ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߝߕߞߡߘ) ߓߘߊ߫ ߟߊ߬ߛߋ߬ߟߌ߬ ߞߟߊߒߞߋ߫ ߞߍ߫ ߞߊ߯ߙߌ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߂߆߸ ߞߵߊ߬ ߦߌ߬ߘߊ߬ ߞߏ߫ ߓߊ߰ߓߊ߰ߟߌ߬ߟߊ ߟߎ߫ ߣߐ߬ ߡߙߊ߬ߒ߬ߡߊ߬ߟߌ ߡߍ߲ ߞߍ߫ ߟߊ߫ ߢߐ߲߮ ߞߐ߫ ߡߊ߬ߟߌ ߘߎ߰ ߛߌߦߊߡߊ߲߫ ߞߣߐ߫߸ ߏ߬ ߡߊ߫ ߘߌߦߴߊ߬ߟߎ߬ ߦߋ߫ ߝߋߝߋ߫، ߛߌ߲߬ߝߏ߲߬ߘߊ ߣߌ߲߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߛߐ߲߬ ߕߴߛߋ߫ ߞߍ߫ ߟߊ߫ ߓߊ߬ߓߊ߰ߟߌ߬ߟߊ ߟߎ߬ ߟߊ߫ ߓߋ߬ߒ߬ߞߊ߲߬ߠߌ߲߬ ߛߎ߮ ߣߌ߲߬ ߡߊ߬ ߢߊ߫ ߛߌ߫ ߡߊ߬، ߏ߬ ߘߐ߫߸ ߞߏ߫ ߝߏ߫ ߓߍ߯ ߟߋ߬ ߘߍ߬ ߞߊߟߌߦߊ߫ ߓߟߏ ߡߊ߬ ߕߋ߲߬߸ ߞߊ߬ ߟߊߞߊ߲ߘߓߊߟߌߦߊ߫ ߛߎ߮ ߣߌ߲߬ ߞߍ߬ߟߍ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߐ߫߸ ߏ߬ ߡߍ߲ ߦߋ߫ ߕߊ߬ߡߌ߲߬ ߠߊ߫ ߝߊ߲߬ߞߊ߫ ߛߐ߬ߘߐ߲߬ ߕߋ߲߬ ߞߊ߬ߣߌ߲߬.

ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߞߟߊߒߞߋ ߣߌ߲߬ ߘߐ߫߸ ߏ߬ ߡߍ߲ ߞߍ߫ ߘߴߊ߬ߟߎ߬ ߓߟߏ߫ ߊߓߎߖߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߡߊ߫ ߞߋߟߋ߲߫ ߣߌ߫ ߝߌ߬ߟߊ߬ ߟߐ߲߫: <<ߓߋ߬ߒ߬ߞߊ߲߬ߠߌ߲߬ ߖߎ߰ ߛߎ߮ ߡߍ߲ ߦߋ߫ ߕߋ߲߬߸ ߏ߬ ߡߍ߲ ߞߍߣߍ߲߫ ߞߘߊ߬ߜߟߍ߬ߦߊ ߣߌ߫ ߥߊ߬ߥߟߏ߬ߦߊ ߓߋ߬ߒ߬ߞߊ߲߬ߠߌ߲ ߘߌ߫ ߊ߬ ߞߍߓߊ߮ ߟߎ߬ ߓߟߏ߫߸ ߏ߬ ߦߋ߫ ߞߏ߫ ߟߋ߬ ߘߌ߫ ߡߍ߲ ߦߋ߫ ߖߐ ߘߐߓߎ߬ߘߎ߲߬ ߠߊ߫߸ ߞߊ߬ ߟߊߞߊ߲ߘߊ ߣߌ߫ ߓߊߛߌ߮ ߢߊߞߍ߫ ߕߟߋ߬ߓߋ߬ ߊߝߙߌߞߌ߬ ߞߣߐ߫.>> ߟߊ߬ߛߋ߬ߟߌ ߣߌ߲߬ ߓߘߊ߫ ߛߘߋߦߊߥߏ ߥߊ߬ߣߌ߲߬ߞߋ ߘߏ߫ ߦߌ߬ߘߊ߫ ߞߊ߬ ߓߍ߲߬ ߟߊ߬ߞߊ߲߬ߘߊ߬ߟߌ ߖߐ߬ߘߐ ߡߊ߬ ߜߙߋߓߊ ߣߌ߲߬ ߞߊ߲߬.

