ߛߊ߬ߡߊ ߓߊ߯ ߘߏ߲߬߸ ߞߌ߬ߣߌ߲߬ߞߌߣߌ߲ ߣߌ߫ ߛߐ߲߬ߖߊ ߟߋ߬ ߓߘߊ߫ ߘߏ߲߬ ߏ߬ ߘߌ߫

ߛߊ߬ߡߊ ߦߋ߫ ߣߊ߬ ߟߊ߫ ߛߐ߲߬ߖߊ ߟߋ߬ ߘߌ߫ ߘߏ߫ ߡߊ߬߸ ߔߏߔߏ߫ ߕߌ߮ ߟߎ߬߸ ߘߎ߰ߞߎߟߎ߲ ߠߎ߬߸ ߛߋ߲߬ߠߊ߬ߡߊ ߟߎ߬߸ ߛߊ߬ߡߊ ߓߊ߯ ߓߊ߲߫ ߘߏ߲߬ ߠߊ߫߸ ߓߍ߯ ߟߋ߬ ߟߊ߫ ߕߊ߯ߡߊ ߦߋ߫ ߖߐ߬ߘߐ ߘߐ߫ ߏ߬ߘߌ߫ ߓߎ߬ߕߎ߲߫߸ ߛߌߟߊ߫ ߘߊߝߍ߫ ߛߌ߱ ߟߊ ߟߎ߬߸ ߝߏߟߏ߲ ߞߙߍ߬ߝߍ߬ ߛߌ߰ ߟߊ ߟߎ߬߸ ߛߐ߲߬ߖߊ ߞߏ߬ߣߌ߲ ߦߋ߫ ߏ߬ ߟߎ߬ ߕߊ ߟߋ߬ ߘߌ߫߸ ߡߊߙߑߛߋ߫ ߖߊ߰ߞߊ ߘߊߝߍ߫ ߛߌ߯ ߟߊ ߟߎ߬ ߢߊ ߓߍ߲߬ߣߍ߲߫ ߖߐ߬ߘߐ ߟߋ߬ ߡߊ߬ ߊ߬ߟߎ߬ ߘߊ߫ ߟߊ߫߸ ߞߵߊ߬ ߛߊߓߎ ߞߍ߫ ߔߏߔߏ߫ ߕߌ߮ ߟߎ߬ ߖߌ߰ ߘߌ߫ ߝߏߟߏ߲ ߞߣߐ߫ ߊ߬ߟߎ߬ ߢߣߊ߫ ߜߍ ߘߐ߫ ߜߋ߲߬ ߥߛߊߞߙߊ߫߸ ߞߐ߲߬ߛߏ ߟߎ߬ ߝߣߊ߫ ߦߋ߫ ߖߌ߰ ߟߊ߫ ߟߋ߬ ߝߏߟߏ߲ ߣߌ߲߬ ߞߣߐ߫. 

ߣߌ߲߬ ߓߘߊ߫ ߞߍ߫ ߕߎ߬ߙߎ߫ ߘߌ߫ ߞߊ߬ ߡߊ߲߬ߕߙߐ ߖߍ߬ߘߍߖߍ߬ߘߍ ߟߋ߬ ߟߊߛߋ߫ ߡߐ߱ ߟߎ߬ ߡߊ߬ ߦߋ߲߬߸ ߊ߬ߟߎ߫ ߞߏ߬ߣߌ߲ ߠߊ߫ ߕߙߐߦߊ ߦߴߊ߬ ߞߊ߲߬ ߞߊ߬ ߡߊ߫ ߟߊ߫߸ ߓߊߏ߬߸ ߊ߬ߟߎ߬ ߟߊ߫ ߝߏߟߏ߲ ߓߘߊ߫ ߘߐߓߐ߫ ߊߡߙߊ߫ ߛߘߌ߬ߓߋ߫ ߡߍ߲ ߦߋ߫ ߡߊߙߑߛߋ߫ ߖߊ߰ߞߊ ߘߊߝߍ߫ ߛߌ߯ ߟߊ߫ ߘߌ߫߸ ߊ߬ߟߋ ߛߋ߫ ߘߊ߫ ߝߏ߫ ߟߴߊ߲ ߧߋ߫ <<ߓߊ߬ߙߌ߫߸ ߝߏߟߏ߲ ߘߓߐ ߣߴߊ߬ ߕߊ߫߸ ߤߊߟߌ߬ ߛߌߣߌ߲߫ ߡߐ߱ ߟߎ߬ ߟߊ߫ ߕߊ߯ߡߊ ߦߋ߫ ߖߐ߬ߘߐ ߘߐ߫߸ ߓߊߏ߬߸ ߡߐ߱ ߟߎ߬ ߦߋ߫ ߓߋ߬ ߟߊ߫ ߤߊߟߌ߬ ߝߟߐ߫߸ ߞߊ߬ߕߎ߲߯߸ ߝߏߟߏ߲ ߠߎ߬ ߡߊ߫ ߘߊߕߎ߲߯ ߊ߬ߟߎ߬ ߓߟߏ߫ ߝߟߐ߫߸ ߢߊ߬ߡߊ ߟߎ߬ ߝߣߊ߫ ߡߊ߫ ߕߊ߬ ߡߎߣߎ߲߬.>> ߞߊ߬ ߓߍ߲߬ ߡߐ߱ ߟߎ߬ ߟߊ߫ ߡߞߊ߬ߛߌ߬ߟߌ ߛߌߦߊߦߊ ߡߊ߬ ߦߙߐ ߣߌ߲߬ ߘߐ߫߸ ߏ߬ ߓߘߊ߫ ߞߍ߫ ߛߊߓߎ߫ ߘߌ߫ ߞߊ߬ ߝߏߟߏ߲߫ ߘߓߐߟߊ ߟߎ߬ ߞߎ߲߬ߛߌ߲߫ ߡߊߙߑߛߋ߫ ߖߊ߰ߞߊ ߟߊ߫߸ ߞߊ߬ ߘߏ߫ ߓߐ߫ ߓߏ߬ߙߌ߬ߝߋ߲߬ߕߌ߮ ߟߎ߬ ߟߊ߫ ߡߊ߲߬ߕߙߐ ߟߊ߫. 

