ߦߏ߫ ߊ߲ ߠߊ߫ ߟߌ߬ߤߟߊ߫ ߕߊ߬ߡߌ߲߬ߣߍ߲ ߠߎ߫ ߞߵߊ߬ ߦߌ߬ߘߊ߬ ߢߊ ߡߍ߲ ߡߊ߬߸ ߖߐ߲߬ߡߊߛߌߣߌ߲ߟߐ߲߫ ߟߊߓߍ߲߬ ߘߊ߫ ߖߌ߲ߘߊ߲߫ ߓߟߋߓߟߋ߫ ߟߋ߬ ߘߐ߫ ߊ߬ ߝߊ߬ߛߏ ߟߊ߫ ߓߌ߬ ߂߀߂߆ ߥߊ߬ߛߌ߬ߥߙߊ ߕߟߋ߬ ߁߈، ߊ߬ ߓߌ߬ߟߊ߬ߛߌ߬ߟߊ߬ ߘߊ߫ ߡߐ߰ ߓߌ߫ ߦߙߌߞߊ߫ ߓߟߏ߫ ߞߊ߬ ߓߐ߫ ߞߊ߲ߞߊ߲߫.

ߕߊ߯ߡߊ߫ ߛߘߍ ߡߍ߲ ߥߟߌ߬ ߘߊ߫ ߞߟߊ߬ߘߏ߲ߛߏ ߟߎ߬ ߘߐ߫ ߓߏ߲߬ߓߊ ߓߌ߬ߟߊ߬ߛߌ߬ߟߊ߬ ߞߊ߲ߡߊ߬߸ ߏ߬ ߟߎ߬ ߓߐ߫ ߘߊ߫ ߖߌ߬ߣߍ߬ ߜߍߞߊ߲ߠߊ ߛߏ߫ ߞߎ߲ߓߊ߫ ߛߌߦߊߡߊ߲߫ ߠߋ߬ ߟߊ߫߸ ߘߏ߫ ߟߎ߫ ߓߐ߫ ߘߊ߫ ߞߐ߰ߖߌ߬ߘߊ ߟߊ߫߸ ߊ߬ ߣߌ߫ ߕߎ ߞߘߐ߫.

ߡߊ߲ߞߏߙߏ߲߫ ߕߎ ߞߘߐ߫߸ ߦߋ߲߬ ߡߍ߲ ߦߋ߫ ߖߊߟߏ߲߫ ߛߏ ߖߊ߲߬ߖߏ߲ ߠߎ߬ ߞߍ߫ ߦߙߐߓߊ ߘߌ߫، ߖߊߟߏ߲߫ ߣߌ߲߬ ߦߋ߫ ߡߌ߬ߛߊ߬ߡߊ߲߰ߠߊ߫ ߡߙߊ߬ߘߊ߬ߙߋ߲ ߠߋ߬ ߘߐ߫߸ ߞߊ߲ߞߊ߲߫ ߡߙߊ߬ߘߊ߬ߓߊ ߞߣߐ߫، ߦߋ߲߬ ߝߊ߫ ߘߊ߫ ߟߋ߬ ߓߌ߬ ߞߵߊ߬ ߓߐ߲߬߸ ߞߵߏ߬ ߞߎ߲߭ ߞߍ߫ ߘߐ߬ߝߐ ߞߣߐ߫ ߞߟߊ߬ߘߏ߲ߛߏ ߟߎ߬ ߘߐ߫ ߓߏ߲߬ߓߊ ߟߊ߫ ߤߖߌ߫ ߟߊ߫ ߕߊ߯ߟߌ ߕߊ߯ߡߊ߫ ߟߊߘߏ߲ ߛߍߥߊ ߘߌ߫.

 

ߞߊ߬ߙߊ߲߬ߝߊ ߣߴߊ߬ ߟߊ߫ ߖߟߊ߬ߡߎ߮ ߣߴߊ߬ ߞߊ߬ߘߊ߲ ߛߌ߰ߣߍ߲߫߸ ߊ߬ ߟߊ߫ ߓߐ߬ߟߐ߲߬ߞߊ߬ ߓߊߥߊ߬ߞߊߟߌ߫ ߞߊ߬ߓߊ ߦߴߊ߬ ߞߍ߬ߙߍߝߍ߬. ߛߏ ߡߐ߰ߓߊ ߟߎ߬߸ ߘߋ߲ߡߌߛߍ߲ ߠߎ߬ ߣߌ߫ ߡߏ߬ߛߏ ߟߎ߬߸ ߓߍ߯ ߟߋ߬ ߓߐ߫ ߘߊ߫.

