ߡߊ߲߬ߘߋ߲߬ ߞߊ߲ ߛߊ߲ߞߘߐߕߊ߬ߓߊ߮ ߘߐ߲߬ߞߟߌ߬ߟߊ ߡߊ߬ߘߎ߮ ߘߐ߫߸ ߊ߯ߙߑߡߊ߲ߣ ߡߍ߲ ߞߊ߲߬ߕߐ߮ ߦߋ߫ ߡߊ߲߬ߘߋ߲߬ ߝߏߘߋ߫ ߘߌ߫߸ ߏ߬ ߟߋ ߣߐ߬ ߝߐ߰ߓߍ߬ ߜߙߊ߫ ߞߟߊߒߞߋ߫ ߞߍ߫ ߟߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫ ߞߵߊ߬ ߦߌ߬ߘߊ߬ ߖߊ߬ߡߊ ߟߊ߫ ߞߏ߫ ߊ߬ ߓߍߣߊ߬ ߝߐߟߌߜߙߊ߫ ߓߟߋߓߟߋ ߘߏ߫ ߞߍ߫ ߞߊ߬ߙߌ߬ߝߐ ߕߋ߬ߟߋ߫ ߂߄ ߡߊ߬، ߞߊ߬ߕߎ߲߯߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߞߊ߲ߞߊ߲߫ ߓߊ߬ߕߏ߲߬ߓߊ ߟߝߊ߫ ߛߋ߲߬ߢߊ߫ ߛߓߊ߬߸ ߞߊ߬ ߜߍߞߊ߲ߠߊ ߡߎ߰ߡߍ ߓߌ߬ߟߴߊ߬ ߛߋ߲߬ߞߘߐ߫، ߏ߬ ߟߋ ߞߏߛߐ߲߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߴߊ߬ ߝߍ߬ ߞߵߊ߬ ߞߊ߬ߣߌ߲߬ߓߊ߮ ߟߎ߬ ߟߊߛߍߥߊ߫ ߞߊ߲ߞߊ߲߫ ߞߐ߲ߔߑߟߍߞߛ ߡߌߟߏ ߟߊ߫߸ ߞߵߏ߬ ߝߣߊ߫ ߞߍ߫ ߘߊ߫ ߓߟߋߓߟߋ ߘߏ߫ ߟߊߞߊ߬ߣߍ߲ ߘߌ߫ ߊ߬ ߟߊ߫ ߞߏ ߘߐ߫.

<<ߟߊ߬ߢߌ߬ߣߌ߲߬ ߞߋߟߋ߲߫ ߔߋ߫߸ ߏ߬ ߟߋ ߞߊ߲ ߠߊߛߋ߫ ߦߊ߲߬، ߏ߬ ߟߋ߸ ߞߊ߬ ߓߍ߯ ߟߊߘߍ߬ߣߍ߲ ߡߊߥߟߋ߫߸ ߊ߲ ߞߐ߬ߘߐ ߣߴߊ߲ ߘߐ߮ ߟߎ߬߸ ߓߍ߯ ߟߊߘߍ߬ߣߍ߲ ߦߴߌ ߥߟߌ߬߸ ߞߵߌ ߛߋ߲߭ ߓߐ߫ ߌ ߞߣߐ ߞߘߐ߫߸ ߞߊ߬ ߥߊ߫ ߛߋ߫ ߦߋ߲߬ߘߐ ߞߊߙߏ ߕߋ߬ߟߋ߫ ߂߄ ߡߊ߬߸ ߁߆ߕߎߡߊ߸ ߛߏߘߐߦߊ߯ߟߊ ߝߣߊ߫ ߦߋ߲߬ ߖߎߡߊߟߏ߲߫ ߞߋߟߋ߲ ߏ߬ ߛߐ߰ߡߊ߬ߘߊ ߟߊ߫.>> ߡߊ߲߬ߘߋ߲߬ ߝߏߘߋ߫ ߟߋ߬ ߞߊ߲߫ ߕߋ߲߬.