ߊ߬ ߣߌ߫ ߞߊ߬ ߖߌ ߓߐ߫ ߊ߬ߟߎ߬ ߘߊߝߍ߫ ߛߌ߯ ߟߊ ߟߎ߫ ߘߊ߫ ߟߊ߫߸ ߊ߬ߟߎ߬ ߦߋ߫ ߡߎ߲߬ ߠߋ߬ ߝߍ߬ ߓߎ߬ߕߎ߲߫߸ ߡߎߛߊ߫ ߖߊߟߏ߫ ߝߣߊ߫ ߛߋ߫ ߘߴߊ߬ ߞߙߊ ߟߊߡߊ߰ ߟߴߊ߲ ߧߋ߫ <<ߝߏ߫ ߊ߬ߟߎ߬ ߦߋ߫ ߊ߬ߟߎ߬ ߓߊ߯ߙߊ ߕߐ߭ ߟߊߓߊ߲߫ ߠߋ߬߸ ߣߴߏ߬ ߕߍ߫ ߤߊߟߌ߬ ߛߌߣߌ߲߫߸ ߛߌߟߊ ߓߍ߲߬ߣߍ߲߬ ߕߍ߫߸ ߊ߬ߟߎ߬ ߦߋ߫ ߝߙߍ߬ߞߍ߫ ߞߊ߬ ߢߊ߬ߡߊ ߟߎ߬ ߓߐ߫ ߛߌߟߊ ߘߐ߫߸ ߊ߬ ߣߌ߫ ߞߊ߬ ߝߏߟߏ߲ ߘߊߕߎ߲߯߸ ߓߊߏ߬߸ ߡߐ߱ ߟߎ߬ ߟߊ߫ ߕߊ߯ߡߊ ߓߍ߲߬ߣߍ߲߬ ߕߍ߫ ߡߎߣߎ߲߬߸ ߣߴߏ߬ ߕߍ߫߸ ߊ߬ ߞߎߡߊ ߞߊ߫ ߛߌߦߊ߫ ߝߟߐ߫ ߘߋ߬.>> ߡߛߌߙߊ߲ߞߊ ߟߎ߬ ߝߣߊ߫ ߦߋ߫ ߛߌߟߊ߫ ߞߏ ߤߊߡߌ߲ ߛߌ߱ ߟߋ߬ ߘߐ߫ ߛߊ߬ߡߊ ߣߌ߲߬ ߘߐ߫߸ ߛߌߟߊ߫ ߕߴߊ߬ߟߎ߬ ߓߟߏ߫߸ ߊ߬ߟߎ߬ ߦߴߊ߬ߟߎ߬ ߟߊ߫ ߓߏ߬ߙߌ ߞߍ߫ ߟߊ߫ ߛߌߟߊ ߡߍ߲ ߞߊ߲߬߸ߏ߬ ߓߘߊ߫ ߕߌߢߍ߫ ߖߌ ߓߟߏ. 

