ߡߊ߲߬ߖߊ߲߬ߠߊ߬ ߞߣߐ߫߸ ߒߞߏ ߟߊߥߙߎߞߌ ߕߏ߰ߝߏ (ߒߟߕ) ߘߍ߬ߞߙߎ ߣߐ߬ ߡߙߌߘߐ߫ ߓߟߋߓߟߋ߫ ߟߋ߬ ߕߊ߬ ߟߊ߫߸ ߞߊ߬ ߓߍ߲߬ ߝߘߊ߬ߝߌ߲߬ ߞߊ߲ ߠߎ߬ ߣߴߊ߬ ߛߓߍߟߌ ߛߊ߲ߞߘߐߕߊ߭ ߡߊ߬ ߡߐ߱ ߟߎ߬ ߢߊߞߘߐ߫ ߝߘߏ߬ߓߊ߬ ߘߌ߲ߞߌߙߊ ߟߎ߬ ߘߐ߫، ߒ߬ߓߊ߬߸ ߞߐ߬ߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߟߋ߬ ߅߸ ߝߟߊ߫ ߥߐ߯ߙߐ߫ ߟߋ߬ ߡߊߛߓߍߣߍ߲ ߦߌ߬ߘߊ߬ ߘߊ߫߸ ߡߍ߲ ߠߎ߬ ߛߓߍߟߌ ߦߋ߫ ߒߞߏ ߣߌ߫ ߝߊ߬ߙߊ߲߬ߛߌ ߘߐ߫߸ ߞߵߊ߬ߟߎ߬ ߡߊߞߍ߫ ߡߊ߲߬ߖߊ߲߬ߠߊ߫ ߛߏ߫ ߞߣߐߟߊ ߘߏ߲߬ߘߊ߬ ߟߏ߯ߟߎ ߟߊ߫߸ ߞߵߏ߬ ߞߍ߫ ߛߋ߲߬ߕߊ߬ߓߊ߫ ߘߌ߫ ߝߊ߬ߛߏ ߛߓߍߟߌ ߟߎ߬ ߟߊߥߙߎߞߌ ߘߐ߫.

ߟߊ߱ߦߌ߬ ߝߘߊ߬ߝߌ߲ ߞߙߏ߬ߡߊ߬ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߦߋ߫ ߕߏ߰ߝߏ ߣߌ߲߬ ߞߐߞߊ߲ߞߏ ߟߎ߬ ߓߌ߬ߟߊ߬ߢߐ߲߰ߡߊ ߞߟߊ߬ߕߌ߮ ߘߌ߫߸ ߖߊ߲߬ߖߏ߲ ߣߌ߲߬ ߦߋ߫ ߒߞߏ ߛߌ߲ߘߌ ߛߊ߲߬ߞߎ߲߬ߓߍ߲ ߇߈߲ ߓߟߏߘߐߓߍ߲ ߠߎ߬ ߟߋ߬ ߘߌ߫߸ ߏ߬ ߡߍ߲ ߓߍߣߊ߬ ߞߍ߫ ߂߀߂߇ ߟߊ߫ ߞߊ߬ߣߌ߲߬، <<ߊ߲ ߞߵߊ߬ ߡߙߌߘߐߕߊ߬ ߟߋ߬߸ ߞߏ߫ ߊ߲ ߧߋ߫ ߓߊ߯ߙߊ߫ ߞߍ߫߸ ߡߍ߲ ߘߌ߫ ߒߞߏ ߡߊߦߋߙߋ߲߫ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߞߣߐ߫.>> ߊ߬ ߞߵߏ߬ ߢߊߝߐ߫.

