ߊ߲ ߣߊ߬ߕߐ߫ ߞߎߡߊ߫ ߘߡߊߘߐ߫ ߟߋ ߘߊ߲߬ߕߍ߰ ߟߴߊߟߎ߫ ߢߍ߫ ߟߍߙߊ ߢߌ߲߬ ߞߣߐ߫ ߸ ߡߍ߲ ߘߴߊ߬ ߦߌ߬ߘߵߌ ߟߊ߫ ߞߏ ߡߐ߱ ߡߍ߲ ߠߎ߬ ߦߴߊߙߊߓߎ߫ ߞߊ߲ ߛߋߞߏ ߓߏ߲߬ߧߊ߬ ߟߊ߫ ߞߊ߲߫ ߜߘߍ ߟߎ߬ ߕߊ ߘߌ߫ ߥߟߊ߫ ߞߵߊ߬ ߟߊߝߌ߬ߛߊ߬ߦߊ߫ ߏ߬ ߟߎ߬ ߘߌ߫ ߸ ߞߴߏ߬ ߕߌ߰ߟߊ߬ߡߐ߯ ߝߊ߲߬ߓߊ ߕߍ߫ ߞߊ߲߫ ߞߏ ߡߊ߬ߘߎ߮ ߞߊ߬ߟߊߡߊ߬، ߓߊߏ߬ ߒ ߞߊ߬ߙߊ߲߬ߣߍ߲߫ ߊ߬ ߣߌ߫ ߒ ߧߋ߫ ߞߊ߲߫ ߞߏ ߟߐ߲ߠߌ߲ߦߊ ߞߊ߬ߟߊߡߊ߬ ߸ ߞߋߟߋ߲߫ ߕߍ߫، ߒ ߘߊ ߘߌߡߊ߲߫ ߊ߬ ߣߌ߫ ߒ ߧߋ߫ ߛߓߍߟߌ ߞߊ߬ߟߊߡߊ߬ ߸ ߞߋߟߋ߲߫ ߕߍ߫.

ߏ߬ ߞߐ߫ ߸ ߞߏ߫ ߝߌ߬ߟߊ߬ ߓߘߊ߫ ߟߊ߲ߞߣߍߡߊ߫ ߏ߬ ߕߌ߰ ߟߎ߫ ߟߊ߫، ߊ߬ߟߎ߬ ߦߋ߫ ߊߙߊߓߎ߫ ߞߊ߲ ߡߍ߲ ߞߐߡߊߓߌ߲ߓߌ߲ ߞߊ߲߬ ߊ߬ߟߎ߬ ߡߴߏ߬ ߟߐ߲߫ ߓߘߍߞߍ߫، ߓߊߏ߬ ߊ߬ߟߎ߬ ߓߊ߯ ߊߙߊߓߎ߫ ߞߊ߲ ߟߐ߲߫ ߊ߬ߟߎ߬ ߘߴߊ߬ ߘߛߍ߫ ߞߏ ߟߎ߬ ߦߋ߫ ߞߵߊ߬ ߣߐ߬ ߞߏ ߟߎ߬ ߦߋ߫، ߊ߬ߟߎ߬ ߡߊ߫ ߞߊ߲߫ ߜߘߍ߫ ߟߎ߫ ߛߋߞߏߦߊ ߝߣߊ߫ ߟߐ߲߫. ߣߴߏ߬ ߕߍ߫ ߊ߬ߟߎ߬ ߘߴߊ߬ ߦߋ߫ ߞߏ߫ ߞߊ߲ ߘߏ߫ ߘߝߊߣߍ߲߫ ߦߌߟߊ ߘߏ߫ ߘߐ߫ ߞߊ߲ ߘߏ߫ ߘߌ߫. ߏ߬ ߘߐ߫ ߤߖߌ߫ ߕߊ߯ ߡߏߙߌ߫ ߟߊߡߍ߲߫:

 