 

ߡߊ߬ߘߋ߲߫ ߖߋ߬ߟߌ߬ߓߊ ߟߊ߫ ߞߘߊߡߊ߫ ߘߊ߲ߕߍ߯ߟߌ ߟߊߕߎ߲߰ ߘߊ߫ ߞߊ߬ߙߊ߲߬ߡߐ߯ ߛߊ߬ߙߌ߬ߓߎ ߓߟߏ߫ ߢߣߊߓߊ߯ߦߊߟߌ ߟߊ߫߸ ߞߵߏ߬ ߟߊߕߎ߲߰ ߛߞߎ߬ ߘߌߡߊ߲ ߠߎ߬ ߟߊ߫.

 

ߞߊ߬ߙߊ߲߬ߝߊ ߛߙߊ߬ߣߎ߲߬ ߘߊ߫ ߛߏ ߡߐ߰ߓߊ ߟߎ߬ ߟߊ߫ ߛߍߥߊߣߊ߲߫ ߞߊ߲߫ ߦߌߘߊ ߞߐ ߘߐ߫߸ ߞߟߊ߬ߘߏ߲ߛߏ ߞߊ߲߫ ߞߏ߫: <<ߊ߬ ߘߌߡߊ߲߫ ߒ ߧߋ߫ ߢߌ߬ߣߊ߲߬߸ ߞߊ߬ ߓߐ߫ ߤߖߌ ߟߊ߫߸ ߦߊߣߌ߬ ߒ ߧߋ߫ ߛߋ߫ ߘߋ߲ߓߦߊ ߡߊ߬، ߒ ߧߋ߫ ߣߊ߬ ߒ ߕߊ߯ߡߊ߫ ߖߊߟߏ߲߫ ߘߎ߰ߞߟߏ ߞߊ߲߬.>> ߊ߬ ߞߵߏ߬ ߦߌ߬ߘߊ߬، ߞߵߏ߬ ߞߎ߲߭ ߞߍ߫ ߝߊ߬ ߓߘߊ ߞߊ߬ߣߎ߲ ߘߌ߫، ߞߊ߬ߝߊ߫ ߂߀߀ ߛߓߍߓߊ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߘߎ߬ߥߊ߬ߥߎ߬ ߞߟߊߒߞߋ߫ ߞߍ߫ ߖߌ߬ߣߍ߬ ߣߌ߫ ߓߊߕߍ߫ ߣߌ߫ ߖߍ߬ߡߍߙߍ߲߫ ߣߌ߫ ߞߎߣߊߘߎ߯ ߣߌ߫ ߖߊߟߏ߲߫ ߦߋ߫، ߓߊߏ߬߸ ߘߎߢߊ߫ ߓߍ߯ ߡߊ߬ߞߏ ߦߋ߫ ߡߐ߰ ߛߓߊ߬ ߟߊ߫ <<ߟߐ߲ߠߌ߲ߠߊ߸ ߓߊ߬ߣߊ߸ ߊ߬ ߣߌ߫ ߝߊ߰ߡߊ.>> ߏ߬ ߢߊߝߐߟߌ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫: <<ߘߎߢߊ߫ ߓߍ߯ ߡߊ߬ߞߏ ߦߋ߫ ߡߐ߰ ߛߊ߬ߓߊ ߡߍ߲ ߠߊ߫߸ ߏ߬ ߝߟߐ ߟߋ߬ ߟߐ߲ߠߌ߲ߠߊ ߘߌ߫، ߊߟߊ ߞߊߣߊ߬ ߟߐ߲ߠߌ߲ߠߊ ߓߊ߲߫ ߊ߲ ߓߘߊ، ߘߎߢߊ߫ ߓߍ߯ ߡߊ߬ߞߏ ߦߋ߫ ߡߍ߲ ߠߊ߫ ߓߌ߬߸ ߏ߬ ߟߋ ߦߋ߫ ߓߊ߬ߣߊ ߘߌ߫، ߡߟߌߦߐߣߍߙ߸ ߡߟߌߦߊߘߍߙ߸ ߘߎߢߊ߫ ߓߍ߯ ߡߊ߬ߞߏ ߓߴߊ߬ ߟߊ߫، ߊߟߊ߫ ߞߊߣߊ߬ ߏ߬ ߓߊ߲߫ ߊ߲ ߠߊ߫ ߖߡߊ߬ߣߊ ߞߣߐ߫، ߘߎߢߊ߫ ߓߍ߯ ߡߊ߬ߞߏ ߦߋ߫ ߡߐ߰ ߟߊ߬ߓߊ߲ ߡߍ߲ ߠߊ߫߸ ߏ߬ ߟߋ ߝߊ߰ߡߊ ߘߌ߫߸ ߘߎߢߊ߫ ߡߙߊ߫ ߡߊ߲ߛߊ، ߣߌ߫ ߘߎߢߊ߫ ߡߙߊ߫ ߡߊ߲ߛߊ߫ ߕߴߌ ߓߟߏ߫߸ ߌߟߋ ߟߋ߬ ߡߙߊ߬ ߟߊ߫ ߘߋ߬߸ ߌ ߕߴߛߋ߫ ߞߊ߬ ߡߐ߰ ߡߙߊ߬.>> ߊ߬ ߞߵߏ߬ ߦߌ߬ߘߊ߬، ߓߊߏ߬߸ ߊ߬ߟߋ ߕߊ߫ ߖߊ߬ߕߋ߬ ߘߐ߫߸ ߟߏ߲ߟߊ߲ ߦߋ߫ ߣߊ߬ ߟߊ߫ ߛߏ ߣߌ߫ ߖߡߊ߬ߣߊ ߞߣߐ߫ ߡߐ߰ ߛߊ߬ߓߊ ߢߌ߲߬ ߠߎ߫ ߟߋ߬ ߞߐ߫ ߓߊߞߍ߬.