ߢߍߥߟߊ ߣߌ߲߬ ߦߋ߫ ߝߟߊ ߘߏ߫ ߟߎ߫ ߟߋ߬ ߕߘߎ ߘߌ߫߸ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߣߴߊ߬ ߡߙߊ߬ߘߊ߬ߙߋ߲ ߕߍߟߊ ߞߎߘߍ߫ ߓߙߍ߬ߦߊ ߛߓߍߣߍ߲߫ ߡߍ߲ ߞߊ߲߬، ߟߏ߯ߟߎ߫ ߦߴߊ߬ ߘߐ߫߸ ߏ߬ ߟߎ߬ ߦߋ߫ ߛߏ ߘߏ߲߬ߘߊ ߟߎ߫ ߟߋ߬ ߟߊ߫߸ ߊ߬ ߥߐ߯ߙߐߣߊ߲ ߓߌ߬ߟߊ߬ߣߍ߲߫ ߞߐ߲߬ߛߏ߬ ߜߙߋ ߟߋ߬ ߟߊ߫. <<ߡߊ߲߬ߖߊ߲߬ߠߊ߫ ߡߙߊ߬ߘߊ߬ߙߋ߲ ߓߍ߯ ߕߐ߮ ߦߴߏ߬ ߘߐ߫ ߦߋ߲߬߸ ߊ߬ ߣߌ߫ ߞߎߘߍ߫ ߓߙߍ߬ߦߊ ߡߍ߲ ߦߴߊ߬ߟߎ߬ ߕߍ߫>> ߘߍ߭ ߞߏߟߊߕߍ߮ ߣߌ߲߬ ߞߵߏ߬ ߔߘߋߔߘߋߟߊߕߍ߰߸ ߞߵߊ߬ ߦߌ߬ߘߊ߬ ߞߏ߫ ߏ߬ ߦߋ߫ ߦߙߐ ߟߎ߬ ߕߍߕߊ߯ߡߊ ߟߋ߬ ߟߊߣߐ߰ߦߊ߬ ߟߊ߫߸ ߊ߬ ߣߴߊ߬ ߘߌ߫ ߞߍ߫ ߓߊߛߌ߫ ߡߎߎ߯ ߞߐ߰ߡߊ߬ ߘߌ߫߸ ߞߊ߬ ߡߐ߱ ߟߎ߬ ߟߊߟߐ߲ߠߌ߲߫߸ ߞߊ߬ ߝߊ߬ߛߏ ߛߓߍߟߌ ߝߣߊ߫ ߡߊߦߋߙߋ߲߫ ߞߎߘߊߘߌ߫.

ߓߊ߯ߙߊ ߣߌ߲߬ ߛߋ߫ ߘߊ߫ ߓߐ߫ ߟߊ߫ ߜߍߟߊ߫ ߥߊ߬ߣߌ߲߬ߗߋ߬ ߢߌ߬ߡߊ߬ߕߌ ߛߌߦߊߡߊ߲߫ ߠߋ߬ ߟߊ߫ ߘߍ߬ߡߍ߲ ߛߊߓߎ߫ ߟߊ߫߸ ߞߵߏ߬ ߟߊ߫ ߡߊ߲߬ߖߊ߲߬ߠߊ߫ ߝߊ߰ߡߊ ߟߎ߬ ߞߊ߲߬߸ ߊ߬ߟߎ߬ ߓߍ߯ ߞߊ߬ ߘߏ߫ ߞߍ߫ ߣߌ߲߬ ߞߏ ߘߐ߫ ߝߊ߬ߛߏ߬ ߞߊ߲ ߠߎ߬ ߣߴߊ߬ ߛߓߍߟߌ ߟߎ߬ ߛߊ߲ߞߘߐߕߊ߭ ߡߙߌߦߊ ߟߋ߬ ߞߊ߲߬.

ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ ߘߊ߫ ߛߐ߰ߡߊ߬ߘߊ ߟߋ߬ ߟߊ߫ ߀߉ߙߋ߲߄߅ ߡߊ߬߸ ߒߞߏ ߛߍ߬ߘߏ߲߬ߠߊ߬ ߛߌߦߊߡߊ߲߫ ߣߌ߫ ߛߏ߫ ߞߣߐ߫ ߡߐ߯ ߛߌߦߊߡߊ߲߫ ߕߘߍ߬ ߡߍ߲ ߞߣߍ ߞߊ߲߬، ߡߊ߲߬ߖߊ߲߬ߠߊ߬ߞߊ ߟߎ߬ ߛߍߥߊ߫ ߘߊ߫ ߣߌ߲߬ ߞߏ ߟߊ߫߸ ߊ߬ߟߎ߫ ߞߵߊ߬ ߦߋ߫ ߞߏ߫ ߕߣߐ߬ߡߊ߬ߓߊ߫ ߘߌ߫ ߦߙߐ ߟߎ߬ ߡߊߟߐ߲ ߘߐ߫ ߣߐ߰ߦߊ߬ ߓߟߏ ߡߊ߬߸ ߞߵߊ߬ ߞߍ߫ ߝߏ߬ߣߊ߲߬ߕߍ ߟߎ߬ ߢߊߦߋߟߊ߲߫ ߓߘߍ ߘߌ߫߸ ߊ߬ ߣߴߊ߬ ߦߋ߫ ߝߊ߬ߛߏ߬ ߞߊ߲ ߠߎ߬ ߡߐ߬ߟߐ߲ ߠߋ߬ ߞߘߐߕߊ߬ ߟߊ߫ ߝߘߏ߬ߓߊ߬ ߘߌ߲ߞߌߙߊ ߟߎ߬ ߘߐ߫ ߓߍ߯ ߢߊߞߘߐ߫.