߁ߟߐ/ ߊ߬ߟߎ߬ ߞߊ߲߫ ߞߏ߫ ߊߙߊߓߎ߫ ߞߊ߲ ߠߋ߬ ߘߝߊߣߍ߲߫ ߞߊ߲߫ ߕߐ߬ߡߊ ߓߍ߯ ߘߌ߫

ߞߎ߬ߙߊ߬ߣߊ ߝߐߘߊ ߡߍ߲ ߦߋ߫ ߟߐ߬ߖߟߎ߬ߡߊ߬ߣߍ߲ ߠߎ߬ ߝߐߘߊ ߘߌ߫ ߸ ߏ߬ ߟߝߊߙߌ߫ ߁߄߇ߣߊ߲ ߞߏ߫: ﴿ ߊ߲ ߞߵߊ߬ ߞߋߟߦߊ߫ ߡߐ߰ ߥߊ߯ ߗߍ߬ߡߍ߫ ߡߊ߬ ߸ ߥߊߟߴߊ߬ ߦߋ߫ ߛߌߦߊߦߊ߫ ߏ߬ ߘߌ߫﴾ وَأَرْسَلْنَاهُ إِلَىٰ مِائَةِ أَلْفٍ أَوْ يَزِيدُونَ. [الصافات: 147].

ߐ߲߬ߤߐ߲߫ ߡߎ߲߬ߘߐ߫ ߡߐ߰ ߖߊߕߋ ߡߍ߲ ߦߋ߫ ߥߊ߯ ߗߍ߬ߡߍ߫ ߞߊ߲߬ ߏ߬ ߡߊ߫ ߝߐ߫ ߞߵߊ߬ ߔߙߋߔߙߋߟߊߕߍ߰؟

ߟߍߙߊ ߡߍ߲ ߕߐ߯ "ߟߐ߲ߠߌ߲ߦߊ ߟߎ߬ ߞߏߢߌ߲" ߡߊ߬ߝߊ߰ߕߌ߯ߤߎ ߊ߬ߟߑߊ߳ߎ߬ߟߎ߯ߡߌ مفاتيح العلوم"߸ ߊ߬ ߛߓߍߣߴߏ߬ ߞߣߐ߫ ߞߏ߫ ߊߙߊߓߎ߫ ߖߊߕߋ ߘߊ߲߬ ߕߘߍ߬ ߥߊ߯ ߗߍ߬ߡߍ߫ ߟߋ߬ ߘߌ߫ ߝߟߐߝߟߐ߫، ߝߐߢߊ߫ ߜߘߍ߫ ߛߌ߫ ߕߎ߲߬ ߕߍ߫ ߊߙߊߓߎ ߓߟߏ߫ ߞߵߊ߬ ߝߐ߫ ߥߊ߯ ߗߍ߬ߡߍ ߞߐߝߍ߫ ߖߊߕߋߘߋ߲ ߡߊ߬، ( ߞߎ߬ߙߊ߬ߣߊ ߟߊߖߌ߰ ߘߊ߫ ߞߊ߬ ߊߙߊߓߎ߫ ߞߊ߲ ߛߋߞߏ ߘߊ߲߬ ߕߘߍ߬ ߏ߬ ߟߋ ߘߌ߫ ߖߊ߬ߕߋ߬ߟߌ ߘߐ߫) .

ߞߐߝߍ߬ ߊ߬ߟߎ߫ ߣߊ߬ ߘߵߊ߬ ߢߊߦߋ߫ ߞߵߊ߬ ߝߐ߫ ߞߏ߫: ߊߟߑߝߎ =ألف: ߥߊ߯ߞߋߟߋ߲߫.

 ߊߟߑߝߎ ߊߟߑߝߎ ألف ألف:  ߞߋ߲߬ߥߟߎ߬ ߞߋߟߋ߲߫.

ߊߟߑߝߎ ߊߟߑߝߎ ߊߟߑߝߎ ألف ألف ألف: ߓߟߌߦߏ߲߫ ߞߋߟߋ߲ ߍ߲߫ ߓߟߌߦߏ߲߫.

