ߛߣߍ߬ߜ߭ߊ߬ߟߌ߬ ߞߊ߲ߕߌ߮ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߓߘߴߊ߬ ߟߊߊ߫ ߞߙߎߞߊ߫ ߞߎߘߊ ߕߐ߮ ߟߊߥߊ߲߬ߞߊ߲߫ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬߸ ߞߵߊ߬ ߕߐ߯ߟߊ߫ ߞߏ߫ ߞߌ߯ߙߊ߯ߦ ߝߊ߬ߛߏ߬ ߞߊ߬ߣߌ߲߬ߠߊ߫ ߞߊ߲ߓߍ߲ߠߞߊ ߟߎ߬߸ ߏ߬ ߞߍ߫ ߘߊ߫ ߖߌ߰ߦߊ߬ߓߏ߲ ߘߏ߫ ߟߋ߬ ߟߊ߫ ߖߡߊ߬ߣߊ ߞߎߓߋߘߊ ߟߊ߫.

ߞߌ߯ߙߊ߯ߦ ߣߌ߲߬ ߦߋ߫ ߓߌߘߌ߲ߞߊ߲ ߠߋ߬ ߘߌ߫ ߥߟߐߝߐ߫ ߞߊ߲ ߘߐ߫߸ ߏ߬ ߕߐ߰ߡߊ߬ߛߙߋ ߞߍߣߍ߲߫ ߥߊ߯ߘߍ ߟߋ߬ ߘߴߊ߬ߟߎ߬ ߓߟߏ߫߸ ߡߍ߲ ߡߌ߬ߣߊ߬ߣߍ߲߫ ߓߟߏ ߘߐ߫ ߛߣߍ߬ߜ߭ߊߟߌ߫ ߔߊ߬ߔߘߊ ߞߎ߲߬ߘߐ߫߸ ߞߵߊ߬ ߟߊߡߌߣߌ߲߫ ߛߎߡߊߙߋߦߙߌ߫ ߜߊ߲ߞߊ߫ ߘߟߊߞߊ߬ߣߍ߲ ߠߊ߫.

ߖߏ߬ߡߊߦߌ߬ ߞߊ߬ ߡߎ߲߬ ߝߐ߫ ߊ߬ ߟߊ߫ ߞߙߎߞߊ ߣߌ߲߬ ߕߐ߯ ߟߊߥߛߊ ߝߍ߬؟ ߊ߬ ߞߊ߲߫ ߞߏ߫: <<ߢߣߊߡߦߊ ߢߌ߲߬ ߘߐ߫߸ ߟߊ߲߬ߠߌ߲ ߥߊ߯ߕߌ ߦߴߊ߬ ߘߐ߫ ߟߋ߬߸ ߞߊ߬ߟߌ ߥߊ߯ߕߌ ߝߣߊ߫ ߦߴߊ߬ ߘߐ߫߸ ߖߌ߰ߟߊ߬ߝߐߦߊ ߕߎ߬ߡߊ ߦߋ߫ ߣߊ߬ ߟߊ߫ (...) ߒ߬ߓߊ߬߸ ߒ ߝߟߍ߫ ߛߍ߬ߣߍ ߘߐ߫ ߣߌ߲߬ ߥߍ߫. ߓߊߘߋ߲ ߝߊ߬ߛߏ߬ ߞߊ߬ߣߌ߲߬ߠߊ ߟߎ߬߸ ߓߌ߬ ߢߐ߲߰ ߟߏ߲߫ ߠߋ߬߸ ߊ߲ ߧߋ߫ ߛߣߍ߬ߜ߭ߊߟߌ߫ ߘߎ߰ߞߟߏ ߘߐߞߍ߫ ߟߊ߫ ߛߌ߫ ߞߎߘߊ߫ ߟߊ߫، ߛߊ߬ߙߌ߬ߦߊ ߟߎ߫ ߟߋ߬ ߦߴߊ߬ ߞߣߐ߫߸ ߊߟߎ߫ ߖߍ߬ߘߍ ߛߐ߲߬ߣߍ߲߬ ߡߍ߲ ߠߎ߬ ߡߊ߬.>> ߖߏ߬ߡߊߦߌ߬ ߝߊߦߌ߬ ߞߵߏ߬ ߟߋ ߝߐ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߙߎߞߊ ߢߌ߲߬ ߞߎ߲߬ߞߊ߲ ߠߋ߬: ߝߊ߬ߛߏ ߟߋ߬ ߢߍߝߍ߬ ߘߌ߫.

ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߟߊ߫ ߝߐߟߌ߫ ߘߐ߫߸ ߊ߬ ߟߊ߫ ߞߙߎߞߊ ߢߌ߲߬ ߘߊ ߟߊߞߊ߬ߣߍ߲߬ ߓߍ߯ ߟߋ߬ ߦߋ߫߸ ߞߊ߬ߦߌ߯ ߊ߬ ߟߊߛߌ߰ ߟߏ߲߸ ߊ߬ ߞߊ߬ ߞߊ߲ ߡߍ߲ ߝߐ߫߸ ߞߏ߫ ߊ߬ ߦߴߏ߬ ߞߋߟߋ߲ ߠߋ߬ ߞߊ߲߬ ߡߎߣߎ߲߬߸ ߊ߬ ߟߊ߫ ߘߊ ߟߊߞߊ߬ߣߍ߲߫ ߛߣߍ߬ߜ߭ߊ߬ߟߌ߬ߞߊ ߓߍ߯ ߟߋ߬ ߦߋ߫߸ ߖߡߊ߬ߣߊ ߞߣߐ߫߸ ߊ߬ ߣߌ߫ ߡߍ߲ ߠߎ߬ ߦߋ߫ ߕߎ߲ߞߊ߲ ߠߊ߫.

ߊߡߌߣߊߕߊ߬ ߕߎ߬ߙߋ ߟߋ߬ ߟߊߛߌ߰ߣߍ߲߫ ߞߙߎߞߊ ߣߌ߲߬ ߛߌ߲ߘߟߌ ߡߙߌߘߐߕߊ ߥߛߊ߬ߓߊ߰ߦߊ ߞߎ߲߬ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߙߎߞߊ ߣߌ߫ ߕߏ߰ߝߏ ߡߍ߲ ߠߎ߬ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬ ߞߵߊ߬ߟߎ߫ ߛߋ߲߭ ߘߏ߲߬ ߥߏ߬ ߞߋߟߋ߲߫ ߠߊ߫ ߞߊ߬ ߞߙߎߞߊ ߢߌ߲߬ ߠߊߘߊ߲߫߸ ߏ߬ ߦߙߌߞߊ ߥߊߣߍ߲߫ ߠߋ߬ ߝߏ߯ ߄߃߇ ߖߊ߬ߕߋ߬.

ߡߊߞߌ߫ ߛߊߟ ߟߊ߫ ߞߙߎߞߊ ߛߌ߲߬ߝߏ߲ ߘߏ߫ ߘߏ߫ ߟߎ߫ ߞߵߊ߬ ߟߴߊ߬ ߞߊ߲߬ ߠߋ߬߸ ߊ߬ ߣߌ߫ ߔߊߛߑߕߍߝ ߞߙߎߞߊ߫ ߛߌ߲ߝߏ߲ ߘߏ߫ ߟߎ߫߸ ߏ߬ ߟߎ߫ ߘߏ߲߬ ߘߴߊ߬ ߟߊ߫ ߞߙߎߞߊ߫ ߞߎߘߊ ߢߌ߲߬ ߘߐ߫.

ߤߊ߲߯ ߒ߬ ߧߋ߫ ߣߌ߲߬ ߛߓߍ ߞߊ߲߬ ߦߙߐ ߡߍ߲ ߘߐ߫ ߣߌ߲߬߸ ߖߏ߬ߡߊߦߌ߬ ߝߊߦߌ߬ ߡߊ߫ ߓߙߐߕߐ߫ ߔߊߛߑߕߍߝ ߘߐ߫ ߡߎߣߎ߲߬߸ ߊ߬ ߘߏ߲߬ ߡߊ߫ ߜߍ߲߫، ߊ߬ ߞߵߊ߬ ߞߊ߲ߠߊߘߌ߫ ߟߋ߬ ߔߊߛߑߕߍߝ ߞߙߎߞߊ ߡߊ߬ߞߟߐ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߘߏ߲߬ ߊ߬ ߟߊ߫ ߞߙߎߞߊ ߢߌ߲߬ ߘߐ߫߸ ߏ߬ ߟߋ ߦߋ߫ <<ߝߊ߬ߛߏ߬ ߞߊ߬ߣߌ߲߬ ߞߙߎߞߊ ߖߍ߬ߘߍߖߍ߬ߘߍ>> ߘߌ߫.

ߊ߬ ߞߊ߬ ߎߛߑߡߊߣߌ߲߫ ߛߐ߲ߞߏ߫ ߜߐ߲߬ߞߌ߲߫ ߦߙߐ ߘߏ߫ ߟߎ߫ ߘߐ߫߸ ߝߏ߫ ߞߵߊ߬ ߝߐ߫ ߊ߬ ߡߊ߬ ߞߏ߫ ߛߐ߲ߞߏ߫ ߦߋ߫ <<ߓߟߊ߬ߥߎ߬ߕߐ>> ߟߋ߬ ߘߌ߫߸ ߡߍ߲ ߣߊ߬ߕߊ ߕߍߣߊ߬ ߡߝߊ߫ ߟߊ߫ ߝߋߎ߫.

