ߞߍ߲ߘߍߟߏ߲ ߂߀߂߆ ߥߊ߬ߛߌߥߊ߬ߙߊ ߕߟߋ߬ ߁߄ ߣߌ߲߬ ߡߊ߬ ߞߐߣߊߞߙߌ߫ ߸ߒߞߏ ߓߟߏߘߐߢߌ߲ ߘߏ߫ ߟߋ߬ ߣߐ߬ ߘߎ߰ߕߍ߬ߟߍ߲߬ ߄ ߢߌ߲߬ ߠߊ߫ ߒߞߏ ߟߊ߫ ߓߊ߲߬ߜ߭ߎ߬ߦߊ߫ ߞߌ߲߬ߘߊ ߟߊ߫. 

ߏ߬ ߡߍ߲ ߟߊ߬ߘߍ ߞߍߣߍ߲߫ ߞߏ߲߬ߓߏ߫ ߓߊ߬ߓߊ߫ ߡߊ߬ߡߊ߬ߘߌ߫ ߖߊ߰ߣߍ߫ ߖߍ߬ߘߍ ߟߊ߫ ߟߎ ߞߣߐ߫ ߞߊ߬ߣߌ߲߬ ߸ ߏ߬ ߟߋ߬ ߞߊ߬ ߞߟߌߟߌ ߟߐ߬ ߞߐߣߊߞߙߌ߫ ߒߞߏ ߘߌ߲߬ߞߏ ߟߎ߬ ߡߊ߬ ߛߊ߫ ߞߊ߬ ߘߊ߲߬ߕߍ߰ߟߌ ߞߍ߫ ߖߊ߬ߡߊ ߦߋ߫. 

ߟߊ߬ߘߍ߮ ߣߌ߲߬ ߛߋ߲߬ߝߍ߬ ߊ߲ ߛߋ߫ ߘߊ߫ ߞߊ߬ ߘߏ߫ ߟߎ߫ ߞߎߡߊߢߐ߲߯ߦߊ߫. 

ߊ߲ߛߎ߬ߡߊߣ ߞߡߊ߬ߙߊ ߦߴߏ߬ ߡߐ߱ ߘߏ߫ ߟߎ߫ ߟߋ߬ ߘߌ߫ ߸ ߒߞߏ߫ ߓߊߛߌߦߟߊ ߣߌ߫ ߒߞߏ߫ ߞߙߊߡߐ߮ ߟߋ߬ ߦߴߊ߬ ߘߌ߫߸ ߏ߬ ߛߋ߫ ߘߊ߫ ߞߊ߬ ߘߏ߫ ߢߊߝߐ߫ ߘߎ߱ ߘߎ߰ߕߍ߬ߟߍ߲߬ ߄ ߢߌ߲߬ ߘߌߢߊ ߡߊ߬ ߒߞߏ ߡߊ߬߸ ߏ߬ ߡߍ߲ ߠߊ߫ ߛߙߊ߬ߣߎ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߘߎ߱ ߣߌ߲߬ ߛߊ߲߭ ߊ߬ ߕߌ߱ ߓߟߏ߫ ߞߊ߬ ߛߋ߫ ߘߎ߱ ߟߊߕߊ߬ߡߌ߲߫ ߡߊ߬ ߒߞߏ߫ ߡߐ߮ ߟߎ߬ ߡߊ߬ ߸ߞߴߏ߬ ߓߘߊ߫ ߛߊ߲߬ ߘߊ߲ߘߐ߫ ߓߐ߫߸ ߦߏ߫ ߊ߲ߛߎ߬ߡߊߣ ߞߡߊ߬ߙߊ ߦߴߏ߬ ߟߊߛߙߋߦߊ߫ ߟߊ߫ ߒ߬ ߧߋ߫ ߢߊ ߡߍ߲ ߡߊ߬ ߣߌ߲߬. 

<< ߒߠߋ ߖߍ߬ߘߍ ߟߋ߬ ߞߊ߬ ߞߣߍ ߛߊ߲߬ ߸ߒ ߞߘߐ߬ߞߍ ߟߋ߬ ߞߊ߬ ߒ ߟߐ߰ ߏ߬ ߟߊ߫ ߸ߊ߬ߟߋ ߡߍ߲ ߕߐ߯ ߞߏ߫ ߡߊ߬ߡߊ߬ߘߌ߫ ߘߎ߲ߓߎߦߊ߫ ، ߞߊ߬ ߓߐ߫ ߞߎߣߊߘߎ߯ ߖߌ߲ߓߦߊ߫ ߡߙߊ߬ߘߊ߬ߙߋ߲ ߞߣߐ߫ ߸ߦߙߐ ߛߊ߲߭ ߓߘߊ߫ ߡߍ߲߫ ߞߐ߬ߣߌ߲߬ ߕߙߏ߬ߞߏ ߦߴߊ߬ ߓߊ߯ߙߊ ߞߍ߫ ߛߍߣߍ߲߬ ߸ ߏ߬ ߞߍ߫ ߘߊ߫ ߂߀߁߁ ߠߋ߬ >>