ߊߙߊߓߎ ߟߎ߬ ߟߊ߫ ߖߊ߬ߕߋ ߘߊ߲߬ ߠߋ ߕߘߍ߬ ߥߊ߯ ߁߀߀ ߘߌ߫ ߏ߬ ߟߏ߲ ߞߊ߲ߠߊ߫، ߖߊ߬ߕߋ ߡߍ߲ ߘߌ߫ ߛߌߦߊߦߊ߫ ߏ߬ ߘߌ߫ ߕߐ߯ ߕߎ߲߬ ߕߴߏ߬ ߟߊ߫ ߊߙߊߓߎ ߟߎ߬ ߓߟߏ߫ ߞߎ߬ߙߊ߬ߣߊ ߖߌ߰ ߕߎߡߊ ߸ ߏ߬ ߞߏߛߐ߲߬ ߊ߬ ߝߐ߫ ߘߊ߫ ߞߏ߫ "ߡߐ߰ ߥߊ߯ ߁߀߀ ߸ ߥߊߟߴߊ߬ ߦߋ߫ ߛߌߦߊߦߊ߫ ߏ߬ ߘߌ߫" ߏ߬ ߟߋ ߘߐ߫ ߖߊ߬ߕߋ߬ ߕߍ߫ ߞߎ߬ߙߊ߬ߣߊ ߘߐ߫ ߡߍ߲ ߞߊ߫ ߛߌߦߊ߫ ߥߊ߯ ߁߀߀ ߘߌ߫.

ߞߏ߬ߣߌ߲߬ ߞߐߝߍ߬ ߸ ߊߙߊߓߎ߫ ߞߊ߲ ߦߙߌߥߊ߫ ߘߊ߫ ߝߏ߫ ߞߊ߬ ߣߊ߬ ߖߊ߬ߕߋ ߟߊߛߌߦߊߦߊ߫ ߥߊ߯ ߁߀߀ ߘߌ߫ ߞߊ߬ ߛߋ߫ ߞߋ߲߬ߥߟߎ ߣߌ߫ ߥߟߎߡߊ ߘߐ߫، ߣߴߏ߬ ߕߍ߫ ߡߐ߰ ߖߊߕߋ ߡߍ߲ ߘߍ߲߬ߞߣߍ߬ߦߴߊ߬ ߘߊ߫ ߦߣߎߛߊ߫ ߡߊ߬ ߕߘߋߕߘߋ߫ ߸ ߊߟߊ߫ ߡߊ߫ ߞߢߊ߬ ߏ߬ ߟߐ߲߫ ߠߊ߫ ߢߊ ߡߍ߲ ߊ߬ ߘߌ߫ ߞߢߊ߬ ߊ߬ ߝߐ߫ ߟߊ߫؟ ߍ߲߬ߍ߲.

ߞߏ߬ߣߌ߲߬ ߖߊ߲߬ߖߏ߲ ߝߐ ߌߘߐ߫ ߊߙߊߓߎ߫ ߞߊ߲ ߡߍ߲ ߘߐ߫ ߸ ߏ߬ ߕߎ߲߬ ߡߊ߫ ߘߝߊ߫ ߞߊ߬ ߛߋ߫ ߖߊ߬ߕߋ߬ߘߋ߲߬ ߝߐ ߡߊ߬ ߡߍ߲ ߞߊ߫ ߛߌߦߊ߫ ߥߊ߯ ߁߀߀ ߘߌ߫.

 ߊߟߊ߫ ߝߣߊ߫ ߞߊ߬ ߞߎߡߊ ߝߐ߫ ߞߊ߬ ߓߍ߲߬ ߊߙߊߓߎ߫ ߟߎ߬ ߤߊ߲ߞߟߌ ߓߙߍ߬ߦߊ ߟߋ ߡߊ߬ ߞߏ߬ߣߵߊ߬ߟߎ߬ ߊߟߊ߫ ߟߊ߫ ߟߐ߲ߠߌ߲ ߓߙߍ߬ߦߊ߬ ߕߍ߫.

 