ߡߐ߰ ߝߌ߬ߟߊ ߢߌ߲߬ ߠߎ߫ ߘߏ߲߬ ߜߎ ߦߋ߫ ߕߋߙߌߢߐ߲߯ߡߊ ߟߎ߫ ߟߋ߬ ߘߌ߫ ߓߘߍ߬ߓߘߍ߬ߟߌ ߘߐ߫ ߞߘߐ߬ߡߊ߲߬߸ ߊ߬ߟߎ߫ ߞߊ߬ ߥߛߎ ߞߍ߫، ߊ߬ߟߎ߬ ߟߊ߫ ߡߊ߬ߝߐ߬ߦߌ߲߬ߝߐ߬ߦߌ߲߬ߠߌ߲ ߏ߬ ߟߋ ߖߍ߬ߘߍ ߞߊ߬ ߛߣߍ߬ߜ߭ߊߟߌ߫ ߟߊߡߊ߰ ߂߀߂߁ ߠߊ߫߸ ߞߵߊ߬ ߛߌ߰ ߂߀߂߄ ߠߊ߫، ߊ߬ ߝߐ ߡߍ߲ ߞߍ߫ ߘߊ߫ ߛߣߍ߬ߜ߭ߊߟߌ߫ ߛߊ߬ߙߌ߬ߦߊ߬ ߓߟߏ߫ ߞߏ߫ ߛߐ߲ߞߏ߫ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߣߊ߬ߟߌ߬ߟߊ߫ ߘߌ߫߸ ߏ߬ ߞߵߊ߬ ߓߟߏ ߟߐ߬ ߖߏ߬ߡߊߦߌ߬ ߟߋ߬ ߟߊ߫߸ ߞߵߏ߬ ߞߍ߫ ߊ߬ߟߎ߬ ߟߊ߫ ߡߊ߬ߡߌ߬ߣߊ߬ߟߌ߬ߟߊ ߘߌ߫، ߖߏ߬ߡߊߦߌ߬ ߣߊ߬ ߘߊ߫ ߛߎߘߊ߲߫ ߢߣߊߕߊߟߌ ߘߐ߫ ߂߀߂߆ ߞߏ߲ߞߏߘߓߌ ߟߊ߫ ߞߊ߲ߢߊ߫ %߅߄ ߖߊ߬ߕߋ߬ ߟߊ߫.

ߝߊߦߌ߬ ߞߊ߬ ߛߐ߲ߞߏ߫ ߟߋ߬ ߞߙߍߞߙߍ߫ ߞߵߊ߬ ߞߍ߫ ߊ߬ ߟߊ߫ ߞߏߕߌ߯ ߝߟߐ ߘߌ߫߸ ߊ߬ߟߎ߬ ߝߘߊ߫ ߘߊ߫ ߂߀߂߆ ߘߓߊ߬ߕߊ߫ ߕߊ߬ߡߌ߲߬ߣߍ߲ ߢߌ߲߬ ߠߋ߬ ߟߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߝߐ ߘߌ߫ ߢߐ߲߮ ߞߐ߫ ߡߙߌߦߊ ߘߏ߫ ߟߎ߫ ߘߐ߫ ߖߡߊ߬ߣߊ ߟߊߕߊ߯ߡߊ߫ ߢߊ ߘߐ߫.

ߌߞߘߐ߫߸ ߛߐ߲ߞߏ߫ ߞߵߏ߬ ߕߣߐ߬ߓߐ߫ ߞߵߊ߬ ߞߐߛߊ߬ߦߌ߲߫ ߝߊ߬ߛߏ߬ ߜߙߊ ߟߊ߫߸ ߞߣߊ߬ߕߏ߫ ߞߍ߫ ߟߊ߫ ߝߊ߬ߛߏ߬ ߜߙߊ ߞߊ߲ߕߌ߮ ߘߌ߫ ߏ߬ ߞߐߝߍ߬ ߕߟߋ߬ ߘߊ߲ߘߐ߫ ߟߊ߫.

ߒ ߞߏ߬ߣߌ߲ ߟߊߣߴߊ߬ ߟߊ߫߸ ߞߘߐߓߐߟߌߓߊ߫ ߥߟߌ߬ߕߐ߫ ߛߣߍ߬ߜ߭ߊߟߌ߫ ߞߣߐ߫߸ ߕߎ߬ߡߊ ߡߍ߲ ߠߊ߫ ߣߌ߫ ߝߊ߬ߛߏ߬ ߜߙߊ ߥߦߊ߬ ߘߊ߫ ߞߏߟߌ߲ߞߏߟߌ߲߫ ߣߊ߬ߕߐ ߟߊ߫߸ ߊ߬ ߣߌ߫ ߣߌ߫ ߘߌ߲߬ߞߌߙߊ ߟߎ߬ ߢߣߊߕߊߟߌ ߞߍ߫ ߘߊ߫ ߂߀߂߇ ߟߊ߫߸ ߊ߬ߟߎ߬ ߘߌߣߵߊ߬ߟߎ߬ ߛߎ߮ ߦߌ߬ߘߊ߫ ߖߡߊ߬ ߞߏ ߘߐ߫ ߏ߬ ߕߎ߬ߡߊ ߟߊ߫ ߏ߬ ߘߐ߫ ߝߛߊߦߌ߫، ߏ߬ ߓߍ߯ ߘߏ߲߬ ߞߍߕߐ߫ ߟߋ߬ ߦߊ߬ߣߌ߫ ߞߊ߲ߕߌ߯ ߢߣߊߕߊߟߌ ߝߣߊ߫ ߦߋ߫ ߞߍ߫ ߂߀߂߉ ߟߊ߫.