ߘߎ߰ߕߍ߬ߟߍ߲߬ ߄ ߢߌ߲߬ ߠߎ߬ ߡߙߌߦߊ ߕߊ߬ ߘߴߊ߬ ߞߘߐ߬ߞߍ߬ ߓߟߏ߫ ߞߣߍ ߓߊ߯ߙߊ߫ ߕߎߡߊ߫ ߢߊ߫ ߡߍ߲ ߡߊ߬ ߸ ߊ߬ ߛߋ߫ ߘߊ߫ ߞߵߏ߬ ߦߌ߬ߘߊ߬ :

<< ߛߊߣߌ߲߬ ߒ ߧߋ߫ ߞߣߍ ߓߊ߯ߙߊ ߘߊߡߌ߬ߣߊ߬ ߸ߊ߬ ߞߵߊ߬ ߦߌ߬ߘߊ߬ ߒ ߠߊ߫ ߞߏ߫ ߡߙߌߦߊ ߘߏ߫ ߦߴߊ߬ ߟߊ߫ ߞߏ߫ ߣߴߏ߬ ߘߌ߫ ߓߍ߲߬ ߒ ߡߊ߬ ߸ ߞߏ߫ ߊ߬ ߦߴߊ߬ ߝߍ߬ ߞߊ߬ ߘߎ߱ ߘߏ߫ ߓߌ߬ߟߊ߬ ߒߞߏ ߕߐ߯ ߘߐ߫ ߸ ߏ߬ ߟߋ߬ ߞߐߝߍ߬ ߛߊ߫߸ ߂߀߁߅ ߘߎ߱ ߛߓߍߞߏ ߟߎ߬ ߓߍ߯ ߟߊߘߍ߬ߣߍ߲ ߘߝߊ߫ ߘߊ߫ ߸ߘߎ߱ ߕߊ߬ ߘߊ߫ ߕߎ߬ߡߊ ߏ߬ ߟߋ߬ ߟߊ߫ ߛߊ߫ ߞߵߊ߬ ߓߌ߬ߟߊ߬ ߒߞߏ ߕߐ߯ ߘߐ߫ ߸ ߏ߬ ߞߍ߫ ߘߊ߫ ߕߐ߲߫ ߖߊ߯ߓߡߊ ߟߋ߬ ߛߌߟߊ ߝߍ߬ >>. 

 ߘߎ߱ ߛߓߍ ߟߎ߬ ߟߊߕߊ߬ߡߌ߲߬ ߞߐߝߍ߬ ߕߐ߲߫ ߖߊ߯ߓߡߊ ߡߊ߬߸ ߊ߬ ߣߊ߬ ߘߊ߫ ߝߊ߰ߡߎ߲߬ ߞߏ߫ ߘߍ߬ߞߙߎ ߏ߬ ߞߋߟߋ߲߫ ߕߍ߫ ߒߞߏ ߘߐ߫ ߸ ߏ߬ ߟߋ߬ ߞߐߝߟߌ ߞߍߣߍ߲߫ ߟߊ߬ߘߍ߮ ߣߌ߲߬ ߛߌ߲߬ߝߏ߲߬ߧߊ߫ ߘߌ߫ ߕߐ߲߫ ߖߊ߯ߓߡߊ ߓߟߏ߫ :

 

<<ߌߞߏߡߌ߲߬ ߒߞߏ߫ ߘߍߞߙߎ߫ ߟߎ߬ ߞߊ߫ ߛߌߦߊ߫ ߛߊ߫ ߸ ߏ߬ ߓߟߏߡߵ ߊ߬ ߞߊߣߊ߬ ߕߏ߫ ߕߐ߲߫ ߖߊ߯ߓߡߊ ߞߋߟߋ߲߫ ߓߟߏ߫ ߸ߏ߬ ߘߐ߫ ߝߏ߫ ߞߵߊ߬ ߓߌ߬ߟߊ߬ ߒߞߏ߫ ߘߍߞߙߎ ߓߍ߯ ߟߋ߬ ߕߐ߯ ߘߐ߫ ߸ ߏ߬ ߟߋ߬ ߞߏߛߐ߲߬ ߕߐ߲߫ ߖߊ߯ߓߡߊ ߞߊ߬ ߞߟߌߟߌ ߟߐ߬ ߘߍ߬ߞߙߎ ߕߐ߭ ߟߎ߬ ߡߊ߬ ߞߊ߬ ߘߊ߲߬ߕߍ߰ߟߌ ߞߍ߫ ߖߊ߬ߡߊ ߦߋ߫ >>. 