߂ߣߊ߲/ ߞߏ߫ ߊߙߊߓߎ߫ ߞߊ߲ ߛߋߞߏ ߦߊ߯ ߓߏ߲߬ ߞߎߡߊߘߋ߲߫ ߞߋߟߋ߲ ߡߊߦߟߍ߬ߡߊ߲ ߘߐ߫ ߞߊ߲߫ ߕߐ ߟߎ߬ ߘߌ߫، ߦߏ߫ ߕߊ߲߬: { رجُلُ رجُلِ رجُلَ. رجُلٌ رجُلٍ رجُلاً. رجلانٍ رِجالٌ. الرجُلُ الرجُلان  الرجُالُ} . ߞߏ߫: (ߙߊ߬ߖߎ߬ߟߎ ߙߊ߬ߖߎ߬ߟߌ ߙߊ߬ߖߎ߬ߟߊ. ߙߊ߬ߖߎ߬ߟߎ߲߫ ߙߊ߬ߖߎ߬ߟߌ߲߫ ߙߊ߬ߖߎ߬ߟߊ߲߫. ߙߊ߬ߖߎ߬ߟߊ߯ߣߌ߲߫ ߙߌ߬ߖߊ߯ߟߎ߲߫. ߊߙߊ߬ߖߎ߬ߟߎ ߊߙߊ߬ߖߎ߬ߟߊ߯ߣߌ߲ ߊߙߌ߬ߖߊ߯ߟߎ). ߕߐ߮ ߏ߬ ߓߍ߯ ߟߐ߬ߣߍ߲߫ ߗߍ߭ ߞߎߡߊߘߋ߲ ߘߐߙߐ߲߫ ߠߋ߬ ߡߊ߬ ߞߍߢߊ߫ ߁߁ ߏ߬ ߘߐ߫، ߏ߬ ߘߐ߫ ߞߏ߫ ߞߊ߲߫ ߜߘߍ߫ ߕߍ߫ ߛߴߏ߬ ߛߎ߯ ߟߊ߫.

ߏ߬ ߓߐߢߐ߲ߞߏ ߡߍ߲ ߒߞߏ ߘߐ߫ ߣߴߊߙߊߓߎ ߛߓߍߟߌ߫ ߕߴߛߋ߫ ߊ߬ ߢߐ߲߰ ߠߊ߫ ߝߋߎ߫ ߸ ߏ߬ ߝߟߍ߫: { ߗߍ ߗߍ߫ ߗߍ߭ ߗߍ߬. ߗߍ߲ ߗߍ߲߫ ߗߍ߲߭ ߗߍ߲߬. ߗߍ߮ ߗߍ߯ ߗߍ߱ ߗߍ߰. ߗߍ߲߮ ߗߍ߲߯ ߗߍ߲߱ ߗߍ߲߰ }. ߒߞߏ ߕߊ ߥߊߣߍ߲߫ ߞߎߡߊߘߋ߲߫ ߦߟߍ߬ߡߊ߲ ߘߐ߫ ߝߏ߫ ߛߋ߲߬ߧߊ߬ ߁߆ ߟߊ߫، ߊߙߊߓߎ ߘߏ߲߬ ߘߊ߲߬ ߠߋ߬ ߁߁ ߘߌ߫، ߐ߲߬ߤߐ߲߫ ߸ ߏ߰ ߘߌ߬؟

 

߃ߣߊ߲/ ߞߏ߫ ߊߙߊߓߎ߫ ߞߊ߲ ߞߐ߯ߣߍ߲߫ ߸ ߓߊߏ߬ حرف "ض"  [ ߘ߭ߺ ] ߞߟߏߘߋ߲ ߦߴߊ߬ ߞߋߟߋ߲߫ ߠߋ߬ ߘߐ߫ ߘߎߢߊ߫ ߞߣߐ߫، ߝߙߋߞߋ߫ ߕߍ߫ ߸ [ ߋ ] ߣߌ߫ [ ߐ ] ߣߌ߫ [ ߒ ] ߦߋ߫ ߒߞߏ ߘߐ߫ ߸ ߛߊ߬ߓߊ ߏ߬ ߝߋ߲߫ ߕߍ߫ ߊߙߊߓߎ ߘߐ߫، ߏ߰ ߘߌ߬؟

 