ߊ߬ ߞߎߡߊ߫ ߘߊ߫ ߞߊ߬ ߓߍ߲߬ ߊ߬ ߟߊߓߐ߫ ߞߎ߲ ߡߊ߬ ߛߏ߫ ߡߐ߮ ߟߎ߬ ߓߟߏ߫߸ ߡߐ߰ߓߊ ߟߎ߫ ߞߵߊ߬ߟߋ ߟߐ߬ ߓߐ߫ ߟߊ߫ ߞߎ߲߭ ߡߍ߲ ߠߊ߫ ߞߊ߬ߣߌ߲߬، ߊ߬ ߟߊ߫ ߛߙߊ߬ߣߎ߲ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ <<ߊ߲ ߠߊߓߐ߫ ߘߊ߫ ߟߋ߬߸ ߞߊ߬ߘߌ߬ߛߊ߫߸ ߕߊ߯ ߟߐ߲ߠߌ߲ ߘߏ߫ ߢߌߣߌ߲߫߸ ߌ ߦߋ߫ ߣߊ߬ ߝߊ߬ߛߏ ߘߐߞߣߍߦߊ߫. ߣߴߊ߲ ߕߎ߲߬ ߓߐ߫ ߘߊ߫ ߥߊߘߌ߫ ߢߌߣߌ߲߫ ߞߊ߲ߡߊ߬߸ ߊ߲ ߕߍ߬ߘߍ߫ ߣߊ߬ ߟߊ߫ ߥߊߘߌ߫ ߞߋߛߎ ߟߋ߬ ߘߌ߫ ߓߌ߬ ߞߵߊ߬ ߓߋ߬، ߣߴߊ߲ ߕߎ߲߬ ߓߐ߫ ߘߊ߫ ߝߊ߰ߡߊ߬ߦߊ ߢߌߣߌ߲߫ ߞߊ߲ߡߊ߬߸ ߊ߲ ߣߌ߫ ߖߡߊ߬ߣߊ ߡߊ߲߬ߛߊ ߟߎ߫ ߟߋ߬ ߕߍ߬ߘߍ߫ ߘߏ߲߬ ߠߊ߫ ߖߊߟߏ߲߫ ߞߣߐ߫ ߓߌ߬، ߓߊ߬ߙߌ߬߸ ߊ߲ ߓߐ߫ ߘߊ߫ ߡߎ߲߬ ߞߊ߲ߡߊ߬߸ ߏ߬ ߟߋ ߞߍ߫ ߘߊ߫ ߟߐ߲ߠߌ߲߫ ߢߌߣߌ߲ ߘߌ߫.>>

 

ߡߐ߰ߓߊ ߟߎ߫ ߖߌ߱ ߡߝߊ ߞߏߛߐ߲߬ ߟߐ߲ߠߌ߲߫ ߢߌߣߌ߲ ߞߊߡߊ߲ ߏ߬ ߞߣߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߋ ߞߍ߫ ߘߊ߫ ߞߊ߬ߟߊ ߟߋ߬ ߘߌ߫ ߞߵߊ߬ ߞߍ߫ ߝߊ߬ߛߏ ߢߍ߫، ߞߊ߬ߕߎ߲߯߸ ߊ߬ ߞߵߊ߬ ߟߊ߫ ߞߝߊ߬ ߛߓߍ ߘߊߡߌ߬ߣߊ߬ ߛߊ߲ ߝߐ߫ ߛߙߊ߬ߣߎ߲߬ ߞߋߟߋ߲ ߏ߬ ߟߋ ߟߊߕߎ߲߱ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߛߓߍߟߌ ߘߊߡߌ߬ߣߊ߬ <<߂߀߁߅.>> ߟߋ߬ ߟߊ߫، ߊ߬ ߞߵߊ߬ ߟߊߛߙߋߦߊ߫ ߛߙߊ߬ߣߎ߲ ߏ߬ ߟߋ ߞߣߐ߫ ߌߞߐ߫߸ ߞߏ߫: <<ߊ߲ ߛߋ߫ ߘߊ߫ ߞߊ߬ ߞߊ߬ߝߊ߫ ߂߀߀ ߛߓߍ߫ ߛߊ߲߬ ߛߋߦߌ߲߫ ߞߣߐ߫.>> ߏ߬ ߡߍ߲ ߞߎߡߊ ߝߐߟߌ ߞߊ߬ ߕߍ߯ ߡߊ߲ߞߊ߲ ߓߐ߫ ߞߏߛߓߍ߫.