ߓߍ߯ ߛߘߌ߬ߣߍ߲߫ ߦߙߐ߫ ߞߎ߲ߞߎߘߎ߲ߣߍ߲ ߠߋ߬ ߡߊ߬ ߕߋ߲߬߸ ߛߌߟߊ ߡߍ߲ ߘߐߝߎߟߋ߲߫ ߓߍ߯ ߦߋ߫ ߛߌߟߊ߲߫ ߠߊ߫ ߥߊ ߟߊ߫ ߦߋ߲߬߸ ߣߌ߫ ߛߊ߲ ߠߊ߫ ߣߊ߬ߟߌ ߝߊ߲߬ߞߊ ߓߏ߲߬ߧߊ߬ ߘߊ߫߸ ߤߊߟߌ߬ ߔߏߔߏ ߕߴߛߋ߫ ߖߌ߰ ߟߴߊ߬ ߞߊ߲߬߸ ߣߴߏ߬ ߕߍ߫߸ ߊ߬ ߘߌ߫ ߛߊ߬߸ ߛߌߟߊ ߣߌ߲߬ ߦߋ߫ ߡߐ߱ ߟߎ߬ ߟߊߓߋ߬ ߟߊ߫ ߟߋ߬߸ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߞߵߏ߬ ߞߎ߲߭ ߞߍ߫ ߓߐ߱ ߛߌ߰ ߘߌ߫ ߊ߬ ߞߘߐ߫߸ ߛߌߟߊ ߣߌ߲߬ ߕߌߢߍ ߞߏߛߐ߲߬߸ ߥߊߟߌߥߊߟߌ߫ ߓߏߙߌߟߊ ߟߎ߬ ߓߘߊ߫ ߛߌߟߊ߲߫ ߊ߬ ߓߏ߬ߙߌ ߘߐ߫߸ ߝߏ߫ ߊ߬ߟߎ߬ ߓߘߴߊ߬ߟߎ߫ ߓߊ߲߬ ߥߊ߫ ߟߊ߫ ߡߌߛߌ߬ߙߊ߲߬߸ ߟߊ߲߱ߛߌ߬ߣߍ߫ ߞߋߕߊ߬ ߡߍ߲ ߦߋ߫ ߡߛߌߙߊ߲ߞߊ߫ ߘߌ߫߸ ߊ߬ߟߋ ߝߣߊ߫ ߞߊ߬ ߘߏ߫ ߝߐ߫ ߊ߬ߟߎ߬ ߟߊ߫ ߛߌߟߊ ߖߌ߫ ߞߏ ߞߊ߲߬ << ߤߊߟߌ߬ ߥߊߟߌߥߊߟߌ߫ ߕߌ߮ ߓߍ߯ ߕߍ߫ ߛߐ߲߬ ߠߊ߫ ߣߊ߬ ߟߊ߫ ߦߊ߲߬߸ ߌ ߓߴߊ߬ ߝߐ߫ ߘߏ߫ ߟߎ߫ ߢߣߊ߫ ߞߏ߫ ߌ ߣߊ߬ߕߐ߫ ߡߌߛߌ߬ߙߊ߲߬ ߠߋ߬. 

ߊ߬ߟߎ߬ ߘߴߊ߬ ߝߐ߫ ߞߏ߫ ߊ߬ߟߎ߬ ߕߍ߫ ߥߊ߫ ߟߊ߫ ߦߋ߲߬߸ ߞߏ߫ ߖߌ ߦߋ߫ ߛߌߟߊ ߟߊ߫߸ ߓߐ߱ ߦߋ߫ ߦߋ߲߬.>> ߛߌߟߓߊ-ߥߎߟߋ߲ ߝߊ߲߬ߝߍ߬ ߡߐ߮ ߟߎ߬ ߝߣߊ߫ ߦߋ߫ ߛߌߟߊ߫ ߞߏ ߢߌ߲߬ ߠߋ߬ ߖߐ߬ߘߐ ߘߐ߫߸ ߓߐ߱ ߢߍߛߌߟߊ߲ߢߍ ߓߘߊ߫ ߏ߬ ߟߎ߫ ߟߐ߬ ߛߌߟߊ ߕߏ߫ ߟߊ߫ ߢߐ߲߯ ߦߋ߫߸ ߘߏ߫ ߓߊ߯ ߕߊ߬ߡߌ߲߫߸ ߘߏ߫ ߜߘߍ߫ ߝߣߊ߫ ߘߌ߫ ߕߊ߬ߡߌ߲߫ ߏ߬ ߣߐ߭ ߞߊ߲߬߸ ߞߊ߬ߕߎ߲߯߸ ߛߌߟߊ ߓߍ߯ ߘߌ߫ ߛߋ߫ ߊ߬ ߟߊ߫ ߖߌ߰ߣߌ߬ߞߊ߬ߦߟߍ ߞߍ߫ ߟߊ߫ ߛߌߟߊ ߡߍ߲ ߞߊ߲߬߸ ߣߴߏ߬ ߕߌߢߍ߫ ߘߊ߫߸ ߡߍ߲-ߣߍ߲ ߞߊ߫ ߢߌ߲߬߸ ߘߌߦߊߜߏߦߊ ߝߏ߫ ߡߐ߱ ߟߎ߬ ߦߋ߫ ߢߐ߲߯ ߘߐߜߍ߬ߘߍ߲߫ ߠߋ߬ ߏ߬ ߣߐ߭ߝߍ߬߸ ߏ߬ ߘߏ߲߬ ߘߌ߫ ߛߋ߫ ߟߊߓߊ߲߫ ߠߊ߫ ߢߐ߲߯ ߠߊߓߋ ߡߊ߬߸ ߖߌ ߣߌ߫ ߓߐ߱ ߟߋ߬ ߝߣߊ߫ ߓߘߊ߫ ߊ߬ߟߎ ߢߊߜߊ߬ ߦߋ߲߬ ߕߋ߲߬ ߞߏߛߓߍ߫. 