߄ߣߊ߲/ ߞߏ߫ ߞߎ߬ߙߊ߬ߣߊ ߟߊߖߌ߰ ߘߊ߫ ߊߙߊߓߎ߫ ߞߊ߲ ߠߋ߬ ߘߐ߫ ߓߊ ߏ߬ ߟߋ ߘߌ߫ ߛߴߊ߬ ߞߘߐ߫، ߞߏ߫ ߊߟߊ߫ ߖߍ߬ߘߍ ߞߊ߲߫ ߞߏ߫: ﴿ ߞߎ߬ߙߊ߬ߣߊ ߣߌ߲߬ ߘߏ߲߬ ߦߋ߫ ߖߊ߯ߓߊ ߟߎ߫ ߡߊ߰ߙߌ ߟߊ߫ ߟߊ߬ߖߌ߰ߟߌ ߟߋ߬ ߘߌ߫ ߛߎߋ߫. ߛߟߐߡߌ߲ ߟߊߒߠߊߒߕߋ ߟߋ߫ ߖߌ߰ ߘߴߊ߬ ߘߌ߫. ߌߟߋ ߛߣߐ߬ߡߍ ߡߊ߬ ߸ ߛߴߌ ߘߌ߫ ߞߍ߫ ߖߊ߬ߛߙߋ߬ߡߟߊ߬ߟߌ߬ߟߊ ߟߎ߬ ߘߏ߫ ߘߌ߫. ( ߊ߬ ߣߊ߬ߣߍ߲߬) ߊߙߊߓߎ߫ ߞߊ߲ ߔߌߦߐߔߌߦߐ ߟߋ߬ ߘߐ߫. ߊ߬ ߘߏ߲߬ ߦߋ߫ ߝߟߐ߫ ߡߐ߮ ߟߎ߬ ߟߊ߫ ߟߍߙߊ߫ ( ߞߘߐ) ߟߎ߬ ߘߐ߫ ߟߋ߬﴾ ߛߞߎ߬ߦߊ߬ߟߊ ߟߎ߬. ߟ. ߁߉߂ - ߁߉߆.

 وَإِنَّهُ لَتَنزِيلُ رَبِّ الْعَالَمِينَ (192) نَزَلَ بِهِ الرُّوحُ الْأَمِينُ (193) عَلَىٰ قَلْبِكَ لِتَكُونَ مِنَ الْمُنذِرِينَ (194) بِلِسَانٍ عَرَبِيٍّ مُّبِينٍ (195) وَإِنَّهُ لَفِي زُبُرِ الْأَوَّلِينَ (196) سورة الشعراء.

ߖߊ߯ߓߌ߫ ߓߘߍߓߘߍ߫ ߛߊ߬ߓߊ߫ ߟߋ߬ ߞߎߡߊ ߏ߬ ߟߊ߫، ߏ߬ ߞߋ߬ߟߋ߲߬ߞߋ߬ߟߋ߲߬ߠߊ ߥߟߊߥߟߊߣߍ߲ ߝߟߍ߫:

ߊ - ߞߎ߬ߙߊ߬ߣߊ ߖߌ߰ߣߍ߲߫ ߊߙߊߓߎ߫ ߞߊ߲ ߠߋ߬ ߘߐ߫ ߝߋߎ߫، ߞߏ߬ߣߌ߲߬ ߟߝߊߙߌ ߟߊߓߊ߲ ߘߐ߫ ߊ߬ ߣߊ߬ ߘߊ߫ ߝߐ߫ ߞߏ߫ ﴿ ߊ߬ ߘߏ߲߬ ߦߋ߫ ߝߟߐ߫ ߡߐ߮ ߟߎ߬ ߟߊ߫ ߟߍߙߊ߫ ( ߞߘߐ) ߟߎ߬ ߘߐ߫ ߟߋ߬. وَإِنَّهُ لَفِي زُبُرِ الْأَوَّلِينَ﴾، ߐ߲߬ߤߐ߲߫ ߊ߬ ߕߘߍ߬ ߝߟߐ߫ ߡߐ߮ ߟߎ߬ ߟߊ߫ ߞߊ߬ߝߊ ߟߎ߬ ߞߣߐ߫ ߊ߬ߟߎ߬ ߟߊ߫ ߞߊ߲ ߠߋ߬ ߘߐ߫ ߓߊ߰ ߊߙߊߓߎ߫ ߞߊ߲، ߏ߬ ߟߎ߫ ߘߏ߲߬ ߕߎ߲߬ ߕߍ߫ ߊߙߊߓߎ߫ ߘߌ߫؟ ߍ߲߬ߍ߲ ߊ߬ ߕߎ߲߬ ߦߴߊ߬ߟߎ߬ ߟߊ߫ ߞߊ߲ ߠߋ߬ ߘߐ߫ ߊ߬ߟߎ߬ ߟߊ߫ ߞߊ߬ߝߊ ߟߎ߬ ߘߐ߫ ߣߴߊ߬ ߡߊ߫ ߞߍ߫ ߊߙߊߓߎ߫ ߞߊ߲߫ ߘߌ߫.