ߣߌ߲߬ ߟߏ߲ ߠߋ߬߸ ߘߐ߲߬ߞߟߌ߬ߟߊ߬ߟߊ߫ ߡߊߞߟߌߣߍ߲ ߠߎ߬ ߘߌ߫ ߓߐ߫ ߘߐ߲߭ ߣߌ߫ ߘߐ߲߬ߞߟߌ ߘߐ߫߸ ߞߊ߬ ߡߊ߲߬ߘߋ߲߬ ߝߏߘߋ߫ ߟߊ߫ ߕߏߟߏ߲ ߣߌ߲߬ ߘߐߘߌߦߊ߫، ߣߌ߲߬ ߦߋ߫ ߟߐ߬ߟߌ ߝߐߟߌߜߙߊ ߟߋ߬ ߘߌ߫ ߔߐ߲߭ ߞߘߐ߫.

ߡߊ߲߬ߘߋ߲߬ ߝߏߘߋ߫ ߛߋ߲߬ߢߊ߬ ߝߟߐ ߟߋ߬ ߕߋ߲߬߸ ߞߊ߬ ߝߐ߰ߓߍ߬ ߜߙߊ ߛߌ߲߬ߝߏ߲߬ߧߊ߫ ߞߊ߬ ߞߐ߲߰ ߊ߬ ߟߊ߫ ߝߐߟߌߜߙߊ ߢߍ߫، ߊ߬ ߟߊ߫ ߞߏ ߟߎ߬ ߘߏ߲߬ߖߟߎ߬ߡߊ߬ߓߊ߮߸ ߜ߭ߊ߯ߖ߭ߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߝߏߘߋ߫ ߛߋ߲߬ߞߘߐ߬ ߞߏ ߞߊ߫ ߛߌߦߊ߫ ߢߌ߬ߣߊ߲߬ ߞߏߛߓߍ߫، ߏ߬ ߟߋ ߞߏߛߐ߲߬߸ ߊ߬ߟߎ߬ ߦߴߊ߬ ߝߍ߬ ߞߵߊ߬ߟߎ߬ ߟߊ߫ ߓߊ߯ߙߊ ߘߊߓߊ߲߫ ߦߊ߲߬ ߝߊ߲ ߝߍ߬ ߡߎߣߎ߲߬߸ ߞߊ߬ ߞߐ߲߰ ߞߏ ߕߐ߭ ߟߎ߬ ߘߊߓߊ߲ ߢߍ߫: <<ߝߎ߳ߕߌߙߌ߲ߜ߭ ߛߌߦߊߡߊ߲߫ ߦߴߊ߬ ߛߋ߲߬ߞߘߐ߫߸ ߊ߬ ߞߊ߫ ߞߊ߲߫ ߞߵߊ߬ ߛߋ߲߬ߠߊ߬ߓߐ߫߸ ߊ߲ ߕߴߛߋ߫ ߥߊ߫ ߟߊ߫ ߏ߬ ߟߎ߬ ߞߍ߫ ߟߊ߫ ߝߟߐ߫߸ ߊ߲ ߞߵߊ߬ ߘߊߡߌ߬ߣߊ߬ ߡߍ߲ ߠߎ߬ ߡߊ߬߸ ߊ߲ ߡߊ߫ ߓߊ߲߫ ߏ߬ ߟߎ߬ ߟߊ߫، ߏ߬ ߟߋ ߞߏߛߐ߲߬߸ ߊ߲ ߞߊ߬ ߞߊ߲ߞߊ߲߫ ߕߊ ߕߎ߬ߡߊ߬ߘߊ ߟߊߕߍ߰߸ ߊ߲ ߧߋ߫ ߓߊ߲߫ ߏ߬ ߟߊ߫߸ ߏ߬ ߞߐߝߍ߬ ߊ߲ ߘߴߊ߲ ߠߊ߫ ߓߙߊߟߊߡߌߣߌ߲ ߘߊߓߊ߲߫.>> ߜ߭ߊ߯ߖ߭ߊ߬ ߞߵߏ߬ ߦߌ߬ߘߊ߬.