ߘߏ߫ ߟߎ߫ ߟߊ߫ ߞߙߐ߬ߛߌ߬ ߘߐ߫߸ ߖߌ߫ ߣߌ߲߬ ߛߌ߰ ߞߎ߲߬ߧߊ ߦߋ߫ ߝߏߟߏ߲ ߕߋ߬ ߓߊߟߌߦߊ ߟߋ߬ ߘߌ߫߸ ߡߊ߬ߡߊߘߌ߫ ߞߊ߬ߡߙߊ߬ ߞߊ߬ ߘߏ߫ ߝߐ߫ ߛߌߟߓߊ-ߥߎߟߋ߲ ߘߊߝߍ߫ ߛߌ߯ ߟߊ ߟߎ߬ ߛߌ߰ߝߊߘߌ ߞߊ߲߬ << ߞߎ߲߭ ߦߋ߫ ߝߏߟߏ߲ߞߏߒߕߊ߲ߧߊ ߟߋ߬ ߘߌ߫߸ ߝߏߟߏ߲ ߘߏ߲߬ ߝߣߊ߫ ߕߴߛߋ߫ ߕߋ߬ ߟߊ߫ ߝߏ߫ ߞߊ߬ ߛߌߟߊ ߟߋ߬ ߘߐߓߍ߲߬߸ ߓߊߏ߬߸ ߤߊߟߵߌ ߓߊ߯ ߛߌߟߊ ߘߐߓߍ߲߬߸ ߣߌ߫ ߥߊ߫ ߘߌߦߊ߫ ߕߍ߫ ߖߌ ߓߟߏ߫߸ ߊ߬ ߣߊ߬ߕߐ߫ ߝߎ߯ߘߌ ߟߋ߬ ߕߎ߲߬ߕߎ߲߬ ߠߊ߫ ߝߣߊ߫.>>

ߊ߬ߟߎ߬ ߟߊ߫ ߘߊ߲߬ߕߍ߰ߟߌ ߟߎ߬ ߓߍ߯ ߞߐߝߍ߬߸ ߡߐ߱ ߢߌ߲߬ ߠߎ߬ ߦߋ߫ ߘߍ߬ߡߍ߲ ߠߋ߬ ߢߌߣߌ߲߫ ߠߊ߫ ߝߊ߰ߡߊ ߟߎ߬ ߝߍ߬ ߓߎ߬ߕߎ߲߫߸ ߞߵߊ߬ߟߎ߬ ߟߊ߫ ߛߌߟߊ ߟߎ߬ ߘߐߓߍ߲߬ ߊ߬ߟߎ߬ ߦߋ߫߸ ߞߊ߬ ߝߏߟߏ߲ ߠߎ߬ ߘߐߓߐ߫߸ ߞߊ߬ ߖߌ߫ ߛߌߟߊ ߘߌ߫ ߊ߬ߟߎ߫ ߡߊ߬߸ ߖߐ߲߰ߛߊ߫ ߊ߬ߟߎ߬ ߟߊ߫ ߖߌ߰ߣߌ߬ߞߊ߬ߦߟߍ ߘߌ߫ ߣߐ߰ߦߊ߫ ߊ߬ߟߎ߬ ߓߟߏ߫ ߛߊ߬ߡߊ ߣߌ߲߬ ߘߐ߫.