ߒ߬ߓߵߊ߬ ߟߐ߲߫ ߞߏ߫ ߖߊ߰ ߞߎ߬ߙߊ߬ߣߊ ߓߘߊ߫ ߖߌ߰ ߞߊ߲߫ ߜߘߍ߫ ߘߐ߫ ߞߘߐ߬ߡߊ߲߬ ߡߍ߲ ߕߴߊߙߊߓߎ ߞߊ߲߫ ߘߌ߫، ߊ߬ ߘߏ߲߬ ߕߎ߲߬ ߘ ߛߋ߫ ߟߊߖߌ߰ ߟߊ߫ ߞߊ߲߫ ߜߘߍ߫ ߝߣߊ߫ ߘߐ߫ ߡߍ߲ ߕߍ߫ ߊߙߊߓߎ߫ ߞߊ߲߫ ߘߌ߫.

ߋ - ߟߍߙߊ ߘߏ߫ ߕߐ߯ ߞߏ߫ "ߞߊ߲߫ ( ߜߘߍ) ߟߎ߬ ߞߎ߬ߙߊ߬ߣߊ ߘߐ߫" اللغات في القران" ߸ ߊ߬ ߦߴߏ߬ ߘߐ߫ ߞߏ߫: ߌߡߊ߯ߡߎ߲߬ ߛ߭ߊ߯ߝߌ߫ ߣߌ߫ ߕ߭ߓߊ߬ߙߌ ߞߵߊ߬ ߟߊߛߋ߫ ߞߏ߫: ߊ߬ ߝߐ ߊߟߊ߫ ߓߟߏ߫ ߞߏ߫ ߞߎ߬ߙߊ߬ߣߊ ߟߊߖߌ߰ߣߍ߲߫ ߊߙߊߓߎ߫ ߞߊ߲ ߔߌߦߐߔߌߦߐ ߟߋ߬ ߘߐ߫ ߸ ߏ߬ ߞߘߐ߫ ߕߍ߫ ߞߏ߫ ߡߌ߬ߙߌ߲߬ߘߌ߬ ߜߘߍ߫ ߟߎ߫ ߟߊ߫ ߞߎߡߊߘߋ߲߫ ߕߴߊ߬ ߘߐ߫، ߡߌ߬ߙߌ߲߬ߘߌ߬ ߜߘߍ ߡߍ߲ ߠߎ߬ ߟߊ߫ ߞߎߡߊߘߋ߲ ߦߋ߫ ߞߎ߬ߙߊ߬ߣߊ ߘߐ߫ ߸ ߏ߬ ߕߴߛߋ߫ ߓߐ߫ ߟߊ߫ ߞߎ߬ߙߊ߬ߣߊ ߘߐ߫ ߓߊߏ߬ ߞߴߊ߬ߟߎ߬ ߛߎ߲߫ ߕߍ߫ ߊߙߊߓߎ߫ ߞߊ߲߫ ߘߌ߫، ߊߙߊߓߎ ߟߎ߫ ߞߵߊ߬ߟߎ߫ ߘߋ߬ߙߌ߬ ߞߊ߲ ߏ߬ ߟߎ߬ ߝߐ߫ ߟߴߊ߬ ߕߌ߱ ߟߎ߫ ߝߍ߬ ߟߋ߬ ߝߏ߫ ߞߊ߬ ߞߎ߬ߛߊ߲߬ߧߴߊ߬ߟߎ߫ ߟߊ߫ ߸ ߤߊ߲߯ ߞߵߊ߬ߟߎ߬ ߟߊߘߏ߲߬ ߊ߬ߟߎ߬ ߟߊ߫ ߞߘߐߝߐߟߊ߲ ߘߐ߫] ، ߞߎߡߊ ߏ߬ ߟߋ߬ ߞߏߛߐ߲߬ ߣߌ߫ ߊߙߊߓߎ ߡߊ߫ ߞߎ߬ߙߊ߬ߣߊ ߞߊ߬ߙߊ߲߬ ߊ߬ ߕߍ߫ ߛߴߊ߬ ߢߊߦߋ߫ ߟߊ߫ ߡߎ߰ߡߍ߫.