ߡߊ߬ߛߎߓߊ ߣߌ߲߬ ߞߏߛߐ߲߬߸ ߛߘߋߦߊߥߏ ߞߵߊ߬ ߞߊ߲ߠߊߘߌ߫߸ ߞߏ߫ ߓߍ߯ ߦߋ߫ ߥߟߌ߫ ߞߊ߬ ߘߍ߬߸ ߞߊ߬ ߞߍ߫ ߞߋߟߋ߲߫ ߘߌ߫، <<ߛߘߋߦߊߥߏ ߦߴߊ߬ ߞߊ߲ߠߊߘߌ߫ ߟߊ߫ ߞߊ߬ߝߏ ߓߍ߯ ߡߊ߬߸ ߕߐ߲߫ ߓߟߏߡߊ ߓߍ߯ ߡߊ߬߸ ߝߘߊ߬ߝߌ߲߬ߠߊ߫ ߕߟߋ߬ߓߋ ߛߌ߲߬ߝߏ߲߬ߘߊ ߟߎ߫ ߡߊ߬߸ ߊ߬ ߣߴߊ߬ ߡߌ߬ߙߌ߲߬ߘߌ ߟߎ߬߸ ߓߍ߯ ߦߋ߫ ߘߍ߬߸ ߞߊ߬ ߥߟߌ߬ ߞߋߟߋ߲ߘߌ߫ ߞߊ߬ ߓߟߊ߬ߥߎ߬ ߛߎ߮ ߣߌ߲߬ ߞߟߍ߬.>> ߛߌ߲߬ߝߏ߲߬ߘߊ ߣߌ߲߬ ߞߵߏ߬ ߟߊߕߍ߰، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߛߏ߰ߟߊ ߣߐ߬ ߡߍ߲ ߠߎ߬ ߛߐ߬ߘߐ߲߬ ߠߊ߫ ߡߊ߬ߟߌ ߝߊ߰ߡߊ ߟߎ߬ ߘߐ߫߸ ߊ߬ ߣߌ߫ ߞߐߙߍ ߡߍ߲ ߠߎ߬ ߣߐ߬ ߡߊ߲߬ߕߙߐ߫ ߛߐ߬ߘߐ߲߬ ߠߊ߫߸ ߊ߬ߟߎ߬ ߦߴߏ߬ ߟߎ߬ ߓߍ߯ ߡߊ߬ߤߌ߬ߣߊ߬ ߟߊߡߌ߬ߣߊ߬ ߟߊ߫.

ߏ߬ ߘߐ߫߸ ߝߘߊ߬ߝߌ߲߬ߠߊ߫ ߕߟߋ߬ߓߋ ߟߊ߫ ߓߊߛߌ߯ߟߌ ߕߍ߫ ߘߏ߫ ߜߘߍ߫ ߘߌ߫߸ ߣߌ߫ ߢߊ߫ ߛߋ߫ ߘߊ߫ ߡߊߖߌ߰ ߟߴߊ߬ ߞߘߐ߫ ߞߊ߬ ߝߊ߲߬ߞߊ߬ ߟߊ߫ ߢߐ߲߮ ߞߊ߲߬، ߣߌ߫ ߝߘߊ߬ߝߌ߲߬ߠߊ߬ ߛߋ߫ ߘߴߊ߬ ߓߟߏ ߘߌ߫ ߟߊ߫ ߢߐ߲߮ ߡߊ߬߸ ߊ߬ ߘߌ߫ ߞߍ߫ ߡߊ߬ߞߊ߲߬ߞߊ߲߬ߠߌ߲ ߛߌߟߊ߫ ߞߎߘߊ߫ ߘߌ߫߸ ߞߊ߬ ߦߙߐ߫ ߘߐߞߟߊߦߟߊ ߟߎ߬ ߢߍߓߍ߲߬߸ ߡߍ߲ ߠߎ߬ ߦߋ߫ ߓߐ߫ ߟߊ߫ ߞߐߞߊ߲߬߸ ߊ߬ ߣߌ߫ ߡߍ߲ ߠߎ߬ ߦߴߊ߬ ߞߣߐ߫.