ߡߊ߲߬ߖߊ߲߬ߠߊ߫ ߛߏߕߌ߮ ߞߊ߬ ߡߐ߰ ߓߐ߫ ߞߵߊ߬ ߟߊߕߊ߯ ߦߋ߲߬߸ ߣߊߟߌ߬ߡߎ߲߫ ߝߌߟߊߞߊ߬ߟߌ߬ ߘߌ߫߸ ߖߊ߲߬ߖߏ߲ ߕߘߍ߬ߒ߬ߘߐ߬ߓߊ߮ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߓߍ߯ ߞߊ߫ ߞߊ߲߫ ߞߊ߬ ߒߞߏ ߞߊ߬ߙߊ߲߬߸ ߊ߬ ߕߌ߯ߕߌ߯ ߡߊ߲߬ߘߋ߲߬ߞߊ ߟߎ߬.

ߒߞߏ ߟߊߥߙߎߞߌ ߕߏ߰ߝߏ ߟߊ߫ ߓߊ߫ߙߊ ߡߍ߲ ߦߋ߫ ߕߋ߲߬߸ ߊ߬ ߦߋ߫ ߞߏ߫ ߕߊ߲߬ߘߏ߬ߕߊ ߟߋ߬ ߘߌ߫، ߏ߬ ߟߋ ߘߐ߫߸ ߊ߬ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߓߍ ߛߏ ߕߐ߭ ߓߍ߯ ߡߊ߬߸ ߞߵߊ߬ ߦߌ߬ߘߊ߬ ߞߏ߫ <<ߒߞߏ ߛߘߊߟߊ ߓߘߊ߫ ߕߏ߫ ߒߞߏ ߞߊߙߊ߲ߠߊ ߟߎ߫ ߡߊ߬ ߢߊ ߓߍ߯ ߟߊߘߍ߬ߣߍ߲ ߡߊ߬>> ߏ߬ ߘߐ߫߸ ߞߏ߫ ߓߍ߯ ߦߴߊ߬ ߖߞߊ߫ ߣߌ߲߬ ߛߎ߮ ߡߊ߬ <<ߞߊ߬ ߒߞߏ ߡߊߦߋߙߋ߲߫ ߝߊ߲߭ ߓߍ߯>> ߟߊ߱ߦߌ߬ ߝߘߊ߬ߝߌ߲ ߞߙߏ߬ߡߊ߫ ߟߋ߬ ߞߊ߲߫ ߕߋ߲߬.

ߣߌ߲߬ ߞߏ߬ߣߌ߲ ߦߋ߫ ߓߏ߲߬ߓߊ߫ ߘߌ߫߸ ߡߍ߲ ߦߋ߫ ߛߏ ߣߊ߬ߓߊ߰ߕߐ ߣߴߊ߬ ߓߐߓߊ߯ߕߐ ߓߍ߯ ߟߊߛߌ߲߫ ߠߊ߫ ߕߊ߯ ߦߙߐ ߣߌ߫ ߓߐ߫ ߦߙߐ ߟߐ߲ߠߌ߲ ߘߐ߫، ߣߴߌ ߡߊ߫ ߥߊߟߌ߫ ߞߊ߲߫ ߟߐ߲߫߸ ߌ ߘߴߊ߬ ߢߊߦߋ߫ ߝߊ߬ߛߏ ߞߊ߲ ߣߴߊ߬ ߛߓߍߟߌ ߘߐ߫.