ߌ - ߡߌ߬ߙߌ߲߬ߘߌ߬ ߜߘߍ ߡߍ߲ ߠߎ߬ ߟߊ߫ ߞߎߡߊߘߋ߲ ߦߋ߫ ߞߎ߬ߙߊ߬ߣߊ ߘߐ߫ ߊߟߊ߫ ߖߍ߬ߘߍ ߓߟߏ߫ ߣߴߊ߬ߟߎ߬ ߛߎ߲ ߕߍ߫ ߊߙߊߓߎ߫ ߞߊ߲߫ ߘߌ߫ ߸ ߏ߬ ߘߏ߫ ߟߎ߫ ߝߟߍ߫:

* ߝߘߊ߬ߝߌ߲߬ߠߊ߬ ߤߓߊߛߊ߫ ( ߋߗߏߔߌ߫): ߡߊ߬ߤߌ߬ߣߊ߬ߟߊ ߝߐߘߊ ߟߝߊߙߌ ߆߂ - ߆߄ ߞߏ߫: ﴿ ߣߊߞߐ߫ ߝߌ߬ߟߊ߬ ߜߘߍ߫ ߓߍ߫ ߸ ߡߍ߲ ߠߎ߬ ߕߍ߫ ߝߌ߬ߟߊ߬ ߜߘߍ ߏ߬ ߟߎ߬ ߘߌ߫. ߒ߬ߓߊ߬ ߊߟߴߊߟߎ߫ ߝߌ߬ߟߊ ߡߊ߰ߙߌ ߟߊ߫ ߣߍߡߊ ߢߌ߬ߡߊ߲߫ ߠߋ߬ ߡߊߛߐ߬ߛߐ߬ ߟߊ߫. ߏ߬ ߟߎ߫ ߝߌ߬ߟߊ ߟߊߝߙߌߛߌߦߊߣߍ߲߫﴾. وَمِن دُونِهِمَا جَنَّتَانِ (62) فَبِأَيِّ ءَالَآءِ رَبِّكُمَا تُكَذِّبَانِ (63) مُدۡهَآمَّتَانِ (64) سورة الرحمن. ߟߝߊߙߌ ߏ߬ ߟߊߓߊ߲ ߦߋ߫ "ߡߎߘߑߤ߭ߊ߯ߡߊ߬ߕߊ߯ߣߌ߲ مدهامتان" ߡߍ߲ ߘߌ߫ ߸ ߏ߬ ߕߍ߫ ߊߙߊߓߎ߫ ߞߊ߲߫ ߘߌ߫ ߞߘߐ߬ߡߊ߲߬ ߝߋߎ߫ ߸ ߋߗߏߔߌ߫ ߞߊ߲߫ ߠߋ߬.

* ߙߏߡߍ ( ߦߎߣߊ߯ߣߌ߲): ߛߎߘߐߛߣߍߡߊ ߝߐߘߊ ߟ. ߃߅ ߣߌ߫ ߛߞߎ߬ߦߊ߬ߟߊ ߟߎ߬ ߝߐߘߊ ߟ. ߁߈߂ ߞߏ߫: ﴿ ߊߟߎ߫ ߓߊ߯ ߞߍ߫ ߛߎߡߊ߲ߠߌ߲ ߞߍ߫ ߟߊ߫ ߸ ߊߟߎ߫ ߦߋ߫ ߛߎߡߊ߲ߠߌ߲ ߓߎߟߋߓߎߟߋ ߞߍ߫، ߊ߬ ߣߴߊߟߎ߫ ߦߋ߫ ߖߌߘߊ߲ ߕߊ ߞߍ߫ ߡߊ߲߬ߕߊ߰ ߕߋߟߋ߲ߣߍ߲ ߠߋ߬ ߟߊ߫، ߓߊ ߏ߬ ߟߋ ߞߊ߫ ߢߌ߲߬، ߞߐߝߟߌ߫ ߢߌߡߊ߫ ߘߏ߲߬ ߏ߬ ߟߋ߬ ߟߊ߫﴾.