ߞߏߢߊ ߣߌ߲߬ ߞߟߊ߬ߡߊ߬ߓߊ߮ ߡߍ߲ ߕߐ߮ ߦߋ߫ ߜߎ߬ߕߙߎ ߘߐ߫ ߸ ߏ߬ ߘߏ߫ ߟߊ߫ ߝߐߟߌ߫ ߘߐ߫ :

ߞߵߏ߬ ߘߎ߱ ߢߌ߲߬ ߘߌ߫ ߒߞߏ ߡߊ߬ ߸ ߏ߬ ߘߌ߫ ߛߊ߲߬ ߅ ߤߊ߲߯ ߇ ߢߐ߲߰ ߓߐ߫ :

<< ߘߎ߱ ߣߌ߲߬ ߠߊߕߊ߬ߡߌ߲ ߒߞߏ ߡߊ߬ ߸ ߏ߬ ߘߌ߫ ߛߊ߲߬ ߅ ߤߊ߲߯ ߇ ߢߐ߲߰ ߓߐ߫ ߸ߓߊ߬ߙߌ߬ ߌߞߏߡߌ߲߬ ߘߎ߱ ߘߌߓߊ߮ ߦߋ߫ ߊߡߙߌߞߌ߬ ߛߌ߰ߓߊ߮ ߟߋ߬ ߘߌ߫ ߸ ߏ߬ ߣߊ߬ ߘߴߊ߬ ߝߐ߫ ߞߏ߫ ߘߎ߱ ߓߘߊ߫ ߘߌ߫ ߒߞߏ ߡߊ߬،ߒ߬ߞߊ߬߸ ߊ߬ߟߎ߬ ߡߊ߫ ߢߊ߫ ߛߌ߫ ߛߐ߬ߘߐ߲߬ ߊ߬ ߞߏߢߊ ߡߊ߬ ߸ ߏ߬ ߟߋ߬ ߞߵߏ߬ ߟߎ߫ ߟߋ߬ ߜߋ߬ߟߎ߲߬ߠߌ߲ ߠߎ߬ ߞߍ߫ ߟߊ߫ ߛߍߣߍ߲߬ ߞߊ߬ ߞߐߣߊߞߙߌ߫ ߒߞߏ߫ ߡߐ߮ ߘߏ߫ ߟߎ߫ ߥߟߋ߫ ߸ ߓߊ߬ߙߌ߬، ߏ߬ ߟߎ߬ ߛߘߍߡߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߐ߲ߞߏ߫ ߛߌ߫ ߕߍ߫ ߘߎ߰ߞߏ ߘߐ߫ ߸ ߏ߬ ߟߋ߬ ߓߍ߯ ߟߊߘߍ߬ߣߍ߲ ߞߐߝߍ߬ ߛߊ߫ ߸ߊ߬ ߢߌߣߌ߲߫ ߠߊ߫ ߞߏ߫ ߞߊ߬ ߘߊ߲߬ߕߍ߰ߟߌ ߞߍ߫ ߞߙߎ ߕߐ߬ߡߊ ߟߎ߬ ߓߍ߯ ߟߊߘߍ߬ߣߍ߲ ߢߍ߫ >>

ߊ߬ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߸ߊ߬ ߞߵߊ߬ ߦߌ߬ߘߊ߬ ߞߏ߫ ߘߎ߰ ߛߘߍߡߊ߲߫ ߠߋ߬ ߓߘߊ߫ ߘߌ߫ ߒߞߏ ߡߊ߬ ߞߘߐ߬ߡߊ߲߫،ߒ߬ߞߊ߬ ߸ ߞߏ ߕߍ߫ ߓߐ߫ ߟߴߊ߬ ߘߐ߫ :

<< ߘߎ߰ ߛߘߍߡߊ߲߫ ߦߋ߫ ߘߌ߫ ߟߊ߫ ߒߞߏ ߡߊ߬، ߓߊ߬ߙߌ߬ ߸ߢߊ߫ ߛߌ߫ ߕߍ߫ ߛߐ߬ߘߐ߲߬ ߠߴߊ߬ ߡߊ߬ ߸ߏ߬ ߕߎ߬ߙߎ ߦߋ߫ ߓߍ߲߭ ߛߘߍ߫ ߟߋ߬ ߘߌ߫߸ ߝߏ߫ ߓߣߐ߬ ߓߘߊ߫ ߞߍ߫ ߘߎ߱ ߘߏ߫ ߟߎ߫ ߘߐ߫ ߸ߣߴߏ߬ ߕߍ߫ ߒߞߏ ߕߊ߫ ߛߎ߯ ߢߌ߲߬ ߢߐ߲߱ ߘߏ߫ ߕߎ߲߬ ߓߘߊ߫ ߞߍ߫ ߞߘߐ߬ߡߊ߲߫. 