ߘߊߞߎ߲߫ ߞߋߟߋ߲ ߢߌ߲߬ ߘߐ߫߸ ߊ߬ ߣߊߓߘߍ߫ ߣߊ߬ߣߌ߲߫ ߞߏ߬ߣߊ߬ߕߍ߫ ߕߘߍ߬ ߞߣߍ ߞߊ߲߬، ߏ߬ ߞߵߊ߬ ߞߊ߲ߠߊߘߌ߫ ߊ߬ ߞߊ߬ߣߌ߲߬ߓߊ߮ ߟߎ߫ ߡߊ߬߸ ߞߏ߫ ߓߍ߯ ߦߋ߫ ߓߐ߫ ߞߊ߬ ߛߐ߬ߘߐ߲߬ ߝߐߟߌߜߙߊ ߢߌ߲߬ ߘߐ߫، ߞߊ߬ ߓߊ߲߫ ߞߵߊ߬ ߦߌ߬ߘߊ߫ ߖߊ߬ߡߊ ߟߊ߫߸ ߊ߬ ߛߎߥߊ߲ߘߌߣߍ߲߫ ߞߎ߲߬ ߞߋߟߋ߲ ߡߍ߲ ߠߊ߫ ߞߵߊ߬ ߞߍ߫ ߣߊߓߘߍ ߘߌ߫ ߡߊ߬ߘߋ߲߬ ߝߏߘߋ߫ ߟߊ߫ ߞߏ ߘߐ߫، <<ߓߍ߯ ߦߴߊ߬ ߓߟߏ ߛߌ߰ ߊ߬ ߞߘߐ߫߸ ߞߵߊ߬ ߞߐߞߘߐߓߌ߲ߓߌ߲߫߸ ߛߴߊ߬ ߘߴߊ߬ ߛߋ߫ ߦߌߟߊ ߟߊߛߐ߬ߘߐ߲߬، ߒߠߋ ߞߍߣߍ߲߫ ߣߊߓߘߍ ߘߌ߫ ߏ߬ ߟߋ ߞߏߛߐ߲߬߸ ߟߊ߬ߟߌ߬ߟߌ߬ ߓߟߏ ߡߊ߬߸ ߡߊ߬ߛߊ߲߬ߛߊ߲߬ߠߌ߲߬ ߓߟߏ ߡߊ߬߸ ߡߊ߬ߞߊ߲߬ߞߊ߲߬ߠߌ߲߬ ߓߟߏ ߡߊ߬߸ ߏ߬ ߟߋ ߣߊߓߘߍߦߊ ߦߋ߫ ߒߠߋ ߓߟߏ߫.>> ߣߊ߬ߣߌ߲߫ ߞߏ߬ߣߊ߬ߕߍ߫ ߞߵߏ߬ ߟߊߛߙߋ߬ߦߊ߬ߟߌ ߞߍ߫.