وَأَوۡفُواْ ٱلۡكَيۡلَ إِذَا كِلۡتُمۡ وَزِنُواْ بِٱلۡقِسۡطَاسِ ٱلۡمُسۡتَقِيمِۚ ذَٰلِكَ خَيۡرٞ وَأَحۡسَنُ تَأۡوِيلٗا (35). سورة الإسراء. ߞߎߡߊߘߋ߲ ߡߍ߲ ߡߊ߲߬ߕߊ߮ ߝߐ߫ ߟߴߏ߬ ߘߌ߫ ߞߏ߫ "ߥߊߖ߭ߌ߬ߣߎ߯ ߓߌߟ ߞߌߛߑߕߊ߯ߛߌ߬" وَزِنُواْ بِٱلۡقِسۡطَاسِ" ߏ߬ ߛߎ߲ ߦߋ߫ ߙߏߡߍ߫ ߞߊ߲ ߠߋ߬ ߘߌ߫ ߡߍ߲ ߕߍ߫ ߊߙߊߓߎ߫ ߞߊ߲߫ ߘߌ߫ ߡߎ߰ߡߍ߫. ߊߙߊߓߎ߫ ߞߊ߲ ߠߋ߬" ߊߟߑߡߌ߬ߖ߭ߊ߯ߣߎ߲" ߘߌ߫" الميزان".

* ߝߙߎߛߎ ( ߌߙߊ߲߫): ߡߊ߬ߤߌ߬ߣߊ߬ߟߊ ߝߐߘߊ ߟߝߊߙߌ ߅߄߲ ߞߏ߫: ﴿ ߊ߬ߟߎ߫ ߛߍ߲߬ߓߍ߬ߣߍ߲߬ ߟߊߟߊ߲ ߠߎ߫ ߞߊ߲߬ ߸ ߏ߬ ߟߎ߬ ߞߣߐߘߐߟߊ ߟߎ߬ ߦߋ߫ ߖߎ߯ߝߊ߮ ߟߎ߫ ߟߋ߬ ߘߌ߫ ﴾. مُتَّكِـِٔينَ عَلَىٰ فُرُشِۭ بَطَآئِنُهَا مِنۡ إِسۡتَبۡرَقٖۚ. سورة الرحمن.٥٤

ߟߝߊߙߌ ߟߊߓߊ߲߫ ߘߊ߫ ߞߎߡߊߘߋ߲ ߡߍ߲ ߡߊ߬ ߊߙߊߓߎ ߘߐ߫ ߏ߬ߘߌ߫ ߞߏ߫ "ߌߛߑߕߊߓߑߙߊߞߎ" استبرق" ߏ߬ ߦߋ߫ ߝߙߎߛߎ ߟߎ߬ ߟߊ߫ ߞߊ߲ ߠߋ߬ ߘߌ߫ ߡߍ߲ ߞߘߐ ߦߋ߫ ߊߙߊߓߎ ߘߐ߫ حرير الغليظ ߤߊ߬ߙߌ߬ߙߎ ߢߊ߫ ߞߎ߲ߓߊߓߊ ߥߊߟߴߊ߬ ߜߟߌߡߊ߲ ߘߌ߫. ߊ߬ ߕߐ߬ ߞߋߟߋ߲ ߠߋ߬" ߛߎߣߑߘߛߎ" ߘߌ߫" سندس" حرير الرقيق ߤߊ߬ߙߌ߬ߙߎ ߢߊߡߌߛߍ߲. ߥߊߟߴߊ߬ ߝߍߡߊ߲ ߘߌ߫.

ߒ߬ߓߊ߬ ߞߎߡߊ ߞߌߛߍ ߦߋ߫ ߡߍ߲ ߘߌ߫ ߸ ߞߊ߲߫ ߠߎ߬ ߦߋ߫ ߢߐ߲߯ ߘߝߊ߫ ߟߊ߫ ߟߋ߬ ߸ ߞߏ߬ߣߌ߲߬ ߝߋߎ߫ ߞߊ߲߫ ߛߌ߫ ߘߝߊߣߍ߲߫ ߕߍ߫ % ߁߀߀ ߟߊ߫.

 

ߞߊ߬ߝߊ ߕߐ߮:   [ ߊߙߊߓߎ߫ ߞߊ߲ ߠߊ߫ ߥߣߊ߬ߦߊ ߡߊ߫ ߒߞߏ ߕߊ ߓߐ߫] ߖߐ߲߬ߡߊ߬ߛߌߣߌ߲ߟߐ߲߫ ߓߟߏ߫. ߤߖߌ߫ ߕߊ߯ ߡߏߙߌ߫.