ߏ߬ ߞߏߛߐ߲߬߸ ߊ߬ ߞߊ߬ ߡߐ߰ߓߊ ߟߎ߫ ߛߊ߲߬ߓߊ߫ ߊ߬ ߟߊ߫ ߞߊ߬ߝߊ߫ ߂߀߀ ߏ߬ ߘߊ߲ߘߐ߫ ߟߊ߫߸ ߞߵߏ߬ ߞߍ߫ ߊ߬ ߓߟߏߣߐ ߘߌ߫߸ ߞߵߊ߬ ߘߌ߫ ߛߏ ߡߐ߰ߓߊ ߡߊ߬߸ ߞߵߊ߬ ߘߌ߫ ߖߊߟߏ߲߫ ߡߊ߬، ߊ߬ ߞߊ߲߫ ߞߏ߫ <<ߒ ߓߐ߫ ߘߊ߫ ߞߏ߫ ߒ ߧߋ߫ ߟߐ߲ߠߌ߲ ߡߍ߲ ߢߌߣߌ߲߫߸ ߊߟߊ߫ ߣߊ߬ ߒ ߛߐ߫ ߟߊ߫ ߟߐ߲ߠߌ߲ ߡߍ߲ ߠߊ߫߸ ߊ߬ߟߎ ߖߍ߬ߘߍ ߟߊ߫ ߘߎ߬ߥߊ߬ߥߎ ߞߣߐ߫߸ ߏ߬ ߟߋ ߞߍߣߍ߲߫ ߜ߭ߊߝߋ ߘߌ߫ ߞߊ߬ ߣߊ߬ ߏ߬ ߡߊߟߐ߬ ߊ߬ߟߎ߫ ߖߍ߬ߘߍ ߟߊ߫.>> ߊ߬ ߞߊ߬ ߞߊ߬ߝߊ ߏ߬ ߟߎ߫ ߘߊ߲߭ߕߍ߰ ߡߐ߰ߓߊ ߦߋ߫߸ ߞߝߊ߬ ߘߋ߲߫ ߣߊ߯ߣߌ߲߫ ߖߊ߬ߕߋ߬߸ ߡߍ߲ ߘߏ߫ ߞߐߜߍ ߥߊߣߍ߲߫ ߝߏ߯ ߞߐߜߍ߫ ߂߁߈߀ ߖߊ߬ߕߋ߬߸ ߏ߬ ߟߋ ߛߎߞߏ ߣߌ߫ ߞߣߍߓߐ ߘߌ߫، ߞߊ߬ ߞߎ߬ߙߊ߬ߣߊ ߖߌ߰ߞߎ߲ߧߊ ߕߎ߲߰ ߏ߬ ߟߊ߫߸ ߏ߬ ߡߍ߲ ߥߊߣߍ߲߫ ߝߏ߯ ߞߐߜߍ߫ ߇߇߀ ߖߊ߬ߕߋ߬߸ ߏ߬ ߛߓߍ߫ ߘߴߊ߬ ߓߟߏ߫ ߕߟߋ߬ ߉߀ ߟߋ߬ ߞߣߐ߫.

ߞߊ߬ߙߊ߲߬ߝߊ ߟߊ߫ ߤߖߌ ߕߊ߯ߡߊ߫ ߟߊߘߏ߲ ߣߌ߲߬ ߞߍ߫ ߘߊ߫ ߛߍߥߊ ߖߍ߬ߘߍߖߍ߬ߘߍ ߟߋ߬ ߘߌ߫ ߖߊߟߏ߲߫ ߞߣߐ߫߸ ߟߐ߲ߠߌ߲ ߞߊ߬ߣߌ߲ ߣߌ߫ ߝߊ߬ ߖߡߊߣߊ ߞߊ߬ߣߌ߲ ߞߏߛߐ߲߬.