ߡߊ߲߬ߘߋ߲߬ ߝߏߘߋ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߘߐ߲߬ߞߟߌ ߟߊ ߝߊ߬ߛߏ߬ ߞߊ߲ ߘߐ߫߸ ߏ߬ ߞߎ߲߭ ߕߍ߫ ߘߏ߫ ߜߘߍ߫ ߘߌ߫߸ ߊ߬ ߦߴߊ߬ ߝߊ߬ߛߏ߬ߘߋ߲߬ߢߐ߲߮ ߡߍ߲ ߠߎ߬ ߕߍߡߊ߬߸ ߏ߬ ߟߎ߬ ߦߴߏ߬ ߟߋ ߢߊߦߋ߫ ߟߊ߫، ߞߊ߬ߕߎ߲߯߸ ߞߏ߫ ߘߐ߲߬ߞߟߌ ߦߋ߫ ߟߊ߫ ߟߴߊ߬ ߜߊߦߋ߫ ߞߊ߲ ߠߋ߬ ߡߊ߬، ߏ߬ ߞߏߛߐ߲߬߸ ߊ߬ ߡߊ߬ߞߏ ߦߋ߫ ߞߊ߲߫ ߠߋ߬ ߝߐߟߌ ߟߊ߫߸ ߓߍ߯ ߦߋ߫ ߡߍ߲ ߢߊߦߋ߫ ߟߊ߫، ߓߊ߬ߙߵߊ߬ ߞߵߊ߬ ߟߴߊ߬ ߞߊ߲߬ ߞߏ߫ ߊ߬ ߟߊ߫ ߘߐ߲߬ߞߟߌ ߘߏ߫ ߟߎ߫ ߦߋ߫ ߝߊ߬ߙߊ߲߬ߛߌ߬ ߞߊ߲ ߘߐ߫ ߞߘߐ߬ߡߊ߲߬، ߊ߬ ߦߴߏ߬ ߓߌ߬ߟߊ߬ ߟߴߊ߬ ߢߊߝߍ߬ ߛߐ߲߬.

ߊ߬ ߞߵߊ߬ ߘߊ ߟߊߡߊ߰ ߏ߬ ߟߋ ߘߐ߫߸ ߞߊ߬ ߝߊ߬ߛߏ߬ ߞߊ߲ ߞߐߡߊߓߌ߲ߓߌ߲߫߸ ߞߊ߬ ߘߕߐ߬ߛߟߌ߬ߟߊ ߟߎ߫ ߣߊ߬ߞߊߘߌ߫: <<ߒ ߡߊߞߐ߬ߣߐ߲߫ ߦߋ߲߬߸ ߒ ߧߋ߫ ߡߊ߬ߣߌ߲߬ߞߊ߬ߞߊ߲ ߞߊ߲߬ߞߌߙߊ߸ ߒ ߧߴߌ ߛߊ߲߬ߓߴߊ߬ ߟߊ߫، [....] ߊߟߴߊ߬ ߝߐ߫ ߊ߬ ߦߋ߫ ߡߊ߬ߣߋ߲߬ߞߊ߬ ߞߊ߲ ߘߐ߫߸ ߡߊ߬ߘߋ߲߬ ߝߏߘߋ߫ ߡߊ߫ ߝߌ߬ߟߴߊ߬ ߛߎ߮ ߡߊ߬. ߒ ߧߋ߫ ߒ ߕߊ ߞߍ߫ ߟߊ߫ ߝߘߏ߬ߓߊ߬ ߞߊ߲ ߘߐ߫߸ ߓߍ߯ ߦߴߊ߬ ߝߊ߰ߡߎ߲߬ ߠߴߊ߬ ߟߊ߫ ߟߎ ߡߊ߬.>> ߡߊ߲߬ߘߋ߲߬ ߝߏߘߋ߫ ߞߵߏ߬ ߘߟߊߡߊ߮ ߞߍ߫ ߘߐ߲߬ߞߟߌ ߘߐ߫.

ߡߊ߲߬ߘߋ߲߬ ߝߏߘߋ߫ ߞߏ߬ߣߌ߲ ߓߘߊ߫ ߛߌߟߊ ߟߊߞߊ߬߸ ߞߵߊ߬ ߦߌ߬ߘߊ߬ ߞߏ߫ ߞߣߐߟߊ ߘߐ߲߬ߞߟߌ߬ߟߊ߬ߟߊ ߟߎ߬ ߞߊ߫ ߞߊ߲߫ ߞߊ߬ ߝߐ߰ߕߍ߬ ߜߙߊ߬ ߞߏ ߓߌ߬ߟߴߊ߬ߟߎ߬ ߢߍߛߌߟߊ ߘߐ߫ ߡߎ߬ߕߎ߲߬߸ ߞߊ߬ ߞߐ߲߰ ߊ߬ߟߎ߬ ߟߊ߫ ߖߊ߲߬ߖߏ߲ ߠߎ߬ ߦߋ߫.