕߓߌߟߌߟߊ ߟߎ߬ ߟߋ߬ ߓߟߏ߫ ߟߎ ߞߣߐ߫ ߓߊߞߍ߬، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߣߎ߬ߡߎ߲߬ߧߊ ߓߘߊ߫ ߘߏ߲߬ ߖߊ߬ߡߊ ߟߊ߫ ߕߋ߬ߟߋ߲ߓߊ߲߭ ߠߎ߬ ߘߐ߫߸ ߞߊ߬ ߞߍ߫ ߢߊ߬ߒ߬ߞߐ߬ߓߊߟߌ ߘߌ߫.

ߣߴߌ ߞߊ߬ ߡߞߊ߬ߙߊ߲߬ߘߋ߲ ߠߎ߬ ߕߊ߬߸ ߣߎ߬ߡߎ߲߬ߧߊ ߕߴߏ߬ ߟߎ߬ ߓߟߏ߫ ߓߊ߯ߙߊ߫ ߜߊ߲ߛߊ߲߫ ߘߌ߫، ߡߊ߬ߡߊ߬ߘߌ߬ ߕߙߊߥߟߋ߫ ߞߊ߲߫ ߞߏ߫ ߊ߬ߟߋ߫ ߛߐ߬ߘߐ߲߬ߣߍ߲߬ ߓߊ߯ߙߊ ߣߌ߲߬ ߘߐ߫ ߟߋ߬߸ ߊ߬ ߘߏ߲߬ ߡߊ߫ ߣߡߌߛߊ߫ ߓߊ߯ߙߊ ߣߌ߲߬ ߞߍߟߌ ߘߐ߫߸ ߊ߬ ߞߵߏ߬ ߡߍ߲ ߦߋ߫ ߊ߬ ߛߐ߬ߘߐ߲߬ ߝߊ ߟߊ߫. <<ߒߠߋ ߓߘߊ߫ ߓߊ߲߫ ߒ ߠߊ߫ ߞߊ߬ߙߊ߲ ߠߊ߫߸ ߓߊ߬ߙߌ߬ ߓߊ߯ߙߊ ߢߌ߲߬ ߠߋ߬ ߘߌߦߊ߫ ߘߊ߫ ߒ ߧߋ߫، ߓߌ߬ ߢߐ߲߰ ߟߏ߲߫߸ ߒ ߧߋ߫ ߒ ߖߘߍ߬ ߡߊߢߌ߬ߣߌ߲߬ߞߊ߬ ߟߊ߫ ߟߋ߬߸ ߒ ߓߞߏ߫ ߊ߬ߝߐ߫ ߒ ߘߌ߫ ߕߎ߬ߡߊ߫ ߛߐ߬ߘߐ߲߫ ߡߎ߬ߕߎ߲߫ ߓߊ߬߸ ߞߊ߬ ߕߏ߫ ߞߊ߬ߙߊ߲ ߖߐ߲߬ߧߊ߬ ߖߟߎ ߟߎ߬ ߘߐ߫ ߏ߬ ߞߐ߫߸ ߥߟߊ߫ ߓߊ߯ߙߊ߫ ߢߌߣߌ߲ ߛߍ߱ ߟߎ߬ ߟߊ߫؟>> ߊ߬ߟߋ߫ ߞߵߏ߬ ߟߋ ߦߌ߬ߘߊ߬.

ߡߏ߬ߤߊ߬ߡߍߘ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߞߊ߬ ߓߊ߯ߙߊ ߣߌ߲߬ ߕߊ߬ ߗߍ ߟߋ߬ ߘߐ߫، ߓߊߏ߬߸ ߊ߬ ߝߊ߬ ߟߋ߬ ߞߵߊ߬ ߘߏ߲߬ ߓߊ߯ߙߊ ߢߌ߲߬ ߠߊ߫ ߞߊ߬ߦߌ߯ ߏ߬ ߕߘߍ߬ ߓߊߟߏ߫ ߘߐ߫߸ ߤߊ߲߯ ߞߵߊ߬ ߛߌ߰ ߏ߬ ߟߊ߫ ߛߊ߬ߦߊ ߟߊ߫ ߂߀߁߄ ߠߊ߫، ߊ߬ ߝߣߊ߫ ߡߊߞߊ߬ߙߊ߲߬ߧߊ߬ ߘߴߊ߬ ߞߊ߬ߙߊ߲߬ߡߐ߰ ߟߎ߬ ߓߟߏ߫ ߕߋ߲߬߸ ߝߏ߫ ߊ߬ ߓߘߊ߫ ߓߌ߬ߌߟߊ߫ ߕߏ߲߬ߜߏ ߡߞߊ߬ߙߊ߲߬ߘߋ߲ ߓߍ߯ ߞߎ߲߬ߠߊ߬. <<ߓߊ߯ߙߊ ߣߌ߲߬ ߓߘߊ߫ ߞߏ߫ ߛߌߦߊߡߊ߲߫ ߠߋ߬ ߢߊ߬ ߒ ߡߊ߬، ߞߎߣߎ߲߬ ߣߌ߫ ߓߌ߬ ߕߍ߫ ߞߋߟߋ߲߫ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߝߋ߲߫ ߠߊߘߊ߲ ߏ߬ ߟߎ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߛߟߊߡߊߣߌ߲߫ ߣߎ߬ߡߎ߲ ߠߎ߬ ߟߊ߫ ߕߏ߲߬ߜߏ ߣߌ߲߬ ߓߘߊ߫ ߞߍ߫ ߡߐ߰ߦߊ ߡߊߘߍ߬ߡߍ߲߬ ߦߙߐ ߘߌ߫߸ ߞߊ߬ ߘߋ߲ߡߌߛߍ߲ ߠߎ߬ ߕߊ߲߬ߞߊ߬ ߓߊ߯ߙߓߊߟߌߦߊ ߡߊ߬.