ߢߐ߲߰ߞߌ߲߬ߘߊ ߞߊ߬ ߘߎ߰ ߛߘߍߡߊ߲߫ ߛߐ߬ߘߐ߲߬ ߢߊ ߛߎ߯ ߢߌ߲߬ ߠߋ߬ ߡߊ߬ ߸ ߏ߬ ߞߵߊ߬ ߕߘߍ߬ ߘߎ߰ߞߏ ߕߘߍ߬ ߕߍ߫ ߓߊ ߘߐ߫ ߡߐ߱ ߟߎ߬ ߓߟߏ߫ ߸ ߤߊ߲߯ ߞߣߊ߬ ߛߏ ߖߍ߬ߘߍ ߛߋ߫ ߢߐ߲߰ߞߌ߲߬ߘߊ ߡߊ߬ ߸ߓߊ߬ߙߌ߬ ߸ ߏ߬ ߟߎ߬ ߛߋ߫ ߘߊ߫ ߞߵߏ߬ ߡߊߡߙߊ߬ ߝߏ߫ ߞߵߊ߬ ߞߍ߫ ߛߊ߫ ߸ߘߎ߰ߞߟߏ ߦߴߊ߬ߟߎ߬ ߓߟߏ߫ ߘߌ߲߬ߞߌ߬ߙߊ߬ ߛߘߍߡߊ߲߫ ߘߐ߫ ߸ߒ߬ߓߊ߬ ،ߒߞߏ߫ ߡߐ߮ ߟߎ߬ ߝߣߊ߫ ߞߊ߫ ߞߊ߲߫ ߞߵߏ߬ ߛߎ߮ ߟߋ߬ ߞߍ߫ ߸ ߘߎ߱ ߓߊ߯ ߘߌ߫ ߡߍ߲ ߠߎ߬ ߡߊ߬ ߸ ߒߞߏߞߏ ߘߐ߫ ߏ߬ ߟߎ߬ ߞߊߣߵߊ߬ ߞߍ߫ ߊ߬ߟߎ߫ ߘߎ߲߬ߘߎ߬ߡߊ߬ ߘߌ߫ ߘߋ߬ ߸ߊ߬ߟߎ߬ ߦߴߊ߬ ߓߌ߬ߟߊ߬ ߖߊ߬ߡߊ ߛߊ߬ߥߏ ߘߐ߫ >>. 

ߊ߬ ߕߌ߱ ߟߊ߫ ߞߎߡߊ ߞߎ߲߬ߘߏ߲ ߘߐ߫ ߛߊ߫ ߸ߊ߬ ߞߵߊ߬ ߦߌ߬ߘߊ߬ ߞߏ߫ ߒߞߏ ߘߌ߫ ߛߋ߫ ߞߊ߬ ߘߎ߱ ߛߐ߬ߘߐ߲߬ ߖߌ߬ߣߍ߫ ߝߊ߲߭ ߓߍ߯ ߟߊߘߍ߬ߣߍ߲ ߘߐ߫ ߞߵߊ߬ ߕߘߍ߬ ߊ߬ ߡߊ߫ ߥߊߘߌ߫ ߓߐ߫. 

<< ߣߴߊ߲ ߞߊ߬ ߞߙߎ ߘߏ߫ ߟߊߛߌ߰ ߸ߏ߬ ߦߴߌ ߘߐ߱ߘߏ߲߬ ߘߎ߰ߞߏ ߏ߬ ߟߎ߬ ߟߊ߫ ߸ߞߊ߬ ߓߊ߲߫ ߞߊ߬ ߛߋ߫ ߛߏ߫ ߞߎߓߊ ߟߎ߬ ߣߌ߫ ߛߏ߫ ߡߌߛߍ߲ ߠߎ߬ ߟߊ߫ ߘߎ߰ߞߏ ߘߐ߫ ߞߊ߬ ߥߙߏ߬ ߕߊ߲߫ ߕߊ߬ ߞߵߊ߬ߟߎ߬ ߡߊߜߍ߲߫ ߤߊߟߌ߬ ߣߴߊ߬ ߡߊ߫ ߞߍ߫ ߛߏ ߞߣߐߟߊ ߘߌ߫ ߊ߬ ߞߊ߫ ߢߌ߲߬ ߸ߊ߬ ߓߊ߯ ߡߍ߲ ߢߊ߫ ߛߌ߫ ߞߊ߲߬ ߣߌ߫ ߘߎ߱ ߦߋ߫ ߒߞߏ ߓߟߏ߫ ߸ ߏ߬ ߘߌ߫ ߞߍ߫ ߒߞߏ߫ ߓߐ߲ߛߐ߲ߘߊ߫ ߞߎߘߊ ߥߟߌ߬ߕߐ߬ߟߊ ߟߎ߬ ߣߌ߭ ߘߌ߫ >>